الجوكر | للكاتبة Koka Saleh
الـحـلـقـة (11)
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
لايك قبل القراية وتعليق بعد القراية ?
من ضعف التفاعل حتى الراجل عايرني قالي قروب فيه 46 الف بنت واللايكات ماايطقنش الالفين ?
حاسة من كلامه بيقولي وقفي كتابه??
شدن الهمة الله ايربحكن وتفاعلن?
::::::::::::::::::::::::::
قبل مانبدو بنوه علي حاجة للي مش فاهمات طريقة التنزيل ويحسابنها يومي راهو التنزيل يوم فيه ويوم لا حبيباتي?
::::::::::::::::::::::::::
عندي نا كنت حاط الدندونة امتاع تسنيم قدامي عالمكتب وانفكر شنو اللي ممكن عبد المهمين ايكون ايخططله وشن بينه وبين تسنيم وهل يستخدم فيها طعم ليا?
ونا في لحظات تفكيري رن تليفوني ولما شفت كالعادة مافيش رقم طالع عرفته اتصال مالمنظمة وعرفت ان فيه مهمة جديدة تنهدت ورديت
هو:اذهب إلى المطار فورا ستجد شخص يتبعنا سيعطيك تذكرة إلى المغرب ستركب الطائرة وهنا شخصية مهمة على متن هذه الطائرة ستراقبه في كل تصرفاته إلى وصوله الى المغرب وعندما تصل إلى هناك سنعلمك ماذا تفعل
نا:حسنا لكن من ذلك الشخص كيف أعرفه
هو:الشخص الذي سيعطيك التذكرة سيوريك صورته
نا:حسنا وسكرت
انسيت كل اللي كنت انفكر فيه وطلعت بسرعة ومشيت للمطار
طبعا كوني معرض للسفر في اي لحظة جواز سفري دائما امعايا اكثر من بطاقتي الشخصية
وصلت للمطار وجاني الراجل اللي قالي عليه عطاني التذكرة ووراني صورة الراجل وقعدت امقمعز لين نادو عالرحلة ركبت وركب بعدي الراجل اللي يبوني انراقبه وفعلا قعدت عيني عليه لعند لما وصلنا
نزلت للمطار القيت قدامي شخص يتبعهم عطاني شفرة مغربية وركبتها ودغري اتصلو بيا
نا:ايوا
هو:ستقوم بإتباعه ومراقبة كل تحركاته ولكن لا تحجز في الفندق الذي سيحجز به ستبقى امام الفندق إلى ان يخرج في اليوم التالي
نا:حسنا
هو:الان قم بمراقبته فحسب وغدا سوف نعلمك ماذا تفعل
نا:حسنا
هو:يوجد شخص امام المطار يرتدي ثياب عامل قمامة ومعه سيارة القمامة سيعطيها لك لتقوم بالمراقبة بها وهي مجهزة من الداخل بكل احتياجاتك
نا:حسنا
هو:لا تنسى ارتداء زي عمال النظافة الموجود بالسيارة
نا:حسنا
وهو سكر ونا قعدت ورا الراجل وانراقب فيه وهو كل مرة ماشي المكان وأخر شيئ نزل الفندق ومعش طلع وناقعدت بعيد مالفندق عشان لما يطلع في الصبح انشوفه
/
/
/
عند عبد المهيمن
قاعد غاطس في شغله وفي المحاضر اللي عنده وكم قضية يقرا فيهن مع خشت موظف الشاهي والقهوة اللي عندهم جايبله قهوة وطلع
خذا عبد المهيمن فنجال القهوة وقعد يشرب فيها وعام الهدوء في المكتب وقعد ايفكر
عبد المهيمن:توا نا مش لو حكيت الاحمد اللي صار بدل اللقطة اللي درتها البنت شكلها كانت غالطة ونا مش عارفها لو فهمت احمد بشويش خير من حركات المراهقة اللي درتهن وزقبت البنت مالروشن شن بتقول عليا توا اكيدة اتقول شكله متعود عالجو هذا عليك موقف حطيت فيه روحي وجو معيلة درته بكل واللقطة تقعد مش تمام لو احمد عرف الموضوع شن بيكون موقفي قدامه بس ?
