رواية “أحمل قلبك .. أينما ذهبت”

قبل ماتقرو شكراً لانكم أستنيتوني 

الحلقة الثانية عشر ~ ??

مع الفجر ،

كان في حد يتسلل برا داره ….وكيف بيطلع……شافه إياد كان يصلي فلفجر

إياد.. حيدر ! وين ماشي !!
حيدر.. هاي بلدي يا أخي .. مافيني اتركها …..

إياد ……………. ربي معاك ،

وطلع حيدر بهدوء وسكر الباب وراه… مباش يقول لحد أنه ماشي لان عارفهم كلهم بيمنعوه… بس في نفس الوقت حبه وغيرته ع بلاده خلوه مقدرش يستنى اكتر من هكي ومشي ،

أما إياد ف طلع تليفونه واتصل برامز يشوف شن صاير معاه …..

رامز…ههههه قاعد عايش ياوجه الفقر انت
إياد… ههههههه عمر الشقي باقي… تعرف كان نلقاك قدامي توا شن ح ندير فيك ؟
رامز… هاتاخدني بلحضن ?
اياد.. علاش مستنيتش لين نجي معاك ؟
رامز.. ههههه ياودي موضوعك مطول انت ..وبعد ماقالي محمد انك بتمشي مع المدام قلت اكيد بيدوب فلعسل وينسى اصل الي جابونا هههههههههههه
اياد..وسخ ?? .. به قولي شن حالك انت وصلت لعيلتك ؟
رامز.. اي الحمدلله اني فلحوش كلهم بخير اهو ؛ ساعدني عبد المعين الي قتلك عليه ومخلانيش لين حطني قدام باب الحوش
رامز.. ههههه باهي فيه الخير والله ، شنو امتى بديرها
اياد..اني ناقص يكتبو في الوكالة الي نشتغل فيها اياد سعد يقع في عشق البنت الي اسمها اية الصادق بلخير
رامز.. هههههههههههه توقعها عادي انت بديت علمفضوح ? ….هي اقلب وجهك خ نصلي

وع الكلمة هادي كانت أية طالعة تصلي و أول ماسمعت شن قال رجليها يبسو ف مكانهم ومعاش قدرت تتحرك ،

قلبها قعد يدق بقوة عمرها مادق بيها…. وانفاسها بدت تتسارع واطرافها بردت وبدت تصير معاها حاجات غريبة اول مرة تصير معاها 

واول ماكمل إياد مكالمته وتلفت لقاها ف وجهه …. وبدل ماينصدم ضحك ف وجهها واية مزال متسمرة و واقفة مصدومة ??

وقرب منها وخدي إيدها الي كانت بدون اي مقاومة منها إثر الصدمة وحطها ع قلبه …. إي ، اني نحبك  … وأي سؤال سألتيهولي قبل اجابته لاني نحبك  …

أية.. انت ،،، بس … و .. “فقدت القدرة علنطق “?

إياد.. مكنتش نبيك تعرفي بلطريقة هادي … كنت نبي نتقدملك بشكل رسمي باش متفهميش إني نستغل ف ضعفك واحتياجاتك لمصلحتي .. اني نحبك بكل نبضة ف قلبي وكل شريان فيا ينبض ب اسمك يا أية.. اني نبيك تكوني حبيبتي …وزوجتي ..وشريكة حياتي … نبيك تكوني إنتي كل شي وكل صفة انثوية في حياتي ……….عارفك مش مقتنعه ان في راجل ممكن يحب بجديات في حياته…..وانتي اغلى من انه تنقالك نحبك بمجرد كلمة وخلاص.. كنت نبيك تشوفيها ف عيوني قبل كلامي.. نبيك تحسي بحبي ليك ف كل تصرف ليا ..

وهي قاعدة ساكتة ومصدومة ؛ وقامت ايدها

إياد.. منبيكش تقولي حاجة توا … بس نبيك تسمحيلي نكون جنبك في كل وقت صعب في حياتك ….  اني منبيش حاجة من ربي الا اني نساعدك ونكون سند ليك وجنبك ف كل خطوة ف حياتك

وبدت دموعها تنزل لا إرادياً منه ، متنكرش انها بدت ترتاح بوجوده وتحس بلأمان معاه .. بس هاجس الخوف كان مزال متملكها من جميع الجهات …. وردت بصوت كأنه مبحوح… اني بنخش نرقد……

إياد.. تصبحي ع خير 

وخشت تجري لدارها و قلبها بيطلع من مكانه …….. وحطت ايدها ع وجها وبدت تبكي… بس المرة هادي مكانوش دموع زعل….كانو دموع فرح  ………

هيا النظرة الي كان يشوف بيها بوها لأمها.. هي نبرة صوته لما يقوله نحبك… هوا حنانه وخوفه عليها …واخيراً لقت الي تتمنى فيه … لقت الي كانت طول عمرها تدور فيه…. الحب الحقيقي الي ماعمره يموت 

ورقدت المرة هادي بعمق عمرها مارقداته في حياتها

ولما ناضت الساعه 8 ع صوت ام سمر تصيح ، ليشششش بيررووووح من غير مايقووول لحدا ليششش يابني ………

بوهم… خلاص يا مريم اهدي انتي ….. انا رح جرب دقلو ….

ام سمر.. دقلو وحياتك شوفو ويين

وطلعت أية كيف نايضة وتفرك ف عيونها لقت الوضع متوتر ومفهمتش حاجة… ولقت اياد واقف وجنبه ساكو صغير……طبست ع سمر…. شن في ؟

سمر وهي وجها اصفر… اخي حيدر ، باينتو راح ….. وإياد هلأ بدو يروح

إياد… عمي ، ممكن تهدى …… انا هانمشي حتى اني عندي شغل ، وباذن الله هانوصل فيه ونطمنكم عليه

اية.. هاتمشي توا اياد !
اياد.. اي معاش نقدر نتأخر اكتر من هكي ، بس هانرجع بعد اسبوعين وعد
أية… سكتت وقوست فمها بزعل 
إياد بصوت واطي..هانرجع والله مش هانموت ههههه
اية… ??

بوهم.. يابني لك كيف بدك تروح والدنيا مقلوبة هيك !
إياد.. ههههه ياعمي هدا شغلي واكيد عندي طرق خاصة بيا ، متقلقش عليا واني هانمشي ورا حيدر ونطمنكم عليه …..

ام سمر.. اي ابني الله يحميك الله معك ،

اما اية كانت واقفة وتشوفله ومشعارفة شن تقول بالذات بعد الي صار امس ،

و ودعهم إياد كلهم وسلم عليهم و رجع عند أية…. مش هانتأخر ؛ اسبوعين وجاي
أية.. رد بالك ع روحك
إياد.. حاضر ? سلام

ومشي اياد ومشي معاه قلب أية ?..وشن بيصبرها الاسبوعين هادم وبعد مابدت تحس بشوية راحة بوجوده … وهايرجعلها سليم ولالا ?……..

~~~~~~~~~~~~~~~~~~~~~~

عارفة ان التسلسل الزمني للاحداث ممكن يكون ملخبط شوية بحيث ان كل قصة لكل شخصية نرويها تكون بزمن مختلف … بس فلنهاية كل القصص هادم هاتلقوهم ارتبطو ببعض في قصة وحدة وبزمن واحد وباش نوصلو للنقطة هيا وسعو بالكم معاي شوية باش لما نوصلها تبدو انتو فاهمين كل شي <span class=”_5mfr”><span class=”_6qdm”>❤</span></span>

اياد اتفق مع اية بعد اسبوعين يرجع ويمشو لليبيا…….

ومابين هلأسبوعين مش هايكون صار اي جديد……….

ولذلك هانمشو لمكان تاني فلوقت الحالي <span class=”_5mfr”><span class=”_6qdm”>❤</span></span> …

اكيد كلكم تتسألوا شن صار لما مشي محمد في ليبيا لأمه بخصوص إيما ، منسيتش اني <span class=”_5mfr”><span class=”_6qdm”>?</span></span>

خ نمشو نشوفو <span class=”_5mfr”><span class=”_6qdm”>?</span></span> …….

اول ماطلع محمد من حوش امل اخته ومشي لحوش امه …….. قعد شوية فلسيارة يحاول يهدي نفسه لان هادي فلاخير امه ميبيش يعلي صوته عليها……..

ونزل من السيارة وشرين وفتحتله امه….ومنغير حرف خشت للداخل وهوا لحقها ……

وقعمزت هي تكمل فرجة علمسلسل متعها وهوا قعد جنبها ساكت شوية وبعدين …..

نهارت كل العصبية الي كان فيها وتحول فجأة لطفل صغير وقالها بصوت كان قريب للبكاء……علاش واقفتيلي ف طريق سعادتي يام ؟ …. علاش تديري فيا هكي ؟

امه … كتمت الصوت وشبحتله ، مفيش ام فلدنيا تكره تشوف صغارها مبسوطين ومرتاحين في حياتهم ولا توقف في طريق سعادتهم ……. لكن ياولدي نبيك تاخد ليبية تفهم علينا ونفهمو عليها وحدة تصبر ع همك وتكونلك ضهر ليك وقت الشدة … مرا بيتية نعرفو اصلها من فصلها مش وحدة مانعرفو عليها شي وتبيني نخليها كنتي ! والناس الي بيسألوني عليها وع عيلتها شني بنقولهم….واخدلي امريكية كافرة لاصلي لاعبادة !

محمد.. يا امي اني نحبها ، وهي مش كافرة حرام عليك … الرسول قال لكم دينكم ولي دين…. ومن قال كان هي مش ليبية مش هاتكون ضهر ليا وتصبر عليا … اي بنت فلدنيا لما تحب هاتكون الشي هوا لزوجها مهما كان جنسيتها و لونها وطبعها لانها فطرة الانثى الي خلقها عليها ربي ….. وبالنسبة لموضوع ماتعرفي عليها شي غدوة نحجز لاهلها ع اول طيارة وهدرزي وتعرفي عليهم لين تتطمني انهم ناس كويسيين ومربيينها احسن تربية… انتي ربيتيني وكبرتيني وخليتيني راجل وملوي هدومي مش هانعرف نختار بنت تكون كويسة وبنت عيلة نكمل معاها حياتي …؟؟
انتي امي المفروض انك تعرفيني المعرفة الكافية الي تخليك واثقة ف اختياراتي….. وحط ايده ع وجهه ، يام تعرفي كان عرفو امها وبوها ب الي انتي درتيه معاها اقسم بالله هاياخدوها مني ويخلوها تنسى موضوع ارتباطها بيا .. لان حتى هما بشر وعندهم كرامة وعزة نفس ،

امه.. وبلادها! افرض تجوزت وجبت منها وتطلقتو بتاخد منك الصغار وتعيش بيهم برا !

محمد… لو شفتي طيبة قلبها انتي بروحك هاتقولي مستحيل تدير هكي

امه… من الي كان يقعمزلي هوا وصحابه وامريكا وامريكا وامريكا وكل واحد يرمي ف كلمة عليها ! توا زهت ف عينكم وتبو تاخدو منها !!

محمد.. ههههه يامي ، السياسة فجنب ؛ والحياة ف جنب تاني .. مش كل شي نربطوه ببعضه ؛ ايما انسانة مسالمة وع حالها لاليها علاقة بالسياسة ولا واحد… اصلا هدا السبب الي شرتعنا فلبلاد هني… انهم ميعرفوش يفصلو هدا عن هدا.. بدو مدخلين كل شي ف بعضه وبدو الشعب يولي ع بعضهم وهدا غلط..خلوهم السياسيين يخبطو بعضهم وياكلو بعضهم ان شاء الله يتشو النار ف بعضهم… حني مدخلناش ؛ هما يتعاركو ع فلوس ومناصب وكراسي حني شن دخلنا فيهم ؟؟ شن بنستفيدو ؟؟ علاش نربطو في حياتنا بيهم ؟؟؟ حني تلت رباع الهم الي فيه ع خاطر رابطين حياتنا بالسياسة وتعاملاتنا مع الناس ومع بعض بناءاً عليها …

امه… مدخلنيش توا اني فلدوة هيا ، انت شن تبي مني ؟؟
محمد… نبيك تعطيها فرصة وتتعرفي عليها ، وراس ميمتي .. كان ليا خاطر عندك<span class=”_5mfr”><span class=”_6qdm”>?</span></span> راني نبيها والله

امه…………….. ردت بعد صمت لمدة دقيقة ؛ ماشي
محمد.. ماشي شن ! وافقتي !
امه.. موافقت ع ششي ؛ بنتعرف عليها بعدين نقرر.. برا جيبها من امل باش تقعد هني …..
محمد..هههههه اني كنت عارف انك مورقة انها غادي
امه.. مالا شن بتحساب المية تمشي من تحتي منغير مانحس بيها ؟
محمد.. هههههههه ،

مشي محمد جري لحوش اخته مرة تانية ولقاهم المرة هادي بوضع مختلف <span class=”_5mfr”><span class=”_6qdm”>?</span></span> … لقي امل فلمطبخ تعلم في ايما كيف تسقي الكسكسي <span class=”_5mfr”><span class=”_6qdm”>?</span></span><span class=”_5mfr”><span class=”_6qdm”>?</span></span><span class=”_5mfr”><span class=”_6qdm”>?</span></span><span class=”_5mfr”><span class=”_6qdm”>?</span></span>

امل.. لا مشش هكي استني استني ، شوفي ها .. تاخدي المغرف ؛ وهكي بشوية

محمد .. شن تديرو <span class=”_5mfr”><span class=”_6qdm”>?</span></span>
امل.. نوري فيها كيف تسقي <span class=”_5mfr”><span class=”_6qdm”>?</span></span><span class=”_5mfr”><span class=”_6qdm”>?</span></span>
محمد.. هههههههههههه به امل تعالي شوية نبيك ، وخدي امل كلمها ع جنب ،

وبعدين رجعو امل ومحمد …..

وقتلهم ايما شن في ؟ ….

وقالها محمد ان امه تستنى فيه في حوشهم <span class=”_5mfr”><span class=”_6qdm”>❤</span></span>

my mother is waiting for you in our house <span class=”_5mfr”><span class=”_6qdm”>❤</span></span>

ايما…..really !!!!!! “بلحق ”

وقالتها ومن الفرحة قامت الكبشة بلطبيخة فوق من غير ماتحس ونطرت الطبيخة كلها ع امل ومحمد <span class=”_5mfr”><span class=”_6qdm”>?</span></span><span class=”_5mfr”><span class=”_6qdm”>?</span></span>??

ايما.. اسسسفة جدا ، وجابت كلينكس وعطتهم وهي الضحكة قريب تتشرك منها ?

امل.. ههههههههه اهدي بس ? …

ومشت بدلت وخدت الهدايا من امل باش تمشي تعطيهالهم تاني …

ورفعها محمد لحوشهم تاني ❤ .. و المرة هادي استقبلتها امه بابتسامة فوق من خاطرها بس باش متزعلش ولدها….. وبتشوف اخرتها معاه!

~~~~~~~~~~~~~~~~~~~~~~~~

توا هانرجع نكملكم قصة سارة وين ماقفنا المرة الي فاتت …?

لما خبط الباب وفتحت كانت زميلتها الي كانت تساعد فيها في المطبخ ،قتلها انه يبوها فلمطبخ ومشت معاهم ،

ومشت وهي سرحانه ف اول يوم وصلت فيه هنايا ….

بعد مامشت مع اسمهان و وصلوهم للمكان المنشود ،

وكانو خاطمين ع 4 بنات تانين بمختلف الأعمار معاهم ……

نزلت سارة وهي تتفحص فلمكان بعيونها ،علم أسود مكتوب عليه لا إله الا الله

معلق فوق مبنى كبير وقديم وعتيق في تصميمه ، الجدران متاعه متآكلة من الرطوبة … دخل معاهم راجل صديقتها و اول ماشافه متع الأمن فتحله البوابة طول وكأنه شخص مهم …. شكله كان غريب لسارة .. وخافت وشدت في كتف اسمهان ….

ودخلو اول شي مرو بحديقة صغيرة قدام المبنى … كان فيها نخل وشوية شجر ،

ولما وصلو للمبنى ؛ طلع راجل صاحبتهم تليفونه وكلم حد وفتحولهم الباب وخشو ،

استقبلتهم مرا مختمرة ومعاها شخص كان واضح انه زوجها……..

ام طلال… وابو طلال …..

ابو طلال كان قاضي المحكمة الاسلامية ، والمسؤول عن المكان وام طلال كانت مسؤولة عليه برضو وتهتم بشؤون حرم التنظيم وتأهيلهم وتوزعيهم ع ادوارهم ب الي تشوفه مناسب زي مايقولوا …..

استقبلوهم كويس وقدمولهم حليب وتمر ، وسارة كانت في حاجة قابضة علي قلبها وخايفة من نهاية الي كانت تدير فيه …. وتحسست السلسلة الي ف رقبتها أخر حاجة فاضلتلها من هويتها الحقيقية والي كانت كل ماتحس بلخوف تتلمس فيها باش تحس بلأمان … ع قد ماحاولت سميرة تاخد منها السلسلة باش تبيعها بس سارة كانت تخبي فيها منها وتقولها انها ضاعت … لانها تحس فيها مرتبطة بيها وبحقيقتها بطريقة ما…….

واستأذنت ام طلال انها تاخد الصبايا ع غرف الاستقبال وتهدرز معاهم شوية زعميتك…وقعد ابو طلال وراجل صاحبتهم الي جابهم للمكان يتكلمو في شوية حاجات كان واضح انها مهمة…..

دخلتهم ام طلال لغرفة صغيرة وفيها روشن يدخل فلهواء عاطيها جو منعش …

وقعمزتهم وقامت الخمار عن وجهها… كانت مرا واضح انها ف نهاية التلاتين قمحية نقشها علاسود و عيونها بنية كبيرة ….

ام طلال.. اول شي نرحب بيكم في دولتنا الاسلامية … ونحب نطمنكم انكم هنا فلحفظ والصون …. بس شن الي خلاكم تقررو تضمو لتنظيمنا ممكن تحكولي؟..وشبحت لسارة ، نبدو بيك ياكتكوته ؟

وترددت سارة شوية بعدين حكتلهم حكايتها ….

اني اسمي سارة .. عمري 17 سنه ؛ يتيمة..وتربيت ف ملجأ ؛ تبنوني عيلة متعرفش ربي وانا عمري عشرة سنين …. غيرولي اسمي … وبديت بنتهم …لما بديت نكبر ؛ سكتت شوية وطبست راسها………وبدت تحكي ف كل شي يصير معاها منهم

ولما كملت …

أم طلال ، لاحول ولا قوة الا بالله استغفر الله العظيم واتوب اليه ، الناس بدت بدون رحمة خلاص …. معليشي يابنتي باذن الله انتي هني ف ايد امينة …. ومحدش هايضرك باذن الله

وحكو الزوز بنات التانيات قصتهم…. وكانت وحدة فيهم ….عمرها 22 اسمها نرجس وهربت من اهلها بعد ما نخطفت مرة وتعرضت للأعتداء وتغيرت حياتها لحجيم بعدها ف اضطرت تهرب منهم.. ومرا تانية زوجها متوفي واهل راجلها لزوها من حوشها وحرموها من صغارها …. اسمها حور

وكل وحدة فيهم بهمها وقصتها وبعدت ام طلال تسمع لكل واحدة فيهم….

وبعد ماكملو كلام قتلهم تعالو نركبكم لدياركم ترتاحو اكيد تعبانين والصبح هايتكلمو مع كل وحدة فيهم ويوزعو عليهم مهامهم ودورهم …

وسارة راكبة حطت ايدها ع كتفها ام طلال …قلتيلي كم عمرك يابنتي ؟

سارة…. 17 سنه

وركبتهم ع غرفتين كل زوز قعدو ف وحدة ارتاحو فيها لحد تاني يوم …..

خبطت عليهم وحدة ، السلام عليكم

اسمهان..وعليك السلام ، تفضلي
…. الست ام طلال تنتظر حضوركم تحت ع مائدة الافطار، وطلبت مني اعطيكم هدا..وطلبت منكم ترتدوه وانتم في طريقكم لتحت.. تفضلو

وعطتهم كيسة فيها نقاب لكل وحدة فيهم وعباية…

لبسوها البنات زي ماقلتلهم ونزلو ؛

ام طلال .. بسم الله ماشاء الله ؛ شوفتكم تفتح النفس ، تفضلوا كلو إخوتي … وبعد ماتشبعو بخيرات الله هانتناقش فلشغل باذن الله ، طبعا بعتت مع اختنا الكريمة خمار لكل وحدة فيكم.. هدا من يوم ورايح هايكون ملازمكم برا غرفكم طول الوقت …. تفضلو بسم الله

وكلو ماكلتهم وكملو ..وجو قامو الأكل من قدامهم….. ومشت بيهم ام طلال وقعمزت بيهم في جلسة دائرية يقعمزو كلهم حوالين بعض ….

ام طلال.. ممكن نعرف كل وحدة فيكم شن تشتغل ؟

ردت اسمهان.. انا كنت محاسبة في بنك

نرجس .. انا كنت مزال ندرس بس تخصصي لغات

حور..وانا ربة منزل

ام طلال.. ماشاء الله جميل جداً ، وانتي بنتي سارة

طبست سارة راسها بخجل وقالت .. وانا مكملتش تعليمي .. قريت لحد اولى اعدادي ،

ام طلال.. مافيش مشكلة ، شن تعرفي تديري عادي ؟
سارة.. نعرف نطبخ ، ونغسل ونكوي
ام طلال.. جميل جداً ، بإذن الله هانعطوك شغل مناسب ليك …..

وقتلهم تقدرو تركبو ترتاحو ومع العصر بعتت ال 3 بنات ماعدا سارة ينزلولها لوطة…. وجت سيارة ونقلتهم ع مكان تاني …..

ولما سارة قعدت فلدار تستنى لقت اسمهان تأخرت قلقت عليها…… ولبست خمارها وطلعت تدور عليها………

ومشت خبطت ع غرفة ام طلال….. تفضلي بنتي
سارة.. يزيد فضلك ، كنت نبي نسأل على اسمهان بعتولها مبكري ومعاش ركبت وينها…….

ام طلال.. اسمهان وحور ونرجس تم نقلهم لأماكن أخرى يشتغلو بيها فلولاية …. اما انتي ف هاتقعدي معانا هني …..كنت هانبعتلك توا تنزليلي نتكلم معاك

سارة ونظرات الخوف في عينها .. قصدك مشو كلهم وقعدت بروحي !!
ام طلال.. متخافيش هما هايمارسو مهنتهم بس في مكان تاني بس…… اما انتي ف بما انك معندكش اي خبرة ف اي مجال هانخلوك تتولي شؤون المطبخ بلدار … حاجة بسيطة وساهله وفي متناول ايدك … ها ، شن رايك ؟؟؟

سكتت سارة والخوف بدي يتملكها من جميع الجهات وللحظة ندمت ع هروبها من حوشهم ……. بس الي صار صار وقع الفاس فلراس .. ولازم تتحمل نتيجة افعالها ، بس ياترى الايام شن مخبية لسارة بعد مامرت سنه وعرضو عليها الزواج من أحد امراء الدولة الاسلامية ، وشن علاقة سارة بقصتنا فلرواية…؟ وأية وإياد شن هايكون مصيرهم ..واية شن الي هاتعرفه بخصوص بوها ؟ وحنان هل هاتقدر تلقى طرف الخيط الي يوصلها بسارة ؟ وشن علاقة حنان بسارة كل هذا هاتعرفوه فلحلقات الجاية … انتظرونا >>>

يتبع ………. >>>>>>>>>

#Mera ❤

تفاعلوا شوية ع خاطري ☹ ممكن ؟ ☹☹

error: