الجوكر | للكاتبة Koka Saleh

#الـجـوكـر ?

الـحـلـقـة (18)

(حقيقية ممزوجة بالخيال)

گـتـابـتـي #Koka_Saleh

::::::::::::::::::::::::::::::::::::::::::::::::::::::::

لايك قبل القراية وتعليق بعد القراية ?

:::::::::::::::::::::::::::::::::::::::::::::::::::::::::

نا:لا مامليتش لكن احترت بس

سمر:خلاص اول ما انتلاقو انقولك اللي صاير امعايا

نا:معناها خلينا انتلاقو بكرا

سمر:تمام بكرا في نفس الكافي الساعة 5

نا:تمام وتوا خليني انخش شور صاحبي قتلني الصقع في السيارة

سمر:تمام

نا:حنكلمك اول مانوعي

سمر:تمام تصبح علي خير

نا:وانتي بخير وديري بالك علي روحك

سمر:حاضر وحتي انت

نا:حاضر وانحبك

سمر:سلام وسكرت

ونا خشيت جوا واول ماخشيت جت عيني عالدار المسكرة وقعدت انبحت فيها وكل اللي في عقلي اني بنخشلها وبس قربت مالباب ومسكت القفل وسمعت عبد المهيمن ايكح بعدت من القفل ورديت بسرعة للباب اللي برا ورديت وخشيت منه للمربوعه

عبد المهيمن:وين كنت

نا:كنت نحكي بالتليفون

عبد المهيمن:الحب

نا:اها?

عبد المهيمن:كيف تعرفت عليها

نا:في مكتبة طباعة وتصوير كنت جاي نبرم عالشغل وجت غادي ومن اول ماشفتها لخبطت كياني وحالي

عبد المهيمن:يعني حب من اول نظرة

نا:بزبط شكله هو الحب من اول نظرة فحِينَ رَأيتَها أوّلَ مرةٍ التَفتُّ لها كمَا لمْ التَفِتْ لِأحدٍ منْ قَبل، شَعرتُ وكَأنّها مَألوفة إلَي قَلبِي، تَقابلَتْ أعْيُننَا لوهلةٍ وَاحِدَة..شَعَرتُ فِيهَا بالسّلامِ يَشُعّ مِن عَيْنَيها وكَأنّها نور، كَانتْ أولَ مرةٍ تَراها فِيهَا عَينَاي ولَكِن رُوحِي لَم تَكُنْ كَذلِكْ، مَضَت ومَضِيتْ ولَكِنْ ظَلت بلبّي وكأَنّ هُناكَ وِصَالٌ رُبطَ بَينَنَا لَا اعْلَمْ كَيفَ لِهذَا أنْ يَحدُثْ بِبِضعِ لَحَظاتْ ولَكِن بالفِعلِ حَدَثْ..

عبد المهيمن:شكلك بتقعد شاعر علي حبها

نا:شاعر وفنان واي شيئ عشانها نقعده

عبد المهيمن:شكلك اتحبها واجد

نا تنهدت:اكثر ماتصور

عبد المهيمن:واخطبها واجوزها في شن ترجى

نا في عقلي ياريت كان الامر ساهل هكي راني درت زيك وزي معز واستقريت وبديت حياه حلوة ومستقرة مع سمر بس نا كنت نختلف واجد الف عائق وعائق في طريقي

نا:ان شاءلله وتمددت في الفراش وغمضت عيوني ونا انتخيل لو اني شخص عادي عندي هل وام وبات وحبيت سمر راه دغري شلت هلي خطبوها وطلعت الفرح وعشنا احلى حياه بس ذنبي كان اني ولدت لقيط وزادني جابر ذنب ثاني لما خلاني مجرم?

/
/

صباح يوم جديد
وعيت خشيت غسلت وطلعت لميت فراشي اللي كنت راقد فيه مع خشت عبد المهيمن جايب فطور فطرت امعاه وطلعت كلمت سمر في الطريق القيتها اتوتي في روحها للجامعة هدرزت اشوي امعاها لعند ماوصلت للشقة وبعدين سكرت امعاها وخشيت للشقة دوشت ولبست وطلعت عالشركة وصلت للشركة كان جوي مش تمام بكككل رقدت امس كانت رقدة بايخة بكل كملت الليل ونا انكوبس بالحاج ميلود وماقدرتش نرقد ونا قاتله وقاعد في حوشه وفوقها انفكر في الدار اللي فيها اوراقه اللي ايخصنه كنت متأكد ان راس الخيط اللي بنكمل بيه طريق الحاج ميلود فيها بس كل همي كيف نوصل للاوراق اللي فيها راسي حاسة كبييير من كثر التفكير
بعدها بديت في الشغل عشان نلهي روحي فيه ومعش انفكر
كان يومها عندي دورة علي مكاتب الطباعة طلعت مالشركة ومشيت للمكاتب كلهن ماكملت دورتي الا وكان موعدي مع سمر مازال عليه ربع ساعة ركبت في السيارة ورنيت عليها وهي ردت

نا:شن الجو حبيبي

سمر:تمام وانت

نا:تمام وين قاعدة

سمر:عند هبة اشوي وماشية للكافي

نا:ونا طالع شوره توا انتلاقو غادي

سمر:تمام وسكرت

هبة:يعني مصرة فيستو فيس

سمر:بنشوف ردة فعله بعيوني لما انقولها له

هبة:كلا انتي عليك افكار عندك

سمر:المهم بنمشي نبيش انتأخر ويقعد يرجى

هبة:باهي مااطوليش

سمر:مش مطولة وطلعت

/
/

وصلت للكافي وقمعزت وقعدت نرجى في سمر
كان بالي مشوش والمواضيع اللي في بالي والتفكير فيهن مش راضي ايخطاني بكل مزاجي امعكر وكنت مانبيش ايبان الشيئ هذا قدامها
بعد اشوي سمر وصلت وقربت مني وسلمت عليا وقمعزت مصادرتني
نزلت راسي وماشفتلهش واول مرة اندير هكي بس ماكنت نبيها اتركز وتفهم اني متضايق لانها كانت تعرفني من صوتي مبالك امقنعز قدامها

سمر:شن اخبارك

نا:تمام وانتي

سمر;تمام
وهي سكتت ونا سكتت

سمر:شن اخبار امك وباتك وخوتك

نا شفتلها بنظرة كانت كلها حزن ;كويسين ونزلت راسي

سمر:كنك متضايق

نا:لا مافيش شيئ

سمر:اسفة لو سؤالي ضايقك

نا:لا عادي ماادوري شيئ شن تبي تطلبي

سمر:أحمد

نا:نعم

سمر:انحبك?

نا:تحكي من جدك

سمر:اها والله

نا من فرحتي معش عرفت انعبر لو نقدر كنت صبيت حظنتها قدام الكل قعدت انشوفلها ونظرة عيوني والفرحة اللي فيهن بروحها اجابة وتعبير عن فرحتي

نا:وحق الله مش مصدق تي نا انموت فيك مش بس انحبك ?

سمر ابتسمت ونزلت راسها ☺

سمر عرفت تختار الوقت المناسب انها اتقولي هكي كان مزاجي متعكر والف فكرة في راسي بس بمجرد مانطقت الكلمة كل شيئ تبخر وقدرت اتبدل حالتي من انسان حزين ويائس الا شخص فرحان ومتفائل ?

الحب الحقيقي فعلا قادر ان ايغير اي حاجة في الشخص❤

قعدت انهدرز نا وهي قريب ساعة وبعدين هي مشت ونا طلعت ونا فرحان وحسيت روحي عندي طاقة ايجابية كبيرة وان كل شيئ في الدنيا له حل وحسيت اني الخيط اللي اندور فيه خلاص القيته
وهالشعور كله جاني المجرد بس انها اعترفتلي بحبها حسيت كل البيبان المسكرات انفتحن في وجي
طلعت مالكافي واول حاجة درتها رنيت علي حركات وهو رد

حركات:خير يالحب لنا زمان علي صوتك

نا:اسبقني عالشقة بنجي توا غادي

حركات يضحك:للدرجة هذي مرايف عليا

نا:بلا ثقالة وتعال موضوع مهم

حركات:تم مسافة الطريق وانكون عندك وسكر

يعجبني في حركات صح ايحب البصارة والكلام الواجد والضحك وواخذها ايزي لكن عند الجد هو اكثر واحد نعتمد عليه لان ايدير مهمته بدون اي غلط

/
/

طلعت للسيارة ومشيت شور الشقة وصلت القيت حركات واصل وقاعد في سيارته واول ماشافني نزل

حركات:امر يامعلم شن فيه

نا:نرقو ونحكيلك فوق

حركات:تمام ورقيت نا وياه وخشينا للشقة وقمعزنا في الصالة

نا:عندي مهمة بنعطيها لك وعارف ان ماحدش ايهنيني عليها الا انت

حركات:شنو ونا انديرها لو فيها موتي

نا:لالا مافيهش موت لكن صعبة اشوي وتبي تأني وحذر

حركات:شوري ياجوكر

نا:انوصفلك حوش واحد صاحبي من جوا وفيه دار نبيك اتخشلها واتجيبلي كل الأوراق اللي فيها

حركات:تمام ساهلة

نا:لا مش ساهلة اول حاجة صاحب الحوش شرطي وامه حتكون في الحوش

حركات:شن كبرها امه

نا:كبيرة في العمر

حركات:تمام وصاحبك بيقعد في الحوش

نا:لالا انا حنطلعه بطريقتي ولما يقعد الوقت مناسب نا انقولك امشي بس مانبيش اتخلي وراك اي اثر واهم شيئ ان امه مااتحسش بيك

حركات:كون هاني الموضوع هذا تخصص ماعليك فيه

نا:يعني نطمن

حركات:اعتبر الاوراق عندك من توا

نا:تمام يبقى التنفيذ بكرا في الليل

حركات:تمام

نا:لا الصيني ولا العيساوي يعرفو بيها نبيها بيني وبينك

حركات صبى:كون هاني مالناحية هذي

نا:خليك نطلبو عشاء وانتعشو مع بعضنا

حركات:مسيب امي بروحها في الحوش بنتعشى نا وهي

نا:اجوز وجيبلها وحدة تقعد امعاها واتغيرلها جوها

حركات تنهد:اللي ماشي في طريق زي طريقي ماينفعش يجوز حيجيب اعيال وفي الاخير بيخليهم أيتام

نا بحتت فيه حسيت كلمته هزت كياني من جوا فعلا اللي زينا مايقدروش يبدو حياه لانهم مش حيكملوها ?

