الجوكر | للكاتبة Koka Saleh
الـحـلـقـة (6)
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
لايك قبل القراية وتعليق بعد القراية والكلام للكل فكوني مالقراية بدون تفاعل راه والله التفاعل بالايكات والتعليقات هو أكثر شيئ ايحفزني للكتابة وبذات التعليقات الطويلة انحبهن?
وللعلم بس نا نقرا في كل التعليقات ??
“”””””””””””””””””””””””””
وسكر الخط ونا طلعت السيارتي ومشيت شور الشركة واول ماخشيت مكتبي طلبت القهوة وقعدت انشوف في الاوراق والشغل المتراكم لان ليا فترة غايب عالشركة ومن بين الأوراق القيت جريدة وبالصدفة كان اول صفحة فيها أسم وصورة الراجل اللي طلبو مني نقتله
قريت الكلام اللي عليه وكان باين ان شخص اكويس مالكلام وان ايساعد في الناس وداير اعمال خيرية واجد
وقعد فيه صراع في داخلي هل هالكلام حق ولا بس كلام جرائد وإعلام ?
نا انطلب مني كم مرة نقتل أشخاص وقتلت بس ليش هذا بذات جت صورته قدامي وشفت الكلام هذا عليه
عمري مااقتنعت بالصدف وانحس اي شيئ ايصير امعايا فيه رسالة وتنبيه ليا
مافهمتش ليش ديما في كل شيئ لازم ايصيرلي حيرة وشك ?
في داخلي شخصيتين الطيبة والشريرة ومش قادر انحدد نا وين نبي منهن صراع في داخلي عايشة وماحد يعلم بيا
#الحيره
ما أصعب ذلك الإحساس أن تحتار بين أمرين
أو تحتار ف تحديد أمر شخصا ما
فما بالك أن تكون هذه الحيره ف أمر نفسك أو في تحديد مشاعرك
تلك هى دوامه الحقيقة التى يصاحبها توهان من كل شىء ومن نفسك بالذات?
قعدت انفكر ونشتغل في شغلي وانوقع في اوراق يبن موافقة علي صيانة اجهزة وهكي مع رنت تليفوني
(اكيدة اتقولو قصة قصة تليفونه هذا كان يقفله خير?)
بحتت القيته عبد المهيمن استغربت لاني من ساعتين بس كنت امعاه
نا رديت:خير
عبد المهيمن:خير ومرحبا شن جوك توا
نا:تمام شن جوك انت
عبد المهيمن:تمام اكيدة مستغرب اتصالي السريع هذا ?
نا ضحكت:لا عادي ماعندكش مشكلة
عبد المهيمن:الحق حكيت الباتي عالصدفة اللي جمعتنا اليوم واصر عليا انكلمك ونعزمك عالغداء عشان بيتعرف عليك
نا:مانبيش انتعبكم خليها يوم اخرى لان عندي شغل
عبد المهيمن:اي تعب وبعدين باتي مسكر راسه انك اتجي وانت ماتعرفش بعد ايسكر راسه و منها اتشوفلي الكمبيوتر امتاعي له فترة عاطل مش انت اتصين فيهن
نا:باهي تمام انكمل شغلي وانجيكم
عبد المهيمن:توا اندزلك وصف حوشنا في رسالة
نا:تمام
وسكرت ونا مستغرب من كلمات عبد المهيمن كلمة باتي اللي قالها وانوصفلك حوشنا كيف يحكي عليهم هكي وحاسبهم هله معقولة اكويسين امعاه الدرجة معتبرهم هله قعد عندي فضول اني نمشي وانتعرف عالناس هذوما وكيف عبدالمهيمن عايش حياته امعاهم
/
/
كملت شغلي وتوقيع اوراقي وبحتت للساعة القيتها الساعة 1 م قلت جا الوقت نطلع وحنوصل غادي الساعة 1وامعاها خذيت مفاتيح سيارتي وتليفوني وطلعت شفت للعنوان اللي دزه ليا عبد المهيمن ومشيت عالوصف تمام وكان وصف ساهل وكان حوشه أول حوش في الشارع درست قدام الباب ورنيت علي عبد المهين وقتله نا برا وطلعلي وخشيت نا وياه المربوعتهم
عبد المهين:خوذ راحتك الحوش حوشك انخش انكلملك باتي عشان اتعرف عليه
نا:باهي
خش عبد المهين وبعد دقيقتين رد وهو وراجل كبير في العمر قريب عمره 70 سنة وهنا كانت صدمتي ?
هذا بزبط الراجل اللي شفت صورته في الجريدة واللي طلبو مني نقتله?
عبد المهين:وهذا الحاج ميلود باتي
نا حاولت انتمالك نفسي وماانبينش اللي قاعد ايصير جوا في عقلي وسلمت عليه
الحاج ميلود:اهلا اهلا بخي اعبيدة نورت يااوليدي
نا:اهلين بيك ياعمي تسلم
الحاج ميلود:من كثر ماحكالي عليك اعبيدة قتله اعزمه خليني انتعرف عليه
نا:تسلمو عبد المهيمن هذا صاحبي وعشرة طفولة
الحاج ميلود:الحمدلله اللي ربي رد لمكم علي بعضكم وان شاءلله ماعاد اتفرقو
نا وعبد المهيمن:ان شاءلله
الحاج ميلود:دوينا واجد وقبل انسينا الظهر اللي اذن خلونا انصلو جماعة علي ما وتى الغداء
عبد المهيمن ضحك:باتي كان ماصلى في الجامع لازم ايديرلك جامع في الحوش ?
نا ابتسمت?
الحاج ميلود:خشو توضو وتعالو انصلو
عبد المهيمن:نا متوضي وانت يااحمد
نا:لا بنتوضى
عبد المهين:هي انوريك الحمام
طبعا انحطيت في أمر واقع ماعرفتش كيف اندير الحق الصلاة ناسيها لما كنا في الميتم كانو ايعلمو فينا كيفية الوضوء والصلاة بس الكلام هذا قديم و من اول مامشيت برا معش صليت ومعش حد حكالي عالدين وبسبب البيئة اللي تربيت فيها وماكن فيه حد مسلم امعايا كنت مبتعد عالدين واجد حتى مافكرتش اني انتعلم بكل نا مسلم صح بس مانعرفش شيئ عالأسلام خاطي الحاجات البسيطة اللي تعلمناهن في الميتم
خشيت للحمام وسكرت وقعدت نذكر كيف قالولنا انتوضو زمان واذكرت حاجات بسيطة يعني واللي اذكرته درته كنت عارف ان نغسلو الايدين والوجه والايدين مرتين مرة للرسغين ومرة للمرفقين والمضمضة والاستنشاق والاستنثاروغس الوذن مالداخل والخارج وغسل الرجلين بس ماكانت عارف عدد المرات الكل وحدة والترتيب امتاعهن فتوضيت ودرت هذينا كلهن وماكنت متأكد اذا هكي او لا وطلعت من الحمام وجيتهم القيتهم طارحين الصلايات وجيت ورا الحاج ميلود وجنب عبد المهيمن وبدا الحاج ميلود ايصلي بينا
الشعور اللي حسيته ونا انصلي عمري ماحسيته شعور ماينوصفش بالكلمات اصلا كان شعور ملخبط راحة مع خوف مع حزن وفرح ماعرفتش انحدد شعوري بزبط
صوته وهو ايقول في التكبير كان مريييييح بكككل شعور خيالي الدرجة ماحسيتش ان الصلاة كملت لما سلم في الصلاة ونحن سلمنا كان خاطري انقوله هي انعاودوها من جديد
/
/
كملنا الصلاة وطلع عبد المهين من جنبنا
وقعد الحاج ميلود ايهدرز امعايا
اول مرة اتمر عليا شخصية زيه شخص مثقف وعنده دراية بكل حاجة وكمية الطيبة والحب اللي فيه مش عاديات شخص ايمانه بربي قوي بإختصار شخصية نادر جدا تلقى زيها ومعش عرفت ليش هما يبوني نقتله
الحاج ميلود:كيف كانت حياتك برا
نا:عادي يعني بس مختلفة عن هنا
الحاج ميلود:تعرف ان اخطر شيئ طفل ايتربى في بلاد غير بلاده وابعيش مع ناس عاداتهم غير عاداتنا
نا:ليش
الحاج ميلود:لأن هما برغم انهم شعب مثقف ومتعلم ومتحظر اكثر منه وهذا شيئ اكويس لكن لو اتجي تنظر للموضوع بمنظور ثاني حتلقى ان عيشة طفل مسلم غادي غلط برغم ثقافتهم وعلمهم الا هما عايشين بطريقة غير طريقتنا وماشيين علي دين غير دينا مجتمعين عكس بعضهم نحن هنا نمشو حسب الشرع والدين وعندنا عادات وتقاليد متمسكين بيهن وهما غادي يحكمهم قانون بس عكس دينا وكل شيئ مباح ولما يمشي طفل برا من هو اصغير ولو ما كان امعاه حد ايراعيه وايوريه ان هذا حلال وهذا حرام وهذا صح وهذا غلط حيقعد زيهم ولما ايجي هنا مش حيتأقلم نهائي
نا:صح امعاك حق في كلامك
الحاج ميلود:ماتزعلش من كلامي بس نا نحكيلك هكي عشان لما تجوز واتجيب عيال اتخليهم يكبرو في بلادهم ولما يكبرو مافيش باس ايعدو يطلبو العلم برا بس لما يقعدو عارفين كل اساسات حياتهم وعارفين الحلال مالحرام والصح مالخطأ
نا:اكيدة
مع خشت عبد المهيمن وجايب سفرة الغداء وحطها قدامي
عبد المهيمن:هي تفضل كسكسو من ديات الحاجة ماعمرك تنساه
نا ضحكت:اتصدق من بعد ايام الميتم ماعاد كليته
عبد المهيمن:وكيف عايش بلاه هذي احسن اكلة عند الليبين تراث هذا
الحاج ميلود بحت في:شفت كيف هذا اللي كنت نحكيلك عليه تنحرم من ابسط حاجات بلادك
نا ضحكت وبدينا ناكلو وكان الغداء كسكسو علي لحم وطني وعصبان وبطاطة امبطنة والغداء كاين باين ان متعوب عليه كان فيه طعمة غير مش زي اي طعمة ممكن لان كان فيه لمة علي سفرة مش متعود عليها
طول عمري قضيته ناكل في المدرسة سريع سريع لان مافيش وقت وفي الجامعة كله جاهز ومطاعم ولما رديت عند جابر ماجمعتنيش بيهم اي صفرة?
ماحسيتش روحي مع ناس اليوم اول مرة انشوفهم حسيت روحي مع هلي ايوا هلي وعرفت ليش عبد المهيمن ايقول هكي
الطيبة والحن اللي فيهم كنت قادر انحسه في الحوش عندهم كأني انشم في بنت الطيبة وبنة الناس الأصيلة?
كملنا الغداء وكليت وكله ماعمري كليتها وبعد الغداء جابلنا عبد المهيمن طاسة شاهي خضرا مديورة مالقلب
وقعد الحاج ميلود ايهدرزلنا علي ايام زمان وعلي شبابه وان كان عنده عيلين وتوفو هما الاثنين في حادث وهما امعاه وماتو قدام عيونه انصدمت كيف قادر ايتحمل بعد هذا كله
راجل كان عنده كمية ايمان وتقوى ورضى بحكم ربي غريبة طول ماهو يحكي ونا منسجم الكلامه ونسمع فيه بقلبي قبل وذاني ?
كان يحكي عالبلاد وإن خايف عليها مالخراب والدمار خايف ان يكثرو فيها العصابات والناس اللي مش كويسة وتدمر ?
عرفت عبد المهيمن منين جاب كل هالوطنية اللي عنده
طبيعي كيف بيطلع لما ايربيه شخص زي هذا
حسدت عبد المهيمن عليه وتمنيت لو ان تبناني نا كانت حياتي متغيرة 180 درجة عن توا
من كثر ماخذاني الوقت امعاه وكيف كنت منسجم الهدرزته شفت للساعة القيتها 4 صبيت واستأذنت منهم عشان عندي شغل وطلعت وركبت في سيارتي وامعاي عبد المهيمن وطلع في جرتنا الحاج ميلود
الحاج ميلود:اعتبر هذا حوش هلك لاخر ولازم تقعد اتجينا ديما
نا:حاظر
سلمت عليه وطلعت ونا مقهور كيف يطلبو مني نقتل شخص زي هذا وشن السبب هو طيب ومش مأذي حد ليش بيتخلصو منه وشنو الخطورة اللي مسببها الهم
خذيت الطريق كلها في حيرة كيف نقتله مانبيش نقتله هذا شخص ماايتعوضش وخسارته خسارة كبيرة تخيلت لو ان اللي في الدنيا كلهم زيه شن حيكون شكل الحياه
أكيدة حتقعد جنة
شخص كان قادر ان يعطيك طاقة إيجابية وإن ايحببك في الحياة لو مهما مر عليك فيها
وقعدت حاير كالعادة مابين نقتله ومابين لا
أحمد اللي في داخلي مايبينيش نقتله لأن حس بمدى ان هو شخص كويس
والجوكر يبيني نقتله لان يبي القوة والقوة اللي طالبها مش حيحصلها إلا مع المنظمة وإن ايلبي كل طلباتهم
كان صراع في داخلي بين شخصيتين عكس بعضهن شخصيتين هما داروهن ليا حكمو ان انعيش عمري كله في حيره
رغم اني قررت نقتل أحمد اللي في داخلي عشان نقعد قوي بس أحمد مش راضي ايموت ومش راضي يسكت علي شيئ ولا راضي علي أي شيئ اندير فيه توا
أما الجوكر فهو يكره أحمد وزي مايقتل في كل حد خاطره يقتل أحمد بس ماقدرش عليه رغم قوته ?
ونا في قمة تفكيري رن تليفوني وشفته القيته العيساوي ورديت عليه
نا:ايوا
العيساوي:فيه موضوع عرفته توا ياجوكر ولازم انت تعوفه
نا:موضوع شنو
العيساوي:راشد ولد جابر
نا:كنه
العيساوي:يبي يخطفك ويقتلك
نا:شنو وكيف عرفتها انت
العيساوي:توا كنت مع منعم درويش ومراد في الشارع وانت عارف كلنا في نفس الطريق
نا:باهي كمل
العيساوي:جا المنعم درويش ومش عارف من داله عليه وخذاه علي جنب وقاله ان يبيه يخطفله واحد ويدفعله اللي يبيه ولما منعم قاله تبيه خطف وبس قاله لا نبي نقتله فطلب منه 6الاف وهو وافق ولما عدى جاني منعم وحكالي وقالي تمشي امعايا ونقسمو الفلوس بالنص وسألته من بيخطف قالي اسمك
نا ضحكت:يعني راشد بيقتلني
العيساوي:مايقدرش ياجوكر وراك رجالة راه
نا:أسمع اللي انقولك عليه ونفذه بالحرف
العيساوي:تمام
نا :انتم اخطفوني زي ماايقوللكم ووين ماايحددلكم المكان تمام وراه ماعندش اسلاح فاكيدة عشان يقتلني حياخذ منكم اسلاح نبيكم الي تعطوه له اتفضوه مالطلق
العيساوي:وافرض جاب امعاه اسلاح
نا بعصبية:فضوه ولا بدلوه له بواحد اخرى فيه كاتم اصرفو ديرو راي عاد
العيساوي:تمام تمام كون هاني واللي تبيه ايصير كله وسكر
ونا قعد خاطري نعرف كيف راشد يبي يخطفني وشنو الخطة اللي دايرها وقعدت انفكر في شكله بعد تفشل خطته ?
قررت انروح للفيلا مع ان عمري ماجيتها في الوقت هذا
لاني كنت انتعامل مع الفيلا معاملة فندق انجيها في الليل نرقد ومالصبح نطلع
وصلت للفيلا وخشيت ورقيت الداري تلاقيت مع تسنيم في ممر الديار
تسنيم ابتسمت;شن جوك
نا:تمام شن جوك انتي توا
تسنيم:تمام بكككل مافيش احسن من هكي راحة
نا:باهي تمام
تسنيم:شن رايك تعزمني عالغداء برا
نا:بس توا مش وقت غداء خلاص
تسنيم:باهي علي نسكافيه حلو اي حا بنطلع ماله بكل
نا:باهي تم اندوش وناخذك
تسنيم بفرحة:معناها انوتي روحي علي ما طلعت
نا:تمام ومشيت شور داري ونا انفكر في تسنيم اللي ماسألتنيش شن درت للتليفون وواثقة فيا ان اكيدة حرقته بحتت للتليفون القيته مازال امعايا وطبعا انسيت اني نحرقه زي ماقلتلها
خشيت للحمام ودوشت وطلعت غيرت ادبشي وكنت بنطلع تسنيم وكنت نضحك علي روحي وكيف وافقت اني انطلعها تي انا عمري مادهورت روحي بندهورها هي
موضوع البنات واي شيئ ايخص البنات سكرته من بعد اللي صار في الملهى الليلي وماليوم هذكي قررت نقطع اي علاقة باي بنت واني نبتعد علي جنس حواء تماما
بس مع تسنيم ماقدرتش كنت انحس تجاهها في شعور أخوي حلو فمقدرتش تطلب مني هالطلب ونرفضه خصوصا بعد عرفت معاناتها مع هلها ?
جيت بنطلع مالدار جتني رسالة وشفتها القيتها من العيساوي وكاتبلي فيها كيف بتم طريقة خطفي ضحكت وطلعت مالدار وكنت ماشي شور دار تسنيم عشان انقوللها هي تلاقيت مع راشد هلبته وكملت طريقي الدار تسنيم وقعدت بلعاني انادي في تسنيم بصوت عالي بنقهرة
(عارفهن حركات اعويلة اصغار بس لان هو عقله هكي بنمشيه بجوه ?)
راشد:أحمد
لفيت عليه وهزيت براسي بمعنى كنك
راشد:نا أسف علي كل شيئ درته امعاك من نحن اصغار لعند توا
نا:وشن خطرلك توا ?
راشد:هكي حسيت روحي بيختها وحاب نفتح امعاك صفحة جديدة وانتعاملو انك خويا ونا خوك
نا ماسك ضحكتي بالغصب عشان عارفه يكذب ومافيش احلى من لقطة تقعد داير روحك عبيط وانت زارق عالموضوع كله
نا:تمام ماعندكش مشكلة ماكأنه صار شيئ بينا
راشد:اكيدة
نا:اكيدة
راشد:معناها اثبتلي حسن نيتك واقبل عزومتي عالكافي وانهيجو اشوية وبعدها ناخذك انعرفك علي شلتي
نا:مرة اخرى ياراشد توا بناخذ تسنيم بتغير جو وبعدها عندي شغل
راشد:معناها مازال زاعل مني
نا:لا مش زاعل قتلك الجو تمام
راشد:كان الجو تمام تقبل
نا:وتسنيم اللي وعدتها بناخذها
راشد:اجلها البكرا
مع طلعت تسنيم من دارها
تسنيم:نا وتيت
راشد:لا تسنيم ماايصيرش منها مشيتكم اليوم احمد بيمشي امعايا
تسنيم بزعل:بس هو قال بياخذني
نا:نوعدك بكرا ناخذك توا بنطلع مع راشد
تسنيم:باهي خوذوني امعاكم
راشد بعصبية:ماشيين الاصحابي ناخذك امعايا الاصحابي
نا:خلاص قتلك وعد بكرا ناحذك
تسنيم:وعد وعد تمام
نا:تمام بكرا ناخذك وركزت علي ملامح راشد وكان هازي لان كان مخطط بيقتلني ?
راشد:هيا نمشو
نا:هي
وطلعت امعاه وركبنا في سيارته ومشينا وفي الطريق وقفن قدامنا سيارتين ضربو راشد ونزلوني وخذوني وفطنت الراشد وهو ايعيط عساس راه عصابة وخطفتني والناس مصبية وماحد قادر ايدير شيئ كلها خايفة
وطبعا فيلم الاكشن اللي دايرة راشد عشان ماحد يفطنله ولا حد ايشك فيه لما يقتلوني خطة عبيطة زيه?
وجعني ان تعب روحه وفكر فيها?
حذوني المكان قديم زي الحوش المهجور وربطوني عاد زي ماهو طالب وقعدت انخرف مع الشباب وهكي لعند قريب ساعة وبعدها فطنو السيارة راشد جت وخش وهو فارد صدره عساس راني داير انجاز واول كلمة قالها ليا
راشد:صار مااتخلينش انحطك في راسي عشان ماانتعبكش
نا بحتت فيه;ومازلت عند كلامي
راشد ضحك:انت مش شايف روحك كيف مكتف قدامي زي الحولي اللي بيذبحوه واخرى مازال عندك دوه
نا:وعمري مانسكت ولا اللي زيك ايحركو فيا شعره
راشد قعد يضحك بصوت عالي
نا:تهيالي ماقلتش نكته ?
راشد:كلامك ايضحك تي حق منظرك كيف مكتف قدامي
نا لفيت وجي للجنب ومعش بحتت فيه
راشد قرب ومسكني من شعري:اجداني وتوسلي عشان مانقتلكش
نا:في حلمك انديرها ولا انقولك حتى في الحلم ماتحلمش بيها عشانها بعيده عليك
راشد عطاني بوكس علي فمي حسيت بدم علي فمي رقتلي بككل خششت الدم بلساني جوا ودفلته عليه ?
راشد رقتله مالحركة وبعصبية:اليوم هذا اخر يوم في عمرك مدولي المسدس ومدله العيساوي المسدس وحطه علي راسي
راشد:مش ولد جابر ال– واحد زيك يطاول عليه
نا:انت راجل اقتلني
راشد:توا انوريك اني راجل غصبن عنك وضغط علي زناد المسدس لكن كان فاضي مافيش رصاص ?
قعد يضغط ويضغط وايعيط هذا كنه ماضربش
نا طبعا كانو رابطيني ربطه خفيفة فكيتها ومسكته وهو ايعيط
راشد:امسكوه امسكوه كيف خليتوه ايفك روحه
نا مسكته من ارقبته:مش نا يا —- اللي يندارلي هكي تي هذوما ارجالي كلهم ياامهبع
راشد ابعيط:والله نحكيها الباتي انت واحد مجرم انت ارهابي
نا:قوله باتك مش خايف منه كان تبي انكلمه لكي توا وشوف شن ايقولك
العيساوي:هاك مسدسك
نا خذيته منه ودفيت راشد تحت وسحبت المسدس والعيساوي واللي امعاه حاوطو راشد بسلاحهم وكلهم مصوبين عليه
نا:اليوم هذا اخر يوم في عمرك ياراشد الكلب
راشد:لا لاااا ماتقتلنيش مازالت نبي انعيش
نا:مش توا داير روحك راجل وبتقتل
راشد:اسمحلي والله ماعاد انعاودها
نا:مش حتعاودها لانك مش حتعيش أصلا
راشد يبكي ويجدى اني مانقتلش وعيساوي قعد ايصور زي ماوصيته
نا: لالا مش عاجبني مازال ماقنعتنيش
راشد يبكي:شن انديرلك عشان تقتنع
نا:انبح
راشد بحت فيا
نا :كان ماتبيش اشهد علي روحك
راشد:حاظر حاظر وقعد ينبح وعيساوي ايصور فيه وباقي الرجالة يضحكو عليه
وبعد شفطنا عليه اشوي ووريته الفيديو السمح اللي درناه له كنت لازم انخليه ايحس بيدي وبقوتها عشان معش ايحاول يطلع في طريقي مسكته ووعطيته بوكسين خلنه يفقد الوعي وطلعنا وسيناه طايح
/
/
عطيت الرجالة حقاتهم ومشيت الكافي كسدت فيه اشوي وكل همي اني بننسى مهمة القتل اللي عندي نبي انحاول نبعد عالصراع اللي في داخلي لاني تعبت منه بس مافيش فايدة من دون ماانحس نلقى روحي سارح وانفكر في الموضوع مش مقتنع اني نقتل شخص زي هذا وفي نفس الوقت مش قادر نرفض لان لو رفضت نا اللي حنموت ?
انقول ياريت لو ايكلموني وايقولولي معش تقتله وقعد عندي امل ان الشيئ هذا ممكن ايصير
صبيت وطلعت مالكافي ونا هالك واصل حدي ساهر امس الليل كله وفوقها اليوم كان يوم متعب والتفكير زاد هلاكي وصلت للفيلا خلاص طافي بكككل بنرقى الداري ونرقد دغري
خشيت القيت جابر في الصالون كنت باطل وجيت بنرقى من غير ماانقول خير
جابر: حتى الجبانة يطلقو عليها في السلام
نا:خير ومعليش طافي بكل مافطنتلكش
جابر:شن صاير امعاك
نا:شيئ شغل وتعب بس
جابر:قالولي جيت اليوم للشركة
نا:اها كان فيه شغل موقف عشاني مشيت نهيته
جابر;كنك ماجيتني في المكتب
نا:كملت شغلي وطلعت دغري
جابر بصوت واطي:كلموك علي بكرا
نا:اها
جابر:علي قصاد العشاء لان يقعد ماشي للجامع
نا:باهي
مع خشت راشد وكان اثار الضرب باين علي وجه
جابر صبى وبصوت عالي:من اللي دار فيك هكي
نا بحتت فيه ومسكت تليفوني ونظرة امتاع تحكي المقطع ينتشر ?
راشد:مافيش تعاركت نا وصاحبي
جابر:من من صاحبك وكيف يجرا وايديرلك هكي
راشد:مشكلة عادية وخلاص انحلت
جابر: اي عادية شوف وجك هي هي خلينا انبلغو فيه
راشد:لالا لا بلاغ لا شيئ قتلك صاحبي
نا:من اصحابك قولي بس وتوا انتفاهملك امعاه
راشد:صاحبي ماتعرفوش
راشد:كان ماتبيش تمشي اتبلغ احكي الاحمد عليه وهو يصرف امعاه
نا:قولي من وماعليك فيه انخليه ايجي ويعتذرلك وماسك تليفوني وانأشرله علي من ورا جابر
راشد:خلاص ياباتي توا انقول عليه الاحمد ايتفاهم امعاه
جابر بحت فيا:شوفه من وتفاهم امعاه بطريقتك
نا:خلاص تم موضوعه انتهى هي يراشد وحطيت يدي ورا كتفه ورقيت نا وهو فوق ولما رقينا قعدت الدروج كلهن نضحك وراشد مش قادر لا يحكي ولا ايحط عينه في عيني
نا:بس صوتك سمح وانت تنبح
راشد:انت شن تبي مني
نا:مش نا اللي نبي منك انت اللي تطلع في طريقي بروحك ومن زمان
راشد:باهي امسح المقطع ومعش نطلع في طريقك
نا حطيت ظهر يدي علي خده وخبطته خبطتين
نا:اتحق فيا غبي عشان انصدقك يااااا شاطر
راشد:ونا شن يضمنلي انك ماتنشرش الفيديو
نا:دبينك قاعد عاقل وفي حالك وامخطيني ونا فايتك لكن ياراشد لو حاولت تلعب امعاي اي لعبة مااتلوم الا روحك
راشد:خليك راجل واقعد عند كلامك
نا بحتت فيه:نا راجل وغصبن عنك وبعدين مش نا اللي انقول كلمة وانرد فيها يارشودة وقرصته في خده ومشيت ونا نضحك خشيت للدار ونا فرحان اني واخيرا رديت حقي اللي من راشد ومتأكد ان توا مايقدرش حتى يرفع عينه في عيني خلاص واطيته وكسرت عينه
الشعور بالقوة والانتصار علي عدوك شعور حلو وبذات اذا كان عدوك من طفولتك
بعد اللي درته في راشد ضمنت ان حول من طريقي نهائي وان حقي ردلي ومازال الدور بيجي علي كل من ظلمني وحرمني انعيش حياه طبيعية زي الناس
تمددت عالسرير ونا معش بنفكر في شيئ لاني تعبت من كثر التفكير غمضت عيوني ونبي ننسى العالم اللي نا فيه ولاني كنت تاعب وباطل دغري خذاني النوم ورقدت?
/
/
/
وعيت في الصبح كالعادة دوشت ولبست ونزلت بنمشي للشركة تلاقيت مع جابر تحت
نا:صباح الخير
جابر:صباح النور ماشي للشركة
نا:اها
جابر:باهي حاول مااطولش لان اليوم حمزة بيروح
نا:جاي زيارة ولا كمل قرايته
جابر:لا كمل قرايته واليوم لازم نستقبلوه كلنا مع بعضنا في المطار وانخلوه ايتريح وبكرا بنديروله حفلة وعشاء كبير علي جيته
نا:تمام وطلعت
بصراحة كنت حاسد حمزة مش عشان باته جابر لان ماحد عنده عقل ايتمنى يقعد عنده أب زي جابر لكن عشان عنده هل مهتمين بيه وبقرايته ورجوعه
ركبت في سيارتي وطلعت شور الشركة جيت غادي بحت للشغل ووقعت كم ورقة وطلعت بندير لفة علي مكاتب الطباعة والبحوث اللي برا الشركة وانشوف الالات ولو فيه آله تبي صيانة وانشوف الشغل كيف ماشي وفي الحقيقة نا كنت نبي اي شيئ يلهيني عشان ماانفكرش في موضوع قتلت الحاج ميلود ?
طبعا كانن اكثر من 10 محلات وكل واحد في حي وفي منطقة معينة ولفيت علي ثلاثة كان الشغل ماشي تمام وجيت للرابع وهذا كان اكبر محل فيهن وفيه اكثر من موظف خشيت درت دورة عالموظفين وشغلهم وبعدين خشيت الغرفة جوا حاطين فيها آلات يبن صيانة شفتهن وشيكت عليهن وعرفت أعطالهن ووقعت علي طلب صيانتهن وعطيت الطلب للموظف اللي خش امعايا عشان ايدزه للقسم وطلعت بنروح بس وانا ماشي شور باب المكتب اللي يفتح برا لفت انتباهي صوت وحدة
#يتبع
قولكن من اللي صوتها لفت انتباه أحمد هل صوتها مار عليه ولا وحدة فيه بينها وبينه معرفة قديمة او شيئ أخرى نحن مازال مانعرفوش?
وقولكن احمد كيف حيصرف في طلب المنظمة هل حيوافق يقتل الحاج ميلود او حيرفض ?
كله حنعرفوه في الحلقة الجاية ☺
تصميم الصورة اليوم من غلاتي #أنين_الصمت?
أسفة لو فيه لخبطة في الأسماء وأكيد رأيكن ايهمني ?
گـتـابـتـي Koka Saleh