رواية “أحمل قلبك .. أينما ذهبت”
اهو حاولت نطولكم فيها ع قد مانقدر مبيتش انزلها امس باش نكمل عليها وتجي طويلة زي ماتبو ?
~~~~~~~~~~~~~~~~~~~~~~~~~~
الحلقة الثامنة ~ ??
ناضت أية الساعه 4 الفجر على صوت الأذآن …. حست بشعور غريب اول مرة تحسه ف حياتها…. ليها سنين مسمعتش صوت الأذان ؛ ليها سنين قلبها مرتواش بحلاوته والسكون الي يحل ع الروح بمجرد ماتسمعه ❤ …… استاحشت صوته..واستاحشت تقعد في دولة عربية بين ناس يفهموها وتفهمهم .. ناس تحس بإانتماء بينهم مش بلغربة ❤.. حتى لو مش بلادها بس يكفي انهم عرب زيها… وفلاخر كلنا تحت راية دين واحد ❤ .. ونفس الاعياد…ونفس المناسبات الاسلامية ❤… تمنت ف خاطرها انها تقدر تولي ليبيا ولو يوم ، استاحشت ترابها وجوها واستاحشت اللمة علعالة الي كانت تديرلهم فيها حناها كل خميس وتلم العيله والجيران عليها ❤…. وكل يوم تدعي ف خاطرها ع الي كان السبب الي خلاها تبعد ع وطنها واهلها وبيتها وناسها ف ضربة وحدة ?
ناضت توضت وهي في قمة السعادة وغاشي على قلبها الشعور بالسكينه والراحة…. وطلعت باش تصلي تلاقت مع إياد كيف نايض حتى هوا…..بحكم انه الديار في البيوت السورية كلها بشكل دائري والديار مقابلين بعض في شكل مدور وفلنص نافورة مية بصوت تدفق المياه دارت جو لطيف مع نسمة الهواء الباردة ?
إياد.. صباح الخير ❤
أية.. صباح النور ….
إياد.. شن منوضك توا ؟
أية.. بنصلي الفجر ، وانت ؟
إياد.. ههه حتى اني … تصلي معاي ؟
أية..سكتت شوية وردت………… عادي ?
وتوضو الزوز و وقف إياد و وراه أية بمحرمة الصلاة وبدي يقرا فلقرءان ?
وللحظة انسحرت بصوته فلتلاوة كان يجلي القلب من أي هم فيه ❤…
ولقت روحها لإرداياً تبكي وهي تصلي… تفكرت ايام بوها كان يلم فيهم وقت كل صلاة ويصلي بيهم جماعه ………
وفللحظة هادي سمر كانت كيف مصلية وتتفرج عليهم من الروشن وصورتهم صورة للذكرى ❤
لان متأكدة هايجي يوم ويكونو مع بعض وتوريهالهم ❤?
وبعتتها للبنات وكتبت عليها … شوفو شو لابقين لبعض ❤❤❤
وردت عليها نورهان وقتي …. يختييي عليهم وعلى جمالهم ?? في تقدم !
سمر.. هههههههه فيييي كتير ، ? انتظروني وانا رح وافيكم بلمستجدات ??
وكملوا صلاتهم وقعمز إياد يسبح وإياد تتفرج علنافورة ……
أية.. قداش ليا مسمعتش صوت الأذان ، 18 سنه
إياد.. هههه وشن شعورك لما سمعتيه بعد 18 سنه ….
اية.. شعور غريب…. حسيت بسكينة وطمأنينة كنت مفتقدتهم ، قلبي كأنه كان عطشان وارتوى ? سبحان الله في هالأذان.. تحسه كأنه دواء للقلب وشفاء للقلوب .. سبحان الله ✨
أياد.. شبحلها وابتسم ، وناض وقف جنبها وقعدو ساكتين شوية …..
أية.. صوتك ماشاء الله فلتلاوة ع فكرة ?
إياد.. هههه شكراً ، فحوشنا امي مكانتش تحب يصلي بيهم الا اني من واني صغير ودخلتني جامع بكري باش نحفظ قرآن
أية .. ماشاء الله ؛ ربي يطولك بعمرها ? …. بابا كان يحفظ فيا قرآن انا واحمد خوي الله يرحمه … وسكتت شوية ونزلت دمعه منها
إياد………الله يرحمهم ،
وشبحت لإياد وقلبها وعيونها كأنهم يستنجدو بيه باش ينقذهم من الضياع الي هيا فيه ? …. وقعمزت ع كرسي قريب وبدون أي مقدمات نهارت بلبكي ……. استاحشتهم يا اياد… تعبت بروحي تعبت …..
وهوا اول ماشافها بلحالة هادي قلبه كأنه من خلعه من مكانه ومش متحمل يشوفها بلوضع هدا ???….
ملقاش روحها الا وهوا يقولها ، أية انتي مش بروحك… صدقيني … وعلى طرف لسانه بيعترفلها بحبه وانه يبي يخطبها بس خاف تحساب انه يستغل ف ضعفها لمصلحته ……..
ومدلها كلينكس وطاسة مية وقعد جنبها من غير اي صوت … خلاها لين كملت بكي وارتاحت شوية ، ومن غير وعي على نفسها لقت روحها تحكيله ف كل شي صار معاها إبتداءاً من هاديك الليلة لحد يومنا هذا…. حكتله كل لحظة ألم عاشتها…وكل كسرة خاطر …وكل فراق…. كل شي حكتهوله ……وكيف نخطفت منها حياتها بين يوم وليلة ونفرضت عليها حياة هي مش حابتها بلغصب ….
بينما هوا على قد ماكان مهيئ روحه من كلام سمر أنه الي عاشاته كان صعب ……….لكن عمره ماتوقع أنه يكون بلدرجة الكبيرة هادي !…
عيونه تعبو دموع مع كل حرف وكل شهقة تشهق فيها بين كل كلمة وكلمة وكان يتقطع بلعرق معاها ?…….
ولما كملت وفرغت كل شحنة الكلام ف خاطرها والألم الي هيا فيه ………
أية.. اني مشعارفة علاش نوجعلك ف راسك بقصصي وحكاياتي هادي اني اسفة بس … مع انه عمري ماحكيت حد قصتي هادي الا صحباتي القريبات مني …….بس حسيت للحظة اني محتاجة نفرغ قلبي من الوجع الي فيه..تعبت من الكتمان محتاجة اي حد يسمعني نبي نصيح ونبكي عندي كمية وججع هني ” وشاورت ع قلبها ” مش قادرة نتخلص منهم !
ونطق اياد بعد صمت طويل وهوا كان مجرد مستمع ليها…. ارمي حمولك كلها عليا ؛ عارف ان مليناش فترة طويلة نعرفو بعض بس ……وسكت شوية ، اني ….. طول ما اني جنبك معاش هاتحسي ب ولا وجع فحياتك
أية.. مسحت دموعها وقتله ، وشن هوا الي بيخليك جنبي !
اياد.. ههههه مش محتاجة تمثلي بشخصية مش ليك وانتي معاي … ممكن اني ابعد شخص عليك واكتر شخص عرفك من داخل شني ….
أية.. شن قصدك ؟
إياد.. قصدي هاتفهميه مع الوقت ? المهم قوليلي ؛ تقدري تعتبريني صديق مقرب ليك في حياتك ؟
ونزل علأرض وجثي ع ركبته ? ….
إياد….aya , would you accept to be my best friend ?
أية.. انت عبيط ؟ نوض نوض
إياد..كسفتيني ?
أية.. ههههه…….. انت علاش دير معاي هكي اياد ؟ اني ديما مش كويسة معاك وانت فلمقابل تعامل فيا كويس
إياد.. لان زي ماقتلك ، انتي مش هكي
أية.. مش سبب هدا
إياد بصوت واطي… مه اني نخاف نقولك السبب الحقيقي ترجعي تصديني وتعامليني زي قبل ههههه واني ماصدقت بديت نقدر ندوي كلمتين معاك
أية… وشن السبب ؟
إياد…….. خليها ف وقتها خير ?..
أية.. براحتك “وهي من داخل قريب تاكل روحها باش تعرف ع شن يلمح ?” …….
أية.. اي ، احكيلي عن نفسك انت شوية ؛
اياد.. والله شن بنحكيلك ، انا شاب عمري 32 سنه أعزب يبحث عن زوجة وجاد ?
أية … ????? ياراجل
إياد …ههههههههه
أية.. كبير هلبا انت ? خيرك متجوزتش لتوا ؟
إياد…. والله الحق عمري ماكنت مهتم بلموضوع هدا للأمانه…وقتي كله سفر وشغل ونرجع البلاد شوية نتطمن ع اهلي وهكذا.. تعرفي صحابي ايام الجامعه شن كانو يقولولي ؟
أية .. شني ؟
إياد.. ياعووقااد ?? “بصوت مرسي الزناتي ف مسرحية مدرسة المشاغبين ” ?
أية..هههههههههههههههههه يعطيهالك…. يابختك تقدر تمشي ليبيا ، خاطري هلبا نمشيلها
إياد… هههه تقدري تمشيلها
أية “عوجت فمها بحسرة “… لمن بنمشي بالله
إياد….. سكت وفكر انه يخطبها ف سوريا قبل لايولي ليبيا باش ياخدها معاه وتتعرف ع اهله وبلمرة ميخليهاش ف خاطرها ?…ولما لمحت الفكرة ف راسه هادي ناض يتبسم زي الاهبل ويلعب برجليه ?
أية.. هههه خيرك التبست ؟
إياد.. هههههه لا شي ،
وقعدو يتكلمو لحد ماطلع الصبح … هدرزو ف كل شي وأية بدت ترتاحله بلتدريج وتاخد وتعطي معاه ?
لحد ماناضت أم سمر ، فلليلة الي جو فيها متكملوش مع بعض يادوب سلمو عليهم وخشو ارتاحو كلهم لان ميتين من التعب …….
أم سمر … شو فايقيين بكير
إياد.. هههههه صباح الخير خالتي
أية.. صباح الفل خالتي مريم ??
أم سمر… صباح الفل والورد والعسل عليكو ، شو نمتو منيح !.
إياد.. اييه الحمدلله ارتحت والله عظامي مكنتش نحس بيهم من التعب
ام سمر… معك حق مشوار كان بيتعب ، روح نام كمان لو بدك مابين ماصحيو الباقي وحضرت الفطار ….
أية.. اي عندها حق انت سقت هلبا ، مزال الساعه 6 توا مش هاينوضو الا مع ال9
اياد.. اوك تمام ? نخليكم براحتكم ونخش نرتاح اني شوية… باش نفطر ونتوكل ان شاء الله
أم سمر… ايييي الله يفتح عليك يا ابني، وانتي يافصعوووونة تعي معي علمطبخ مشتاقتلك كتيير ???? فوتي اسبقيني
أية.. اييي خالتو جاية ?….ومشو مع بعض للمطبخ وإياد اول ماتأكد انهم مشو جري لدار سمر وخبط عليها ……….
~~~~~~~~~~~~~~~~~~
متفكررررة اييي منسيتش ? في مشهد من الحلقة الي فاتت مكملتاشي ??♀️ اهو توا بنحكيلكم الي صار بس مش كل شي ، هاتعرفو كل حاجة ف وقتها ???
في الميتم >>>>
…. شن أسمها وشن التاريخ الي حطيتيها بيه ؟
المرا….إسمها…..و التاريخ 25 – نوفمبر وسمتلها السنه
“منبيش نعطي سنة معينه باش متربطوش الاحداث بحدث قديم صاير في تاريخ قريب زي هدا وهكي ف خليها هكي خير ??? ”
و ردت عليها الي تخدم…… التاريخ هدا قديم بكل يا ابلة ،، ممكن المشرفة الي قبلي تفيدك هيا الي عندها معلومات الاطفال الي جو قبل الفترة الي اشتغلت فيها … توا نتصلك بيها ونسألها ع رقم ملفات الاطفال الي جو فليوم هدا …
المرا… باهي بنتي الله يربحك تساعديني
المشرفة… حاضر … تقدري تتفضلي برا تاخدي جولة مابين ماكلمتها ……
ودارت زي ماقتلها وخدت لفة فلميتم… تفرجت علأطفال وتمنت ربي رزقها بعيل يملى عليها حياتها بس للاسف نحرمت من النعمة هادي ومن الزواج اصلاً ? ….ومفيش مهرب من الوحدة الي عايشة فيها…… تمنت تلقى الي تدور فيه هنايا علأقل تملى عليها وحدتها بعد ما حطتها ب ايدها قدام الميتم لما مكانش عندها قدرة تربيها وتوفرلها ابسط مستلزماتها ?
ومابين ماهي ماشية في ممر طويل كان على يمينها غرف وعلى يسارها غرف …. عنابر للبنات الصغيرات … والبنات الصبايا… والاطفال…والشباب….والب<wbr />يبيهات ?..
وهي خاطمة سمعت صوت عياط خلاها ترجع بخطواتها ، ..
…..قداااششش مرة قتلك لما تاكلي متبزعيششش علأرض هاااه !!!! وبدت تقرص فيها من ودنها…….. توااا لمي الي فتفتيه ومفيشش عشي اليوم بررري !!!!!
لمعت عيون المرا لما شافت المنظر هدا لأحد المشرفات تضرب في بنت صغيرة عمرها متجاوزش ال7 سنوات ???….
لقت روحها فجأة ربي دب فيها الصحة وبدت تمشي بخطى سريعه حتى منغير عكازها وخشت للغرفة الي فيها الموقف
المرا….. انتي كييييف تتعاملي مع طفلة صغيرة ويتيمة بالشششكل هوا!! انتي معندكش ررحمة ف قلبك هادم يتامى !!!!! كيف تضربيها بالشككل هوا فهميني كيف !
ردت عليها…..وانتي من ان شاء الله !؟ هادي وحدة مش متربية والاطفال لازم يتعلمو الإنضباط من توا …..واني عارفة روحي شن ندير لو سمحتي متتدخليش ف شغلي !! ……
المرا…. نعم ! شغلك ؟؟؟ وهوا هدا شغل ! انتي عندك علم ان دمعه من عين طفل يتيم تهز عرش الرحمن !!! وانتي بكل وقاحة تضربي فيها لا وتحرمي فيها من العشي فوقها!! معقولة مفيش ذرة انسانية ف قلبك هادم نحرمو من اهلهم وقعدو بروحهم فلدنيا بدل ماتحنو عليهم تذلي فيهم !!!!
والبنية الصغيرة طول لبدت وراها وبدت شادة ف طرف عبايتها خوف منها……. هيا ديما تضرب فينا وتكشخ علينا يا ابلة ?????
وشدت فيها ب ايدها….وصار مش اول مرة ليك ! لا انتي واضح عليكم انسانه مريضة وتبيلكك شكوى !!!!
وكيف بترد عليها جت المشرفة الي كانت تدورلها ع الي تبيه على صوت حسهم …..
المشرفة.. شن في صوتكم عالي ؟ ان شاء الله خير ياحاجة !؟
المرا… اييي طيب فيييك جيتي باش تشهدي … مجرمة زي هيييا كيف تخلوها تكون مشرفة علأطفال ! كيف تخلوها تربي يتامى بلقسسسوة والإهانه هادي وين عقلكم لما شغلتوها !!!!
وشبحتلها المشرفة وردت قالت للمرا… بإذن الله هانتولى الموضوع ، ولقيت معلومات تقدر تفيدك تفضلي معاي ياحاجة …..
وشبحت للتانية باستحقار وتبعت المشرفة ……
وكيف بتمشي شدتها البنية من طرف عبايتها وعيونها معبيات دموع ، خليك متمشيش ??…..
الموقف الي هزلها قلبها وخلاها تصب دموع وحضنتها …… هانجي كل فترة ونلعب معاك ? وعد
البنت …. مدت صبعها وقتلها قولي وعد ؛
المرا… وعد ?… انتي شن اسمك ؟
تبدلت النظرة التعيسة الي فيها لنظرت فرح وبهجة ? … قتلها بكل براءة…. إسمي محبة?? وانتي !
المرا ضحكت وقتلها حتى اسماءنا قريبة من بعض…. اسمي حنان ?
محبة.. خلاص هانستناك غدوة ?
حنان…. بإذن الله????
ومشت سبقت المشرفة لدار الاستقبال الي كانو فيها….
وقبل ماتطلع المشرفة من الدار قالت للتانية… مرة تانية اضبطي تصرفاتك قدام الناس ! مش ف اي وقت فهمتيني ؟؟؟؟ منبوش فضايح تبيهم يسكرولنا الميتم !
وردت عليها … حاضر ؛ ودفت البنت الصغيرة من كتفها وقتلها بري توا
ورجعت وين ماكانت …..
المشرفة.. درت مكالمة تليفون ، وطلع فعلا في بنت بلمواصفات الي قلتي عليها….البنت قعدت فلميتم 10 سنين بعدين تبنوها عيلة ***
وحنان فرحت وزعلت ف نفس الوقت أنه حد تبناها… بس قالت ف خاطرها احسن ربي يعوضها بعيله بدل ماتعيش حياة اليتم من غير اهل ولا ضهر تنسند عليه ?….
وخدت عنوان العيلة هادي من المشرفة وخدت تاكسي وطارت طييير للعنوان ?????
~~~~~~~~~~~~~~~~~~~~~~~
في مكان أخر >> ?
شوفوا هوا الحوار كله بالانجليزي بينهم بس انا بنحكيلكم بلعربي طول ?
محمد..حبيبتي مرتاحة ف حوش اختي ؟ تعامل فيك كويس ؟
إيما… ايي اختك انسانة لطيفة جداً وتعامل فيا بمنتهى الإحترام… متشغلش بالك انت ? كيف حال امك ؟ وخدت خبر اني عند اختك ولالا ؟
محمد… تنهد وقالها لا ؛ بس هانقولها فلوقت المناسب ……. شن ديري ؟
إيما.. أوك ? شي نتفرج علتلفزيون
محمد.. حبيبتي ، صحيتي بجديات انك متحملة ظروفي ومشاكلي ؛ نوعدك اول مانتجوزو ح نعوضك ع كل شي ? ……
إيما.. هدا كان وعدي ليك ? … وهانوفي بيه ، اهلي اتصلو بيا اليوم وسألو علينا .. قلتلهم اني ف حوشكم ومتعرفش ب الي صار رجاءا لو حد فيهم كلمك مياخدش خبر
محمد… تمام .. تصبحي ع خير حبيبتي ?…
إيما.. وانت من اهله ? نحبك
محمد.. حتى اني ?
وسكر محمد وتغطى وسكر السهارة ورقد ،
امه من ورا الباب .. هلمدوقن.. يحساب روحه بيفوتها عليا والمية تمشي من تحتي من غير مانحس بيها ، انا هانوريك
وسكرت إيما وكملت تتفرج ع فيلم تحبه ، لين جت أمل من وراها وسكرت التلفزيون…….
وإيما قعدت حايرة وتشوفلها …..
امل.. متأسفة جداً بس حني نرقدو بكري والصغار يسمعو صوت التلفزيون ينوضو
وردت قتلها مفيش اي مشكلة ، وتغطت حتى هي بترقد وهي الكلام الي قالته كله لمحمد كان كدب…. لانه اخته مش متقبلتها ومتعاملش فيها كويس أبدا ???
وكيف بتخش امل ترقد جاها اتصال …..ايوا ماما ؛ اي شن حالك ….. اي خشت رقدت ، درت زي ماقلتيلي…. هههه لالا بلكتير يومين وهاتطفش ، اي نسمع فيك ………… شن ندير ؟ دكتورة نساء ؟ علاش ؟؟؟؟
~~~~~~~~~~~~~~~~~~~~~~~
نرجعوا لأياد وأية ??
خبط إياد ع باب سمر بشوية وفتحتله……..
إياد… صباح الخير
سمر.. صباح النور اخي كيفك
اياد.. الحمدلله …..سمورة نبيك ف طلب ?
سمر.. اي بتؤمر ………
وتوا نقولكم شن دار بعدين ?
بعد ساعتين جي اياد من برا وخش للمطبخ كانو اية وسمر والبنات الصغيرات فلمطبخ وكيف بدو يحطو فلفطور وناضو باقي العيلة ? …….
إياد… اية لو سمحتي ، نبيك شوية ?
أية.. اي جاية هي …….ومشت طلعت برا معاه ؛……… شن في ؟
إياد… كنت نبي نعطيك حاجة ?
اية .. حاجة شن ؟
واياد..ومدلها ساعه بوها الله يرحمه ?
اية باستغراب..بس هادي ساعه بابا ! لين أنتبهت ان الساعه بدت تتحرك …. حييييييي تخدددددم !!!!!!!
إياد.. هههههه اي ، لقيت بطارية ليها ….
اية.. تبصصصر انت???? وبدت تبكي والدموع يصبو منها ?…. صحيييت هلبا اياد والله مشعارفة شن نقولك بجديات كأنكك رجعتلي روحي شكررا هلبا هلبا هلبا هلبا هلبا.. مشعارفة كبف نردلك جميلك والله ?
إياد…. هههههه منبيش اي ردان جمايل… ردت فعلك والفرحة الي شفتها في عيونك كافية ?
تحشمت اية ونزلت عيونها للارض وهي قلبها يرقص رقص ?? ….
اية.. بس كيف خديتها !؟
إياد.. هههههه العصفورة جابتهالي
أية.. ههههههههه والعصفورة هادي اكيد اسمها سمر
وتلفت اياد لسمر الي كانت واقفة زعميتك تراقب فيهم بلدرقة بس الزوز شايفينها ولما كبسوها دارتلهم باي وهربت ?????
ام سمر….يا جمماعه يلااا الفطور جاااهززز
ومشت تجري اية ونفسها مفتوحة هلبا علأكل ??
اما اياد ف كان شاد ورقة ف ايده ……. الورقة هادي لما رفع الساعه للصايغ باش يغير البطارية كان لازم يفك الغطاء متعها……. و اول مافكه طاح منه ورقة مطبقة بشكل صغيييير جداً جداً ؛ … طبعا الصايغ معطاهاش اي رد فعل ومدها لإياد وكمل شغله ….. بس لما إياد فتح الورقة استغرب من الي فيها……..
يتبع…..>>>>>>>>
#mera ?
محدش يقولي قصيرة باليز ☹ .. ونبيكم تفكرو فلاحداث وتربطو القصة ببعضها نحب الي نلقى تعليقاتهم توقعات وتفكير فيهم نحس إنهم قلبا وقالباً معاي فلرواية لان الرواية فيها هلبا عِبر فسط الأحداث نفسهم مش مجرد رواية تسلية وخلاص ?
و لو قلتلكم خاطري توصل الحلقة ل٢٠٠ تجبرو بخاطري ولالا ؟ ???