الجوكر | للكاتبة Koka Saleh
الـحـلـقـة (12)
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
لايك قبل القراية وتعليق بعد القراية ?
::::::::::::::::::::::::::
في اللحظة هذي مشاعر وأحاسيس ووعارة الراجل الشرقي اللي ايغار علي نفسه وعن فيا ورفضت الشيئ هذا خذيت كاس وطلعت للجنان امتاع الفيلا برا ونا غمتلي مالجو اللي جوا كنت مانبيش انشوف المناظر المقرفة اللي جوا ?
قمعزت برا علي كرسي واول حد جا في بالي لما قمعزت سمر مش عارف شنو اللي خلى صورتها اتجي بيني وبين كل بنت جوا ?
قعدت انفكر شن معنى هي تي شنو الفرق بينها وبين البنات اللي جوا اصلا اللي جوا قريب كلهن كانن احلى منها تي شن فيها بالزايد عليهن بس ?
وفي اثناء صراعاتي الداخليه هذينا قمعز جنبي حد
بحتت جنبي القيته شاب من عمري وكان ايبحت قدام وقالي
هو:شبك
نا بحتت فيه بإستغراب:شيئ
هو:ليش تركت السهرة وايجيت لهون
نا:مليت جوا قلت نطلع
هو:ماعجبك اللي عم بيصير مو
نا:عادي هما هكي متعودين
هو:لان شرقيين متل بعض ماارتحنا بهيك وضع
نا:ممكن
هو:من لهجتك هيأتك ليبي
نا ماكنت نبي حد يعرف معلومات عليا
نا:جنسيات متعددة بس حاليا عايش بليبيا
هو:بس عم تحكي ليبي امنيح
نا:نقدر نحكي بأي لهجة تبيها مش بس الليبية
هو:اي ماأنت اسمك الجوكر اكيد بتعرف كتير اشيا
نا:أكيد
هو:سمعت كتير عنك واديشك رجال وقوي واديش هون بيعتمدو عليك ودائما بيسلموك المهام الصعبة وصرت في وقت اصير ماللي الاعضاء
نا:ومن حكالك كل هذا
هو:مافي حدا معين لان الكل بيحكو عنك وعن إخلاصك لا الون
نا تنهدت وسكتت
هو:شبك متل كأنك شايل اهموم الدني عراسك اذا بدك اتفضفض وحاب تحكي بسمعك لانو شبه اني حاس متل احساسك
نا رغم اني كان خاطري نحكي الحد وانفضفضله وانقول كل اللي في قلبي بس عدم ثقتي حتى في ضلي تمنعني مانقدرش نحكي الحد بس كان حكيت الحد اللي في قلبي وفضفضت بكل شيئ ولما انقول كل اللي عندي يضمن اني اول ماانصبي حنقتله ?
نا بحتت فيه:بس لو فضفضتلك وحكيتلك اللي عندي مش حيطلع عليك صبح
هو:كيف يعني
نا:يعني حتموت انت حاب اتموت
هو شافلي زين وهو مصدوم من كلمتي وصبى وسيبني من غير مايحكي ولا كلمة
اكثر شيئ كان امحيرني هو نا واللي زيي وزيه هو رغم الحياه اللي عايشينها وارواحنا علي ايدينا ورغم بحر الدم اللي غارقين فيه ورغم ان كل حياتنا متوقفة علي اوامرهم ورغم ان عارفين ان نهايتنا انموتو مقتولين بس مش مستغنيين علي ارواحنا انديرو اي شيئ مقابل انعيشو وهو في الحقيقة والواقع ماعندنش عشان شنو وعشان من انعيشو?
متمسكين بالحياه رغم ان مافيش حد متسك فينا فيها?
/
/
في الفيلا
عبد المهيمن في داره وكالعادة دق الباب عرف إنها الخدامة جايبة العشاء من تسنيم صبى وفتح الباب بس هالمرة كانت تسنيم بروحها جايبة العشاء
عبد المهيمن بصدمة:شن جابك هنا
تسنيم:جايبتلك العشاء
عبد المهيمن:باهي هاتيه وعدي مانبيش حد ايشوفك هنا
تسنيم بلوية بوز:حتى نا ماشية ومدتله الصفرة ومشت
عبد المهيمن حط الصفرة تحت ولحقها
عبد المهيمن:زعلتي
تسنيم:لا عادي
عبد المهيمن:غير والله خايف عليك مانبيش حد ايشوفك وايديرلك مشكلة
تسنيم ابتسمت:عارفة ومازعلتش
عبد المهيمن ايشوفلها:لازعلتي ولويتي بوزك اخرى
تسنيم تضحك:بوزي ?
عبد المهيمن ذاب مالضحكة?
لكن في اللحظة هذي بذات شافو سيارة حمزة خشو وكانو بعيد مالفيلا واقرب مكان الجناح
كرها عبد المهيمن من يدها وخش بيها للجناح
تسنيم بخوف:اكيدة شافنا
عبد المهيمن:ان شاءلله لا
تسنيم ترجف مالخوف وتبكي:ياريت مانزلت
عبددالمهيمن قرب منها:خلاص اهدي ودبيني امعاك ماايصيرلك شيئ
تسنيم تبكي:حيحكيها البابا?
عبد المهيمن مسك يدها:حنخطبك منه
تسنيم فنصت عيونها فيه زين ?
عبد المهيمن:عارفة اني حبيتك
تسنيم قعدت تبلع في ريقها ومصدومة
عبد المهيمن:انراجي في احمد ايروح وبنطلبك منه
تسنيم من كثر ماانصدمت وانحرجت بعدت من عبد المهيمن وفتحت الباب وطلعت وماكان هامها تلقى حمزة او غيره اهم شيئ تطلع وخلاص كانت مصدومة وفرحانة ومش مصدقة كل اللي قاعد ايصير
عبد المهيمن طلع في جرتها:يامجنونة تعالي خوك حيشوفك
تسنيم ماردتش عليه وخشت للفيلا والحسن الحظ حمزة كان خاش وماشافهش
/
/
تسنيم خشت الدارها وهي فرحانة ومش مستوعبة اللي سمعاته طاحت عالسرير وقعدت مغمضة عيونها وتذكر في كلام عبد المهيمن وبعدين قعدت تضرب في روحها بتعرف اذا حقيقة او حلم
تسنيم;حي حقيقة معقولة ايحبني وبيخطبني يعني بنقعد مراته مش مصدقة?
وقعدت طول الليل وهي فرحانة ومش مصدقة اللي صاير
/
/
عبد المهيمن هو بروحه مستغرب ماللي داره ومش مصدق اللي صار وكيف قدرت اتخليه ايحبها في كم يوم حسه موضوع غريب وبذات ان ماكانلش تجارب قبل هكي
قطع تفكيري شيئ واحد وهو اللي ريح بسمته لما اذكر ان مالميتم وان فيه ناس واجد ماترضش اتزوج بناتها من شخص لقيط وخاف ان هل تسنيم يقعدو منهم?
وقعد طول الليل ايفكر في الموضوع هذا
/
/
واخيرا جا الصبح
نا مارقدتش مالليل طشة نرجى في الصبح يطلع وايجي موعد الطيارة بنروح مليت وتعبت لان المكان اللي قاعد فيه هذا مكان الجوكر واللي مريحه أما أحمد مكانه غادي مش هنا ?
جا موعد الطيارة وركبت وماصدقت وصلت الليبيا واول مرة ننزللها ونا فرحان مهما كان فيها ومهما ايصير فيها ومهما كانت موخرة ومش مقدمة بحظارتها زيهم بس مازال فيها شيئ مش عندهم فيها شعور براحة غريب فيها روح طيبة تجذب فيا الها فيها ناس بسيطة واحلامهم بسيطة فيها الشيئ اللي مش في البلاد لخرى
اول ما نزلت مالطيارة تنهدت تنهيدة من وسط قلبي كأني كان مقطوع عليا الاكسجين واستنشقت هواها وحسيت ان الدم رد يمشي في عروقي من جديد
خذيت سيارتي من وين مادرستها وروحت للفيلا واول ماخشيت قابلتني سناء
سناء;حظرت الشياطين
نا نضحك:عساس انتي ملاك
سناء:ملاك شيطان المهم مش زيك
نا:اصلا تحلمي تقعدي زيي
سناء بعصبية:دير حل في صاحبك احسن وديني وما اعبد انخلي الحراس ايلزوه
نا قربت منها:ترا جربي وخلي راجل ايطلعه وشوفي شن انديرلك فيه
سناء:احمد راك اتحدى فيا واجد وانت مش قدي
نا:غلطانة ياماما سناء انتي اللي مش قدي ?
سناء بتحدي:حتشوف
نا:ونا نرجى ? ورقيت وسيبتها
وصلت عند باب داري
تسنيم:روحت ياذايح?
نا لفيت ولما شفتها كيف حاطه ايديها في نصها ورافعه حاجبها ضحكت
نا:والله كنت في شغل
تسنيم:اي شغل ايخليك تمشي فجأة واتغيب هذا كله
نا:اسألي باتك هو اللي دازني في شغل
تسنيم بزعل:بس هالمرة طولت?
نا:معليش والله عشان شغلي واجد بس
تسنيم قربت مني وحظنتني:معش اطول لما اتعدي انت انحس بالوحدة وان مافيش حد ورايا
شعرت بإحساس غريب لاني حاظنها رغم حبي الها ورغم تعلقها بيا وتعلقي بيها الا ان اول مرة نحظنها وكلامها اللي قالاته وعى فيا مشاعر ميتات من زمان
نا:حاظر معش انطول
تسنيم بعدت مني:خوذني فطرني علي حسابك اليوم
ناومن غير تفكير:حاظر من عيوني عدي البسي علي مادوشت وطلعت
تسنيم بفرحة:تمام
مشت تسنيم الدارها ونا خشيت الداري وسكرت الباب وكلمت حركات
حركات:جوكرنا روح الحمدلله علي سلامتك
نا:الله ايسلمك شن عرفك اني كنت امسافر
حركات يضحك:ماهو لما تقعد هنا مااتريحش لين تسمع صوتي كل صبح ?
نا ضحكت:واطي ?
حركات يضحك:قديمة ياحبي ?
نا:خلينا في المهم توا
حركات:ماكنت ماشي كويس?
نا:شن صار مع الراجل
حركات:لوز اللوز وبدى في اول المشوار
نا:وشنو صار
حركات:قال مازال في البداية بس طلباته واجد اشوي
نا:ديرله اللي يبيه اهم شيئ ينهيلي
حركات:تمام ونا امعاه خطوه بخطوه وكل شيئ عندي بيه علم
نا:ايوا هكي نبي
حركات:عيب ياحبي دبين حركات وراك مااتشيل هم شيئ
نا:عارفك صح دوتك واجدة ورغوة لكن عند الشغل اتهني
حركات:بس حانط
نا:حانط وفوقها تافه?
حركات:مقبولة منك يابعد شبدي ?
نا:هي سكر ورايا شغل واجد
حركات:ديما ادير فيها تاخذ الزبدة واتسكر?
نا:زبدة ولا سمن المهم المضمون وهي سلام وسكرت
خذيت ادبشي وخشيت دوشت وطلعت القيت تسنيم ترجى فيا
خذيتها وطلعت نا وياها وتلاقينا مع سناء ونحن طالعين
سناء بعصبية:تسنيم وين ماشية
تسنيم:ماشية مع احمد بنفطرو برا
سناء بعصبية:لا هذا اللي ناقص خشي جوا واحسابك بعدين امعايا
تسنيم:مش خاشة بنطلع مليت مالفيلا ومن كل شيئ فيها
نا ساكت وماسك اعصابي بالغصب مانبيش نحكي امعاها
سناء بعصبية:قتلك ردي الدارك ناقص غير تطلعي مع واحد غريب
تسنيم:مش رادة واحمد مش غريب هو خويا
سناء بعصبية:خوك في عينك وقربت بتضربها وفي اللحظة هذي نا ادخلت ومسك يدها
نا:اخرلك مرة اتحاولي اديري هكي
سناء بعصبية:انت شن دخلك هذي بنتي ونا حر فيها
نا:لا مش حرة وهذي اختي برضاك غصبن عنك اختي
سناء بعصبية:اختك في عينك يالقيط
مع طلعت جابر من مكتبه
جابر بعصبية:سناء
سناء لفت عليه
جابر;احمد اولدي ونا مربيه وكيفه كيف الباقي
تسنيم تبكي:ماتبيش اتخليني نطلع نفطر امعاه يابابا
جابر:خوذها ياااحمد وعدو
سناء بعصبية:بتكسر كلامي نا
قلت مافيش مشيئ
جابر بعصبية:ونا قلت يمشو خوذها وعدو
نا خذيت تسنيم من يدها وطلعت من قدام سناء ?
ديما انحب نقهرها وانغلي النار تغلي عندها??
جابر صح ماكان ايحبني بس كان يوثق فيا واجد وكان عارف ان نا اكثر واحد يعتمد عليه في حماية اعياله وهو كان اكثر واحد يبيهم ايحبوني وانحبهم عشان يضمن اني انكون ديما امعاه
جابر وسناء تعاركو عركة سمحة واختمت علي ان جابر سيبها وطلع للشركة وسناء قعدت تحرق في دمها وكل الي اتمناه انها اتشوفني ميت قدامها ?
طلعت نا وتسنيم واللي صار ماغيرش شيئ وزادت فرحت لان جابر صبى امعاها وطول الطريق وهي فرحانة واتخرف واتبصر وتضحك صح هي امعايا ديما جوها سمح بس اليوم هذا بزيادة حسيت عندها طاقة إيجابية غريبة خشينا المحل وطلبنا فطور وتسنيم وطلبت عرم حاجات
نا:متاكدة بتاكلي هذا كله
تسنيم تاكل:اها
نا:شكلها شاهيتك مفتوحة اليوم
تسنيم:بكككل
نا:صحة
تسنيم:سلمك
وقعدنا نفطرو في جو من تخريف وابصارة وحب وبعدها طلعنا وركبنا في السيارة
تسنيم:اسمع مانبيش انروح للحوش توا
نا:امالا شن تبي
تسنيم:خوذني الاي حديقة فيها ملاهي ليا زمان عليهن
نا بإستغراب:ملاهي من جدك مش صغيرة راه تسنيم:وراس مادي والله ليا زمان ماطلعت انت عارف الفيلا وجوها الكئيب ولا عندي صحبات انغير امعاهن جوي لا شيئ انت بس ننسجم امعاه
نا تنهدت:حاضر وتنشيلك غير لازم تعقلي بكرا تجوزي راجل اتقوليله بنمشي للملاهي احتمال يضربك
تسنيم:وانت اتخليه يضربني
نا ضحكت:عشان يقعد اخر يوم في عمره كان على صوته بس عليك مش ايمد يده
تسنيم:نجيلي خويا الواعر
نا ضحكت وقعدنا نمشو
تسنيم:مادي تكي علي محل خوذلنا شبس وعصير وحاجات سمحات هكي
نا بصدمة:حلك جعتي توا ونحن نفطرو?
تسنيم:مش جعت بس هذينا للتكسيد
نا:باهي وربي ايعيني عليك ?
تكيت علي محل واصرت تنزل امعايا ونزلتها خشينا للمحل وخذت سلة وبدت اتحط ونا نضحك علي حركاتها صح كانت كبيرة بس كان عندها براءة وطفولة مش عادية كنت انحس امعاها ان نا عندي حد عايش عشانه رغم انها بنت اكثر شخص عدوي ونحن هكي سمعنا صوت علي عند مكينة التسليك
هو بعصبية:قتلك طلعي اللي واخذتيه
حنان:يا اوليدي والله ماخذيت حاجة ونا في عمر امك عيب اتسرقني
هو بعصبية:نا قتلك طلعيه احسن ماانفتشك هنا
حنان:نقسملك بالله ماخذيت حاجة
هو:لكي ساعة جوا وجاية جايبتلي باكو جبنة مالحة وحكية هريسة بس واتقولي ماخذيت شيئ امالا عليش كارسة جوا الوقت هذا كله
حنان:كنت انتفرج عالمحل والفلوس اللي امعايا دوب هذينا بس
هو بعصبية:نا حنكلم الشرطة ويصرفو امعاك
نا:تسنيم خليك هنا مااتحركيش ومشيت الصاحب المحل وهو كان ماسك تليفونه وبيرن عالشرطة
نا كريت من يده التليفون
نا بعصبية:مش متحشم علي وجك ولية من عمر امك اتسرق فيها
هو:لو سمحت ماتدخلش
نا بعصبية:لا ندخل ونص وعشرة وكريته من صوريته لين هلبته للمكتب اللي قاعد وراه ونزلت فيه ضرب
نا وبعد مسحت كبدي فيه
نا:لما تبي ادير روحك راجل مرة اخرى ديره عالرجالة مش صبايا وطلعت فلوس من جيبي عزقتن علي وجه
نا:مش هذينا اللي درت عشانهن هالقصة اهو خوذهن وسخ دنيا راه
حنان مصبية واتبحت فيا زيين ونا مشيت خذيت الحاجات من يد تسنيم وعزقتهن لوطة وخذيتها من يدها وطلعت وحنان طلعت ورايا اتناديلي
حنان:شكرا يااوليدي عاللي درته
نا مارديتش
حنان:قولي اسمك
نا ركبت في السيارة وركبت تسنيم وطلعنا
تسنيم:انت ليش درت هكي
نا:ماشفتيش شن دارلها مسكينة قدام الناس
تسنيم:مش قصدي قصدي هي تشكر فيك واتقولك شن اسمك ليش مارديت عليها
نا:كنت امعصب مافطنتلهش
تسنيم:اها بس عارف حسيتها مش غريبة عليا وكأني نعرفها من زمان
نا:منين بتعرفيها يعني
تسنيم:مش عارفة حاسة وجهها مار عليا تشبه حنان اللي كانت تشتغل عندنا
نا:اها ممكن نا مانذكرهش
تسنيم: اها اصلا انت ماطولتش امعانا المهم قولي وين هذا كله طلعت بطل وعطيته طريحة سمحة
نا:هذا اللي هامك بس
تسنيم:ناعليا خويا البطل مادي البطل من يوم وغادي ماعاد انخاف من حد وعندي اخ زيك
نا:ومن يجرا وايخوفك خليني ندفنه حي
تسنيم بحزن:ليش مش انت خويا الحقيقي بدال راشد ?
نا:وحتى نا خوكي والخوت مش بس اللي جايين من بكن وحدة الخوت هما الخوت بالقلب وبالحب وبخوفهم وحنهم علي بعضهم
تسنيم:والله صح
تسنيم:قصدك بتشيلني للفيلا
نا:اها لان عندي شغل مهم وتأخرت عليه
تسنيم:معناها اوعدني اتشيلني مرة اخرى
نا:خلاص نوعدك
وصلنا للفيلا نزلتها ونا طلعت وكل اللي قعد في بالي اللي داره صاحب المحل في حنان
حنان اكثر انسانة تهربت اني انشوفها من اول ما روحت لانها اكثر وحدة تفهمني من عيوني ولو شفتها حتعرف اللي نا فيه واللي داسة عالعالم كله
حنان هي الام الحنونة اللي حسيت بحنيتها هي اكثرانسانة حبتني من دون مصلحة لما شفتها كان خاطري نحظنها وانقوللها ياامي زي ونا اصغير بس ماقدرتش خفت تعرفني نا من وتعرف كل اللي وصلتله
انسانة قلبها طاهر وطيبة حرام اتحن في واحد زيي نا قاتل ماجور وظالم اسهل شيئ عنده ان ياخد روح انسان وهذا اللي ماخلانيش لنرد عليها?
مسكت فوني ورنيت عالعيساوي وهو رد
العيساوي:خير ياجوكر
نا:شن صار في الولية اللي قتلك كل شهر اتشيللها فلوس
العيساوي:ماهو هي حولت مالمكان اللي هي فيه ومعرفتش نوصللها
نا بعصبية:وليش ماقتلي
العيساوي:راحت من بالي بكككل
نا بعصبية:اسمع اعذار مانبيش قدامك يوم واحد بطير اتجنح اتجيب عنوانها واحسابك عاللقطة هذي امعايا
العيساوي:تم وسكر
/
/
نا كملت طريقي ومشيت للشركة برمت عالشغل اللي فيها
/
/
عند تسنيم
خشت الدارها وهي فرحانة ملتمة عليها الفرحة من جيهات واجد لكن فرحتها مادامتش واجد لما حشت عليها سناء
سناء بعصبية:تكسري كلمتي وتمشي امعاه
تسنيم:بابا قالي امشي
سناء بعصبية:بشن انفهمك هذا واحد مش كويس وحقير وحتى مش متربي امعانا وانتي تمشي امعاه افرضي يقتلك او ايديرلك شيئ
تسنيم:مستحيييل احمد مش هكي هو ايحبني ومعتبرني اخته وايكون بعلمك كان بيتربى امعانا لولا اللي انتي درتيه فيه صح كنت اصغيرة بس فيه حاجات نذكرهن
سناء:لان مش خوكم وباتك كتبه علي اسمه وداره كيفه كيفكم وبيقسم امعاكم كل حاجة وهو واحد خبيث ومتأكدة حيلعب اي لعبة عشان ايطلعنا كلنا من هنا
تسنيم:أحمد عمره ماكان هكي لانه انسان طيب وحنون وايحب الخير ماشفتيش اليوم شن دار عشان الولية الكبيرة اللي الراجل سرقها
سناء:هذينا اطروح قدامك الا في الحقيقة هو شيطان يقتل حتى باته عشان مصلحته
تسنيم:لالا انتي لانك مااتحبيش احمد اتقولي هكي بس نا امثر وحدة نعرفه ةانحبه وواثقة فيه اكثر ماواثقة حتى فيكم
سناء:تمام خليك هك ولما انطلعه علي حقيقته توا تعرفي انك واهمة وان عمايله حتى الشيطان ماايديرهن وطلعت وسيبتها
وتسنيم ماعدلتش علي كلام امها لانها واثقة في احمد ثقة عمياء
/
/
عندي نا قعدت في الشركة ننهي في الشغل اللي قاعد متراكم وخذيت رست اشوية وقعدت نشرب في قهوة ومسكت تليفوني وفتحت النت وشفت رقم سمر القيتها متصل عالنت وكالعادة انفكر اندزلها ولا مااندزلهش وفي الاخر قررت اندزلها ودزيت (خير)
بس كان بعد فات الاوان شكلها سكرت نت? وندمت علي دزتها وقعدت انقول ياريت نقدر نحذفها ?
/
/
مر اليوم زي اي يوم عادي كان كله شغل وكملته كله تحت في قسم الصيانة انشيك عالاعطال والاجهزة اللي اصلحن لعند لما جا الليل وكنت هالك بكككل ومش واكل شيئ من بعد قعدتي فطرتي مع تسنيم الشغل خذاني وكنت بنكمله بسرعة وخلاص
نا كنت انحب نشتغل نشتغل واجد عشان ننسى اي شيئ اندير فيه نبي نتعب اكثر واكثر عشان لما انجي نرقد ماانفكرش في شيئ ?
كان في عقلي اليوم كله اني نمشي العبد المهيمن نعتذر منه علي اني مشيت فجأة بس ماقدرتش نمشيله في المركز مش عارف المكان هذا بذات ماانحبش حتى تخطيم من جنبه مستحيل انخطم
لان انحس فيه فرق كبير بينا هما ايدافعو ويحمو في بلادهم ونا اندمر وانخرب فيها
قلت في عقلي لما انروح انتلاقه امعاه وانتعذر منه
ونازفي نفس الوقت مازالت مش ناسي الللي شاك فيه تجاههة وان بيستغل تسنيم لكن قلت انتأكد قبل
/
/
طلعت مالشركة ومشيت المطعم خذيت عشاء ليا والعبد المهيمن وطلعت عالفيلا وصلت ومشيت للجناح دغري دقيت فتحلي عبد المهيمن
عبد المهيمن:اووو بياع تي معقولة اتحطني هنا واتريح
نا:والله جاني سفر فجأة عشان الشغل نا بروحي ماكنت امخططله
عبد المهيمن:اي سفر فجأة
نا:بضاعة ازرطت برا وكان لازم حد منه يمشي ورشحوني نا ودزولي التذكرة طلعت دغري عالمطار
عبد المهيمن:ربي ايعينك والله
نا:عارفة موقف بايخ واعذرني ياخيي
عبد المهيمن:مش بينا ياراجل حصل خير نا بروحي مانبيش انقيدك علي شغلك واصلا النهار كله مش قاعد انجي في الليل بس انبات
نا:خش جايب عشاء خلينا انتعشو مع بعضنا
عبد المهيمن:بعدها مازلت ماتعشيت وجيعان بكل
خشينا وقمعزنا وبدينا انتعشو
كنت حاس بنظرات عبد المهيمن ليا فيهن شيئ غريب مافهمتش ايتهرب من التبحيت فيا والنظرات هذينا كانن ايزيدن ايشككن فيا فيه
نا:عبد المهيمن شن تشتغل خاطي انك شرطي
عبد المهيمن:مافيش شغل اخرى انكمل فيها في المركز
نا:وكيف تصرف علي روحك معقولة عايش عالراتب بس
عبد المهيمن:لا لا مش راتب بس اوقات اتجيني كروة عالسيارة وعندي حرفة تصليح تليفونات مرة مرة انصلح وناخذ عليهن في فلوس
نا:تمام باهي كويس
كملنا عشاء وخذيت الزايدة عشان نعزقه وهو خش ايدوش
عزقته ورديت القيت عبد المهيمن مازال ايدوش فتحت نت والقيت سمر راده عليا حسيت قلبي من كثر الفرحة والصدمة يبي ايوقف
القيتها دزتلي (خيرات)
شفت الظهوها القيتها متصل قلت اندزلها قبل مااتسكر
نا:شن جوك
سمر:تمام شن جوك انت
نا:تمام شن اخبار امتحانك هذك اليوم معش فضيت نسأل عليه
سمر:تمام حليت وحتى نتيجته طلعت ونجحت فيه
نا:باهي مبرووك والبحث تمام
سمر:تمام بكككل
نا:معش بديري بحوث اخرى ?
هي:لا ماهو خلاص شريت نت وقعدت اندير بروحي
نا:يااخسارة
هي دزتلي;?
نا كنت مانبيش المحادثة تكمل امعاها
نا:اصلا انتي شن تقري
سمر:هندسة نفطية
نا:تخصص حلو
سمر:شكرا
نا:هالمرة قلتيها مش زي اول مرة
سمر:ماهو رقيتوها ليا ?
نا :??
نا:بس شخصيتك قوية وواول مرة انشوف وحدة متمسكة باسمها هكي
سمر:هذا اسمي وانحبه وماانحبش حد يغلط فيه
نا:تحسابيني درتها بلعاني نا ماركزتش بس انتي عصبتي
سمر:نحسابك اتشفط
نا:شكلك نقصية
عبد المهيمن طلع مالحمام وقعدت ايبعبش في تليفونه جنبي
نا:لا والله معقولة عاد
سمر:وين نندري عليك
عبد المهيمن:أحمد نبي شحن شحني شكله خرب وبنشحن تليفوني قبل مانرقد بكرا عندي شغل
نا نبيه يسكت وخلاص:مش هنا في داري
عبد المهيمن:باهي صبي جيبه ليا
نا:اهو المفتاح وارقى خوذه داري ثاني دار في الممر
عبد المهيمن:من جدك نرقى نا افرض شافني حد
نا:كلهم مرقدين غير ارقى بس وتلقاه في الكوميدين اللي جنب سريري
عبد المهيمن:تم خذا المفتاح وطلع
نا:أسف كنت نحكي مع خويا جنبي نفخهن ليا ?
سمر:عادي ولا ايهمك
نا:باهي قوليلي شن تقري
سمر:هندسة نفطية
/
/
عبد المهيمن رقى للدار وفتحها وخش وجا للكميدين فتحه وخذا الشحن وفطن للتليفون اللي فيه
عبد المهبمن:تليفون سمح بس خارب ولا شنو اللي احمد حاطه هنا
مسك الفون وولعه مابش يولع علقه في الشحن شحن وولعه ولقاه يشتغل وقعد ايبعبش فيه وفجأة لقى صور تسنيم ?
/
/
نا لما حكيت مع سمر انسيت روحي الدرجة ماركزتش شنو اللي لبزته وكيف نعطيه مفتاح داري ودغري ضربت في راسي كلمة جابر مااتخليش ايخش للدار
تي داري فيها سلاح وفيها اقنعه الجوكر عزقت التليفون وصبيت بسرعة
/
/
عبد المهيمن طلع مالدار ناايشوفش قدامه وتلاقه مع تسنيم في الممر
تسنيم ابتسمت:انت كيف خشيت هنا
عبد المهيمن بحت فيها تبيحيتت غل وطلع وسيبها
/
/
نا بنخش للفيلا وعبد المهيمن طلع وكان وجه ماايتفسرش
عبد المهمين بعصبية:انت كيف ادير هكي
نا وكل الي جا في بالي ان شاف اللي في داري وعرف حقيقيتي
نا ماعرفتش شن انرد وكل اللي في عقلي اني توا حنقتله لان مستحيل نسمحله يعرف حقيقتي وايدمرني حطيت يدي علي جنبي وبنطلع اسلاحي روحي بروحه
عبد المهيمن ومدلي التليفون:اصورها شنو ايديرن عندك مش عساس اختك ليش مصورها صور هكي شن فيه بينكم قولي
نا استك ادماغي في بالي شيئ وجاني شيئ
بس السوء الحظ تسنيم كانت مصبية عمد الباب وسمعت الكلام كله
#يتبع
واااااااااو هذا اللي ماحدش دار احسابه قولكن شن حيصير مع الثلاثة وكيف احمد يقدر ايفهمهم وهل تسنيم حتصدق كلام احمد ولا لا ?
كله حنعرفوه في الحلقة الجاية?
بنات معليش عالتأخير بس وربي مش فاضية نكتب سطر وانسيب وتوا غير كملت بكرا جايين هل عزو وقاعدة حايسة?
بنات راه ماعدلتش الحلقة قبل ماانزلها لان مش فاضية لو فيه اي خطأ تغاضن عليه هالمرة وهذي اول مرة انزل حلقة بدون مانبرم اذا تبي تعديل خرف زايد او ناقص ?
أسفة لو فيه لخبطة في الأسماء وأكيد رأيكن ايهمني ?
گـتـابـتـي Koka Saleh