رواية “أحمل قلبك .. أينما ذهبت”

صحة فطوركم ? لايك قبل ماتقرو ?

الحلقة السادسة عشر ~ ??

شاهين.. بنتي لو مش قادرة الافضل نكملو يوم تاني

اية.. لااا لا عمي شاهين ، كمل ارجوك ? .. هانستحمل بس كمل ،

شاهين.. تمام ………بلفعل حجز تذاكر ليكم كلكم ع امريكيا ، وتكلم مع عمتك كذا مرة فهمها انه جايين سياحة فقط لاغير ،

وسكت شوية وعقد ايديه ببعض كأنه يفكر في الجملة الجاية كيف يحاول يقولها بطريقة ميتأثرش بيها قدامها ويزيدها ?

ف يوم ، وفي شارعكم …. كانو الشباب منظمين تنظيم حزب المعارضة ، ومحاولة لقلب النظام ولما سمعوا بيهم…… جوهم طول … وصار ضرب ، بجميع انواع الاسلحة ، وبيوت شعلو فيها النار ….. و وسط هدا كله ، واحد استغل الي صاير كتمويه باش يدير الي يبي يديره ، وباش محدش يركز فيه ،

ح نحكيلكم اني شن صار ف ليلتها بعدين نكملكم عمي شاهين شن الي قال لأية بالضبط ، لان كل التفاصيل الي بنحكيها توا مش كلها يعرفها هوا ?

الصادق…. رانييييا ؛ رانيا نوضي ؛ في صوت ضرب قوي برا بري للصغار فيسسع

رانيا ناضت مخلوعه ، ياارب سترك يارب …..

وناضت تجري خشت لدار الصغار بينما الصادق طلع يجري للتليفون واتصل ب امه وبوه ،،، ولقي مفيش رد……. قلبه انقبض وحس ان في شي غلط صاير ؛ شاف للروشن لقي الدنيا شاعلة حريقة برا ……خش جري للدار طلع شنطة وحط فيها اوراقهم المهمة هما والصغار وحط كم حاجة فيها بسرعه

وخش جري لدار الصغار الي كانت رانيا فيها شادة صغارهم ف غمرها وتهدي فيهم ……

الصادق … نوضووو معاي جري …..

وخداهم بسرعه خباهم في مكان آمن بعيد عن كل شي وسكر عليهم وطلع مع رانيا

رانيا وهي تبكي …… علاشش درت هكي ! علاش حبست الصغار هني هايخافو !

الصادق.. قلبي مقبوض يارانيا …..حاس ان في شي بيصير ؛

رانيا بدت تبكي بلقوية ودست راسها ف صدره وخايفة …… وصوت الرزم يتزايد ويقرب …وفي صوت قوي برا يحاول يكسر في باب جنانهم ويحاول يقتحم الحوش

صادق.. رانييا .. رانيا حبيبتي ؛ متبكيش .. شوفيلي هني … شوفيليي رانيا… اني نحبك ، وهانقعد طول عمري نحبك ….. وهانموت واني نحبك ?

رانيا.. معاشش تقول هكي …

صادق.. حبيبتي ارجعي للصغار ، خليك معاهم اكيد مرعوبين توا ومش فاهمين شن صاير ،

رانيا.. لا مش هانمشي هانقعد معاك
صادق.. ياراانيا اسمعي كلامي يهدييك ربي……. يا حبيبتي ……… وكيف بيتكلم كسرو الباب ودخلو للحوش ..

وطول الصادق خلى رانيا ف دارهم وطلع يجري……….. وملحقش يصدهم لانهم كانو اكتر من نفر وانتشرو فلحوش

….. اني قتلك مش ح نسيبك

صادق.. انت شن تبي مني !!!!! خليني ف حالي خلااصص جايني لحوشي شن مزال تبي !! مش درت الي ف راسسك !

…. وين نسخ العقود الي عندك … و وين تسجيل الصوت الي سجلتهولي ،

صادق… ماعندك ماتدير بيه خلاص مش خديت براءة وصار الي صار !! اركح وخليني ف حالي ……..

وفللحظة هيا طلعو رجالته وشادين رانيا ف ايدهم وهي تبكي …….

رانيا.. صادقق اعطيهم مايييبو و راسسك الله يخلييك

…. ههههههه اووه ، معقولة هادي مرتك ؟ والجمال هدا كله ليك بروحك ؟؟

وصادق ماتحملش كلامه وطول خدي المزهرية وحدفها عليه وفللحظة هادي ……….. ضربه واحد من رجالته بطلقة رصاص خلاته يطيح علارزض يزفر في اخر انفاس ليه

رانيا بدت تصييح… صصصصادددددددددققققق … حرررررامممم علييككك علاش درررتت هكييييي حرااامممممم وبدت تبكي وتعيط وتخبط برجلها علارض وهوا جاها بكل برود اعصاب وقالها… تعرفي مكان الي نبيه وين ؟؟؟

رانيا ردت وهي تعيط ومهستره ….هانعطييك كل شييي تبيه بسسس خلي صغار ومتمسسهمش الله يخلييك خليهم ف حالهم تررربححححح……

و فجأة بدت تنزف وحست بوجع رهيب خلاها تطيح علأرض……

…. اييا علينا عاد ؛ وتلفت لرجالته… اقلبولي الحوش فوقاني لوطاني علصغار وصفوهم …….. وهادي جيبوها معانا توا ،

وخدوها بدون اي مقاومة منها وهي حاسة ب الم رهيب وفللحظة هادي طلعو أية وأحمد الزوز ع منظر بوهم ميت علارض وغارق ف وسط دمه وامهم يكرو فيها وهي تنزف وتصيح وتقولهم يهربو ……..

محمد بدون حرف خدي ايد اخته وبدو يجرو ورجالته يجرو وراهم … والجزء الثاني منهم خدو رانيا وركبوها ف سيارتهم……وفجأة فقدت رانيا وعيها …..

ياريس هادي شن بنديرو فيها توا ؟؟

أ.ن……. توا لوحوها ف اي مستشفى قريبة من هني شكلها بتجيب ..ولما تولد هاناخدو العيل نبتزوها بيه باش تقولنا مكان المستندات وين…..وفروخهم الباقيين مالهمش لازمة قلتلهم يصفوهم

وحتى امه وبوه.. خليتهم شعلو حريقة ف حوشهم منبيش ولا فرد من عيلة الصادق بلخير عايش ….وشبح لرانيا….وحتى هادي بعد ماناخدو مانبو منها معاش ليها عوزة

وبلفعل واحد من رجالته قتلو أحمد ? ..

وأية قدرت تهرب منهم ، بس الي كان يجري وراها خاف يقوله انه هيا فلتت منه ، وقالهم ان هوا قتلها …………

نرجعو نشوفو العم شاهين شن حكي لأية ? ….

شاهين… وقت الي صار ليلتها يابنتي استغل الفرصة وصفى بوك ..وانتقم منه ….وقتل خوك معاه…. وللاسف اني كنت مسافر قبل اليوم هدا ندير في عملية ازالة للمرارة في تونس … ولما شفت الوضع فلصبح اول شي درته بعد مارجعت من السفر مشيت لحوشكم …. و سكت شوية ونزلو دموع من عينه ؛ وقال بصوت شبه مبحوح…… ولقيت جثة بوك يابنيتي مطروحة علأرض ؛ وعلى بعد كم متر من حوشكم جثة أحمد خوك….. وانتي وامك ملقيتش ليكم أي اثر

كان الشارع شبه مهجور بعد الي صار فيه امس ،

وسكت شوية لما أية بدت تنهار ومعاش قدرت تتحمل الي تسمع فيه ??

وبدي شاهين يطبطب عليها…… اني مفيش دليل ف ايدي يخليني نثبت أنه .. أ.ن هوا الي قتل بوك … بس اني متأكد ان هوا زي ما اني نشوف فيكم توا ….

دفنتهم جنب بعض في مقبرة *** ، وصلينا عليهم جنازة …. وجدك وحناك لقيناهم محروقين ف شقتهم

وأية ساكته والدموع يصبو منها بدون حرف ، قلبها بدي يغلي اكتر من قبل ….?

وانهارت بلبكي وقعد عمها حاضنها واياد جنبها ولاول مرة حتى هوا حاجة تخلي عينه تدمع من الي يسمع فيه… هوا ومتحملش مابالك هي ???

شاهين.. خلاص يابنتي خلاص.. متقطعيليش قلبي ? متخلينيش نندم اني حكيتلك…. انتي خلاص رجعتيلي وهانعوضك اني ع كل شي انتي فقدتيه… كل السنين الي فاتو انسيهم انتي من اليوم بنتي ، اني وبوك كنا شخص واحد… واني من يوم ورايح مسؤول عليك ليوم الدين وراس وبيك ماتبكي ….

أية بصوت متقطع….. بسس ياعمي هدا حرمني من اهلي وعيشتي وحياتي .. هوا السبب فخرااب بيتنا ………. كنت صغييرة ومانعرف ششي وتبهددلت ياعمي… اني طول ال18 سنه الي عشتهم واني كل يوم نرقد ونحلم ب الي صار معاي … اني ناااار شاعله ف قلبي ياعمي ناااااار … وقعدت تعيط وكل صيحة منها كانت تنزل زي السهم ع قلب إياد وهوا يسمع فيها ومش قادر يديرلها شي ??

وقامت راسها من على كتف شاهين فجأة وقالت… عميي ، تتوقع ماما تكون عايشة !!!!

شاهين.. مشعارف يابنتي بس مدام لقيتك انتي عايشة ف في احتمال حتى هي تكون عايشة ?

وبدي عندها أمل ١%انها تلقى علاقل امها …. بس لو عايشة علاش مدورتش عليها ! هي مش صغيرة ومش هاتريح .. شن الي يخليها لو عايشة متدورش علي بنتها ، شن الي صاير فيها ??

وقعدت ساكته وشوية تسرح وشوية تبكي…

شاهين.. شاف لإياد… ابني من اليوم اية بتقعد معاي فلحوش هني.. هدا حوشها …

إياد.. اكيد عمي هدا حقك …

وقعدت أية ساكته وحاطة راسها علكنبة وتفكر ودموعها جفو ع خدها…واخيرا لقت الإجابات الي تدور فيهم ؛ بس هلإجابات زادوها تعب و وجع اكتر من الي كانت حاسة بيه ?

وخداها النوم وإياد استأذن لانه مكانش يقدر يقعد اكتر من هكي… وقال انه هايولي ف الليل باش يعطي لأية شنطتها وحوايجها ويتطمن عليها……

وبلفعل مشي وساق بسيارته وهوا سارح لين فات زنقتهم وملقاش روحه الا قدام البحر ؛ حط ايده ع راسه بعد ماكان قريب يتفجر من الصداع …ويفكر ف أية كيف هاتقدر تتحمل وتتأقلم بعد الكلام الي هي سمعاته ? ..

وروح للحوش ومباش يتكلم مع حد وخش للدار الي كانت فيها هيا … وحط راسه علمخدة وشم ريحتها ورقد……….

توا أكيد كلكم تتسائلوا وين سارة مختفية من الاحداث ? هانحكيلكم ملخص لحد مانرجعولها

لما عرضت عليها سهيلة يهربوا فلاول كانت معارضة الفكرة بس بعد اصرار ام طلال انها تتزوج عبد المنعم بدت تفكر فلموضوع بجدية ويفكرو هيا وسهيلة كيف بيديرو وامتى هايهربوا……. وتساير في ام طلال باش متشكش فيها

ابو طلال.. كيفها أية في التدريبات العسكرية ؟
ام طلال.. بلغني المدرب انه مستواها ماهر جداً ومتفوق ،
ابو طلال.. جميل جدا ، وشن ردها على موضوع الزواج … من ابو منعم ؟
أم طلال..وافقت مبدئياً ؛ لاتخاف من ناحية هذا الموضوع هاتتزوجه بلغصب عليها
ابو طلال..اوعك تكون خدت علم انه متزوج ٣ تانيات عليها ؟
أم طلال .. لا طبعاً ؛ ماتدري بهذا الموضوع … وهدا حقه الشرعي ليس ليها أن تعترض ،
ابو طلال.. بزواج سارة من ابو منعم هانستفيدو من الموضوع هدا لصالحنا ف ارض الخلافة .. هانكونو عززنا العلاقات بينا وبينه .. منعم قائد مهم وأمير قوي في أرض الخلافة وهايجي ف صفنا ويقوينا ويدعمنا بعد الزيجة هادي ..
أم طلال.. اسأل الله ان يجعله خيراً

عند سارة >>>

بعد ماتعلمت حمل السلاح بدت ترتاح وتلاقي فيه طريقة مناسبة تطلع بيها الطاقة السلبية منها ..وبدت من امهر الراميات في فترة قصيرة جداً

هانرجعولها تاني بس فلوقت المناسب ?

فلليل ، جي إياد لحوش شاهين تاني باش يعطي اية حوايجها وحاجتها ، و لما جي لقاها فلدار ومش طايقة تتكلم مع حد ومسكرة عليها …ومحبش يضايقها …..خلالها حاجتها وروح وعرف ان هيا محتاجة وقت تقعد فيه بروحها ….

تاني يوم ناضت الصبح ، وطلعت وقعمزت قدام عمها بكل هدوء وقتله ان هيا تبي تمشي تزور قبر بوها .. و وافق ومشي رفعها

و اول ماوصلو…… قبل لاينزلو من السيارة ؛

شاهين.. بنتي .. توعديني تتماسكي ؟
أية بوجه جاف ؛ نوعدك

ونزلت ونزل معاها و وقفت قدام قبر بوها وتتلمس فيه ومقدرتش تمنع روحها من ان دموعها ينزلو ، بس حاولت تتماسك قدام عمها……

شاهين.. بنتي انتي كويسة ؟
اية.. اي 
شاهين.. به هيا نمشو ،
اية.. عمي شاهين ….ممكن تستناني فلسيارة شوية ؟ حابة نقرا الفاتحة على روحهم
شاهين .. سكت شوية ورد بتردد ؛ براحتك …..

وركب للسيارة يستنى فيها ورن تليفونه…….

الو ، اهلين اياد ولدي…شاهين
إياد.. اهلين عمي كيف حالك
شاهين.. بخير الحمدلله ف نعمة
اياد..واية كيف حالها ؟ نكلم فيها على موبايلها متردش انشغلت لايكون صارلها حاجة ،
شاهين.. حني فلجبانه توا ….قتلي تبي تمشي تزور خوها وبوها وتقرا الفاتحة على روحهم
اياد……اه ؛ به هيا جنبك توا ؟
شاهين.. لالا اني فلسيارة نستنى فيها ، هيا واقفة غـ ….. وسكت قبل مايكلم كلمته ونزل يجري من السيارة
اياد.. عمي شن في !!! خيرك سكتت ؟؟؟؟؟

شاهين… اييية مشعارف وين مشت توا كانت واقفة هني !!!!!
اياد…. شششنو !!!!!! زيد دور عليها ترا شوفها بالك اغمى عليها ولا حاجة !!

ومشي شاهين زي المجنون يدور ويصيح بين المقابر ومفيش رد………

واياد مخطرش ف باله الا مكان واحد مش هاتكون متجهة الا ليه….

اياد…عميي شاهين ، سكر توا اني عرفت وين نلقاها خلي نلحق عليها

شاهين وهوا يبكي… به بسرعه تربح ياوليدي لحق عليها……..

وسكر التليفون وطاح ع ركابه وقعد يخبط ف راسه…. سامحني ياوخي ياريتني ماحكيتلها سامحني يا غالي… وقعد حاط راسه ع تربة بو اية ويدعي ميكونش الي ف باله صار….و ان اية مشت تدور في الي قتل بوها ??

بينما اياد طلع من الحوش زي الطلقة منغير مايكلم حد وامه تجري ف جرته للقراج تبي تعرف شن في ومردش عليها و ولع السيارة ومشي يجري……………

أما أية ، ف بعد ماخلت عمها شاهين مشي هربت تجري منغير علمه وخدت تاكسي وطلعت…….

وكانو عيونها حمر وماتشوف في شي قدامها غير شي واحد…… تاخد حق بوها ??

السواق … وين تبي تمشي يا أنسة ؟
أية… تعرف ا.ن ؟
السواق.. اكيد طبعا
اية.. نبيك ترفعني لوين ماموجود
السواق.. هوا مش بعيد هلبا ع هني بس حضرتك لاش تبي تمشيله ؟ هدا سياسي ورجل اعمال معروف واكيد الناس عليه بلمواعيد قبل

فنصت فيه اية وعيونها حمر وعروق جبينها بارزات وقتله ارفعني ومدخلكش !!!!

ورفعها وين ماتبي وحاسباته ونزلت ……..

وقفت قدام الفيلا متاعه … منزل فخم والحرس من برا عليه والكلاب البوليسية ..وكاميرات المراقبة ف كل مكان…. ارضية رخام تشوفي انعكاس وجهك فيها ونافورات باينه من ورا البوابة الحديدة العالية الي هوا مدايرها … وجنان اخضر كبير بلأمتار…..

ضحكت أية ف سرها وقالت.. فلوس الشعب! وربي لما ناخد حق بوي وكل نفر ب ايدي يا **** الكلب … ومشت بخطى ثابتة نحو البوابة و وقفها متع الامن ،

الامن.. اووقفي ياماما هييي ! وين خاشة من تبي !!!!
اية.. نبي نقابل أ.ن
الامن.. عندك موعد !!
أية.. لاء بسس قوله بنت ،،، وكيف بتتكلم جي حد من وراها وجبد ايدها بلقوة بعد مالحق عليها ف اخرررر لحظة…..

اية.. اياد !!

اياد بتعصيب ….. انتييي شت ديري هني !!!!

اية ……. خليينيي يا ايااد … خليني نخش لهاا ال */@&@ ونقتتتله ب ايدي هانقتتتتتتله و……. سكرلها فمها ب ايده…….

اياد بصوت واطي وعيونه كلها خوف ….اية اهدي.. اسكتي وراسك هايقتلوك لو عرفوك مني اهدي ورحمة بوك

وهي تحاول تفك ف ايده منها وهوا ضاغط عليها ولما شاف حواليه لكاميرات المراقبة والامن يشبحوله خداها بلغصب وحطها فسط السيارة وسكر عليها بلمفتاح….ورجعلهم

اياد.. سامحونا غير المدام شوية ؛ ودارلهم ع راسه متع مجنونه او غير متزنة عقلياً وهكي

الامن.. به خود مرتك واقلب وجهك انت وياها وشدها فلحوش مش طالقهالنا فالشارع ………
اياد.. حاضر ؛ ونتأسف مرة تانية …..

وركب للسيارة وساق من غير حرف وايه طول الطريق ساكته وتبكي منغير صوت…. ودرس في مكان زي جردينه بس مفيشي ناس…..ونزل من السيارة وقعمز علارض وشد راسه من الالم

ونزلت هيا وراه وتبكي وحطت ايدها ع كتفه …….. اياد اني اسفة

وناض اياد و وجهه احمر وصيح عليها….. انتي كييييف تديري هكككي يا اييييية فهميني !!!! كيف تتصرفي هكي انتي هاااه !! مش متخيييلة انتي لو عرف بيك قاعدة عايشششة شن هاييييديرلك !!! هاييييقتتتتلك يا اية هايقتتتتتلك ….

اية نهارت وطاحت علارض …..

واياد مسح وجهه لانه انفعل زيادة عليها……. ونقص نبرة صوته وطبسلها…. يا اية معاش تتصرفي هكي مرة تانية ارجوك.. متعرفيش شاهين شن صار فيه مبكري وقت الي لقاك اختفيتي قريب نجلط الرجل…هدا اخر حد قعدلك فلدنيا حافظي عليه معاش ديري فيه هكي تاني…انتي وعدتيه ماتديري شي هوا حكالك بس لان من حقك تعرفي مش باش تخاطري بحياتك بالشكل هوا

وردت اية بصوت منهار ومتقطع…….. بسس …بابا يا اياد…. بابا ….وبدت تبكي زي العيل الصغير واياد طول خداها ف حضنه وقعد يمسح على شعرها……..

اياد…اهدي يا اية ؛ اهدي حبيبتي …..

وقامت راسها طول وشبحتله…..
وهوا قال… ههههه اي ؛ حبيبتي …. ترا قولي ماتحبينيش واكدبي توا ههههه

وابتسمت ابتسامة خفيفة …ومسحلها دموعها ب ايده…

اياد.. انسي الماضي خلاص ؛ اهو عرفتي كل الاجابات الي انتي تبيها… توا اطويه ع جنب..وابدي صفحة جديدة…. صفحة كلها سعادة وفرح وحب … انسي اوجاعك….وتعالي نبدو مع بعض من الاول ، ياسرك بكي ودموع .. هادي العيون الي سحرتلي قلبي بالله لاتبكيها ….

أية.. مسحت دموعها وردت بصوت مبحوح.. اياد…. خليك ديما جنبي….. متبعدش عليا اني…..”مع دمعه دافية نزلت ع كف ايده ” ..اني نحبك

واياد ضحك طول وضمها ليه…واني اكتر  نوعدك انه عمري ماهانخليك ولانبعد عليك …. انتي بس ارمي الماضي ورا ضهرك ، اتفقنا ؟
اية.. ههههه اتفقنا 

اياد.. هيا نرجعو لعمك الغلبان الي قالب الدنيا عياط عليك ؟
اية.. متقولاش اياد والنبي ؛ هايزعل مني
اياد.. مش ح نقوله… هانقوله لقيتها فلغذائية الي جنب المقبرة تاخد في مية هههه هكي تمام ؟
اية.. ههه هوا مش هايصدق بس تمام ،

وشدو ف ايد بعض ورجعها للحوش والي كان شاهين بيموت من الرعب عليها …. وقاله زي ماقالها بس هوا مصدقاش بس مشاها ههههه ومع الليل 

جو ناس لحوش عمي شاهين في زيارة غير متوقعة  …وكانو اهل اياد ….. امه وخوته البنات

واستقبلتهم مرت شاهين وبنتها كانت كيف جاية وقت الي عرفت بوجود اية اصرت تجي ….

سمية… تفضلو تفضلو البيت بيتكم….

وأية طلعت مستغربة لما لقت امه وخوته البنات بس سلمت عليهم وفرحت بوجودهم هلبا……

سمية..انستونا انستونا …. شن تحبو تشربو ؟
ام إياد… ههههه عايزين نشرب شربات…..

وشبحت سمية لأية واية شبحت لبنتها ميس مستغربين ?

ام اياد.. بصراحة وبدون مقدمات…… حني جايين نطلبو ايد بنتكم أية ؛ لولدي إياد على سنه الله ورسوله 

وطول أية جري الدم في وجهها ومعاش عرفت تضحك ولا تبكي وتحشمت هلببا وناضت قتلهم… اني ح نديرلكم قهوة ❤….وخشت تجري للمطبخ مش مصدقة روحها

وتبعتها ميس الي كانت مش اقل فرحة منها ❤❤❤

ميس.. هههههههه والله الحلووو كبر وبقينا عراايسسس

وأية ضحكت وحست بشعور عمرها ماحست بيه في حياتها…. متوقعتش ف يوم انه لما تنخطب زي اي بنت بشكل تقليدي …طول عمرها تفكر ف اليوم هوا كيف بتكون فيه بروحها ❤ محدش من عيلتها يشاركها فرحتها ❤ متحسش زي شعور اي بنت وتلقى من يفرحولها ❤ … وربي عوضها بعمها شاهين بعد كل السنين هادي وحوشه باش تأنس بيه وبعيلته وتحس كأنها وسط اهلها وناسها ❤ وراجل يحبها ويعطيها فرصة تكون حياة جديدة وتنسى ماضيها معاه ❤… بس هل الحياة هاتوقف في صف أية ..وتكون هادي نهاية دموعها واحزانها ومشاكلها ❤ هانعرفو فلحلقات الجاية ❤…

بس مشهد اخير قبل لانختمو الحلقة ❤

من ورا مكتبه الفخم كان يقرا في جريدة وجابتله الخدامة فنجال قهوته… سمع صوت صياح قوي جاي من برا وحد يكرر في جملة “بنقتله” خلاه يغير تلفزيونه الي كان محطوط ع محطة الاخبار على كاميرات المراقبة قدام البوابة متاعه ……

وقعد يتابع في رجال الامن وهما يبعدو في البنت الغريبة هادي عن بوابة حوشه …وقعد يفكر من هادي وشن تبي منه ؟……و دار ايقاف للكاميرا ودار تكبير على صورة البنت هادي ……… وكمية الشبه الرهيب الي بينها وبين امها….. مصعبش عليه موضوع انه يتعرف عليها طول مني !!… بس قعد لوهله مركز فلصورة ويكدب في عينه…..

وطفى الدخان ولوح فنجال القهوة بتعصيب…. معقولة !!!!!!!!!!

يتبع…………..>>>>>>

#Mera ✨

بتبدا تولع ره.. قيت ريدي ? .. شن رايكم بيصير فلحلقات الجاية ?

error: