رواية قلبي شاريك كاملة

#قلبي_شاريك ❤

???الحلقة الخامسة عشر ???

حنان تفطر فى صغارها ..
وحاسة بالملل
ومستاحشة حسين
ومشاعر مختلطه عليها
طلعو صغارها يلعبو مع صغار عمهم
حطت الصابون فالغسالة ..
وخدت تليفونها .. فتحته ..
مفيش مكالمه منه ولا رساله من يوم ما مشى
فتحت الرسايل وكتبت رقمه
كتبت لحسين رساله ..
كلمتين بس
“وينك!؟ نسيتنا؟”
حطت التليفون و ناضت من مكانها
رن التليفون تنبيه وصول رساله
فتحتها
لقتها مرسله من حسين …
“ننسى روحى وماننساكمش”
ردت حنان برساله “معناها زعلان”
حسين ” هلباااا لكن مش منك ..زعلان من نفسى”
ردت هيا “الصغار ستاحشوك :
-حسين: “وانتى !؟”
حنان: “ربي يردك لينا بالسلامه ”
حط حسين تليفونه عالكوميدينو جنبه .. طق الباب .. فتح ..لقى كمال صاحبه
فتحله الباب ورجع اتكى عالسرير .. وحط يده اليسار على راسه وفاتح تليفونه بيده اليمين يقلب فيه عالرسايل يعاود يقرا فيهم
-كمال: كنت تكلم فيها
-حسين: لا بعتتلى رساله ورديت عليها
-كمال: هدا غير حالف مش حتكلمها
-حسين يضحك :حلفت عالمكالمات لكن عالرسايل لا
-كمال: قصتكم غريبه
-حسين: ستاحشتها ياراجل هيا والصغار
-كمال: الله غالب مكتوب علينا نفارقو احبابنا وصغارنا بالايام والشهور

طبعا حسين وكمال وناجى صداقتهم من النوع النفيس .. وعشرة شنين ..ويحكو لبعضهم فى كل شى

________________

يوم الجمعه العيلة كلهم متلاقيين عالغدا وحنان والصغار معاهم
-امال : زعما كيف يصير ..دبريلى يا حنان
-حنان: متخافيش حسين قالى مدامها هيا تبى بنعطيها ان رضى سالم ولا مرضاش
-امال : انا نتمنى يكون الكل راضى
قربت منهم جميله : خيركم توشوشو
-امال : لا مافى شى نهدرزو وخلاص
– جميلة غمزت لحنان : سمعت اسم حسين
-حنان ابتسمت: ربي يرده سالم
-جميلة: هوا البعد بين الراجل ومرته ديما ينحى المشاكل لانه يروح مستاحشها
حنان سكتت
-امال: هكى قولك انتى
-جميلة: شنو امولا بدينا نحكو ونسألو عالمتزوجين والزواج ..
وغمزت جميلة لامال: شنو فى حاجه..نقولو مبروك

“زى ماحكيتلكم جميله دكية ولماحه ومايفوتها شى ”

-الحاجه تنادى: يا جميله .. وين الكاكاوية ؟!
-جميلة: عطيكم الهنا جيت نكلم فيكم ونسيت الكاكاوية
-امال: مش منك من التقصقيص اللى فيك
وضحكت جميلة
وطللعت تجرى وخلتهم بروحهم
__________

حنان لما سمعت كلام جميلة خطر عليها خاطر..
-حنان: امال نقولك حاجه
-امال : قولى
-حنان: احكى لجميلة على موضوعك
-امال: مستحيل
-حنان: وراسك ماتبدا الا دايرتلك حل
-امال: زعما هكى تقولى
-حنان: نوعها خبثية وديما عندها حلول
-امال: قوليلها انتى
-حنان : باهى
ناضو الزوز وخشو للمطبخ ..
لقو جميلة تقلى فالكاكاوية ..
-جميله: وجه البومه خيرها متنوضش من مكانها ???
“قصدها على سلفتها وجدان مرت سلفها سالم ”

-امال: اللى يبي يدير حاجه اهو قدامه واللى مايبيش براحته
-حنان: امولا ديما تهدى فالامور.. غير كيف بنديرو بعد تطلعى من الحوش يا حبيبه
-جميلة : هيا تمشى وتتهنى وانا نحل وراها المشاكل ههههه
– امال: قولى كان مش زدتيها انتى
-جميلة تضحك: ههههه يعطيهالك

“ديما جوها مليح جميله ومش حراجه”???

-حنان: هوا تبى الحق يا جميلة حنان جايها موضوع
-جميلة : باهى كويس الف مبروك امولا
-حنان: لكن فى مشكله …

_________________________

-حسين متكى على سريره : لكن هيا صغيرة عليا وفرق العمر هلبا ومرات معاها حق
-ناجى : فرق العمر اللى بيناتكم مش قصه .. فى اللى تزوجو على علاقه والفرق بينهم نفس الفرق بينك وبينها
-كمال: بالك نزوة يا حسين.. مسكينة ايام وينكسر خاطرها
-حسين: المرة هادى غير …وحط يده على قلبه .. المرة هادى فى حاجه تحركت هنا
-ناجى: حلو الحب .. تدكر زمان لما تغطى عليا فالعمل ونطلع نمشى لمواعيدى
-حسين: ربي يخليكم لبعض اهى توة بدت مرتك وام بنتك
-ناجى: وحتى انت حنان مرتك ..وسيورها ح تكون ام صغارك .. حقه نبو نعرفوهم على بعض راهو
-حسين: ليش لا ..غير خلى تتساوى الامور

___________

-جميلة: غبارتك غبارة..ومالقيتى الا العيله هادى تاخدى منها
-امال: والله ماكنت نعرف انه خوه
-جميلة : خلينى نفكر فى حيلة وتو نقولك
-حنان: فكرى يا جميلة نعرفك فالحه
-جميلة : غير الصبر بس خلى نستوعبو هالمصيبه
اليوم خلونى نفكر وغدوة بادن الله نقوللكم
___________

___________

روحو كلهم لحياشهم ..
حنان خشت لحوشها .. عشت صغارها ورقدتهم
وفى كل زاوية فالحوش تشوف فى حسين
وكيف يبصر عليها
وكيف يضحك ويعلق عليها
تكلم فى نفسها ..
حنان انتى تحبيه ..ارخى روحك معاه .. مش غلط .. وكانا مشي بعدها عادى المهم تكونى عشتى مرحلة حب فى حياتك ولو لمرة وحدة
___________________________

حسين فى غرفته
يكلم فى روحه …
ستاحشتها
وستاحشت صوتها
ودلعها عليا
لكن انا حالف انى مانتصلش ..
توة معقولة هكى رساله منها اليوم ادير فيك …
حركتلك اللى كان غايب
فتح التلفزيون .. برنامج شعر شعبى

شاعر يغنى .. يقول
طاح الشال وبأن شعرها..
الله يقهرها
كي ما قهرتني ب منظرها
بان شقاها…لا قدرت نقربها ولا نخطاها

ريت زولها سبحان من سواها
عناق ريم جفلت عارفه موكرها
سهيت معاها بي مشيها وخطاها
عجيب مشيها سبحان من صورها
نسكت انظني خيرلي #ننساها
وناري عليها في خاطري نظمرها
وحق من امصور الجمال عطاها
جميله و شامخه في طباعها موعرها…

ومع كل كلمه كان حسين يتخايل فى حنان .. وكيف مرة تدلع عليه وتقرب .. ومرة تصد فيه وتباعد ..

_________________

حنان معش قادرة تصبر وتكلم فى نفسها: كلميه واسألى على احواله مش عيب
قامت تليفونها ..
اتصلت ..
الخط ينادى…
حسين تليفونه يشرين جنبه .. فتحه لقاه حنان تتصل بيه … فرح … ونفس الوقت قال انا حالف انى منكلمهاش …
ويكلم فى نفسه ..” انت حالف ماتتصلش بيها مش حالف متردش عليها فى فرق ”
” رد مقنع الحق ?????”
معناها عادى لو رديت عليها …
فتح الخط ورد
-حسين: يامساء الانوار
-حنان: اهلين كيف حالك يا حسين
-حسين: تعبان
-حنان: خير انشالله العمل متعبينك
-حسين: العمل مقدور عليه .. ناس ثانية هما اللى متعبنى
-حنان: قلت نجى احسن منك ونسأل مدامك انت ماتسألش
-حسين: منبيش نضايقك
-حنان: باهى انا متبيش تسأل عليا خايف اضايقنى .. عالاقل اسال عالصغار
-حسين: نكلم فى سعد خوى كل يوم نطمن عليهم
-حنان بدلع : صار هكى يعنى تكلم فى سعد كل يوم وانا لا .. زعلت منك
-حسين: كل شى الا زعلك ياغالية .. لكن سعد يبينى وما يضايقش منى هدا علاش نكلم فيه
وجت مكالمه على تليفون حنان خشت فالانتضار
حسين سمع صوت المكالمه متع الانتظار
-حسين: منو يكلم فيك توة الساعه 12 انشالله خير
-حنان: هادى جميلة مرت خوك .. توة بتقعد تلكلك فى منو تكلمى عقاب الليل ..هدا علاش قلتلك منحبش يكون تليفونى فالانتضار فالليل
-حسين: باهى ردى عليها وعاوديلى
-حنان : باهى
سكرت منه وردت عليها
-جميلة: كيف حاله الغالى انشالله بخير وقريب يروح
-حنان: منهوا
-جميلة تضحك بخبث: اللى كنتى تكلمى فيه
-حنان: وبالك كنت نكلم فى وحدة من خواتى
-جميلة : باهى تعاندينى انك كنتى تكلمى فى حسين
-حنان: جميلة شن تبى والله تعبانه ومارقدت الصغار لين درهولى كبدى
-جميلة: تعبانه ولا تبى تسكرى خاطر قالك ردى عليها شويا ونعاودلك
-حنان?: انتى بالك رايق هيا تصبحى على خير
-جميلة: تعالى جاى خيرك خلوقك بدو فى شيشه من وقت ما مشى للعمل … بنقولك على موضوع امال
……..لقيتلكم خطه مش عادية
جميله دوتها هلبا وحنان مستعجلة..
-حنان : غدوة نتلاقو واحكيلى انا وامال مع بعض
-جميلة : خلاص غدوة تعالو افطرو عندى ونهدرزو
-حنان: فطور لا منقدرش … لكن تو نجيك غدوة نتلاقو انشالله ونهدرزو ..تصبحى على خير
-جميلة تضحك : ليلتك سعيدة وسلميلى عليه …
سكرت حنان التليفون …
ومشت طلعت التليفون السري اللى جابهولها حسين
واتصلت بيه
رد حسين : الو
-حنان: احسن مافى الموضوع ان الشفرة هادى متعرفهاش جميلة
-حسين: احسن مافى الموضوع انى سمعت صوتك
قعدو يتكلمو من 12 للساعه 3
حديث مبطن .. خارجه كله لوم وعتاب انه ماتصلش ..وداخله كله حب واشواق كل واحد للثانى
-حنان: غدوة نكلمك ولا متبيش
-حسين: كلمينى طبعا بيش عالاقل نطمن عليكم..
-حنان: باهى
-حسين : هوا بنقولك اتصلى انتى احنا مسكرين علينا الاتصال الايام هادو ..التليفون يستقبل بس
وهوا فالحقيقه مايقدرش يتصل لانه حالف مايكلمهاش لين يروح ونسى انه قاللها انه يكلم فى سعد ويطمن ???
المهم هيا فاتت عليها طيوبه يانارى
-حنان: باهى انشالله نكلمك غدوة..توة تصبح على خير
-حسين: بنقولك حاجه
-حنان: نعم
-حسين: الاسبوع هدا تعبت فيه هلبا وكأنه 7 سنين لانى ماكلمتكمش ولا نعرف عليكم شى .. متخليش حتى الاسبوع الثانى هكى ..خففيه عليا شوى
-حنان تضحكز?: حاضر من عيونى .. ليلتك سعيدة
-حسين: يسلمولى عيونك ليلتك عسل
وسكرو الخط

_____________________

ثانى يوم حسين نايض للعمل نشيط الساعه 6 بالرغم ساهر طول الليل ..
-ناجى: شنو الاحوال تغيرت ونشطنا
-حسين يضحك
-كمال : ترا فتش تليفونه عليه 3 ايام صيام
-حسين: لا والله ما اتصلت .. لكن هيا اتصلت
-ناجى: خطوة ممتازة ربي يسعدكم

_________________________

حنان ناضت فرحانه
فتحت تليفونها بتشوف الساعه
لقت رساله
من حسين .. “صباحك هنا ياعمرى انا ”
ردت عليه برساله … “صباح الورد ”
هيا متعرفش تقول الكلام المعسول زيه هوا ….
فطرت صغارها وحاست فالحوش وطيبت الغدا وطفت عليه …
وطلعو هيا وصغارها
مشت لحوش سلفها عزيز
لقت امال قدامها …
-حنان: شنو الخطه يا جميله
-جميلة : صلو عالنبى
-حنان وامال : عليه الصلاة والسلام
-جميلة : كانا ليك عند الكلب حاجه شن تقوله
-حنان وامال فى صوت واحد : تقوله ياسيدى

_______________

زعما شنهيا خطه جميلة
وهل بيصير من خطوبة امال والا لا …
نحبكم❤