رواية “أحمل قلبك .. أينما ذهبت”

الحلقة الرابعة ~ ??

قعد إياد يشوفلها وهوا يسأل ف خاطره… زعما شن السر الي ورا البنت هادي ، شن عاشت باش تكون بالشكل هدا.. رغم انها كان واضح صدها ليه بس كان قلبه ينخص فيه بطريقة غريبة مع كل دمعه تنزل من عيونها مع انها مش ملاحظة وجوده بكل …. وقعد يشاور ف روحه يمشي يكلمها ولالا .. علاش هي تصد فيه هكي كأنه عدو ليها مع انه مادرلها شي ؛

ونزل للكافتيريا جاب عصير ومية وشكلاطة وركب ومشي جيهتها ……

إياد.. أحم، انسة أية
أية.. مسحت دموعها فيسع بكمها وتلفتت ، ايوا ؟
إياد.. جبتلك شوية حاجات تاكليهم لان شكلك ماكليتي شي من امس و وجهك اصفر وشاحب ،
أية..وحد قالك اني محتاجة حاجة !؟
إياد.. زي من صب عليه قردل مية مصقعه وسكت ، اني اسف مقصديش نضايقك …. بس كنت حاب نقولك حسيت بداية تعارفنا كلها ع بعض كانت غلط ، ممكن لو تعرفنا ف ظروف تانية وبطريقة احسن مكنتش هانكون سبب ازعاج ليك ….

أية قامت صبعها ف وجهه وقتله .. اسمعني كويس ؛ مفيش بينا اي تعارف ، ولا هايكون في بينا تعارف ! .. بطل تتدخل ف حياتي بلشكل هوا وخليني ف حالي لو سمحت… متقعدش تتطفل علي حياتي انت غريب عني واني لانعرفك ولا انت ليك اي علاقة بيا مش كان خدمتني خدمة بتنسى روحك وتشدها قروب معاي !!

ع طلعت نورهان وسمعت الكلام الي قالتهوله ونصدمت ،

إياد ، سكت ومعاش عرف شن يقول …. متأسف جداً والله

وكيف بيمشي جاه تليفون رد ….. ايوا محمد ، اني ف مشوار توا جاي … ششششششني ؟؟؟؟ سافر !!!!!!!

ومعاش شافت غير غبرته وهوا نازل يجري علدروج وأية استغربت فيه بس معدلتش ورجعت تلفتت للروشن ،

وجتها نورهان تقربع علارض بتعفليق ولفتها ناحيتها……

نورهان…بصي ! احنا متكلمناش معاكي بخصوص موضوع كرهك للرجالة وانك عمالة تعاملي كل واحد فيهم بإستحقار بالشكل ده ……. بس انك تتكلمي مع الراجل ده بالذات بلأسلوب ده وقلة الزوق دي…وهوا كان بيساعدنا لا أكتر ولا أقل وبيعاملك بمنتهى الأدب كدة ميصحشش ! مالك يابنتي جرالك إي؟؟؟ ليه عمالة تعامليه بلشكل ده هوا قتلك قتيل ولا حاجة !!!! حرام عليكي ياشيخة بقى اتقي الله ف نفسك وف غيرك !!

وخشت من غير ولا حرف اما أية قعدت زي العيل الصغير الي عيونه يتعبو دموع بعد مايكشخو عليه…. هي بروحها مش عارفة هي فعلاً علاش تتعامل معاه هوا بالذات بالشكل هدا….وانه نورهان عندها حق ف كل الي قالاته وانها غلطت وقلت أدبها وتصرفت بوقاحة وهدا مش من طبعها …..

بس شن بدير ؟ احساسها بلخوف ديما محوطها ماشية بقانون.. انا نجرح غيري ؛ بس محدش يجرحني !

خشت بعد ماهدت شوية لسمر ولقتها بدت احسن شوية بعد ماكملت كلامها مع عيلتها ….

اية بضحكة مصطنعه.. شن صار 

سمر.. بالزور لا اقدرت اقنعها اني روح ع سوريا ؛ بس شرطت عليا بخلص امتحاناتي بلاول وبروح بلعطلة يعني بعد اسبوعين من هلأ

أية.. شني ! بتمشي ؟؟؟؟
سمر.. بترجاكي أيوش حسي فيني انا قلبي عم يحترق مافيني ضلني بعيدة عن اهلي بهيك ظروف …
أية.. ماشي تمام ؛ رجلي ع رجلك….وقبل لاتتكلم سمر قاطعتها أية ……وغير هكي والله ماك مخطيتيها !

