الجوكر | للكاتبة Koka Saleh

#الـجـوكـر ?

الـحـلـقـة (21) ( مـا قـبـل الأخـيـرة)

(حقيقية ممزوجة بالخيال)

گـتـابـتـي #Koka_Saleh

::::::::::::::::::::::::::::::::::::::::::::::::::::::::

لايك قبل القراية وتعليق بعد القراية ?

:::::::::::::::::::::::::::::::::::::::::::::::::::::::::

سمر:قتلك والله ماني رادة عليه نا بروحي خلاص عرفت انه كذاب ومعش نقدر انصدقه مرة اخرى

هبة:ايوا شاطرة خليك هكي

سمر:ان شاءلله

هبة سلمت علي سمر وطلعت وسمر لمت اشوي في الحوش وجت بترقد بس قبل ماترقد مسكت فونها وفتحت النت اشوية وجتها الاغنية من أحمد وبدت تسمع فيها وكان اسمها #كل_واحد_عندو_سر_جوا_منه_وامداريه

سمر قعدت تسمع في الاغنية وادموعها ينزلو تلقائي مافهمت من احمد شن يقصد بالسر اللي داسة بس كل اللي كان في عقلها ان ايكون السر فيه بنت اخرى
ماكانت متحملة فكرة ان ايقوللها ان متجوز او خاطب او فيه اي بنت ثانية في حياته حاسة لو قال هكي حتنها وتدمر
قعدت اتشوف فيه متصل بس مش قادرة تكتبله او ادزله شيئ وبمجرد ماطلع عندها يكتب الان حظراته مالوتس وطلعت للفيس حظراته وحظراته حظر مكالمات مالفون وكله عشان ماتبيش تنصدم وتنقهر لو طلعت فيه بنت في حياته ?

/
/

نا لما دزيت المقطع قعدت طول الوقت فاتح نت ونرجى فيها تستلمه واول مااستلماته والله قعدت نحسب في الدقايق نين وصلن الدقايق المقطع وعطيتها فوقهن دقيقة ازيادة عساس نرجاها ادزلي شيئ بس لما مادزتلي شيئ جيت بنكتبلها اني انحبها وان مافيش غيرها في حياتي وخايف اني نحكيلها سري اتسيبني بس فاجئتني بالحظر ?
خشيت عالفيس بندزلها برضو القيتها حاظرتني ورنيت علب رقمها القيتها حاظرتني ?
ماتصورتش سمر اتكون قاسة للدرجة هذي
معقولة اتكون ماحبتنيش وماصدقت صار هكي لا مستحيييل نا عارف انها صادقة وانها حبتني بكل صدق انا اكثر حد يقدر يقرا الشخص اللي قدامه ونا قريت الصدق اللي في عيونها وشفت حبي في عيونها ومتأكد انها ادير هكي من كثر مااتحبني ولاني وجعتها بتهرب مني ?

عرفت ان مكالمة عالتليفن مش حل ومش حترد انا لازم انشوفها ولازم انوصللها قديش نا انحبها وبعدها انصارحها ونحكيلها كل شيئ عليا وانخليها تعرف ان كل شيئ كان غصبن عني وبعدين انخلي الخيار في يدها يااما ترضى بيا يااما اتسيبني?

قعدت الليل كله انفكر فيها وشن حيكون ردها بعد تعرف
بس مافكرتش لحظة اني انتراجع في قراري لاني كنت لازم انريحها مالتفكير وانريح ضميري مالتأنيب

/
/

جا الصبح ونا مازال واعي صبيت غسلت ولبست وماكنت قادر نفطر لاني كنت متوتر بكل وخايف من ردة فعلها لما تعرف كل شيئ
طلعت في سيارتي ووصلت للجامعة كنت عارف ان محاضرتها الساعة 8 ونا الساعة 7:30 كنت قدام الجامعة قعدت امدرس بسيارتي لين شفتها نزلت هي وهبة وكانت هي اللي اتسوق خليتهن ايخشن ونزلت وراهن ولما قعدت وراها بزبط

نا:سمر
هي شافتلي وماكنت مصدومة لانها شكلها كانت متوقعة اتشوفني

نا:خليني نحكيلك شيئ واحد وبعدين اللي تبيه ديريه

سمر بعصبية:معش فيه كلام بينا يااحمد معش نبيك في حياتي خلاص انتهى كل شيئ

نا:نبيك بروحك والله مش حناخذ من وقتك واجد

سمر:لو بنحكي امعاك كنت امس رديت عليك بس نا خذيت قرار ومش حنتراجع فيه وعدت وهبة بحتت فيا زين ولحقتها

