رواية “أحمل قلبك .. أينما ذهبت”
متأسفة جداً علتأخير بس التغطية متع النت كانت هاربة وتوا كيف جت ?
الحلقة الرابعة عشر ~ ??
كان اليوم الي مفروض أية وإياد فيه يمشو لليبيا ….
أية.. سامحيني ياسمر والله ماهاين عليا نخليك فلظروف هادي ؛ كان بودي نقعد معاك اكثر
سمر.. معليش حبيبتي كلو قضاء ومكتوب ، لازم تسافري هلأ .. مشان تعرفي شو الي صار مع أهلك ، ودمعت عيونها شوية … طمنيني عليكي كل يوم إي ؟
أية.. حاضر ،
وطبطو بعض الزوز وقعدو يبكو ?…
وشبحت سمر لإياد…. دير بالك عليها وحياتك
إياد.. من غير ماتوصي ❤
وسلمو على باقي العيلة وتشكروهم ع حسن ضيافتهم ، اما سمر واية معاش هايتلاقو تاني الا لما يرجعو امريكا …….
وركبت أية للسيارة وقلبها يرجف من الخوف ومشو زي ماجو المرة الي فاتت ؛ وبنختصر عليكم ….
لما وصلو ليبيا ؛ كانت الساعه ١٠ فلليل… خدو تاكسي وطلعو طول
وأية طول الطرييق وهي تتفرج علشوارع والناس ومش مصدقة روحها ان واخيرا رجعت ليبيا ❤
تغيرت ع زمان هلبا ❤ كل شي تغير كأنها ف مكان تاني … بس للأسف التغير كان مؤسف ليها … بعد ماشبحت الخراب في بعض الأماكن العامة .. كانت ديما اتابع فلأخبار بس متوقعتش انه يكونو بلشكل هوا ❤
خدت نفسم عميق وقالت فسرها …ااه..وأخيراً رجعتلك يابلادي.. ورجعت نشم هواك تاني ❤ قداش ما الغربة صعبة وتكسر الضهر ?
وهي تتفرج من الروشن وفرحانه كلمها إياد
إياد.. تحبي تمشي لحوش شاهين توا ولا تعبانه ؟
أية.. لالا شن تعبانه هادي ! هيا نمشو توا
إياد.. متأكدة ؟ لان مرات يكونو رقدو.. الساعه ١٠ توا
أية….. بس ، وسكتت شوية …. نجرب نتصل ؟
إياد.. جربي …..
أية… طلعت الرقم وكلموه من تليفون إياد .. ومكانش في رد
إياد.. كان مفروض نعطوه علم انه حني جايين اليوم
أية……
إياد.. شن قلنا ع البكي حني ؟
أية.. ههههه .. به توا نمشي نحجز ف فندق نقعد فيه لغدوة
إياد.. تحجزي ف عينك تحسابي روحك في امريكا هههه
أية قالت بغصة… مالا وين بنقعد
إياد.. ف حوشنا حني
أية.. نعم ؟
إياد.. هههه اهدي اهدي ، الحوش كله البنات وامي بس وعطيتهم علم انك بتجي معاي
أية.. قصدك يندرو عليا ؟
إياد.. اي قلتلهم بنجيب معاي سائحة امريكية للحوش ?
أية.. هههه بالله عليك ؟
إياد.. هههه والله قتلهم بتجي معاي ضيفة ..وامي اوبن مايند عادي مش زي باقي الامهات ?
أية.. ههه ربي يخليهالك ،
وسكتت وقالت ف خاطرها علاش معاش جاب معاها سيرة ان يحبها تاني 
ومعاش جاب سيرة الموضوع بكل تاني ،
والله حني البنات مصيبة ع قد مانبانو متماسكات وشخصية من داخل زي العيل الصغير ?..
وقالت زعما غير رأيه ؟ … وحست بغصة ورجعت تلفتت للروشن .. وضحكت ع روحها.. طيح سعدك هدا غير متبيش تحبي و واحد ههههه
وانتشلها من تفكيرها اول ماخطمو جنب السرايا وتلفتت لاياد طول… ايااااد بابا كان يجيب فينا وحني صغيرين هني !!! قاعدة زي ماهي ! وكنا ناخدو في بوشار وناكلو فيه وحني نتفرجو ع البط ❤❤
إياد.. ههههههه اكيد حاجة زي هادي من معالم البلاد ولازم ماتقعد زي ماهي ❤ …. وفكر ف حاجة بعدين قال للسواق….. عفوا خوي ، ممكن توقف ع جنب لحظة ؟
التاكسي .. تم هي،
إياد.. استنانا متمشيش ؛
التاكسي.. خود راحتك
إياد….. هي ننزلو !
اية وهي تضحك… هههههه اكيد تبصر انت صح !! الدنيا ليل
إياد… ههههههه اما نبصر هادي وقفت الراجل باش نبصر اني ؟
ونزلت أية تجري زي عيل صغير والضحكة من الودن للودن…ومشت تجري لقدام البحيرة ..وغمضت عيونها وعبت صدرها بريحة المكان ، وف رمشة عينها هادي مر علي بالها صورة بوها وهوا قايمها على كتفه ويجري بيها وهيا صغيرة وامها واحمد يجرو وراهم باش يشدوهم ❤ …
ولما فتحت عيونها ابتسمت ، مجرد ريحة المكان بالذكريات المحملة بيه بعث في نفسها هدوء وطمأنينة… لدرجة نست ان إياد موجود معاها ? …
بينما هوا مشي لمتع بوشار قريب عليهم ، وخدي منه زوز وجي من وراها … ااحم .. تفضلي مدموزيل …… اي خدمات اخرى ? ،
أية.. ههههههههههه لا تقدر تنصرف
إياد.. ههههههههه اشي البيوع ?
أية.. ههههههه ؛ وتلفتو الزوز للبحيرة بعدين قالت ، زعما شن صار مع بابا ؟ وشن هايقولنا عمي شاهين ؟
إياد.. متوجعيش راسك غدوة هانعرفو كل شي ،
أية.. بس اني راسي وجعني من كتر التفكير ،
وتلفت إياد وشدلها راسها ب ايديه الزوز … وهلراس لازم يبطل تفكير شوية ويتعلم ينسى كل مشاكله لثواني ويستمتع بللحظة ؛
وأية وجها بدي احمر وتحشمت ونزلت عيونها ….
إياد.. شوفيلي أية ، وقامت راسها وشبحت لعيونه….. اني نعشقك ❤
أية ……. قلبها بدي يرقص ، و روحها بدت تغني ، قوة قلبها لما ينبض كأنه يبي يكسر ضلوعها ويطلع من بينهم .. يطلع ويضمه ويسكن ويتربع وسط قلبه وروحه ؛ ❤ بس كالعادة مقدرتش ترد عليه مع انه من غير ماتحاول تتكلم ، عيونها فاضحينها ❤ وصوت قلبها الي أي حد خاطم يقدر يسمعه ❤ … ورجعت أطمنت تاني من شكوكها وغاصت ف احلامها ❤
أما إياد ف نزل إيده وكمل سرحانه فلبحيرة وخلاها هي تتخبط بين المشاعر الي خلاها فيها لحظتها …..
وهوا كان يفكر في حاجة معينه ؛ ومش هاتعرفوها قبل غدوة ❤
وقعدو الزوز ساكتين لحد ماقال إياد … هيا ؟
أية.. هي ؛
ورجعو ركبو السيارة ومشو لحد حوش إياد…. وشرين علجرس واية كانت متوترة شوية ،
ولما فتحت أمه الباب…..
إياد.. هههههه الحلوووة صاحية لحد دلوقتي بتعمل اي ؟؟
أمه وعيونها دمعو طول….ترااجي ف وليدها وضي عيونها …….وغمراته وقعدت تبوس وتحضن فيه …..
إياد …ههههه والله استاحشتك ياغالية
أمه…واني اكتر ياعيوني انت خش خش…..وشبحت لأية ؛ انتي اكيد أية صح ؟
أية.. ههه اي اني ، اهلين كيف حالك خالتي
أمه..سلمت عليها ؛ بخيير ياروحي أنستي ونورتي تفضلي حبيبتي خشي من الصقع خشي …..
اية .. الله يأنسك خالتي ❤
وخشت وضبحت امه على خواته البنات وجو يجرو سلمو عليه …….
كان عنده 3 خوت بنات ، و زوز ولاد بس متزوجين ومش فلحوش
والبنات كانو كلآتي :???
ميار الصغيرة …. تقرا تانية تانوي ❤ 16 سنه
نجود الكبيرة … دكتورة كيف متخرجة ومخطوبة ❤ 24 سنه
و أمواج الوسطية .. تقرا قانون ❤ 20 سنه
ورحبو بيها هلبا ولان كان الوقت متأخر متكلموش هلبا وخدتها نجود لغرفة الضيوف باش تبات فيها ??
وبعد مادخلتها رجعت نجود تجري ونقزت ع المندار?
نجود.. محلاها ياوخيتي قداش مارقيقة ولطيفة ههههههه
امه.. اي شكلها طيبة ? .. وخجولة هلبا
إياد.. هههههههه امي ،
امه.. عيونك ميمتك ?
إياد.. نبي نصارحك بموضوع ،
أمه.. اي حبيبي موضوع شن
إياد.. اني كدبت عليك ، هادي مش مساعدتي
أمه.. اه ؟
إياد.. هانحكيلكم قصتها.. بس قبل لانقولكم شي ؛ امي نبيك تخطبيهالي ? اني نبيها
أمه…به ياولدي منين نخطبهالك صلي علنبي وقولي من هيا قبل ههههه
وخدي اياد نفس ومشي للدار تأكد ان اية رقدت لانها كانت مرهقة ، ورجعلهم تاني.. حكالهم قصتها كلها من الطق للطق لحد السبب الي خلاها تجي ليبيا ….
أمه.. يامييمتي عليها البنية مقطوعه من شجرة ? لاحول ولا قوة الا بالله ،
إياد.. اي اني قتلك من توا باش تعرفي ان البنت وضعها خاص ؛ وانها هلبا حساسة فلموضوع هدا وظروفها صعبة … واني ،، نحبها …ونبي نتزوجها ….
أمه.. ياهي ياولدي مدام انت عارف ظروفها من مني بنخطبهالك ؟
إياد.. ح نقولك كل شي بس مش توا لاني ميت من التعب
أمواج وعيونها مدمعه .. ياروحي عليها البنت تسخف مسكينه… معقولة في ناس متخافش ربي هكي ،الله يعلم قداش ما تشردت مسكينة فلغربة وتبهدلت.. حسبي الله في الي كان السبب ،
نجود.. فعلا والله وان شاء الله غدوة تلقى الاجابة الي تشفيها وتريح خاطرها يارب
أمهم.. اميين يارب امين ..
إياد.. يارب ادعولها يام ، وراسك خليك حنينة عليها… صدقيني الا هاتحبيها وهي ابيض من قلبها مفيش بس رجاءاً محدش يفتح السيرة هادي قدامها …
امه .. اني واثقة فيك وليدي وعارفاتك مش هاتختار اي وحدة والسلام ?وباذن الله لو صار نصيب هانعوضها ع حنان الام الي فقداته ونحطها وسط عيوني .. زيها زي بناتي
إياد.. ناض وحب ع راسها ؛ عارف قلبك مفيش من اكبر منه ياميمتي ? ..
وخش إياد لداره تعبان بدل وارتاح ع سريره والافكار ترفع وتجيب فيه ….. لحد ما رقد ….
وعند أية ، ناضت ع صوت أذان الفجر توضت وصلت وقعدت ع سجادة الصلاة تدعي بكل الي ف خاطرها لحد مالقت دموعها يصبو من غير ماتحس …. غدوة من اهم الايام ف حياتها والي بيتعتمد عليه مصيرها … ومرو ساعات ثقيلة عليها لحد ما طلع الصبح ، وقعدت اية ف دارها بعد مابدلت ولبست سورية طويلة زرقاء تحت الركبة وسروال جينز وخلت شعرها مفتوح ، وطقطق عليها الباب …..
نجود.. صباح الخير ?
اية.. صباح الفل ،??
نجود.. ان شاء الله تكوني رقدتي كويس
اية.. اي الحمدلله كان جسمي مكسر من التعب رقدت بعمق …..
نجود.. الحمدلله بنقولك ان الفطور جاهز لو تبي تفطري ?
اية.. لالا شكرا معنديش نية ?
نجود.. لاكيف عاد لازم تاكلي حاجة جاية تعبانة من السفر لازم تتغذي .. مفيش نقاش ييلا نوضي
أية.. هههههه حاضر هي جاية ،
نجود.. هههههههه تمام نستنو فيك ?
وطلعت نجود سبقتها وشوية ولحقتها أية وريحت الفطور تفحفح …
أية.. الله عالريحة الله ?? قداش ليا ع سفرة فطور زي هكي …..
أمهم.. هههههه اي سلم بنيتي صحيحتين كولي باش تقيمي قلبك
اية.. شكرا خالتي?
وجي اياد معاهم … اووو لا بعد هكي فساد ? كان نقولكم قداش مامستاحش نفص الدحي بلهريسة العربية تضحكو عليا
ميار.. هههههههههههههه شني برا معندكمش دحي ولا شن
إياد.. لا بس سبحان الله مفيشي بنة زي هنايا ❤❤ والشاهي مليشي طعم لو مكانش من ايد ست الحبايب ❤
امهم.. ياكبدي اي خودني بكلمتين زي زمان غير توا كبرت معاش تخنب مني فلفلوس بس هههههههههه
البنات ..هههههههههههههههه
إياد لأية .. صباح الخير ❤
اية بأبتسامة لطيفة .. صباح النور ❤
وبدت تاكل معاهم وهما يتبادلو في اطراف الحديث وهي تستمع ليهم ساكته…
استاحشت الاجواء هادي سفرة فطور تقليدية مع طاسة شاهي ومفرش علأرض زال شعور الغربة عن قلبها واستأنست بيهم وبوجودها وسطهم? وقالت ف خاطرها “فعلا الي عايش برا بلاده مش عايش ”
وكملو فطورهم وجت الساعه المنتظرة … ولما قال إياد لأية….
إياد….اية نمشو ؟
وهي فجأة وجها اصفر وقلبها نقبض وردت عليه.. اوك .. نستأذن منكم اني ❤
نجود.. اذنك معاك ،
وخشت غسلت ايدها وطلعت…وهي طالعة نادتها امهم …. بنتي
اية.. تفضلي خالتي ..
امهم.. خودي البسي هادي ، عطتها سلسلة دهب صغيرة مكتوب فيها المعوذات ❤ .. ربي يريح خاطرك يابنيتي ويزيل همك ويفرج عليك…. وأية طول دموعها نزلو وحضنتها ….
ولما طلعو طلع إياد اتصل ب شاهين تاني ورد عليه وقاله انه امس كان راقد وميندريش عليهم جو ❤ وخدي منه النعته وانطلقو لرحلتهم ….
ومش هانكتر عليكم ❤ لما وصلو لحوش شاهين …
وقفت اية قدام الباب ورجليها تسمروا.. قلبها بيطلع من مكانه… خايفة لدرجة انها كانت بتجري وتهرب….. والي انقذها من كل مشاعر الخوف هادي.. لمسة إيده لما شدت ع إيدها….❤
واية باستسلام شدت ف ايده بلقوة ، وارتاحت ? وشرينو علجرس ……
ولما نفتح الباب ،
طول هربو الدموع من عيونها ، لما شافاته قدامها وراسه الي نص شعره طاح والنص التاني شاب ❤ وتجاعيده الي كادت تغير قسمات وجهه النحيف ❤
قال والدمعة ف عينه … والله وكبرتي وبديتي عروسة يابنتي
وطول خداها ف حضنه وقعدو يبكو الزوز ، ??
أية… انت .. مش .. متصور قداش ماشوفتك ردتلي الروح ياعمي شاهين …… اني استاحشتك هلبا
رد عليها وكف ايده على وجها ..واني اكتر يابنتي .. اني اكتر ، وقعد يتأمل في وجهها وقال سبحان الله …. بديتي نسخة طبق الاصل من امك ❤ …
اية مسحت دموعها وضحكت وحطت ايدها ع خصرها…. ههههههه بس اني مزال احلى ع قولت بابا صح ؟
شاهين.. هههههههههه اكيد يابنتي اكيد… تفضلو خشو ،
اية.. عمي نعرفك ، هدا إياد ❤
شاهين.. اهلين بيك ياولدي انستو تفضل تفضل
إياد.. يزيد فضلك عمي ❤
وخشو وقعمزو فلمربوعة
أية.. عمي وين سمية ! “مرته”
سمية طلت براسها من الباب…. سمعت اسسمي !
أية .. هههههههه خالتيي سمييية ???? .. الناس تكبر وانتي تصغري مستحيل ههههههههه
سمية.. ههههههه وانتي شن هلجمال والحلاوة الي بديتي فيها يابنت !
أية.. ههههههه هادي حلاوة عيونك والله
سمية.. تعالي ياروحي اعطي خويلتك حضن ؛ الله يرضى عليها رانيا الي خلف مامتش ..من قال بعد العمر هدا كله نرجعو نشوفوك ونملو عيونا بيك ❤ ميس ومحمود ولدي لو سمعو انك هنايا هايسيبو للي ف ايدهم ويجو طول يجرو ❤
أية.. ههههههههه الله ؛ وشبحت لاياد…. ميس محمود يكونو صغار عمي شاهين كنا نلعبو ديما مع بعض وحني صغيرين
سمية.. هههههههه اين صغيرين توا .. ميس بدي عندها زوز صغار شياطين توا مشيبينها .. ومحمود تزوج توا من شهرين
اية.. ماشاء الله❤
شاهين.. ههههههه وانتي يابنتي مزال مفيش حاجة ؟
وابتسمت اية وطبست راسها.. لحد توا مافي شي ياعمي
شاهين.. هههه يلا ربي يفرحني بيك يابنتي ونشوفك متهنية … وقال لسمية ديريلنا قهوة ❤
سمية.. حاضر هي ❤
وناضت
أية.. عمي شاهين ؛ ممكن …. تحكيلي شن صار مع بابا ؟
شاهين.. هههه اين ممكن ؛ هانحكيلك كل شي❤
أية……
شاهين.. شوفي يابنتي ؛ قبل كل شي اني بنقولك لان من حقك تعرفي كل شي .. لكن انك تديري حاجة بعد الي بنحكيهولك مش هانسمحلك… اني خسرت وبيك مش هانخسرك حتى انتي بعد ماصدقت لقيتك ?
أية.. خوفتني عمي
شاهين.. متخافيش يابنتي طول ماني معاك ، شوفي ….
بوك رحمة الله عليه ، كان زي ماتعرفي يشتغل في جريدة صحفية … وبوك كان من أمهر الصحفيين فلجريدة..وكان ماسك عمود الأخبار الي تخص السياسة ورجال الأعمال
كان في رجل أعمال مشهور وقتها ، أسمه (أ.ن) ….شاب مش كبير فلعمر
إياد.. مش هدا توا بدي سياسي ! ويشتغل تبع الداخلية ؟؟؟ …وبعد الثورة طلع وقال اني مع الشعب والثورة باش يقعد ف منصبه !!!!
شاهين .. هوا بعينه… المهم وقتها كان مجرد شاب ورجل اعمال بس ثقيل شوية ومن عيلة معروفة وليه نفوذ وسلطات ….
في يوم من الأيام ، كانت الجريدة طالبة علي بوك أنه يكتب مقال يمجد فيه الشخص هدا ويتكلم عن انجازاته… كمثال وقدوة للشباب ….. و واجهة مشرفة عن الليبين …… وبوك كان يشجع فلشباب العامل ويحب يكتب عليهم كنوع من التشجيع والتحفيز ليهم …. و وافق ، ومشاله طبعا لمكتبه باش يجري معاه مقابله ويجمع معلومات عن مسيرته المهنية وكيف أنه بدي وحارب وجاهد باش يوصل للي هوا فيه ..وقداش تعب وثابر وأجتهد باش يكون عبرة لشباب جيله……وبينما الصادق كان يتكلم معاه جاله تليفون ، استأذنه وناض يتكلم برا …….. وتأخر شوية كان باين أنها مكالمة مهمة ،
ع خشت السكرتيرة خلت ملفات وعقود علمكتب متاعه وطلعت…..
الصادق كان عنده عيب واحد رحمة الله عليه هههههه انه كان عنده فضول غير طبيعي من ناحية كل شئ …….
وإياد شبح لأية بقيمة حاجب وفهمت هي مقصده ?
و طبست راسها وضحكت…..وهادي حاجة تانية طلعت واخدتها من بابا هههههههه
شاهين… هههههه … وخدي صادق الملف الي كان علطاولة وتصفحه علسريع …..وشاف شي عمره ماكان يتوقعه …….
إياد…. شن شاف !!
يتبع……….>>>>>
#mera ✨
طبعا حلقة اليوم درتها خفيفة وتغيير جوكم ليكم ، لان بتستعدوا للدق ع الرزين الي بيبدا من الحلقة الجاية هههه .. ومتنسوش ديرو لايك ?