رواية يتيمة مع والديها
#قصة_من_الخيال
#الحلقة_التاسعة_عشر
.
.
.
.
.
لا اسمح بنشرها بدون اسمي الكاتب:Arhima Alagory قراءة ممتعة للجميع
.
.
.
.
.
وصلنا المستشفي
لقينا امي ومريم ومعاهم خالد وانا نعيط
انا:شعفه وتوبه
امي:اذكري الله
انا:ياربي ياربي فكني منها
خشينا للدكتورة:خشوها كشفت عليا قالت هذي عندها ولادة توا ضروري
خشيت للغرفة عمليات
وخشت دكتورة وانا نعيط
وامي:برا تدعي
ومريم:تبكي
احمد:حتي هو يدعي
شوي هكي وطلعت دكتورة
احمد:شنو يا دكتورة
دكتورة:مبروك عيل
امي:لولولولولي
احمد:الله يبارك فيك
امي:باهي بنتي كيف حالها
دكتورة:اكويسه شويه توا تطلع
امي:باه
احمد:عمتي خلاص كان هذا روحي انتي وخالد
امي:لالا ما نسيبهش
شوي خالد جا
خالد:ان شاءلله مبارك
احمد:لعقبالك ان شاءللهشويه طلعوني وانا نبكي حطوني في دار
امي:لولولولولي مبروك يا بنيتي
انا:الله يبارك فيك
امي:تمت تمسحلي في دموعي عليش تبكي
انا:شفت معتز قدامي وانا نجيب
امي:الله يرحمه
انا:ياربي
خش احمد علينا امي طلعت برا
احمد:مبروك علينا يا قلبي
انا:الله يبارك فيك
احمد:عليك العياطه طلعتي
انا:واعره بكل ياريتك اتجربها بس
احمد:هههههه عنجد نجربها
انا:احمد نبي نسمي العيل معتز
احمد:عليش
انا:ع معتز خويا
امي:هذوم بابا وماما شفتهم
انا:يا روحي انا وري ليا
امي:سمي بالله
انا:بسم الله
امي:توا نجي انا نمشي لحوش نجيب دبش ونجيكم
انا:ريحي روحك يا ماما توا نقاعد بروحي
امي:لالا نبي نقاعد معاك
انا:تمام
احمد:نوصلك
امي:لا خالد قاعد برا
احمد:تمام
الكاتب:Arhima Alagory
طلعت امي وقعدت انا واحمد
احمد:عطي ليا
انا:امشي لبابا
احمد:بسم الله ماشاءالله وقعد ياذن في وذنه
انا:احمد ما رديتش عليا شن نسمي ع معتز
احمد:لا
انا:عليش لا
احمد:انتي عليش تسمي ع معتز
انا:معتز خويا وماعندش عيال ونبي نسمي عليه
احمد:عبير مسميه عليه
انا:بس نبي نسمي ولدي لان لي دار ليا معتز ما دارش لخواتي
احمد:توا بعدين ساهل
خشت علينا عمتي سالمة ورتاج
سالمة:لولولولولي انشاءلله الف مبروك
انا:الله يبارك فيك
رتاج:واخيرا قعدت اعميمه
انا:هههه ان شاءلله تقاعدي ام
رتاج:ان شاءلله
احمد:توا نجيكم انا ماشي
انا:جيبلي دبش
احمد:باه
رتاج:لحق يرقد
انا:ههههه جابو ليا راقد
سالمة:ربي يحفظه ويخليه
انا:امين يارب
سالمة:وين امك
انا:كانت هنا ماشيه للحوش
سالمة:باهي وانتي كنك ما قلتينا ان ولادة متاعك توا
رتاج:صاح
انا:والله يا عمتي ما كنت نندري ع شي شوي بطني بدت فيا وعياط رنيت ع احمد ما ردش عيا رنيت ع امي شوي قالت توا نجيك بعدها حصلت احمد جاني وامي قتلها راه قاعده في مستشفي جتني لكن ماكنتش متاكده من موعد ولدتي والله
سالمة:المهم حصل خير
عند هلي
امي دقت ع باب لانها نسيت مفتاح
خالد:من فيه الحوش
امي:اميرة
خالد:رني عليها
امي:حتي هو راي
رنت ع اميرة واميرة كانت قاعده في حمام حشاكم
امي:وين راحت البنت
اميرة:من ع باب
امي:افتحي يا ابلة
اميرة:من
امي:انا امك
اميرة:فتحت وين كنتي قلبت عليك دنيا
امي:كنت في مستشفي
اميرة:عليش كنك
امي:ملاك جابت وليد
اميرة:شنو ملاك جابت
امي:اها ملاك جابت
اميرة:باه
امي:بيش اديري غداء لباتك وعشاء
اميرة:وانتي
امي:نبي نقاعد مع اختك في مستشفي
اميرة:سمحه حتي هذي هي تجيب ونحنا نقاعدو معاها
امي:حطي لسانك في فمك فاهمه ولالا
اميرة:باه
خشت امي جابت دبش من حوش وبعدها طلعت للمستشفي
الكاتب:Arhima Alagory
عندنا في مستشفى
رتاج:يهبل بذات عيونه نبي ناكلهن
انا:هي الا وليدي
سالمة:شن تبو تسموه
انا:مش عارفه بس انا خاطري نسمي معتز لكن احمد مش طارب
سالمة:عليش
انا:مش عارفه
رتاج:عزو انا عمتك رتاج وهذي امك بارده
انا:عيب عليك يا رتاج
رتاج:نبصر معاك امك سمحه هذي
امي:سلام عليكم
سالمة:عليك سلام
امي:خير يا سالمة مبروك ما جد عليكم
سالمة:الله يبارك فيك الحمدلله ع سلامة ملاك
امي:الله يسلمك
رن تلفوني لقيت حنان
انا:الو
حنان:سمعتي جامعة اسبوع جاي نبدا
انا:تحكي من جدك
حنان:وحق الله
انا:عليك قصة
حنان:كنك
انا:خطرها جبت
حنان:شن جبتي
انا:فكرونه
حنان:بلا براده
انا:تي ولدت يعني جبت عيل
حنان:اها ههههه الف مبروك لولولولولي
انا:سلمك
حنان:امتي جبتي
انا:اليوم في صبح ماليا شي
حنان:وين قاعده
انا في مستشفى ****
حنان:توا نبرم عليك
انا:باه
سكرت
امي:كنك
انا:كني
امي:تقولي عليك قصة
انا:اها هذي حنان قالتلي ان جامعة بدت
رتاج:عليش عليك قصة
انا:العيل وين نمشي بيه
رتاج:عليش دايرة موضوع انتي جيبي حطي عندنا وانا ورحاب توا نمسكوه
امي:ولا عندي انا
انا:نقصكم معانه انتو
سالمة:توا من هنا نين يجي يوم الجامعة ساهل
امي:ايوه الله
عند عمتي
خالد:شن من ماشي
مروه:انا
صفاء:حتي انا
مريم:كلنا ماشين
خالد:وعليش كلكم
عمتي:هك مكسدين كيف عليش كلنا نبو نبركولها
صفاء:ونشوفو البيبي
خالد:تشوفي شنو
صفاء:البيبي
خالد:صار بيبي هي باهي
عندنا في مستشفي عيت عمي روحو قغدت انا وامي
امي:ماشاءالله عليه
انا:يشبه لمن
امي:يشبهلك
انا:يا كله يشبهلي
امي:والله انتي وصغيره هكي الفم وحناك
انا:وانا صغيرة
امي:اها انتي وصغيرة كنت قاسية معاك كنت نشوف فيك تبكي مرات نرضعك ومرات جتك تاخذك امي تحكي وتبكي كان عياطك يقطع القلب بس انا لان خفت نخسر باتك عفست ع قلبي من اجل انسان يسكن قلبي انا واخذه باتك ع علاقة كم سنه ولهذا ما نتحمل بعد عليه باتك كان يبي عيل مع معتز بيش يدفع عليه ويكون معاه بس جيتي انتي وقتها حلف ان مدام انتي في دار معش يخش عليا فيها نين جت جتك وخذاتك بعدها باتك بدا يردلي شوي بشوي بس بعدك انتي معاش حملت انا وقعد عندنا عيل واحد هو معتز وانا خذيت ع معاملتي معاك بس بعد معتز كان يهزب فينا عليها انا نحن عليك شوي بس بعدها نقول تعودت نين سكنتي معانا وتميتي تحت عيني وشفت معاملتك ليا كيف تختلف ع خواتك وبعد جيتي ازوجتي وتبي تطلعي من صاله وعرفت اني قيمتك وعرفت روحي ضلمتك ونبيك تسامحيني وتبكي امي
انا:نبكي يا ماما لي صار نسيته انا ودمعتك اغلى من كل شي شوفت دموعك تقطع قلبي اكثر من معاملتك ليا
امي:حضنتني وقعدت تبكي اخره
انا:خلاص يا ماما
الكاتب:Arhima Alagory
شوي دق باب
امي صبت عند روشن وتمسح في اعيونها
انا:تفضل
احمد:سلام عليكم
انا:عليك سلام
احمد:كنك
انا:كني
احمد:اعيونك كنهن حمر
انا:شي
احمد:باهي جبتلك دبش
انا:تمام اطلع
احمد:باه
طلع احمد وامي جتني
امي:تلبسي هنا
انا:اها بس نخش حمام قبل
امي:هي تعالي
انسندت ع امي و مشينا للحمام
انا:احمد خش اقعد مع العيل
احمد:باه
جت عمتي وبنات
خالد:اهي دار
خشن
مريم:مافيها حد هذي
خالد:وين راحو
احمد:في هنا تعالو
خالد:اهو احمد
مريم:ههه زرقت راسي شفت سرير فاضي مبروك
عمتي:خير يا احمد مبروك
احمد:الله يبارك فيكم
عمتي:وين ملاك
احمد:في حمام توا تجي اهو العيل
عمتي:بسم الله ماشاءالله عليه تبارك رحمن
مروه:يهبل
خالد:يترب في عزك ان شاءلله
احمد:انشاءلله هي نطلعو
خالد:هي
شوي طلعت انا وامي
انا:خلاص معاش نقدر
امي:هي بس
انا:يا ماما والله خلاص
امي:نبو نقعدو في ممر باهي
انا:لالا غير نتريح
امي:خوافه كيفي انتي
انا:هههه مش خوافة
امي:وريني
قعدت نمشي شوي بشويه نين خشينا دار شفت بنات وعمتي
انا:بسم الله شن جابكم
عمتي:توا نروحو
انا:لالا خليكم
صفاء:قعدين وع قلبك
انا:عليك قصة
عمتي:مبروك ان شاءلله
انا:الله يبارك فيك
مريم:مبروك نبي نزغرتلك غير معانا خالد
انا:هههه لالا عادي
في حوش هلي
باتي:يا حميده حميده
اميرة:نعم يا بابا
باتي:وين امك
اميرة:عند ملاك
باتي:كنها ملاك
اميرة:ما جابت عيل
باتي:وكان جابت يعني اول وحده تجيب مثلا
اميرة:مش عارفه
باتي:توا نكلمها
الكاتب:Arhima Alagory
عندنا في مستشفي
قعدين نهدرزو امي رن تتلفونها لقاته باتي طلعت برا وردت عليه
باتي:وين قاعده
امي:ما قلتلكش اميرة
باتي:قلتلي عندك من يجيبك
امي:انا قاعده معاها
باتي:شنو روحي لحوشك
امي:يا سعد بنت عارف شن صار معاها وبنت بنتي وانا مش مسيبتها
باتي:سكت
امي:كان تبي حاجه قولي
باتي:سلامتك
وسكرو
عندنا في دار عمتي وبنات صبن يبن يروحن
انا:خليكن مزال بدري
عمتي:لا والله نبي نمشي
انا:براحتك ما نزرش عليك
مريم:توا نجيك انا
انا:خلاص بس مرات انا بكرا نطلع
مريم:نجي نبات عندك
امي:لالا انا قاعدة معاها انتي روحي تريحي
عمتي:كان هذا توا نقاعد انا
امي:لالا انا قاعده بس نبي منك حاجة وحده
عمتي:شنو
امي:تعالي
طلعت عمتي وامي من دار
امي:نبيك بكرا في صبح تمشي للحوش انتي وبنات وتوعو اميرة وتبرمو ع حوش وتاخذو سرير وتحطو في دار معيشة وتاخذي فلوس تلقيهن في دولاب متاعي وتشري بيهن حاجات شكلاطة ما شكلاطة وتحجزي عند حلواني في انواع بشكوط وموالح نبي نديرلها لمه
عمتي:الله يجبر بخاطرك كيف ما جبرتي بخطارها
امي:ما تنسبش انها بنتي
عمتي:مش نسيتها
امي:خلاص كيف ما وصيتك
عمتي:كوني هانيه
امي:انشاءلله
شوي روحو عمتي وبنات وقعدت انا وامي واحمد حتي هو روح شوي ع مغرب خشت علينا حنان
حنان:سلام عليكم
امي:عليك سلام
انا:كنت راقده
حنان:الحمدلله ع سلامته ملاك
امي:الله يسلمك
حنان:راقده
امي:توا نوعيها
حنان:لا خليها راقده
امي:لالا راقده امبدري
حنان:خليها جايها السمور وتعب
امي:شن داير وليدك
حنان:اكويس حال العياط وخلاص يرقد في صبح وليل ياخذه ع طوله
امي:اها هذا عيال
حنان:بعدك جايه جامعة
امي:قتلها حطي عندي وماعليك فيه
حنان:حتي انا هذي انديرها
انا:نضت شفت حنان
حنان:خير يا ملوكه
انا:خير حنان
حنان:مبروك حبيبتي
انا:الله يبارك فيك
حنان:شنجوك
انا:اكويسه بس حاسه دوخه
امي:مرات هبوط صبتلي امي عصير عنب وصبت لحنان
حنان:شكرا
امي:عفوا
انا:امتي جيتي
حنان:ماليا شي واللهي نبيها من صبح بس عمر ما فضاش بكل توا خش يبي عشاء قتله شيلني قبل
امي:هههه شاطرة
انا:صدقت وحده بوحده
حنان:خلاص توا نجيك بعد تطلعي توا نبي نروح
امي:مربوحه
انا:خلاص بوسيلي عزو
حنان:حاضر
الكاتب:Arhima Alagory
ثاني يوم
نضت في صبح شفت احمد
احمد:صباح الخير
انا:صباح النور امتي جيت
احمد:جيت توا هذا كنت في سجل مدني سجلته
انا:شن سجلته
احمد:سالم ع باتي
انا:تحكي جد
احمد:امسكي شوفي
خذيت كتيب شفته سالم
انا:سكرت مش قتلك نبي معتز
احمد:معتز اختك مسميه عليه
انا:بس حتي انا اخت معتز
احمد:وانا نبي العيل ع جده وسميت وانتهى الموضرع
انا:ليش ما قتلي
احمد:عليش نقولك
انا:انا امه العيل
احمد:انا باته وانا اوله بيه
امي:خير كنكم
احمد:مافي شي بس ملاك مش عجبها اسم العيل
امي:شن سميته
احمد:سالم ع باتي
امي:عاشت الاسامي
احمد:تعيشي وتسمي وطلع
انا:قعدت نبكي
امي:عليش يا بنيتي تبكي
انا:نبي نسمي معتز
امي:توا تسمي توا تجيبي واحد اخره وتسمي
انا:ماصدقت روحي جبت وانا نرج فيها بساعة ودقيقة
امي:ما تزعلش روحك توا يجيك واحد اخره وتسمي معتز حتي هو عند الحق اول عيل لهم
انا:ان شاءلله
امي:هي نوتو اروحنا توا يجينا خالد
انا:عليش
امي:تمشي معايا للحوش
انا:لالا نروح الحوشي
امي:تروحي بس بعد ما نتهنى عليك
انا:امي والله تفكيني
امي:تبي تنقصي فرحتي
انا:لا
امي:اسمعي كلامي معنها
انا:حاضر
بدينا نلمو في دبش وكل حاجه تمت واتيه وخذيت سالم وغطيته وبعدها جانا خالد طلعنا للحوش وصلنا الحوش لقينا عمتي وبنات وديرات جو ومواتين دار خشيت رقدت وامي خشت ع باتي في دار
امي:امشي سلم ع بنتك وبركلها
باتي:غير قولي خير
امي:خير
باتي:توا نمشي
امي:توا امشي
باتي:خلاص انتي حسيتك تامري عليا
امي:مش انتامر بس نبي بنت تفرح كيف ما فرحن باقي بنات
باتي:باهي
في دار كنت قاعده ونرقد في سالم
باتي:سلام عليكم
قلبي رد سلام قبل لا ينطقه فمي
انا:عليك سلام خير يا باتي كيف حالك
باتي:قرب مني الحمدلله الحمدلله ع سلامتك وانشاءلله مبارك
انا:الله يسلمك ويبارك فيك
باتي:مسك سالم ماشاءالله ربي يحفظه ويكون من حفاظ كتاب الرحمن
انا:انشاءلله يارب
باتي:نقصتك حاجة
انا:سلامتك يا باتي
باتي:ردبالك منه و صقع
انا:ان شاءلله
طلع باتي شفاته اميرة زادت نار الحسد لي عندها وتعقدت خشت عليا تبي تنكد عليا خشت ورها مريم
اميرة:خير يا ملاك
انا:خير اميرة كيف حالك
اميرة:كنت تمام
انا:ان شاءلله ديمة تمام
مريم:اميرة تعالي نبيك
اميرة:شوي
مريم:كرتها تعالي نبيك قتلك
الكاتب:Arhima Alagory
طلعت هي وياها
مريم:اسمعيني يا اميرة واقسم بالله نشوفك تقربي ملاك نوريك
اميرة:شن تبي اديري مثلا
مريم:تعرفي روحك شن دايره من قبل كل يقعد عند باتي
اميرة:شن قصدك
مريم:قصدي واضح يعني ايام تمشي ناصر ومواعيد مع هذا وهذا كل عند باتي فاهمه ولالا
اميرة:خطيني تراه
مريم:انا قتلك واهي ملاك قدامك امشي نكدي عليها تراه
اميرة:خشت دارها وطبقت باب بقوة
مرت الايام وانا عند هلي وما صار شي جديد غير ان هلي دارولي لمه ودارو عشاء كبير ويعني جبرو بخاطري وفرحوني بكل واميرة ما دارت شي غير تلوي في وجها عليا وتقاعد متعقده وخلاص وانا بدت جامعة عندي ونحط في سالم عند رتاج ونحنا طالعين بعدها نمشو للجامعة بس في حاجة جديد وهي انها احمد متغير معايا بكل مش كيف قبل يعني قعد شن يدير يخش معاش يهتم بيا يقاعد مهتم بسالم وانا فيتني بكل توا تعرفو شن يدير اخره نرجعو قصتنا اها وخطرها عبير جوها تمام التمام ونحكي معاها مره مره لان انا ما عندش نت في الحوش بس لما نمشي لهلي ولا عيت عمي نحكي معاها
في حوش
انا:احمد هي نوض
احمد:شن تبي
انا:نوض نمشي للجامعة وانت شغل
احمد:مش ماشي للشغل انا وانتي مش ضروري جامعة اصلا
انا:احمد كيف هذي هي عاد
احمد:سكنتي راه خاطيني
انا:باهي نبي نمشي للجامعة كيف الحل
احمد:مش شوري بيك توعيني اخره نصبي نكسرك فاهمه ولالا
انا:باه
طلعت للصاله ياربي هذا كانه رن عليا تلفون
انا:الو
رتاج:وينك كنكم ما جيتو اليوم
انا:والله ياحنه احمد ما باش يشيلني
رتاج:كانه
انا:والله ما نعرف هو له ايام هكي يروح متاخر ويرقد ما حوته ما ينوض وابسط حاجة يهزب حتي شغل قال مش ماشي
رتاج:ان شاءلله خير
انا:ان شاءلله
رتاج:خلاص يا ملوكه انتي وسعي بالك بس
انا:ان شاءلله
شوي سكرت منها وسالم قعد يبكي
انا:جيتك يا ماما هي اسكت كانه اسلومه جعان خلاص حبيبي اس درتله رضاعة وقعدت نرضع فيه رنت عليا حنان
انا:اوووف هذي حنان
انا:الو نعم
حنان:وينك
انا:في حوش
حنان:تحكي جد معقوله
انا:الله غالب احمد راقد
حنان:واعيه
انا:ما يبش ينوض قالي مش ضروري
حنان:عليك موال
انا:خليني نسكر خير
حنان:باهي مع سلامه
انا:سكرت ومشيت قعدت نبرم في حوش ونلم فيه
بعدها كملت حوش بديت ندير في الغداء رن عليا تلفون لقيته مروه
انا:الو
مروه:قتلك راه مريم توا شالها خالد في حاله
انا:كنها
مروه:انضني تبي تجيب
انا:من معاها
مروه:خالد وامي
انا:ربي يكون معاها
مروه:ليش هيا واعره
انا:انتي عليش رنيتي
مروه:رنيت نبي نحكيلك ع مريم
انا:باهي عليش تسالي
مروه:لما شفت مريم نين خفت
انا:ههههه عطك الخير
مروه:تضحكي عليا
انا:لالا المهم خلاص توا سكري وقوليلي شن يصير
انا:ان شاءلله
الكاتب:Arhima Alagory
عندهم في مستشفي
عمتي:ياربي ياربي ياربي كون معاها يارب
خالد:يارب احفظها ليا هيا ولي في بطنها
دكتورة:مبروك بنت
عمتي:لولولولولي
خالد:الله يبارك فيك
انا رنيت ع عمتي
عمتي:الو
انا:شن صار عند مريم
عمتي:بنت
انا:الحمدلله ياربي
وسكرت
ناض احمد
احمد:ديريلي فطور
انا:باه
خشيت درتله فطور وطلعت لقيته احمد ماسك سالم
انا:تفضل
احمد:من لي جابت
انا:مريم نبي نمشيلها
احمد:صبح راه
انا:وين صبح ظهر توا
احمد:انا عندي صبح ومزلتي تبي اطولي لسانك نقص لكي
انا:باهي نمشي بروحي
احمد:فك مفتاح امسكي هذا مفتاح سيارتك وامشي اطلعي بيها وفكيني من هرجتك
انا:خذيت مفتاح وسكتت
مشيت غيرت لسالم وخذيت معايا في سيارة وطلعت للمستشفي
عندهم في مستشفى
عمتي:الحمدلله ع سلامتك
امي:لولولولولي مبروك يا بنيتي
مريم:الله يبارك فيك
اميرة:وريني بنوته سمحه
مريم:مزال ما جبوها
انا:سلام عليكم
كلهم:عليك سلام
انا:مبروك ما جبتي
مريم:الله يبارك فيك
انا:وين العروس
عمتي:توا تجي
امي:عطيني عيون جتت هو
انا:خوذي فكيني من هرجته
امي:حرام عليك العسل هذا مافيش منه
شوي جابوها لنا كانت كيف القمر
انا:ماشاءالله عليها اسمعي يا مريم راهي نبي ناخذها لسالم
امي:والله حجزوها قبلك
انا:من حجزها
امي:عيت كندا
انا:لالا سلم عيونهم
مريم:خلاص انديرو قرعه
عمتي:خالد تعال اذن لبنتك
خالد:هي جا خالد وقعد ياذن
عند احمد
احمد:الو
صاحبه:قتلك اليوم مايصير شي منها تكسيده
احمد:عليش
صاحبه:عندي موضوع
احمد:موضوع من ورنا
صاحبه:والله مش من وراك بس ماشي انا واحد اخره نبي نجيب حاجات
احمد:تمام
عندي انا روحت الحوش ودرت الغداء بعدها مشيت لعمتي وتميت نساعد فيهم رن عليا تلفون ليقته احمد
انا:الو
احمد:وينك
انا:عند عمتي تبي حاجه
احمد:اها نبي نبيك انتي
انا:كيف يعني
احمد:مرايف عليك واليوم قاعدت في حوش ع سابك تمشي وتسيبني
انا:ما انت لكي كم يوم فيتني
احمد:نرجا فيك باهي
انا:باهي توا نجي
الكاتب:Arhima Alagory
سكرت منه ومشيت للبنات
انا:يابنات انا نبي نروح توا نجيكن بكرا
بنات:تمام
روحت الحوش خشيت مالقيت حد وضي طافي ولعت ضي انا وين احمد يقولي تعالي خشيت ولعت ضي دار لقيتها ورد ع سرير وجو شموع وهكي
انا خشيت حطيت احمد في سريره وشوي باب دار اسكر
انا:ووو
احمد:خوافه
انا:بارد
احمد:من بارد
انا:انت
احمد:متاكده
انا:اها
احمد:توا نشوفو
عند عيت عمتي
عمتي:شن تبي اتسميها
مريم:خالد يبي يسميها عليك
عمتي:لالا ماحد يسمي عليا
مريم:عليش
عمتي:هك يبي يجبر بخاطري بخليني نسميها انا
مريم:باه
عمتي:سموها هاجر
مريم:خلاص هاجر
عندي انا بعد مرور الوقت قاعده في حضن احمد
انا:زعلانه منك راه
احمد:توا خطرلك تقوليها
انا:ههههه مش قتلك بارد
احمد:توا نشوفو
انا:لالا نبصر بس معاش تسيبني
احمد:حاضر
انا:اكيد
احمد:اكيد
ثاني يوم حطيت سالم عند رتاج ومشيت جامعة
حنان:كانه راجلك
انا:امس جو سمح بكل
حنان:انا نقول عليش وجك ناير
انا:حيوانه
حنان:هي انا عندي محاضرة اوكي
انا:اوكي
قعدت شويه بعدها خشيت محاضرة وبعدها روحت الحوش لقيت احمد داير الغداء
انا:من احمد يطيب
احمد:اكيد
انا:غريبه
احمد:مافيش غريبه امشي حطي سالم وتعالي نتغدو
انا:هي
حطيت سالم في دار ومشيت غيرت دبشي وجيت قعدت نتغدا انا وسالم
انا:خطرها راه عازم عليك خالد في عشاء
احمد:اها عارف كلمني
انا:تمام
جا يوم العشاء مشيت انا من العشية
انا:مريم انتي قاعده قاعده ردبالك من سالم
مريم:ماعليك
شوي تلفوني رن لقيت ع ماسنجر عبير
انا:الو عبير
عبير:فتحت فيديو شن اديري
انا:قاعده عند عيت عمتي عشاء عروسه متاعنا
عبير:متاعكم في عينك شورنا نحنا
انا:اهي شوفيهم رقدين
عبير:نجيهم ليا يا عزو تعال اجري ملاك تبيك
معتز:ملاك
انا:عزو كبرت يا خويله
معتز:كيف حالك
انا:الحمدلله وانت
مريم:وريني
انا:اهو هذي مريم
معتز:فكيني منها
انا:هههههه لسان طاول
عبير:بكل وقعدت تبكي
انا:عبير كنك
عبير:مرايفه عليكم كلكم طولت غادي
انا:عدت سنه ومزال 4
عبير:واجد المهم توا نحكو مره اخره
انا:باه باي
سكرت ومشيت ودرنا العشاء وتعشو الضيوف وجو تمام وكل واحد روح الحوش ومرت الايام وجوي تمام انا واحمد
في يوم خميس كنت عند هلي
امي:شن حال احمد
انا:تمام الحمدلله
امي:باهي الحمدلله
مريم:يا امي هاجر متعبتني بكل
امي:كنها
مريم:تاخذ صبح نوم وبعدها ترقد في ليل
انا:في صبح ما تخليهش ترقد
مريم:كيف نديرلها
انا:قلقيها
امي:ههههه عطك خير
انا:شن حل خليها ترقد ولا تبيها تلم معاك
مريم:بارده بس لا انا لا خالد نرقد خالد هذك اليوم رقد في مربوعه
امي:تحملو هذي ضنوة
اميرة:مافيش خير من العزوبيه
مريم:بكل صدقتي
انا:حسيت بدوخه وكبدي تلعب مشيت نجري حمام
امي:كنها هذي
مريم:مش عارفه
امي:جت تجري
مريم:كنك
انا:حاسه بدوخه
مريم:معقوله تقاعدي حامل
امي:ليش لا مرات
انا:حامل
امي:امشي جيبي جهاز اختبار حمل بس
انا:توا
امي:اها
انا:باه
الكاتب:Arhima Alagory
مشيت بسيارة الصيدلية وجبت جهاز وروحت للحوش
امي:امشي شوفي
انا:توا نشوف في حوش
امي:لالا امشي توا نبي نطمن
انا:باه
خشيت حمام ودرت جهاز بعدها طلعت
امي:كيف صار
انا:مديتلها جهاز
امي:لولولولولي مبروك
مريم:شن صار
امي:حامل
مريم:ماشاءالله مبروك
اميرة:كنكم
امي:ملاك حامل
اميرة:مبروك قالتها بلا نيه
المهم مره الوقت ودرنا عشاء بعدها مريم روحت واميرة رن تلفونها خشت
اميرة:الو وينك
البنت:كنت مش فطنتله
اميرة:اسمعي الموضوع لي حكيتلك عليه نبيك تنهي الموضوع واديري لي قتلك عليها في اسرع وقت
البنت:عليك الواعره انتي
اميرة:ع اساس طيبة انتي كيف ما قتلك
البنت:تمام
عندي انا وامي
انا:خلاص نبي نروح
امي:خليك
انا:لا وين قريب ساعة 11
امي:باهي مربوحه بس ردبالك من روحك ومن في بطنك
انا:ان شاءلله تصبحي ع خير
امي:وانتي بخير
روحت في طريق حسيت بدوخه خفيفة درست شوي بعدها طلعت للحوش وصلت لقيت سيارة احمد قاعدة جيت فتحت باب وخشيت وهنا كانت صدمة …..
.
.
.
.
.
#يتبع
تحياتي Arhima Alagory