نالحقت هبة:هبة

هبة لفت:نعم

نا:انتي صاحبتها الوحيدة واتعزي عليها واجد خليها تعطيني فرصة وحدة ونحكيلها كل اللي تبي تعرفه وبعدين هي حرة في قرارها والله مانضغط عليها

هبة:مافيش شيئ تحكيه يااحمد القصة واضحة انت في حياتك بنت اخرى وسمر مش قادرة تسمع الشيئ هذا

نا:والله والله مافيه في حياتي اي بنت غيرها بس خليها تحكي امعايا مرة ونا انقوللها كل اللي بتعرفه واللغز اللي في راسها بنحله الها

هبة:هي معندة وخلاص مقررة اطلعك من حياتها

نا:قوليلها لو اتحبني جديات وبصدق ولو امأمنة بحبي الها واني ماعرفتش الحب الا امعاها اليوم الساعة 5 العشية نرجاها في الكافي اللي ديما انتلاقو فيه لو جت حنحكيلها كل شيئ وهي اللي اتقرر اتكمل امعايا او تنسحب من حياتي واي قرار تختاره نا نحترمه

هبة:حاضر حنقوللها وعدت وسيبتني
اول مرة ننحط في موقف زي هذا اول مرة انترجى حد ان يحكي امعايا اول مرة بنت ادير فيا هكي اول مرة نقتنع ان الحب ايخليك ادير اللي عمرك مااتخيل نفسك اديره

بعد عدت هبة من جنبي طلعت مالجامعة ومشيت للشركة ليا اسبوع عليها

/
/

عند سمر وهبة خشن للمحاضرة وبعد المحاضرة طلعن

سمر:بعد نا مشيت انتي حكيتي مع احمد صح

هبة:اها

سمر:شن حكالك

هبة:قالي ان ايحبني

سمر انصدمت وشافت السمر زيين

هبة تضحك:راه اعيونك يطلعن تي انبصر ياهمي

سمر:امالا شن حكالك

هبة:أحمد شكله ايحبك جديات

سمر اتشوف الهبة: لعند امس مش هذا كان كلامك

هبة:شوفي نا ماعمريش حكيت مع احمد وهذي كانت اول مرة نحكي امعاه بس من كلامه حسيته صادق ومايكذبش

سمر:باهي شن حكالك

هبة:قالي اني نحكيلك تعطيه فرصة يحكي امعاك وايحللك اللغز اللي في راسك

سمر:مستحيييل وانتي عارفة ليش لو احمد يحكيلي ان في حياته بنت اخرى نا حننهار

هبة:هو حلف ان مافيش بنت اخرى وان انتي البنت الوحيدة في حياته الباين ان عنده قصة اخرى

سمر:شن بيكون يعني

هبة:الله واعلم مشكلة مع هله او ان مش ليبي حاجة هكي اكيدة

سمر:بس هو قالي ولد من وباته شخص معروف

هبة:بس انتي ماشفتيش بطاقته بالك يكذب وهو بس يشتغل عندهم مثلا

سمر:معقولة

هبة:هذا اللي جا في بالي وعموما هو قالي قوليلها لو اتحبني ولو مأمنه بحبي الها واني ماعرفتش الحب الا امعاها اليوم الساعة 5 اتجي للكافي اللي انتلاقو فيه وحتعرف كل شيئ

سمر سكتت

هبة:بتمشي

سمر:لالا ماعنديش قلب انحقه شفتي امبدري لما شفته شن صار فيا والله المحاضرة مانندري عليه في شن يحكي وطول الوقت ماسكه دمعتي بالغصب ونزلو ادموعها?

هبة:اسمعي نا ماانشجعكش لا علي غلط لا شيئ ونا اول وحدة قتلك مش متريحتله وحاسة وراه شيئ وانتي بروحك لاحظتي الغموض في حياته بس لما حكى امعايا امبدري حسيت بنوع مالشفقة عليه وحسيت ان ايحبك بصدق فانتي مش خاصرة شيئ عدي اسمعي اللي بيحكيه وبعدين قرري شن اديري

سمر قعدت ساكته وخلاص

/
/

ونا في مكتبي حاير مابين افكاري هل سمر اتحبني او مااتحبنيش هل حتجي للموعد او لا هل حتكمل امعاي او حتسيبني أسألة واجد في بالي ماعنديش جواب الولا واحد منهن
بحتت للساعة القيتها الساعة 4:30 طلعت مالمكتب ومشيت للكافي وصلت غادي كانت الساعة (4:45 دقيقة )
قمعزت وقعدت نرجى فيها ونا حاير مابين اتجي او لا
طلبت فنجال قهوة وماكنت واكل شيئ مالصبح بس كنت بنصحصح اكثر قعدت نشرب وعيوني عالباب
شفت للساعة القيتها 5:05 وسمر ماجتش بس مازال ماقطعت الامل انها اتجي قلت نرجى ممكن اتكون زحمة اي شيئ امعطلها وقعدت نرجى

الساعة 5:30 وسمر مازال ماجت في اللحظة هذي ايست من جيتها وتأكدت ان سمر طلعتني من حياتها نهائي
تنهدت والغصة في قلبي وخذيت تليفوني وصبيت بنمشي وانشوفها خشت مالباب قلبي في وقتها وقف
ماعرفتش فرحة، توتر ،خوف، ماللي بنحكيه ومن ردة فعلا الف شعور جاني في لحظتها
كل خطوة تمشيها واتقرب مني كل ماانزيد انتوتر اخرى لعند ماوصلت فيا
سمر:جيت في الوقت هذا بلعاني قلت لو فعلا ايحبني حنلقاه مازال يرجى فيا

نا:مستعد نرجاك عمري كله بس نقعد متأكد ان في النهاية بتجيني

سمر:شنو اللي بتحكيه وهل يقدر ايجاوب علي كل الأسلة اللي في راسي

نا:قمعزي وحنطلعك مالحيرة اللي انتي فيها وانجاوبك علي كل سؤال عندك

سمر قمعزت:احكي نسمع فيك

نا:قبل مانحكي اي حاجة بنسألك سؤال واحد وجاوبيني عليه بصراحة

سمر:اكيدة شن هو

نا:انتي مازلتي اتحبيني

سمر تنهدت:للاسف مازال انحبك ?

نا:تمام معناها الكلام اللي بنقوله حيقعد سر بينا ونا عارف انك حتخليه سر لان الثقة اللي عندي فيك مش حاطها حتى في روحي

سمر:اكيدة اللي بتحكيه مش حيطلع مني الحد

نا سكتت اشوية ونا مش عارف منين نبدى
نا:نا اصلي مالميتم يعني لقيط لا اب ولا ام وجابر ال— متبنيني تبني

سمر استكت ومعش عرفت مااترد عليا

نا طلعت من جيب جاكتي 3 جوازات و4بطاقات وحدة منهن بطاقة عضوية في المنظمة بأسم الجوكر وحطيتهن قدامها

سمر:شن هذينا

نا:شوفيهن

سمر قعدت اتشوف فيهن ومافهمت شيئ

سمر:هذينا شن قصتهن وليش كل بطاقة فيها صورتك بس بأسم يختلف

نا:هذا اكبر سر في حياتي ومافيش حد يعلم بيه نهائي

سمر:اللي هو

نا مسكت البطاقة امتاع عضوية المنظمة
نا:نشتغل مع منظمة سرية ونا عضو فيها بأسم الجوكر

سمر:انت في شن تحكي شنو منظمة سرية المن تتبع وفي شنو ايديرو بزبط استخبارات يعني مثلا

نا:لا بس المنظمة هذي متشكلة من اكثر من دولة وماحدش عارف المن تتبع بزبط بس الها يد في كل دولة في العالم

سمر:وانت كيف عضو فيها وشنو ادير

نا:كبرت القيت روحي عضو فيها وكان لازم انوافق انكون امعاهم لاني لو رفضت حيكون مصيري الموت

سمر اتشوفلي زين زي انها مش مصدقة كلامي ومكذبتني

نا:لما كان عمري 9 اسنين جا جابر وتبناني ماالميتم وجابني الحوشه تعرضت في حوشه التعذيب واجد وقعدت نحكيلها في كل شيئ من تعذيب سناء ليا ولما سفرني برا وكيف كان طريقة تعليمنا في المدرسة وشنو اساليب العقاب اللي عاقبونا بيهن وللي صار في الملهى بعد كبرنا والقرايتي في الجامعة لعند اخر شيئ لما جابر حكالي عالمنظمة وخيرني مابين انكون امعاهم او الموت وعن اختياري الهم وسبب اختياري الاسم الجوكر كل شيئ حكيته وسمر قدامي واتبحت فيا زين مش مستوعبة كلامي

سمر بصدمة:كل هالكلام صاير مع واحد ليبي وهنا في ليبيا

نا:ومش نا الوحيد اللي صار فيه هكي او يبي ايصير فيه هكي

سمر:باهي شن نوع المهام اللي كنت ادير فيهن يعني فيهن دم

نا نزلت راسي:اها?

سمر بعصبية: قصدك قاتل ناس وكان صوتها عالي اشوي
وبعدين فطنت الروحها وواطت صوتها
سمر:يعني قتلت ناس

نا:اها وفيه اكثر من قصة قتل صارت نا كان عندي يد فيها وتوا اكيدة تبينلك اسباب سفري المفاجئ كانن ايجني اتصالات علي اني انسافر توا والقوانين المحطوطة ان ماحد يعرف اني سافرت لان فيه اوقات واجد انسافر بأسماء ثانية مش اسمي ومن غادي مانقدرش انكلم حد

سمر كان وجهها ماايتفسرش من الدهشة والصدمة
سمر:وليش السفريات

نا:مش كل المهام في ليبيا فيه منهن برا وفيه اجتماعات سرية للمنظمة لازم فيهن الحظور

سمر استكت ومعش ردت بولا كلمة

نا:هذا اللي كنت داسة عليك وهذا ليش حياتي كانت مليانة غموض بس الشيئ اللي نبيك تعرفيه ان مافيش شيئ اخترته بإرادتي كل شيئ اخترته غصبن عني حياتي كانت مش ملكي ملك الناس ثانية وهما يصرفو فيها زي مايبو ولو كنت رفضت اني انكون امعاهم او رفضت اي مهمة مصيري في النهاية الموت ونا زيي زي اي انسان مازال يبي الحياه ومايبيش ايموت رغم ان مافيش شيئ ايخليني انتمسك بالحياه الا انتي من اول ماخشيتي في حياتي ونا تغيرت حياتي كلها عرفت شن هو الحب وحسيت بطعمته حسيت روحي فعلا عايش امعاك بس كنت ننسى في كل شيئ صارلي من انا اصغير
حبيتك من كل قلبي وهذا الشيئ الوحيد اللي اخترته بإرادتي ?

سمر كانت مطبسة راسها وتسمع فيا وخلاص

نا رفعتلها راسها بإيدي:سمر الذنب مش ذنبي مالاول نا انسان انولدت في هالدنيا القيت روحي بروحي مافيش حد جنبي ماانبررش في اخطائي بس هذا الواقع ومش عارف من انلوم بزبط بس اكيدة اولهم هما الاثنين اللي غلطو غلطة وبسببها جيت انا وماتحملوش نتيجة غلطتهم وخلوني نا انتحملها ?

سمر كانت مش قادرة اتشوفلي بكل ومعش ردت عليا ولا كلمة

نا:هذا سري وقلته لكي والقرار توا عندك ياحتكملي امعايا او مش حتكملي لو وافقتي اتكملي امعايا حتكوني انتي الوحيدة اللي عطتني السعادة واتزيد سعادتي لما انجي نخطبك واتكوني مراتي وام عيالي ولو رفضتي اتكملي امعايا هذا حقك ومش حنضغط عليك وحنخليك براحتك بس ثقي وتأكدي ان مستحيل اتخش الحياتي بنت بعدك

سمر مازال منزلة راسها وماردتش بولا كلمة

نا:خوذي راحتك في التفكير بس حنرجى منك اتصال اتقوليلي فيه قرارك وخذيت الجوازات امتاعي والبطاقات وطلعت وسيبتها مع نفسها

/
/

طلعت ومن طلعتي ونا نرجى في قرارها وخايف منه
خايف لو ترفضني شن بيصير فيا وكيف حتكون حياتي بعدها ?

/
/

عند سمر
هذي اكبر صدمة خذيتها في حياتي تمنيت لو نحلم وماسمعت كلام احمد هذا تمنيت لو كانت فيه بنت في حياته كان اهون عليا ماللي سمعته
صدمتي في احمد وصدمتي في بلادي ان ايكون فيها اشخاص هكي كانت كبيرة
علي قد مافيه قصص اجرام منتشرة في البلاد بس كنت نحساب ان سببها انتشار الاسلحة وان مافيش رئيس ومافيش جيش وشرطة ماكنتش نحساب ان كل هذا سببه منظمات وناس من برا
احمد الشخص الطيب اللي حنية الدنيا فيه يطلع مجرم وقاتل ماكنتش قادرة انصدق
احمد طلع وسيبني مع نفسي حايرة ومش فاهمة شيئ ولا قادرة انصدق اللي سمعته منه
طلعت وركبت في السيارة ومش عارف كيف وصلت لعند الشقة خشيت ودغري خشيت الداري وسكرت علي روحي وقعدت امقمعزة علي سريري وحايرة هل نا في حلم ولا في علم معقولة فيه حاجات هكي عندنا معقولة الشخص الوحيد اللي حبيته يطلع سفاح

ماطلعتش اليوم كله من داري حتى رنت عليا هبة اكثر من مرة مارديتش عليها لاني كنت عارفة بتسألني اذا مشيت الاحمد او لا ومش عارفة مانحكيلها نا بروحي مازال مش مستوعبة شيئ وملخبطة ومش فاهمة اي حاجة

/
/

نا كملت اليوم كله في حيرة بس كان عندي احساس ان سمر حتكمل امعايا ومااتسيبنيش واحساسي عمره ماخيب ضني في شيئ وكنت انطمن روحي بالكلام هذا يمكن نهدى

/
/

سمر مرت عليها ليلة ماتنحسدش عليها كلها حيرة ووجع ومش عارفة اتقرر من ناحية اتحب احمد وتبيه لان هو الحب الحقيقي اللي كانت ترجى فيه ومن ناحية ان شخص مش كويس وقاتل وماتقدرش اتعيش مع واحد عارفة ان عيشته كلها حرام ومتورط في دم ناس ابرياء ?
الليل ماقدرتش ترقد منه لحظة وهي قاعدة في دوامة الحب والاجرام
كانت حاسة بألم في قلبها بس هالالم ماكان جسدي كان روحي الم مش قادرة كيف توصفه ولا تعرف توصفه مهما حاولت
(‏أشد الأوجاع هي تلك التي ، لا يكشفها الطبيب ‏ولا يستطيع أن يتحدث عنها المريض)

/
/

مرن يومين

بالنسبة ليا كنت حاط امل كبير في ان سمر حتكمل امعايا ومش عارف ليش كنت امفكر هكي بس يمكن لاني واثق ومتأكد من حب سمر ليا
بس احتمال انها ترفض اتكمل ماكنتش حاطة في حسبتي عشان ماكنتش بنفكر كان رفضت كيف حتكون حياتي بعدها
ممكن اتحسوني امأوفر بس بصدق نا حبيتها حبيتها حتى اكثر من روحي ماهي الانسانة الوحيدة اللي حسيت امعاها بطعم الحب اللي فاقدة من صغري الحب اللي مااقدرتش انحسه لا من ام ولا اب ولا اخ ولا اخت حسيته امعاها هي بس واعتبرتها ان هي كل الصفات اللي فاتن هي امي هي باتي هي خويا واختي وحبيبتي وبنتي ومانبيش انفكر انها ترفض اتكمل لان لو رفضت كل هالصفات والاحاسيس اللي حسيتهن امعاها حتحرمني منهن وحتجرحني اكبر جرح ننجرحه في حياتي?

اما سمر كملت هاليومين في الحوش لا مشت للجامعة ولا للمعهد ولا اترد علي حد في فونها ابدا
كل وقتها اتفكر في اللي صار ومش قادرة تاخذ قرار
جتها هبة وحاولت تفهم منها اللي صاير اتحاول اتساعدها في التفكير بس سمر رفضت تحكي اي شيئ وحبت اتخلي سر أحمد الكبير بينها وبينه بس ?

