رواية قلبي شاريك كاملة
#قلبي_شاريك❤
??الحلقه الواحدة والعشرون ??
الضهر ادن
احلام تراجى فى حنان بيبدو فالحلويات …
-احلام: مئاب كلمى خالتك وينها
-مئاب : كلمتها تليفونها خارج الخدمة الشفرة مسكرة
-احلام : باهى كيف نديرو توة
-مئاب: اهو رقم مرام عندى خديته منها فى عرس عمتها
-احلام: باهى كلماها قولليلها تعطيك خالتك
اتصلت مئاب ب مرام ..قالتلها نبى نكلم خالتى حنان
لبست مرام عبايتها وطلعت ..
مشت لحوش حنان ..
قعدت اطقطق
وحنان مش قادرة تنوض وتفتح .. يادوبك تتحرك ..
وصلت للباب ..
فتحت لقتها مرام
-مرام: مئاب بنت اختك تبى تكلمك
-حنان : هاتى التليفون .. واتصلت ..ردت مئاب ..
مئاب : اهلين خالتى وينك نراجو فيك
-حنان: مشششش حنقدر نجى ى ى ى … و ابعتيلى صغارى مع ااااااحمد ….
وسكرت
لدرجه مئاب استغربت خيره خالتها اتمتم
____________________
روحت مرام للحوش
اتصلت باحمد …
-مرام: الو حبيبى جيب لخالتك تليفونها مئاب كلمت على رقمى بش حصلتها
-احمد: ومرام من عطاها رقمك ..صار فى تطورات من وراى
-مرام: بش تعرف بس
-احمد: اهو بنجى امى قالتلى نرفعلها صغارها ..وتو نعطيها تليفونها ..
-مرام : ايه احسن
-احمد : باهى اطلعى ديري روحك ماشيه لحناك نبى نشبحك ستاحشتك
وقاعد داير روحه رومنسى وجه البومه هدا ودر خالته ???
________________
حفيظ واكرم ومحمد واقفين على سيارة اكرم
فاتحينها من قدام ترا شن يصلحو …
جى احمد بالسيارة ومعاه صغار خالته ..
وقفه حفيظ : تفضل احمد وين خاش شن تبى
-احمد : شن حالك يا حفيظ ..خاش لحوش خالتى بنعطاها صغارها شنو ممنوع
-اكرم يهدى فالوضع : هاتهم تو نعطيهملها ..
والصغار طول فتحو الباب ونزلو
-احمد: باهى المهم اهى الامانه وصلت
وطلع يسب ويلعن …
ونسى التليفون متع حنان عنده
حنان خدت صغارها من اكرم وهيا ساكته
دخلتهم وسكرت الباب
___________
خشت للمطبخ طيبت الغدى
وطلعت ..لقتهم محوسين الصاله …
ضمتها ..
جابتلهم الغدى …
هييييياااا تعاللللو كوللللو
اتم اتم …
جوها صغارها خيرك يا ماما مريضه
-حنان: لا غيررررر نابتتتتتتلى حبة فى فمى
وهيا يا نارى لسانها انعقد ….
وتاريتها مش اول مرة تصيرلها ..حتى مع راجلها الاول كانت تصير معاها
المهم ماعلينا…
العشيه لعبو صغارها فالحوش …قاللولها يا ماما خلى نطلعو نلعبو مع صغار عمى
قالتلهم لا مفيش طلوع ….
____________
حسين صاحب العمايل شن صاير فيه زعما
شادها خدمه وخلاص ..
مقعمز فى الكفيتريا متع الشركه .. ويهدرز مع الشباب
باعتبار توكه ناجى وكمال مش معاه المرة هادى
سألهم عالايفون
-نجيب: الايفون عنده حاجه اسمها ايكلاود تعطيك تليفونك بمن اتصل ومن اى تليفون استقبل مكالمه
-حسين: المشكلة الايكلاود هدا منعرفاش فتحولى ولد يخدم فى محل ونسيته الحق لانى نستعمل فيه اتصالات بس التليفون
-نزار : تقدر ادير استرجاع .. اطلع المكالمات الممسوحه كلها وتعرف تليفونك وين كان وعند منو
-حسين: باهى كيف
وقعد يشرحله نزار
__________________
اليوم الثانى …
حنان والصغار فالحوش ماطلعوش بكل ..
واكرم يبي يرد لخالته تليفونها معش عرف كيف ..دسه فى داره فى الكومودينو لين هيا تجى ويحطه فى شنطتها منغير متحس…
مايحسابش خالته صايرتلها مشكله من تحت راسه هوا والتليفون ..وجه الكاشافيتا هدا
____________
اليوم الثالث
دور حنان مع عمتها …
دوشت حنان لصغارها وطلعتهم قدامها مشو لحوش حناهم .. دارت الفطور وهيا ساكته بالصدفه لقت سعد قدامها
-سعد: خيرها حنان ساكته مريضه ولا شنو يمى
-الحاجه: مندرى عليها
-رياض: ماما عندها حبة فلسانها
شبح سعد لامه .. زى اللى فهم حاجه
نادى عليها
-سعد: حنان ترا جيبيلى اميه
جت حنان حطت المية قدامه ومشت
-سعد: حنان تعالى
-حنان: نننعم
-سعد : خيرها بنتى
-حنان عيونها دمعو: شششى
الحاجه سكتت ..
طبعا اسرار حنان القديمه كلها عند عمها سعد
وهوا عارفها لما تجيها تلكليكه فلسانها يعرف انها قعدت تعيط بالقوة …
جتها زمان مرة راجلها الاول محمود شد ولدها رياض
قعد يخنق فيه
زعميتا يتشطن بيربيه ماهو محمود مش على عقله …
قعدت حنان تعيط وجتها زى تلكليكه فلسانها ..
وهلبا مرات صايرتلها …
فعرف انها مغتاظه ومعيطه ..
لكن استغرب حسين متطلعش منه العيبه
-سعد: انا بوك اهنا .. وحقك ناخدهولك ثالث ومثلث
-حنان: مافى شششى عمىىىى
-سعد : براحتك لكن امتى ماتبى تشكى باب حوشى مفتوحلك
والحاجه بردو ساكته .. عارفه ان فى عملة صايرة لحنان..ومفيش غير حسين ..
قعدت حنان للمغرب .. دارت زميته للحاجه تعشت وقالتلها برى روحى وارتاحى فى حوشك
____________________
اليوم الرابع
احلام جابها راجلها خالد تشبح فى اختها حنان ..لانها روحت منها مريضه عندها الشقيقه يومها ..
حنان وجهها دابل ..
-حنان: واللللله يا حلومه غير الشقيقه دايرتلى هكككككى
-احلام: باهى نرفعوك نعاينوك يا وخيتى
-حنان: سلم وخيتى لا لاوالله مانبى
فى نفس اليوم ..
حسين يكلم فى سعد يبي يطمن عالصغار وسعد مايبيش يرد عليه
انشغل حسين اتصل باكرم
-حسين: انشالله خير..خيره الحاج ميردش عليا
-اكرم : الحمد لله يا عمى .. بوى فى خيار الخير ..غير اكيدة ماشافش مكالماتك
زاد حسين اضايق اكثر
_______________
اليوم الخامس ..
مئاب اضم فى الحوش
خشت دار احمد اضم فيها ..
فتحت القجر بتحط فيه الحاجات ..
لقت آيفون
قعدت تشبح فيه عرفاته تليفون خالتها حنان
خداته وطلعت بيه
-مئاب: ماما تليفون خالتى حنان لقيته
-احلام: باهى يابنيتى لقيتيه ..خالتك قاعدة بلا تليفون ..وين لقيتيه!؟
-مئاب: لقيته فى قجر احمد شكله واحد من صغار حنان حطه غادى
-احلام: ماتطلع الا اموله هيا 24 ساعه شاداته تلعب بالالعاب
-مئاب: خلى نكلم احمد يرفعهولها ??
-احلام : كلميه قوليله تعالة ارفعهولها
-مئاب: تتصل باحمد .. التليفون يشرين
-احمد : الوووو
______________
حسين فى غرفته يفكر فاللى صار
وقلبه معصور
ويتحلف
غير خلى نلقى التليفون وتو نعرف كيف ناخد حقى انا
وقعد يتخايل فى جسم حنان كيف ابيض وصافى …
وكيف من تحت نضيفه وبيضه ومافيهاش ولا شعرة
كيف جسمها ناعم
وبعتالى يفيق على الخيانه …ما حرهاااا
_____________
-مئاب: احمد تعالة تبيك امى بتبعتك لحنان
-احمد: تى فكينى منهم الصرصريه هادو صغار سلفها بنتعارك معاهم ..وبعتالى نخدم عالماكينه توة انا مش فاضى
-مئاب: تى ماهو احنا لقينا ..
توووت تووووت … ولدك صكر عليا الخط يمى
-احلام: كلمى مرام وقوليلها تعطيك خالتك
-مئاب: لا لا شنو كل يومين منقعد نكلم فيها امالا
-احلام: نقولك كيف.. كلميلى حسين خلى نقوله ويعرف هوا كيف يبلغها
خدت مئاب التليفون متع امها واتصلت برقم حسين .. وعطاته لامها
حسين متكى على سريره ..
شرين تليفونه
لقاه رقم احلام ..انخلع اكيدة حنان صارتلها حاجه
رد عليها
-حسين: الووو
-احلام: كيف حالك يا حسين
-حسين: الحمدلله بخير
-احلام : غير نبو حنان ومعرفناش كيف نوصلوها
-حسين: خيرها
-احلام: لقينا تليفونها طايح عندنا ونبو نقولولها .. كلم واحد من صغار خوك تبعته يرفعهولها غير احمد قال مش فاضى توة
حسين ناض وقف ..قعد يرعش ..مخلوع من اللى داره …. مصدوم …..اختلطت عليه الاحاسيس
-حسين: وين لقيتوه
-احلام : قلتلك اهنا عندنا
-حسين: احمد جنبك
-احلام: لا احمد فالعمل
-حسين: باهى منو جنبك توة
-احلام مستغربه : مئاب بحداى
-حسين: ترا اعطيهالى
-احلام: مئاب خودى كلمى عمك حسين
-مئاب : الو
-حسين صوته مخنوق: مئاب ترا كانا فيه شحن افتحيه التليفون
-مئاب : هوا مقفل خلى نفتحه ونشوف
وقعدت تفتح فيه ..مافيشى شحن
-حسين: باهى اشحنيه وكلمينى لو عندك شحن ايفون
-مئاب:ايه عندى شحن ايفون متع تليفونى باهى عشرة دقايق ونعاودلك
بالله منين بيلقوه التليفون مشحون كانا احمد هاديكه الليله كلاله كبده شاده للصبح ????
_______________________
حنان ادوش لصغارها
-حنان : منلبزووووش حوايجكم باهى
-امولا : حتى انا منطلع نلعب يا ماما
-حنان: نصصص ساعه وتخشو بااااهىىى
-رياض: انتى قاعدة مريضه يا ماما
-حنان: ايه يا مااااما ما تعبوووونيش باهى
_____________
حسين مستعجل اتصل برقم احلام ردت مئاب
-حسين: شنو انفتح ..
-مئاب : ايه اهوا حصل شوية شحن وانفتح
-حسين: نقولك على خطوات ديريها فالجهاز باهى
-مئاب: باهى
-حسين: خشى الاعدادات .. وبعدها خشى …..
وصل فى اعادة الارقام المحدوفه …
وقاللها اعطينى القائمه
اخر اتصال الرقم……….. 091 3
واللى بعده……… 091212
قاللها هدا رقمى انا ..وقال فى خاطره يهمنى الرقم الاول …
-حسين: كم مدة المكالمه متع الرقم الاول
-مئاب : المدة سبعه ساعات
_حسين انصدم : هوا هدا الرقم اللى يدور فيه .. وقاللها خلاص صحيتى طفى الجهاز وخليه عندكم تو نجى انا ناخده وماتقولى لحد انكم لقيتوه
__________________
اتصل حسين بالشاب اللى كان يهدرز عليه فالكفيتيريا
-حسين: كيف حالك مهندس نجيب
-نجيب: اهلين خوى حسين
-حسين: عندك المنظومه متع المدار… قصدى كان نعطيك رقم تعرفه باسم من
-نجيب : عندى ايه
-حسين: امالا اهو نبعتلك رقم فى رساله شوفهولى باسم منو وتو نعاودلك …
بعت الرقم فى رساله
خمسة دقايق وعاودله نجيب
الرقم باسم مراءة اسمها جميلة خليفه محمد
حسين انصدم .. قعد ساكت ….
وبعتالى فاق
شكر نجيب .. وسكر
ناض وقف على حيله الشفرة باسم جميلة مرت خوى عزيز
شن جاب جميلة لتليفون حنان تكلمها 7 ساعات
شن دخل… وادكر ……مرام
مرام تكلم فى احمد
ماعندهاش تفسير ثانى
ودايرة شفرة سريه باسم امها
حط ايديه على وجهه .. وقعد سكت
ويردد اللهم انى لا اسئلك رد القضاء ولكن اسألك اللطف فيه
____________
قعمز حسين على سريره
وهوا يبكى
عرف روحه غالط
كيف بيعتدر
كيف بيجبرلها خاطرها
كيف بيتصرف
ضرورى يروح لانه ماتنحلش المشكله بالتليفون
طلع مشى للادارة خدى يوم اجازة امر طارئ يبي يروح للحوش
وبالفعل عطوه اجازة يوم واحد ..وروح للحوش ..
فات اول شى على حوش احلام خدى التليفون وروح للحوش
_______________
وصل حسين قيس المغرب للحوش
لقى امه وسعد وسالم مقعمزين برة
درس سيارته
نزل
-حسين: السلام عليكم
-خوته : وعليكم السلام
-الحاجه : مرحبتين بوليدى.. شنو روحت بكرى المرة هادى
-سعد ناض من مكانه: هيا نستادنكم انا توة
ومشى ..
لحقه حسين .. يا حاج …ياحاج
تلفتله سعد
-حسين: خيرك يا حاج انشالله خير
-سعد : خيرك مفهمتش
-حسين: متردش على تليفوناتى وتوة انا جيت وانت نضتت
-سعد: شن داير لحنان يا حسين
-حسين وجه تغير: هيا شن حكتلك بالزبط
-سعد : هيا متحكيش .. كانها تحكى وتفضح راهو مش هدا حالها
-حسين : امالا انت من جاى ومخبرك ..وبعتالى خيرها حنان
-سعد : مدامك نشدتنى هكى..معناها ليك ايام لا كلتمها ولا ناشد عليها وعلى صغارها
-حسين: شغلتنى خيرها حنان
-سعد: تلكلك فالحروف ..كلامها كله تلكليك .. الحاله
هادى تجيها من زمان لما كان يضرب فيها خوك…حتى انت ضاربها يا حسين ولا شن دايرلها
سكت حسين وواطى راسه وخلاه ومشى ..
______________
وقف حسين قدام باب حوشه
عارفها بتصير مشكله
عارفها بتصير دوشه
لكن ضرورى من المواجهه
ضرورى من الاعتدار
فتح باب الحوش….
خش وسكره
طلعت حنان من الطبخ لقاته قدامها
عيونها تعبو دموع
-حسين : حنان
-حنان: اطلللللعععع برررة
-حسين: انا لقيت التليفون يا حنان كان فى حوش اختك احلام
-حنان حاطه يداها على ودانها الزوز وتعيط :قلتلك اطلللععععععع بررررة
-حسين قرب منها : عيطى عليا هزبينى اللى تبيه ديريه غير خلينى نعتدر منك ونرضيك بس
-حنان : اطلع برررة.. اطلع برة
حسين طلع تليفونه اعطاهولها ..
خداته منه حدفاته عالحيط بكل غيظ انكسر طاحو منه طروف
وخشت تجرى للمطبخ جابت الرزام
وقعمزت فى جنب التليفون وبدت تضرب فيه …تكسر على مية شقفه ..
امولا تعيط .. ماما .. ماما ..
نزلها حسين يجرى شدها يبي يسكتها
مشت حنان خدتها منه ..
-حنان: انتتتتتتت ماليكششس علاقه بصغارىىى
حسين انهار… بدى يبكى
-حسين: حنان خيره هكى صوتك
-حنان خدت المخاد والعاب الصغار تحدف فيهم عليه : قلتلك اطلع برة .. اطلع برة
-حسين: حاضر حنطلع .. لكن متحرمينيش نشوف صغارى
-حنان تلفتت لصغارها : اسمعو اللى بيمممممممممممشيله لا هوا ولددددى ولا انا اممههه
-حسين: متعاقبينيش بالصغار
-حنان: انت من اليوممممممم اختفييييبت من حياتنااااا ماليكشششش علاااااقه بيينا والحووووش هدددا بتخشششه نطلعو منه احنا
-حسين: باهى اهدى اهو طالع
خدت صغارها وخشت دار النوم وسكرت على روحها هيا وياهم …
قعمز حسين عالصالون وقعد يبكى .. مايبيش يخسرها بعد مالقاها
قعدت مقعمزة من ورا الباب.. وحاطه راسها على ركابها وتبكى ..
وصغارها مقعمزين عالسرير ويبكو
جى حسين طق على باب الدار …قامت حنان راسها وانخلعت …
-حسين: اهو بنطلع بنبات فى سيارتى .. طلعى الصغار من الدار خلى يرقدو فسرايرهم
وطلع وسكر الباب ..
داير محاولة توقعها تسخف عليه وتقوله خش ..
باعتبار ان السيارة فى جنانهم ..