نا سكتت ومعش رديت عليه

حركات ضحك:بس المزز واجد خليك كل يوم مع مزة واستمتع بالحياه مش داعي تربط روحك بوحدة تمسكك من ارقبتك وين ماشي وين جاي?

نا ابتسمت:المزز واجد لكن الحب

حركات قعد يضحك:تي اي حب ياجوكر من جدك مصدق الكلمة هذي كذب ووهم توا البنات كلهن يبن المعبي اللي امعاه فلوس لا حب ولا دفنقي

نا:وعليش تحكي هكي انت

حركات:عشان نا اكثر واحد حبيت وماطلعتش برا حبيت بنت خالي وادرى الناس باحوالي كبدت فيها ونويتها بالحلال لكن كانن احوالي مش احوال زواج حتى مش قادر انأجر حوش الامي مشت امعاي في الحب ويوم اللي جاها الواتي بحوشه وسيارته وقلتلها نحكي الخالي نبيك قالتلي لا نا بنجوز كيفي كيف كل البنات وانت لو نرجاك عمري كله مش حتقدر اتأجرلي حتى دار وباعت الحب والسنين واجوزت وانزفت قدام عيوني

نا:واااااو ياحركات كل هالحاجات صايرات امعاك وعادي تضحك واتبصر نحسدك نا

حركات:لا تحسدني لا شيئ الموضوع ومافيه ان خلاص تبلدت قعدت بليد وقتلت قلبي واحساسي ومشاعري الوحيدة اللي انحس امعاها بالحب وان عندي مشاعر امي غيرها كلام فاضي

نا:ربي يحفظها لكي ?

حركات:يارب خلاص نا بنمشي توا

نا:تمام

حركات قدم خطوتين ورد عليا
حركات:شن صار في موضوع الراجل اللي بيردلي فلوسي

نا:حكيت امعاه وقالي اليومين هذينا بيجي الليبيا وحنخليك اتقابله وتتفق امعاه علي كل شيئ

حركات ضحك:راه ينصب علينا حتي نحن

نا:عيب ياراجل امعاك الجوكر اللي يلعب امعاه ياخذ روحه ?

حركات يضحك:خف علينا ياعزرائيل ?

نا:انقنك بارد?

حركات:عارف روحي?

نا ضحكت:خلاص عدي خير مانرتكب فيك جريمة

حركات:معش تلقى من ايضحكك ?

نا ضحكت:العزا فيك باطل ?

حركات:سلام يالحب بينا تليفون علي بكرا

نا:تم
طلع حركات وناخشيت اندوش بعد يوم كان متعب

/
/

عند سمر

هبة:باهي كيف كان شعوره

سمر:لو ماتحشم كان حظني قدام الناس ?

هبة:خزي سخيفة ?

سمر:اها ?

هبة:يعني انتي هكي منسجمة وحاسة بتريحي امعاه

سمر:اكيدة وحق الله مافيش زيه راجل عمره مامر عليا شخصية هكي

هبة ابتسمت:ربي ايهنيكي امعاه ياقلبي ?

سمر:يااارب وقعد فونها ايرن

سمر:ولد الحلال عند ذكره ايبان

هبة:هو

سمر:اها خليني انرد عليه وردت

سمر:اهلا

نا:انحبك

سمر:حتى نا ?

نا:انتي شنو

سمر شافت الهبة وابتسمت:حتى نا انحبك ☺

هبة جنبها وتضحك?

نا:مازال مش مصدق حاس روحي نحلم

سمر:لا ماتحلمش كله حقيقه

نا:اتصدقي امبدري كان عندي مشاكل واجد في الشغل بس مجرد ماقلتيلي انحبك انحلت كل حاجة قدامي

سمر:يعني كنت وجه خير عليك

نا:مش وجه خير بس انتي مصدر سعادتي والهامي في كل حاجة في حياتي

سمر ابتسمت:تحكي جد

هبة اشرتلها بمعنى افتحي الاسبيكر وسمر فتحاته

نا:جد الجد مش بس مصدر سعادتي انتي بالنسبة ليا حاجات واجد وانخاف نحكيلك تضحكي عليا او تحسابيني نكذب عليك

سمر:مستحيل نضحك عليك ولا انفكر انك تكذب لان عندي فيك ثقة كبيرة

نا:سمر والله انحس فيك امي واختي وبنتي

سمر شافت الهبة ومعش عرفت اترد

نا:انحبك زي ما كل انسان ايحب امه اللي هي سبب وجوده في الدنيا وانغار عليك زي ماانغار علي اختي وانخاف عليك زي كأنك بنتي ومسؤولة مني
و تعرفي حاجة رغم كل هالكلام حاس روحي ماحكيت شيئ ماللي في داخلي بس بإختصار حنقولك شيئ واحد ان لما عرفتك وحبيتك في اللحظة هذي حسيت روحي انولدت من جديد وتوا كيف بدت حياتي

سمر:معش عرفت شن انرد علي كلامك

نا:المهم حسيتي بيه وصدقتيه مش مهم اتردي عليه

سمر:والله حسيته وبالكلمة وصدقته كله

نا:إنتي السبب الأول الذي يدفعني للإستمرار وانتي أيضاً ورآء شغفي اللآمتناهي.. أنتي لستَ خطة ثانوية أو ممر جانبي أنتي الطريق.. ~

سمر:لَاْ يَلِيْقُ بِيِّ سِوَاكَ رَجُلَاً يُضْيْءُ عَالَمِيِّ ، وَ يُتَوِجُ أُنُوْثَتِيِّ عَلْىْ عَرْشِ الْنِسَاءْ ، أُحِبُكَ يَا مَنِّ سَكَنْتَ نَبْضْي..

نا:حاس ان كلمة انحبك مااتعبرش علي كل اللي في داخلي

سمر:اخترعلي كلمة اتعبرلك

نا:كان نقدر نخترعلك مش كلمة لغة كاملة ليا نا وانتي بس

سمر ضحكت

نا:لا هكي واجد عليا صوتك وضحكتك

سمر ابتسمت:باهي بنقولك توا بيجيني سالم انروح ونحكي امعاك

نا:نرجى فيك

سمر:سلام

نا:انحبك

سمر:ونا انحبك? وسكرت

في اللحظات هذينا كنت اسعد انسان في الدنيا غمضت عيوني وقعدت انتخيل فيها جنبي وامعايا وكيف حتكون حياتي امعاها

/
/

هبة:كلامه اوفر

سمر:بس صادق

هبة:انتي مصدقتيه

سمر:اكثر ماانصدق في روحي

هبة:سمر مش للدرجة هذي مالكيش واجد تعرفيه صحصحي يابنتي مش هكي تقعديش هبلة

سمر:هبة انتي ليش ديما تحكي علي احمد هكي تعرفي عليه شيئ

هبة:من جدك انتي لو نعرف عليه شيئ كنت دغري حكيتلك بس القصة خايفة عليك وضعك قاعد مش طبيعي متعلقة بيه بكل وهكي مش صح عشانك افرضي اتصير بينكم مشكلة واتسيبو شن بديري بعده

سمر:فكنا الله انتي كنك هكي تحرقي في اللحظات السعيدة

هبة:والله مانحرق فيهن نبيك توعي علي روحك اشوي

سمر;واعية واعية وعايشة قصة حب اتهبل خليني متهنية فيها

هبة:ربي ايهنيك حبي نا بس نبيك اتصحصحي اشوية الشباب مافيهمش امان وماتزعليش مني

سمر:وامتى عمري زعلت منك ياهبلة بس بجد احمد كويس وقلبي واحساسي قايلاتلي هكي وعمره قلبي واحساسي ماكذبن

هبة:ان شاءلله

سمر:خليني انرن علي سالم انشوفه وين طب

هبة:لما يوصل توا ايرن عليك

سمر:يقعد تحت ويقعد ايشلط وايكمل رصيده وايقولي من بدري برا وماعنديش رصيد?

هبة تضحك:ربي ايعينكم علي بعضكم

سمر:ماتاخذيش عالجو عند هلي ديما يشكر فيا واديرلي واديرلي

هبة:واتشحوير المشي يحكيش عليهن

سمر:لا ضروري ايقوللهم ماتقعدش بكل وتبيني شوفيرها امالا ليش علمني السواقه بابا قاله علمها

هبة:خلاص هانت مازالت هالسنة واتردي الهلك

سمر:هي هذي خلاص عدى الواجد مازال اشوية
وطلعت فونها ورنت علي سالم
سمر:وين طبيت

سالم:برا اطلعي

سمر:وكنك مارنيت

سالم:ماعنديش رصيد

سمر:ديما هكي اتكمل رصيد عليهن ونا ليا ماعندكش رصيد وسكرت في وجه ?

سمر:مش قتلك مشلط لين مكمل الرصيد ويقعد برا يرجاني نا انرن

هبة:ووووه من سالم كان نا مشنقته

سمر:بس فيه جو ?

هبة:حانط بكل

سمر:طالعلي ?

هبة:باهي اطلعي ?

سمر تضحك وطلعت ونزلت السالم ووصلو قدام الشقة

سمر:تبيش تنزل

سالم:بنمشي الاصحابي اشوي وانجيك

سمر:تمام بس مااطولش روح قبل مانرقد

سالم:تمام

نزلت سمر وخشت للشقة

/
/

كنت قاعد في الدار مع احلامي الوردية
وبعدين اذكرت حركات والاتفاق اللي بيني وبينه علي بكرا دغري مسكت تليفوني ورنيت علي معز وهو رد

نا:شن الجو

معز:تمام شن جوك انت

نا:تمام حال الكساد

معز:مافيش سفر

نا:لا الايام هذينا مفيش بس فكرت في فكرة بناخذ رايك فيها

معز:شنو

نا:يعني ماعمرنش طلعنا زردة هكي مع بعضنا شن رايك بكرا نطلع نا وانت وعبد المهيمن عالبحر نقعدو يومين فيه

معز:هي فكرة سمحة ونبوها الطلعة لكن يومين واجد كان قعدت يوم نمشي

نا:باهي تمام يوم ياسيدي كله عشان ماتبعدش عالمدام

معز:عاد اهو ماصدقنا استقرينا شوف مهيمن ورد عليا

نا:تمام توا انشوفه توا
وسكرت امعاه ورنيت علي عبد المهيمن وهو رد

نا:شن الجو

عبد المهيمن:تمام شن جوك انت

نا:تمام بنقولك توا كنت نحكي مع معز واتفقنا نطلعو زردة للبحر بكرا ونقعدو اليوم كله لعند ثاني يوم شن رايك انت نحسبوك ولا كيف

عبد المهيمن:اكيدة احسبوني وفكرة سمحة عمرنا ماطلعنا مع بعضنا

نا:هي هذي خلاص بكرا وتي روحك في الصبح انتكي عليك

عبد المهيمن:تمام بس قبل ناخذ اذن مالشغل وانحط امي عند خالتي

نا:يعني قصاد امتى تقعد ناهي موضوعك

عبد المهيمن:عا ال10 هكي

نا:خلاص تمام بكل العشرة انتكي عليك

عبد المهيمن:تمام وسلام توا وسكر

عاودت رنيت علي معز وقتله بكرا المشية ونا اللي انتكي عليك
وبعد معز كلمت حركات وحكيتله ان بكرا الحوش حيكون فاضي

بعد كملت اتصالاتي مسكت اللاب امتاعي وفتحت النت مع رنت تليفوني وكانت سمر رديت عليها وقعدنا انهدرزو قريب ساعة وبعدها

نا:سمر عادي نطلب منك طلب

سمر:شنو

نا:عادي نحكو فيديو

سمر:توا

نا:اها

سمر:تمام بس مش واجد

نا:انشوفك اشوي وبعدين انتي سكري الكاميرا ونا بنقعد فاتح كامرتي ونحكو هكي

سمر:باهي

فتحت اللاب واتصلت بيها فيديو عالفيس وقعدنا نحكو فيديو
شعوري كان سمح لاني كنت حاس انها قاعدة امعاي وان نا وهي في نفس المكان
قعدت فاتحة الكاميرا عندها ربع ساعة وبعدين سكرت كاميرتها ونا قعدت فاتح كامرتي وانهدرز امعاها
كانت احلى ليلة شعور سمح اتحس حبيبتك امعاك وامشاركتك نفس المكان❤

/
/

سمر
طلب احمد بالنسبة ليا كان غريب بس شيئ في داخلي خلاني انوافق ممكن لاني واثقة في احمد وحاسته انسان صادق بكل مش عارف بس حبيت فكرته ووافقت عليها بس ماقدرتش انخلي الكاميرا مفتوحة اكثر من ربع ساعة وبعدها سكرتها وقعدت انشوف فيه هو جاني شعور ان نا وهو مع بعضنا ❤
لما سكرت الكاميرا قعدت نقدر انشوفله اكثر نحفظ ملامحه وانشوف تصرفاته اكثر نقدر انشوف العيونه بدون ماننحرج لان لما نقعد قدامه وهو ايشوفلي معش نقدر انبحت فيه او نحفظه بس بهكي القيتها فكرة سمحة انكون قريبة منه اكثر وانشوف الصدق في عيونه لما ايعبرلي علي مشاعره
زدت حبيته وتعلقت بيه اليوم هذا بزيادة عن كل يوم ?

الليل كله خذيناه ونحن انهدرزو وحكيتلها ان بكرا طالع مع اصحابي للبحر عشان ماتنشغلش عليا لو ماكلمتهش
وقعدنا انهدرزو لين هي نعست ونا طفيت سكرنا ورقدنا ?

/
/

صباح ثاني يوم ?

كان يوم حلو وجا من غادي يوم بحر
وتيت ادبشي وكانت اول رحلة ليا انوتي فيها دبش قبل كل مشة اتجيني فجأة?
فطرت وطلعت تكيت عالمحل خذيت كل اللي نبوه
ودزيت الحركات رسالة مكتوب فيها(وقت التنفيذ ارجى مني رسالة)

وطلعت علي معز خذيته هو اول واحد وبعدين مشينا العبد المهيمن خذيناه وطلعنا عالبحر
حجزنا شاليه كان نوعا ما فاضي ماكان فيه عائلات كان كله شباب

حطينا دبشنا في الشاليه وطول نحن الثلاثة عالبحر?

كان يوم سمح بككل حسيت بالجو اللي طول عمري فاقدة الاخوة والصداقة والرفقة اللي يحكو عليها
كمل يوم كله بصارة وضحك وجو من عين عينه كنا نحن الثلاثة علي طبيعتنا وبعفويتنا
كل شيئ اشتركنا فيه نظمنا الدبش مع بعضنا ورتبنا الشاليه مع بعضنا وتينا الفطور والغداء مع بعضنا وكل واحد تخصص الحاجة
حسيت بطعمة حاجات واجد فاقدهن ومش حاسهن من قبل
تقربت منهم اكثر وتعرفت علي شخصياتهم اكثر واكثر

وبرغم كل اللي عشته كان لازم نفصل اشوي عن شخصية احمد ونمشي اشوي للجوكر خصوصا بعد المغرب والدنيا ضلمت بعدت منهم ودزيت رساله الحركات(التنفيذ توا ومااتخلي حد يفطنلك واطمن الحوش فاضي كله ولما تطلع طمني وهذا العنوان ———- حتخش للحوش تلقى دار مسكرة بطريقة غريبة بقفل ومفتاح هي هذي الدار اللي فيها الاوراق واي ورقة فيها جيبها )
دزلي حركات (تم وكون هاني توا طالع وبعد انتم اندزلك رسالة)

حطيت تليفوني في جيبي ورديت عليهم وبدينا انوتو للعشاء لكن نا كان بالي مع حركات خايف يغلط اي غلطة او اتصير اي حاجة مش حاسبين احسابها بس طبعا ماخليتهم ايحسو بشيئ

بعد ساعة الا ربع بزبط وصلتني رسالة من حركات مكتوب فيها (كل شيئ تمام وخذيت كل الاوراق ورديت سكرت الدار زي ماكانت وبدون ولا غلطة)

في اللحظة هذي تريحت بس هالمرة ماحسيتش بتأنيب ضمير تجاه عبد المهيمن لان المرة هذي الشيئ الي درته كان الغرض منه خير ومش شر

كسدنا مع بعضنا ووبتنا اليوم هذكي في المصيف

مارقدنش بككل اتفقنا نحظرو شروق الشمس ونحن مقمعزين عالبحر

جينا عالشط ورقدنا نحن الثلاثة وخلينا روسنا لاصقات ببعضهن بالمقابل (اكيدة فهمتوني كيف نقصد)

وقعدنا انتفرجو عالسماء في البداية كانت السماء صافية وامعبية انجوم قعدنا انتفرجو عليهن وبعدين معز وعبد المهيمن قعدو ايغنو في اغنية سمحة نا مانعرفهش بس عجبتني وهما ايغنو فيها (عدي انجوم الليل وانتظريني علي وعدنا خليك ماتنسيني)
هم ايغنو ونا نسمع ومنسجم كان صوت معز حلو في الغناء وياخذك العالم ثاني

وبعدين كل واحد فيهم قعد يحكي علي حياته كيف كانت وكيف تغيرت
حكو عالميتم واللي كانو ايديرو فيه لنا غادي
كانن حاجات بسيطة وتافهة وكلهن التنشيئتنا تنشئة صحيحة
يحكو عالعقابات اللي في الميتم وكأن هذا اشد عقاب تعاقبوه وماكانو عارفين اللي نا عشته وشفته مافيش عقل انسان يقدر ايصدقه ويستوعبه ?
هما يحكو ونا نسمع فيهم وساكت
معز كان انسان طموح وشاطر كون نفسه بنفسه وكان يحكي عالشيئ هذا
مهيمن طاح في عائلة كويسة واتخاف ربي وربوه صح وكان برضو يحكي عليهم
اما نا ماعنديش مانحكي كل اللي صارلي مايصدقش?
طلبو مني نحكي شنو تغير في حياتي وهل تغيرت للافضل او للاسوء
حياتي ماكان فيها شيئ كويس ينحكى كلها اجرام وقتل ودم بس طبعا ماقدرتش نحكي هكي
حكيت بس اني كملت طفولتي ومراهقتي كلها في الغربة وروحت الناس مانعرفهمش ولا تربيت امعاهم الشيئ الوحيد اللي صار وغيرني هو الحب اللي خش الحياتي ❤
وقعدنا انهدرزو هكي لعند لما بدت الشمس تطلع كان منظر خيالي وجو مش عادي
بداية اطلوع الضي والضباب اللي في السماء والبحر وصوت الموج وبعدين بداية شروق الشمس مافيش احلى من هكي لحظة في الدنيا
شيئ ايخليك اتفكر في الخالق العظيم اللي خلق وابدع هالمنظر الخلاب اللي ايحسسك بالراحة والامان اللي ممكن انت اتكون فاقدهن
شيئ ايخليك اتحس ان في شخص رحيم فوق منك وانت مقصر في حقه رغم كل هالنعم اللي عندنا بس نحن نركتبو في معاصي

ماكنت عارف اذا حنتاخذ بذنوبي او ربي حيسامحني لان مافيش شيئ كان من اختياري
كل هالافكار كانن في راسي ماقدرتش انشاركهم بيهن ?

اليوم هذا مارقدنش بكل بعد طلعت الشمس صبينا فطرنا وبعدين خشينا للبحر عمنا اشوية وبعدها طلعنا دوشنا ولمينا دبشنا وركبنا في السيارة بنروحو
نزلت معز في حوش انسابته وعديت بعبد المهيمن ونزلته قدام حوشهم وطلعت نا شور حركات دغري
خذيت منه الاوراق اللي خذاهن وطلعت عالشقة دغري

حطيت الاوراق قدامي وقعدت نقرا فيهن
القيت تصريحات جايبهن وعليهن موافقات بعدم التبني
القيت اوراق الشروط التبني كان اولهن عدم سفر الطفل المتبنى خارج ليبيا
القيت اوراق بأسماء كل المياتم في ليبيا
القيت احصائية للسنة هذي باعداد الاطفال اللي في المياتم
القيت توقعيات ناس مهمة عالاوراق وبموافقتهم الراى الحاج ميلود

واضح مالاوراق ان تاعب عالموضوع واجد ومكلفه واجد من سفر وفلوس وقصص واضح ان كان شاك في اللي ايصير مع اطفال المياتم او عارف اللي ايصير غادي بس كيف مش عارف

اما باقي الاوراق كانن اوراق الجمعيات خيرية هو عضو فيهن
اسماء بعائلات محتاجة
اوراق جداول التقسيم زكاه وصدقات علي محتاجين
اسماء ناس محتاجة العلاج برا
اسماء ناس محتاجة المساكن
اسماء ناس محتاجة الشغل
الحاجة ميلود شخصية نادرة انسان ايحب الخير الكل الناس وايساعد في كل الناس
حتى دار المسنين مهتم بيها وباللي فيها وفيه اوراق ومشاريع ايخصنها

كل هالاوراق اللي قدامي زادن تأنيب ضميري تمنيت اني قتلت روحي ولا قتلته
نا انسان مجرم قاتل سفاح فيه مني واجد في البلاد وفي العالم كله روحي ماتسوى شيئ جنب روح شخص طيب وطاهر زي الحاج ميلود لان الشخصيات اللي زيه نادر ماتلقاهن
روحي النجسة مقابل روحه الطاهرة معادلة حقيرة هما داروها ليا ?
ياريت قتلت روحي ولا قتلته
ياريت لو عرفت كل هذا قبل مانقتله
كلمة ياريت هذي قلتها الف مرة من كثرة القهرة والحسرة اللي في قلبي ?
تعبت ومعش قدرت انكمل لميت الاوراق ودسيتهن وجيت تمددت عالسرير ونا انفكر بعد القيت اوراق واجد ايساعدني كيف نبدى ومنين نبدى وشنو اندير كان لازم انكمل اللي بداه الحاج ميلود وانساعد الايتام ولازم مانسمح ان ايصير فيهم زي ماصار فيا بس برضو لازم نشتغل عالصامت بدون مالمنظمة تعرف وبدون مااتحس او تعرف من اللي ايدير هكي بس هذا شيئ صعب صعب بكل ويبي تخطيط وتكتيك بشويش يعني توا حنريح الموضوع اشوي لين انفكر في خطة ذكية

قعدت في السرير اشوي وبعدها حبيت نهرب من تفكيري هذا مسكت تليفوني ورنيت علي سمر وقعدت انهدرز امعاها لين نعست ورقدت وهي تحكيلي ?

/
/

مرن يومين كان وضع هادي والجو سمح لعند يوم اللي كلمني عبد المهيمن وقالي اليوم بيجيب امه وخالته يخطبو تسنيم دغري نا رنيت علي جابر وقلتها له وهو قالي خليهم ايتفضلو وقلتها المهيمن ودغري مشيت للفيلا حكيت الموضوع التسنيم وكانت اشوي واطير مالفرحة اللمعة اللي شفتها في عيونها اليوم هذا عمري ماشفتها من قبل في عيون تسنيم ودغري سيبتني وخشت بتوتي روحها ونا نزلت تحت وقابلتني سناء والاول مرة اتحقني وماتعزقليش كلام زي قبل ?
نا:اليوم بيجو عرب يخطبو تسنيم

سناء:من هذوما

نا:هل عبد المهيمن صاحبي

سناء:شنوووو ?

نا:اللي سمعتيه?

سناء بعصبية:بس هذا لقيط لا عنده هل لا شيئ كيف بنتي تاخذ واحد زي هذا اكيدة هي مش عارفة وانت ضاحك عليها

نا:لا هي عارفة كل شيئ وتبيه وجابر موافق وكلميه وتوا ايفهمك كل شيئ وطلعت وسيبتها حايرة في روحها

/
/

سناء خشت علي تسنيم

تسنيم:ماما بيجو عرب يخطبوني اليوم

سناء:انتي عارفة ان لقيط وماعندش هل

تسنيم;عارفة ولو سمحتي معش اتقولي كلمة هكي ماانحبش نسمعها

سناء بعصبية:اتحبي ولا مااتحبيش هذا واقع ولازم اتعيشيه تقدري اتقولي اعيالك بيسمو باسم من

تسنيم:باسم باتهم

سناء:وباتهم ماعندش هل

تسنيم:مش شرط الواحد ايكون اسمه ايتكون من 6او 7 اسماء عشان يقعد ولد عيلة وولد ناس ومحترم يكفي ايكون بأسمين بس ومتربي صح ومهيمن انسان كويس وانا حنقعد سعيدة لو خذيته وهو قعد اب عيالي

سناء;ماشي ياتسنيم بس صدقيني الشيئ هذا مش حيصير

تسنيم:بابا وافق

سناء:ماشي وطلعت

/
/

مشت الدارها وخذت فونها ورنت علي جابر وهو رد

سناء:انت صح وافقت عاللي اسمه عبد المهيمن هذا

جابر:مش نا اللي وافقت المنظمة وافقت

الكلمة هذي كانت كفيلة انها اتسكت سناء ومعش اتزيد حرف علي كلامها سكرت الخط وكانت عارفة ان المنظمة لما اتقرر قرار لازم ان ايتنفذ بدون اي اسألة
وسكرت عالموضوع وصبت اتوتي في روحها الاستقبالهم ?

/
/

بعد العصر وصلت ام عبد المهيمن وخالته للفيلا استقبلتهن سناء وبعدين طلعت تسنيم عليهم

ام عبد المهيمن حبتها بككل وكأنها فعلا كنتها مرات ولدها الحقيقي وطلبوها وسناء وافقت
واتفقو ان بيطلعو فرح دغري بعد شهر بس هل عبدالمهيمن مايبوش ايديرو فرح بيديرو عشاء بسيط عشان الحاج ميلود لان كانت هذا حلمه ان ايجوز عبد المهيمن ومراته قاعدة اتنفذ فيها

/
/

اما عندي نا كنت في الشركة ومانندري علي كل هالتخطيطات
كنت مقرر ان لما انكمل شغلي في الشركة نمشي العبد المهيمن انباركله عالخطبة
لكن ونا في مكتبي جاني اتصال بدون رقم ودغري عرفته منهم ولما رديت طلبو مني نطلع عالمطار والسفر هالمرة الروسيا
سيبت كل اللي في يدي وطلعت دغري وسافرت وكالعادة مااقدرتش انرن علي سمر ونحكيلها شيئ لان هذا من اخطر الحاجات انك اتخلي حد عارف وجهتك وين?

/
/

وصلت الروسيا عالفجر خذتني سيارة من قدام المطار وشالوني المزرعة بعيد مالمدينة وخشيت وقعدت امقمعز في دار بروحي ونستنى واكثر حاجة نكرهها في اللحظات هذينا الانتظار

/
/

عند سمر

كانت قاعدة في دارها وطول الوقت اترن علي أحمد تلقى فيه مقفل وتفتح في نت تلقى فيه مش فاتح قعدت قالقة وقلبها نار عليه ومش عارفة شن صاير امعاه
اخر مكالمة كانت في العشية وكان في الشركة ومن بعدها وهي اترن مقفل
كل اشوي اطلع فونها واترد اترن من جديد معش قدرت ادير شيئ الا انها ترجاه ايرن وهي في اللحظات هذينا رن فونها ولما شافت لقاته رقم وردت دغري

سمر:الووو

هو :اهلين

سمر استغربت الصوت:من امعاي

هو;معجب

سمر:اها شكلك واحد فاضي وسكرت

اشوي وجتها رسالة مكتوب فيها (نا صاحب سالم خوك وعاجبتني واجد بكل واليوم بنطلبك منه لو ماعندك مانع)

سمر بإستغراب;صاحب سالم منين جايب رقمي معقولة واخذه من فون سالم ? حي كان يعلمها اكيدة حيقتله
ازعمك نحكيله لالا مش داعي اندير الروحي مشاكل نا مازالي كم شهر وانروح الهلي خليني انشوف قبل كان سالم حكالي علي موضوع صاحبه نحكيله عالرقم وكان ماحكش انفوته بكل وماكأن صار شيئ

وردت مسكت فونها اخرى وقعدت اترن علي احمد وقعدت طول الليل اترن علي احمد علي امل ان يفتح فونه

/
/

عندي نا بعد ساعة كاملة مالانتظار خش عليا واحد كان شكله غريب واول مرة انشوفه حتى في الاجتماعات عمري ماشفته

هو:مرحبا

نا:مرحبا

هو:سررت بلقائك

نا:انا ايضا

هو:انت لا تعرفني لكني اعرفك جيدا

نا ابتسمت

هو:انا السيد جان اتسمع عني

نا:بالتأكيد سمعت عنك كثيرا

هو:ولدي اختصاصي في هذه المنظمة

نا:اعلم ذلك لكن اختصاصك لم اعمل به من قبل

هو:اعلم ذلك ولذلك طلبت ان تعمل معي هذه المرة

نا بحتت فيه زين:وماذا تريدني ان اعمل

هو:استلمت مجموعة نساء جدد من دول مختلفة تم بيع النصف منهن ولازال النصف الاخر

نا:وما المطلوب مني

هو:ان تشرف علي تسليم كل من تم بيعها الي من اشتراها وان تقوم ببيع الباقي

نا بحتت فيه:هل انت محق ?

هو:اجل وسناخذك الان الي مكانهن لتلقي نظرة واذا اعجبتك احداهن خذها فهي لك بدون نقود

نا مازال انبحت فيه ومستك بككل اول مرة بنخش في شيئ زي هذا
التجارة في النساء يعني هي نفسها التجارة في الاعراض ?

هو:هيا انهض سنذهب فورا الي هناك

صبيت امعاه ونا مش مستوعب الفكرة نا سرقت قتلت دمرت خطفت هربت بس ولا مرة تاجرت في الاعراض ولا مرة اغتصبت ولا مرة بعت بنت ولا مرة اذيت انثى اصلا

طلعت امعاه وركبنا في سيارة وورانا مجموعة سيارات والمكان ماكان بعيد كان في نفس المزرعة بس يبعد عن الحوش 3 كيلو هكي

نزلنا كان زي الهنقر كبيييير عليه حراس ومقفول بكم قفل فتحوه وخشينا

#يتبع

قولكن احمد شن بيشوف جوا وهل حيوافق عالمهمة هذي او لا ?

واذا قال لا شن حيكون مصيره?

وقولكن من صاحب سالم اللي رن علي سمر وهل شخص له دور في حياة سمر وحياثر علي قصتها مع احمد او لا ?

وفرح تسنيم وعبد المهيمن حيطلع او فيه شيئ حيخربه ?

والسؤال المهم هل احمد يقدر ايكمل اللي بداه الحاج ميلود او لا واذا كمله شن ممكن ايصير?

كله حنعرفوه في الحلقة الجاية☺

أسفة لو فيه لخبطة في الأسماء وأكيد رأيكن ايهمني?

گـتـابـتـي Koka Saleh