الجوكر | للكاتبة Koka Saleh

#الـجـوكـر ?

الـحـلـقـة (14)

(حقيقية ممزوجة بالخيال)

گـتـابـتـي #Koka_Saleh

::::::::::::::::::::::::::::::::::::::::::::::::::::::::

لايك قبل القراية وتعليق بعد القراية ?

::::::::::::::::::::::::::::::::::::::::::::::::::::

الاب الروحي:نعم انت في مدة قصيرة استطعت كسب ثقتنا جميعا وبكل مهارتك وذكائك واتباعك للأوامر بدون تقديم اي سؤال جعل الكثير يرشيحونك لمنصب اكبر من ماانت عليه الان

نا:انا حقا سعيد بهذا الكلام

الاب الروحي:ولانك انسان ومن الارجح انه يدور برأسك العديد من الأسئلة فمن اجل تمييزك عندنا قررنا انت تسأل سؤالا واحدا وسنجيب لك عليه لتريح ولو جزء بسيط من تفكيرك

نا:انت محق

الاب الروحي:اجل بإمكانك طرح سؤالك

نا ماكان في بالي الا سؤال واحد وهو اكثر شيئ كان امحيرني ومالقيتله اي تفسير

نا:ما سبب طلبكم مني لقتل ذلك الرجل المسن الذي ميلود ال–

الأب الروحي:هذا الشخص كان يريد ان يقف في وجه المنظمة انت تعرف ان اغلب من ينفذو أوامرنا هم جنود مجندة تم اخذهم أطفال من المياتم من كل دول العالم وتم تجنيدهم ليكون ولائهم لنا فقط لكن هذا الرجل قام بحملة منع التبني او بالأحرى مراقبة كل من يتبنى طفل الى ان يكبر وممنوع اخذ اي طفل متبني خارج البلاد التي يعيش فيها وهذا يخالف ما نريده اذا هذا القانون طبق في كل الدول لن نستطيع تجنيد أحد لهذا أمرنا بقتله لتنتهي هذه الحملة ولكي لا يتجرأ أي شخص غيره في اكمال هذه الحمله

نا كنت نسمع ومصدوم يعني نا بإيديا قتلت شخص كان يقدر ايساعد أطفال المياتم ويمنعهم ماللي صار فيا نا بإيديا قتلت شخص كان رايد يبعد الظلم عن أطفال المياتم كان يبيلهم حياه كويسة بعيدا عن حياة الإجرام اللي يفرضو فيها عليهم?
ماكنتش مستوعب كلامه كنت انشوفله بدهشة وعيوني معبيات دموع
لما قتلت الحاج ميلود حسيت بالذنب وحسيت بتأنيب الضمير بس مش زي اللحظة هذي
كرهت روحي تمنيت لو لحظتها قتلت روحي ولا قتلته ?

الأب الروحي:مابك مالذي شعرت به

في وقتها كان خاطري انط عليه وناخذ روحه زي ماخذيت ارواح ناس واجد بإيديا بس ماكنتش قادر لاني عارف لو درتله شيئ حنموت قبل مانقتله
بس في نفس الوقت ماكنتش قادر نحكي امعاه ولا نص حرف عقلي مش مستوعب قلبي ايدق بسرعة الدنيا قدامي ضببت شفتله بنظرة مليانة حقد ونزلت مالسيارة وطول الطريق نمشي ونحكي مع روحي

نا:معقولة قتلته قتلت بإيديا الشخص الوحيد اللي فكر في اللي زيي وفكر في اطفال الميتم نا قتلته في وقت الكل مغمضين عيونهم عالحقيقة هو فتحهن ونا قتلته ليش درت هكي ليش ?

اللي صار ماكان صدفة لا السفرة ولا الاجتماع ولا كلام الأب الروحي ولا سؤالي كله كان مدبر من ربي ممكن رايد يفتحلي عيوني ممكن رايد ايردني الصوابي بس شن ممكن اندير
هذي رسالة رسالة بتوعيني بس علي شنو وشن ممكن اندير مش عارف
رغم اني من اطفال الميتم بس ولا مرة فكرت انساعدهم بس بعد اللي صار ولاني نا قتلت الحاج ميلود وتوا عرفت ليش طلبو ان ايموت حسيت اني القيت بداية الخيط ولازم نوصل النهايته وكيف وليش هذا شيئ يبيله مجازفه وتفكير طويل ودخول في حروب واجد

