رواية “أحمل قلبك .. أينما ذهبت”

مع انه التفاعل بلهون بس اهو هههه مبيتش نخليكم تستنو ? …

الأضافية الي وعدتكم بيها ✨

??????????

الحلقة الخامسة ~ ??

أية.. اياد

إياد تلفت .. ايوا ، ورجع لمكانه قدامها ….

أية.. كنت نبي نتأسفلك ع اسلوبي مبكري و …وسكتت ،

وهوا قعمز ؛ وخلاها تكمل كلامها

أية.. كنت فظة و وقحة معاك ، مكانش المفروض اني نتصرف هكي .. اني اسفة

وهوا ابتسم ورد عليها .. مش مشكلة ❤ .. اني مضايقتش عادي.. اكيد كنتي مضغوطة وصاير عليك سترس وتعبانه ؛ انا لو مكانك كنت احتمال نتصرف هكي عادي …

وأية زادت تحشمت من روحها وطبست راسها وقعدت تفرك ف أيدها… لا ؛ اني متصرفتش هكي لاني مضغوطة …. اني ديما هكي فظة مع الناس ؛ مع انه مش طبعي بس منعرفش شن الي يخليني نتصرف هكي.. خصوصا لو كان راجل ،

إياد.. ههههه افهم من كلامك ده انك بتكرهي الرجاله ?
أية.. صراحتاً ؛ اي ?
اياد.. هههههه مش هانقولك دسكة صوابع ايدك مش زي بعضهم ، لان عندك حق حني ننكرهو للامانه ??

أية سكتت شوية وفمها تعوج متع شادة ضحكتها بالسيف بس مقدرتش وقعدت تضحك ??

أياد.. هههههه تشرفنا يا انسة أية ؛
أية.. الشرف ليا استاد اياد
إياد.. جدك انا يابنتي ؟ ?‍♂️ .. i’m 32 only ?

مردتش عليه وشربت من قهوتها…..

إياد.. ههه هي نشوف وجهك بخير
أية.. مسافر ؟
إياد.. اي ان شاء الله

أية مقدرتش تكبح غريزتها فلتقصيقيص وقتله وين ?

إياد.. لسوريا كان سخر ربي

وأية قرنت حواجبها باستغراب وقتله سوريا !… مش توا حرب ؟

إياد.. ههههه بالضبط
أية..وشن عندك فيها ماشيلها توا ?
إياد.. شغل
أية..علاش شن تشتغل ؟
إياد.. نصور ??‍♂️?
أية.. شن تصور ؟
إياد.. ههههههه وطلعتي قصقاصة فوقها ?

أية حست بروحها زودتها حق وتلفتت ورجعت سكتت?

إياد.. انا مصور للحروب ، وينك ياحرب ونمشي … نصور ….ونخلي الناس تشوف فلوجه التاني للعالم ..وتعرف انه مش الكل مرتاحين زيهم ، وتعرف حقيقة الناس الي تمجد فيهم وهما سبب خراب ودمار ناس تانية وموت اطفال ابرياء مليهمش ذنب.. هادي مهنتي

أية.. بس مش خطر عليك المهنة هادي ؟
اياد.. لما تشوفيلها من الزاوية الي نشوف فيها مش هاتدوري خطورتها بكل ،
أية.. هزت راسها ورجعت سكتت ، انا صاحبتي سورية وتبي تسافر بعد اسبوعين تتطمن على اهلها ….
اياد..وكيف بتمشو ؟
أية.. مشعارفة ، انت كيف بتمشي ؟
إياد.. بنمشي من تركيا وبعدها بري ، بس انتو بنات كيف هاتقدرو تمشو بروحكم هكي ؟ مش أمان
أية.. مزال نفكر ؛ مرات نقول لسمر تخلي خوها يجي ياخدنا من تركيا
إياد.. صعب يطلع من دمشق أصلا
أية.. به كيف ندير ؟

وبعدين سكت شوية وقعد كأنه يفكر ف حاجة ومتردد يقولها يخاف تفهمه غلط…تمشو معاي ؟

أية…. نعم ؟

إياد.. مجرد فكرة وانتي براحتك اكيد.. انتم بنات وخطر عليكم تمشو مشوار زي هدا فلظروف هادي بروحكم….وانا نعرف ناس هايساعدوني لحد مانوصل غادي ؛ ونوصلكم لحد حوش صاحبتك بخير ونمشي انا … هاتبدا رحلة طويلة ومرهقة وصعبة عليكم ومش أمان……

سكتت أية من ناحية تبي ترفض لان متبيش تكون موجودة معاه ف مكان واحد فترة طويلة ومن ناحية كلامه مزبوط وعنده حق ….

أية.. نشاور صاحبتي قبل بالك ترفض ويكون عندها خطة بديلة

إياد.. براحتك زي ماقتلك مجرد اقتراح…وكتب رقمه ف منديل ؛ هدا رقمي لو في حالة قررتو تمشو معاي .. خليه معاك علاحتياط……. نتلاقو ع خير ❤ وشكراً علقهوة مرة تانية
أية.. العفو

وناض مشي……

أما اية ف قعدت ساكته تفكر ومتوترة ف نفس الوقت وخايفة …. بالرغم من قناع القوة الي هي لابساته طول الوقت بس شعور الخوف تعودت عليه خلاص لانه ملازمها من لما كانت صغيرة?…..

وخدت المنديل حطاته ف جيبها وناضت روحت …… فتحت الدار لقت سمر راقدة والبنات روحو ، قعمزت ع سريرها وبدت تفكر …………………….

~~~~~~~~~~~

……… أية ، أية بنتي

سمعت اية الصوت وتلفتت حواليها لقت الدنيا كلها فاضية كأنها ف اللا مكان ! ….

ونفس الصوت قاعد ينادي فيها …… وكان كأنه مألوف عليها ، مش غير مألوف وبس هدا الصوت مستحيل تنساه ! ?

ناضت تضبح ب علو صوتها…… بابا !!! بابا انت ويييين

وقعدت اتبع فلصوت لحد ماوصلتله…. شافت بوها قدامها…. شافاته كأنه مخلياته امس ?…. نزلو دموعها زي المطر ومقدرتش تمنع روحها من انها تمشي وتحضنه ….. وتشم ريحته ?

وقالت وهي تعيط وشادة فيه….. بابا اني استاحشتكم هلبا … استاحشتك انت وماما واحمد خوي ….. اني ضعت من غيركم ، اني بديت انسانه سيئة جدا….وبديت مطفية معاش قادرة نفرح زي قبل…… كل يوم الي صار معاي قاعد يتعاود قدام عيني….. خودوني عندكم ومعاكم خودوني وسطكم اني معاش نبي نعيش حياة مفيهاش صوتك وريحتك انت وماما … اني معاشش قاادرة نبدا قوية زي قبل يابوي كل مانكبر يبدا أصعب عليا…. كل مانكبر الوحدة تبدا أصعب وعذاب اكبر ليا…… خودوني ليكم يابابا ارجووووك ????

شدلها راسها ب ايديه الزوز الدافيات ومسحلها دموعها وعلى شعرها….. انتي مش ضعيفة بكل ياروحي …. انتي أقوى بنت فلدنيا… انتي بنتي ❤ …وقلبك هدا أبيض منه مفيش ، دوري ع نفسك من جديد ……

دوري ع أية الي كانت نوضو كل يوم ع صوتها تغني ومعبية الحوش بألحان صوتها الملائكي وضحكتها وروحها الطيبة ? … انتي كبرتي توا …. بس أية هادي قاعدة هني ؛ وشاورلها ع قلبها……وتوا بنكلم بنتي هادي … وبنتي القوية الي كبرت وبعد كم شهر هاتبدا محامية قد الدنيا…… بنتي هاتبدا محامية وترجع حق بوها …..

أية.. حقك ! شن قصدك بابا !!

بوها.. رجعيلي حقي يابنتي ؛ ? ……. انتي الوحيدة الي هاتقدر تردهولي… ورجعي حق امك..وخوك …واختك ?.. اني واثق فيك ، انتي قدها…. خلي عندك ثقة ف نفسسك ….ودوري ع نفسك من جديد ،

وبدي يمشي بعيد عليها

وهي تجري وراه….. بابا استنى من مني نرجعلك حقك….وكيف ?…… وعلاش صار معاكم هكي بابا استناني شوية اققعد معاي……. بابااااا !!!

وناضت م النوم مفزوعه تشوف حواليها كأنها تحاول تستوعب هي وين ، وعرفت انه كان حلم………غفت وهي مقعمزة تفكر ?…..ولقت روحها عرقانه و تبكي لما ناضت كأنها كانت تكلم فيه بلحق…… نهارت بلبكي وناضت ع صوتها سمر طول وقعدت تحضن فيها وتسأل فيها خيرك وشن صار وأية مردتش وقعدت ساكته تبكي من غير صوت وخلاص ……. وبعدين قالت كلمة وحدة ورجعت سكتت بعدها ، ?

سمر.. شو بتقولي ! حق مين بدك ترجعي !!

اية.. نبي نرقد

سمر.. ماشي ارتاحي انتي وبكرة بنحكي …..

وهزت براسها وخشت بدلت حوايجها وصلت وقعمزت ع فراشها واول ماحطت راسها بدت تفكر ف الحلم….وشن كان يقصد بوها برجعيلي حقي ?…… ومن مني هاترجعهوله وكيف وهيا مشعارفة اصلا علاش صار معاهم هكي !…… وهي متاكدة انه اكتر من مجرد حلم …..وأكيد بوها فعلاً مش مرتاح ف قبره ?….. وتفكرت حاجة ، انها متعرفش حتى هوا وين مكان قبره ! ? …. بدت تبكي لحد مانعسها النوم وهي على أمل ترجع تحلم بيه تاني باش تقدر تكلمه تاني ?

تاني يوم ، بعد ماروحو البنات من الجامعه والتمو بلكافي الي متعودين يمشوله….

أية.. سمر نبي نحكيلك موضوع
سمر.. موضوع شو ؟
أية.. بالنسبة للسفر ؛
سمر.. لا ماتقولي ششي بدي روح يعني بدي روح !
أية.. اي روحي ماقلتلك شي اسمعيني بس ? فكرتي كيف بنمشو والطيران مسكر ؟
نورهان.. تصدقي مفكرناش فيها ? صحيح يابت ياسمر هاتروحو ازاي ؟
سمر.. مافكرت فيها ☹
جمانه.. هههههه اي وانتي تفكري اصلا دماغك معبي هواء ?
سمر.. طيب شو رأيك انتي عندك فكرة ؟
أية……

وبدت تحكيلهم الحوار الي صار بينها هي واياد….

نورهان.. انا من رأيي دي فرصة وجتلكو من السماء
أية.. يعني انتي موافقة نمشو معاه بروحنا ؟
نورهان.. انا عن نفسي اه ؛ وانتي اي ؟

وشافت لجمانه

جمانه.. وحتى اني شايفاته انسب حل ،
سمر.. خلاص دقي عليه وقوليله بدنا نروح معو أيوش ☹☹
أية.. بس انا ،،، وسكتت

نورهان.. يا حبيبتي متخافيش واضح انه مفيش في نيته حاجة غير انه هوا يساعدكم … و وبصراحة الولد ماشاء الله عليه والواحد يطمنله من اول مايشوفو كدة لله ف لله ???

أية.. حد يكلم خطيبها بليز ? به وهوا شن بيستفيد لما يعرض علينا عرض زي هدا ؟

جمانه..?????? لالا بس عندها حق شكله راجل وينعبى عليه ..وبعدين هوا بيوصلكم وبيمشي لحال سبيله يعني شن بيصير ؛ ولا شي متكبريش الموضوع

أية.. الي يريحكم ، هاك رقمه كلموه انتو

نورهان.. يختاااااي ع الي هاتجيبلي النقطة وتشلني بدري دييي ??‍♀️??‍♀️??‍♀️??‍♀️??‍♀️

أية..واااك مبردكمم هاتو …. وطلعت برا تتصل بيه ؛

نورهان.. بت ياسمر… مش غريبة انه يعرض على أية عرض زي ده ? هي معاها حق بس مش عايزة اقول كدة قدامها ?

جمانه.. انا بديت نتأكد انه معجب بيها ?✋
سمر.. بتقولو هيك ؟
نورهان.. ااه مشفتيهوش لما جي المستشفى وانتي نايمة ده كان هاياكلها بعينه?
جمانه.. تحشمي ع وجهك شن المصطلحات السوقية هادي ? … بس عندها حق كان يشبحلها هلبا ?…واضح انه عاجباته وصحبتكم عارفينها كبريائي سر انوثتي ..
سمر.. الله? دخيلو انا…وضمت ايدها ف بعض وقالت …..يعني ره اشهد ع ولادة قصة حب جديدة ???ومش اي حد أنتيمتي كمان ??
نورهان.. هههههههه يختي انتي ادعي بس مطفهوش وتكرهو في الي خلفوها ?
سمر.. ههههههه يارب ؛ لو رحنا رح احكيلكم كل شي اول ب اول واتس خليكم معنا علخط ?

