رواية قلبي شاريك كاملة

#قلبي_شاريك❤

??الحلقه الثامنه??

يوم الجمعه الصبح حسين تلاقى مع حنان …
والعشيه قال لصغار خوته وخواته عاونونى فالحوش .. اكرم ومعاد ومحمد وعبدالحفيظ… واحد يشري فرش للصاله وواحد دار النوم ..وواحد يستلم المطبخ بماعينه …

?? متنخلعوش هوا مش قاعد يشحت منهم فى هدايا .. لاااا هوا مايقدرش يدير هدا كله بروحه فى زمن قياسى… فقصده كل واحد يعطيه فلوس متع حاجه يتكفل بيها ويديرها …لان الموعد يوم الثلاثاء قريب ..
-سعد: حسين شن بنقولك
-حسين: نعم يا حاج
– سعد: بنديرو عزومه وعشا يوم الثلاثاء انشالله .
-حسين: اللى تبيه ديره يا حاج
– سعد: امالا تو نتصل بعمامكك وخوالك واقاربنا ونديرو عزومه
-حسين: تم ..والفلوس تلقاهم عند امال

___________________________

يوم السبت …
احلام: حنان خودى من بوك الفلوس واطلعى اشري اللى ناقصك ولا بتمشى بحوايجك هادو
-حنان: ماناقصنى شى يا احلام
“مسكينه واخدة ع القلة ..ومش واخدة عالنعيم والشري ”
-احلام: لو انتى متحشمه تكلميه بوك تو نكلمه انا
-حنان: يا احلام انا منبي شى خلاص اسكتى
-احلام تنادى : بوى … بوى
-المولدى: نعم يا حلومه
– احلام : يابوي وين الفلوس اللى عطاهملك حسين بيش تعطيهم ل حنان تشري اللى ناقصها هياوصغارها
-المولدى: فلوس شنو اللى تتكلمى عليهم .. وشد قلبه مسلسل كل مرة ???…
ويلوم عاد … ااااه يا قلبى شكلى بنجلط … ااااخ يا مولدى عشت وشفت بناتك يحاسبو فيك ..
– احلام: والله مانحاسب فيك يا بوى .. لكن عالمسموع الراجل عطاك عشرة لاف دينار
– المولدى: العشرة لاف هادو نصهم سبيزة ولحم ولا يعنى حقى انا
– احلام: سبيزة ولحم متع شنو …وشن شرتنا بيهم انت يا بوى .. احنا لا دايرين عرس ولا موكلين حد
– المولدى: درت عرس ولا مادرتش هادو من حق والد العروس
– احلام: تى باهى من العشرة لاف عطيها الف بس
-المولدى: الفلوس طلعو من الحوش وحطيتهم فى خديمة .. وكان ربحت تو نعطاها منها الف
-احلام : هيا بتمشى يوم الثلاث عندهم .. بتعطاها قبلها ولا كيف
– المولدى: اوووف انتى جايه اديرلنا فى مشاكل.. روحى لحوشك وخلاص …

________________

يوم الاحد جت قمرة ..
وكلمت بوها على نفس الموضوع ..
-قمرة: عطاها عالاقل تشري جلابية كويسة تروح فيها .. ولا تجيب حناية تحنيها
-المولدى: وانتو خيركم يديكم مكسرات ..حنوها
حتى انتو .. واللى عندها جلابية جديدة تعطيهالها تروح فيها وبعتالى تردهالها بلا دوة فاضية
__________

يوم الاثنين

تليفون حنان شرين …
شافت الرقم لقاته رقم حسين …
-حسين: اهلين يا حنان
– حنان : اهلين يا حسين
-حسين: شنو شريتى حاجاتك كلها اللى ناقصاتك ولا نجى انا نرفعك ???
– حنان : والله شن بنقولك عندى كل شى الحق
-حسين ستغرب : شنو كل شى عندك.. حاجاتك القديمه حياة المرحوم بتلبسيها !!
-حنان: لاااا مش لهدرجه
– حسين يبي يسألها شن بتلبسى ومعرفش كيف: احنا دايرين عشا يوم الثلاث لما انتى بتجى.. عازمين فيه اقاربنا بتقعدى بحداهم وبعتالى نروح بيكم انتى والصغار
– حنان: كنت نحساب بتجينا انا والصغار نروحو للحوش طول ..
-حسين: لا بتقعدى معاهم شوى …هوا منسئلك .. انتى شن بتلبسى..
-حنان : الحق مطلعتش .. خاطر صغارى معنديش لمن نخليهم
-حسين زبط الموضوع : بوك عطاك الفلوس
-حنان تلكمست: ااه ايه.. قصدى لا .. قصدى ايه
-حسين :بعتالى العشيه بنجيكم باهى .. قولى لخواتك يجو ..
-حنان: حاضر

_________

جت العشية .. وكانو خوات حنان حاضرين ..
جى حسين …
-حسين ينادى: حنان .. ياحنان
طلعت حنان لقاته حسين
حسها زى نفسيتها مستريحه ..وجهها ابيض وخدودها حمر .. وابتسامتها على وجهها ..
-حسين : تعالى
-حنان: ليش
-حسين: بنخطفك ?
-حنان: لااا اديرها
-حسين: تعالى خودى الاكياس هادو ..ودخليهم لخواتك ..واختارى وحدة منهم وتعالى نراجى فيك برة
خدت منه 4 اكياس
فتحوهم خواتها .. لقوهم دشداشات خليجية ..كل وحدة احلى من الثانية ..
وحدة لونها ابيض.. ووحدة لونها ازرق ملكى.. ووحدة لونها بينج .. ووحدة لونها دم غزال ..
اختارت اللون البينج .. لانه طلع عليها زى الملايكه
طلعت قالتله اخترت اللى لونه بينج ..
-حسين: نفس اللى اخترته انا
-حنان: بلحقه
– حسين : هاتى باقى الاكياس وحطيهم فالسيارة من قدام خلى نردهم لانهم نفس الموديل
-حنان: باهى
فتح كوفينو السيارة من الخلف .. وادا بيها مليانه اكياس …شى مكياج وشى ملابس داخليه .. وملابس حوش … الا الارواب ..ماجابش ولا روب
وجاب لبس للصغار ..وجاب فيلو ابيض لامولا بنتها ..
-حنان: ليش متعب روحك هكى
-حسين: اصحاب المحلات هما اللى تعبو انا والله مانفهم هما يعرفو وحطو اللازم
-حنان: ومع هدا سامحنى فى تعبك وفالمصروف انا والله متحشمه
-حسين: ياستى خوديها عالاقل من باب الصداقه ..

______________________

روح حسين لحوشه اللى بتسكن فيه حنان والصغار ..لقى دار النوم والمطبخ راكبات ..وصالون على جنب مغطى بالنايلو … والشباب فالدار جنب السطا اللى يركب فى دار احمد ورياض ..
لقاهم يهدرزو ..
-اكرم : خلا فيك يا دنيا
-معاد: العاطى حى ياولد الخال
-عبدالحفيظ: بعد ماكانت ساكنه فى حوش كله كرسان ربي عطاها وسكنت فى فيلا
-معاد: تدكر لما كانت المية تنضرب فالحمام وتبدا تنزل عالصاله وتقولنا تعالو عاونونى انشرو معاى البساط
-اكرم: ايييييه ايام ..
-عبدالحفيظ: لكن تصدقونى قداش نعزها
-اكرم: كلنا نعزوها ونحترموها صراحه مراءة ونص
حسين مقعمز على الصالون ويسمع فيهم ..
وجت فى باله كلمت اخته امال .. مش حتندم ..
حس انه دار الخطوة الصح ..
وحس انه عنده نية يعرف كل شى على حياتها القديمه ويشوف قداش كانت تعانى..
دار روحه كيف خاش للحوش ونادى..
اكرم … حفيظ ..كملتو ولا شن صار
طلع حفيظ: كملنا ياعمى .. قعد سجاد الصاله والصالون خليه اخر حاجه
-حسين: شريتو اماعين
-اكرم: شرينا ايه قاعدات فالباكوات ..
باهى صحيتو .. واللى فضلتله فلوس من المبلغ اللى عطيتهوله صحيحتين عليه يخليه فى جيبه
-حفيظ: فضلى هلبا انا ياعمى من فلوس دار النوم
واكرم نفس الشى
ومعاد ومحمد قالو حتى احنا نفس الشى المبلغ اللى عطيتهولنا فضل منه هلبا
-حسين: وانا زى ماقلتلكم كل واحد يحط فى جيبه المبلغ اللى فضله
الشباب فرحو ..صحيت يا عمى ربي يحفظك
_____________________

جى يوم الثلاثاء…
ولبست حنان الدشداشه الخليجية
وسشورت شعرها ومكيجت بالمكياج اللى جابهولها حسين
-احلام: قلتلك نجيبلك مزينه مهداكش ربي ياوخيتى
-حنان: شنو قصدك انا توة مش حلوة?
-احلام: قمر 14 ربي يحفظك
صغارها لابسين ومتكمين ..
-خيريه: ماشالله عليك يا حنونه
-حنان: صحيتى يا عمتى
-قمرة: والله ياعمتى خيريه مفروض طيبنا احنا هنايا العشا
-خيريه: تعرفينى ياقميرة الطياب مايكيدنيش ..لكن الحاجه خديجه هيا اللى شدت وحلفت قالت العشى عندهم .
-احلام: فيها خيرة زى عندنا زى عندهم حنان بنتهم من زمان مش غير توة بس

____________________________

قربت الساعه 7 …
وحنان قلبها يطق يطق يطق
صوت كلاكس سيارات .. شدت حنان صغارها بيديها تقول بيريحو منها
-خش يوسف .. حنان هيا البسى عبايتك اهم وصلو
-خيريه : لابسه عبايتها اهو واتيين وليدى وتزغرط حشيشتها تزغريط عاد هههه
-احلام: من جى بيرفعها اكرم ولا محمد
-يوسف: حسين هوا اللى جى بيرفعها
الكلمه خلت جسم حنان كله يرعش…. توقعت واحد من صغار سلافها يجى يروح بيها ..
طلعت حنان للجنان …
لقت عمتها بريكه سلفتها .. وحماتها امال .. وحماتها فاطمه ..جايين بيروحو بيها .. عادات الليبيين عاد?
هيا طلعت وهما زغرتو ..
سلمو عليها وقعدو يبوسو فيها تقول اول مرة يديروها كنه .. متقولش كانت كنتهم
شدت صغارها من يديهم وطلعتهم معاها .. لابسه نقاب والدشداشة كبيرة والكعب عالى مع هدا حنان تمشى بكل شخصيه .. ومستريحه لانه قرارها …تلفتت جت عينها فى عين حسين …
واقف جنب سيارته ..
دار للباب الثانى ..
فتح الباب الخلفى ركب الصغار
وفتح الباب اللى جنبه وقاللها تفضلى اركبى
ركبت حنان …
سكر وراها الباب
ومشى للباب متعه فتحه وركب
حقه مقلتلكمش حسين شن لابس ..
هدا ياحناتى لابس بدله عالاسود بنطلون وجاكيت .. وسورية لونها سماوى.. لكن مش لابس قرواطه .. ورايح زى الغزال ????
طلعت امولا راسها مابيناتهم ..
-امولا : عمو حشين بترفعنا لحوش حنينه
-حسين : ايه بنمشو لحوش حنينه
-امولا : وبنرقدو غادى
-حسين: لا بترقدو فى حوشى ديما
-رياض: معش بنولو هنايا عمو
-حسين: لا معش بتولو
حسين تلفت لحنان :خيرك ساكته
وقعدت حنان ساكته …
مشو السيارات فى جرت بعض .. وصلو سور الحوش وخشو ….
وقفو السيارات ..
– حنان تلفتت لصغارها :خليكم جنبى وماتتحركوش
-رياض: انا بنمشى مع الرجاله يا ماما
-حنان: لا يا ماما خليك معاى
-حسين: انتى خلى امولا معاك ..ورياض واحمد خليهم معاى…
اول مرة حد يقوللها نشد معاك صغارك ?
-حنان : باهى غير رد بالك عليهم
-حسين: بتوصينى على صغارى
وفتح باب حنان ..ونزلها .. ونزلت وسلمت على عمتها خديجه وباقى سلفاتها وحماتها مفيدة..
جابو العشى وتعشو … وشربو المشروب .. والشاهى
وكلم حسين حنان :هيا اهو بنجيب السيارة وانجيك اطلعو ..
-حنان: الحوش قريب نمشو حتى على رجلينا
-حسين: لا عاد عروسه ادللى اليوم?
-حنان: باهى بنقولك حاجة
-حسين:ادللى
-حنان: بنستادنك فى صغارى منقدرش نخليهم عند حد
-حسين: طبعا جيبيهم قاعدة تشاورى انتى .. واللى يسالك قوليله قالى حسين جيبيهم
-حنان: باهى تمام

______________________

وصلت السيارة .. فيها حسين وراكبين معاه احمد ورياض ..
وقفت حنان تلبس فى عبايتها وكلمت بنتها امولا قالتلها البسى مداسك
-امال: خليهم عندى الليلة يا حنان
-احلام: ولا نروح بيهم حتى انا
-حنان : انتو بتعرفونى اليوم .. عارفينى منقدرش نفارق صغارى
-احلام: براحتك وخيتى وربي يسعدك وانشالله تجيك لقدام
طلعت حنان من الممر.. ونزلت من الدروج ..لقت حسين واقف ركبت للسيارة .. وسكر وراها الباب
حنان مقعمزة فالسيارة ومستغربه علاش واقف يفتحلها فى باب السيارة.. هيا مش متعودة هكى..ولا عمرها شافت هكى..وهوا فى رجاله هكى!!??..

المهم ماعلينا …

ركب حسين السيارة وولعها ومشى يادوبك خطوتين بالسيارة ودرسها ونزلو ..
خشو للحوش …
خشو الصغار يجرو فرحانين ويعيطو هدا حوشنا يا ماما …
-حسين: ايه هدا حوشكم
حنان خشت فى دهول …
عجبها الحوش …
خلى نوصفهولكم…
ياحناتى اول ماتخشى من الممر..تلاقى على يدك اليسار حمام .. وعلى يدك اليمين مربوعه كبيرة فيها زوز صالونات .. تنزلى درجه تلاقى صاله وااااسعه فيها طالون قدامه شاشه بلازما وع اليمين غرفه نساء فيها جلسه ارابيسك وفى اخر الصاله ع اليسار باب المطبخ .. مطبخ دائري لونه فستكى فالابيض فالاسود… وجنبه فى ممر .. اول ماتخشى تلاقى عاليسار دار نوم حنان صينيه بحمامها .. وتمشى شوى تلاقى غرفه ثانية فى نفس الصف فيها دار نوم سندريلا لبنتها امولا .. وتمشى شوى تلاقى غرفه متع رياض واحمد .. فيها دار نوم اطفال سرايرهم سيارات .. وبعدهم عاليمين فى حمام .. وكل غرفه بالمكيف و بالبلازما متعها طبعا والارضيه بورسلين .. والفرش قطع سجاد راقى …
حست انها فتحت مغارة على بابا ..
مسكينه كان تعرفو حوشها الاول كيف …
نوصفهولكم

ارضيه الحوش بالكامل كرسان ماعدا الحمام ??……والمطبخ حتى هوا كرسان فيه دولاب صغير على تركينه وغاز عاطينهولها عيت سعد سلفها لما شرو غاز جديد .. والثلاجه الحجم الصغير شرتها بالتقسيط من اختها قمرة لما باعتها ..والحوش كله فراشات طبعا وحتى دار صغارها …
وهيا عندها دار نوم ليبيه نصها تكسر من الضرب والتخبيط لما المنجوه الاول يجرى فى جرتها ويضرب فيها ..قصدى المرحوم لاول ..ادكرو محاسن موتاكم ??

________________________

المهم صغارها يجرو وفرحانين ..
خشت هيا قعمزت عالصالون ..
وقاعدة بحجابها
-حسين: خودى راحتك الحوش هدا كله ليك انتى والصغار
-حنان: ربي يحفظك ليهم وانشالله مايفقدوك
-حسين: ليهم هما وليك انتى لا ههههه
نزلت حنان راسها تحشمت
-حسين: تى خيرك يا حنان نبيك ترخى روحك شوى
حسيتك هلبا خاشة فبعضك
-حنان: لا عادى غير اول يوم فالحوش ..
جت امولا تجرى
-امولا : دارى زى دار الملكه يا ماما
-حسين: تى ماهو انتى اصلا ملكه
-رياض: واحنا دارنا سيارات سباق ياماما
-حنان: باهى ردو بالكم تحوسو ولا تفسدو حاجتكم
ناضت حنان خشت لدارها وسكرت الباب وراها بالمفتاح …
وقفت مدهولة تقول جناح ملكى بالنسبه ليها مش متعودة يا نارى
سلبت حوايجها .. وغسلت وجهها …
ولبست جلابيه ووشاح ??

“ايه جلابيه ووشاح… شنو تبوها من اول يوم تنحى الحشمه وتطلق شعرها قدامه ??“…

_________

حسين هوا والصغار خشو المطبخ
فتحو الثلاجه .. لقوها بسم الله ماشاء الله …كيك على عصير على موز على فواكه …
-حسين: كل واحد ياخد الحاجه اللى يبيها
-احمد: قالت ماما ماتاخدو شى من ثلاجات الناس
-حسين: لكن هدا حوشكم وهادى ثلاجتكم مش ثلاجه الناس
-رياض تلفت ل حسين : وانت بتقعد معانا فى حوشنا هدا
-حسين: لو مايضايكمش و ماعندكمش مانع ايه بنقعد معاكم ويضحك هههه
-امولا: يعنى انت بتقعد معانا زى منو
-حسين: زى لما كان بابا الله يرحمه ساكن معاكم …. انا فى مكانه توة
-امولا: معناها مفروض نقولولك يابابا
-حسين: والله ياريت انسة امولا .. لو مكنش فيها ازعاح ليكم
-احمد : كان قالت ماما باهى عادى تو نقولولك بابا
-حسين: اهو تو تجى ماما ونسألوها
جت حنان .. لابسه وشاح وجلابيه .. وجهها صافى بلا مكياج ..هيا فيها من براءة الاطفال ….
-حنان: هيا ياسنافر عالنوم كلكم
-امولا : احمد بيقولك حاجه يا ماما
-حنان حطت ايدها على شعره بحنية: نعم حبيب ماما
-احمد : ماما عادى نقولو لعمى حسين يابابا
شبحت حنان لحسين …
-حنان : عادى قولو لو هوا معنداش مانع
-حسين: طبعا معنديش مانع
-امولا: امالا من اليوم بناديك بابا
-حسين يضحك: تم
.
.
__________

دخّلت حنان صغارها للحمام غسلو يديهم ووجهم .. وخشو لاولاد لدارهم يغيرو فى حوايج النوم .. وهيا خشت مع امولا تغيرلها فحوايجها
رقدتها فسريرها …
ومشت للاولاد لقتهم مبدلين رقدتهم فسريرهم
طفت الضى عليهم وولعت السهارات و سكرت الباب
…

كملت صغارها وتبى ترجع لحسين فالصالة … لكن تحشمت معش قدرت ترجع .
خشت دارها ..وسكرت بالمفتاح
وهيا فالدار تخمم ..زعما على شنو رقد مسكين
..عالصالون تو ضهره يوجعه .. زعما نطلع نعطيه مخدة.. لا لا تو يفهمنى غلط ويحسابنى ندحنس….
تعبت من التفكير وقعدت مقعمزة عالكنبه اللى مقابله سريرها لحد مالفجر ادن …
حسين طبعا رقد عالصالون مالاول ماجاشى نوم ..يفكر … عشرين سنه بينى وبينها … عُمر..لما انا كنت فالجامعه هيا قاعدة امها كيف جابتها … فتح كاميرا تليفونه عالسيلفى وقعد يتفرج على شعره .. عالجناب كله شيب..سخفاته
ويخمم فى خاطره : يانارى معندهاش حظ فالزواجتين …. تعب مالتفكير …تغطى و رقد …
ناضت حنان توضت وصلت الفجر..وصلت ركعتين شكر لله عالستر …
_______________________________

ناضت الساعه 9 كالعادة .. وهيا اصلا مارقدتش
خشت المطبخ ..دارت فطور صغارها وحسين …
الساعه عشرة ناضو الصغار وبدت الدوشه …
طلعت امولا لقت حسين راقد عالصالون .. جت تنوض فيه
-امولا : عمى حسين …حقه نسيت .. بابا .. بابا نوووض
حسين فاق يشبحلها مش مستوعب …منو هادى وخيرها تقولى بابا …مرات الانسان تغيب عليه الداكرة جزئيا للحظات ههههه
-حسين: صباح الفل يابابا
-امولا : انت رقدت هنا
-حسين قعمز على حيله: لااا رقدت لداخل فى دار النوم وتوة طلعت نراجى فالفطور خدانى النوم رقدت مرة ثانية
-حنان : صباح الخير
وبردو لابسه جلابيه خفيفه ولابسة وشاحها
-حسين : صباح الخيرات
وقعمزو فطرو .. وقامت حنان الماعين بتنظفهم
-امولا: ماما منطلع نلعب مع ميار بنت عمى
-حنان : باهى غير ردى بالك من التراب
-رياض: حتى احنا بنطلعو يا ماما
-حنان: الساعه 12 روحو شمس عليكم باهى
-الصغار: باهى يا ماما …وطلعو الصغار يلعبو

حسين خش للمطبخ فتح الثلاجه خدى امية
وحنان متلفته لحوض غسل الماعين متبيش تشبح جيهتته بكل
-حسين: اديريلى قهوة
-حنان : حاضر
-حسين : نبيها ناقصه سكر
-حنان : حاضر
-حسين: ولازم نبى معاها حاجه حلوة
-حنان : حاضر
ضحك حسين وقاللها يحضرلك الخير يا حاجه .. ضحكت حتى هيا .. وطلع حسين من المطبخ وقعمز فالصاله

________________________________

الصغار برة يلعبو …

جميلة مرت عمهم عبدالعزيز شدت امولا تقصقص فيها
-جميلة : امولا تعالى
-امولا : نعم عمتى جميله
– جميلة : عمك حسين وين رقد امبارح
-امولا : رقد فى دار ماما
-جميلة بضحكه صفرا: امممممم مبروك عليهم يا حنه ..بري العبى سلم بنيتى
وخشت على عمتها خديجه فالجنان لقتها مقعمزة هيا وبنتها فاطمه يديرو فالشاهى
-جميلة: صباح الخير يا عمتى
-الحاجه خديجه تتكلم منغير نية: صباح الخير والهنا
-جميلة: على دكر الهنا العروس تهّنت ولا شنو
-فاطمه : لا حول ولا قوة الا بالله
-جميلة: وووه ياعمتى سامحينى والله نسيت
تلفتت الحاجه للجهه الثانية ومعش بت ترد عليها .. اصلا معندهاش ليها خلوق
___________

وجى الليل وبنفس الطريقه كل حد رقد فى تركينه

وجى اليوم الثانى …

واليوم الثالث …..

واليوم الرابع فالصبح ….

-حسين: حنان انا ماشى لطرابلس
– حنان: طريق السلامه انشالله
-حسين : ماشى للشركه ومرات نتاخر ..ولو تأخرت وادن المغرب احتمال نبات غادى عند صحابى
-حنان : باهى براحتك
طلع حسين لقى امه وخوه سعد .. بلغهم انه مرات يبات فى طرابلس ووصاهم على حنان والصغار …

_________

طلع بالسيارة ومشى للشركه .. تلاقى مع صحابه كمال وناجى… عز الرفقه من لما كانو فالقرايه مع بعض …
كمال: وشنو الاحوال توة
-حسين : احنا اول امس اتزوجنا .. واتفاقنا كان واضح ومعروف حكيتلكم
-ناجى: وكيف قادر تتحمل
-حسين: انا من اول لحظة مشيت معاها عالاتفاق
..محبيتش نعطى لنفسى الاوكى انى نخترق الهدنه ولااايخطر عليا ندير امور لا تحمد عقباها
وضحكو بالصوت العالى ههههههه

خشو الاجتماع وكملو منه العصر ..
ولقاهم دايريله لفت نضر عالسفرة اللى لغاها الاسبوع اللى فات …وكان عنده شغل ومامشاش
قدم اعتدار انه اتاخر بسبب الزواج ..
-حسين: هيا توة نستادنكم
-ناجى: اعبى على غيرها يا بابا .. الكسكسى متع العرس وراك وراك
-حسين: عزمتكم وماجيتوش شن بنديرلكم هههه
-كمال: انت عارفنا كنا مسافرين الزوز ..وتوة عليك غدى ..وكان تروح تصبح فى زوز غداوات
-حسين:: باهى وين تبو
-ناجى: فى مطعم حوت جديد حاجه مالاخير
-حسين: باهى غير منتاخروش
-كمال : تم ..
ومشو للمطعم تغدو .. من حوت من جمبري من سلاطات من كلمار.. عزومة معاش شهر?

____________

حنان صلت المغرب ودارت لصغارها سندوتشات دحى ..
قالتلهم هيا تعشو وعالنوم طول
-امولا: وين بابا
-حنان: بابا بايت فى طرابلس الليله عنده شغل
-رياض: وامتى بيروح
-حنان: غدوة انشالله
رقدت صغارها وخشت دوشت ولبست قفطان قصير.. ومن فوق سيور .. واخيرا قعدت بروحها وتحررت من الجلابيه والوشاح …
اتحوس فالحوش وتمسح فالطاولات

كملت …
خشت لدارها وسكرت الباب منغير مفتاح .. وخشت للحمام تغسل فى يداها …

سمعت صوت تكة باب الحوش نفتحت …
طلعت من الحمام بتشوف شكون …
فتحت باب دارها واتلاقت هيا وحسين
تلاقت هيا وحسين فم باب دارها …
-حنان: حسين
-حسين عيونه دابلات: ايه حسين
-حنان: انت روحت نحسابك بتبات غادى
هوا ميسمعش فيها هايم يشبح لجسمها من فوق للوطا وفخادها كيف بيض ومواسيات ..
وشعرها المفتوح ..
والحوت ياكبدى دار معاه شغل قوى والحكايه مش تمام ههههع
-حسين: كنت بنبات غادى وبعتالى غيرت رائي
وخش لدار النوم ..ورقد عالسرير
حنان مستغربة فى تصرفه
-حنان: انت شن ادير
-حسين بنضرة رغبه فيها : بنرقد هنايا تعبت من رقدت الصالون
-حنان ترعش : معليشى لو سمحت ممكن تطلع شوى بس وبعتالى خودها الدار
-حسين: وليش بنطلع
-حنان: معليش نغير حوايجى
-حسين: غيري قدامى
-حنان: خيرك شن صايرلك شن تحكى انت ….
وقامت ايدها واشرت بصبعها للباب وعلت صوتها: لو سمحت اطلع برة
-حسين: انا راجلك يا مهبولة خيرك خايفه
-حنان : انا مش خايفه انت اللى الباين عليك هبلت ولا سكران
-حسين: مش خايفه وانتى ترعشى ههه …وانا والله مانى سكران ..اللى يقول الحق فالوقت هدا يقولو عليه سكران
-حنان: انت تعديت حدودك وشكلى بنغير اسلوبي معاك
-حسين: انتى قد الكلام اللى تقولى فيه ??
-حنان : انت الباين عليك متفهمش بالدوق مستفز
وطلعت من الدار ومشت للصاله …
-لحقها حسين : شنو انتى تحسابينى كايد فيك
وقامها على كتفه زى البيبي… وهيا تفك فى روحها منه وتعيط…وتضرب فيه على ضهره ..حول بلاش هبال ..حول يا كداب .. حول الصغار بينوضو
دخلها لدار النوم ورقدها عالسرير وشدلها يديها وحدة عالجهه اليمين..ووحدة عالجهه اليسار..
قعد يشبحلها وهيا تعيط ..
-حنان :حول ايدك وتحشم واحترم نفسك
-حسين: بالك تحسابينى منقدركش.. لكن انا اللى مستحيل نمس وحدة متبينيش
-حنان: ايه منبيكش .. ولا نبي نرقد معاك
-حسين: متخافيش مستحيل ندير حاجه وانتى مش راضيه
وطلق يديها وطلع ….وسكر الباب وراه …

____________

ناضت حنان الصبح راسها يوجع فيها .. لكن لازم تفطر صغارها ملقتش حسين فالحوش ..
و فى خاطرها: والله مانى مكالماته ولا ناشدة عليه …
___________

زعما حسين وين مشى
وشن بيصير فى قصته هوا وحنان
الايام الجايه تو يبان كل شى

نحبكم❤