رواية “أحمل قلبك .. أينما ذهبت”

ديرو لايك قبل ماتقرو ❤ وبعد ماتقرو اعطوني رأيكم لان حلقة متعوب عليها للامانه وهكي ?❤

الحلقة الخامسة عشر ~ ??

إياد.. شن شاف !!

شاهين… شاف ورقة وعقود ومستندات ..تتكلم صفقة بلمليارات، طلع (أ.ن) تاجر مخدرات ….

أية .. شني !!!!

شاهين.. الي نقولكم فيه ….. طبعا السكرتيرة متعرفش اهمية الورق الي حطاته ولا تعرف شن في حطاته قدامه ومشت ، لانها لو كانت تعرف محتواه مستحيل تحطهم قدام بوك….. بلمختصر المفيد كل الملف الي كان ف ايد صادق كان يقول ان الشخص هدا من اكبر تجار المخدرات ومداير صفقة بيع ممنوعات بمبلغ خيالي ؛ الصادق نصدم لما شاف الورق هدا… وبسرعة خاطفة كان في ماكينه تصوير فلمكتب صور كل الورق الي فلملف وخدي نسخ منها ….. وخاب امله فيه وظنونه ….

اية..وبابا شن دار بعدين !!

شاهين.. بوك ياحنه مكفاشي الي عرفه ؛ خش وقتها مرة تانية للمكتب لنفس السبب يبي معلومات اكتر للمقال متاعه ….

ورجع بسرعه كل شي مكانه …. وقعد حوالي شهرين كاملات وهوا يراقب فيه …..وكان يتردد ع مكتبه بحجة انه مزال يبي معلومات اكتر بخصوص مقاله الصحفي ف اول اسبوعين بعد ماعرف وبعدها معاش قدر يمشيله بس قعد يراقب فيه من بعيد من غير مايعرف ……ومكانش في حد يعرف بلموضوع وقتها حتى اني …. كان يحاول يجمع في ادلة ع قد مايقدر لحد مافي يوم عرف الحاجة الي خلاته يتهور ويحاول يتصرف فيها ب اي شكل لدرجة معاش بدي يخاف حتى ع نفسه……..بوك كان عايش في دور المتحري وقتها هههههه

ف يوم لحقه في مطعم من غير مايحس……..

كان شكله عنده غداء عمل مع شخص مهم لانه قعد فترة طويلة يستنى فيه ، ومع هذا مروحش وقعد في انتظاره….. لحد ماجي الي يستنى فيه……بوك وقتها استعار جهاز تنصت من صديق ليه يخدم فلمباحث الجنائية يستعملو فيه فلتحريات وزرعه تحت الطاولة الي هوا قاعد فيها باش يسمع كل شي بوضوح…..وفي نفس الوقت كل الي كان يقول فيه يتسجل بلحرف الواحد …….>>

وكان الحوار كالتالي :

ا.ن …… خيرك تأخرت .. مشعارف انه معندناش وقت نضيعوه !

“هدا الشخص الي متفق معاه هايبيعله الممنوعات”

مش ح نقول اسم معين ليه بس هانرمزله ب $$

$$…… اسف شغل ، بس اهو جيت…… كيف هايتم تسليم البضاعه ؟

أ.ن…..عن طريق البحر ، هايكون في باخرة كبيرة مسافرة عن طريق البحر لايطاليا… البضاعه هاتنحط فيها ….. اول ماتوصل لنقطة معينه هاتمر علجمرك …… قبلها هاتاخد مني تليفون …. تكون انت وجماعتك في مركب تستنو عند النقطة هادي وهاتركبو بعدها للباخرة ، وهاتاخدو كل البضاعة من علسفينه ….وهايكونو في جماعه تخصني يساعدوك باش مديرش اي انتباه وشوشرة للمسافرين ….. يساعدوك تنقل بضاعتك للمركب وتمشي ويادار مادخلك شر ،

$$ .. والله ؟ وانت تحساب انها هاتطلع من هني بلسهوله هادي ومن غير تفتيش ؟؟

أ.ن … ياودي كانك ع هني اني منظم اموري عندي ناس ف كل مكان … وهما الي هايساعدوني ندس البضاعه ف السفينه ……يعني من ليبيا لحدود ايطاليا معندكش مشكلة…. قبل الحدود بشوية وقتها هاتمر السفينة علجمرك … و هني لازم تكون انت مجهز نفسك باش يتم نقل البضاعه بشكل سريع وخفي وبدون اي شوشرة وانت هاتكون بينهم باش تتأكد من كل شي بنفسك… وزي ماقتلك من اول ماتبحر السفينه من هني لحد ماتوصل لغادي ع مسؤليتي ……. بس زي ما اتفقنا….. الدفع مسبقاً ،

$$….. حط سيجارة ف فمه وشبحله…. اني مش مطمن ،

أ.ن…… عارف ان اخر صفقة بيناتنا كانت فيها مشاكل.. بس نأكدلك ان هادي اني حاسب كل شي فيها ب الخطوة ومنظم اموري …

$$…. تمام ، المرة هادي هانوثق فيك ….. بس صدقني يا *** لو صارت اي غلطة ، اني مش هانتهاون معاك زي كل مرة ! ….

ا.ن……. متفاولش انت بس ههههههه.. هاه ، كيف هاناخد فلوسي ؟ ..

$$… نفخ الدخان وشبح يمين يسار قبل لايتكلم …….. اول ماتطلع ، هاتلقى تحت سيارتك شنطة ، وزي ما تبيهم.. بالدولار ؛ ومنبيش الموضوع يتأخر ؛ اسبوع بلكتير ! وباقي المبلغ هاتاخده اول ماتبحر السفينه

وطفى السيجارة وطلع ، اما أ.ن ابتسم ابتسامة مكر كأنه يخطط لحاجة …….وخدي جاكيته ولبس طاقيته وناض ……….

أما الصادق مكتفاش ب الي سمعه برضو ! وزاد نصدم فيه اكتر و اكتر ، وهوا طالع مشي وراه ومتخفي باش ميعرفاش…… وقف أ.ن على هاتف عمومي وقال لشخص مستنيك فلليل فلمكان الفلاني ، الساعه ٩ ……

وفلموعد ، كان الصادق موجود قبله ويستنى فيهم…….

لحد ماجي شخص تاني مختلف عن الأول …..

– اه ياريس …….كل شي تحت السيطرة

أ.ن……… درت زي ماقتلك ؟

– ايه كله تمام …. اول ماتاخد باقي فلوسك ويركب $$ للسفينة…….. هاتغرق هي وكل المسافرين عليها….. واتفقت مع مهندس الباخرة فلتحقيق يقولهم انه عطل فني فلمركب ، …..وكل البضاعه هاتغرق فلبحر معاهم….. وهكي تكون ضربت عصفورين بحجر…….. خديت فلوسك……وخلصت من $$ باش ميكونش ف يوم مصدر تهديد ليك وتقدر اتابع شغلك براحتك ……..

أ.ن……. مية مية برافو عليك … اهم شي تتأكد ان $$.. ركب مع المسافرين وعلباخرة قبل لاتبدا تنفذ العملية ، بدي يدرهلي ف كبدي ف كل عملية تسليم ويهددني انه بيبلغ عليا… يحساب روحه يقدر يلعب بيا ههههههه يوريني توا كيف بيتذاكى عليا…..

– بس ياريس في مشكلة… في وحدة

أ.ن ….. شن هيا !

– المهندس الي اتفقت معاه.. دايرلي دسكة في ألاف الابرياء بيموتو وجو الشرف هوا اني نحس انه يلمح يبي زيادة فلفلوس لانه هكي بيصدعنا

أ.ن … سكتله فمه بقرشين وخلاص فكني من دوشته …

و خدي بعضه وركب سيارته ومشي كل واحد فيهم ع حاله………والي قعد في حالة ذهول فاقت كل معالم الصدمة هي الصادق ،،

إياد وأية يشبحو لبعض بوجه مصدوم……

وأية بدت تتوتر اكتر وقتله ..وبعدين عمي شاهين ؟؟ كمل بسرعه !!

وجابت سمية القهوة واستأذنت منهم بتطلع تشري حاجات من السوق باش تضايف بيها ضيوفها مابين ماكملو كلامهم …….

شاهين… بعدين ……………

((هانرجع اني نحكيلكم الاحداث احسن … خلونا نرجعو بالزمن شوية ❤))

روح صادق للحوش ومش قادر يصدق الي سمعه ولا الي قاعد يصير …. معقولة في ناس بلبشاعه هادي ! تاجر مخدرات ويبي فلوس ماعلينا ! هادي حد ممكن يتقبلها…. بس كيف يضحي بالكم الهائل من الناس الأبرياء هادي والي بيموتو جراء عملية قذرة زي هادي من غير مايرفله جفن ! الاف الناس هايموتوا وهما ماليهمش ذنب ف شي ! وع خاطر فلوس !!! ع خاطر رزق دنيا زائل ! اني كيف هانقدر نرقد بعد الي سمعته… كيف هانقدر نعيش عادي كأنه ماصار شي ! هاتصير فاجعة واني قاعد حال فمي وساكت! نبلغ عليه ؟! ونفضحه بلدلائل الي عندي … يقدرو يودوه ورا عين الشمس ! بس هوا عنده نفوذ هلبا يقدر بكل بساطة يطلع روحه منها….. نفضحه في مقال صحفي ! مش مهم يصدقوني المهم اي حد حاجز موعد ع رحلة الباخرة فليوم هدا ميمشيش علاقل ننقذ الناس هادي كلها من موتة شنيعة تستنى فيهم !

هادي كلها أسئلة قاعدة تلف وتدور في راس الصادق ومليون حاجة ف راسه لين ناض عليه صداع شديد عليه ، لين حس بإيد دافية صغيرة تتحسس ع ايده …….

كانت إيد أية ❤ .. بابتي.. خيرك زعلان ؟ علاش متلعبش معاي ؟

صادق.. ههه حبيبة بابا ؛ غير مصدع شوية من الشغلة
اية.. بس اني استاحشتك ☹

وخداها قعمزها ع حجره .. مفيش حاجة ممكن تنسيه هم دنيته وزحمة افكاره الا شوفت عيون بنته وهي تتكلم بكل براءة ولطافة معاه ?

اية.. بابا تعرف سن سفت فلتلفزيون اني وماما اليوم؟
بوها.. هههه شن شفتي ،
أية.. شفت مسلسل فلتلفزيون بنت يتيمة بوها مات وهي تبكي ع خاطره ☹ قعدت نبكي هلبا وقعدت نصلي مع ماما وندعي هلبا ربي يخليكم ليا انت وماما واحمد ومنبداش زي البنت اليتيمة فلتلفزيون ، ? مسكينه هيا اكيد زعلانه هلبا من غير بوها…

بوها .. هههه ادعيلها ربي يصبرها ?
اية.. يارب ويارب معاش في ولا اب و ولا ام يموتو ويقعدو ديما مع صغارهم لييييييييي يوم القيامة
بوها.. هههههههههه يارب❤
اية.. عطاته بوسه ع خده….. توا مشي الصداع ؟ ??
بوها.. ههههه مشي يانور عيوني انتي ❤

رانيا …. اششي اشي الدلع بنبدا نغير اني ! شنو يا اية بتاخدي بابا مني ولا كيف !؟
اية.. ههههههه اي بابا راجلي اني ??
رانيا.. هههههههههه صار هكي ! ماااشي ؛ وجت شدتها من بوها وقعدت ادغدغ فيها وهيا تضحك وصادق يضحك عليهم ….

كانت اللحظات السعيدة والدافية هادي تكفي انه تنسيه دنيته كلها ويستمتع بس وتقر عينه بشوفت اسرته بخير وسلام ❤ ..

اللحظات الاسرية الدافية والي تبدا مملة للبعض هايجي يوم وتتمنى انه ترجع دقيقه منها ف متضيعوهاش من ايدكم ❤ ..

ولما شافهم يضحكو جال في خاطره كذا سؤال

ياترى قداش اب هايكونو عيلته علباخرة هيا وهاينحرم منهم.. قداش طفل هايبدا يستنى بوه يجيه وميرجعلاش… قداش ام تستنى في ضناها وميجيهاش … قداش قلب هاينكسر ع فراق حبيب ليه وعده بلقاء ومنفذاش…………..اني لو متكملتش قداش ذنب هايقعد ف رقبتي… اني لازم نتصرف ، مستحيل نخلي الشي هوا يصير …….

وخش لداره وشوية وخشت رانيا تمشط في شعرها الي تريش من اللعب مع أية ?….. وصادق كان يشوفلها وكلعادة مفتون بيها وبجمالها ❤ ..

ولما كملت تلفت وشبحتله ببتسامة دافية.. خيرك حبيبي ؟ مش على بعضك ليك يومين ….

صادق.. في موضوع شاغلني
رانيا.. موضوع شن ؟ ممكن تحكيلي ؟.
صادق……. منقدرش نتكلم حاليا
رانيا.. اوك ؛ كل مشكلة وليها حل … متضايقش روحك وتفكر زيادة عن اللزوم ❤
صادق.. قرب منها وباسلها راسها ، هههه حاضر ❤ اني بنرقد لاني تعبان تصبحي ❤..

ورقد ،

نرجعوا وين ماكنا …..

أية.. يعني نفهم من كلامك ان بابا ، كان……. ودمعت عيونها

شاهين.. اي يابنتي ؛ حاول يمنع ان الفاجعة هادي من أنها تصير ؛
إياد.. وقدر ؟
شاهين.. للاسف ? وصار الي مكانش يتوقعه صادق ، ومشت الامور عكس ماكان مخططلها …..

وحس إياد ان الجاي هايكون صعب علي أية…وضغط ع ايدها ….. كمل لو سمحت ،،،،

شاهين…..كتب بوك مقالة عنه ، وفضحه بكل شي ….وكان مش فارق معاه شن يصير فيه بس قرر انه يحاول ينقذ الناس الأبرياء هادوما….. كان غرضه الاول والاخير انه محدش يطلع ع الرحلة هادي ولا يركب الباخرة هادي فليوم هدا ، بعد ماكمل المقاله سلمها للجريدة الي اعتبرتها سبق صحفي محصلش ….

بس الغير متوقع >>>>>>

أ.ن………. خش للمكتب بكل ثقة مابين ما كان الصادق يكتب ومنهمك ومش منتبه …

ورماله المقالة الي هوا كاتبها علمكتب……..

وشبحله الصادق بطرف عين و وقف بكل شجاعه ومقابله ……. تفضل ؟

ا.ن…….. ههههههههه لا عجبتني برافو عليك ، وقعد يصفق ، شغل متحريين درجة اولى …….

الصادق بكل ثقة…. غريبة مشدوكش مزال

أ.ن…… هدا لان مقالك تم منعه من النشر

الصادق… نعم !

ا.ن…. زي ماقتلك ، اني عندي عيون ..و ودان…وناس في كل مكان ، ف لو بتحسب نفسك هاتتذاكى عليا مننصحكش …….والمقال وصلني قبل حتى ماتفكر تنشره وعارف انك كنت تراقب فيا …واي حركة بديرها هايكون عندي علم بيها ، ف المرة هادي سامحتك …. لكن الجاية ، “خدي جاكيته وناض ” هانزعل منك هلبا

وتلفت طالع ،

الصادق.. صدقني الي انت بديره هايكون على جثتي مستحيل نسمح ب ان حاجة زي هيا تصير .. انت والي زيك مكانكم فلحبس ، انتم ناس متعرفش ربي …ولكل ظالم يوم صدقني

ا.ن …..ههههههههههههههه حافظلي الكلمتين هما من اما مسلسل؟ ع جثتك عادي مايحشمك شي ، هي مجتش عليك…وصدقني ، هايصير يعني هايصير..و ع جثتك لو انت حاب

وطلع يضحك وصادق عروقه قريب يطربقو ومشي لاقرب مركز شرطة ،

……….. لو سمحت اني بنبلغ ع عملية تسليم مخدرات وع شخص يتاجر فيها

~~~~~~~~~~~~~~~~~~~~~~

أية.. بدت دمعتها ف عينها وهي تسمع ؛ وقالت….. طول عمري نعرف ان بابا شجاع بس عمري ماتصورت انه يكون بلدرجة هادي ………وبعدين شن صار ؟

شاهين… الي صار صار يابنتي ، بلغ بوك عليه وبلفعل الشرطة قبضت عليه وقعد اسبوع فلحبس ع ذمة التحقيق…. بس الي خلى بوك يجن ويطلع من عقله انه مشدوش شي عليه ، وكل الورق الي عند بوك بكل بساطة اتهموه بأنه مزورها …. وكذلك التسجيلات مفبركة …. يعني هوا انتصر عليه فلاخر

إياد.. كيف هكي معقولة ميعرفوش يميزو بين عقود حقيقية ومزورة !!!!! وسكت شوية ، الا اذا كان …….. وفتح عيونه ع وسعهم….مستحيل !!

شاهين.. بالضبط هوا الي فكرت فيه ، دفع رشوة لهيئة المحكمة … واي حد ماسك عليه حاجة بقرشين يسكتوه…. كان رجل مرتشي لأبعد الحدود…….. والناس للأسف ؛ يعبدو فلفلوس عبادة ….وقال بشمئزاز ، ينسو ربهم ودينهم وضميرهم وأمانتهم ع خاطر حفنة دولارات

المشكلة فلموضوع ، انه لما طلع براءة ، أجل عملية التسليم سنه باش معاش تبدا عيون الشرطة عليه ، ونسو الموضوع ….

تمت العملية متاع تسليم البضاعه بكل بساطة زي مامخططلها … وبرضو اي حد كان يشك ويحاول يتكلم كان بقرشين يبكشه …

اية…. مستحيل ، مش قادرة نصدق … معقولة في ناس هكي !!!!!!
شاهين… هههه واكتر يابنتي ، الي ماتو 1300 مسافر غرقو فلبحر ، منهم اطفال ونساء ورجال وعائلات ، وكان عدد الناجيين والي كتبلهم ربك عمر 150 فقط …..

صارت ضجة اعلامية كبيرة بس هدا لما طلع المهندس المصمم للباخرة وقال ان سبب غرق السفينه عطل فني … هدت الدوشة هادي والناس نسوها

أية بتأثر… مستحيل هكي…. به كيف محدش شك فيه لما سمعو فلتسجيل انه كان بيدير هكي تي هدا كان دليل يخليهم يقبضو عليه منغير تفكير !!!!!!!

إياد.. ضحك باستهزاء ، انتي قاعدة مفهمتيش ،

اية… شن ؟

إياد.. يابنتي حاميها حراميها

شاهين.. بالزبط ، زي ماقالك …. كلهم كانو عصابة من اولهم لاخرهم وكلهم مشتركين في الجريمة البشعه هيا ، هي الثورة ناضت فبلادنا من بلاش يابنتي ؟ ……..

نقهرو ألاف الناس وحزنوا على الفاجعه المؤلمة الي صارت هادي…واهالي الميتين حاولي رفع عدة قضايا بس محدش سمعلهم… كأنهم مليهمش صوت …….ولا حد سمع لبكاهم ولا لحزنهم ولا حاول يردلهم حقهم …..

إياد.. هههههه والقوسطو ف هدا كله انه بعد الثورة بدي سياسي ، تخيلي واحد زي هدا يشد منصب فلبلاد ؟ متخيلة حجم الكارثة انتي ؟

شاهين.. هادم زي الحرباء على كل شي يتلونوا …..

اية… حطت ايدها ع راسها من الصدمة واستغفرت ربها……. وبه هدا شن علاقته ب موت بابا !

شاهين بصوت متردد …انتي متأكدة يابنتي انك تبي تعرفي الي صار يومها ؟

اية.. هدا السبب الي خلاني نجيك اصلاً ، قول متخافش … انا مهيئة نفسيتي ……

وتنقل بعيونه بين إياد وأية….وإياد هزله براسه متع كمل ……..

شاهين….. بعد الي صار ؛ بوك تعب نفسياً هلبا …. حس روحه كأنه مكانش قد المسؤولية … حس روحه ضعيف قدام الظلم ، وحس بذنب كل الي ماتو في رقبته لانه مقدرش يدير حاجة…. بعد ماكتب مقالته بسنتين……وكان بدي شبه ينسى فلموضوع ..ومحكاش لولا مخلوق فلدنيا الا اني ….

بدت توصل فيه رسائل تهديد من شخص بدون اسم….ومكانش صعب على صادق انه يتوقع من الي باعتهم …

أية…. تهديد … بشن ؟0
شاهين.. تهديد بلقتل ،
أية.. شني !
شاهين… اي

شخص زي هدا مستحيل يخلي بوك قاعد عايش بعد الي عرفه عليه… الناس الي زي هادو اي حد يشكل خطر 1% عليهم يبعدوه من طريقهم بكل بساطة وبدون تفكير ،

لما كترو الرسائل الي توصل لبوك فلبريد ، وكانت تخير فيه ياياخد اي مبلغ هوا يحدده ويسافر برا ويسكت… يأما يموت ،

أية…. وهي ترعش ، بعدين ؟

فلفترة هادي ، كان الوضع الأمني للبلاد ملخبط شوية …. وكان في محاولة لقلب نظام الحكم بس محاولة فاشلة كالعادة

في هادي الايام… بوك تعب من رسائل التهديد الي توصله وامك بدت تشك ، اضطر انه يقوللها على كل حاجة ……

وامكم اول ماعرفت مكانتش تفكر ف حاجة غير انها تقنع فيه يسافرو لحد ماتهدى الامور باش محدش فيكم يتعرض لحاجة …..

رانيا….. انت توا لاززم تحجز ع اول رحلة لامريكا … ع خاطري حبيبي ؛ ساد مجازفة اكتر من هكي …..

صادق.. يارانيا بس اني ،

وقاطعاته ، ارجوك… الناس هيا خطر وحني مش قدهم ……

صادق وهوا مهموم.. معقولة يجي اليوم الي يبدا فيه الي على حق هوا الي يخاف والظالم هوا المستقوي ! ولوح كل رسائل التهديد علطاولة قدامه… يارانيا اني كل يوم نحلم ب الناس الي ماتت وذنبها ق رقبتي…… اني تعبت … ونفسيتي تعبت ، كيف نهرب ونخلي مجرم زي هوا عايش ع وجه الدنيا !

وبدون مقدمات انهار …..ورانيا بعدت كل الورق من عالطاولة بإيدها … وطبطبت عليه وحضناته…..متخافش ، لكل ظالم يومه ❤

وأية اول ماسمعت الجملة هادي رنت ف ودنها…. اي ، اي الموقف هدا حضرته ! ونزلو دموعها طول… كان اليوم هدا الي طلعت فيه مع امها وتأخرو وبوها كشخ عليهم وقالهم معاش تقعدو برا لحد الوقت هدا ! وهادي الكلمة الي سمعتها لما كانت لابدة وتسمع في امها وبوها يدوو… لكل ظالم يومه ?

شاهين.. بنتي لو مش قادرة الافضل نكملو يوم تاني اية.. لااا لا عمي شاهين ، كمل ارجوك ? .. هانستحمل بس كمل ،

شاهين.. تمام ………

القصة كلها مش هاتم في حلقة وحدة ❤ استنوني فلحلقة الجاية باش تعرفو باقي الاسرار وكل الاسئلة الي انتم تبو اجابات ليها زي ما أية تبي إجابات ليها ❤ ..

يتبع……. >>>>>>

#mera ✨

* ملاحظة : شخصية أ.ن اني قصداً درته بدون أسم والحروف اخترتها عشوائيا باش لما نتكلم عليه فلرواية يبدا ليه صيغة معينه …ومبيتش نعطيه اسم معين وتربطوه انتم بحد علواقع وتحسابوني نتكلم عليه لأنه شخصية حساسة فلرواية ولهذا فضلت انه يكون بدون اسم احسن ، ومتنسوش ان الرواية ديما نقولكم بكل احداثها وشخصياتها خيالية ❤

وأخر حاجة ، تفاعلو خيرلكم ?? وأعطوني رايكم وتوقعاتكم للحلقة الجاية ❤