/
/

نا كملت اليومين هذينا في شغل وزدت الضغط علي روحي واجد في الشغل عشان نلهي روحي فيه وماانفكرش في شيئ

انكمل في اليوم كله في الشغل وانروح في الليل للشقة ونقعد طول الليل حاط تليفوني قدامي نرجى في مكالمة سمر ويطلع الصبح ومش جايني شيئ

اليومين هذينا انا وسمر ماذقنش فيهن طعم النوم وكل واحد شايل هم بروحه بعيد عاللاخر

/
/

ثالث يوم في الصبح ونا قاعد انوتي في روحي بنطلع للشركة جت رسالة علي تليفوني جيت بسرعة ومن برا ومن قبل مانفتح التليفون طلعلي انها من سمر
قلبي في اللحظة هذي وقف معش حسيت بنبضاته قعدت خايف اني نفتح عالرسالة ونلقى فيها حاجة تقهرني قعدت امصبي وماسك تليفوني وانبحت فوق كنت نطلب من ربي اني مانلقش فيها اللي خايف منه
وبعدها قعدت انشوف للتليفون زين نا عارف ان الرسالة اللي جتني توا هي الوحيدة اللي قادرة اتغيرني ياتصنع مني انسان جديد وحاب الحياه ياتصنع مني وحش كاره كل شيئ وكل حد قعدت 5دقايق ونا ماسك التليفون وماعنديش شجاعة نفتحه رغم كل القوة اللي عندي بس سمر كانت نقطة ضعفي الوحيدة في الحياه لكن بعد الخمس دقايق اجرأت وفتحت التليفون وقريت الرسالة وكان مكتوب فيها(ليا يومين مش قادرة نرقد مالدوامة اللي حطيتني فيها وكنت حايرة ومش قادرة ناخذ قرار من ناحية انحبك ومش قادرة انتخيل حياتي بدونك ومن ناحية شافقة عليك وعاللي صار فيك وعارفة ان ماكان ذنبك ومن ناحية اخرى انت انسان مجرم ومش حنقدر انأمن علي نفسي وعلي اعيالي امعاك ومش قادرة نرضى وناخذ واحد مجرم هلي والناس وبلادي و تربيتي اللي ربوها ليا هلي علي حب بلادي هذينا كلهن يمنعني اني انكون امعاك ونا عارفة طبيعة شغلك عشان ذنب الناس الابرياء وعشمهم حيتبعك وايتبعني وايتبع عيالك وحيكون لنا جحيم في الدنيا وفي الاخرة أسفة أحمد مانقدرش انكون امعاك انتمنالك حياه سعيدة مع وحدة غيري والله هالكلام انقول فيه لكي ونا قلبي ايتقطع من جوا وادموعي علي خدي بس هذا انسب حل لنا ياريت تنساني واطلعني من حياتك زي ماانا بندير وبنعتبر انك حلم ووعيت منه خلاص
سلام)

الرسالة التعبير البسيط الها انها قتلني ونا حي ?
كيف كنت حاط امل وكيف في لحظة انتهى كل شيئ
معقولة كل الاحساسيس والمشاعر اللي في قلبي تجاهها ينتهن برسالة وحدة
نا رغم كل اللي صاير امعايا حبيتها رغم كل قسوة الدنيا عليا كنت حنون امعاها رغم ان كل الدنيا مستغنية عليا كنت متمسك بيها

(أنت لا تعرف ما معنى أن يحبگ شخص متعب .؟ شخص رغم مرارة داخله يحاول أن يحبگ بگل حلاوة العالم ورغم گل الفوضى التي تسگنه فإنه يرتب نفسه لأجلگ .♥️-)

/
/

عند سمر
دزيت الاحمد الرسالة ونا ادموعي ينزلن عالفون ومن كثر ادموع اعيوني ماكنتش انشوف في الشاشة كويس واول ماكملتها ودزيتها انهرت انهرت بجد مش مصدقة اني نهيت كل شيئ وبكامل إرادتي بس نا كنت متأكدة ان هذا احسن حل انديره
مع اني عارفة هالقرار حيدمرني بس فكرة انعيش امعاه وهو مجرم مانقدرش عليها
في اللحظة هذي تمنيت لو كان متجوز لو كان خاطب لو كان مش ليبي او حتى سر ان مالميتم كلهن كانن ساهلات جنب ان هو انسان قاتل وسفاح ومجرم مانقدرش انكون امعاه وهو هكي مستحييييل حتى لو بنموت بعده بس مانقدرش ?

/
/

مرن أسبوعين كانن اسوأ اسبوعين مرن عليا في حياتي
تاعب تاعب بكل ماتعني الكلمة من معنى منهك ومش قادر اندير شيئ اول مرة انحس اني ضعيف للدرجة هذي حبيبتي ضاعت مني ولا في يدي اي شيئ انديره

كل هالاسبوعين ونا انفكر في الدنيا وكيف كل شيئ مسكر قدامي لاني قادر انكون انسان اكويس ونختار كل شيئ نبيه ولاني قادر انكون مجرم ونقتل قلبي وضميري جيت هكي في النص ووقفت ✋
قعدت نسأل في روحي هل نا بس في الدنيا هكي او فيه ناس عايشه نفس مأساتي
نبي حل نبي نعرف من انا نبي انعيش شخص واحد ياانكون الطيب ياانكون الشرير ?
طول الأسبوعين نحلم بسمر يوم انها انقتلت يوم انها انخطفت يوم انهااجوزت ?
ووفوق احلامي بسمر كانن ايجني كوابيس مالناس اللي نقتل فيهم كل يوم واحد جايني بعد نرقد
الدرجة اني كنت انخاف نرقد من كثر الاحلام والكوابيس
طول الاسبوعين ماطلعتش مالشقة بس واكثر شيئ يقهر ان مافيش حد دورني وهذا ايدل علي شيئ واحد اني مش مهم عند حد ?
كل اللي صار هذا عطاني فرصة انفكر ونعرف ان مافيش حد يقعد امعاك الا اللي اخلقك فتقربت من ربي قعدت انصلي في كل وقت ونطلب منه ايوريني الطريق الصح اللي نمشي فيها هو الوحيد اللي حيوقف جنبي
كنت كل ماانتوضى ونبدى بنصلي من اول ماانكبر ونا ادموعي ينزلن أحساسي بالذنب عاللي درته في الناس وهل يمكن ربي ايسامحني نعرف ان هو غفور رحيم هل ممكن يغفرلي ويرحمني

لعند لما جا اخر يوم في الأسبوعين واللي صارلي في اليوم هذا ماعمرش صارلي
كان انفسي ضايق عليا حاس روحي في اللحظة هذي بتطلع حاس اني بنموت مافيش مهرب صليت دعيت مافيش فايدة ماتريحتش
وبحكم ان ليا اسبوعين ماطلعتش وماحكيتش مع حد قلت يمكن محتاج نطلع
طلعت وكان الجو برا صقع والدنيا مطر ومن كثر المطر مافيش سيارات واجد برا وكان الوقت قريب الساعة 11 في الليل قعدت نبرم بالسيارة وانفكر لو ان عندي ام في اللحظة هذي كنت مشيتلها وعزقت روحي في حظنها وحكيت اللي في قلبي كله اكيدة الحمل والوجع اللي عندي كانن خفن عليا
وفي اللحظة هذي مااذكرتش الا انسانة وحدة هي الوحيدة اللي حسيت ان حظنها حظن أم حقيقي
حنان هي الوحيدة اللي حبتني بدون شيئ هل ممكن نلقى عندها دواء الاوجاعي
قعدت نمشي بالسيارة لين وصلت عند حوشها قعدت انبحت فيه وحاير بين ننزل وبين لا واخر شيئ قررت ننزل الدنيا مطر ونا كنت لابس تيشرت نص كم وماكنت حاس بالصقع لاني وصلت المرحلة ان معش انحس بشيئ

‏(لستُ حَزيناً ولستُ سَعِيدًا ، أنا فِي المَرحَلة الأصعَبْ ، أنا لا أشعُر بشَيٍء أبَداً..✋?)

دقيت عالباب وقعد صوتها من جوا ايقول من
ماقدرتش انرد كنت انفكر في اني انلف ونركب في سيارتي ونطلع
حنان:من
تراجعت خطوتين لاورا وبنرد انفتح الباب

حنان بخوف:من انت

نا ماقدرتش انرد بولا كلمة

حنان وهي اتشوفلي زين:مش انت اللي من فترة تلاقيت بيك في محل مواد غذائية

نا كان صوتي مش قادر يطلع والكلام راح من عقلي

حنان نظرتلي نفس النظرة الحنونة اللي كنت انشوف فيها في عيونها ونا اصغير وكأنها حست بيا وعرفتني

حنان:انت من وشن اسمك

نا رفعت تيشرتي لعند مكان لذعة سناء ليا ونا اصغير

حنان شافتها ودغري الدموع سبقنها

حنان تبكي:أحمد كان قلبي حاس اني حنرد انشوفك مرة اخرى كنت متأكدة حتجيني وطلعت وضمتني برا ضمت ام الولدها اللي غايب له 20 سنة

حنان;خش خش جوا عالمطر
وخشيت امعاها جوا كان حوش صغير وبسيط بكل عبارة عن صالة ودار مصادرة ومطبخ صغير وجنبه حمام
قمعزتني في الصاله
حنان وهي مازال ادموعها ينزلن:وين كنت طولت ونا نرجى في مكالمتك

نا:سفرني جابر من انا اصغير وماروحتش هنا الا بعد كبرت وخذيت شهادة الجامعة

حنان:وين سفرك

نا:ونا اصغير قعدت في روسيا وبعد خشيت للجامعة سافرت الامريكا

حنان:عند من كنت وليش ماكلمتني من غادي

نا:كنت في مدرسة داخلية وماكنت قادر انكلم حد

حنان:ولما روحت ليش ماجيتني

نا طبست راسي وماقدرش انرد عليها ماكنتش قادر انقوللها مانبيكش تقعدي نقطة ضعفي بس طلعتلي نقطة ضعف اكبر منك

حنان قربت مني:مش مشكلة اهم شيئ انك جيتني توا والله ياحمد ماانسيتك ولا انسيت براءة طفولتك ولا يوم وكنت طول الوقت انفكر فيك وانفكر وين ممكن اتكون وعند من وديما ندعيلك ان ربي ايوفقك

نا بحتت فيها وكانن اعيوني مليانات ادموع

حنان:ليش الدموع هذينا عهدي بيك حتى وانت اصغير ماكنتش تبكي وديما اتحمل فوق من طاقتك

نا وادموعي سبقني:تعبت تعبت بكل يا امي
حنان حضنتني حضن كان في لحظتها عندي بالدنيا كلها قعدت نبكي بين ايديها وهي ضامتني بكل قوتها وحاطة يدها علي شعري واتحرك فيها زي كأني ولدها اللي غلط ويبكي عندها خايفها اتعاقبه
نا نبكي وسناء اطبطب عليا بيدها واتقولي ابكي ابكي عشان اتريح نا عارفة انك شايل حمل اكبر منك بواجد

ربع ساعة كاملة ونا في حظنها ونبكي لعند لما حسيت روحي تريحت تريحت بكل وسكتت وبعدت منها

حنان;قولي شنو اللي تعبك هكي

نا حطيت يدي علي قلبي:هذا تعبني لا اللي قدر ايعيش كيف باقي الناس ولا اللي مات وريحني

حنان:حبيت يااحمد

نا نزلت راسي:للاسف حبيت السوء حظي اني حبيت والحب هو اللي ضعفني وخلاني هكي

حنان:عمرك مااتأسف عالحب عشان الحب هذا اجمل شعور انحسو بيه شن طعمة الدنيا لو مافيهش حب ولازم تعرف ان الحب عمره ماكان ضعف الحب قوة للي يعرف كيف ايحب وكيف ايحافظ علي حبه

نا:نا كنت قوي بس هو اللي وصلني للحالة هذي وهو اللي تعبني هكي

حنان:اللي تعبك هكي مش الحب اللي تعبك جابر وسناء حسبي الله ونعم الوكيل فيهم

نا بحتت فيها زين نظرتي كانت نظرة صدمة ودهشة ليش هي تحكي هكي

حنان:نا عارفة جابر شن يشتغل وعارفة ان سناء امعاه وعارفة ان اللي داراته سناء فيك كله كان من تدبير جابر

نا:– ???

#يتبع

حي حنان كيف تعرف شغل جابر وسنائ مالكاينة اتكون حتي هي امعاهم?

قولكن احمد شن حيرد علي كلامها هذا وقولكن شن حيصير بينه وبين تسنيم وهل حيفوز الجوكر او احمد ?

كله حنعرفو في الحلقة الجاية والاخيرة من رواية الجوكر? اللي حتنزل في العشية ?

اسفة لو فيه لخبطة في الاسماء وأكيد رأيكن ايهمني?

گـتـابـتـي Koka Saleh