الجوكر | للكاتبة Koka Saleh

#الـجـوكـر ?

الـحـلـقـة (22) ( والأخـيـرة)

(حقيقية ممزوجة بالخيال)

گـتـابـتـي #Koka_Saleh

::::::::::::::::::::::::::::::::::::::::::::::::::::::::

لايك قبل القراية وتعليق بعد القراية ?

:::::::::::::::::::::::::::::::::::::::::::::::::::::::::

حنان:نا عارفة جابر شن يشتغل وعارفة ان سناء امعاه وعارفة ان اللي داراته سناء فيك كله كان من تدبير جابر

نا بصدمة:انتي شن عرفك

حنان:نا مااشتغلتش عندهم يوم او يومين نا اشتغلت عندهم 10 اسنين من اول مااجوزو بس بعد مشيتك كيف عرفتهم شن يشتغلو سمعت كلامهم بالصدفة وهذا هو الشيئ اللي خلاني انسيب الشغل عندهم قبل مايعرفو او ايحسو ان عرفتهم عصابة قلت انسيبهم قبل مايقتلوني وطلعت من عندهم بحجة ان جاني عريس وبنجوز وانسافر عشان ماايحسو بشيئ ومن يومها ونا كاتمة في قلبي وطول وقتي كنت انفكر فيك لاني عرفت ان جابر كان يبيك امعاه في الشغل القذر هذا

نا معش رديت عليها ولا كلمة

حنان:ان شاءلله ماقعدتش مجرم زيه

نا معش قدرت انبحت فيها ولا انرد عليها حطيت راسي بين ايدي وسكتت

حنان تبكي:هذا اللي كنت خايفة منه ان ايخليك زيه ناعارفة ان مالكش ذنب في شيئ انت مش مخير انت انفرض عليك اتكون هكي الذنب كله علي كل واحد عارف اللي ايصير فيك وفي كل عيال المياتم وساكتين عالشيئ هذا

نا:مش كل الناس اتفكر ان مش ذنبي او اتفكر شن خلاني هكي اي حد يعرف اللي نا اندير فيه حيقول مجرم وقاتل وسفاح وبس

حنان:انت مش مجرم انت احسن واطيب طفل مر عليا انت من صغرك كنت راجل صغير ومازال عندك فرصة انك اتغير من نفسك واتكون انسان كويس الانسان اللي انت اتليق تقعد عليه

نا:مافيش اي فرصة انا لو انسيبهم حنموت حيقتلوني

حنان:وانت هكي عايش

كلمتها رنت في وذني وصل معناها دغري العقلي وقلبي فعلا نامش عايش نا بزبط عايش زي الميت مافيش عيشة بدون حرية بدون مااتكون انت مسؤول علي كل تصرفاتك

حنان:مافيش عيشة في عالم اجرام لاحتكون متريح في دنيتك ولا حتشوف راحة في اخرتك ربي مش حيسامحك وانت قاتل ناس ياقاتل الروح وين اتروح وين بتمشي من ربي يااحمد فكر في روحك فكر في شبابك اللي بتضيعه علي وهم وسراب فكر لو اجوزت شن حيكون مستقبل اولادك كيف حتنظرلهم وكيف حتربيهم وانت قاتل ومجرم كيف تقدر تمسك حد فيهم بيد مليانة دم ناس

نا بحتت في حنان:وقولك ربي لو تبتله حيسامحني علي كل اللي درته

سناء:(ان الله غفور رحيم )(وخير الخطائون التوابون)

نا صبيت وحبيت علي راس حنان
نا:تبي مني حاجة ياامي
حنان:خليك امعايا اشوية
نا:خلاص الوقت تأخر ولازم نمشي
حنان:عاودها وتعال مرة اخرى
نا:ان شاءلله حنجيك

طلعت وهي ورايا ولما وصلت عند الباب

حنان:احمد وفتحتلي ايديها رديت عليها وحظنتي حظنها كان حظن دافي يشبه حظن الام اللي انحرمت منه
حنان:نا صح مش امك وصح اني انحرمت اني انحس شعور الامومة لاني ماجانيش نصيب واجوزت بس من اول ماشفتك ونا معتبرتك اولدي اللي ماجباتاش بطني كل مااتضيق بيك الدنيا تعالي وحتلقاني فاتحلك ايديا ونحضنك بحظن وقلب ام

نابعدت منها وطبست علي ايديها بستهن وبست راسها وطلعت ونا مطمن حسيت براحة غريبة بعد حكيت امعاها وحست بيا
رغم اني انحرمت من حاجات واجد بس جتني من ربي رحمة وعوض علي هيئة حنان
القلب الطيب والحضن الدافي كانت بالنسبة ليا امي بالفطرة بتواصل الاحاسيس والمشاعر بينا

/
/

ركبت في سيارتي فوق الراحة اللي حاس بيها حسيت اني فعلا تعبان ونعسان نبي افراشي بنطيح نرقد دغري

وصلت عند الباب وفتحت وخشيت جت علي تليفوني رسالة فتحتها وكانت من سمر مكتوب فيها جملة وحدة(مش قادرة انعيش بلاك?)

/
/

عند سمر

الاسبوعين اللي مرن عليا كانن أسوء اسبوعين كنت مش حاسة بيهن بشيئ انسانة عايشة هكي وخلاص بلا روح وبلا هدف نطلع في الصبح للجامعة ماانشوفش في حد ومش قادرة حتى نحكي مع اي حد كل شاب انشوفه انشوف في وجه صورة احمد
حاولت هبة كم مرة اني نحكيلها اللي مضايقني رفضت قعدت اتحاول اتغيرلي روتين حياتي بطلعني ماللي نا فيه بس ماقدرتش لاني ماكنتش حاسة بطعمة شيئ كل الايام زي بعضهن حاسة روحي ميتة وجسمي بس ايتعامل مع الناس
اسبوعين ماذقتش فيهن طعم حاجة اسمها راحة او فرح او سعادة اخر يوم في الاسبوعين فكرت نا ليش اندير في روحي هكي ليش مدمرة حياتي بالطريقة هذي ليش نجبر في روحي ننسى شخص انحبه ونا حتى مش قادرة انمشي يوم بلاه مش ننساه هو شن ذنبه حياته مااخترهش بروحه ليش انكون نا والدنيا عليه ليش ماانحاول انغيره بدل ماانسيبه ايتعذب زيي
بعد تفكير طويييييييل مالقيتش روحي الا دازتله رسالة مكتوب فيها( مش قادرة انعيش بلاك ?)

دغري رن عليا ورديت ومن اول ما قال الو ونا نبكي ?

/
/

ماتحملتش الرسالة دغري درت اتصال ومن اول ماقلت الو قعدت تبكي نسمع في صوت شهقات ابكاها قعدت ساكت وحاس روحي مكبل تماما مش قادر اندير شيئ
لكن سكوتي ماكان سكوت حقيقي وصارم كنت ساكت ونسمع في ابكاها وكل دمعة نزلتها نزلت زيها علي خدي ?
ايقولو ابكى الراجل غلط والراجل اللي يبكي مش راجل ونا اكثر حد كنت مقتنع بالمقولة هذي من صغري
وماكنتش انحب نبكي ومن نا اصغير بس فيه اوقات يستحقن البكى اوقات اللي في قلبك ايكون اصعب بواجد من انك تحكيه او تشرحه
الشيئ الوحيد اللي ايعبر علي في داخلك او ايريحك هو البكى
ايقنت توا ان هالمقولة مقولة خاطئة مية في المية الراجل يقدر يبكي لان ببساطة انسان وعنده طاقة معينة للتحمل بعد ايشيل فوق طاقته ضروري يبكي عشان ايهون علي نفسه اشوي
سمر تبكي ونا ادموعي ينزلن بس ماحسستهش اني قاعد نبكي وبعد فترة طويلة مالبكى

سمر:بكرا نبي انشوفك

نا:حاضر

سمر:الساعة 5 في نفس المكان

نا:حاضر

سمر:تصبح علي خير

نا:انحبك وسكرت

/
/

عند سمر
كنت امرايفة واجد عالكلمة هذي منه حسيتها ردتلي روحي فرحتني رغم كل الالم اللي فيا قدرت اتخليني نرقد متريحة ?

/
/

نا صارلي حاجتين اسماح في حياتي
حنان وكلامي امعاها اللي ريحني واجد
وسمر واتصالها اللي كنت مش متوقعه وسمعت صوتها اللي كنت مرايفله بكككل

/
/

صباح يوم جديد

وعيت من رقدة مريحة وعميقة بحتت القيتها الساعة 8 الصبح
صبيت من سريري دوشت وصليت الصبح وطلعت للشركة وقعدت فيها
احلى شيئ صارلي في الفترة هذي اني كنت انصلي وحافظت علي صلاتي بطريقة مش عادية وكل وقت صليته في وقته ?
بحتت للساعة القيتها 4:30 طلعت مالشركة عالكافي دغري واحلى لحظة ان نا وسمر جينا في نفس التوقيت وخشينا للكافي مع بعضنا وقمعزنا مع بعضنا
كانت ساكتة ونا قعدت ساكت طلبت نسكافيه ليا والها وقعدت انبحت فيها كان وجهها تاعب بكل
سمر:تعرف انك وانت طالق لحيتك هكي قاعد احلى بواجد

نا ابتسمت وحطيت يدي علي لحيتي:اتحبيها هكي

سمر:اها

نا:مش حنحولها مرة ثانية بكل

سمر تنهدت:ليش مش قادرة انكمل بدونك

نا:لانك اتحبيني زي ماانا انحبك ومش قادر انكمل بدونك

سمر بحتت فيا ونظرتها كان فيها كلام واجد

نا:عارف شنو بتحكي اتحبيني وتبيني بس مش قادرة اتكملي امعايا ونا هكي

سمر:خايفة عليك وخايفة علي روحي وخايفة علي اعيالي لو خذيتك شن بيكون مصيرهم ومستقبلهم كيف بنعيشو وانت هكي حتي ربي لا حيسامحك ولا حيسامحني

نا:عارف وباذن الله قررت انغير كل شيئ وحنتغير وحنغير كل حياتي عشان نبي ربي يرحمني ويغفرلي ونبي الجنة ونبيك

سمر:بس انت قلت مش حتقدر اتسيبهم لانهم حيقتلوك

نا:اكيدة فيه حل ومش حنتريح لين انديره

سمر:واللي فات واللي قتلتهم

نا:ربي غفور رحيم اول مانجوزو حناخذك ونمشو انحجو عشان ربي يغفرلي كل اللي درته

سمر:وهلي وكان جيت خطبتني واذا عرفوك

نا:مافيش حد يعرفني ولا يعرف اللي اندير فيه ولو جيتك قدام هلك وقدام كل الناس نا احمد ولد جابر وبس

سمر:ونا مش حنحكي شيئ وحتى انك مالميتم مش حنحكيها الحد لعند لما نجوزو وبعد نجوزو لو عرفو اي شيئ معش ايهمني حد لاني حنكون مراتك

نا:باذن الله ماحدش حيعرف شيئ

سمر:امتى بدير حل

نا:كم مازالك واتخرجي

سمر:بعد شهرين انتخرج

نا:يبقى حندير الحل بعد شهرين

سمر:ليش

نا:مانبيكش اتأذي بسببي

سمر:ماشفتش في الدنيا راجل زيك وزي حنيتك

نا:ونا ماحبيتش في الدنيا حد زي ماحبيتك

سمر حطت يدها علي يدي:ردبالك اتسيبني

نا:عمري ماانسيبك

في اللحظة هذي رن تليفونها وهي قعدت اتشوفله زين

نا:من

سمر:رقم ماعرفتش

نا:ردي وافتحي الاسبيكر

سمر:حاضر وردت

هو:يعني كان حطيتي كل رقم انرن عليك منه في الحظر تحسابيني انمل ومش حنرن عليك اخرى

نا انصدمت الصوت مش غريب عليا تي نعرفه حافظه الصوت هذا بذات مستحيل ننساه
كريت من يدها التليفون وسكرت

نا:شن تعرفيه هذا

سمر:والله مانعرفه بس فيه رقم له فترة ايرن عليا وايقولي نا صاحب سالم خوك وبنخطبك ونا حاطته في الحظر وكل ماايرن من رقم انحطه في الحظر

نا:الشخص هذا عرفته

سمر بصدمة:من

نا صبيت:روحي بسرعة للحوش انحل الموضوع وانرن عليك

سمر بخوف:هذا من قولي مااتخشش في مشكلة عشاني

نا بعصبية واول مرة نحكي مع سمر هكي واول مرة سمر اتشوف شحصية الجوكر

نا بعصبية:سمر قتلك روحي توا وخذيت تليفوني ومفاتيحي وطلعت

/
/

وطول الطريق ونا معصب ودمي فاير

نا بعصبية:ماشي ياراشد الكلب والله نقتلك

وصلت عند الفيلا واول ماخشيت رقيت دغري الدار راشد فتحتها بالقوة والقيته ايغير في ادبشه مسكته وحطيت فيه دراه كبدي كله وكنت في لحظتها مستعد نقتله

جابر خش وبعصبية:احمد سيبه
نا مارديتش عليه وكملت ضرب وهو ايعيط

جابر جاني وقعد ايكر فيا وجا بينا لين فطني العقلي وطلقته

راشد والدم في وجه كله:كان بيقتلني

جابر بعصبية:شن فيه بينك وبينه لين تضربه هكي

نا:هو عارف شن داير

راشد:مش داير شيئ هو هكي كارهني بروحه وديما بيقتلني

نا بعصبية:مش داير شيئ صح وسمر اللي اترن عليها

راشد:بنت عاجبتني وبنخطبها وتوا كنت نحكي عليها الباتي

نا بعصبية والدم وقف في عروقي:تخطب عينك تي وربي لو اتجي شورها نقتله سمعت ياجابر نقتله وانت عارفني انديرها

جابر كان عارف ومتأكد ان لما انهدد انفذ

جابر:شن قصتها البنت هذي

راشد جا بيحكي

جابر بعصبية:انت سكر فمك نبي نسمع من احمد

نا:انحبها ونبي نجوزها

جابر:من امتى تعرفها

نا:ليا فترة طويلة نعرفها

جابر:وانت ياراشد شن تعرفها واحكي الصدق احسن ماانخلي احمد ايكمل عليك

راشد خاف وسكت

جابر بعصبية:قتلك احكي

راشد:شفتها مع احمد مرة في كافي وقعدت نستفسر عليها لين جبت كل معلوماتها كلهن وخذيت رقمها وبديت انرن عليها عشان تعجب بيا واتفوته ونخطبها ونكسر قلبه لكن البنت ماعطتنيش وجه هذا ليش جيتك توا وقتلك بنخطبها

نا بعصبية:كيف جبت رقمها وليش كنت اتقوللها نا صاحب خوك

راشد:لاني فعلا صاحبت خوها عشانها ورقمها كانت اسهل حاجة انجيبه لانها اجتماعية ورقمها عند بنات واجد

انا عظيت علي فمي وسكرت قبضت يدي زييين وكنت متمني انط عليه ونقتله

جابر بعصبية:راشد موضوع البنت هذي تنساه بككل واحسابك امعايا بعدين عاللقطة اللي درتها وانت يااحمد الحقني في المكتب وطلع جابر

نا:انسيت المقطع اللي عندي صح وربي ياراشد اليوم تلقاه منتشر عالنت

راشد:لا وراس احمد مااديرهش

نا:لا انديرها واندير اللي اكبر منها وطلعت وسيبته وقعد ايناديلي لان ماكان قادر ايتحرك بس مارديتش عليه ونزلت تحت الجابر وخشيت

جابر:ضربتك الراشد غلط

نا:واللي داره هو اللي صح

جابر:مش صح لكن كنت تحكيلي ونا نصرف امعاه

نا:انت عارف كويس اني مانعتمدش علي حد في وخذ حقي وحقي ناخذه بروحي

جابر:بس هذا خوك

نا:لو خويا ماايديرش اللي داره

جابر:اصغير وغلط

نا:امدادي مش اصغير

جابر:للدرجة هذي اتحبها وتقتل راشد عشانها

نا:نقتل روحي عشانها مش بس راشد

جابر:وصح قصة بتجوزها

نا:اكيدة

جابر:والمنظمة

نا:وشن دخلها المنظمة في قرار زي هذا

جابر;مافيش واحد مالمنظمة عمره اجوز وحدة خارج المنظمة ياتجوز وحدة امعاهم ياماتجوزش

نا:انا حنعرف كيف نقنعهم

جابر:اذا قنعتهم نا بروحي نمشي نخطبها لكي

نا:شكرا ?

جابر:بس اللي بنعرفه حكيتلها علي شغلك ولا لا

نا:اكيدة لا شنو بنحكيلها نا مجرم مستحيل انجي انقوللها نا مجرم

جابر:تمام هكي تعجبني

نا:اكيدة نا مش غبي عشان اندير هكي

جابر:عارفك بس توا امتى بتحكيلهم

نا:الفترة الجاية

جابر:ان شاءلله ايوافقولك

نا:ان شاءلله انا بنمشي توا عندي شغل في الشركة

جابر:تمام وياريت اللي صار معش ايتكرر واي حد من عيالي ايضايقك قولي نا قبل

نا:تمام وطلعت

طلعت منه ونا خاطري مكسور فعلا ان جابر عمره مااعتبرني ولده نا كنت كبش فداء عشان يحمي اعياله مش اكثر ?

طلعت وماشي شور سيارتي القيت راشد عند السيارة وقعد يجدى فيا اني ماننشرش الفيديو وقعد يحلف ان ماعاد ايجي شور سمر ومن كثر ماايترجى فيا كان اشوي وينزل ايحب علي كرعيا

نا:تمام ماننشرش بس وربي ياراشد لو اتقرب من سمر ولا اتحاول اتخطم حتى عليها انصورك مقطع اشر ماللي عندي وننشرهن مع بعضهن

راشد:والله ماعاد انقرب لا شورها ولا شورك خلاص انت فزت

نا:نا ماخشيتش امعاك حرب عشان انفوز انت اللي درت هذا كله

راشد;نا غلطان ونعترف اني مش قدك بس ارجوك ماتنشرش الفيديو

نا:تمام مش ناشرة بس لا طريقي ولا طريق سمر اتخش فيها

راشد:والله ماعاد ندخل فيك ولا فيها من يوم وغادي حنكون في حالي

نا:تمام توا انشوفو بس لازم تعرف اللعب امعاي ايخسرك حياتك ياشاطر وركبت في سيارتي وسيبته مذلول وخايف مني ومن اللحظة هذي تأكدت ان راشد معش يقدر يطلع قدامي نهائي

/
/

عديت للشركة ورنيت علي سمر وحكيتلها كل اللي صار وتفهمت الموضوع خصوصا بعد عرفت العداوة اللي بيني وبين راشد من نحن اصغار واستغليت الفرصة وقعدت نحكيلها علي تسنيم وعلي اصحابي وعلي حنان وبهكي قعدت عارفة كل شيئ عليا

/
/

مرن شهرين كنت قدام سمر كتاب مفتوح حكيتلها كل شيئ عليا حتى الجرائم اللي درتهن حكيتهن الها مادسيتش عليها شيئ عشان انكون واضح امعاها في كل شيئ وهي لما عرفت اني فعلا تبت وتقربت من ربي واجد واني معش نبي الطريق هذي تقبلت كل شيئ وسامحتني علي كل الماضي امتاعي

قرت سمر وجا وقت امتحاناتها وكنت واقف امعاها في كل لحظة بالكلام المعنوي بالتشجيع بالمساعدة في القراية وفي مشروعها كنت اقريب منها بكل اقرب حتى من نفسها الها
كل ماكان ايقرب المشروع كل ماكانت اتوتر كنت قادر اني انريحها فترة التخرج فترة صعبة علي اي شخص ايكون متوتر ديما وعصبي ديما ومش متحمل شيئ وعلي ابسط شيئ يبكي كنت هذا كله متحمله وانحاول انخفف خوفها وتوترها لعند جا يوم المناقشة
مشت بدري للجامعة عشان اتشوفني وتلاقيت بيها غادي شجعتها واجد وعطيتها طاقة ايجابية كنت اقريب منها وخشيت امعاها للمناقشة بحكم ان مناقشتها كانت كبيرة وفيها حتى الاعلام واي حد بيخش كان يقدر ايخش فأنا خشيت امعاها
وقبل مااتخش طلبت منها انها لما اتوتر اتشوف العيوني وحتكمل وفعلا دارت زي ماقلتلها كل مااتحس روحها متوترة تقعد اتشوفلي كنت نبتسملها وكنت نحكيلها بلغة العيون اللي هي الوحيدة كانت تفهمني بيها
كانت احلى بنت اتناقش ماكانت مناقشتها انها طالبة ابدا اتحسسك انها دكتورة قدامك علي ماقد الكل كانو مبهورين فيها وعاجبتهم علي قد ماانا كنت فرحان وفخور بيها هي هذي فعلا البنت اللي نبيها كل شيئ فيها زي مانبي كل شيئ فيها زي ماتمنيت
عيوني ماشلتهن من عليها لحظة كنت نحفظ فيها وفي كلامها وفي ضحكتها وفي كل شيئ فيها
طلعت والكل ايهنو فيها ونا كنت قاعد انشوفلها من بعيد ومش قادر انقرب منها لان كل اقاربها وهلها كانو جنبها
اكثر شيئ عجبني انها رفعت راس هلها وباتها بيها رغم معارضة الكل الا هي حققت اللي تحلم بيه وقدرت اتسكت كل حد حكى عليها ردت بشهادتها مالقسم اللي حلمت بيه
نا بجد كنت فخور بيها فخر الاب ببنته ?

اخر حد باركلها نا لما بعدو الكل منها جتني وقربت مني كانن عيونها مليانات ادموع

نا:قبل ماانقولك الف مبروك بنقولك اني بجد فخور بيك

سمر نزلو ادموعها:ونا بجد فرحانة اني تعرفت عليك انت كنت سندي ومصدر قوتي

نا:حنكون سندك صح لما تقعدي مراتي

سمر ابتسمت:انحبك يااحسن راجل في الدنيا

نا:نعشقك يامراتي وام اعيالي

/
/

كمل يوم المناقشة وبعد يومين طلعت النتيجة وسمر خذتها الاولى علي قسمها ماتصوروش كيف كانت فرحتي كنت فرحان اكثر منها خذيتلها هدية وتلاقينا في الكافي الهدية كانت عبارة عن تليفون وعطر ولبسة

نا:هذي هدية بسيطة اما الهدية الكبيرة هي اني انجي نخطبك

سمر:امتى بتجي?

نا:انتي بكرا حفلة تخرجك وبعدها بتردي مع هلك صح

سمر:اها

سمر:بعد اسبوع من جيتك غادي مع هلك حنجي نخطبك

الفرحة اللي في عيون سمر في لحظتها مستحيل ننساها

قعدت امعاها اشوي وبعدين هي روحت ونا روحت

/
/

ثاني يوم كان هو يوم حفلة تخرجها برضو حظرتها امعاها بس كنت بعيد شفت لما كلمو اسمها وطلعت واستلمتها شهادة تقديرها
مش حننسى طلعتها وابتسامتها ومش حننسى لما نزلت تمسح في ادموع الفرحة في عيونها ومش حننسى ابدا اول حظن لما رقيتلها فوق بعد خذت شهادتها

سمر:خلاص ياحبيبي حققت حلمي

نا:الف الف الف مبرووك ياقلبي العقبة ماانحقق حلمي نا وناخذك

سمر ابتسمت:قصدك حلمنا ☺

نا ماتحملتش كلمتها قربت منها وحظنتها حظن بالدنيا كلها في الحظن هذا كل احاسيسي اشتغلن بالغصب بعدت روحي منها

نا انشوف العيونها وذايب:نا بننزل احسن مااندير شيئ اخرى

سمر انحرجت وطبست راسها ونا نزلت بسرعة وطلعت مالقاعة كلها ونا مش قادر انتحكم في روحي ولا في انفسي كل شيئ فيا تلخبط من حظن واحد كيف لو نقعد امعاها❤

/
/

الغريب في كل هالموضوع ان طول الشهرين هذينا ماجتنيش ولا مهمة هذا اكثر شيئ كنت مستغربه وانفكر فيه

/
/

ثاني يوم الحفلة سمر روحت مع هلها ونا كنت حاجز في تذكرة الروسيا ورحلتي كانت في نفس اليوم اللي سمر بتمشي مع هلها فيع
صبرت لين اطمنت علي سمر انها وصلت الحوشهم وحكيتلها اني مسافر واني غادي معش نقدر نحكي امعاها وهي كانت عارفة ان سفري عشان نوصل الحل مع المنظة ونقدر انسيب الشغل امعاهم
البكى اللي بكاته عالتليفون كان قادر ان يقسم قلبي نصين
طمنتها واجد بأني حنرد لين هدت وسكرت
مع اني نا بروحي ماكنت متأكد اذا حنرد او لا ?

/
/

طلعت دغري للمطار وركبت الطيارة وسافرت الروسيا
اول ما وصلت غادي مشيت الاول مكان تلاقيت فيه مع الاب الروحي وكانت مزرعة بعيدة اشوي
مشيت غادي القيت فيها حرس وحكيت امعاهم اني بنشوف الاب الروحي
استقبلوني وعطوني دار وقالولي تريح فيها كنت تاعب مالسفر بكل اول ماخشيت للدار رقدت
وعيت علي صوت دق عالباب وبعد فتحت قالولي انهم جهزولي فطور
طلعت راقد من اول مااوصلت وماوعيتش الا ثاني يوم من كثر التعب والأرهاق

غسلت وغيرت ادبشي وطلعت فطرت ورديت الداري اخرى وبعد ساعة دق الباب من جديد بس هالمرة قالولي ان الأب الروحي يرجى فيا في مكتبه
طلعت امعاهم ورقيت للطابق الثالث اللي فيه مكتب الاب الروحي وخشيت عليه

الاب الروحي:جوكر يبدو انك اشتقت لمهامنا

نا ابتسمت:يبدو لي ذلك

الاب الروحي:لما طلبت مقابلتي

نا:اريد مقابلة الرئيس

الاب الروحي:اي رئيس

نا:رئيس المنظمة

الاب الروحي ضحك:يبدو انك جننت

نا:لماذا

الأب الروحي:الرئيس لا يستطيع اي شخص مقابلته

نا:لكني اريد مقابلته لأمر هام وطاريئ

الاب الروحي:قول ماهو ونا سأوصله له فورا

نا وكنت متردد وخايف بككل ماللي بنحكيه بس خوفي من ربي واني نخسر أخرتي كان اكبر من خوفي مالموت ومالاب الروحي ومالمنظمة كلها

نا:اريد ان اترك المنظمة

الاب الروحي قعد يضحك بهستيريا ونا مقمعز وانبحت فيه وخلاص وبعد وقف ضحك

الاب الروحي:انت تمزح اليس كذلك

نا:لا اني اتحدث بكل جدية

الاب الروحي:الا تعلم بقوانين المنظمة من يدخل بها لا يستطيع ان يخرج منها الا اذا مات فقط

نا:لماذا لا يخرج منها الا اذا مات

الاب الروحي:بكل بساطة لانك اصبحت تعرفنا وتعرف اماكننا وتعرف كل ماقمنا به والى ماذا نخطط ايضا

نا:اجل اعرف لكن انا ايضا من قمت بمهام كثيرة اظن ايضا اني مشترك في كل شيئ ولا استطيع فعل اي شيئ يضركم لاني سأتضرر قبلكم

الاب الروحي:اجل اعلم لكن هكذا قوانين المنظمة

نا:لذلك اطلب منك ان تسمح لي بأن التقي مع الرئيس

الاب الروحي:لن استطيع ان اجعلك تلتقي بالرئيس هذه ليست من صلاحياتي لكن يمكنني نقل رسالتك عنك

نا:يوجد شيئ اخر أيمكنني ان اصور فيديو اتحدث له عن طلبي ولما اريد ذلك وانت أوصله له
الاب الروحي:حل سليم توجد كاميرا هنا (واشر عالدرج الأول في المكتب)خذها وانا سأخرج وانت ابدأ وعندما تنتهي اطلب من الحراس اخباري

نا:حسنا
هو طلع ونا جيت للدرج خذيت منه الكاميرا وشغلتها وحطيتها قدامي

نا:اهلا بك سيدي الرئيس كم تمنيت لقائك لكن لم يحالفني الحظ اتمنى ان تكون بصحة جيدة والان سأدخل فيما اريد بدون اي مقدمات
اولا انا ادعى الجوكر ومن الطبيعي ان تكون تعرف كل من هم معك في المنظمة
اعرف جيدا منذ ان بدات اعمل معكم ازددت قوة وكان بإمكاني فعل اي شيئ لاني محمي بحمايتكم وانا ايضا كنت عضو جيد هنا اقوم بكل ماتطلبونه مني من دون تقديم اي اسألة او اي اعتراضات علي اي مهمة
لكن يارئيس اتضح لي انني لا انفع لهذا العمل لاني ببساطة لم استطع قتل قلبي مثلما طلبتم مني في بداية دخولي الى هنا
كنت سعيد في بداية العمل معكم لكن الان لا اريد سوا الراحة اريد ان اعيش كأي انسان بسيط يعمل بجد من اجل قوت يومه ويرجع نهاية اليوم متعب ويجد اسرة تنتظره واطفال يلعبون حوله هذا كل مااطمح له لا اريد لا مال ولا قوة ولا سلطة
اعلم جيدا ان الانسحاب من المنظمة ممنوع ومن يدخل لهذا العمل لا يخرج منه الا وهو ميت لكن اتمنى ان اكون مستثني فأنا لا اريد اي شيئ حتى تلك النقود اللي تعطونها ليا لازالت مثل ماهي لا اريدها خوذوها اريد فقط ان اعيش في هدوء وسلام
وثقو وتأكدو انني لن افعل اي شيئ ضد هذه المنظمة وتستطيعو مراقبتي لباقي عمري لو رأيتم اي شيئ بذل مني بإمكانكم قتلي
انا من كنت اقوم بالمهام فلن اشكل عليكم خطر لان الخطر اشكله علي نفسي قبلكم
اتمنى ان تنظر لي بعين من الشفقة والرحمة وان توافق على مااطلبت منك وانا جاهز لتقديم اي ضمانات لكم
وطفيت الكامير ورفعت وجي فوق وقلت
#يااااااااااااارب?

طلعت للحراس وبلغتهم اني كملت وبعد اشوي رد الاب الروحي مديتله الكاميرا وطلب مني اني ماانغادرش روسيا لين ايجيه الرد قتله تمام وطلعت

/
/

مشيت الفندق وحجزت فيه وقعدت 5 ايام فيه ماتحركتش منه نهائي نرجى في ردهم وسادس يوم في الصبح وعيت علي رنت التليفون امتاع الدار وكان اتصال مالرسبشن وقالولي ان فيه سيارة ترجى فيا تحت
غسلت ونزلت للسيارة وكانو حراس الاب الروحي وخذوني النفس المكان وخشيت عليه دغري

الاب الروحي:مرحبا ايها الجوكر

نا:اهلا بك

الاب الروحي:انت جدا محظوظ

نا بحتت فيه:وافق الرئيس على تركي للمنظمة

الاب الروحي:اجل انت اول عضو في المنظمة يتم الموافقة له على مثل هذا الطلب لان في الحقيقة لم يتجرأ اي شخص ان يطلب مثل هذا الطلب ابدا يبدو انه اعجبته شجاعتك

نا الفرحة ماكانت سايعتني مش مصدق اني قعدت حر من اغلالهم اللي كانت محاوطة ارقبتي

نا:اذا الان يمكنني السفر

الاب الروحي:اجل من الان انت حر

نا:حسنا شكرا لك والى اللقاء وطلعت ونا مش مصدق روحي نا حر خلاص من اليوم لا عاد فيه مهام ولا قتل ولا سفر فجأة مافيش شيئ
استنشقت الهواء اول مرة انحس بيه لان اول مرة نستنشقه ونا حر لان ديما احساسي انهم متحكمين حتى في الهواء اللي انتنفسه اما توا نا حر
عرفت شن هو احساس الطير بعد يقعد محبوس في قفص وبعدين يطلقوه احلى شعور شعور الحرية

( بمعادلة بسيطة الحرية هي الحياه?)

مشيت للمطار وحجزت وكانت رحلتي في الليل قعدت في المطار لين جا وقت الرحلة وطلعت فيها ونا مقرر مش حنرد للمكان هذا مرة ثانية لو حتى مجرد رحلة او زيارة عادية لان هالمدينة عشت فيها اسوء ايامي ?

/
/

وصلت الليبيا عالفجر واول ماوصلت وفتحت تليفوني رن عليا حركات ورديت

نا:بسم الله توا غير فتحت التليفون

حركات ضحك:صار اول صوت تسمعه صوتي

نا:تخيل عاد

حركات:نا عليا من كثر الحب يالحب ??

نا:شن فيه

حركات:نبي افلوسي

نا:جاي توا للشقة

حركات:نرجى فيك قدامها

خذيت سيارتي من وين ماامدرسها ومشيت شور الشقة القيت حركات يرجى فيا قدامها
خشيت نا وياه للشقة وطلعتله فلوسه
نا:شن صار في موضوع الميتم

حركات:نا بديت نشتغل في الميتم وقاعد انجمع في معلومات

نا:تمام

حركات:تبي مني شيئ

نا:بكرا الصبح تعالي هنا نبيك

حركات:تمام الساعة 8 انكون هنا

نا:تمام
طلع حركات ونا قعدت واعي وقررت ان بكرا نمشي نخطب سمر لاني وعدتها بعد مشيتها بأسبوع انجي نخطبها وبكرا مشيتها حطق اسبوع

مسكت تليفوني ورنيت عليها وهي ردت دغري وكأنها ترجى في اتصالي ❤
قعدنا انهدرزو وحكيتلها كل شيئ درته وطارت مالفرحة بعد عرفت اني قعدت حر وان من يوم وغادي حنعيشو في حب وامان بعيد عن اي اجرام في الدنيا
وزادت فرحت لما عرفت ان بكرا بنجي نخطبها وقعدت انخطط نا وهي شن بدير ونا شنو انجيب امعايا ومافيش اسعد منا في اللحظة هذي ? بعد اشوي هي رقدت امعايا عالخط سكرت ونا ماجانيش نوم وقعدت واعي الليل كله

/
/

صباح يوم جديد

اول ما طلع الضي صبيت دوشت ولبست وجاني حركات فطرت نا وياه ووصيته علي حاجات نبيه ايديرهن وطلع ونادغري طلعت عالشركة واول ماخشيت مشيت المكتب جابر وحكيتله عاللي صار امعايا وان المنظمة وافقت علي طلبي فرحلي واجد وقتله اليوم بنمشي نخطبها قالي ان بيمشي امعايا
قتله اني بنطلع 2:30 وتوا قبل مانطلع انتكي عليك وناخذك وهو وافق وطلعت ومشيت المكتبي

عالساعة 2:30 مشيت الجابر في مكتبه نبيه يمشي امعايا قالي ان حيلحقني بسيارته قتله تمام وطلعت وركبت في سيارتي واول شيئ درته مسكت تليفوني ورنيت علي سمر وهي ردت دغري

سمر:حبيبي طلعت

نا:طالع توا

سمر:توصل بالسلامة نرجى فيك بفارغ الصبر

نا:ان شاءلله حنجيك لكن لو بعد ساعة ونص ماوصلتش معش ترجيني وبكرا الساعة 8 في الصبح حيوصلك مني خبر شن صار امعايا

سمر:مااتخوفنيش مش قتلي كل شيئ قعد تمام

نا:ماانخوفش فيك وكل شيئ تمام لكن نحكيلك عشان ماتنشغليش عليا

سمر:ربي يحميك ليا اللهم استودعك الله الذي لا تضيع عنده الودائع

نا:أمين

سمر:صليت الظهر

نا:من بدري

سمر:خلاص ربي امعاك

نا:يارب
نا:انحبك يامراتي
سمر:انحبك ياراجلي
وسكرنا

مسكت تليفوتي ورنيت علي حركات وهو رد

نا:حركات نفذ اللي اتفقنا عليه

حركات:حاضر

/
/

ماكان عندي فيهم اي ثقة وكنت متأكد ان في اي لحظة يغدرو بيا
ولعت سيارتي وتوكلت عالله وطلعت

/
/

صباح ثاني يوم ?
وتحديدا عند سمر قلبها نار اترن علي احمد من امس مقفل اذكرت كلمته حيجيك مني خبر في الصبح قعدت ترجى في الخبر وبعد اشوي رن تليفونها
حركات:اطلعي برا بنعطيك شيئ من احمد

سمر:انت من ووين أحمد

حركات:اطلعي وحتعرفي

سمر:حاضر
لبست جاكتها ووشاحها وطلعت وفتحت الباب لقت حركات برا ومدلها رساله
حركات:هذي من احمد

سمر:باهي وين احمد وليش ماجش في الموعد

حركات:ادعيلة بالرحمة

سمر بصدمة:احمد مااات ?

حركات:امس تفجرت بيه السيارته وطلع بسرعة وسيبها

سمر من كثر الصدمة معش قدرت اتصبي وقمعزت في مكانها وادموعها ينزلو تلقائي

/
/

حركات طلع من سمر وقمعز في سيارته واذكر كلام أحمد اللي حكاه له لما كلمه

نا:حركات نفذ اللي اتفقنا عليه

حركات:حاضر

نا:لو صار اي شيئ مااتحاولش ادافع عني

حركات:بس

نا:مافيش بس انت لازم اتعيش عشان اتوصل رسائلي اللي عطيتهن لكي

حركات:حاضر

نا:حتكون اخر مهمة بينا

حركات:مااتقولش هكي ياراجل

نا:هذوما نعرفهم كويس لا فيهم ثقة ولا فيهم امان وانهم خلوني حر مامشتش عليا بكل واللي زاد كشفهم تصرف جابر توا

حركات:ان شاءلله خير ياصاحبي

نا: حركات حتى لو متت مااتسيبش موضوع الميتم نهائي

حركات:حاضر

نا:عارفك قدها

حركات:لا اله الا الله
نا:محمد رسول الله

طلع احمد ونا طلعت وراه كنت نمشي بشويش عشان ماانكونش قريب منه وفي لحظات والسيارة قدامي انفجرت السيارة وهو فيها تفتفت طرف طرف شفت اللي صار وماقدرتش اندير شيئ
احساس احمد كان في محله وكان عارف انهم بيقتلوه
لغمو السيارة وانفجرت وهو فيها

حركات قعد في السيارة ايخبط في الدومان اللي قدامه ويبكي علي صديق مات قدامه وما قدر ايديرله شيئ صديق كان وفي ومش حيقابل كيفه في حياته كلها?

/
/

بعد بكى واجد من حركات ولع سيارته ورد المدينة احمد ومشى الثاني مكان احمد قاله عليه وهو حوش عبد المهيمن

رن الجرس واول مالباب اللي جوا انفتح حط الرسالة علي حافة الباب وطلع

تسنيم فتحت ولقت الرسالة استغربت التصرف خذت الرسالة وفتحتها وكان مكتوب فيها
(عبد المهيمن اعز صديق عرفته واحسن راجل قابلته لو وصلاتك رسالتي هذي معناها نا توا ميت
بس نبيك اتسامحني لاني اكبر جريمة في حقك وطعنتك في ظهرك لما قتلت باتك بس كله كان غصب عني
لما خذاني جابر من امعاكم وسفرني برا جندني الصالح منظمة منظمة كبيرة وعالمية ومش عارف الاي دولة بس اللي عارفة ان فيها كل الدول والها يد في كل الدول وبعد خذيت الشهادة الجامعية فرضو عليا نشتغل امعاهم يا انوافق ياانموت ووافقت عالشغل امعاهم لاني زي اي انسان مايبيش الموت
ومن هنا بدت مأساتي لاني بديت في الاجرام كان ينطلبو مني في مهام وانقوم بيهن ماكنت قادر نرفض
لو نرفض حيكون مصيري الموت
ومن ضمن المهام اللي طلبوهن مني هو اني نقتل باتك الحاج ميلود احسن راجل قابلني في الدنيا وماعرفتش سبب طلبهم هذا الا مؤخرا
والسبب هو ان طلع بيدير قانون جديد يمنع فيه تسفير الاطفال المتبنيين خارج ليبيا وايكون لجنة اتكون مسؤولة عن مراقبة الاطفال بعد التبني بحيث كل شهر ادير طلة عليهم واتشوفهم كيف عايشين والشيئ هذا هما ماكانوش يبوه
نا متاكد انك توا كرهتني وحقدت عليا بس توا نطلب منك تنسى كل اللي فوق لاني انا توا في عداد الموتى ومعش ينفعني لا كره ولا حقد ولا حب بس نبي منك اتساعد اطفال المياتم نا بديت انكمل في مشروع الحاج ميلود وايساعد فيا واحد اسمه محمود حركات حنكتبلك عنوانه هنا شوف وكمل امعاه اللي نا ماقدرتش انكمله
انا متاكد انك تقدر اتساعده لانك شرطي ورجل امن وانت الوحيد اللي تقدر اتصبي في موضوع زي هذا
واخر شيئ نبيك تعرفه ان كل شيئ صار غصبن عني نا كنت مسير مش مخير
ونا توا موضوعي انتهى ويومي جا نبيك انت توا تسعى في باقي الايتام مااتخليهمش ايصير فيهم زي ما صار فيا
سلام ياصاحبي?)

عبد المهيمن طلع من جوا

عبد المهيمن:من اللي رن حبيبي

تسنيم دست الورقة:فتحت ماالقيت حد شكلهم عيال صغار يلعبو

عبد المهيمن قرب منها:باهي خلينا انخشو

تسنيم:قبل ماانخشو بنقولك حاجة

عبد المهيمن:شنو

تسنيم:نا حامل ?

عبد المهيمن بفرحة:تحكي جد

تسنيم:والله جد الجد

عبد المهيمن:مش مصدق واخيرا بنقعد اب بنمشي انفرح معز واحمد اكثر اثنين حيحسو بيا

تسنيم نزلر ادموعها:باهي وخشت للحمام وقعدت تبكي علي احمد وعلي كل شيئ عرفاته عليه وعلي باتها وبعدها شرطت الورقة وعزقتها في المرحاض وفتحت السيفوني عليها
تسنيم رغم حبها الاحمد الا انها كانت انانية وفكرت في روحها وانها حتخسر مهيمن لو عرف اللي صاير وزادت انانيتها لما فكرت في سعادتها ونست مأسات اطفال المياتم ?
والنموذج هذا فيه منه واجد اللي ماايفكروش الا في روحهم ومصلحتهم وهذا اللي صاير عندنا للأسف ?

/
/

سمر قعدت تبكي بحرقة بس ماكانت قادرة اتعلي صوتها خافت حد من هلها يسمعها صبت الدارها وخشت وسكرت الباب وطلعت الرسالة وفتحتها وكان مكتوب فيها
(رغبتي فيك كانت حقيقيه جدًا، لم أكن عندها تحت تأثير أغنية، نظرة او ماشابه، كنت أدرك وأعي بأني أريدك، بطريقة أعمق ممّا أظن، وتظني❤
حبيبي عارف انك توا عرفتي اللي صارلي وعارف ان عيونك قاعدات حمر من كثر البكى بس مانبيش منك تزعلي عليا نا كنت عارف مالاول شن بيصيرلي من اول ماقتلك بنسيبهم واندير حل امعاهم ونا عارف انهم مستحيل ايوافقو انسيب الشغل امعاهم بس ماحبيت انحسسك بالشيئ هذا كنت نبيك تفرحي ومااتفكريش في شيئ عشان ماايأثريش علي تخرجك وبلعاني اني ماسافرتلهم الا بعد انتي سافرتي عشان ماحدش يعرفك ويأذيك
اول ماجاني قرار الموافقة عرفت ان الموافقة كانت علي قتلي مش علي تسيبتي للمنظمة كنت متوقع يقتلوني غادي بس بما انهم قتلوني هنا هما كانو بس بيثبتولي انهم يقدرو يوصلو فيا في نص بلادي وبين هلي وناسي
بس من غير مايثبتولي كنت عارف انهم يقدرو ايديرو اي شيئ
نا حنموت وضميري متريح لاني تقربت من ربي واجد وطلبت سماحه وباذن الله حيسامحني ويغفرلي كل شيئ درته
ارجوك وقفي ابكى لما انتي تبكي حنحس بيك وانتألم واجد لانك انتي نقطة ضعفي الوحيدة في الدنيا انتي السعادة اللي لمستها وحسيتها وذقتها في عز كأبتي ويأسي
احلى لحظات عشتهن هنا اللحظات اللي عشتهن امعاك كنت انتمنى انعيش امعاك اكثر من هكي بس لعند هنا مكتوبلنا ?
يا قلبي وياروحي وياعمري بطلي ابكى واقري كلامي كويس
الزعل والبكى مش حل ولا حينفعني في شيئ الشيئ الوحيد اللي ينفعني انك اتحاولي اتوصلي قصتي اتحاولي اتوري للناس اللي ايصير في اطفال المياتم
مانبيكش توقفي في وجه حد او تحكي مع شرطة او اي شيئ ردبالك لان موضوع خطير ممكن ينهي حياتك بس وصليها بطريقة ثانية لو حتى بوست عالفيس من ايميل مش ايميلك اي شيئ المهم توصل بالك ايكون فيه ضمائر حية ايحسو باللي ايصير في المياتم وايديرو بالهم عليهم
اما انتي مانبيكش تزعلي ولا تحزني نبيك زي ماعرفتك بوجك السمح وابتسامتك البريئة كل ماتبتسمي اذكرني واعرفي اني في لحظتها قاعد نبتسم امعاك
عيشي حياتك وحبي من جديد مااتوقفيهش عشاني لان حتى نا كنت مذنب في حق نفسي واللي صار فيا كنت اخترت الموت مالاول لان اللي ايخش امعاهم في شغلهم حتكون نهايته القتل لو كنت اخترت الموت مالاول لا كنت قتلت ولا قعدت مجرم ولا اذيتك ولا اذيت روحي
نا متت وتريحت بس عارف اني سببتلك وجع والم كبير
سامحيني عليه يافرحتي اللي ماكملتش ?
اخر شيئ خليه ديما في بالك واذكريه اني حبيتك حبيتك بجميع انواع الحب اللي انحرمت منهن
حبيتك حب الام والاب والاخت والاخ والعم والخال كل انواع الحب اللي في الدنيا حبيتهن لكي ❤
راك تنسي تدعيلي في كل صلاة ان ربي يرحمني ويغرفلي انتي الوحيدة اللي عالمة بيا وبكل شيئ صارلي ادعيلي عشان ربي ايسامحني بالك نقدرو انتلاقو في الجنة?)

سمر انصابت بهستيريا بكى وبعدها طاحت ولما شالوها للمستشفى كان عندها انهيار عصبي

وبعد فترة وبعد تجاوزت المرحلة هذي وقعدت تستوعب في الموضوع حبت اتساعد احمد وادير الشيئ اللي يبيه وهي انها اتوصل قصته للناس
جتني وحكتلي القصة صدمتي بيها اول ماحكتلي ماتنوصفش?
ترددت واجد في كتابتها هي حاكيتلي عليها من فترة طويلة من رمضان اللي فات ونا توا كيف قدرت نكتبها
غيرت فيها كم حاجة لاني خفت اني نكتب الحقيقة كاملة ?
البطلة في القصة كانت المفروض سمر وكنت المفروض نكتب بلسانها هي بس انا اخترت نكتب بلسان احمد عشان اتحسو بيه اكثر واتكونو اقريبين منه اكثر
كل رواية نكتبها كنت نكتب عالابطال دار مشى رقد وكذا
الا احمد حبيت نكتب بلسانة عشان انوصل شعوره كويس وان شاءلله قدرت انوصله ?
جزئية الرسالة اللي جت التسنيم ومهيمن كانت من خيالي الغرض منها اني انبينلكم ان فيه ناس يعلمو الحقيقة والمصالحهم الخاصة يخفوها وكأنهم لا شافو ولا سمعو شيئ ومش مهم المتضرر من ?
اما جثة احمد تأيدت انها جثة مجهول من دون ما اي حد ايتعرف عليها وانتهت قصته في غموض زي مابديت حياته في غموض ?

احمد كان مذنب في قصته هذا شيئ ماننكروش بس طبيعة النفس البشرية انها مااتمنش النفسها الموت مافيش حد يطلب الموت النفسه ?
لكن المذنبين الاولين هما الاب والام اللي غلطو وحملو نتيجة غلطتهم له هو ?
المذنب الثاني هما الناس اللي بلا ضمير زي جابر وسناء ?
والمذنب الثالث المنظمة اللي تستغل في اطفال زي هذوما لان ماعندهمش حد وراهم ?

عارفة ان النهاية كانت حزينة وماكنتش تبنها حزينة بس هذي كانت النهاية?
وهذي النهاية اللي اتليق بواحد زي احمد لان علي كل الاحوال هو ميت ميت وبنفس الطريقة ?
نطلب منكن تدعله بالرحمة والمغفرة بس ووصلن قصته للناس ممكن نلقو حل للي زيه
ياريت ايكون فيه قانون يحمي الأيتام من الجرائم والناس اللي زي هك وياريت ايكون في مجتمعنا حتى 3 بس زي الحاج ميلود ?
انتمنى انكون وصلت القصة زي مالمفروض توصل وانتمنى انكون امتعتكن وعيشتكن في القصة وتفاصيلها
وصدقني زي مالنهاية صعبة عليكن كانت صعبة عليا ?

#الـنـهـايـة

اسفة لو فيه لخبطة في الأسماء وأكيد رأسكن ايهمني?

گـتـابـتـي Koka Saleh