رواية “أحمل قلبك .. أينما ذهبت”
قبل لاتقرو بنفكركم إن الرواية بكل أحداثها وشخصياتها خيالية ولاتمت للواقع بصلة ? تمام ؟ هي متابعة ممتعة ?? وصحيحة شربتكم ?
~~~~~~~~~~~~~~~~~~~~~~~~~~
الحلقة الحادية عشر ~ ??
واول مافتح الدار لقي ايما مقعمزة علسرير وعيونها مفخات من البكي
محمد.. خيييرك !!!!
ايما ……… لا شئ ، انا بخير.. اشعر فقط بلإرهاق
محمد.. لماذا هل انتي مريضة ؟
ايما.. نعم
محمد.. حسناً إنهضي لأصطحبك إلى الطبيب حالاً
إيما.. لالاا تزعج نفسك ، انه شيئ طبيعي
وفهم محمد قصدها بس حس ان في حاجة تانية…….. حبيبتي ، اخبريني ماذا حدث ؟
وانهارت ايما بلبكاء…. وقالت …. انا اتفهم انه لكم عادات وتقاليد خاصة بكم في دينكم الإسلامي ، انا احبك وقطعت لك وعداً كي أصبر معك ولكني لن أسمح بأن تتم إهانتي بهذا الشكل … أريد ان اعود الى بلدي وعائلتي .. ارجوك
محمد.. اخبريني فقط ماذا حدث !؟
إيما بتردد… لقد كانو يودون التأكد من انني …. عذراء ، ولم يمسسني شخص من قبل ، “وبدت تبكي” .. كما قلت لك اني اتفهم عاداتكم ومن حقهم معرفة ذلك ولكني شعرت بلإحراج والإهانه كان بإمكانهم سؤالي مباشرتاً ولن أتوانى لحظة عن إجابتهم ولكن ليس بلطريقة المحرجة تلك ……انا لست عاهرة ليفعلوا بي هذا ?
ومحمد عروق إيده بدو قريب يطربقو وناض يجري لاخته امل………….
محمد…. هدااااا غييييير قتلك البنت ف امانتك وضيفة عندكك هكييي تديري فيها !!!!!! شن دارتلك الللهم الازقح حرام علييك ترضيها ف نفسسك انتي هادي ! وليية زيك زيها ترضييها ف نفسسك ردي ها !!!! ……… اصلا الكلام مش معاككك اقلبي وجهك من عليييا توا …..ايييما ، ايييما …..
وجت تجري طلعت من الدار…….
محمد….لمي حوايجك شششوية وبنخطم علييك بنحجزلك ف فندق مش هاتقعدي هني دقيقة زيادة ……. وايما هزت راسها وخشت تدير زي ماقالها….. وتبكي لان مكانتش تبي انها توصل بين محمد وعيلته للدرجة هادي بسببها وحست انه هيا هاتكون سبب ف تفكيكهم ? …
بعد مامشي محمد قعدت امل وأنبها ضميرها لان هي فعلا مرا زيها والمفروض الي مترضاشي ف روحها متراضشي ف بنات الناس حتى لو منغير ديانة فلأخر هي بنت زيها …..وفنفس الوقت زعلت لان زعل محمد خوها منها ? بس شن بدير كان لازم تسمع كلام امها
وخبطت علباب خشت لقت ايما تلم ف حاجتها……
إيما بابتسامة.. تفضلي بالدخول ? ..
أمل.. شكراً ؛ كنت اود ان ……
وقاطعتها ايما…… لقد اشتريت لكم هدايا خصيصاً في سفرتي للاس فيغاس بامريكا ، ولكن لم تسمح لي الظروف بأن أعطيها لكم… تفضلي ? ..”وعطتها قفطان سمبل بسيط كانت واخدتهولها” …. لقد أخبرني محمد بمقاسك اتمنى ان يعجبك، واخبرني أيضاً عن كل فردٍ فلعائلة ما الذي يحب ويكره ، فقد كان كثير الكلام عنكم …. وأنا كنت احفظ لكي اشتري هدايا تليق بكم..
وعطتها ساكو زهري متع اديداس … الساكو بروحه متكلف ?.. وقتله هادم فيه هدايا للكل كل واحد عنده شكارة مكتوب عليها إسمه…
إيما.. كنت اتمنى أن أعطيها لهم بنفسي ، ولكن يمكنك فعل هذا بالنيابة عني ? ..
وأمل زاد شعورها بالذنب بعد مالقتها باللطافة والأدب هما وحست بروحها غلطت هلبا ف حقها.. وفلاخير هي عارفة محمد خوها …مش هايختار أي بنت وخلاص ?
وتأسفتلها امل الي داراته وقتلها أن هيا مرحبة بيها في عيلتهم ? … لانها طيبة فلاخير وقلبها أبيض ……وايما ماصدقت وطول ارتسمت ضحكة ع وجها وحضنو بعض…..
وقتلها أمل … ستحبك أمي حتماً ؛ ليس عليك إلا بالصبر …
إيما.. ههه أتمنى ذلك ?
~~~~~~~~~~~~~~~~~~~~~~~
نمشو لمكان تاني >>
《 سارة 》
لقد مضى عام على وجودك بيننا يا ابنتي… بماذا تشعرين ؟
سارة.. مشعارفة كيف نوصف شعوري ياشيخ ابو طلال …. بس أكيد احسن من الحال الي كنت فيه..
ابو طلال.. انتي كبرتي يا ابنتي وبلغتي سن الرشد “18 عام ” وانتي من الفتيات الي أنعم الله عليهم بالجمال الخلاب.. وهذا الجمال يجب أن يُصان بزوج صالح وتقي يخاف الله فيك ويعاملك معاملة حسنة ….وتكوني أسرة وتعيشي بينها … لقد كنتي من خيرة البنات الي اشتغلوا معنا فلدولة الإسلامية .. حتى لو كان دورك بسيط بس اجرك عند الله كبير … وكما أن أم سياف ” المسؤولة عن شؤون المطبخ ” تشكر فيك وانك من أمهر الطباخات الي اشتغلوا معنا… بس اكيد مش هاتقعدي فلمطبخ عمرك كله ولا ؟
سارة.. اكيد
ابو طلال .. الله يبارك فيك يابنتي ، بمناسبة بلوغك ال18 هايتم تعليمك حمل السلاح ..وكيفية الرماية وهاتنضمي للتدريبات العسكرية الخاصة بنساء الدولة الإسلامية…..
سارة .. الي تشوفه مناسب انا فيه شيخ ابو طلال …..
ابو طلال .. الله يفتح عليك ، تقدري تنصرفي واني هانتناقش مع أم طلال بخصوص الزوج المناسب لك وبخصوص تدريباتك العسكرية وتجنيدك رسمياً ضمن صفوف الدولة الإسلامية “داعش” ….
سارة .. بس ياشيخ ، اني حاسة ان فكرة الزواج مزال بكري عليها… منحسش ف روحي مستعدة ليها
أبو طلال … يابنتي عن أبي هريرة قال قال : رسول الله صلى الله عليه وسلم : إذا أتاكم من ترضون خلقه ودينه فزوجوه إلا تفعلوا تكن فتنة في الأرض وفساد عريض….. ولا تبي تكفري وتعصي الله سبحانه وتعالى ؟
سارة بحزن..حاضر.. الي تشوفه مناسب ليا
أبو طلال .. تقدري تنصرفي لغرفتك……
ومشت سارة لحد غرفتها……خلعت خمارها وطرحاته علفراش ، وقعدت تشوف حواليها… معقولة ليا سنه هني ، قداش مالوقت يجري ! زعما ميمة خيرية شن صاير فيها ?….واسمهان خيرني معاش سمعت عليها حاجة من يوم الي جينا …..
اكيد تبو تعرفو شن صار بعد ماسارة هربت من حوش اهلها ? وباش ترتبط الاحداث ببعضها هانحكيلكم ،،
سارة زي ماقلتلكم كانت عايشة عيشة من أسوء مايكون وسط الي يسموا في نفسهم أهلها ، ومش هانعاود نحكيلكم ونصدعلكم راسكم …..
بس زي ماتعرفوا ان سارة كان المتنفس الوحيد ليها هيا حوش خيرية …وكانت لما تمشي مرات تبدا جارتهم أسمهان عندها تهدرز ……
أسمهان مرا عمرها حوالي 35 عام… مطلقة ومعندهاش أطفال.. راجلها كان عقيم وميجيبش ؛ وفوقها كان معيشها في ظلم وإهانه كأنه هيا السبب في الي هوا فيه…ويقولها انتي نحستيني !….. تحملت اسمهان لحبها ليه فترة بعدين معاش قدرت تتحمل ، وتطلقت وهوا تزوج وحدة تانية وسافر برا البلاد وهي قعدت بروحها فلحوش…. وقعدت تعاني وسط مجتمع مش راحمها بالكلام عليها ..والي كانت تسمع فيه بودانها ،
” شفتو مفلحها ! راجلها ميجيبش ناضت طلبت الطلاق ! بدل ماتقعد معاه وتتحمل وفوقها قعدت هيا فلحوش !.. توا مرا عايشة ف حوش طويل عريض بروحها شن تدير فيه !! وعلاش ممشتش تعيش مع اهلها ! ..”
وهلبا كلام انتم عارفينه من مجتمعنا وتفكيرهم…. لحد ماكرهت نفسها والساعه والدقيقة الي تطلقت فيها ?…..من غير زملاءها فلعمل الي كان يحسابوها مطلقة وعايشة بروحها ف دماغهم يمشي لأماكن بعيدة … ومحاولات للتقرب منها من شباب عازبين وحتى متزوجين !.. وبصغارهم فوقها !!
كرهت كونها مطلقة…وكرهت تفكير عامة الناس فيها… هي اطلقت باش ترتاح والي داراته حلال مش حرام …. وربي مقالش تحملو فوق طاقتكم ومقالش تحملوا الظلم والاهانه.. بس لما تطلقت زاد تعبها اكتر…بسبب المجتمع وتفكيره ? ….
والي كانت تعرف بكل قصصها وحكايتها هادي.. خيرية ؛ وسارة …. في كل تقعميزة تبدا كل وحدة فيهم تشكي بهمها وخيرية كانت مستمعة ليهم ، لحد مافي يوم بعد ماكانت تحكي لخيرية وتبكي…ناضت خيرية باش تجيبلها طاسة مية تهدى بيها…. وقعدت سارة واسمهان بروحهم ..
سارة.. صدق الي قال الي يشوف هم الناس يهون عليه همه ?
اسمهان.. لا متقولييش هكي ياسارة.. اني كنت نصبر في روحي بلكلمة هادي ! وشوفي حالي لوين وصل! … كنت ديما واني معاه نقول عادي ونفس كلمتك هادي … وتوا معتقدش في حد يتمنى يكون مكاني ??… وبدت تبكي
سارة.. باهي هدي روحك … شن بديري توا ؟
وشبحت اسمهان بعيونها يمين ويسار تتأكد ان مفيش حد سامعهم وأن خيرية مزال مجتش …
وقتلها… نعرف وحدة معاي ملتزمة وسلفية ؛ وقتلي على فكرة…….
سارة.. شن هي ؟
اسمهان… ننضموا للدولة الاسلامية
سارة ..وشن هي هادي الدولة الاسلامية ؟
اسمهان.. داعش .. تنظيم دول الشام والعراق… هادي دولة إسلامية دارو فيها كل قيم الاسلام ، يعاملوا فلمرأة باحترام .. وليها كيانها … بدل الانحلال الاخلاقي الي حني فيه توا مفيش غادي …. بس هيا توا من تحت لتحت مفيش هلبا سمعو بيها … وهي عندها زوجها يخدم غادي ويتنقل ديما…. ع حسب ماقتلي هيا
سارة.. اول مرة نسمع بيهم … امتى تأسست هادي ؟
اسمهان.. هيا من قبل موجودة فلعراق وسوريا وإيران ودول غيرها… يتبع منهج السلفية الجهادية ويبو يرجعو الخلافة الإسلامية زي قبل بتطبيق الشريعة … تأسسو بداية ال2003 بعد ما أطاحو بلقاعدة
سارة.. الله قصدك زي ايامات الرسول والخلفاء الراشدين والجو هوا ..
اسمهان .. هكي قتلي اي ، يعني هانعيشو في امان وبما يرضي الله ومحدش حايقدر يدوسلنا على طرف.. محدش فيهم عنده الفكر الجاهل هوا …. شن رأيك ؟ تمشي معاي ؟
سارة.. بس اني خايفة ؛ اني 17 سنه بس كيف بنمشي ونهرب ؟
اسمهان… متخافيش هاتبدي معاي …. مش هانخليك ..وشن الي بيخوفك ! هني المجتمع الي عايشين فيه هدا الي تخافي منه ! مش غادي ناس كلهم قال الله وقال الرسول والإيمان غاشي قلوبهم ومش هايوصل حد فيك بولا ربع حرف..والشياطين الي انتي عايشة معاهم هادم مش هايكونو خير منهم….. فكري فلموضوع وردي عليا فلليل بنمشو، كأنها خيرية عطلت ؟
سارة.. نسمع فيها تتكلم فلتليفون ، شكله حد من بناويتها حنو عليها واتصلوا … بس لو مشيت معاك شن هايصير فيها ??
اسمهان.. حتى اني نفكر فيها ? .. بس حتى حني حياتنا بدت صعبة ومعاش عندنا خيار تاني ……
ومع المغرب روحت سارة لحوشها وكلام اسمهان ينخر في دماغها ، وبينما هي قاعدة وسرحانه يجي من يخبطها ع ضهرها …
سميرة.. مش قتلكك معاش تمشي للي ماتتسمى خيرية هادي !!!! قداش مرة بنبهك ونقعد نججري ف جرتكك اني ! قتلك من المحل للحوش ومعاش تقعدي عند حد ولا !!
سارة.. كانت مريضة وحبيت نطمن عليها بس ؛
سميرة.. تمدلها كف ، مليون مرة نقولك معاش تردي عليا الدوة ! عطكك قصة ف رجلييك.. بري حضري العششي لبوك امشششي …وبدلي لاختك حوايجها
ومشت سارة ودمعتها ف عينها دارت العشي وحطاته قدام عبد الحميد
سارة.. بابا
عبد الحميد وهوا ياكل… نعم
سارة.. كنت نبي ……
عبد الحميد… شن تبي ؟
سارة.. فلوس ، ناقصتني شوية حاجات
وكمل ماكلة ولا كأن قالت حاجة
وخشت دارها وسكرت ع روحها ورقدت ودموعها ع خدها ?…. وقاعد كلام اسمهان يرن في ودنها …
ومع الساعه 3 فلليل شبحت مقبض باب دارها حد يحاول يفتح فيه من برا ? …. شوية ومشي لان هيا دارت قفل ليها من داخل باش معاش حد يقدر يفتح عليها الباب وهي راقدة …..وشهقت بلبكي وتمنت انها قعدت فلميتم بدل الهم الي هي فيه توا ? …….
وناضت من علسرير … خدت ورقة وقلم وكتبت فيها رسالتين… رسالة لخيرية… ورسالة لريهام ،
وخدت شنطة ولمت فيها كل حوايجها ولبست عبايتها و وشاحها وفتحت الباب بشوية وطلعت تجري لحوش اسمهان…وفي طريقها خلت الظرف الي فيه رسالتين لخيرية وريهام تحت عتبتة الباب…. لانها عارفة ان خيرية تقدر توصل رسالتها لريهام في الملجأ لان هي الي ديما كانت تساعد فيهم يتراسلو بالسر ….. عندها حد تبعت فيه لطرابلس ع خاطرهم مخصوص …
اسمهان.. جيتي ! خشي خشي ….
وخشت سارة وهي قاعدة مترردة الي تدير فيه ، بس مش هايكون أسوء من الي هي فيه……..
و تاني يوم الفجر جتهم المرا وراجلها ورفعوهم ………..
وفاقت سارة من سرحانها على صوت الباب يخبط ….. لبست خمارها وفتحت الباب ، لقتها زميلتها سهيلة … الي تساعد فيها فلمطبخ …..
ح نحكيلكم باقي الي صار مع سارة لحد ماوصلت هني بس خلونا قبل نمشو نشوفو أية وإياد شوية شن صاير فيهم ?
كانو مقعمزين يشربو في قهوة العشية مع عيلة سمر ?
ومع الدوة حكولهم سمر واية واياد الي صار معاهم عند بوابة مدخل دمشق ،
جدهم… هههههه بس عنجد هيك ، طلعتي مو قليلة يا بنت
أية..هههههه ?
سمر.. بس الي استغربتو وقت عرف ان اية معها الجنسية الأمريكية كان رح يفرشلها الارض ورد .. صار كتير يرجف …..
إياد.. شي طبيعي
سمر.. ليش مافهمت ؟
جدها.. يابنتي لو في كلمة بهاد العالم ممكن تهزو من الخوف ؛ ف هيا امريكا ، الكل بيحسب حسابها وهي الي بتحرك العالم كلو بس من تحت الطاولة
سمر.. كيف من تحت الطاولة جدو ؟ ليش هما مسوين ؟
جدها .. ره احكيلك قصة قصيرة ؛ ماسألتوا حالكم ليش مافي اي حدا من الدول العربية عمل موقف للعراق ؟ …… في دول عربية بلخفاء عم تدعم امريكيا ……
سمر.. ششو ! بس كييف هييك كيف بيدعمو دولة اجنيية في احتلال دولة عربية ماكلنا عرب !
إياد..في الي بدو يضحو بحساب العروبة الي بينهم على خاطر مصالح تانية.. وع خاطر زي ماقال جدك ، امريكا من اقوى دول العالم والكل يبيلها غير الرضى ترضى….
جدها… بتعرفو شي ، نائب رئيس الجمهورية بلعراق مرة اتهم اتهام مباشر بدعم بعض الدول العربية الولايات المتحدة لغزوها للعراق بالسر …وانها عم تعطي معلومات مخابراتية للمخابرات الامريكية مشان تضرب مواقع محددة بلعراق ….. وهاد الاتهام خلى كتير عالم يشكو بموقف كل الدول العربية من الحرب هونيك …. مافي جواب نهائي ي إيه .. ي لا بخصوص هدا الموضوع ، بس فيكم تسألو حالكم ليش قناة السويس عم تفتح ممراتها المائية مشان تعبر منها حاملات الطائرات ؟…….. عندكم الكويت متلاً ، ماحدا بينكر انها واقفة بصف التحالف الاميركي البريطاني بوجه العراق …. واستقبلت الكويت قواتهم ع اراضيها واعطتهم كل التسهيلات لغزو العراق ……..ولما رفض البرلمان التركي استقبال قواتهم طلعت الكويت ورحبت بيهم ع اراضيهم …… بس الكويت شو قالت ؟ لما هاجموها بلاعلام ان هي ماسوت هيك لمشاكل مع الشعب العراقي وانما مع النظام الي كان ماسكو وقتها صدام حسين ومع حزب البعث الحاكم … مع إن الاعلام الكويتي بيشارك بكل ما اوتي من قوة مشان يضعفو معنويات العراقيين وبيدعمو امريكا قال شو مشان يقيمو نظام ديموقراطي وان امريكا مو طامعة بثروات العراق ……
سمر.. ولك شو هاد معقولة مابيخافو ربي ???? كيييف عربي بيوقف ضد عربي مثلو معقول هييك ! …..
أية…بس فلاخر اعدموه صدام حسين وتوا معتقدش ان الوضع احسن فلعراق !
إياد.. الصليبيين من يومهم حاقدين علدين الاسلامي…. جورش بوش اعتبر ان اعدام صدام حسين انجاز كبير ليهم وهدا هايقود العراق نحو الديموقراطية ….. اعدموه فجر عيد الاضحى ، وهدا أكبر استهانة واستهزاء بينا كمسلمين..لان هدا المفروض عيد اسلامي لينا وحرم فيه الدم .. والعراقيين وقتها احتفلو بكل بلاهة وعاشو فلاحلام الوردية الي رسمتهم ليهم الولايات المتحدة…… مفيش حد مقدرش ينكر شجاعه صدام حسين وهوا متجه نحو حبل المشنقة…..
والصغار كانو مستمعين ليهم …
فهد…. طيب جدو ليش اعدموه صدام حسين ؟
جدهم…اعدمو يابني لانه هاجم الاسرائليين … والي مارح ترضى بعدها ب اقل من حبل المشنقة .. وليك صار الي صار وصارت العراق اسوء من ذي قبل
سندس.. طيب جدو لاكان ليش احتفلوا بموتو هاد مو شي منيح مو الاسرائليين مو مناح والي عملو ماكان غلط !
حيدر… هههههههه ليك حتى المفاعيص هادول صار بدون يعرفو كل شي… هاي مواضيع كتير كبيرة عليكم يا امي … وشاف لإياد.. البلد الوحيدة الي اعلنت الحداد ٣ ايام ع مقتل صدام هي ليبيا
أية.. ايه قريت عليه الموضوع هدا ؛ بس الي مستغرباته كيف حني اغبياء بلدرجة هادي ؟ كيف يحركو فينا ع مزاجهم ويخلونا ناكلو وننهشو في بعض … توا في عيد الميلاد في الغرب ممنوع تنفيذ اي احكام اعدام في اليوم هدا بالذات بس الي داره واضح كان استخفاف بينا وبالمسلمين !
جدهم .. وهاد هوا بيت القصيد يابنتي ، ان نحنا العرب وللاسف ؛ اغبياء …… احنا عم نتخانق في مابينا والعدو عم ينهش ظهورنا ….. بدل مانصف بصف واحد كلنا ضدهم ما رح يكون هاد وضعنا بلوطن العربي… نحن للاسف اضعف دول في التعليم وفي الصحة والاقتصاد ، ونحنا مابنشكل ربع العالم ومع هيك بنظل اغبياء ….. هلأ الوطن العربي عم بيفرقع واحد ورا التاني ورا التالت ورا الرابع… كلهم رح يدخلو ع مجازر كتير كبيرة .. بس لو بيوقفو مع بعض ويكونو إيد وحدة ومابيخلو حدا يتدخل فيهم وفي شؤونهم …… الي مابيدافع ع ارضو .. مابيستاهل يعيش فيها … مابيستاهل ياكل من خيرها.. مابيستاهل يتنفس بيها… القتال مو بالدم ، بإنهم مايسكتو علظلم.. مايبطلوا يطالبو بحقهم ..وحق غيرهم …. ماينسو انهم عرب ..وكلنا مهما كانت ديانتنا عرب ، والعروبة كتير غالية..والدم كتير غالي…. الشباب عم يموتو هلأ ورح يضلو يموتو..ورح تضل اراضي بلادهم ترتوي بدمهم…..مايسكتو علنُظم الفاسدة …….. لازم يبطلو يتخانقو فيما بينهم… ويعرفو من عدوهم الحقيقي… وينسو الخلافات الأهلية والقبلية والجهوية الي مابينهم…ويحطو ايدهم ب ايد بعض ..ويخلو بلدهم تعلى وتعلى ….. بالعلم ..وتضحية الشهداء مشان يعطوك حريتك وتقدر تستعملها صح .. وبلحب والخير … هيك بنبني وطنا يا ابني .. مو بلقتل والخناق والطمع
سلاماً عليك أيها الوطن الجريح ، متي من طول نزفك تستريح ?? ……
وسكتو كلهم وقعدو يشوفو لبعض وكلامه كان يلامس في كل واحد فيهم …..
وناضو كلهم يشوفو شن وراهم وأية كانت شادة كتاب وتتصفح فيه … لين جي حد من وراها خلعها …
أية.. انت !!! يعطيييهالك قلبي طاح
إياد… ههههههههههه ، شن ديري
أية.. شي كسدت نقرا ،
إياد.. هههههه به بنقولك اني غدوة بنمشي
أية.. توا !
إياد.. هههه ايه
أية.. به امتى بترجع
إياد.. علاش بتستاحشيني ؟
وأية تعفلقت وحطت الكتاب عالطاولة وطلعت تجري وإياد يضحك عليها?
ومع الفجر ،
كان في حد يتسلل برا داره ….وكيف بيطلع……شافه إياد كان يصلي فلفجر
إياد.. حيدر ! وين ماشي !!
حيدر.. هاي بلدي يا أخي .. مافيني اتركها …..
إياد ……………. ربي معاك ،
يتبع………..>>>>>>
#mera ✨ …
خيره التفاعل علحلقة الي فاتت هكي ☹ معجبتكمش ؟