/
/
/
عند تسنيم كيف وعيت واول ماحلت اعيونها اذكرت الي صار مع عبد المهيمن
تسنيم ابتسمت:حي مش قادرة ننساه ولا ننسى اللي صار وكيف كان شكله وتصرفاته وارتباكه اللي كان واضح وباين عليه ان اول مرة ايصير امعاه موقف هكي او اول مرة ايكون مع بنت بروحها?
تسنيم اختفت ابتسامتها:وحي عليا لو احمد يعرف القصة او يلقى الدندونة في الجناح?
وصبت تجري لبست ونزلت للجناح بتشوفها لقت الجناح مسكر
تسنيم:عليك بخت?
وردت بتخش للفيلا تلاقت مع سناء
سناء:وين كنتي
تسنيم:كنت في الجنان
سناء:شن تبي فيه الجنان
تسنيم:وعيت انفسي ضايق نزلت اشوي للهواء
سناء:معش تنزلي تحت الافندي أحمد جايب صاحبه وحاطه في الجناح
تسنيم:صح مانعلمش
سناء:اهو علمتي معش تنزلي
تسنيم:تمام ورقت فوق الدارها
سناء:ساهل ياأحمد تتحدى فيا نا وانت مش عارف اني اللي تشتغل فيه توا كنت فيه قبلك ومش عارف شنو اللي نقدر انديره لكي وحيكون مصيرك حاجة مالاثنين ياإما نقتلك يا إما انبلغ عليك وعلي كل شيئ ادير فيه بس هنا الاثنين يبن تخطيط عشان ماحدش يعرف ان انا وراها ?
/
/
/
مشى اليوم عادي نا كملتها قدام الفندق وماتحركتش من قدامه بكل والسيارة كانت مجهزة بكل شيئ مية واوكال وكل شيئ نستحقه
/
/
الباقي كانو كل واحد لاهي بحياته
تسنيم في دارها وكالعادة ماتطلعش منها الا لما بتاكل
جابر في الشركة ?
راشد مسافر مع أصحابه?
سناء اتخطط للانتقام من أحمد?
وحمزة في المستشفى ?
وعبد المهيمن في شغله يمشيله مالصبح مايروحش الا في الليل
/
/
في الليل وتحديدا عالساعة 1
روح عبد المهيمن من شغله ومالقاش احمد رن عليه كان رقمه مقفل طول وهو يرجى فيه بس احمد ماجش قعد هكي مكسد بروحه وفجأة دق باب الجناح صبى بيفتح يحسابه أحمد
ولما فتح كان
تسنيم:خير☺
عبد المهمين بصدمة:شن جاية تبي هنا اخرى
تسنيم:نبيك اتشوفلي فردة دندونتي بالك طايحة هنا لاني ماالقيتهش من لما طلعت امس
عبد المهيمن:باهي اشوي وخليك هنا راك اتخشي واحمد ايجي
تسنيم:باهي?
خش عبد المهيمن وتسنيم قعدت قدام الباب
تنسيم:ياربي شنو هالسماحة كلها حاسة روحي بندوخ منه?
عبد المهيمن قعد ايدور في كل مكان بس مالقش شيئ وبعد فترة طويلة جوا جاها
عبد المهيمن:ماالقيتش شيئ جوا شكلها مش طايحة هنا
تسنيم:بس نا دورتها في الفيلا كلها مش قاعدة
عبد المهيمن:والله مافيه جوا
تسنيم:خليني انخش اندورها نا لاني خايفة احمد يلقاها
عبد المهيمن:لالا مااتخشيش افرضي احمد ايجي توا اصلا جيتك كلها لعند هنا غلط ?
تسنيم:بس أحمد مش قاعد
عبد المهيمن:بس حيجي وايشوفك هنا والمرة هذي مش حنطلعك حنقوله هي اللي جت بكرعيها
تسنيم:بس احمد مش حيجي اصلا
عبد المهيمن بإستغراب:ليش مش حيجي
تسنيم;اكيدة سافر اصلا رنيت عليه القيته مقفل وهو مستحيل يقفل فونه الا لما ايسافر
عبد المهيمن:كيف سافر وهو لعند الصبح وهو هنا
تسنيم:أحمد هذا مستحيل تعرفله حاجة ايسافر فجاة وايروح فجأة ماحدش يعلم بيه
عبد المهيمن:اصلا ماقاليش ان مسافر
تسنيم ضحكت:ولا حيقولك ولا حيقول الحد ?
عبد المهيمن ضحك:باهي خشي خير ماايجي خوك لاخر شن قلتي اسمه
تسنيم:حمزة?
عبد المهيمن:ايوا هذا
تسنيم:مش قاعد في المستشفى عنده مناوبة اليوم وراشد له كم يوم مسافر مع أصحابه
عبد المهيمن:ومن راشد هذا
تسنيم:خويا لاخر ?
عبد المهيمن:يعني مش قاعد حد في حوشكم
تسنيم:فيه بابا بس في مكتبة ومش حيطلع منه لين ينعس وبيرقد وماما من بدري راقدة
عبد المهيمن ضحك:يعني توا تبيني انقولك خشي ولا كيف
تسنيم انحرجت وفطنت الروحها:لا مش قصدي?ومشت تجري ومشت للفيلا
عبد المهيمن قعد يضحك وخش وسكر
عبد المهيمن:غريبة البنت هذي فيها براءة وعفوية مش عادية ? بس غريبة كيف الراجل هذا متبني احمد وحاطه علي اسمه وهو عنده عيال
غريب التبني ممنوع في ليبيا الشخص عنده اعيال ?
وخش بيرقد وهو ايفكر في الموضوع هذا ?
/
/
#تسنيم
خشت الدارها وسكرت علي روحها وطاحت علي سريرها وهي محروجة
تسنيم:نا شن درت خليته يفهمني غلط?
تسنيم:ياربي من كثر سماحته ودرلي عقلي حي شن بيقول عليا اكيدة بيقول صايعة وحي كان مايحكي الاحمد عاللي درته نا شن درت ياربي وقعدت تبكي?
/
/
نا مشت الليلة طويلة وصامطة مارقدتش فيها لحظة خايف الراجل يطلع وماانشوفش وكان ليلة طويلة اطول من ليلة بلا عشاء?
/
/
عند راشد
كان مسافر مع اصحابه وكانو امقضينها سهر وشرب وجو سمح وواخذين شقة في مصر وهيتك ياهياجة وامعاهم بنات وحياه واضحة لكن الغريب ان راشد كان امقمعز بعيد علي أصحابه ويشرب وسارح
جاه مالك صاحبه
مالك:كنك قاعد بروحك تعال هيج امعانا
راشد:ماايردش
مالك:اوووي نحكي امعاك واخبطه علي كتفه
راشد:شنوو
مالك:من بدري نحكيلك وانت سارح اللي واخذه عقلك ياعم ?
راشد:قصدك اللي واخذ عقلي
مالك بصدمة:اتفكر في راجل ?
راشد:مش راجل فرخ فرخ ونهايته علي يدي
مالك:تي من اللي حاقد عليه الحقد هذا كله
راشد:واحد عندي امعاه ثاااار كبيرر وماانردش ثاري الا اذا قتلته
مالك:لا انت شكلك شربت واجد وبديت تخرط
راشد:اها وسكت
مالك بحت فيه وعدى وسيبه
مالك:وربي يااحمد الكلب ماننسالك اللي درته وثاري ماايخلصه الا اني انطلع روحك بإيدي الاثنين بس قبلها لازم انردلك كل اللي درته فيا ?
/
/
أحمد زي مازرع محبة في قلوب ناس برضو غرس الكره والعداوة في قلوب ناس ثانية ?
بس الاسوء ان الناس اللي زرع فيهم الكره هما الناس اللي متواجد امعاهم ديما واخطر طعنات هنا اللي ايجنك مالناس القريبة ?
الأعداء المقربون.. يعني أعداء الداخل.
طعناتهم أشد لآنها تأتي من مسافة قصيرة.
/
/
واخيرا كمل الليل وجا الصبح ونا مازال واعي بس عالساعة 8 هكي الشخص اللي قالولي راقبه طلع مالفندق ونا تبعته لكن في وقت وانا انتبع فيه تليفوني رن وكالعادة اتصال بدون رقم?ورديت
هو:اقتله
نا:الان
هو:نعم سوف يذهب إلى مؤتمر الان اقتله قبل ان يدخل
نا:كيف سأقتله
هو:اسبقه لتصل قبله الى قاعة المؤتمر ستجد شخص يتبعنا سيعطيك ملابس رسمية البسها واصعد الى نهاية المبنى الذي امام المؤتمر ستجد قناص بها كاتم صوت ستقوم بالتصويب عليه وقتله واخرج من الباب الخلفي للمبنى ستجد سيارة اركبها واذهب الى قاعة المؤتمرات لتحظر المؤتمر لانك من المدعووين
نا:حسنا لكن كيف اتخلص من القناص ومن سيارة القمامة
هو:لا تكترث لهذا الامر نحن سنتعني به ونتخلص منه
نا:حسنا و
هو سكر ونا درت زي ماقالي بالحرف وكل شيئ نفس ماطلب وتمت المهمة وقتلت الراجل وطلعت مالباب الخلفي للمبنى وركبت في السيارة وجيت قدام قاعة المؤتمر وكانت الدنيا ملتمة وحرس وشرطة ونا كنت مش فاهم شيئ زي باقي الناس وقعدت الشرطة كل حد يجري المكان وسكرو الشارع وايحاولو يعرفو القاتل بس كالعادة القاتل بينهم ووسطهم ومالمدعوين وماحد يعرفه?
“العذاب الذي تختاره بإرادتك ، لا يككون عذاباً، بل أشد درجات السعادة وجعاً…”
/
/
عند عبد المهيمن وعى في الصبح ودوش وغير ادبشه علي دقت الباب فتح لقاها الخدامة جايبتله فطور
عبد المهيمن:شن هذا
الخدامة ماما تسنيم قول جيب الحضرتك فطور
عبد المهيمن:من تسنيم
الخدامة:ماما صغير اخت بابا احمد
عبد المهيمن ضحك:قوليلها شكرا
الخدامه:حاظر
ومشت للفيلا واول ماخشت
تسنيم:ها قوليلي شن قالك
الخدامة:قال شكرا
تسنيم:بس شكرا يعني مافيش اي تعبير ثاني لا ابتسم لا كشر
الخدام:ابتسم ماما
تسنيم بفرحة:قولي والله احلفي توا
الخدامة:ماما تسنيم طرشق
تسنيم;ماطرشقتش مازال بعقلي? واسمعي ردبالك ماما تعلم باللي صار وبعد تمشي تاخذي منه الصفرة مااتخليهش اتشوفك
الخدامة:حاظر حاظر والله فهمت ماما حفظت كلو
تسنيم:باهي ورقت الدارها وهي فرحانة بككل
(ضحكة من عبد المهيمن قدرت تعطي تسنيم سعادة كبيرة
زعمك هذا حب ولا بس إعجاب?)
/
/
عبد المهيمن ايبحت في صفرة الفطور ومبتسم ?
عبد المهيمن:تسنيم أسم حلو بس المفروض كان أسمها حلا من كثر جمالها ?
عبد المهيمن فطن الروحه:اووي شن فيه هذي اخت صاحبك وانت ماتعودتش علي هكي خيانة اصحابك مش من طبعك ياعبد المهيمن افطن الروحك راك قاعد كم يوم وماشي مش داعي تطلع من هنا بمشكلة مع احمد لازم اتحط احدود للشيئ اللي قاعد ايصير وديما حط في بالك راه اخت صاااااحبك ✋
وبعدها فطر وطلع بالسفرة وخذتها منه الخدامة وركب في سيارته وعدى
لكن تسنيم كانت اتراقب في هذا كله من روشن دارها وبعد عدي عبد المهيمن
جت قمعزت علي سريرها:ايهبل ايهبل شنن هالشخصية ولا الطول ولا الابتسامة اول مرة انحس بالإحساس اللي نا توا حاسته شفت رجالة واجد وحكيت مع كم شاب بس الشعور اللي توا عندي عمري ماشعرت بيه ياربي ازعمك هذا الحب الحقيقي اللي يحكو عليه?
/
/
عندي انا
المؤتمر طبعا ماصارش منه وبعد تحقيقات واجد مالشرطة عاللي صار وقريب 4 ساعات ونحن في مكان الجريمة وبعدين طلقونا كلنا وقعدت القضية قيد التحقيق بس كالعادة حتأيد ضد مجهول ?
طلعت من غادي هالك واصل حدي وماصدقت المهمة كملت حجزت في فندق وطحت رقدت ماعاد فطنت الشيئ بكككل ?
/
/
الساعة 11 في الليل
عند عبد المهيمن دق الباب وكانت الخدامة جايبة عشاء ?
عبد المهيمن:وشنو هذا اخرى
الخدامة:عشاء من ماما تسنيم
عبد المهيمن:بس نا تعشيت
الخدامة:ماما تسنيم داراته بإيديها لكي
عبد المهيمن ابتسم:دبينها هي داراته مش حنرده وقوليلها يسلمن ايديك ☺
الخدامة:حاضر
ومشت وخشت للفيلا ونفس الجو تلقتها تسنيم
تسنيم:ها قوليلي شن قالك
الخدامة:قالت تسلم يدك
تسنيم بفرحة:حتى كلامه ايهبل ?
الخدامة ضحكت وعدت للمطبخ وتسنيم رقت الدارها وهي اتغني
#الحب_بيجي_في_ثانية_مالوش_
(توا انززلكن رابط الاغنية في بوست بروحه أغنية اتهبل بكل ?)
/
/
عبد المهيمن ياكل;وين بتوصل هذي بس ليش اتجر فيا الشيئ مانبيش تي غلط هذا غلط كيف انفهمها بس ?
وبعدها سكت وقعد سارح في خياله في تسنيم وحركاتها
عبد المهيمن:بس سمحة وعفوية وبريئة من نادر تلقى بنت هكي توا تصرف بعفوية وبدون تفكير ?
/
/
صباح ثاني يوم ?
وعيت علي صوت تليفوني ولما شفته كانت رسالة فحواها ( اذهب الي موظف الرسبشن سيعطيك تذكرة الى روسيا اذهب فورا يوجد اجتماع مهم بإنتظارك)
تنهدت وصبيت غسلت ودوشت ورديت لبست البدلة وطلعت دغري مشيت للموظف عطاني التذكرة والقيت احساب الفندق مدفوع وطلعت مالفندق دغري عالمطار وصلت غادي ماطقيتش نص ساعة نادو علي رحلتي ركبت في الطيارة قضيت وقت الرحلة في الطيارة ونزلت في مطار روسيا القيت شخص يرجى فيا ركبت امعاه في سيارة ومشينا للمؤتمر وخشينا بس هالمرة كان مؤتمر غير تعالمت فيه علي اني عضو منهم مش مترجم الحد فيهم وهذي اول نقطة تحول بالنسبة ليا ??
/
/
عند عبد المهيمن جاه الفطور مالخدامة نفس امس فطر وغير وطلع لقى تسنيم برا ولابسة بتمشي للجماعة بس كانت اتشوفله من بعيد وماقربتش منه مازال محروجة ماللي صار يوم اللي جاته
لكن هالمرة الخطوة الجريئة كانت من عبد المهيمن جا شورها وهي مصبية
عبد المهيمن:صباح الخير
تسنيم بخجل:صباح النور ☺
عبد المهيمن:شن جوك
تسنيم:تمام وانت
عبد المهيمن:تمام
عبد المهيمن بتردد وهو يمسح في يده علي لحيته
عبد المهيمن:شكرا عالفطور وعالعشاء وفطور اليوم?
تسنيم وهي ذايبة مالحركة:عفوا?
عبد المهيمن:عندك مدرسة ولا جامعة ولا شغل
تسنيم:لا جامعة ونرجى في السواق عشان ايشيلني
عبد المهيمن:كان اتعديه ايطول انشيلك نا
تسنيم:شنو?
عبد المهيمن فطن الروحة:تي نا شن نحكي ?قصدي تبي حاجة
تسنيم تضحك:سلامتك
عبد المهيمن مالضحكة قعد مستك وايبحت فيها
تسنيم:الو انت
عبد المهيمن فطن:اسمي عبد المهيمن
تسنيم:عاشت الاسامي ونا
عبد المهيمن قاطعها:عارف تسنيم وظلموك بالاسم كان المفروض سموك حلا علي سماحتك
تسنيم رقت عليها الحرارة واخدودها انحمرن مالاحراج
وعبد المهيمن عرف روحه لبز في الدوة وسيبها بسرعة وركب في سيارته وطلع ?
وتسنيم خشت للفيلا ورقت الدارها وطاحت علي سريرها وهي مازال قيد الصدمة ومش مصدقة اللي صار ولا عاد صار من مشية الجامعة ولا شيئ?
/
/
الاجتماع استمر 5 ساعات وبعدين طلعنا واول ماطلعت مشيت للسوق خديت دبش لان ماامعيش ولا شيئ وبعدين طلعت حجزت في فندق واول حاجة درتها دوشت وغيرت البدلة اللي لابسها وعزقتها لاني كنت كارهها وحاس ان دم الراجل مازال عليها ?
بحتت للساعة القيتها 8 في الليل وكنت جيعان ومش ناعس قلت نطلع انتعشى برا وانغير جو اشوي وانرد
وطلعت تعشيت برا وقعدت كل اشوي نفتح في النت وانخش علي محادثتي مع سمر علي امل ادزلي اي حاجة تبدى هي بالدوة مانبيش نا اللي نبدى بس هي شيئ شيئ شكلها اعتبرتني شخص شافاته مرة وخلاص
قلت في عقلي جت منك ياجامع خليني انفوت فكرتها احسن لان الجو هذا كله مش ليا ?
اصلا ماكنت امحدد شعوري تجاهها شنو بس هكي بنحكي امعاها وخلاص?
بعد صراع واجد في داخلي اندزلها انفوتها اندزلها انفوتها قررت انفوتها ونشقى بروحي قعدت برا لعند الساعة 12 وروحت للفندق ودغري طحت ورقدت ?
/
/
/
مرن 4 أيام ونا في روسيا
كملتهن كلهن شغل واجتماعات سرية وعلنية بس اللي كان مفرحني قصدي امفرح الجوكر مش نا هو ان كنت انتعامل كعضو منهم بس هل عضو مهم او لا ماكنتش نعلم ?
تنسيم وعبد المهيمن مازال نفس الوضع كل يوم ادزله الفطور والعشاء وامكملينها نظرات من بعيد وبذات لما يطلع عبد المهمين في الصبح تسنيم تقعد علي روشن دارها واتشوفله وهو ايشوفلها ويبتسمو البعضهم ويمشي عبد المهيمن للشغل وقعدو علي هالحالة وخلاص بس ماحدش حكى مع حد اي كلمة بس نظرات الإعجاب كانت واضحة بين الاثنين ?
/
/
عند عبد المهمين في الشغل واثناء عمله خش علي معز
عبد المهيمن:اووووو عزو شن جوك
معز:حلال الواحد لا ايسلم عليك ولا ايدورك معقولة من مشيتك ماعاد ادورني
عبد المهيمن:والله قلت اكيدة غارق في تجهيزات فرحه مانبيش نلهيه
معز;شن تلهيني انت خويا عيب راه
عبد المهيمن:شن صار فرحني امتى فرحك
معز:الاسبوع الجاي
عبد المهيمن بفرحة:مشاءلله ربي ايتمملك علي خير اهو اول واحد فينا بيخش القفص الذهبي وبيعيش حياة الاسرة اللي انحرمنا منها
معز:ايوا والله شعور سمح العقبالك ياخيي اتعيش هالشعور
عبد المهيمن:ان شاءلله يارب
معز:شد حيلك وفرحنا بيك بسرعة مش اصغير وراك اتقول اندور بنت الحلال قبل راه قاعدات واجد
عبد المهيمن:البنت القيتها لكن
معز:لكن شنو
عبد المهيمن:مالاخر هكي بنحكيلك اللي صاير وانت شاور عليا شنو اندير
معز:ان شاءلله خير احكي
قعد عبد المهيمن يحكيله في الموضوع من بدايته من لحظت ماخشت عليه تسنيم لعند نظرات الاعجاب اللي بينهم
عبد المهيمن:وهذا اللي صار كله وخايف لو أحمد ايشك في الموضوع ولا يفطن الحاجة يفهمني غلط واتصير مشكلة بينا
معز:اسمع كونه حيفهمك غلط حيفهمك غلط وفي الاخير هذي اخته ومايرضش الشيئ هذا ايصير
عبد المهيمن:باهي نا شنو اندير توا
معز:البنت عاجبتك
عبد المهيمن:كان قتلك مش عاجبتني نكذب عليك لنقنها عجبتني وبكل اخرى
معز:خلاص ساهل تعال مالباب وبلا الحركات هذينا
عبد المهيمن:كيف نخطب ياراجل وباتي كيف ميت وامي مازال رابط تي حتى من يخطبلي توا مافيش
معز:مش شرط خطبة تعال الاحمد بينك بينه وقوله نا شفت اختك بالصدفة وعجبتني ولنقني ناوي الحلال لكن نبي هذي كلمة بيني وبينك عساس يقعد عندك علم وبعد مااتفك امي انجيبها تخطب رسمي
عبد المهيمن:قولك هكي
معز:مافيش احسن من هكي البنت عاجبتك وخوها صاحبك ومش حيعطيها الخير منك ودبينها حتى انت عاجبها الامر محلول الاغلبية توا علي راي البنت بس
عبد المهيمن:بس هو توا امسافر
معز:ارجاه ايروح لكن انت ركح الكارطة لا اتحاول تحكي امعاها ولا اتجي شورها احسن ماحد من هلها يفطنولكم وبعدها معش يعطوها لك
عبد المهيمن:ماتبقى الا هك اصلا نا حصلت شقة وبنحول فيها لكن مش حنقدر انحول لين ايجي أحمد نشكره ونحكيله وبعدين نطلع
معز:تمام بس زي ماقتلك افطن الروحك
عبد المهيمن:ماعليك كون هاني
وقعدو ايخرفو مع بعضهم
/
/
خامس يوم في الصبح وعيت كالعادة وطلعت الاجتماع بس هالمرة كان سري وطول بكل علي غير العادة قعد فوق من 7 ساعات وبعد طلعنا قالو انهم محتفلين بس علي شنو محتفلين مش عارف ?
مشيت امعاهم من دون مانسأل علي شيئ ووصلنا المكان الإحتفال وكانت فيلا بس بعيدة عالمدينة وخشينا وبدت الحفلة وبدى الجو والشرب والرقص وكل شيئ جوا كان مباح وعلني
مانقدرش نوصف المناظر اللي كانن قدامي مش حيتخيلهن عقل بشري
كل شيئ كان على مرئى ومسمع الجميع وحاولت كم بنت اتقرب مني بس رفضت لان اللي ايديرو فيه مستحيل انديره ?
في اللحظة هذي مشاعر وأحاسيس ووعارة الراجل الشرقي اللي ايغار علي نفسه وعن فيا ورفضت الشيئ هذا خذيت كاس وطلعت للجنان امتاع الفيلا برا ونا غمتلي مالجو اللي جوا كنت مانبيش انشوف المناظر المقرفة اللي جوا ?
قمعزت برا علي كرسي واول حد جا في بالي لما قمعزت سمر مش عارف شنو اللي خلى صورتها اتجي بيني وبين كل بنت جوا ?
قعدت انفكر شن معنى هي تي شنو الفرق بينها وبين البنات اللي جوا اصلا اللي جوا قريب كلهن كانن احلى منها تي شن فيها بالزايد عليهن بس ?
وفي اثناء صراعاتي الداخليه هذينا قمعز جنبي حد
#يتبع
قولكن من قمعز جنبه وهل حيكون حد يعوفه او لا ?
وقولكن هل راشد وسناء حينجحو في انتقامهم من أحمد أو حيكتشف مخطاطاتهم الجوكر?
وقولكن شن رد فعل احمد لما عبد المهيمن يطلب تسنيم ?
وقولكن شن شعور تسنيم لو عرفت ان عبد المهيمن من اعجاب طب في زواج اكيدة حتموت مالفرحة?
كله حنعرفوه في الحلقة الجاية☺
عارفة ان الحلقة مش طويلة بس وحق ربي ماحوتك كتبتهت تعرفن ضاربني برد ونكتبلكن رغم الحرارة والإحتقان والزكمة وصداع راسي مانحكيلكن لكن ماحبيتش انخليكن بلا حلقة?
گـتـابـتـي Koka Saleh