رواية “أحمل قلبك .. أينما ذهبت”

الحلقة الثالثة ~ ??

سمر.. لالاء انا مافيني اتحمل ، هلأ بدي روح ع سوريا !!!

أية … ششن هبببلتتتتي!!!!!!

سمر …… انا ماحداا حاسس فيني اتركيني مشان الله

أية.. لاحول ولا قوة الا بالله ! اني بنتصل بلبنات معاش قدرت نتفاهم معاكك خلاص …….

وكلمت نورهان وجمانه وقتلهم يجوهم توا ،

ومافتتش دقيقة الا وخبط الباب خبطتين وخشو ، بحكم ان ديارهم لاصقين ف بعض ف وصلو فيسع …..

نورهان وهي مخلوعه .. مالكم في ايي ؟؟ سمر مالك بتعيطي اهلك جرالهم حاجة !!!!

اية…. من اول امس فلليل وهي تتصل بيهم ومش محصلة حد بتخش ف عقلها وتطلع وناضت قتلي بنمشي سوريا تفاهمولي معاها وراسكم عييت ?

جمانه.. يابنتي اهدي بالك الشبكة عندهم متصلحش مدام مفيش اخبار معناها كل شي تمام ماتخوفيش روحك… no news good news !

نورهان…صح زي ماقلتلك استعوذي من الشيطان كدة وروقي ومتفوليش عليهم وبإذن الله مش هايطلع النهار الا وانتي متطمنة عليهم …..

سمر.. بيصير خير بس اتركوني لحالي شوي لو سمحتوا ….

نورهان.. طيب أية تعالى معانا انا وجيجي لحد ماتروق وترتاح

و اية شبحت لسمر ومش هاين عليها تخليها بروحها وهي فلحالة هادي.. متأكدة تبي تقعدي بروحك ؟

سمر.. ياريت

اية .. براحتك ، لو احتجتي اي شي رنيلي وانا هانجيك طول

سمر.. ماشي ? ..

ومشت أية مع نورهان وجمانه لغرفتهم ؛ وزعلانه ومضايقة هلبا عليها لان حاسة بيها وبوجعها?

نورهان.. ماتفكك بقى انتي التانية عليكي قلبت بوز ياساتشيير ?

اية .. هههههه والله زعلانه عليها , من لما بدت الثورة ف سوريا وهي معاش ترقد وطول الليل كوابيس قلقانة عليها
جمانه .. me too .. شن نديرولها به ؟
اية .. مشعارفة هي نطت ف راسها من يومين تبي تسافر وكل شوية تقولي بنمشيلهم …
جمانه .. وكيف بتمشي وامتحاناتها !
اية.. مش قصة حتى امتحانات ياجمانه ، كيف بندبرو حق الفلوس الي بنسافرو بيهم ؟ حني المنحة الي ناخدو فيها يادوب للقراية
نورهان.. اه صحيح ؛ مفكرناش فيها دي ☹

جمانه .. لو صار وبتسافر تنوي هي بس وتخلي مصاريف السفر عليا …

اية .. كيف منين بتجيبيهم ؟ زيك زينا حتى انتي !

جمانه.. ملكش علاقة انا نتصرف خلاص تمينا

نورهان.. هاتبيعي نفسك ! ?

وضربتها جمانه بلمخدة .. حيوانة???

اية.. ههههههههههههه سخيفة ?

نورهان.. قوليييلي ايي اخبار المز بتاع القهوة ?

اية.. جوجو زيديها ضربة تانية ع خاطري بليز ??

جمانه.. تحت امرك ، ورفستها برجلها????

نورهان.. ااااه الهي تتشكي ف عظامك يابعيدة ، وانتي اوووعي تفتكري اني منتبهتش لما زحلقتيني يوم الامتحان وروحتي اتكلمتي معاه ? اعترفي قولتيلو اي وقالك ايييه ????

اية.. ههههههههه معفنه ، شي غير لما شفته يتعارك هوا وصاحبه جاني فضول نوقف نتفرج ونعرف شن في بس ?

نورهان.. مشيها على اهبل ?.. بجد والنبي قلتو اي ?

جمانه.. راك تكبري ? ..

اية .. ياستي شفته يتعارك وبعد العركة حسيته مش تمام ، مشيت عطيته مسكن كان راسه يوجع فيه بس ….

ونورهان زعميتك تعزف ع كمان وهي تدوي وتغني ?.. في حاجات تتحس ؛ ومتتقالشش ?

اية .. لا المرة هيا الردسة تبيها مني اني ؛ وطاحت فيها ردس ? ….. بس وبعدين تأسفلي ع الموقف الي صار فلمكتبة وخلاص

جمانه…. اططططلع ياحق ربي طلع في حتى مواقف فلمكتبة اششهدي يانورهان اشششهد ياتاريييخ اشششهد

اية.. اششي الكلببة التانية انا حمارة الي نحكيلكممم كمشة بقر انتي وياها
نورهان.. يختي بتهزر عليكي منغير أفورة? قوليلنا بقى الي حصل فلمكتبة عشان يتأسفلك

وحكتلهم اية كل شي عليه بلتفصيل ، من لما نخبطو ف بعض لاخر مرة تلاقوا فيها

نورهان.. الله يابت يا أية ? تفتكري هايحصلكو زي المسلسلات التركية وتحبو بعض فلأخر وكدة???

جمانه…البت دي تافهه? .. بس شكله جنتل ع حسب ماتحكي عليه ??‍♀️

اية .. هههه لا جنتل لا سو كلهم زي بعض…. خ نوض نشوف سمر ؛

نورهان.. طيب خدي بالك من نفسك
اية .. حتى انتو تصبحو ?

ومشت أية ……

نورهان.. والنبي انا ماخايفة إلا ع الموكوسة دي .. هاتفضل كدة لحد امتى !؟

جمانه.. معليش هي الي مرت بيه مش ساهل ، توا يجي ولد حلال يخليها تحبه وتغير فكرتها علموضوع متاكليش هم ……

وفجأة سمعو صوت صياح قوي جاي من دار اية وسمر ناضو يجروو الزوز يشوفو شن في…

ولما مشو لقو زحمة الطلبة قدام غرفة اية وسمر تجمعو البنات الي فلسكن لما سمعو صياحها

وقعدو يتجاوزو فيهم لحد ماوصلو للدار لقو سمر طايحة علارض فاقدة الوعي واية تصيح وتبكي وتحاول تفيق فيها ونخلعو لما شافوها بلمنظر هدا وقعدو يفيقو فيها معاها………… وقعدو يشممو فيها ف ريحة قوية ويرشو ف مية عليها وهي ولا بت تنوض

اية.. سسسمر نووووضي تسمعي فيا.. يا سمر افتححي عيونككك سممر … حددد يكللم الاسعاف pleease some one call for heeeelp !!!!

ومافاتتش ١٠ دقايق وصلت سيارة الاسعاف الخاصة بمستشفى الحرم الجامعي ونقلوها لمستشفى الجامعة ومشو معاها ال٤ وهما بيموتو من الرعب

وبعد نص ساعه طلع الدكتور من الحجرة وخشو جمانه ونورهان يشوفوها ………. وأية وقفت تتكلم مع الدكتور …..

وقالها انها تعرضت لضغط عصبي شديد وهي بنيت جسمها ضعيفة هلبا ومتتحملش.. مما أدى لفقدان وعيها بشكل مؤقت وانهم عطوها حقنة مهدئ ومع الصبح تكون فاقت وتبدا تحسنت وتقدر تطلع من المستشفى….. وهي توا راقدة محدش يزعجها …

وعطي لأية اسم ادوية ومقويات ضروري تاخد منها لان عندها فقر دم ؛

وأية قعمزت علكرسي و خدت نفس واخيرا بعد ماقدرت تتطمن عليها..

خافت عليها بشكل لايوصف وتخاف حياتها منغيرها لان حياتها هي سمر وسمر هي حياتها ?..ومش مستعدة تخسر اي حد قريب منها تاني ف وتقعد وحيدة من جديد بعد ماربي عوضها ب ٣ خوات قدرو يصبروها شوية ع الهم الي هيا فيه ?

بعد شوية خشت وطمنت البنات بالكلام الي قالهولهم الدكتور وقتلهم ان هيا بتمشي باش تاخد الادوية الي كتبلها عليهم …و كانت الساعه 8 فلليل ،

وهي طالعه مشت ع رجلها لاقرب صيدلية جنب الجامعه وخدت منها الحاجات وهي مولية لمحت حد كان طالع من باب السكن متع الشباب …

لانهم كانو مقابلين بعض بس بعاد شوية سكن البنات وسكن الشباب كل واحد بروحه …

بس كان ظلام ومركزتش ف ملامحه وطبست راسها وكملت طريقها…

لحد مانادى عليها ، ….. أية ؟

وتلفتت … لقاته إياد …استاذ اياد ؟ اهلين
إياد.. اهلين بيك ههه شن مطلعك ف نص الليل م السكن ؟ ..وشبح لشكارة الادوية ف ايدها ، خيرك لاباس !

واية سكتت شوية بعدين قتله وهي متحشمة.. صاحبتي سمر مرضت ونقلناها علمستشفى متع الجامعة … ومحتاجة شوية ادوية نزلت نجيبهملها…. وكانت تتكلم وتحاول تشوف لأي حاجة قدامها إلا هوا ? ….

إياد.. ان شاء الله لاباس عليها خيرها مريضة ؟؟
اية….. لا هي بس ،،،،
إياد.. بس شني ؟

أية ردت بصوت فيه بحة كأنها بتبكي وشادة روحها.. قلقانه ع اهلها ف سوريا ومش قادرة توصل لحد فيهم ؛ وكانت تبكي وطلبت مني نخليها بروحها شوية فلدار ومشيت و….”سكتت” ….

ياريتني ماخليتها وسمعت كلامها …..وهربت دمعه من عينها من غير ماتحس ? ومسحتها بكمها طول باش ميلاحظهاش اياد ..

إياد.. ممكن نسايرك للمستشفى ؟

ردت أية وقتي وقتله لا…. مافيش داعي

إياد……. طيب ؛ براحتك

وتلفتت اية بتمشي وطول دموعها طاحو لان ضميرها يأنب فيها هلبا ان خلتها فلحالة هادي بروحها ومشت ?

وهي ماشية جي إياد بجنبها بكل بلادة وقال…. الجو صقع هني ولا ?

وأية تلفتتله ونصدمت من جرأته? …. وردت بصوت واطي… إي

ومشو الزوز جنب بعض وهما ساكتين لحد باب المستشفى ،

أية .. شكراً علتوصيل ، نستأذن منك
إياد… هههه اني مش جاي ع خاطرك ، بنشوف صاحبتك ونقولها حاجة
أية.. تقولها حاجة ؟
إياد.. اي ،
أية وقفت وحطت ايدها ع وسطها وقامت حاجبها..وشن هوا الي بتقولهولها هدا ان شاء الله ؟؟
إياد.. هههههههههه …..صدقيني شي لمصحلتها .. انا نقدر نطمنها على اهلها
أية.. بلحق ! كيف ؟؟؟؟؟
إياد.. شن رايك نركبو ونحكيلك فلطريق ؟
أية……سكتت ومردتش لإنها كانت مضايقة من وجوده معاها وتدخله في حياتها للشكل هوا فجأة وتبي تخلص منه بأي طريقه ..

وقعدو ساكتين لحد ماركبو فوق لباب الغرفة خشت أية وقعد إياد واقف برا لحد ماقالت للبنات ع انه برا وانه قال يقدر يطمن سمر ع اهلها ..

نورهان..طب خليه يدخل مستنية اييه !!

وطلعت أية وقالت لإياد تقدر تخش ؛

إياد…. السلام عليكم

البنات..وعليكم السلام ورحمة الله وبركاته

إياد.. ان شاء الله لاباس عليها

نورهان.. انت تقدر توصلنا بأهل سمر ف سوريا !

إياد.. بأذن الله اي …. بس نبي لابتوب بعد اذنكم

وشبحو البنات لبعضهم بعدين قالت جمانه .. معنديش لابتوب بس تليفوني فيه نت !

إياد.. معتقدش ينفع ضروري لابتوب ؛ استنو عندي فكرة…. اني كنت نزور في محمد صاحبي ف سكن الشباب الي مقابلكم مش بعيد على هني ؛ استنوني ربع ساعه نجيب لابتوبه ونجي ……

نورهان.. ماشي طيب بس ربنا يخليك بسرعه ؛

وكانو يتكلمو كلهم بصوت واطي باش متنوضش سمر …..

وطلع إياد بسرعه والبنات ناضو ينخصو ف أية ….

نورهان.. روحي وصليه يخربيتك ميصحش الولد بيساعدنا اممششي

أية..وشن ميعرفش يمشي بروحه ! الي بيدير خير يديره لربي مش لينا

وشبحو لبعض نورهان وجمانه وسكتوا……. وقعدو يستنو لحد ماجاهم إياد تاني وف إيده اللابتوب ،

وخبط علباب واستأذن وخش ؛ وفتح اللاب توب وقعد يدير ف حاجات وهما مش فاهمين منها شي

وجمانه ونورهان نعجبو هلبا بشخصيته واخلاقه واسلوبه وقعدو يغمزو لبعض كيف كل شوية يشوف لأية بطرف عينه من غير ماهي تنتبه ❤

وتمنو انه أية تعطيه وجه وتسايره لعل وعسى تحبه وربي يكتب نصيب بينهم وتلقى حد تنسند عليه وتدير عيلة وتنسى ماضيها وتبدا صفحة جديدة معاه ?

نورهان.. حضرتك بتعمل ايه ممكن نفهم ؟

إياد.. هانفهمكم بس ممكن تعطوني عنوان حوش البنت بلتفصيل وين ؟

وعطتهوله نورهان

إياد من غير مايقيم عينه من ع اللاب….. في برنامج جديد يخدم بلانترنت اخترعوه بحيث المناطق الي يكون مقطوعه عليهم الخدمة والاتصالات بلنت ويقدر يجيب اي مكان عن طريق القمر الصناعي بلجوجل ايرث ويوصل للحي متعهم ويبحت ع اي تليفون يكون ع خط الثرايا “هدا جهاز هاتف معين يخدم بالقمر الصناعي” يستعملو فيه الناس الي يتنقلو بشكل مستمر داخل وخارج المناطق الي فيها تغطية ؛ طبعا فلحروب والحالات الطارئة هادي لازم يكون علاقل واحد او تنين عندهم الجهاز هدا…وانا عندي واحد لما نربطه بللاب وبلبرنامج هدا يدور هوا فلمنطقة هادي ع اقرب شخص ليهم عنده الجهاز هدا ونقدرو نتواصلو معاه نخلوه يطمن ع عيلتها يكون قريب من منطقتهم ….

نصدمو سمر وجمانه وقعدو يشبحو لبعض متوقعوش الفيس الكيوت هدا يطلع منه هدا كله ??

وأية ردت بشكل عادي بكل.. وانت شن يخليك تستعمل برنامج زي هدا ؟

إياد.. ضحك ضحكة ع جنب وقال ، شغلي …….

نورهان..وهوا أي شغلك ؟ فلإتصالات ؟

إياد.. هههههههههه لا ، لحظة ، هوا حصلنا واحد ……

وشرين الخط وطلع إياد برا الحجرة يستنى فيه يرد ويدعي ان شاء الله يكون حد يقدر يساعدنا ،

والبنات يدعوا انه يقدر يحصل حد فيهم …..

ورد راجل على إياد … الو ؟

وقعدو يتكلمو حوالي ربع ساعه بعدين خش إياد والضحكة من الطق للطق ?

أياد.. الحمدلله طلع ولد حلال وف نفس الوقت يسكن قريب على الحارة متع حوش صاحبتكم …. مشي وقتي للحوش واني نكلم فيه وخبط عليهم وطلعو كلهم بخير مافيهمش حاجة وقالي ان الاتصالات مقطوعه عليهم هدا لاش سمر مقدرتش تحصل حد فيهم وكلهم نفس الشي وان الضرب بعيد عليهم…وقالي لو تبي تتكلم معاهم تتطمن عليهم عادي بس قتله يخليها الصبح يوليلهم لو مفيش ازعاج ليه وتكون فاقت باش تقدر تكلمهم وتتطمن عليهم …….

نورهان.. ربنا يفتح عليك ياخويا وينورلك طريقك بجد مكناش عارفين هانعمل من غيرك ايه …

وجمانه قرصت أية وقتلها ف ودنها اشكريه ياحمارة……

أية .. شكراً تعبناك

إياد وجعاته نبرتها الجافة الي تدوي بيها معاه حس كأنها مش طايقاته …

إياد..ولو تعبكم راحة ؛ الناس لبعضها وحني عرب وف غربة واي حد كان ف موقف زي هدا و ف ايدي نساعده مش هانوخر ،

جمانه .. ربي يباركلك هدا من طيب اصلك وخي

إياد.. نستأذن منكم والصبح نجيبلكم الجهاز باش تتكلم مع اهلها وتطمن عليهم بنفسها ؛ تصبحو على خير

اية.. وانت بخير

وشبحلها شوي وطبس راسه وطلع…..

وجت نورهان خبطتها ع كتفها. …..

نورهان.. انتي بتتكلمي معاه كدة ليه !!
اية .. علاش خيرني ؟
نورهان.. مش شايفة نفسك !
اية .. لا☺ وطلعت……

نورهان ..البت دي هاتشلني ??‍♀️

جمانه.. سيبيها خلاص ،

وقعدو معاها لحد ما طلع النهار ☀️❤

ومع الساعه 11ونص فاقت سمر و اول ماقالولها الي صار وفرحت وقدرت تاخد نفسها وقعدت تستنى بلدقيقة امتى يجي إياد باش تكلم اهلها ❤❤

ومع ال١٢ ونص جي ، وخش معاه بوكيه ورد بسيط وشكلاطة ❤ وقالها حمدلله ع سلامتك ، ولابس سورية زرقاء ع سروال بيج يجللط نخبطو فيه كلهم بما فيهم سمر ? أما أية قاعدة قالبة وجها زي البومة ?

واتصل بلولد وبعدها ب ١٠ دقايق كلمهم وكان عند حوش اهلها

وكلمتهم سمر وأول ماسمعت صوت امها بدو دموعها يصبو وتبكي وحالتها حالة ? ..وكذلك البنات يبكو معاها ، أما اية طلعت برا باش محدش يشوفها وهي تبكي …….

سمر وهي تعيط… امي طمنيني علييكم كلكم مناح ! وابي كيفو وحيدر اخي وجدوو !!!!

امها.. احنا كلنا مناح يابنتي انتي اطمني وماتشغلي بالك علينا الاتصالات مقطوعه بلبلد عنا بس كلنا مناح ،

سمر.. امي انا بدي إجي لعندكم انا مارح اتحمل ضلني هيك هلأ بحجز وبجي ضل وسطكم مشان يهدى بالي

امها.. اوعك يابنتي اصلا الطيران والمطارات عندنا مقفولين مافيكي تجي

وسمر بدت تعيط وتبكي وإياد طلع من الدار باش تاخد راحتها لقي أية واقفة علروشن وسرحانه و وجها خالي من كل التعابير ودمعة باردة نازلة ع خدها …..

قعد يشوفلها وهوا يسأل ف خاطره… زعما شن السر الي ورا البنت هادي ، شن عاشت باش تكون بالشكل هدا.. رغم انها كان واضح صدها ليه بس كان قلبه ينخص فيه بطريقة غريبة مع كل دمعه تنزل من عيونها مع انها مش ملاحظة وجوده بكل …. وقعد يشاور ف روحه يمشي يكلمها ولالا .. علاش هي تصد فيه هكي كأنه عدو ليها مع انه مادرلها شي ؛

ونزل للكافتيريا جاب عصير ومية وشكلاطة وركب ومشي جيهتها باش يكلمها ……

يتبع……..<<<<<<

#Mera

نزلتها للناس الي ديما متفاعلين معاي ومبيتش نكسر بخاطرهم ❤ .. توا بنطلب منكم طلب نبي كل الي يتابعو فلرواية المرة هادي بس يديرو لايك باش نعرف كم نفر يتابع فيها ومعاش نتوقع عدد اكتر من هكي ? .. وبعدين معاش يديرو عادي المهم نعرف عدد اجمالي المتابعين للرواية فقط ?❤

وشن توقعاتكم للحلقة الجاية ? أية هاتكلمه ولا تصده وتعطيه ع راسه ?..ونكرر ونعاود الرواية مزال مبدتش?