سمر.. ههه خفت ? طيب مثل مابدك

جمانه …وانا ونورهان هانقعدو بروحنا 

سمر.. بطمن عليهم وبرجع مو مطولة …. لسة ماخلصنا دراسة وبرجع نهائي بعد التخرج ان شاء الله

نورهان.. يعني هانفترق فلأخر ?

سمر.. ماتقولي هيك اكيد ره نضل نلتقى ??.. ييي وينو الزلمة نسي تليفونو معي ماتقولو راح ؟

وشبحت نورهان لأية…..

أية.. روح اي ؛ هاتيه توا نعطيهوله انا …

سمر.. خدي.. وانتو شو رح تعملو بلعطلة ؟

جمانه.. انا بنمشي نزور عيلتي ف واشنطن 

جمانه كانو عيلتها عايشين بامريكيا بس بمدينه تانية

نورهان..وانا هاروح معاها مدام انتو مسافرين مش ح اقعد لوحدي اكيد يعني ?

جمانه.. ههههه تنورينا ? خلاص العشية يكونو عندكم فلوس السفر

سمر.. منين رح تجيبيهم ؟

جمانه.. ماخصك ياحياتي ?

نورهان.. هههههه متحاوليش تعرفي مكتمة علموضوع ، انا مش مطمنة للموضوع?
سمر.. يكونشي ?
نورهان.. يجوزز????
جمانه.. قسماً بالله حيوانات وخسارة فيكم خبزة يابسة ??

وبعد الظهر كتبو لسمر خروج و وصلوها البنات للغرفة وطلعت جمانه واستأذنت ف مشوار ….

ومشت لصايغ ذهب ؛ خلعت من رقبتها سلسلة ذهب ع شكل صليب كانت عيلتها تعطي فيها من بنت لبنت ف عيلتهم لحد ماوصلت في جمانه ؛ ذهب صافي ومزين بشكل مميز عليه اول حرف من لقب عيلتهم منقوش ف وسط الصليب …. كانت عاطيتهولها حناها و وصتها طول ماهي عايشة متخلعاش من رقبتها الا لو موضوع حياة او موت ويستاهل انك تضحي بيه ع خاطره.. شداته شوية وقعدت تتأمل فيه ،ومفيش حاجة تستاهل فلدنيا تضحي بيها غير لصحباتها  بلنسبة ليها مكانش عندها اغلى منهم …… عطاته للصايغ وزنه ونعجب بيه هلبا وحاول انه يقنعها تبيعهوله بسعر اقل بأنه يطلعله عيوب فيه بلكدب بس هي كانت عارفة قيمته كويس وباعاته بلسعر الي هي تبيه….. وخدت الفلوس وحطتهم ف ظرف ورجعت تجري لصحباتها ،وكانو كلهم قاعدين ف دار سمر وأية…

جمانه.. هاي ?
نورهان.. بتلفي فين لحد دلوقتي ياهانم ؟?
جمانه.. مع حبيبي ?.. شدو هاك .. هادو فلوس السفر ليك إنتي وأية

اية.. منين جبتيهم ؟
جمانه.. مادخلكش
نورهان.. خلاص بقى من غير هزار جبتيهم منين بجد !

سمر.. انطقي ?

ولما قعدو كلهم يشبحولها قالت…. بعت السلسلة الذهب متاعي الي عطتهالي حناي

وشهقو كلهم من الصدمة…لان عارفين قيمتها كويس عندها ?

اية.. نهارك احححرف كيف تبيعي حاجة زي هادي !
سمر.. ليششش بس عملتي هيك جنيتي شي !

جمانة.. صدقوني مافي شي ف حياتي اغلى منكم ومن صحبتنا  انتم فداكم مليون سلسلة ذهب … ومنقدرش نشوف وحدة فيكم محتاجة مساعدة وانا ف ايدي نقدمها ليكم ونسكت…. ولو اي وحدة فيكم كانت ف مكاني هاتتصرف زيني .. صح ولا مش صح ؟

سكتو كلهم وسمر دمعو عيونها وناضت حضنتها.. الله يخليلي ياكم ويقدرني اني رد جمايلكم

جمانه.. مافيش جمايل بين الصحاب

<< نمشو لإياد >>

لما نزل يجري من المستشفى اتصل بيه محمد وقاله انه ناض من النوم ملقاش رامز وملقاش حوايجه فلدولاب وشكله سافر وتليفونه يعطي مقفل

ومشاله إياد طول وقعدو ع اعصابهم يتصلو بيه وبرضو يعطيهم مقفل …………

محمد.. خلاص اهدى بإذن الله خير ؛
إياد.. تي ااممما خير الللززفت اني حجزت حتى باش نمشي تركيا ومنها سوريا بعدين العرراق توا وشغلي كيف بندير ونلحقه ! ماعنداش دماغ الزفت ميفككرش
محمد.. متلوماش معليشي.. مش كنت بتمشي من إيران….؟
إياد.. لقيتها هكي اسهل قلت لاش نلف اللفة هادي كلها ?
محمد… بس اكيد المعبر توا بينهم علحدود مسكر
إياد.. لالا اتصلت بولد غادي سألته وقال مفتوح ، وبيسكر بعد اسبوعين ف لازم نلحق … حقا قولي كلمت أهلك علبنت ؟
محمد.. اي
إياد .. وبه ؟ شن صار ؟
محمد…نبع الحنان خرطت عليا خرط لين نحس في فاتورة التليفون بتجي اكسترا علسبان الي سبتهولي ههههههه ??
إياد.. شكله موضوعك بيبدا صعيب ياصاحبي هههه
محمد.. توا بنسافر فلعطلة بعد 3 اسابيع وبناخدها معاي يتعرفو عليها
إياد.. وفكرك بيدخلوها الحوش ؟
محمد.. توا نعرف كيف نقنعهم

~~~~~~~~~~~~~~~~~~

أية .. كيف نرجع التليفون لإياد واني منعرفش نوصله ؟
نورهان.. ماعندكش رقمه ؟
أية .. لا ؛

سمر…جربي افتحي التليفون شوفي أخر ارقام متصل بيهم ودقي لحدا فيهم يمكن تعرفي توصليلو

واية دارت زي ماقالها ولقت رقم قبل الاخير بإسم محمد واتصلت عليه ،

~~~~~~~~~~~~~~~~~~

محمد.. خدي نقاله كان يرن … إياد هدا مش تليفونك الثرايا ؟

بعدين إياد تفكر انه خلاه معاهم قلمستشفى ونسي ياخده…..وقاله اي رد رد وافتح المايك

محمد.. الو
أية .. السلام عليكم
محمد.. وعليكم السلام اختي تفضلي
أية .. لو سمحت نبي نسألك لو تعرف صاحب هدا التليفون توصلني بيه ، هوا عطانا نتكلمو بيه ونساه عندنا واني معنديش رقمه باش نكلمه ونعطيهوله
محمد… ااااااه ، وشاور لإياد متع شن نقوللها ? … قاله قولها اني موجود هني….

محمد.. اهوا إياد جنبي تقدري تكلميه …ودار روحه زعميتك ينادي ? إيااااااد…. مكالمة ?

وخدي إياد التليفون وهوا يضحك عليه… ايوا
… السلام عليكم
أية.. تلبكت شوية بعدين تكلمت…وعليك السلام اهلين …
إياد.. اهلين بيك
أية.. انت نسيت تليفونك عندنا ، وين ممكن نلقاك باش نعطيهولك ؟

واياد ضحك بصوت واطي عليها كيف تتكلم وهي خاشة فبعضها و رد…. بعد ساعتين لو تبي فلكافي الي ديما تمشوله

أية.. سكتت شوية وكانت بتتعفلق بس تفكرت انها لازم تهدى وتتأسفله وقتله تمام…بعد ساعه نتلاقو

نورهان… هييييه ؛ موعد ! ?
أية… قهرتك
جمانه.. شن بتلبسي ?
اية.. ارخو روحكم انا بنعطيه التليفون ومولية مش هانقعد معاه
سمر.. مشاني اقعدي احكي معاه شوي باين ظريف كتير وزلمة 
أية .. لا ?
سمر.. باليز ?
أية.. لا ?
سمر.. باليز ؟
أية… برضو لا?
سمر.. الله ياخدك ?

نورهان.. ههههههه ياحبيبتي يا اية .. ليه متديش نفسك فرصة أنك تعيشي حياة جديدة وتحبي وتتحبي ؟ مش هاتقدري تكملي حياتك كلها كدة يابنتي احنا مش دايمينلك العمر كله البنت فلأخر ملهاش غير بيتها وجوزها وعيالها.. انا مش بقعنك بيه هوا ولا حاجة انا بكلمك عن فكرة الارتباط بصفة عامة متفكريش فلموضوع بالطريقة السلبية دي ! .. ليه مقتنعه ان كل الرجالة وحشة قدامك خطيبي محمود اهو طيب وجدع وشايلني فوق راسه وإيه الي يرضيكي وانا فيه …

سمر.. صحيح كلامها… اعطي نفسك فرصة الحب شي كتير حلو وبيحلي الحياة والدنيا وبيدينا طاقة وقوة لانواجها … وشوفي امك وبيك كيف كانو كتير بيحبو بعضهم وكيف كان بيتكم كتير دافي ومليان حب وحنان ليش ماتشوفي للموضوع من هاي الناحية…. وانتي بنت طيوبة وقوية وأكيد رح تلاقي حدا يحطك بعيونو ويحبك متل ماحب بيك أمك …وبصراحة إياد زلمة باين كتير منيح ومتل مابيقولو الكتاب واضح من عنوانو ! … وكمان هوا ليبي متلك وهاد شي كتير منيح ! معنى هيك انك رح تنتقلي ع ليبيا وترجعي لبلدك وتكوني عيلة هناك وتربيهم متل ماتربيتي انتي ع عاداتكم وتقاليدكم وبلحب ❤

وأية سكتت ونزلت دمعة سخونه من عينها لما جابو سيرة امها وبوها وردت بحدة… وامي وبوي ع قد ماحبو بعضهم ماتو وقعدت اني نتبهدل ونتخبط فلدنيا ، تبوني نحب ونجيب صغار باش يصير فيهم زي ماصار فيا !!

نورهان.. وعشان كدة لازم تفتحي قلبك انتي لازم يبقالك سند وظهر تتسندي عليه.. احنا البنات على قد هانحاول نفضل متماسكين بس برضو هانحتاج راجل ف حياتنا.. محتاجين كتف حنين يطبطب علينا وقت ضعفنا ❤ ومحتاجين حد نحس بلإنتماء ليه…تعرفي حاجة ههههه اجمل حاجة فلحب انك لما تحسيه بقى كأنو ابوكي .. وبيعاملك كأنك بنته ساعات… هايخاف عليكي ويحميكي زي أي اب بيخاف على بنته.. وده شي لا إرادي بيطلع في تصرفات اي راجل بيحب بجد ❤ …. عشان هوا هايحسك حاجة مسؤولة منو?

جمانه.. لا انا نبي نحب بعد الكلام هدا خلاص .. ينفع انا نمشي لإياد ونحبه ؟ ?

البنات..هههههههههههههههههه

أية.. ههههههه مجانين…وخدت التليفون وطلعت ؛ ونادتها نورهان… استني لحظة ?

أية.. اييي تاني ، متمتش المحاضرة مزال !

نورهان.. اسكتي كدة يخربيتك… بت يا جيجي اديني قلم الروج النبيتي بتاعك ???

وأية فتحت عيونها على وسعهم.. رروججج مرة وحدة ! ونبيتي ! لا هبلتي انتي خلاص ?حي عليا اني خ نهرب منكم لانلقاكم ملبسيني حتى قفطان سهرة بعدين….. ?‍♀️

وهربت تجري وقتلها نورهان.. متتأخريش الساعه 8 تكوني فلبيت معندناش بنات يسهرو برا مع رجالة ?

واية تلفتت حدفت عليها شيشة المية وجرت ??‍♀️

~~~~~~~~~~~~~~~~~

إياد لما سكر لقي روحه يضحك زي الاهبل ?
محمد.. وحق ربي لين نسيت انه عندك سنون ياراجل?
إياد..هههههههههه كلب
محمد.. شكلها شخصية مهمة الي اتصلت هادي ?
إياد… ههههه مشعارف شن نقولك ، مشكلة اني مجربتش نحب وحدة ف حياتي كلها باش نعرف الشعور الي اني فيه هوا حب ولا مجرد اعجاب
محمد.. ترا اوصفلي بشن تحس ?
إياد.. مشعارف اني مانعرف عليها شي مستغرب ف روحي اول مرة نتصرف بالشكل الغبي هوا قدام بنت ! كأن في حاجة تانية تحرك فيا مش أني .. قلبي نحس فيه يرف ؛ لو جت عيني ف عينها ننسى حتى نرمش ، كان نسمع صوتها نحسن كأن قلبي وقف ع النبض وكل حاجة فيا توقف بس باش تستمتع بكلامها كأنه أغنية تغذي ف كل جزء من روحي….. مع انها تتعامل معاي بشكل بارد وتصد فيا …. بس حسيت كأنها مربوطة بيا بطريقة ما ❤ .. حسيت كأنها مني .. وسكت وقال

“كنتُ أحسبُها طفلةً حتى إلتقينا،
ووجدتُ أنني أنا الطفلُ أمام عَينيها ? .. ”

ضحك محمد وقال لا انت فتت حتى مرحلة الحب

اياد.. معقولة واني مشفتهاش غير مرات ولا تنين ومتكلمتش معاها ولا نعرف عليها اي شي ! كيف هكي ؟؟

محمد.. الحب مفيشي شروط ولا قواعد، ربي يغرس فيك الشعور هدا تجاه شخص معين حتى لو انت لمحته بس فلشارع صدفة.. وهادي مش حاجة حني نتحكموا بيها ، ربك يألف مابين القلوب بمعرفته سبحانه وتعالى ❤

إياد.. شن معناها ؟
محمد..هههههه يعني انت بعد 32 سنه وأخيراً حبيت ياصاحبي ❤

واياد كيف بيتكلم نفتح الباب وخش رامز…..

وناضوله الزوز يجرو…..

محمد.. انتت وين كنت !!
رامز.. خيركم شن في ?
إياد .. مسافرتش !!!!
رامز.. لا خيركم ،
محمد..مالا وين حوايجك ونقالك خيره مسكر !
رامز.. شي حوايجي نص رفعته المغسلة والنص التاني تبرعت بيه لجمعيه خيرية معاش نبيه بنقص لبس وتليفوني فصل شحن

وشبحو لبعض اياد ومحمد…. بعدين إياد خدي مفاتيحه منغير حرف وطلع

وشبح رامز لمحمد… هدا خيره ؟

ومحمد زفر بتعصيب وخش للبلكونه وسكر عليه وبدي يدخن

وخش رامز للدار وسكر ع روحه ، واتصل بحد وقاله ؛ غدوة الصبح نكون عندك ونسافرو …حوايجي وحاجتي تلقاهم فلمكان الي اتفقنا عليه ومحدش ياخد خبر ، زي ماقتلك ها !!

~~~~~~~~~~~~~~~~~

عند أية ، وصلت للكافي وقعمزت فيه تقرا وتشرب ف القهوة متعها لحد مايوصل إياد…..

ولقت روحها منغير ماتحس طلعت مراية من شنطها وبدت تدير ف روج هادي وبودرا منغير ماتحس.. غريزة الانثى عاد ??‍♀️??

وشافت انعكاس إياد وهوا جاي وراها سكرتها ودارت روحها تقرا ?

إياد…. مساء الخير
أية .. مساء النور ؛ تفضل قعمز
إياد.. يزيد فضلك ، شاف للقهوة وقال i see that u already ordered ?

((قالها ان فات فيك وطلبتي ?))

أية ..ابتسمت وقتله اي ؛ تشرب حاجة استاد اياد ؟
إياد.. مفيش داعي مش حاب نزعجك شوية وبنوض ..ومش ضروري كلمت استاد كل شوية تحسسي فيا اني جدك ?
أية .. ههههه ماشي ، و مفيش اي ازعاج عادي ، وقامت ايدها وطلبتله قهوة تانية ع حسابها
إياد.. هوا المفروض الولد هوا الي يعزم البنت ?
أية.. ههههه عادي التغير حلو

وجاب القرسون القهوة ،

ومدتله أية التليفون وتشكراته بأدب ع مساعدته ليهم ?

إياد.. العفو ? معنديش في جميل واي حد ف مكاني كان هايدير نفس الشي ، المهم صاحبتك احسن توا ؟
أية…. اي الحمدلله بخير ،
إياد.. هههه تمام ، حمدلله ع سلامتها ، وقال يستأذن باش ميزيدش يضايقها اكتر من هكي… خدي شربة من القهوة ….صحيتي علقهوة ? نستأذن منك
أية… اذنك معاك

وتلفت بيمشي ……بس أية نادت عليه قبل لايطلع… إياد

إياد……

يتبع……….>>>|>|

#Mera ? ..

ان شاء الله متكونش قصيرة بس ☹ ، ولو لقيت في تفاعل وتشجعت هانحاول نكتب حلقة اضافية ونزلهالكم مع الفجر ههههه .. صحة شربتكم?

error: