الجوكر | للكاتبة Koka Saleh
الـحـلـقـة (1)
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
كلكن سمحاتي لايك قبل القراية وتعليق بعد القراية
“”””””””””””””””””””””””””
نزلت ونا انبحت ومش مصدق المنظر اللي قدامي
ومن المكان هذا بدت قصتي
/
/
/
قعدت امصبي وانبحت في الحوش زين وكيف هو كبيررر وعالي بكككل وفي اللحظة هذي الراجل حكالي
جابر:شن رايك في حوشك الجديد يا أحمد هكي اسمك صح
نا:اها هكي
جابر:باهي شن رايك في الحوش
نا:سمح بككل وكبييير بككل
جابر:باهي هي خش عشان انعرفك علي خوتك اللي جوا
بعد حكالي هكي بحتت فيه زين لان اول مرة تنقالي كلمة هكي وتبو الحق قعد قلبي ايدق بسرعة بكككل وخشيت نا وهو جوا وكان المكان من جوا احلى من برا بواااجد كله أثاث سمح ولونه ذهبي الارضية الدروج الثريا اللي فوق كل شيئ يلمع وسمح ?
وانا قاعد انبحت فوق وتحت وايمين وايسار نزلت وحدة مالدروج كاااانت دبة اشوي بس سمحة? لكن لما وصلت فينا ماسلمتش عليا وقالت كلمة وحدة
سناء:درت اللي في راسك يعني
بس في اللحظة هذي جابر بحت فيها زين وقاللها
جابر:سلمي علي أحمد
مدتلي سناء يدها وبعدها عدت وسيبتنا وقعدت نا وجابر بروحنا
جابر :تعال قمعز هنا
ومشينا قمعزنا عالصالون كان عالي بكككل الدرجة كرعيا مش واصلات في الوطى قعدت نلعب وانهز في كرعيا وانبحت للحوش الكبير اللي كله تحف وحاجات سمحة بعد اشوي جتنا وحدة جايبة صفرة فيها فنجال قهوة وكباية عصير وامعاهن شكولاطات واجد ونا كنت انحب الشكولاطات بكككل ??
جابر:هي تفصل كول
خذيت كباية العصير وفتحلي جابر طرف شكولاطة وقعدت ناكل فيه في نفس اللحظة هذي خشو ثلاث أطفال صغار كانو من عمري او اصغر مانعرفش بزبط بس كانو عيلين وبنت
خشو يجرو وخذاهم جابر بالحظن
جابر:كيف كان الدرس وسمعتو للشيخ اليوم ولا لا
حمزة:اها سمعنا وانا وتنسيم سمعنا كويس بس راشد لا
جابر:وليش يابابا ماسمعت للشيخ
راشد :ماعرفتش نحفظ بروحي وحمزة مابش ايحفظني
حمزة:والله يكذب يابابا نا قتله انحفظك هو مابش يحفظ
جابر:عيب يا حمزة اتقول علي خوك كذاب وخلاص نا اليوم انحفظه الصورة تمام ياراشد
راشد:تمام
جابر:سلمو علي احمد هذا حيقعد خوكم من يوم وغادي
نا نزلت مالكرسي ومديتلهم يدي وهما الثلاثة قعدو ايبحتو في بعضهم زييين وبعدها راشد وتنسيم رقو يجرو وحمزة مدلي يده وسلمت عليه
جابر:شاطر ياحمزة وماتزعلش يااحمد غير مازالو مايعرفوكش
نا مارديتش وسكتت وحمزة قدامي وايبحت في زين وبعدين قالي
حمزة:هي تلعب امعايا في داري
ودغري وافقت ورقيت نا وياه فوق وكانت دار كبيرة وفيها جزء خاص بالألعاب وفيها كل الالعاب مافيش لعبة ماعندش وقعدت نلعب نا وياه
بعد اشوي هكي خشت علينا سناء
سناء: حمزة تعال نبيك
حمزة: حاظر وصبى وطلعو مالدار
وانا قعدت نلعب بسيارة الشرطة وكان كل حلمي ان بعد نكبر نقعد شرطي ?
واذكرت يوم اللي عاقبونا نا وعبد المهيمن عشان حكينا ونحن ناكلو ?
في يومها طلعونا للساحة ودرنا وجهنا للساس وقعدنا مرفعين ايدينا وكل واحد مرفع كراع نذكر اليوم هذكي كملناها نضحكو ونحن متعاقبين مش عارف ليش يومها سألني عبد المهيمن سؤال غريب ومش وقته ونحن في عز الضحك قالي
عبدالمهين:شن بتقعد لما تكبر
نا ضحكت وقتله:بنقعد شرطي
عبدالمهين:عليش شرطي
نا:عشان انساعد اللي هنا كلهم وانعاقب اي واحد ايعاقب فينا وعشان وسكتت
عبد المهيمن:شن اخرى
نا:عشان اندور علي أمي
عبد المهيمن:وكيف بتلقاها امك
نا :مش عارف بس اللي عارفة ان الشرطي هو اللي يقدر ايدور ويعرف اي حاجة
عبد المهيمن:عارف نا شنو بنطلع
نا:شنو
عبد المهمين:نبي انبيع مسدسات وبنادق زي الفيلم اللي شفناه يومتها
نا انصدمت:بس في الاخير الشرطة مسكاته
عبدالمهيمن:بس كانو كلهم ايخافو منه ونا نبيهم كلهم ايخافو مني وبعدين انت بتقعد الشرطي مش حتحبسي صح
نا ضحكت وقتله:صح ?
/
/
/
في اللحظة هذي نا نزلت مني دمعة ? والغريب ان مش من طبعي نبكي لكن حسيت روحي رايف علي عبد المهمين ومعز وكيف بنقعد بلاهم ?
مسحت دمعتي ورديت نلعب بسيارة الشرطة ونا انتحيل في روحي لما نكبر راكب فيها ونا نلعب هكي خش حمزة وقالي
حمزة; نا نبي نقرا خوذ السيارة والعب بيها برا
نا:باهي وطلعت بس ماخذيتش السيارة امعايا مش عارف ليش ماخذيتهش بس وجعتني لقطة حمزة
صح نا كنت اصغير بس فيه مواقف نفهن وانحسهن يعني زي مااتقولو عقلي كان اكبر من عمري
طلعت وشفت سناء مصبية قدام دار حمزة بحتت في بنظرة كلها حقد خطرة عليا من نظرة المربية عندنا في الميتم أسمها نورية كنا انقولو عليها عزوز القايلة علي قد ماكانت اتخوف فينا واتعاقب فينا ماكانتش اتحب حد منا بكل
بحتت فيها وبعدين نزلت نحساب جابر مازال تحت بس مالقيتش قمعزت علي نفس الكرسي اللي قمعزني عليه جابر وقعدت سارح وانفكر هل كل اللي يطلعو مالميتم ايجو الناس هكي ويقعدو مش مقبولين بينهم زي ما انا مش مقبول هنا باهي هما ليش ياخذو فينا مالميتم وهما مايبونش قطع تفكيري صوت راشد وهو ايقولي
راشد;حول من عا الكرسي
نا:قمعز امعايا اهو واسع
راشد:لا مانبيش انقمعز نبيك اتحول من علي كرسينا ?
نزلت مالكرسي وعطيته له وكان فيه صالون اخرى مصادر قمعزت عليه لحقني راشد لما قمعزت
راشد:حتى هذا كرسينا حول من عليه
نا:وين تبيني انقمعز
راشد:مانبيكش اتقمعز اطلع من فيلتنا كلها نحن مانبوكش هنا
نا:جابني عمي جابر مانقدرش نمشي نين هو ايردني
راشد قعد ايدف فيا وايقولي اطلع اطلع لعند طلعني برا الباب وسكر عليا
فكرت نطلع ونمشي للميتم بس ماكنتش نعرف المكان وخفت نمشي بروحي وخصوصا ان الوقت كان قريب مالمغرب فقمعزت قدام الباب مش عارف في شن كنت نرجى بس قمعزت وخلاص
نذكر يومها طولت وانا برا ظلم الظلام والجو بدا ايصقع ونا مقمعز والباين ان فات وقت طويل ونا مقمعز الدرجة اني نعست ونا مقمعز برا ومافطنتش الا لما وعيت علي صوت جابر وهو ايقولي
جابر:احمد احمد شن رقدك هنا
نا فتحت عيوني وقعدت انحك فيهن
(جيت بنقوله راشد طلعني لكن نا ماانحبش نقعد فتان)
نا:طلعت نبي انشوف الجنان والباب اسكر عليا هنا
جابر:باهي هي خش امعايا
وصبيت وفتح الباب بالمفتاح وخشينا
جابر:وروك دارك
نا:لالا
جابر:تعال انوريها لكي
مشيت امعاه وكانت في نفس المكان اللي فيه ديار عياله فتحلي باب الدار كانت دار كبيرة وسمحة وفيها سرير علي شكل سيارة وكان فيها العاب واجد
كنت انبحت فيها ومش مصدق هذي داري
جابر: خش ارقد وتريح هنا وطلع
دغري مشيت للسرير بسرعة دوبك سلحت كندرتي ولفيت روحي يالورغان زين كنت مصقع بكككل واول ماسخنت رقدت دغري
/
/
/
وعيت في الصبح بطريقة غريبة بكككل اول مرة نوعى بيها حسيت بمية مصقعة انصبت عليا فتحت عيوني والقيته راشد ماسك كاس مية وايصب فيه عليا شعور الغضب اللي حسيته في اللحظة هذي اول مرة انحسه هو طلع يجري مالدار ونا صبيت بسرعة بنلحقه وطلعت مالدر نجري مسكتني سناء برا
سناء:وين ماشي
نا كنت معصب بكل:نا راقد وراشد قعد ايصب في امية عليا
سناء بعصبية:وطالع في جرته بتضربه
نا بنرد وهي مسكتني من وذني زين
سناء بعصبية:أسمع انحقك قارب واحد من عيالي ولا جاي شورهم مش حتحق خير وحندير فيك اللي عمرك ماشفته وتوا تمشي تنتلف وتقعد في دارك ومانبيش انحقك برا بككل ودفتني في الدار وسكرت الباب
قمعزت عالسرير ونا خاطري نبكي بس ماتعودتش نبكي حتى بيني وبين نفسي ماكنتش انحب نبكي حتى في الميتم اوقات كنت انتعارك مع عيال ويضربوني بس ماكنتش نبكي بكل
قعدت امقمعز عالسرير وبعدين صبيت للدولاب فتحته القيت فيه دبشي طلعت تيشرت وحولت التيشرت اللي عليا عشان كان مليان امية وخذيت المخدة اللي عاسرير وفتحت الروشن وحطيتها فيه
وقعدت انلم في سريري اصلا متعودين في الميتم ان اللي يوعى ايلم سريره ?
وبعدها جيت للألعاب وقعدت انتفرج عليهن لكن قعدت انحس بالجوع اصلا من كباية العصير والشكولاطة اول ماجيت معش كليت شيئ بس قعدت نلهي في روحي باللعب بالك ننسى اني جيعان
مر الوقت بشويش ونا كل اشوي ايزيد امعاي شعور الجوع انفكر نطلع وبعدها نذكر سناء وكلامها انخاف ونا قاعد وحايس بين تفكيري نطلع ولا لا انفتح الباب وخشت عليا تنسيم جايبة في يدها خبزة ومدتها ليا ولما بحتت القيته نص جبنة شرائح وقالتلي جملة وحدة
تنسيم:كوله بسرعة ومااتقولش الماما جبتلك شيئ وطلعت بسرعة وسكرت الباب وراها
في اللحظة هذي مافكرت في شيئ كنت جيعان بكل كليت النص بسرعة خفت سناء اتخش عليا ونا ناكل وبعدها كملت لعبي عادي
/
/
/
حسيت روحي مليت ماللعب صبيت وفتحت الروشن شفت حمزة وراشد يلعبو تحت بالبشكليطات(دراجات)
قعدت انتفرج عليهم وبعد اشوي طلعت مدتلهم سناء تفاح وقعدت اتقشر فيه الهم وتضحك امعاهم ونا قاعد انشوف في الفرق كيف اتعامل فيهم وكيف اتعامل في وفي اللحظة هذي راودني سؤال
هل لو أمي امعايا حتعاملني نفس معاملة سناء لعيالها ??
برغم اني مانعرف شيئ عالأم ولا نعرف كيف ايكون حنان الأم الا ان كان عندي احساس إن الام هذي أحسن شيئ في الدنيا ❤
عمري مافكرت في باتي او اني محتاج الاب بقد ماكنت ديما انفكر في امي وشن شكلها وشن اسمها وهل لو كنت امعاها حتكون حنونه عليا واتحبني
قاطع تفكيري صوت الباب لما انفتح تلفتت شوره القيت نفس الوحدة اللي جابتلي العصير امس خاشة عليا وجايبة في يدها صونية اممم شكله الغداء
بحتت فيها ابتسمتلي وابتسمتلها قالتلي
حنان:انت اسمك احمد صح
نا:صح
حنان:باهي يااحمد اكيدة جيعان تعال جبتلك الغداء
جيت شورها وهي حطت الصفرة عالكوميدين وجت بتطلع
نا:انتي شن تعرفيهم
حنان:نا نشتغل هنا
نا:شن تشتغلي
حنان:مربية العيال وانساعد في مدام سناء في شغل الفيلا
نا:اها وشن أسمك
حنان:اسمي حنان
نا:أها وبديت ناكل
حنان قربت مني:باهي يا أحمد لو قعدت تبي اي حاجة قولي
نا كنت ناكل وهزيت براسي وماحكيتش لان تعودنا في الميتم مانحكوش ونحن ناكلو
وحنان طلعت وخلتني كليت لين شبعت مالغداء نذكر يومها كان رز وشربة وحاجة اخرى مانعرفش بس كان فيها جبنة وبطاطا وكان طعمتها سمحة وامعاها عصير برتقال
/
/
/
مشى اليوم عادي كملته في داري ونلعب بروحي وخلاص كنت مال بكل عشان مش متعود نقعد في دار بروحي
وفي وقت العشاء جتني حنان وجابتلي عشاء وتعشيت وبعد العشاء نعست وخشيت الفراشي ورقدت
نا كان نومي خفيف بكل واي حاجة نفطنلها ونا راقد
حسيت إن فيه حد ايغطي فيا لما فتحت اعيوني القيته جابر ابتسملي وقالي كمل نومك وطلع في اللحظة هذي فرحت حسيت ان فيه حد في الحوش هذا مهتم بيا وغمضت عيوني ومشيت في النوم اخرى ?
/
/
/
وعيت في الصبح علي نفس اللقطة اللي امس برضو راشد ايصب عليا في امية وطلع يجري وصبيت بسرعة وراه ولما جيت عند باب الدار وقفت وتباوعت ماشفتش سناء في ممر الديار لحقته ونا فطنتله لما خش الداره مشيت وراه بسرعة وخشيت عليه وضربته لين بكيته وطلعت وخشيت الداري وماطقيتش 5 دقايق جتني سناء وبدت تضرب فيا واتقولي والله انبكيك كيف مابكيت راشد بس المشكلة نا ماكنتش انحب نبكي فقدت تضرب وتضرب فيا لعند مابطلن ايديها وطلعت وسيبتني بس قبل ماتطلع قالتلي
سناء:انت اليوم معاقب وممنوع مالوكال والشرب وطلعت وقفلت الباب عليا
قمعزت علي سريري ونا مانزلتش مني ولا دمعة بس كان جسمي كله يوجع فيا يدها كانت واعرة خاطي التقريص والعض
قعدت اليوم هذكي كله ونا محبوس في الدار ونفذت كلامها وفعلا من وعيتي ماشربتش حتى امية
كان اطول يوم ايمر عليا ?
اصدقو اللي ايقولو اطول من ليلة بلا عشاء
اذا الليلة بلا عشاء طويلة كيف بيكون يوم كامل بلا اوكال او حتى امية ?
والمشكلة نا اللي درتها في روحي كل مرة نلقى روحي انتخيل في وجبة قدامي مرة رز وعصبان ومرة كسكسو وكل ماانتخيلهن انجوع أكثر ?
حاولت نلعب باللعب عشان ننسى الجوع بس مافيش فائدة
قعدت ندعي لو تنسيم ولا حنان ايجيبلي حتى خبزة فاضية كنت ميت مالجوع بس ماحدش جاني شكلهم كلهم كانو خايفين من سناء
مشى اليوم هذا ومش عارف كيف مشى لعند لما نعست من دون مانفطن الشيئ ?
/
/
في الليل وعيت علي جابر وهو ايغطي فيا بحتت فيه وكان خاطري نحكيله اللي صار بس كنت هالك مالجوع وناعس بكل ماقدرتش وهو طلع وسكر عليا الباب
طبعا ماكنتش عارف كيف جابر فتح الباب هل لقاه مقفول ولا سناء فتحاته لما جا جابر نا مش عارف كيف صار
/
/
/
وعيت في الصبح كالعادة نفس الحركة امتاع راشد وكأنه ايدير فيها بلعاني بس هالمرة ماطلعتش ولا جريت وراه قعدت في مكاني لعند لما خشتلي حنان بالفطور ونا اتقول حقيت الجنة تلقيتها في الجو? وخذيت منها الصفرة وبديت ناكل وهي طلعت
بعد اشوي جتني حنان في الدار بتاخذ الصفرة
حنان:المدام سناء قالتلك انزل العب تحت
نا:متأكدة هي قالت هكي
حنان:اها والله متأكدة
نا فرحت ودغري لبست كندرتي ونزلت نجري وطلعت للجنان القيت حمزة وراشد وتنسيم يلعبو جيتهم بنلعب امعاهم بس حسيتهم مايبوش يلعبو امعايا بعدت منهم وقعدت انتفرج عالجنان وعالورد اللي فيه وعالخضرة
(خطرها ماقلتلكمش اعمارهم حمزة كان اكبر مني بسنتين وراشد امدادي بزبط وتنسيم اصغر مني بسنتين)
نا ماكنتش امركز امعاهم ومع لعبهم بس فجاة سمعت حاجة خبطت بلحيل بحتت فيهم وهما خشو يجرو خشيت وراهم القيناه راشد مطيح فازة كبيرة
جت سناء وامعاها حنان يجارن
سناء بعصبية:من طيحها
راشد:طيحها هذا وشاور عليا
نا:والله ماقربتها هو طيحها
راشد:كذاب والله هو طيحها
سناء بعصبية:حمزة من طيحها
حمزة:مش عارف نا ماشفتش شيئ
سناء:تنسيم من طيحها
تنسيم:هذا وشاورت عليا
سناء اتفنص فيا لين عيونها بيطلعو:معناها انت كسرتها
نا:والله ماني نا
سناء:عارف هذي بكم هذي تشريك وتشري هلك كان عندك هل يالقيط
قعد راشد يضحك ونا متأكد ان ماكان فاهم كلمة لقيط
ونا انقهرت بكل عشان قالتلي ماعندكش هل وكرتني من يدي ونا نحلف ان مش نا كسرتها وهي اتقولي مايبوش يكذبو عليك وشالتني للمطبخ وخلت حنان تمسكني وحطت كاشيك علي نار الغاز وبعدها رفعتلي تيشرتي
نا بصوت عالي:لا ماتلذعينيش لااااا
سناء:عشان اتحرم مرة اخرى تكسر حاجة ولا تكذب حركاتك امعفنة وبتعلم عيالي صح والله انوريك وحطت الكاشيك علي بطني تهيالي في اللحظة هذكي شفت الموت ومعش فطنت الشي لين وعيت القيت روحي في داري واللذعة تحرق في وتنهش في بطني ماننكرش ان في اللحظة هذكي بكيت اصلا كانت واعرة بكل ?
وقعدت ننفخ علي بطني نبيها تبرد خاطري انصب عليها امية مصقعة انحسها توا اتبرد النار صبيت بصعوبة ونا كل ماانتحرك انحسها وجيت بنفتح الباب كان مقفول من برا حولت تيشرتي وقعدت انحاول ننفخ بالك تقعد احسن ماصار شيئ
بس بعد اشوية خشت حنان وجايبة في يدها مرهم وشاش ونا لولا الوجع اللي حاس بيه راه ماخليتها اداويني عشان هي اللي مسكتني وخلتها تلذعني ?
حسيت بعد حطت المرهم النار بردت وغطتها بشاش
حنان والدموع في عيونها:معليش اني مسكتك الها بس لولا الحاجة ولولا ماني خايفة اتلزني مالشغل وماعاد نلقى بشن نصرف علي باتي وامي المرضه راه ماخليتها تلذعك
بحتت فيها بنظره كلها حقد
حنان:مااتبحتش فيا هكي بعد تكبر وتعرف ان اصعب حاجة تقعد فقير وماعندك شيئ واطلع في القرش بالغصب توا تعذرني نبيك اتسامحني والله غصبن عني وقعدت تبكي
حسيت من ادموعها انها صادقة ووجعتني قمعزت ومسحتلها دموعها وابتسمتلها
حنان باست علي راسي وباست خدي
حنان:نا محرومة من كلمة ماما طول عمري كان اتحب اقعد قولي ياماما
نا فرحت بكل:حاظر
حظنتي لين وجعتني وبعدين باستني وطلعت ونا فرحت اول مرة حد ايقولي ناديني ياماما واول مرة حد ايبوسني ويحظني زيها
بعد طلعتها بشوي انفتح الباب وخشت تنسيم وكنت متعقد منها عشان كذبت عليا
تنسيم:معليش اني قلت انت اللي كسرتها بس لو ماقلتش هكي راشد كان حيضربني
بحتت فيها ابتسمتلي ومدتلي طرف شكولاطة
تنسيم:هذا مني لكي عشان كذبت عليك بس والله راشد ضربته واعرة
خذيت منها طرف الشكولاطة وضحكتلها
نا:بعد يضربك مرة اخرى قوليلي توا نضربه
تنسيم:تضربه تضربك ماما
نا:عادي نا راجل وانتحمل المهم راشد مايضربكش
تنسيم ضحكت:ياريتك خويا بدال راشد وطلعت وسكرت الباب وراها
رغم صغر سني بس قدرت نعرف في اللحظة هذي ان كل قوي فيه اللي أقوى منه حنان كبيرة ومش صغيرة زيي لين اتخاف بس كانت خايفة انها تخسر شغلها من سناء اللي مشغلتها
وتنسيم كانت خايفة من راشد لان اكبر منها ويضرب فيها
قدرت نستوعب ان كل يد فوق منها يد
/
/
مر الوقت عادي كملته كله في داري بس ماقدرتش نلعب كان الالم مش مخليني لعند لما جا الليل ورقدت
وعيت علي حد ايغطي فيا بحتت نحسابه جابر بس القيتها حنان ابتسمتلي ومسحت علي راسي وباستني وطلعت ونا رقدت
/
/
/
مرن الأيام ونا امعاهم معش شفت جابر بكل
وسناء كانت واخذه غايتها فيا وكل يوم عقاب علي حاجة
راشد مش مقصر كل يوم كاذب كذبة وهي اتصدقه اتعاقبني يابضرب يا بتلذيع يااتوكلني هريسة ولا فلفل حتى الضي شلطتني بيه مرتين وكان هذا أصعب عقاب ?
حتى لما نقعد في داري ومانطلعش راشد لازم يكذب عليا كذبة يا أني سرقت منه حاجة ولا ضربته او اني قتله لفظ مش كويس
في الايام هذينا تمنيت لو اني ماطلعتش مالميتم وديما نذكر في ايامي غادي مهما كان العقاب غادي بس مش زي هنا ?
اغلب العقاب غادي عشان نقعدو كويسين وايعلمو فينا الصح مالغلط صح فيه مربيين كانو ماايحبونش بس ماكانو ايديرو فينا زي سناء ?
كانت حنان بس اتصبر فيا يابحظنها يابحكياتها وكل مااديرلي سناء حاجة هي اتجي اداويني وتقعد اداوي فيا وتبكي اتقولي مش بيدي شيئ ونا مش لايمها فهمت ان سناء أقوى منها
اما تنسيم كانت كل مااتحصل فرصة اتجيبلي شكولاطة واتخرفلي اشوي وتطلع وكل مرة اتخش عليا اتقولي ياريتك خويا بدال راشد
راشد طبعا ماكنش يقبلني بكككل بروحه مش عارف ليش كارهني هكي
أما حمزة ماكان يحكي امعايا ولا يحتك بيا اصلا ماكنتش عارف نيته تجاهي هو لا ايعامل فيا بكره زي راشد ولا كان كويس امعايا زي تنسيم
نذكر المرة الوحيدة اللي حكيت فيها امعاه يوم اللي خشيت امعاه الداره وبعدها كلماته سناء شن قالتله لين قعد هكي مش عارف ?
المهم قعدت عندهم اسبوعين كانن اسوء اسبوعين ايمرن عليا
كلهن عقابات مافيش يوم مر بدون عقاب بكككل
جابر ماشفتش طول الاسبوعين هذينا
لعند في يوم خشيت السريري بنرقد كنت امحصل طريحة رباش القبور من سناء بالتوبو جسمي كله املطع ويوجع فيا
نا تغطيت وسناء خشت عليا وفي يدها خيط الضي اللي تشلط فيا بيه
بحتت فيها وقعدت انقوللها
نا:والله مادرت حاجة اصلا ماطلعتش من داري بكل
سناء:عارفة مادرت شيئ بس جابر برا توا تطلع اتقوله نا معش بنقعد هنا
نا ماصدقت نزلت مالسرير دغري وبنطلع مسكتني
سناء:تعرف اتقوله سناء اتعاقب فيا ولا اتكلم نص كلمة في اللي درته لكي عارف هذا (وورتني الخيط)انحطه في الضي ونعلقه فيك لعند مااتموت
نا كان كل شيئ الا عقاب الضي كان اصعب عقاب بعد اديره ليا نقعد اليوم كله دايخ وانحس في رعشة في جسمي
هزيت براسي بمعنى باهي ونزلت القيت جابر مقمعز في الصالون تحت
اول ماجيته حظني وباسني
جابر:شن جوك وشن درت ونا مش قاعد ان شاءلله انسجمت مع خوتك
نا:نا نبي نمشي من هنا
جابر بحزن:ليش
نا:نبي انرد للميتم نبي اصحابي غادي
جابر:بس هنا احسن وقعد عندك خوت وام واب
نا:لالا مانبيش نبي الميتم
جابر:يعني مااعجبكش المكان هنا
نا:اها نبي انرد للميتم
جابر ابتسملي:نا توا انشيلك بس مش للميتم حنشيلك المكان اخرى
نا:بس نا نبي الميتم
جابر:كان ماعجبك المكان اللي بنشيلك له انردك للميتم تم يابطل وضحكلي
نا ضحكتله:تم
جابر باسني:خلاص عدي ارقد الوقت تأخر
نا:تصبح علي خير ورقيت الداري ونا فرحان واخيرا بنفتك من سناء
#يتبع
قولكن وين المكان الجديد اللي بيمشيله احمد وهل حيلقى فيه سناء اخرى ولا حيلقى ناس كويسة كله حنعرفوه في الحلقة الجاية ?
أسفة لو فيه لخبطة في الأسماء وأكيد رأيكن ايهمني?
گـتـابـتـي Koka Saleh