رواية يتيمة مع والديها

#يتيمة_مع_والديها
#قصة_من_الخيال
#الحلقة_السادسة
.
.
.
.
.
لا اسمح بنشرها بدون اسمي الكاتب:Arhima Alagory قراءة ممتعة للجميع
.
.
.
.
.
ثاني يوم
نضت لقيت جتي مش قاعده خشيت حمام وطلعت مشيت مطبخ لقيت جتي طايحه قعدت نعيط
انا:يا معتز تعال ونبكي
جا معتز كان راقد ناض مفجوع خذينها وركبنها سيارة وطلعنا بيها مستشفي خششنها للدكتور
دكتور:اطلعو برا معلش
انا:لا ما نسيبهش
دكتور:لالا معلش خلينا نشوف شغلنا
خذاني معتز وانا نبكي
انا:حي عليا كان صارت فيها حاجه وين نمشي
معتز:انشاءلله خير
طلع دكتور
معتز:شنو يا دكتور
دكتور:دكتور هضا حال دنيا وللاسف الحاجة توفت
انا:انصدمت ومعش نطقت بكلمة
معتز:قعد يبكي ويخبط في راس ع ساس
دكتور:وحد الله وادعيلها برحمة
انا:مستحيل جتي تسيبني ومشيت نجري نبي نخش عليها مسكتني ممرضة
انا:نبي جتي جتي مستحيل تخليني انتو تكذبو
جا معتز
معتز:حضني خلاص يا ملاك اهدي توا
انا:كيف نهدا وجتي ماتت وخلتني من يحن عليا بعدها يا معتز من يجي في مكانها انا انتهيت خلاص وطحت وقعدت نبكي
معتز:هي معايا باهي
انا:مش ماشيه نبي نقاعد معاها
الكاتب:Arhima Alagory

معتز رن ع باتي
باتي:ايواه معتز
معتز:باتي انت وين
باتي:في طريق مروح للحوش
معتز:قتلك جتي
باتي:كنها
معتز:قعد يبكي
باتي:كنك يا راجل
معتز:جتي توفت
باتي:سكت بكل
معتز:ياباتي بااتي
باتي:سكر ع معتز
معتز:رن علي باتي بس ما ردش. عليه
معتز:عليك قصه
انا:نبكي معتز نبي نشوفها
معتز:حاضر بس انتي لزام تروحي
انا:لا
معتز:لالا هيا ملوكة
انا:لالا قتلك نبي نشوفها
معتز:والله توا تشوفيها توا نجيبوها للحوش
انا:به
ومشيت مع معتز نحنا طالعين باتي خش
معتز:توا نجي
انا ركبت في سيارة ومعتز عدى لباتي قعد يحكي هو وباتي بعدها جا ركب لقاني نبكي
معتز:الله يرحمها
انا:مش متخيله الحوش بلاها حي عليا انا
معتز:وسعي بالك وحدي الله
انا:لا اله الا الله

الكاتب:Arhima Alagory

خشينا من شارع لقينهم يديرو في خيمة ع الحوش
انا:نزلت نعيط حي عليا جتي سيبتيني لمن خليتني من بعدك
جتني عمتي خديجة وقعدت نبكي انا وياها وبعدها بناتها ومشيت خشيت دار جتي قعدت ع سرير ونبكي حتي روحي وحيده وغريبه في حوش جتي كانت كل شي مونستني وتغيرلي في جوي بس توا خلاص انا قاعده ع سرير سمعت عياط صبايا ويقولو لا اله الا الله طلعت نجري لقيت جيبين جتي في صندوق تميت نتفرج من بعيد معش قدرت نقرب شوي خذوها وحطوها في المربوعة معتز طلع شفني مصبيه ونبكي ومش قادره نخش
معتز:تعالي
انا:نهز في راسي بمعني لالا
معتز:كنك
انا:معتز قولي صندوق فاضي قول ان جتي ما متتش وهضا كله انا نحلم ومزلت راقده في حضنها
معتز:قعد يبكي الله غالب يا ملاك
انا:خشيت للمربوعة ومسكني معتز جيت عند صندوق وشفتها طحت ع ركبي وقعدت نبكي هنت عليك يا امي وسيبتيني لما خليتني انتي ابي وامي ليش عدتي انا مزال نبيك جتي ردي عليا خوذيني في حضنك ردي عليا قعدت نخبط ع وجهي ونقول ردي عليا ردي عليا
معتز:مش هكي يا ملاك خلاص تعالي
انا:خليني
معتز:بلا عياط
انا:باه مشيت خذيت مصحف وقدت نقرا عليها ودموعي ينزلن
خشو رجاله يبو يخذوها
انا:سامحيني يا غالية كان قصرت في مره معاك
خذوها وطلعو طلعت الحنيه من حوشنا ومعها كل شي سمحه
انا:خشيت دار جتي ورقدت ع سريرها

الكاتب:Arhima Alagory

في العشية
صفاء:ملوكة ملوكة
انا:نعم
صفاء:نوضي هي
انا:ساعة كم
صفاء:ساعه 5
انا:والله نحس روحي تعبانه
صفاء:عرب واجده ادور فيك هي غيري دبشك واطلعي
انا:باه

صبيت غيرت دبشي وطلعت وتجيني ناس وتقاعد تعزي انا كملت منهم جتني صفاء
صفاء:تعالي تبيك حنان
انا:هي جيتها
انا ماشيه لحنان جتني اميرة
اميرة:يا ملاك تعالي سعدينا ومدي معانا
صفاء:دقيقه في ناس يبو يعزوها توا تجي
اميرة:حتي نحنا يبو يعزونا ولا جتتها هي بس
صفاء:اميرة تعالي توا نساعدكم انا
انا:مشيت حنان وما عدلتش عليها وتميت نبكي معاها
حنان:ربي يرحمها
انا:عوزتني يا حنان جتي هي كل حاجه ليا
حنان:ربي ما يسيب حد يا ملوكة
انا:يارب
قعدت مع حنان نين روحت وبعدها مشيت مع بنات ونساعد فيهن ومعش ريحت روحي بكل جتني عمتي خديجة
خديجة:ملاك ريحي روحك ومش كل حاجه اديرها انتي
انا:لالا خليني نبي ننساه شوي ونلهي روحي
خديجة:والله غيبت امي لو تخدمي العمر كله ما تنتسى
انا:فعلا
خديجة:باهي تعالي ارقدي خلاص
انا:كيف يجيني نوم وانا متعود قبل لا نرقد نهدرز معاها توا هي في قبرها وقعدت نبكي
خديجة:الله يرحمها

خشت عمتي خديجة رقدت وانا في الخيمة بروحي
معتز:شن اديري
انا:شي قاعده انت شن ادير
معتز:مش جايني نوم
انا:وين تبي ترقد
معتز:توا نرقد غير ننعس قبل
انا:وكان ما نعستش
معتز:ما نرقدش
انا:ههه
معتز:ايوه اضحكي نبي نوريك حاجه
انا:شنو
معتز:فتح تلفونه وخش ع استيديو وفتح ع صوره امسكي
انا:مسكتها لقيتها انا وجتي اخر ليله لنا مع بعضنا بكيت امتي صورتها
معتز:امس بعد جيت خشيت لقيتكم رقدين صورتها
انا:شوف امس كنت في حضنها وتوا متمنيه نسمع صوتها
معتز:كانت حاسه بيها هيا
انا:كيف
معتز:بعد صورتها وطلعت كلمتني جيتها قلتلها نحسابك راقده قالت كيف نرقد ونتريح وملاك مضايقه قلتلي ردبالك منها انا مش قاعدتلها ديمه ونبي نتريح عليها قالت من صغرها ما شافت شي يفرح الا لما كبرت انت واهتيمت بيها تحكي وتبكي وقالتلي اوعدني تخاف عليها وتحطها في اعيونك وعدتها بعدها قلتلي هكي ريحتني ورقدت وانا طلعت رقدت بعدها نضت ع عياطك انتي
انا:نسمع ونبكي معتز رايفت عليها يا معتز
معتز:الله يرحمها ادعيلها برحمه
انا:حاضر
معتز:خشي تريحي
انا:لالا نبي نمشي تشيلني ولا نمشي بروحي
معتز:توا وين
انا:نبي نمشي لقبرها نبي نحكيلها ان فراقها كسرني
معتز:باهي امشي البسي
انا:باه

الكاتب:Arhima Alagory

مشيت لبست وطلعت انا ومعتز للمقبرة لقينا البواب
معتز:سلام عليكم
البواب:عليك سلام
معتز:معلش نبو نخشو زيارة
البواب:تعال في صبح يا خويا
معتز:والله يا خويا نبو نخشو توا
البواب: يا راجل والله ممنوع ومانتحملش مسؤليه
معتز:يا راجل انت مش مصدقني خش معنا
شوي طلع راجل من دار يبي يقوللنا ممنوع لقاه معتز عرفه
راجل:لالا خليهم هذوم دفنو امبدري
البواب:تفضل

طلعنا
انا:وعليش خايفين هم
معتز:عندهم الحق مرات واحد يخش يدفن واحد ولا يدفن سحر بذات في وقتنا توا
انا:اها صاح واللهي
معتز:هي انزلي
انا:باه نزلت وخايفة عمري ما خشيت مقبرة ولما خشيتها جيت في ليل قعدت نبكي
معتز:تعالي هنا
انا:جيت لقيت قبرها نزلت وقعدت نبكي وندعيلها امس في حضنك واليوم قاعده ع قبرك غبتي وكسرتيني
معتز:شن اتفقنا بلا بكاء
انا:باه
قعدنا شويه وطلعنا روحنا
معتز:هذي الحياة بس ناس ما تعرفش شطرين في حسدهم لبعضهم وحقد بس نهايتها موت مش مفكرين فيها بكل
انا:نسمع وساكته

وصلنا للحوش خشيت ومعتز طلع
خشيت لقتني صفاء
صفاء:وين كنتي انتي اندور فيك من امبدرب
انا:كنت في مقبرة
صفاء:شنو مقبرة شن اديري
انا:مشيت انا ومعتز لجتي
صفاء:معقوله في ليل
انا:لو ما مشيت ما تربحتش بس بعد قربت منها حتي وهي ميت تريحت
صفاء:تعالو نرقدو
انا:باه
خشينا رقدنا

مرات ايام العزاء طبعا هلي مزالت نفس معامله خواتي مستحيل يرحوني امي تهزب فيا قدام ناس باتي كل ما نقول حاجه يفوتني ويدير غيرها بس كنت نرقد وحدي انا ومعتز في حوش جتي بعد نوض ونفطر ونلم حوش وندير الغداء بعدها في العشيه تجي عمتي ومرات ينزلو هلي ويجونا عرب وفي ليل ندير عشاء وبعدها نرقد وهكي ماشيه حياتي بعد وفات جتي مره ع وفات جتي 40 يوم

الكاتب:Arhima Alagory

قاعده انا وهلي لوطه
باتي:نبي نبيع حوش هضا
انا:شنو
باتي:كنك
انا:لا شي بس وين نبي نقاعد انا
امي:تحولي معنا حوش الجديد
باتي:وهضا نبي نبيعه كله
انا:فرحت وزعلت فرحت لان هلي اذكروني ويبي يخذوني معاهم وزعلت لان يبو يبيعو الحوش لي في كل شي وبذات ريحت جتي
باتي:بكرا توا نكلم معتز ونجيبو سيارات نشيلو دبش
مريم:يعني امتي نحولو حوش جديد
باتي:اسبوع جاي نكونو فيه
انا:بسرعه هذي
باتي:بلكي مش عاجبك يا ابلة ملاك مزال ما سكنتي معانا وبديتي تشرطي
انا:خنقتني العبرة وصبيت

خش معتز
معتز:سلام عليكم
هلي:عليك سلام
معتز:وين ملاك
امي:توا كانت هنا خشت للدار
معتز:دق ع باب
انا:من
معتز:نخش
انا:تفضل
معتز:كنك
انا:شي غير يبو يبيعو الحوش وخطرت عليا جتي
معتز:ملوكة الحوش مبيوع مبيوع سو توا ولا بعدين
انا:ماعندش مانع ابدا بس جتي مالها شي متوفيه
معتز:عادي مرات حوش الاخر يكون خير علينا وتحس علاقتنا بعضنا لان ح يجمعنا
انا:انشاءلله
معتز:توا انا جايك ع موضوع اخر
انا:شنو هو
معتز:جامعة
انا:كنها
معتز:نبي نسجلك
انا:توا خليها
معتز:هي مزال سنه جايه تبدا نسجلك وبعدها سنه جايه تبدي تمشي
انا:توا نسجل سنه جايه ونخش
معتز:تسجيلي سنه جايه معناها تخشي سنه بعدها
انا:دير لي تريحك
معتز:باه لان حتي حنان تبي تسجل توا
انا:خطرها تشيلني لحنان بكرا
معتز:حاضرين

ثاني يوم
نضت درت فطور وفطرت بديت نلم في الحوش وبعدها خشيت درت الغداء جا معتز تغديت انا وياه
معتز:خطرها نبي منك اوراق صور
انا:عليش
معتز:نديرلك اوراق لسيارة
انا:لالا فكني منها سيارة
معتز:سيارة لكي انتي ونبي نديرلك فيها اوراق وبعدها انشاءلله تحرقيها انتي حره
انا:ما نبش يسيرن منها مشاكل اخره
معتز:ما تخافيش مايصير شي توا اليوم نحنا ماشين لحنان نصورك ونديرلك رخصه واوراق
انا:رخصه تبي اختبار وقصة
معتز:لالا رخصتك واتيه
انا:كيف
معتز:توا نلبس وشاح ونمشي بدالك
انا:ههههه بارد
معتز:والله جديات محمد صاحبي عند ولد سيده يدير فيهن
انا:اها باهي
معتز:تبي شي توا
انا:وين
معتز:نبي نشوف باتي يبيني امبدري
انا:تمام اربح

الكاتب:Arhima Alagory

ركب معتز باتي وانا خشيت رقدت
معتز:خير يا حاج
باتي:خير عزو قمعز نبيك
معتز:نعم
باتي:نبي سيارات نشيلو فيهن دبش
معتز:هذي بس امتي تبيهن
باتي:والله ياريت اليوم في العشيه بس انت تقاعد معهم
معتز:والله انا اليوم مش فاضي
باتي:كنك
معتز:ماشي شايل ملاك لصاحبتها
باتي:ضروري
معتز:اها
باتي:ملاك ليش ما تمشي سيارتها
معتز:مزال مادرتلها رخصة ولا اوراق
باتي:باهي جيبهم توا نقاعد معاهم انا
معتز:تمام توا نشوفهم لكي توا

طلع معتز ورن ع محمد
محمد:هي غالي
معتز:اين انت الان
محمد:قدام الحوش
معتز:نبي منك خدمة
محمد:عيوني لكي
معتز:باتي يبي ينتقل للحوش جديد ويبي سيارات فكان تعرف واحد عند سيارة ويكون مضمون
محمد:ضامن ربي قصدي انت شن تبي في مضمون مدام انت ماشي معاه
معتز:انا مش ح نمشي معاهم لاني عندي مشوير وباتي مش عارف كان فاضي ولا لا بس يبدولي يبي يهرب منها
محمد:توا نجي انا كان هضا
معتز:فاضي انت
محمد:وماعندي ماندير
معتز:تمام نصبيلك في فرحك يا غالي
محمد:غصبان عنك
معتز:باهي كيف يصير في سيارات
محمد:قتلك موضوع تم
معتز:جعني مانفقدك
محمد:تم

الكاتب:Arhima Alagory

خش معتز لباتي
معتز:يا باتي نهيتلك موضوع
باتي:حصلت سيارات
معتز:حصلت وتوا يجي معهم محمد يقاعد معهم
باتي:باهي تمام
معتز:تبي شي
باتي:سلامتك
امي:وين ماشي
معتز:ماشي مشور
امي:وين مشور
معتز:نبي نشيل ملاك لحنان
امي:ملاك وحنان اهم من عاد
معتز:ملاك تبي توسع خطرها
اميرة:كلنا نبو نوسعو خوطرنا
معتز:ملاك مش كيفكن
امي:امشيلهن خلاص
معتز:اوكي وطلع

نزل عليا معتز
معتز:هي يا حنه
انا:وين
معتز:نمشو لحنان
انا:هههه كنك مستعجل توا نمشو
معتز:يابارده مانبي نشيلك تصوري
انا:باهي توا نمشي نلبس
معتز:تمام كلمتيها ولا نكلمها
انا:كلمتها
معتز:متاكده
انا:متاكده اها
معتز:باهي هي بسرعه
انا:اطلع توا نجيك
طلع معتز وانا كملت عقاب لبسي وطلعت

مشينا قرطاسية
معتز:هي انزلي
انا:شن نبي فيها قرطاسية
معتز:لا في تصوير ولي فيه نعرفه
انا: اها
نزلنا وخشينا صورنا وطلعنا
معتز:خليك توا نجي
انا:وين ماشي
معتز:محل هنا
انا:باه
قعد شوي وجا جايب معاه شكاير
انا:شن هضا
معتز:بيش ما تخشيش عليهم ويدك فاضيه شوي حاجات
انا:نجكليا ولا ع شان خاطر الابلة حنان
معتز:لا والله عشانك
انا:انا وياها واحد

الكاتب:Arhima Alagory

شوي وصلنا للحوش
معتز:انزلي دقي
انا:باهي امشي
معتز:لالا توا خطيبها خلاص
انا:معتز اسمع كلام
معتز:عارفه انتي الوحيده نعامل فيك وكانك اكبر مني
انا:كيف
معتز:خواتي الاخرات نعامل فيهن بدون احترام وهن اكبر مني وانتي محترمك وانتي اصغر
انا:عليش
معتز:لان المحترم يحترم
انا:حي يا نزار قباني انت
معتز:باهي انزلي دقي هيا
انا:باه

نزلت ودقيت فتحتلي ام حنان
انا:خير عمتي
ام حنان:خيرات ملوكة
انا:كيف حالك
ام حنان:الحمدلله وانتي كيف حالك شن دايره
انا:قاعده الحمدلله وخلاص
حنان:يا هلا
انا:اهلين
حنان:نورتي الحوش
انا:منور بوجودك
حنان:تفضلي
خشينا وقعدنا نهدرزو

عند هلي جا محمد
محمد:خير يا عمي سعد
باتي:خير يا محمد كيف حالك
محمد:الحمدلله وانت كيف حالك
باتي:بخير باتك شن دايره صحته
محمد:لا الحمدلله خير من قبل
باتي:سلملي عليه
محمد:يوصل كلمني امبدري معتز قال تبي تشيل دبش لحوش جديد
باتي:اها
محمد:سيارات ورايه
باتي:خلاص لما يجو نشيلو دبش
محمد:تمام

الكاتب:Arhima Alagory

عندي انا وحنان
حنان:ربي يصبرك
انا:انشاءلله توا نبو نحولو حوش جديد ومشكله ح نسكن مع هلي في حوش
حنان:انشاءلله ربي يهديهم
انا:انشاءلله
حنان:حكالك معتز ع الجامعة
انا:هي فكرة منك
حنان:اها هههه
انا:خلاص ربي يوفقنا توا يديرلي سياره ونجي ناخذك بيها
حنان:تمام

عند عيت هلي جنهم السيارات وعبوهن دبش
باتي:هضا مفتاح الحوش يا محمد
محمد:وين نزلهن
باتي:نزلهن في وسط الحوش
محمد:تمام
طلع محمد بسيارته وسيارات وراه
تلفون محمد رن لقاه معتز
محمد:كنك
معتز:شن ادير
محمد:ماشي لحوشكم جديد
معتز:عبيتو الدبش
محمد:لالا ماشي وسيارات فضيات
معتز:يا نجك ليا متسلفها الحناطة هذي
محمد:صقع عليك
معتز:هي جايكم غادي
محمد:لالا خليك عندك
معتز:تمام

معتز مشا لحوش جديد لقاهم ينزلو في دبش
معتز:الله يعون
محمد:الله يسلمك
معتز:تفضل هذين
محمد:شنو هذين
معتز:ديرلنا رخص واوراق لسياره
محمد:تمام
معتز:تبو شي
محمد:وين بيها
معتز:ماشي واللهي
محمد:باهي تم

في ليل عندي انا وحنان رن تلفوني
انا:الو
معتز:هي اطلعي
انا:خليني
معتز:لالا
حنان:خليها
معتز:اعوذ بالله من شيطان رجيم
حنان:هههههه باهي باه
معتز:قوليلها هيا
حنان:خليها تبات بصوت دلع طبعا
معتز:عيب يا بنت
انا:خلاص توا نطلع
وسكرت
حنان:مزال بدري
انا:لالا خلاص واللهي
حنان:كان قعدتي بتي
انا:لا باتي مايخلنش ونمشي نسعادهم في لمت الدبش
حنان:براحتك

الكاتب:Arhima Alagory

طلعت ركبت مع معتز
معتز:شن غيرتي جوك
انا:اكيد بنت هذي مانتريح الا لما نحكي معاها
معتز:ربي يخليكم ليا
انا:انشاءلله يارب

روحت الحوش لقيت سيارات مزال يشيلو في دبش
انا:من هذوم
معتز:باتي يشيل في دبش
انا:دمعتي نزلت طول يعني خلاص
معتز:توا جتي ذكرها في حوش بس
انا:لالا
معتز:خلاص معنها حتي لو طلعنا من حوش هضا جتي معانا
انا:الله يرحمها

نزلت وخشيت الحوش ومعتز قعد برا
معتز:مزلتو تشيلو
باتي:اها نبي نشيل دبش كله
معتز:كل اليوم
باتي:اها كله اليوم

خشيت لقيت هلي يلمو ودبشي انا مطرطش
اميرة:واخير جت الابلة
امي:تعالي سعدينا يا حنه ولمي دبشك
معتز:كنكم
اميرة:شي
معتز:تعالي يا ملاك
قعدت انا ومعتز نلمو في دبشي ونبكي
معتز: ماتزعلش
انا:حاضر

شلنا دبش كله
امي:يا سعد خلينا نمشو نباتو غادي بمره
باتي:والله ع راحتكم
مريم:صاح ونوضو بدري نلمو دبش ونضموه
باتي:باه
انا:خشيت داري
معتز:لحقني كنك
انا:نبي نبات هنا
معتز:حاضر

الكاتب:Arhima Alagory

طلع معتز
معتز:انا وملاك بيتين هنا
باتي:عليش
معتز:هكي نبو نباتو هنا اليوم
باتي:باه
امي:ودبش غادي من يفرشه معانا
معتز:توا نجيب وحدات يفرشنها
باتي:لالا
معتز:شوري انا بكرا في صبح يجنكم
امي:باه
باتي:خلاص نحنا ماشين

طلعو هلي وانا ومعتز قعدنا في حوش
معتز:توا نجيك باهي
انا:وين
معتز:نجيب عشاء ونجي
انا:باه
طلع معتز وانا قعدت نبكي وخطرت عليا كل حاجة

روح معتز وجايب معاه عشاء
معتز:لقاني نبكي كنك
انا:شي خطرت عليا جتي
معتز:الله يرحمها
انا:شن جبت
معتز:عشاء
انا:هي
تعشينا وقعدنا نهدرزو نحنا في فراشات
انا:عارف حوش هذا قطعة من قلبي عندي فيه ذكريات لي تفرح ولي تزعل تكسر القلب في عرفت الحن من جتي ومنك وفي عرفت القسوة من باتي وامي وعرفت في المكر من خواتي في بكيت اول بكية وفي ضحكت اول ضحكة واليوم اخر يوم في خايفة نمشي حوش جديد نكون برانيه اكثر من حوش هضا
معتز:انا معاك
انا:ربي يخليك ليا
قعدنا نهدرزو ونردو في ذكريات لعند صبح نضت قعدت نبرم في حوش وبعدها طلعنا وسكرنا الباب وقعدنا نشوفو في الحوش من برا وانا دمعتي ع خدي وركبت سياره و ودعت الحوش لي كبرت فيه وماشيه حوش اخر مش عارفه كيف تكون حياتي فيه…..
.
.
.
.
.
#يتبع
تحياتي Arhima Alagory

error: