رواية قلبي شاريك كاملة
#قلبي_شاريك❤
???الحلقه السابعه عشر ???
طقطق الباب ..
فتح رياض ..
-رياض: ماما عمتى امال
-حنان: قوللها تخش
خشت امال للحوش .. سلمت على حسين
-امال: كيف الحال حسونه
-حسين: الحمدلله كيف حالكم انتو
-امال: الحمدلله بخير.. شفت شن صار فالقصه ..وتضحك
-حسين: قصه شنو
-امال: شنو ماقلتيله يا حنان
-حنان تبيش تشبحله: لا لا هوا قعد لاهى فالصغار امتى بنحكيله وخشت للمطبخ
حسين حسها مضايقه
قعد مع امال حكتله المقلب اللى داروه فى وجدان
قاللها صحه ليكم ….
روحت امال …
خش حسين للمطبخ ..
لقى حنان بادية اطيب فالغدى ..
-حسين: شن رايك نطلعو نديرو دورة .. ونجيبو غدى من برة
-حنان: لا ليش اهو بديت نطيب توة خلاص
حسين يبي يحضنها ويبوسها وكل المشاعر اختلطت عليه فى نفس اللحظه .. لكن هوا لااازم يراجى بيش تكون العلاقه بيناتهم واضحه واساسها صح
طلع من المطبخ وقعمز فالصاله …
طلعت هيا وخشت لدارها …
قعمزت عالكرسى اللى قدام المراية وتتفرج على روحها وهيا تبكى تبكى …
وتكلم فى نفسها
مدامه متكم اموره ويبي يتزوج ليش يكلم فيا فالتليفون ويقولى ستاحشتك
شفتى يا حنان ان رايك صح …
شفتى انك نزوة وبعدها بيرجع لحياته وللسفر والسهر والنساوين
تمسح فدموعها ..
كداااب .. كدااااب ويزلبح فيا بكلامه ويبوس ويحضن وهوا كله كدب .. خسيس .. فى واحد يلعب بمرته .. تى انا حلاله يلعب بيا هكى
فالتليفون استاحشتك وهدرزة وجو ..
ولما روح سلام جاف ولا كأنه نفسه اللى كان هنايا قبل اسبوعين ..
لكن انا خلاص اتخدت قرارى وماعنديش حد فى حياتى غير صغارى
ومسحت دموعها ..
وطلعت من دارها لقاته مش موجود فالحوش
_________________
-الحاج سعد : كانك متاكد من خوتك موافقين انا معنديش اى مانع
-حسين: انا مزال متكلمتش معاهم لكن اعتقد انهم مش حيعارضو
-الحاج سعد : اهو تو اناديهم ونشوف
ونادى ولده اكرم وقاله برة نادى عمامك ..
وسألهم وقالوله موافقين …
دارو يوم للنساوين جو شافوها وتكلمو فيها ..
__________
لما جو النساوين يخطبو فى امال
طبعا الكل حاضرين الكناين والبنات
مفيدة مقعمزة جنب جميله
-مفيدة : العقبى لوخى حسين
-جميلة: خيرك وخيتى حسين متزوج
-مفيدة : ماهو توة ندوروله فى بنية .. وبعلمه
وبعدين تنحنحت ..ووك يا جميله ياريتنى ماتكلمت قدامك .. ردى بالك تطلع منك
-جميلة: اللطف يا مفيدة توة انا تعرفينى متع دوة … سرك فى بير وخيتى ????
طبعا مفيدة عارفه ومتاكدة ان جميلة بترفع الدوة لحنان .. وهيا هدا اللى تبى توصله ..
وكله مش على خاطر حسين .. لا لا .. هكى حقد لانها حست حنان متهنية
حنان وامال فالدار
جت جميله ل حنان ..
اتمتم وتتكلم كلمه تقولها وكلمه تنساها
-حنان: خيرك تلكلكى يا جميلة .. احكى شن تبى تقولى
-جميلة : حنونه انتى زى وخيتى ..وانا سمعت كليمه ونبى نعاودهالك
-حنان: ادوى شن فى
-جميلة : قالو يدورو لحسين فى بنية وهوا عنده علم
-امال: تى شن تخرطى انتى
-جميلة: والله مانكدب اختك مفيدة هيا اللى قالتهالى
-حنان حست بالاهانه: ايه عندى علم
-امال: حنان شن تحكى انتى
-حنان: زى ماسمعتى ..وقالى انا ندورله هيا شن دخلها مفيدة
وعم عالمكان صمت غريب نصدمو امال وجميله
_____________
غصتها حنان فى قلبها وسكتت .. مابتش تعاودها لحسين …
هيا متكلمش فيه انه يبي يتزوج
وهوا مايكلمش فيها يبي يستفزها اطلع حقيقه مشاعرها
هوا فى وادى وهيا فى وادى
اسبوع كامل قعده حسين فى الحوش … لا كلمها وقربها …
مجرد السلام عليكم ..عليكم السلام
زعميتا يبيها تحس هيا ببعده وتقرب .. يعطى فيها فى فرصه بيش تتاكد من مشاعرها .. او عالاقل كان متأمل من مشاعرها تفضحها …
وهيا حست انها بروحها
حست باليتم
حست انه كان يلعب بيها
وجعتها روحها …
قلبها معاه … وعقلها مع كلام اخته مفيدة
__________
جو الرجاله الخميس فضو فى امال ..
والجمعه متلاقيين العيله كلها فى حوش العيلة عالغدا
حسين مقعمز جنب خوته ..
هما الاربعه بس مقعمزين يوشوشو مع بعضهم
-حسين: عرس امال كله عليا ..والفلوس عند الحاجه تلقوهم
-سعد : امال وخيتنا كلنا واللى عنده جهد مايقصرش
-حسين : الصاله بنعطاها حقها بعتالى والعشى وكل حاجات القفه .. انتم غير ارفعوها تختار بنفسها
-سعد قريب من حسين: لكن الوقت ضييق هلبا اسبوعين بس والثالث العرس شن بيكفو
-حسين يوشوش لسعد: غير عندى عمل كنهدا راهو درته الاسبوع الجاى ..ياراجل خايف تصير مناوشه بين خوك سالم ونورى ويتفركش كل شى ..انت شفتهم فالفضانية كيف يشبحو لبعضهم
___________
روحو الكناين لحياشهم
وخش حسين لاخته امال قاللها انا بنغيب اسبوعين فالعمل ووصيت الاولاد يرفعوك تقضى
واعطاها ظرف فيه فلوس .. قاللها الضرف هدا للعرس بس ..الصاله والعشى والقفه والحاجات هادى..
فتحت امال الضرف وقالتله لكن هدا هلبا يا اوخى
ومدله ضرف ثانى قاللها هدا خودى بيه حاجاتك انتى الشخصيه كلها ماتنقصى على روحك شى
حضناته وقعدت تبكى …قاللها انتى امولا الغالية شن بتتزوجى كل يوم …
-امال: مش حننسى ليك و لحنان وقفتكم معاى هيا صاحبة الفضل وهيا اللى قالتلى نقول لجميلة ..كنهدا رانا توة فى مشاكل وزعل ..الحمدلله اهو توة الكل راضيين
-حسين: حنان طيبه وتستاهل كل خير
-امال: رد بالك عليها يا حسونه ..وحتى كان تبى تتزوج مزال شوى مش هكى على طول
-حسين: زواج شنو
-امال: مش انت بتتزوج
-حسين بدى وجهه احمر وتعصب: من قالك الكلام هدا
-امال: بكرى قالوه
-حسين: ومن قاله
-امال: قالته جميلة وحكت لحنان
فقالتلها حنان .. ايه هوا شاورنى وانا موافقه وانها هيا قاعدة ادورلك توة
طلع حسين من دار امال بسرعه
قعدت امال تنادى عليه ماباش يرد عليها
ومشى بخطوات سريعه لحوشه …
______________
حسين ينادى .. حنان.. حنان ..
جت حنان تجرى من المطبخ : نعم
بدت امولا تبكى : خيرها ماما
تمالك حسين نفسه وسكت .. قام امولا فى غمره .. يسكت فيها ..لا يابابا معش تبكى ..انا نبى نقول لماما وين العشى …
وقعمز عالصالون … وهوا كاظم غيضه وساكت ..شبحلها وقاللها عشى الصغار ورقديهم نبيك
ردت عليه هيا وصوتها مخنوق وترعش : حاضر
____________
تعشو الصغار ورقدو …
وحنان خشت دارها خايفه منه
جى حسين طق عليها باب الدار : اطلعى نبيك
-حنان ترد من ورا الباب بخوف: خيرك شن تبى
-حسين: افتحى الباب
-حنان: لا منبيش
-حسين متعصب : افتحى بلاش دلع ..افتحى ولا والله نكسره الباب
-حنان ترعش : باهى اهو بنفتح ونطلع
حول حسين من قدام الباب مشى للصالة وعيونه حمر
طلعت حنان لابسه جلابيه وفوقها مالية صوف ووشاح على راسها وهيا ترعش مع بعضها
قاللها تعالى قعمزى عالصالون
ترعش باللى فيها …
وبدت بلا وعى منها تبكى بقوة: والله مادرت حاجه ..والله ماطلعت من الحوش ..والله ماشكيتش لاى حد ولا حكيت عليك
جى حسين قعمز قدامها على ركابه وحط ايده على كتافها : خيرك ترعشى
-حنان قامت راسها تبكى: والله مادرت حاجه وتبكى وتبكى وتبكى
-حسين: عارفك مادرتى شى خيرك اهدى .. وليش لابسه مالية الصوف فى هالنو هدت
-حنان: مش انت بترضبنى .. بش منحسش بضربت العصا
يارووووووحى قداش سخفتنى ?
-حسين: وليش بنضربك انا .. وكيف نضربك
-حنان : امالا ليش تعيط عليا
حط ايده على راسها وضمها لصدره
-حسين: اششسش حبيبي خلاص معش تبكى… انا معيطش عليك خيرك اهدى
-حنان: تبكى وخلاص
-حسين: خلاص اهدى .. اهدى
وشربها امية ..
وحولها وشاحها
وقامها بين ايديه ورفعها لدارها .. رقدها على سريرها وغطاها …
قعمز عالكرسى متع الموبيليا
قعد يتفرج عليها وهيا تبكى …
بدت تهدا بالشوى ..
بدت تسكت …
جى قعمز جنبها عالسرير .. وضمها رقدها على يده
-حسين: شنو هدينا حبيبى
حنان ساكته
-حسين: سمعينى صوتك
-حنان: ايه خلاص
-حسين: انا امتى قلتلك اخطبيلى
-حنان: لا انت ماقلتليش انا
-حسين: امالا شنو
-حنان: قلت لناس ثانية
-حسين: ضحكو عليك وزلبحوك
-حنان: شنو غير هما بس اللى ضحكو عليا وزلبحونى
وناضت من حضنه قعمزت عالسرير ..وهوا مقعمز جنبها ..
-حسين: انتى ليش قلتى انك بتخطبيلى
-حنان: لانى عندى كرامه
-حسين: من كرامتك انى نخطب ونتزوج
-حنان: من كرامتى انى نكون عارفه ..مش الناس هيا اللى تجى تبلغنى
-حسين : مش قلتلك هبله
-حنان: ايه هبلة لانى صدقت روحى
-حسين : جاوبينى نبى ليش قلتى انك بتخطبيلى
-حنان: لانك قايل لاختك مفيدة تخطبلك.. وهيا باعتتلى الدوة مع جميلة عارفتها تعاود فاللى تسمعه
-حسين: باهى وبعدين
-حنان: خلاص كرامتى معش قدرت ..قلتلهم حتى انا عندى علم وانت طلبت منى انى نخطبلك
-حسين وقف: بااااهى صار الدوة فيها مفيدة وجميله
حنان شداته من يده : خيرك وشن بدير
– حسين: تو نعرف انا كيف نتصرف مع تريسهم انا منكلمش نساوين
-حنان: باللهِ عليك لا ..مديرليش مشكله معاهم
-حسين: كدابات الزوز .. اقسم بالله العظيم ماقلتلها مفيدة ادورلى مراءة .. ليش خيرها المراءة اللى عندى تسواهم كلهم
-حنان فرحت: باهى مصدقاتك وعلى خاطرى ماتتطلعش وتكلمهم
حسين قعد يشبحلها وهيا تترجى فيه .. حط ايده على خدها اليمين
-حسين: توة انا بنضربك يا حنان
-حنان : لانك تعيط
-حسين: ولابسه لبس غليظ
-حنان: من زمان ندير فيها بيش منحسش الضربه
-حسين: باهى نوضى بدلى هالحوايج
-حنان: باهى اطلع خلى نبدل
-حسين: نقولك حاجه .. لو طلعت من الدار اقسم بالله انى ماشى لراجل مفيدة وخوى عزيز ونعرف ناخد حقى وحقك منهم
-حنان: لا تربح
-حسين: امالا منيش طالع انا خلاص حلفت
-حنان: اهو نخش للحمام نبدل
وناض حسين سكر باب الدار
طلعت حنان من الحمام لابسه فستان وردى قصير ..
قاللها حسين تعالى
قعمزت جنبه عالسرير ..
سكتو الزوز .. هوا يشبحلها .. وهيا مواطية عيونها متحشمه
قاملها راسه بيده .. احكى اللى فى خاطرك
-حنان: ليش اسبوع كامل هاملنى
-حسين: نستفز فيك
-حنان: نهون عليك
-حسين : انتى اسألينى ليش قبل
-حنان: ليش
-حسين: لانى نحبك
-حنان: واللى يحب هكى يدير
-حسين : لانى نبى قلبك .. وانتى هاربة وداسة كل مشاعرك …
-حنان: انا خايفه من الحياة بعد سنين او حتى بعد شهور
-حسين ضمها ليه: متخافيش منى .. متخافيش من قلب يحبك
وقعد ضامها .. ويقوللها ستاحشتك
حولت من حضنه .. وبدلع قالتله باهى هيا اطلع ..
ناض قاللها براحتك
وتلفتلها .. لكن انا حالف والله كان طلعت توة بنمشى طول لخوى عزيز وراجل مفيدة
-حنان: ونهون عليك تفضحنى
-حسين: ونهون عليك توة نطلع ومكيف الصاله مايخدمش ..
-حنان: حسين بلا جو خلاص
-حسين : جى ضمها لصدره وقاللها انتى خلاص عدبتينى وقطعتينى بالعرق
وبدى يبوس فيها …
قريب ربع ساعه
دابت بين ايديه
قعمز عالسرير وشبحلها: مزال ماحنيتيش عليا
– حنان: انا قلتلك منقدرش نمنعك
-حسين : وانا قلتلك نبيها برغبتك
حطت راسها فحضنه.. وقالتله انت مش ليا
-حسين: بس انتى ليا انا بس
وقعد يبوس فيها مرة ثانية …
فتحلها بطمه القفطان .. وقعد يبوس فى رقبتها..
ونزل لفتحه القفطان يبوس فيها …
وانتهى كل شى … هيا متبيش .. وهوا مايبيش يغصبها …
طلع من باب الدار..
رقد عالصالون …
وجسمه كله رغبه …
وياااااليله شن يطلع صبحك
__________________
ناض حسين الصبح فطرو وبصرو وضحكو ..
وتى حوايجه .. وبيمشى للعمل
-حسين: نحبك
-حنان: باهى
-حسين: بلي ريقي بكلمه بس
حنان تضحك
-حسين: تبى حوايج للعرس ولا
-حنان: الحمدلله عندنا كل شى
-حسين: حنان جو الفقر هدا قلتلك اطلعى منه
-حنان: باهى نبى للصغار حوايج
-حسين: الصغار بناخدلهم منغير متقولى ..انا نحكى عليك انتى …العرس فالصاله..عندك قفطان مناسب
-حنان: عندى الدشداشة اللى جيت فيها
-حسين: لا لااازم تشري قفطان كبير
-حنان: باهى تعالة وبعتالى ساهل
-حسين: تبى نخليلك مبلغ
-حنان: ومن بيرفعنى.. روح انت وبعتالى ساهل
-حسين: متبيش تمشى تشري معندكش من يرفعك ولا تبى تمشى معاى
-حنان بدلع: امممممم نبي نمشى معاك
وقف ضمها وباسها .. وقاللها نحبك
-حسين: يا عمرى انتى قداش نفرح من قلبى لمانشوفك فرحانه …نبيك ديما تضحكى.. انتى مانخلقتيش للزعل والنكد .. انتى انخلقتى للفرح والسعادة
انتى نخلقتى بيش انا نعيشك ملكه ..
ونخليك اسعد امراءة فالدنيا
??????
__________
حسين مشى وقعد عشرة ايام بس .. وطبعا كلها مشت حب ومكالمات ..
وسلفاتها يطلعو ويشرو ويتجعدو عليها
وهيا مش معدلة عليهم .. تستنى فى حبيبها يطلعها
روح حسين والعرس مزاله عشرة ايام ..
__________