الجوكر | للكاتبة Koka Saleh
الـحـلـقـة ( 4)
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
لايك قبل القراية وتعليق بعد القراية والكلام للكل فكوني مالقراية بدون تفاعل راه والله التفاعل بالايكات والتعليقات هو أكثر شيئ ايحفزني للكتابة وبذات التعليقات الطويلة انحبهن?
وللعلم بس نا نقرا في كل التعليقات ??
“”””””””””””””””””””””””””
طلعنا مالزعيم ومشينا الفندق بتنا اليوم هذكي فيه ومالصبح كان جابر حاجز الليبيا وكأن كان متأكد اني حنوافق انخش العالمهم وأول ما وعينا فطرنا وطلعنا عالمطار وتوجهنا الليبيا
/
/
/
وصلنا الليبيا اول ما نزلت للمطار اذكرت لحظة اطلوعي منها وعرفت كيف فيه فرق كبير بين طلعتي منها وردتي الها واني نا توا شخص مختلف وقوي اكثر ماحد يصور وحنعرف كيف حناخذ حقي منها لان السبب الاول في عدم حمايتي هي ?
القينا سواق الجابر يرجى فينا عند المطار ركبنا امعاه وطلعنا
انشوف في الشوارع وكل شيئ حسيت انها مش متغيرة واجد عن زمان هي هي نفس المباني ونفس الشوارع وحتى ونفس الناس
وصلنا عند أكثر مكان فقدت فيه طفولتي وحسيت فيه بيتمي أكثر مكان تعاقبت فيه بالظلم اكثر مكان حسيت بيه بعجزي وبضعفي وان ماعنديش حد يحميني فيه
بس هالمرة ردتي له تفرق هالمرة نا اقوى من قبل بواجد هالمرة نعرف كيف نحمي روحي كويس
من اول ماشفت فيلا جابر حسيت اني لازم نفرض وجودي عالكل لازم كلهم ايخافو مني بجابر بككل
وقوتي مش حتزيد ومش حتكتمل ومش حنخلي الكل ايديرولي الف احساب الا لما انتمسك بشغلي مع المنظمة هذي ولازم نثبت ذكائي وانكون عضو مهم حتى أهم من جابر عشان نقدر ناخذ حقي من الكل
في لحظات حسيت ان عشان اندير الشيئ هذا كله لازم انكون انسان بدون لا مشاعر ولا عواطف انسان قاسي وقلبه ميت
بحتت في جابر
نا:عيلتك عارفة اني بنرد امعاك
جابر;لا الحق مازال مافيش حد عارف
نا هزيت براسي وسكتت
جابر:خلينا انخشو
خشيت ونا امقرر ان لازم انكون مهم وليا مكانة مهمة في الحوش هذا ولازم الكل يحسبولي الف احساب
خشيت مع جابر طبعا الفيلا كانت متغيرة بكل من جوا ومن برا مديورلها ديكورات جديدة واثاث جديد
بس الشيئ اللي ماتغيرش هو الاحساس بألم طفولتي اللي ماانسيتش بكل
قمعزت نا وجابر عالصالون جوا ونا انبحت وانراقب بعيوني في المكان وجابر كان يحكيلي علي تغيير ديكورات الفيلا وان جاب ناس من برا غيروهن له ونا جزء من تفكيري امعاه والجزء لاخر انفكر شن بندير اول ماانشوف سناء
بس طبعا كنت مركز ونسمع كويس في جابر شن قاعد يحكي وهذا احسن شيئ تعلمته في المدرسة ان نقدر انحط تركيزي وانتباهي في اكثر من حاجة
وجابر يحكيلي مع نزلت شاب من فوق كاين ابيض وشعره فيه لون وداير لحية بسيطة وكان طوله متوسط وارقيق ودغري عرفته أول شخص ضلمني وكذب عليا واكثر شخص تعاقبت بسببه #راشد أكثر حد كرهته في طفولتي
هو نزل مالدروج وجابر ناداه
جابر:راشد تعال نبيك
راشد جا شورنا:الحمدلله علي سلامتك يااحويج
جابر:الله ايسلمك وين كنت طالع
راشد:ماشي الأصحابي
جابر:قبل ماتمشي سلم
راشد مدلي يده
جابر:شكلك ماعرفتش هذا خوك احمد
يد راشد مازالت في يدي ضغطتله عليها زين لين بان الوجع علي ملامح وجه وقعد ايبحت فيه حطيت عيني في عينه وبنظره كلها حده وكنت انقوله بنظرتي اني ماانسيتش شيئ ماللي درته فيا وزدت ضغطت علي يده عشان انبينله اني نا توا أقوى منك
كان واضح الم يده علي وجه بس مش قادر يحكي
وبعد وصلت رسالتي له طلقت يده
راشد:باتي نبيك في كلمة بروحك اشوي
نا بحتت فيه هك ?
جابر:ان شاءلله خير
وعدو من جنبي هم الاثنين بس نا كنت عارف كويس راشد شن بيقول لان فهم الشخصيات وقرأتهن قعد اسهل شيئ عندي
/
/
عند راشد وجابر في المكتب
جابر:كنك شنو المهم اللي بتحكيه
راشد بعصبية:هذا شن رده عندنا هنا وكيف اتقول خويا
جابر:اول حاجة اللقطة اللي درتها وكيف سلمت عليه هذي غلط وبعدين يااستاذ من انتو اصغار تبنيته وقلت خوكم ولما كمل قرايته برا لازم ايرد وايعيش امعانا
راشد بعصبية:بس هذا مش خونا هذا واحد مالشارع وانت اللي بتفرضه علينا
جابر بعصبية:خوك وغصبن عنك وعنده اوراق يثبتن ان ولدي زيك زيه
راشد:معناها قصة التبني كذبة وهو ولدك بالحقيقة وجايبة عشان تعطيه حصته في فلوسنا
جابر بعصبية:لو ولدي يالحقيقة كنت قلت مش خايف من حد نا والفلوس اللي اتقول فلوسك هذينا مازالن فلوسي ونا الامر الناهي فيهن مازلت مامتتش عشان حظرتك تورثني
راشد بعصبية:وانت لازم تعرف ان هذا مش خونا ومستحيل نسمحوله ايخش بينا ونا حنعرف كيف انطلعه من هنا
جابر بعصبية:اعلى مافي خيلك اركبه واحمد امعانا وزيك زيه بزبط
راشد:تمام تمام وطلع
نا مازلت امقمعز تحت خطم عليا راشد وكاين معصب بككل ضحكت وعرفت اني قدرت انخشش في قلبه الرعب من اول ماحقني وهذي اول حاجة حيشوفها مني
/
/
طلع راشد وهو معصب وكانت سناء كيف نازلة من سيارة السواق وشافت راشد وهو طالع معصب
سناء:راشد
راشد لف جيهة سناء وجاها:نعم
سناء:كنك طالع بسرعة هكي شن صاير
راشد بعصبية:خشي شوفي اللي جوا توا تعرفي
سناء:شن فيه جوا
راشد:باتي شكله ودر وماشي رد الفرخ اللي اسمه أحمد وكاتبه علي اسمه ويبيه ايشاركنا في كل حاجة
سناء تغيرو ملامح وجها:قصدك احمد جوا
راشد:اها وباتي يبينا نعتبروه خونا وقالي ان زيي زيه جايبلنا واحد لقيط وبيدير راسه براسنا
سناء:خلاص انت امشي وانا حنعرف انتفاهم مع جابر
راشد:قوليله ان كلنا مش حنسكتو وان يا نحن امعاه يالفرخ هذا
سناء:تمام غير امشي توا وبعدها ساهل
راشد طلع وركب في سيارته وسناء خشت جوا
واول ماخشت جت جيهتي وجت عيني في عينها ومدتلي يدها وسلمت عليا ونا امقمعز
بس دغري قدرت نقرا عيونها نظرتها مش غريبة عليا كانت كيف نظرة جابر حسيت ان سناء عارفة شغلنا وان هي عضو مالمنظمة من نظرة عيونها حسيت بخوفها مني لان قعدت واحد منهم وهذا معناه اني قعدت قوي وان مش ضعيف زي قبل وبهكي معناها هي وعيالها في خطر توا من رعشة يدها اللي في يدي قدرت انحدد نسبة خوفها اللي هلبت 60% مني
سناء سحبت يدها:الحمدلله علي سلامتك
نا شفتلها بنظرة حادة:الله ايسلمك
سناء:نورتنا واعتبر الحوش حوشك
نا:أكيدة ?
سناء:تفضل تريح انسلم علي جابر وانجيك
نا:تمام
هي مشت وحسيت اني لازم انتأكد من إحساسي وإن هي امعانا أو لا
/
/
عند سناء خشت علي جابر في المكتب وكان ايطلع في أوراق مهمة وصور
سناء:انت رديت احمد هنا وتبيه ايعيش امعانا
جابر:قولي الحمدلله عالسلامة قبل
سناء:الحمدلله عالسلامة وتوا جاوبني
جابر:اها حيقعد امعانا هنا
سناء:وصح قصة انك كتبته باسمك
جابر:صح وحيشتغل امعايا في الشركة اخرى
سناء:انت من امتى كتبته علي اسمك
جابر:من يوم اللي تبنيته
سناء:وليش ماقتلي الكلام هذا مالاول
جابر:مش مظطر انقولك وهنا قرارات من فوق وكان لازم انوافق عليهن
سناء بعصبية:حاجة زي هذي كنت تقدر مااتوافقش عليها
جابر بعصبية:ماانوافقش ويقتلوني هكي انتي تبي صح
سناء:مش صح بس كنت اتقوللهم انتبناه من دون ماانحطه علي اسمي
جابر بعصبية:لازم اتحطي في راسك ياسناء ان لو مادرتش هكي ولو ماتبنيتش واحد وحطيته علي اسمي كانو حيجندو واحد من عيالك
سناء انصدمت:شنو
جابر:هذا اللي شنو اللي درته هذا عشان نحميهم ساد انا وانتي في الطريق هذي
سناء:بس بهكي هذا حيورث مع اعيالي
جابر:مااتخافيش نا امرتب الكل حاجة وحق عيالك ماحد ياخذه وبعدين هو ذكي وفي كم شهر متأكد حيدير اكبر من ثورتي انتي ماشفتيش كيف من فوق متمسكين بيه
سناء:بس برضو فيه منه الخوف انت عارف اللي درناه فيه وهو اصغير اكيدة مش ناسيه
جابر:اللي درناه كان اصغير واكيدة مش متذكرة وحتى لو متذكرة موضوع عادي انتو توا عاملوه اكويس وديريه ان ولدك وهو حيعاملكم اكويس
سناء:مانقدرش انعامله ان ولدي لانك ماشفتش نظرته ليا برا قاعد واضح في عيونه الحقد وان مش ناسي اللي صار وزي ماقلت هو ذكي ونا خايفة من ذكائه هذا ايرد علينا
جابر:مااتخافيش دبينه مازال في يدي وهو مايقدرش ايدير شيئ مازال تحت امرتي
سناء:وافرض طلع من تحت يدك وطلع من امرتك
جابر:مايقدرش انا مازالت سلطتي اكبر منه ودبيني مازالت محسسة ان هو اضعف مني حيقعد ديما خايف وتحت سلطتي
سناء:ان شاءلله
جابر:انتي بس عقلي راشد واحكيله ان حقهم محفوظ وايصاحبه احسن
سناء:حاظر بس قولي شن بتشغله امعاك
جابر:حنشغله في قسم صيانة الالكترونيات وحنخليه مسؤول علي مكاتب الطباعة والابحاث اللي برا
سناء:يعني ضامن ماايديريش العيالك شيئ وياخذ فلوسهم انا مش مطمنة من ذكائه وماتنسش ان مدرب اكويس
جابر:مش ناسي لكن قتلك دبينه تحت سلطتي وعارف اني اقوى منه مش حيقدر ايدير شيئ
سناء:خلاص معناها خلينا نطلعوله عشان ماايحسش بشيئ
جابر;ناخذ الاوراق هذينا ونطلعو
/
/
نا:حنشوفو ياجابر من حيقعد تحت سلطة من ?
واسحبت بشويش ونزلت من بلكوني المكتب زي مارقيت ومن دون ماحد ينتبهلي
طبعا شخص زيي مدرب علي كل شيئ ومدرب تدريب جواسيس اسهل شيئ عليه ان يسلق مكان او ان يسحب المكان لو قعد بيسمع دوة حد
ونفس مادرت بزبط لما حسيت ان سناء مع جابر في كل شيئ حبيت اني انتأكد من كلامي وطلعت مالفيلا ولفيت من وراها وكنت عارف مكان مكتب جابر لولي اسحبت ورقيتله والحسن حظي كان مازال نفس مكان المكتب ورقيت من عند البلكوني وسمعت كل كلامهم اللي حكو وفعلا طلع شكي في محله وسناء عارفة كل شغل جابر واكيدة اتساعد فيه
/
/
دغري نزلت ورديت المكاني قبل ماينزلو لما وصلو درت روحي ولا كاني تحركت من مكاني ولا كاني عرفت حاجة
جا جابر قمعز امعايا وسناء عدت بديريلنا قهوة
أما جابر خذاني المكتبه وسكر وقعد ايوري فيا في اوراق صفقات واسماء ناس لازم انتعرف عليهم في ليبيا لاني حنتعامل امعاهم واجد وقالي أسماء ناس امعانا في الشغل وقالي اسماء مصفيينهم وليش صفوهم شبه ان خلاني نطلع علي كل شيئ صاير
ولما خشت علينا سناء بالقهوة سكت عاد عساس راه مش عارفة شيئ ولما طلعت سناء قالي
جابر:اهم شيء في شغلنا السرية التامة يعني ماحدش يعرف شن تشتغل هذا خليه سر بينك وبين نفسك
نا:يعني انت مراتك واعيالك ماحدش يعرف شن شغلك
جابر:ابدا وبذات عيالي كل اللي عارفينه ان فلوسي هذينا كلهن من شركة الالكترونيات
نا ضحكت:كان ايفكرو اشوي حيعرفو كل الفلوس هذينا مستحيل ايكونن من شركة الكترونيات
جابر:ماهما مش اذكياء زيك
نا:احسن مافيش احسن من ان الواحد يقعد غبي ?
جابر;من بكرا حتستلم الشغل امعانا في الشركة
نا:تمام
جابر:حندير بكرا عشاء ونعزم كل اقاربي ومعارفي عشان يعرفو انك روحت الليبيا وانك حتبدى تشتغل امعايا
نا:هما عارفين انك تبنيت طفل مالميتم
جابر:الكل عارف الشيئ هذا وعارف اني سفرتك تقرا برا
نا:وماقلتلهم عليش تبنيتني
جابر:بنكسب اجر
نا ضحكت:خذيت اجر كبير اخرى?
جابر ضحك وقعد يشرب في القهوة☕
ونا خذيت قهوتي وقعدت نشرب وانبحت في جابر ونذكر في كلامه
/
/
ثاني يوم وعيت الصبح ولبست وطلعت مع جابر للشركة
طبعا حمزة ولد جابر مسافر ويقرا في الطب برا
وراشد مافيش أي قبول بينه وبيني وكان ماسك منصب مدير تنفيذي في الشركة
أما تسنيم ماشفتهش بككل من اول ماروحت
وفي الليل جابر كان داير عشاء العيلته واقاربه ومعارفه وعرفني عليهم كلهم فيه اللي كان متقبل الفكرة وفيه اللي لا
كانو مستغربين بما ان ربي عاطي حابر عيال ليش ايتبنى
وجابر طبعا واخذ دور التقي والانسان الملتزم وايقول نبي اجر من ربي ?
/
/
حنان كانت مسيبة الشغل في حوش جابر وماقدرتش نعرف السبب
وقررت ان أول مانبدى في شغلي اني اندورها لأن عمري ماانسيت اللي داراته ليا هي الإنسانة الوحيدة اللي حسيت بحنيتها عليا من دون اي مقابل هي الوحيدة اللي كان حبها صادق وهي الوحيدة اللي حسستني بحنان وعطف الام اللي فقدته ?
/
/
أما تسنيم تلاقيت امعاها بعد ترويحتي باسبوع وكان لقاء عادي جدا عبارة عن سلمت عليا ورقت الدارها كانت إنسانة غامضة بكل وكانت متغيرة عن هي اصغيرة
أول ماشفتها وشفت العيونها اندور عالبراءة اللي كانت فيهن زمان بس كانت مختفية
كانت مبتعدة عن هلها نهائي وماتحكيش مع حد واتجي مالجامعة ترقى دغري الدارها وتطلع من دارها دغري عالجامعة حتى اوكالها بروحها في دارها
طبعا انا هذا اللي لاحظته عليها بس موضوعها ماكنش ايهمني واجد
صح اني مش ناسي اللي داراته امعايا وكيف كانت طفلة بريئة وكيف بعد كل عقاب من امها اتجي وتحكي امعايا وكأنها تعتذر عاللي داراته سناء بس نا من خشتي للفيلا هنا قررت انخلي مشاعري برا
واللي بيشتغل شغلي كان لازم يقعد انسان من دون قلب ومشاعر عشان يقعد ديما يكسب ومايخسرش شيئ ?
/
/
بديت الشغل في الشركة مع جابر وكان امسكني قسم صيانة الالكترونيات وكنت مسؤول عن فوق من 10 مكاتب طباعة وبحوث وكنت كل فترة ضروري نطلع اندير عليهن دورة وعالشغل فيهن واذا فيه اجهزة او طابعات يبن صيانة انحدد الاعطال واندزهن القسم الصيانة في الشركة وكان شغل عادي وبسيط ومش متعب واجد وقعدت مستمر فيه شهرين
طبعا طول الشهرين هذينا كنت اندور علي حنان لاني مافيش لحظة انسيت اللي داراته ليا وكيف كانت حنونة وطيبة امعايا وكيف عاملتني زي ولدها
وقدرت نعرف مكانها كانت عايشة هي وامها في شقة اجار وكانت تشتغل في مشغل خياطة قريب مالشقة ولما سألت علي ظروفها وعلي حياتها الكل قالو ان ظروفها صعبة وان امها عندها خبيث وكل بعد فترة تاخذ في جرعات كيماوي وان اوقات ايلمولها في صدقات عشان علاج امها
الحق ماقدرتش نمشيلها او انخليها تعرفني لاني كنت عارف انها اكيدة مش ناسيتني وحترد اتعاملني بحنية لان قلبها كبير وحنونة الابعد حد ولو عاملتني هكي حنزيد انحبها ونا هالكلمة مانبيهش في حياتي عشان حتخلي عندي نقطة ضعف وحتقعد حنان هي نقطة ضعفي واللي في وضعي ويبي يقعد قوي ويبي ايحط الكل تحت منه وقراره يقعد هو اللي ماشي لازم ماتقعدش عنده نقطة ضعف ولازم ينهي اي مشاعر حب من حياته فكنت اندزلها في فلوس العلاج امها بس كانن عساس صدقة من فاعل خير
/
/
بعد الشهرين هذينا انطلب مني أول عملية بنديرها
كلمني جابر وجيته في المكتب
نا:شن فيه
جابر:جهز نفسك بكرا اول شغل حتستلمه انت
نا قمعزت:وشن المطلوب مني
جابر:فيه كمية اسلاح كبيرة جاية من روسييا بتخش الليبيا
نا:باهي
جابر:المطلوب منك ترسم خطة دخولها وكيف حتوصلها بأمان هنا
نا:والتسليم هنا حيكون المن
جابر:انت عليك اتوصلها بأمان اما التسليم المن هذا مش شورك وماتسألش فيه انت بس وصلها المزرعتي
نا:تمام بكرا الصبح حتكون خطة دخولها واتية بس امتى توصل
جابر:توصل في الليل
نا:اوكي
جابر:حيكون امعاك رجالة من رجالتنا حيساعدوك
نا:تمام بككل
جابر:بس ماتوثقش فيهم واجد وماتحكيش علي شيئ اللي في راسك خليه في راسك في شغلنا حتى في ضلك ماتوثقش
نا ضحكت وقتله
نا;وبعد آلذي حدث لو أستطيع غسل الماء قبل شربه لغسلته
فلآ تحدثني عن ألثقة ?
جابر:هكي تعجبني
نا صبيت وبنطلع
جابر:أحمد ردبالك اتحب راه الحب والبنات ايضيعنك
نا:من يوم اللي قتلك اموافق نشتغل امعاكم ونا قتلت قلبي بإيديا
جابر:سلح روحك كويس وخليك فاطن الكل شيئ وانا حنقعد امعاك بالتليفون
نا :تم وطلعت
/
/
كملت اليوم ونا انرتب في خطة الدخول السلاح ودرت خطة ممكن مافيش حد دايرها من قبل
وثاني يوم في الليل كان موعد الاستلام وطبعا بما ان كان اسمي الجوكر فقررت عشان ماننعرفش ان ايكون حتى شكلي زي شكل الجوكر لبست بدلة وحطيت قناع الجوكر علي وجي وطلعت وقدرت انوصل السلاح وانخششه الليبيا بسلام وشلته المزرعة جابر زي ماقالي بزبط وهنا كملت مهمتي
كان موضوع فيه شد اعصاب وتوتر بما ان اول مرة بس بعد وصلتها بأمان حسيته ساهل واني حنقدر انكون شخصية مهمة في العالم هذا وحنقدر نعرف كل الاسرار ومتأكد اني حنوصل الاكبر الروس في المنظمة هذي واللي كنت متأكد انهم أجانب
/
/
/
مرن 8 اشهور في شغلي في الشركة وفي الشغل الثاني وكان عندي شخصيتين في الصبح في الشركة نا احمد جابر ولد صاحب الشركة
وفي الليل نا الجوكر اللي خلال 8 اشهور قدرت نثبت روحي كويس واسمي قعد ايتردد في كل مكان وقعدو ايخافو منه ناس واجد
طبعا شغلي ماكان كله في ليبيا كان اغلبه برا وخلال هالشهور سافرت 6 مرات وفي كل مرة شغل شكل وكان فيه اجتماعات انتلاقه فيهن بناس معينة وناس مهمة وقدرت بثقافتي وعلمي نقنعهم بيا ونكسب ثقتهم
وكان كل شيئ ينطلب مني اندير فيه علي أكمل وجه ومن ضمن اللي انطلب مني هو تصفية ناس خانو المنظمة وكنت انصفي ولاني قاتل مرة فالموضوع ماكان صعب واجد او حتى لاني كنت امقرر انكون شخصية مهمة والكل ايديرولي الف احساب فكنت مستعد اندير اي شيئ عشان نوصل للي نبيه حتي لو القتل ?
/
/
طبعا مساعدتي الحنان من دون ماتعرف نا من مازالت مستمرة
اما علاقتي بعيال جابر وسناء علاقة اقل من عادية وبالأصح ماكنتش انتلاقه امعاهم واجد لان اغلب وقتي امسافر
درت فلوس الروحي وكنت قادر اني نشري حوش ونقعد فيه بروحي بس كنت بنقعد امعاهم في الفيلا عشان كنت عارف ان الشيئ هذا قاهر راشد وسناء وهذا اللي نا نبيه
وكل ماانتلاقه بيهم انحسسهم ان اقوى منهم وان قعدتي امعاهم غصبن عنهم?
مانحكيلكمش كمية الرعب والرهبة اللي كانت في عيون راشد كل ماايشوفني مع اني مازال مادرتله شيئ ايخوفه ?
بس نظرة الخوف اللي في عيونه كانت اتحسس في بالانتصار عليه ??
/
/
/
استمرت حايتي ماشية هكي وكنت منسجم في الشغلين وللامانة ماكان فيه اي تأنيب ضمير عاللي اندير فيه
لان طول الوقت حاط اللوم والحق عاللي وصلتله واللي انا فيه توا علي ناس اخرى?
اولهم الاثنين اللي نا جيت بسبب غلطتهم واللي هما المفروض باتي وأمي ماكان صارلهم شيئ لو اعترفو بيا وطلعوني قدام الناس بدل مارفضو اني انكون في حياتهم ?
وبعدهم الميتم اللي عطاني الشخص زي جابر
وجابر اللي خاف علي عياله وماخاف علي طفل كان بريئ زيي وسلمني نا الاشخاص هكي وتعذبت في طفولتي كلها عشان يصنعو مني وحش اصغير
الذنب قبل ماايكون ذنبي كان ذنبهم كلهم ?
/
/
الوضع كان عادي وكنت ديما امسافر ومش واجد نقعد في ليبيا لعند يوم اللي روحت من إيطاليا كنت تاعب مالسفر وباطل وهالك لان غادي كان النوم اشوية واغلبه الوقت كان شغل اجتماعات في الصبح وفي الليل مهمات للمنظمة
جيت هالك وماصدقت وصلت للسرير وبنرقد
سمعت صوت حاجة خبطت وبعدها خطوات عالدروج صبيت بنشوف شن فيه مسكت مسدسي وطلعت بنشوف من نزلت مالدروج بشويش ماكان فيه شيئ لاحظت ضل كرعين حد قدام الفيلا طلعت بنشوفه من
#يتبع
قولكن من الظل اللي شافه وشن ممكن احمد بيلقه في هالليل وهل شيئ ممكن ان ايضره او ينفعه ?
كله حنعرفوه في الحلقة الجاية ☺
أسفة لو فيه لخبطة في الاسماء وأكيد رأيكن ايهمني ?
گـتـابـتـي Koka Saleh