ورجعت أية…. الاثنين الجاي لا الي بعده ؛ باش نجهزو نفسنا

سمر.. هانسافر ?
اية.. لا هانمشو الملاهي ?
سمر.. هيي?????

ومش هانكتر عليكم مشو الأيام بدون أي احداث وجي موعد السفر ، واياد مكلمش أية الا قبلها بيوم باش يشوفوهم جهزو نفسهم ولالا ، وعطاها التكت متعهم ،

و وصلت سيارة الأجرة الي بعتهالهم إياد باش تاخدهم علمطار ويتلاقو غادي …..

نورهان.. والنبي طمنونا عليكم اول ماتوصلو
سمر.. حاضر وانتو ديرو بالكم ع حالكم اي !

و ودعو بعضهم وأية حابسة دمعتها لانها كانت اول مرة تسافر من الي صار وزعلانه انها أول مرة تبعد ع صحباتها والي هما عيلتها الوحيدة الي تعرفها …. ?

ومشو ، ولما وصلو علمطار لقو اياد يستنى فيهم خدي منهم الشناطي وبدو فلاجراءات ومرة مرة يتكلم هوا وسمر اما أية ف مكانش ليها حس …. لحد ماركبو الطيارة

قعمز اياد جنب الروشن وسمر بلعاني قعمزت ف طرف الصفة باش أية تقعمز فلنص جنب اياد ?❤

وقعمزت أية وبدت تقرا ف ادعية وقرءان

إياد.. هههه ارخي روحك مش ماشيين تحاربو .. شن اول مرة تركبي طيارة ؟
أية.. لا ، بس من وقت بعيد
إياد.. كل شي هايمشي تمام ان شاء الله.. متخافيش

وتلفت هوا للروشن اما هيا ف قعدت تشبحله “متخافيش” .. كلمة ع قد مابسيطة ع قد ما استعذبت شعور انه تنقاللها وبالذات منه وبشكل غير متوقع … ارتاحت ! ❤

إياد.. nice watch …”ساعه جميلة ”

اية.. شكراً ، كانت لبوي
إياد.. ههه مخلي لبنوته تذكار باش متنساشي فلغربة
أية ابتسمت ومردتش …. متخدمش لكن تبي بطارية
إياد.. وخوديلها به
أية.. الساعة موديلها قديم بكل كل مانمشي لمحل منغير حتى مايفتحها يقولي قديمة ومعندناش بطارية ليها…..

ورجعو لسكوتهم تاني ،

وسمر واية رقدو ع كتف بعض وإياد مرة مرة يغفى ومرة ينوض يتأمل فيها ❤ …

لحد ماوصلو …. ولقاهم واحد حامل كرتونة مكتوب عليها اسم اياد…..

سمر.. هههه الله يحرسك مبين مجهز كل شي ?
اياد.. عيب عاد بزنس مان ?

وباتو في فندق وتاني يوم انطلقو برحلتهم بالسيارة كان إياد مأجرها من واحد …. و قعدو ماشيين نص يوم واية مرة ترقد ومرة تنوض تتفرج علطريق منغير صوت…

سمر.. شو بك صايرة هادية كتير بتنحسدي ?
أية.. لا شي راسي مصدع م المشوار ….
سمر.. اي الي بيشوفك هيك مابيشوفك وانتي صارعتينا بحكيك بامريكيا هههههههه بتعرف بس بتفتح تمها مابتقفولو بتصير بتحكي بكل شي حتى وصفات الطبخ الي هي اصلا مابتفهم فيه ?

اياد…. هههههه ايا رسمي الدوة ؛ متعرفيش اطيبي ولا شن
أية.. يعني حاجات بسيطة
اياد..زي ؟
اية .. دحي مسلوق ..دحي مطبوخ.. دحي محرك… و
اياد.. ههههههههههه طيح سعدك
سمر… ايواا دخيلك هاي الكلمة بدي قولها ع قد ماحاولت احفظها مابتدخل دماغي بقولا مرتين بشرق ????
أية.. ههههههه

وهما ماشيين طلعو من ….وصلو ع اول بوابة لمدخل دمشق

وقفهم واحد ……….. وشاف لجوزاتهم وقال لإياد ينزل

يتبع…….>>>>>

#mera

ان شاء الله تكون عجبتكم ، ونتلاقو في موعدنا بعد غدوة ?✨