قعدت قريب ساعتين انلف في شوارع إيطاليا تايه ومش عارف وين نمشي ولا شنو اندير كل الطرق قدامي مسكرة

كرعيا تعبن من كثر المشي بس عقلي ماتعبش مالتفكير

الوحيد اللي كنت انفكر فيه في عز اللي نا فيه عبد المهيمن لان رغم كل شيئ داره او قاله انا المفروض انسامحه وانحل امعاه المشكلة لان هو بذات طعنته اكبر طعنه في حياته قهرته في شخص كان احسن راجل في الدنيا
قررت ان الأشكال اللي بيني وبينه لازم ينحل لو مهما كلفني هالشيئ لازم انحله وهذا اول قرار خذيته

وصلت الفندق حجزت فيه وخشيت للدار اللي حجزتها وقعدت انتقلب ساعتين في السرير ونا فكرة تاخذني وفكرة اتجيبني وانفكر شنو العبرة او الرسالة ماللي صار
لعند لما خذاني النوم ورقدت

/
/

ثاني يوم الصبح وعيت علي رنت تليفوني ولما شفت القيته كالعادة بدون رقم عرفته اتصال منهم وان فيه مهمة بس شن هي مش عارف رديت

وكان صوت غريب عطاني عنوان وطلب مني انجيه توا وصبيت دغري غسلت وطلعت وخذيت تاكسي وصلني المكان يبعد عالعنوان الاساسي قريب بي 4كيلو لان ممنوع انجي العنوان الهم في سيارة مش تابعة الهم او انسوق بروحي
نزلت مالتاكسي وكملت الطريق علي كرعيا لين وصلت للمكان المطلوب وكانت مزرعة من برا ماكان فيه اي دليل ان هالمزرعة مسكونة توحيلك من برا انها مزرعة مهجورة دفيت الباب اللي برا وكان فيه باب ثاني وخشيت منه ومن لما خشيت هنا اوتضح كل شيئ وحراس واسلحة كبيرة فتشوني اول ماخشيت وبعدها خشو امعايا اثنين من الحراس جوا لعند لما وصلوني الدار وفتحولي الباب وخشيت وسكروه ورايا وماكان فيه حد في الدار وقعدت نرجى قريب ربع ساعة وبعدها انفتح الباب وخش الأب الروحي وجا قمعز في الكرسي اللي قدامي

الاب الروحي:ما اخبارك بعد الذي حدث يوم أمس

نا:مالذي حدث

الأب الروحي:هروبك عندما عرفت سبب قتل ذلك الرجل الدي يدعى ميلود

نا:لم اهرب

الأب الروحي:بلا هربت وكأنك ندمت على قتله

نا:كلا لم اندم لكن

الاب الروحي:لا يوجد لكن انت ندمت وهربت أيضا شاهدت تلك النظرة في عيونك لكن ماحدث خسرك الكثير انت لم تعد تستحق المنصب الذي رشحناك اليه لازال الطريق طويل امامك وتريد مهارات وخبرة اكثر

نا:تعني انني لن أكون قائدا مثلما قلت لي بالامس

الأب الروحي:لا يمكننا وضع شخص يندم على مهمة فعلها هذا المنصب ليس لك ولا تستحقه لازال امامك الكثير لتصل إليه

نا:حسنا فهمت

الأب الروحي:واليوم يوجد لديك مهمة جديدة هل ستستطيع ان تقوم بها أم نبحث عن شخص آخر

نا:أجل أستطيع

الأب الروحي:اذا عليك الذهاب إلى هذا المنزل وسيكون برفقتك بعض الحراس هذا وكر لشخص نريده حيا ستحظره بنفسك إلى هنا

نا:أجل فهمت متى سيكون عليا الذهاب

الأب الروحي:الان يوجد بالخارج سيارة مجهزة لك وستخرج معك سياراتان ثانيتان بهما حراس اريده حيا

نا:حسنا سأحظره حياه وصبيت بنطلع

الأب الروحي:جوكر

نا:نعم

الأب الروحي:من يريد ان يكمل معنا ويكون له دور اساسي في منظمتنا يجب ان يكون بلا قلب أو مشاعر هكذا فقط تنجح انسى تلك العاطفة التي بداخلك

نا:حسنا

طلعت ومش عارف نحزن او نفرح من كلام الأب الروحي او بالأحرى هذا فرق الشخصيتين اللي في داخلي

أحمد كان مايبيش ينجح في اي شغل مع المنظمة وكان مايبيش ايتعمق فيها اكثر وكان كل فشل للجوكر ايفرح فيه

أما الجوكر كان يزعل لما يفشل ومايبيش أحمد ينتصر عليه مازال يبي قوة وسلطة ومال اكثر وكل هذا ماايجيش الا بالدم

وصلت برا القيت السيارة ركبت فيها وطلعت وطلعن ورايا سيارتين اخرى

ومشينا للمكان كان بعيد بكل مالمزرعة وبعيد مالمدينة كلها وصلنا للمكان كان زي الكوخ الصغير نزلنا كلنا وكنا مسلحين بالكامل حاوطناه كله بالحراس اللي امعايا ونا وامعايا اثنين اخرى هجمنا عاللي جوا وطبعا الشخص اللي يبوه كان امعاه حراس جوا وكانو مستعدين بالكامل الأي هجوم وصارن اشتباكات جوا وضرب بالسلاح وبعدين امضرابه بالايدين وبعد قريب نص ساعة مالهجوم قتلنا اللي جوا كلهم ومسكت الشخص اللي يبوه ربطته وغمضتله عيونه وركبته في شنطة سيارتي وطلعنا واللي امعايا فيه منهم اللي مات واللي اصاوب ونا بروحي حصلت ضربه في يدي ?

/
/

وصلت للمزرعة اللي فيها الأب الروحي ونزلت الراجل من سيارتي وخشيت بيه جوا وتحديدا وصلته لعند الدار اللي فيها الأب الروحي والقيته قاعد جوا

الاب الروحي:ماذا فعلت

نا:ها هو احظرته لك حيا

الاب الروحي:احسنت وضغط علي جهاز علي مكتبه وخشو الحراس من برا

الأب الروحي:خذوه لغرفة الجحيم

الحارس:حسنا وخذا الراجل وطلع ونا مازال مصبي

الاب الروحي شافلي وكانت يدي تنزف
الأب الروحي:انت مصاب اجلس هنا وسيتم احظار طبيب لك لكي يداوي جرحك

نا:ليس جرحا عميقا

الاب الروحي:حياتك الان تهمنا يجب ان يتم فحصك من قبل دكتور ومسك تليفونه ودار اتصال وبعدها طلع وخلاني في الدار بروحي وبعد5 دقايق بزبط وصل دكتور ونا بسبب الاصابة كانت مرتفعة عندي الحرارة ونسبة عرق كبير
الجرح كان عميق لاني انضربت بألة حادة
وفتح الدكتور شنطته وبدا ايطلع في معداته وطلب مني انحول تيشرتي وحولته
بحت للجرح

الدكتور:جرحك عميق يجب خياطته

نا:افعل ماتراه مناسب

طلع الابرة وقعد بيوتي ابرة البنج

نا:لا داعي له

الدكتور:لكن الخياطة مؤلمة

نا:المعنى الحقيقي للألم ، أنك لم تعد تشعر بالألم ?

الدكتور :انت متأكد لا تريد ان تأخذ ابرة المخدر

نا:أجل متأكد

الدكتور:حسنا كما تريد

وبدا ايخيط في الجرح بس ماكنتش حاس بالألم لان ألم قلبي كان اكبر واجد كل اللي شايله عليا من هموم كانن بالنسبة ليا مخدر طبيعي وكافيات اكتفاء كامل ان بعدهن معش نشعر بأي ألم

وفوق من احساسي هذا كان طلبي الخياطة الجرح بدون بنج كنوع من معاقبة نفسي عاللي اندير فيه يمكن بنحس بألام الناس اللي وجعتهم?

كمل الدكتور الخياطة وصبيت ومدلي روشيته فيها دوا مسكن خذيتها منه ومدلي تيشرت ثاني لبسته وطلعت ونا انحس بألم في يدي غريب وصلت برا القيت سيارة ترجى فيا ركبت فيها ومشينا وتكى علي صيدلية جابلي الدوا اللي نبيه ووداني عالفندق ونزلت وخشيت الداري دغري خذيت مالدوا وكان مسكن ألام واول ماخفت وجيعة الألم رقدت من دون ماانحس بشيئ ?

/
/

مرن 10 أيام ونا في إيطاليا كان 10 أيام كلهن مهمات ماكان فيه اي اجتماع للمنظمة بس كله مهام ومهام صعبة كلهن خطف وقتل وتهريب أسلحة ومخدرات وشفت في ال 10 ايام اي شيئ ماشفتش عذبت وقتلت ودمرت كم شخص كل مكان نمشيله كان فيه دم وزدت غرقت في بحر الدم أكثر وأكثر وكأن هالشيئ كان مخطط من ضمن المنظمة تكثيف المهمات والقتل والاجرام بالطريقة هذي عشان ايزيدو من قوتي وايقوو شخصية الجوكر في داخلي أكثر
سلبت ارواح ناس واجد منها من غير مانفهم ولا نعرف اي شيئ كنت عبد مأمور فقط وماكنت قادر اني نرفض اي مهمة لأني كنت عارف ان كلهن اختبارات ليا ولو فشلت في واحد منهن حيكون موتي?

/
/

اليوم العاشر في الصبح وتحديدا عند سمر كل اشوي تفتح فونها واتشوفله واترن بيه

هبة:انتي كنك اليوم

سمر:كني

هبة:ماسيبتيش فونك لحظة وكل اشوي اتشوفيه واترني بيه حتى تخريف ماخرفتي امعايا

سمر تنهدت:لازم نحكيلك اللي صاير

هبة:وهذي اللي من بدري نرجى فيها شن صاير امعاك

سمر:تذكري الشاب اللي قتلك ساعدني في البحث وخذا رقمي ودزه ليا عشان نقراه

هبة سكتت اشوي:اها اذكرته كنه

سمر:الشاب هذا من اسبوعين زادن مكالماتي امعاه وقعد صديق مقرب بكل وكل يوم نحكو عالنت واوقات عالفون وكل صبح ضروري ايكلمني ويسأل علي اخباري ويحكيلي في الليل علي كل تحركاته اللي دارهن المهم صداقة قوية بكل

هبة:باهي وبعدها شن صار

سمر:له 10 ايام مختفي مايفتحش في نت وفونه مقفل ومالقيتش اي وسيلة اتوصلني بيه وقاعدة مشغولة عليه بكل مش عارفة شن صار امعاه

هبة:ماصاير شيئ يعني جديدة شاب ايدير هكي ماهو كلهم يقعدو فترة ويختفيو ولا انسيتي مجدي اللي قعدت امعاه سنتين واختفى فجأة وكملتها خايفة وانقول صايرله حاجة وفي الاخير طلع اختفائه عشان اجوز ونا مانندري علي شيئ زي الهبلة

سمر:اول حاجة احمد مابيني وبينه شيئ لا حب ولا اي حاجة كلها صداقة لو خاطب او بيجوز راه قالي شنو المشكلة يعني

هبة:ماايقولكش اكيدة عابي علي اكبر من صداقة ممكن ايكون متعارك مع حبيبته او خطيبه وكان بيضمن روحه امعاك ويلقى مع من يحكي بعد ردلها سكر النت وكسر الشفرة وفضت شنو المشكلة

سمر:لالا مستحيل احمد مش هكي

هبة:لا هكي وبعدين في اسبوع او اسبوعين ماحلكش عرفتي طبعه وانتي مازال ماتعرفيش في الشباب واجد

سمر:بس عندي اصدقاء وانتي عارفة

هبة:صديق مش زي حبيب ماتعرفيش نيته وطبعه

سمر:والله حسيته مختلف اتحسيه صادق وواضح لا عنده في اللف ولا الدوران ولا حتى حاول يحكي اي شيئ امعايا برا الطريق كلامه محترم بكل

هبة:ماهي في البداية هكي لين اتعلقي بيه وبعدين اتشوفي شخص اخرى ماتعرفيش بكل

سمر:قولك هكي

هبة:هكي ونص وفوتيه لا عاد اترني لا ادوري توا بعد اتصحله ايرن بروحه

سمر سكتت بس بينها وبين نفسها ماكانت مقتنعة بكلام هبة لانها كانت حاسة ان احمد مش هكي وان هو غير عن كل الشباب

هبة:شن رايك نطلعو نفطرو في اي كافي

سمر:ماشي تمام بس مااطولوش لان سالم يبي السيارة عنده جامعة

هبة:تمام مش حنطولو نفطرو وحطيني في حوشنا وعدي

سمر:تمام وطلعن

/
/

اليوم العاشر في الليل كان موعد ترويحتي الليبيا خذيت اول طيارة وسافرت وكان طول ونا في الطيارة انفكر في شخص واحد وهو عبد المهيمن وقررت اول مانوصل الليبيا نمشيله دغري واول ما وصلت الليبيا كان ليل كانت الساعة 4 الفجر
واول مانزلت في المطار فتحت رقمي ورنيت علي معز وهو رد والباين كان راقد

نا:اسمحلي عالرنة في الوقت هذا

معز:لا عادي لكن قولي انت وين رحت يوم الفرح معش القيتك وليا كم يوم انرن عليك مقفل

نا:صارلي موضوع واضطريت نطلع وبعدها سافرت

معز:اها لكن عبد المهيمن تعقد منك بكككل واكد علي ان مش سوء فهم وان اللي شافه صح

نا:حكالك عليه

معز:اها من جدك انت ادير هكي

نا:والله فهمتو غلط ونا توا بنمشي العبد المهيمن انفهمة الموضوع بس لو تعرف وين قاعد هو توا

معز:توا اندزلك عنوان الشقة اللي قاعد فيها عديلة وياريت اتحلو الموضوع ولو مش صح فهمة اللي صاير

نا:ماعليك انت بس دزلي العنوان

معز:توا اندزه لكي في رسالة توا

نا:تم وسكرت

اشوي وجتني رسالة فيها العنوان بالتفصيل قريته ومشيت شور العنوان ووصلت عند العمارة وقعدت في السيارة حاجة 5 دقايق ونا انقوي في روحي المواجهة عبد المهيمن بعد معرفتي بليش قتلت باته
كان تأنيب الضمير طاغي عليا نبي اندير اي حاجة اتريح ضميري ولو اشوي
بعد الخمس دقايق قررت ننزل ونزلت وخشيت للعمارة ورقيت مالدروج لين وصلت الشقة عبد المهيمن وصبيت قدامها خذيت شهيق وزفير وقويت روحي ورنيت الجرس رنتين وعالرنة الثالثة الباب انفتح
عبد المهيمن اول ماشافني جا بيسكر الباب ونا مسكته بيدي

نا:بنحكيلك اللي صار اسمعني وبعدها اللي تبيها ديرها

عبد المهيمن:تهيالي كل شيئ كان واضح

نا:مافيش شيئ واضح انت فهمت غلط

عبد المهيمن:وشنو الصح

نا:خليني انخش وانفهمك

عبد المهيمن:خش

خشيت وعبد المهيمن سكر الباب وخش ورايا
قمعزت عالصالون وهو قمعز مصادرني

عبد المهيمن:هيا احكي اللي عندك

نا:اول حاجة تسنيم عمري ماشفتنها الا اختي وبس

عبد المهيمن:والصور اللي عندك

نا:قصة صعب عليا اني نحكيها لانها قبل مااتضرني اتضر تسنيم ونا مانبيش اي شيئ او اي حد ايضرها مهما كان هالشخص

عبد المهيمن;ونا لاعمري انضرك ولا انضرها

نا:وعشان هكي قررت نحكيلك بس الموضوع هذا ماحدش يعرفه الا نا وهي وتوا انت

عبد المهيمن:شنو هو

نا:تسنيم مهووسة بشيئ اسمه تصوير واتحب روحها بكل وزيها زي اي بنت معجبة بروحها وديما اتحب التصوير والصور

عبد المهيمن:باهي

نا:في فترة تعرفت علي بنت وقعدت صاحبتها واجد وتمشيلها واتجيها وصحبتهن تقاوت وبعد فترة من معرفتها بالبنت هذي قعد رقم ايرن عليها وكان شاب ايهدد فيها بصورها ويااتجيبله فلوس ياينشرهن الها وايدزهن الهلها وتسنيم خافت لو هلها يعرفو اكيدة مش حيصير خير فيها وقررت تهرب في وقتها نا ماكان ليا واجد مروح وكنت ملاحظ علي تسنيم الوحدة والاكتئاب ويوم اللي طلعت نا شفتها ولحقتها وبصعوبة خليتها تحكيلي اللي صار وبعد حكتلي وعدتها انحل الموضوع من غير ماحد يعلم وفعلا عرفت الشاب ووصلت فيه ومشيتله في شقته عطيته طريحة وحكى كل شيئ وطلع هو والبنت اللي صاحبة تسنيم يشتغلو هكي هي اتصاحب البنات اللي هلهن عندهم فلوس وتاخذ اصورهن ويقعد هو يبتز فيهن والقيت في اللابتوب امتاعه صور البنات واجد وصور البنت اللي يقعد يبتز فيها ينقل فيهن في تليفونه خذيت منه التليفون واللاب وحرقت اللاب من اول ماطلعت منه اما التليفون جبته التسنيم عشان اتصدق اني حليت الموضوع بس هي عطاته ليا وقالتلي انت احرقه ونا في وقتها كان عندي شغل حطيته في الدرج وطلعت ومن يومها انسيته بكل لين انت القيته (وطبعا ماقدرتش نحكي اللي صار بصدق لان الصدق ايضر سمعة تسنيم)

عبد المهيمن:وليش مابلغت فيه الشاب هذا والبنت اللي امعاه

نا:لو انبلغ حينجاب اسم تسنيم وحيعرفو هلها ونا وعدتها انحلها من دون ماحد يعلم بس العيل هذا قدرت انخوفه والبنت دزيت واحد الهلها وحكالهم كل اللي ادير فيه

عبد المهيمن:بس قعدت التليفون عندك غلط وكان ممكن اي حد ايشوفه يفهم اللي نا فهمته

نا:قتلك انسيته نسية بس

عبد المهيمن:تمام فهمت عليك وقصة التليفون انحلت بس فيه شيئ واحد مازال امحيرني من ناحيتك

نا:شنو

عبد المهيمن:كيف جابر تبناك وكتبك علي أسمه ونحن هنا ممنوع واحد عنده عيال ايتبنى وفوق هذا مايقدرش اي حد متبني طفل ايحطه علي اسمه حتى لو ماعنده عيال هكي القانون الليبي

نا صدمني سؤاله بس ماحبيت انبين وكان لازم انجاوب اجابة سريعة وننقذ الموقف بسرعة

نا:نحكيلك واتخلي الموضوع بينا

عبد المهيمن:اكيدة

نا:جابر هو باتي الاصلي

عبد المهيمن بصدمة:شنووو?

نا:الموضوع هذا بيني وبين جابر بس واللي صار من زمان وكان نتيجة غلطة غلطها جابر مع وحدة ولما جابتني وماتت ماكان جابر قادر ايطلعني قدام الكل لان مراته كان له بس سنتين متجوزها فحطني في الملجأ ولما كبرت جا وخذاني ودار روحه تبناني عشان فعل الخير وهكي بس لما مراته وعياله ماتقبلونيش
دغري سفرني برا وردني لما كبرت ومازال نفس الوضع لا مراته ولا ضناه متقبليني ماعادا تسنيم

عبد المهيمن:باهي انت ليش مااتناديلش باتي وانحس فيك ماعندكش عليه

نا ضحكت:نا عمري ماعشت امعاه ولا حسيت ان باتي ومن انا واصغير حاطني برا في مدرسة داخلية عشان يرضي مراته وضناه وفوق هذا حتى امي ليش ماتت ماحكاليش ولا قالي اصلا من هي الامور هذينا كلهن ايخلني ماانعدلش عليه الشيئ الوحيد اللي داره ليا امنلي مستقبل اكويس وقراني احسن قراية ووعدني ان حيكون عندي حق في املاكه زيي زي باقي عياله
(وكان لازم نحكي هكي عشان نبعد اي شك من عبد المهيمن تجاهي)

عبد المهيمن:توا فهمت ليا فترة حاير في الموضوع هذا

نا;وتوا زيد تأكد ان بيني وبين تسنيم مافيش شيئ لانها اختي بالجد مش بس بنت الشخص اللي رباني

عبد المهيمن:اسمحلي اني فهمت غلط بس ماتوقعتش ايكون هكي بكل

نا:عادي امسامحك بس توا بما انك عرفت اللي صار كله وفهمته توا انا اللي فيه شيئ بنعرفه وخليك صادق امعايا زي ماانا كنت صادق امعاك

عبد المهيمن:اكيدة بس شنو اللي بتعرفه

نا:شنو اللي صاير بينك وبين تسنيم وشن قصته هذي اللي القيتها في الحمام (وطلعتله الدندونه)

عبد المهيمن:توا نحكيلك اللي صار كله
وبدا يحكي من اول لقاء بينه وبين تسنيم لعند اخر شيئ صار
عبد المهيمن:ويوم اللي روحت كنت عابي نطلبها منك بس صار اللي صار

نا:هذا عليش اليوم هذكي كنت حاسك بتحكي كلام ومش قادر

عبد المهيمن:ماكنتش عارف منين نبدى وكيف نطلبها موقف بايخ وصعب في نفس الوقت

نا:كنت حكيتلي مالاول

عبد المهيمن:مافيش شيئ صار واهو نا توا طالب منك تسنيم تعطيها ليا

نا معش عرفت شن انرد عليه
في عقلي لو يعرف ان انا اللي قتلت باته مستحيل يطلب طلب كيف هالطلب وفوقها متأكد ان جابر حيرفض لان هو صداقتي بيه ورافضها مبالك يطلب بنته

عبد المهيمن:شن قلت

نا: نا اكيدة موافق لان مستحيل ايجي التسنيم حد احسن منك بس القرار الاول والاخير الها والهلها

عبد المهيمن نزل راسه:اكيدة مش حيعطوها الحد مالملجأ وماعندش هل وبذات ان هي بنت ناس معروفه

نا جيت وقمعزت جنبه وحطيت يدي علي كتفه
نا:عمرك مااتفكر هكي صح ماعندكش هل بس انت احسن بواجد من وحدين عندهم هل وماعرفوش ايربوهم هذا اللي لازم اتفكر فيه ولو رفضك واحد عشان السبب هذا وما نظر لا الاخلاقك ولا كيف انت انسان كويس يبقى هذا انسان مايفهمش وماايمهمه شيئ الا المظاهر ولما يرفضك انت اللي كاسب وهو اللي خاسر

عبد المهيمن:امعاك حق بس نبي منك اتشوف راي تسنيم وراي هلها ولو حسيتهم موافقين بنجي انتقدم رسمي امي مازال اشوي واتفك انجيبها وانجيكم

نا:تمام انشوفهم وانقولك شنو ايصير امعايا

عبد المهيمن:تمام

نا صبيت:خلاص نا بنروح ماليا شيئ امروح مالسفر وتاعب بكل

عبد المهيمن صبى:الحمدلله علي سلامتك واسمحلي عاللي صار مني

نا:عادي ما كأنه صار شيئ نحن خوت مش بس اصحاب

عبد المهيمن حظني وبعدها نا طلعت وروحت الشقتي

واول ماخشيت شفت التليفوني وشفت الرسائل اللي جياتني من سمر عالشفرة وعالنت والمكالمات الفائته باين من عددهن ان انسان كان فاقدك بجد
بحتت للساعة القيتها الساعة 6 الصبح ماقدرتش انرن قلت اندوش ونفطر ونلبس ونمشيلها مشي في الجامعة بس دزيتلها رسالة مكتوب فيها
(نا اسف علي غيابي طول الفترة اللي فاتت بس كانن عندي ظروف واليوم بنجي المكاتب الجامعة اللي غادي بنمر عليهن وبنشوفك ونحكيلك اللي صار)

خشيت للحمام دوشت وطلعت لبست وفطرت بحتت للساعة القيتها الساعة 7 وامعاها طلعت السيارتي ولعتها وبعدين مشيت شور الجامعة وكنت مانبيش انبين السمر انها زيارة مخصوص وبما ان محلات الطباعة اللي في الجامعة اثنين منهن يتبعن الشركة امتاعنا مشيتلهن وقلت اندير طلة عليهن عشان ماايبان اني جايها مخصوص
مشيت للمحلات وقعدت انشوف في شغلهن كيف ماشي وبعد حوالي نص ساعة من وصلتي للجامعة خشت سمر للمكتبة

سمر:صباح الخير

نا:صباح النور

سمر:شن جوك

نا:تمام شن جوك انتي

سمر:الحمدلله تمام وين كنت مختفي

نا:تعالي نطلعو برا ونحكيلك

سمر:تمام وطلعت نا وهي

نا:اكيدة اتقولي هذا كنه اختفى فجأة

سمر:اكيدة ومعش عرفت شن صار امعاك

نا:اخر مكالمة كانت بينا وبعدها طلعت بنوتي روحي بنمشي الفرح صاحبي ونا في الطريق درت حادث وكنت بنخسر يدي لو ماسافروني دغري وغادي درت عملية وقعدت كم يوم بعد العملية لين قعدت اكويس وامس كيف روحت وماقدرتش انكلمك قلت لازم انفهمك اللي صار فيستو فيس

سمر: الحمدلله علي سلامتك وكنت مشغولة عليك لاني كنت متأكدة ان فيه شيئ كبير صاير امعاك

نا:اسف اني ما كلمتك ونا مسافر وشغلتك عليا بس ماكنت قادر انكلمك لان وقتي كله كان في المستشفى

سمر ابتسمت:لا مااتأسفش اللي صار امر طبيعي والمهم انك توا كويس

مع رنت فونها وكانت هبة صاحبتها

سمر:اسمحلي نا بنمشي توا صاحبتي اترن اكيدة وصلت وبنخشو للمحاضرة

نا:تمام خوذي راحتك ولما اتروحي كلميني

سمر:حاضر ومشت

نا كنت فرحان وماكنت انصدق اني كنت امصبي امعاها ونحكي امعاها هكي وعيني في عينها كانن دقايق معدودة بس كانن اسعد واحسن الدقايق اللي مرن في حياتي

سمر مشت من جنبه ولقت هبة ترجى فيها عند الكافيتيريا

هبة:مع من كنتي مصبية

سمر:هذا احمد?

هبة:امتاع البحث

سمر:اها

هبة:مش قلتيلي له كم يوم مختفي شن جابه هنا

سمر:قعدت تحكيلها في اللي صار واللي حكاه الها

هبة:مش عارفة حاسة روحي مش مصدقته شكله نسونجي وامتاع بنات ويلعب

سمر:لا والله احمد مش هكي ونا صدقت كلامه كله وبعدين مادار شيئ ايدل انه نسونجي كل الموضوع حب ايفهمني لما ايشوفني بدون تليفون وتقريبا مافيش اصدق من هكي

هبة:ممكن انكون غلطانة

سمر:شفتيه كيف شخصية وايهبل اتحسي روحك فعلا مصبية مع راجل?

هبة تضحك:شكلها القصة حتطور من صداقة الحاجة اخرى

سمر:وووه عليك تفكير في الليبين خلينا انخشو المحاضرتنا خير ومشن شور المحاضرة

(لا يعترفان بالحب ، لكنهما يشعران بأن شيئاً ما يجري بينهما مذهلاً ?)

/
/

نا طلعت مالجامعة وماشي للشركة ونا جوي سمح وفرحان ومافيش الا صورة سمر قدام عيوني وبنت عطرها انشم فيها في كل مكان وقطع عليا الجو هذا تليفوني لما رن حركات

نا:ايوا ياسي زفت شن تبي

حركات:قلت ماصبحتش عليا لكي واجد انصبح نا

نا ضحكت:شن عندك عالصبح

حركات:الراجل جا وقال تم في كل شيئ ويبي باقي فلوسه

نا:تمام خوذه للشقة ونا توا انجيكم غادي

حركات:تمام وسكر

غيرت طريقي مالشركة وتوجهت للشقة ومشيت القيت حركات وامعاه الراجل

نا:درت كل اللي طلبته

هو:كله وبالحرف وحتى فوق اللي طلبته

نا:وريني

هو::::?

/
/

عطيت باقي فلوس الراجل له وطلع هو وحركات ونا طلعت بعدهم ومشيت شور الفيلا وكان عندي غرضين
اول حاجة نبي نحكي مع تسنيم وانفهمها اللي صار كله
والثاني كان عندي كلام مهم مع سناء عالمخططات اللي اتخطط فيهن ليا وانها ادبر القتلي لكن الشيئ اللي بنقوله الها بيخليها معش تطلع في طريقي نهائي واتحولني من بالها بكل

#يتبع

قولكن هل تسنيم حترضى تحكي مع احمد وهل حتقتنع بكلامه او لا ?

وقولكن احمد شن عرفه بمخططات سناء وشن هو اللي بيقوله لين ايخلي سناء معش اتفكر انها تقتل أحمد ?

كله حنعرفوه في الحلقة الجاية ?

أسفة لو فيه لخبطة في الأسماء وأكيد رأيكم ايهمني?

گـتـابـتـي Koka Saleh