ضحية ذئب للكاتبة ريهام الحديدى(كاملة)

الحلقة الخامسة عشر:
(في شقة عواطف)
رجع كلاً من صلاح و إبراهيم وعصام فأستقبلتهم أمينة بلهفة متسائلة وقالت:
– ها عملتوا ايه يا إبراهيم؟ قاللك هايعمل حاجة؟
أجاب إبراهيم وهو يهم بالجلوس وقال:
– قالنا إن شاء الله هايتابع الموضوع بنفسه وهايعمل تحرياته وبإذن الله هايبلغنا لو فيه جديد.
جلست أمينة على الكرسي المقابل له وقالت بإحباط:
– يعني بردو لسه هانستنى لما يعرفوا يوصلوا لمكانها.
أجابها صلاح وقال:
– خلي أملك في ربنا كبير وإن شاء الله اللواء حمدي هيقدر يعمل حاجة أنتِ ماتعرفيهوش ده مافيش حد بيقصده في حاجة غير لما بيساعده فيها مابالك بقى بالمشكلة دي ، قولي يارب يا أمينة وهو هايقف معانا ويرجعلنا بنتنا بالسلامة.
– ردت بصوت متضرع: يارب رجعلي بنتي بالسلامة.
– أمن الجميع بقلب خاشع على دعائها.
(في مكتب خالد)
دخلت سلوى مكتب خالد تعرض عليه بعض أعمال اليوم فرد عليها وقال:
– إلغي كل حاجة النهاردة يا سلوى دماغي مش رايقة لحاجة ، ثم بادرها بسؤاله عن حسن وقال:
حسن لسه عندك في الشقة لحد دلوقتي؟
– أبتسمت عند ذكر حسن وقالت: أيوة من ساعة ماجالي أمبارح لسه ماخرجش لحد دلوقتي .
– نظر لها يتفحص وجهها الذي أشرق بإبتسامة واسعة وقال: شايف إنك حبيتيه يا سلوى والحب ده خطر على شغلنا وانتِ عارفة كده كويس وعارفة أخرته بتكون إيه.
– تجهم وجه سلوى وقالت: ماهو شغال معانا من زمان يا خالد باشا وكل الأخبار اللي بتطلب مني أجبهالك منه بجيبها بطريقتي.
– نظر لها يتفحصها ملياً ثم قال : وانتِ ؟ أنتِ مابتقوليلهوش على أخبارنا؟
– ردت سريعاً تنفي هذا الإتهام عنها وقالت: أنا !! أبداً والله يا خالد باشا ، ده أنا مابفتحش معاه سيرة الشغل غير لما حضرتك تكون عايز تعرف هو ناوي على إيه وبيفكر في إيه.
– صمت قليلاً يتفحص وجهها ثم أومأ برأسه وقال: وعرفتي هو مضى البنت دي على إيه؟
– ردت سريعاً: طبعاً يا باشا هو قاللي أنه مضاها على وصل أمانة عشان لو فكرت تعمل زي اللي عملته قبل كده ونجحت فعلاً أنها تهرب بعد ما يبيعها وبلغت عنه يكون هو في التمام ويقول هي بتتبلى عليه عشانماتدفعش اللي عليها.
– صمت خالد يفكر في كلام سلوى ثم أشار لها بيده أن تنصرف.
فإنصرفت بهدوء.
(فى مديرية الأمن (
فى قاعة الاجتماعات حضر عدد كبير من أفراد القوات الخاصة هذا الأجتماع و يترأس هذا الاجتماع اللواء حمدى يقوم بأعطائهم الأوامر والتعليمات الخاصة بخطة الهجوم على شحنة الأسلحة الآتية من الخارج وبعد أن انهى تعليماتة سألهم وقال:
-ها يارجالة كل حاجة فى الخطة واضحة ؟ ، كلة عارف مكانة فين ؟
– ردوا علية بصوت واحد قوى : كلة تمام يافندم
-رد وقال : مش عايز أى حد يهرب منكم يارجالة عايز كل اللى هيكونوا هناك يتم القبض عليهم ، العملية دى متوقف عليها حاجات تانية مهمة .
– رد شريف وقال: إن شاء الله يافندم مش هانخذلك .
– رد اللواء حمدى طيب يارجالة أتفضلوا أنتوا الوقتى والساعة خمسة هنبتدى نتحرك على هناك عشان نتمركز وناخد احتياطيتنا.
– هم الجميع بالانصراف وبقى شريف ومعة أيضا زميل له يدعى حسام فى الحجرة فتحدث اللواء حمدى وقال: انا مش عايز حد يفلت النهاردة ياشريف ، عايز من أكبر واحد لأصغر واحد يتقبض علية ، ثم أتجة بنظرة نحو حسام وقال وأنت ياحسام هاتتابعنا من هنا وأول ما نقولك نفذ تنفذ كل اللى أتفاقنا علية أنا مش عايز غلطة تحصل النهاردة دا مجهود أتعمل فى سنين و جة وقت أننا نشوف نتيجة مجهودنا دة اية مش عايز حد من اللى عندك اسمائهم ياخد علم باللى حصل و يلحق نفسة ويهرب عايز على بكرة الظهر إن شاء الله يكون كل الكبار مشرفنا هنا .
– رد حسام وقال: ماتقلقش يافندم انا مرتب مع ظباط زمايلنا أننا ورانا حاجة مهمة النهاردة ومحدش يعرف اية هى الحاجة دى ، أول ما سيادتك تدينى الأوامر هابتدى أديلهم المعلومات وأعرفهم احنا هانقبض على مين وبأذن الله محدش هايعرف يهرب منهم لأنى حاطط على كل واحد منهم ناس تراقب تحركاتهم وبيعرفونى أول بأول أماكن تواجدهم فين.
– تحدث اللواء حمدى وقال: كدة كلة تمام ربنا يوفقنا ونخلص البلد دى من أشكالهم القذرة دى ، يلا أنتوا يارجالة على مكاتبكم كل واحد يشوف وراه اية لحد ما يجى وقت التنفيذ .
– انصرف حسام وشريف بعد أن أدوا التحية العسكرية كلا الى مكتبة.
(في شقة سلوى)
– أستعد حسن للمغادرة بعد أن أخبر محروس أن يقابله في مكتب خالد ، وبالفعل توجه حسن إلى مكتب خالد وقابل محروس هناك، وأستأذن حسن لمقابلة خالد فردت سلوى وقالت:
– الباشا مستنيكوا من بدري أتفضلوا أدخلوا.
– دخل حسن ويليله محروس وألقى حسن التحية وقال : مساء الخير أزيك ياباشا .
– رد خالد وقال: مساء النور ، إيه يا حسن كل ده تأخير؟ أنت مش عارف إم ورانا سفر؟
– رد حسن بإقتضاب وقال: معلش أصل راحت عليا نومة .
– رد خالد وقال : طب يلا عشان مانتأخرش وأنصرفوا جميعهم من المكتب.
(في تمام الساعة الخامسة)
أجتمع جميع أفراد الشرطة المسؤولون عن تنفيذ العملية أستعداداً للذهاب إلى الصحراء حيث مكان التسليم، حيث شدد عليهم اللواء حمدي للمرة الأخيرة على أن يتم القبض على كل من يقوم بتسليم أو تسلم هذه الأسلحة وشدد على شريف أن يحرص على خروج حسن من هذا الإقتحام حياً يرزق …….
أستنوني بكرة إن شاء الله مع حلقة القبض على العصابة توقعاتكوا ….
ياترى العصابة هايتقبض عليها كلها ولا ايه لأ ؟
وايه اللي هايحصل لحسن بعد كده مع العصابة؟