______________
فتحت هيا باب الدار ورقدت صغارها وكنست التليفون اللى تكسر وخشت لدارها وسكرت بالمفتاح ولااااا عبراته
لما ادن الفجر .. ولع سيارته وفتح القراج طلع السيارة ورجع للعمل
_____________
قعد اسبوعين فالعمل ….
يكلم فى اكرم ويطمن عالصغار
خوه سعد ميبيش يرد عليه
وحنان معندهاش تليفون كيف بيوصلها
مع ان فى خاطره هلبا كلام يقولهولها ..
وفات الاسبوع الاول
والاسبوع الثانى
وحنان صحتها تضعف ومش قادرة حتى تقيم راسها …. لسانها تسرح وبدت احسن
قاعدة تمشى بالدور هيا وسلفاتها لعمتها …
وبعد 12 يوم من غياب حسين .. كان دورها فى المشى لحوش عمته ..
قعدت طول اليوم عندها فطور وغدى وعشى
روحت فالليل حطت راسها ورقدت وعندها الم غريب فالحوض …
لمن بتشكى بالله غير لله
طق الباب ….
قالت لرياض افتح الباب
خش رياض يجرى يا ماما جدى المولدى
“تعرفو يا بنات تاريتا الام والاب حتى لو كانو قاسيين لكن يحسو بينا “..
خش المولدى
ناضت حنان بالسيف من مكانها …
-حنان: اهلا بوى زارتنى البركه
-المولدى : شن حال بنيتى وينك معش تجى لبوك
-جنان مش قادرة تتكلم من الالم: اهو يابوى تشوف فيها الدنيا جرى وخلاص
-المولدى: خيرك يا حنونه مريضه
-حنان: غير تعب الجرى ع الصغار يا بوى
-المولدى: ربي يعاونك يابنيتى
وقعد يهدرز شوى وبعتالى ناض روح
حنان دخلت صغارها لديارهم وقالتلهم هيا ع النوم
_________________
اليوم اللى بعده ناضت حنان لقت عندها نزيف ..
توقعت انه دورة
لكن الدورة ماتوجعش فيها .. وهدا الم حاد مش قادرة تبدل خطوتها …
قعدت راقدة فى دارها ماتتحركش ..وصغارها طول اليوم يا كلو فالتشيبس والكيك والحاجات الجاهزة
اليوم اللى بعدها فمكانها وجهها رايح اسود تقول تودع …
وصغارها مقعمزين جنبها ويبكو …
وهيا فمها جاف تقول ليها عام ماشربتش
تكلم صغارها شوى وتمشى فى غيبوبه
وترجع تفتح عيونها وتشبحلهم ..
ادان العشى انفتح باب الحوش …
خش حسين مروح من العمل
تمو ال 15 يوم وبدى فى اسبوع الاجازة
جوه الصغار يبكو
-حسين: خيركم وين ماما
-رياض : ماما من امس راقدة .
خش حسين لدار النوم لقاها ملوحه لوطه عالبساط وحاطه مخدة تحت راسها
نزل قامها من كتافها : حنان خيرك ..حبيبتى خيرك
وهيا شادة كلمه وحدة بس : صغارى صغارى
لبسها عبايتها …
وقال للصغار البسو مداساتكم
ركبها جنبه فالسيارة ورقد الكرسى وركب الصغار من تالى ..
طلع بالسيارة من السور واكرم وحفيظ خاشيين بالسيارة ..
شافوه داروله كلاكس ماشافهمش ..
لكن هما شافو حنان والصغار معاه
حسين يجرى بالسيارة
وحنان مفيش فى فمها غير كلمت صغارى
صغارى
وصل لمستشفى الزاوية العام
دخلها فالاسعاف
والصغار معاه
مشى للاستعلامات .. عطاهم اسمها وعمرها
وقعمز هوا والصغار فى كراسى الانتضار
عطلت قريب ساعه
مشى حسين للاستعلامات يسال ..
قالتله البنت اللى فالريسبشن الحاله اللى جبتها توة ركبناها الدور الثانى تقدر تركب من الاسانسير وتسالهم فوق
ركب حسين ..قايم امولا فى غمره والاولاد وراه
ركب الدور الثانى
سال الاستعلامات على حالة حنان ..
قالتله الممرضه اهيا الدكتورة اللى استلمت حالتها
كيف طالعه منها توة
قعمز حسين الصغار عالكراسى ومشالها
-حسين: دكتورة انا زوج حنان اللى ركبوها توة
-الدكتورة : منكدبش عليك حالتها خطيرة شوى ..
-حسين: شن عندها يا دكتورة
-الكتورة : حالة تسمم ليها عالاقل ثلاث ايام ..وانتو تاخرتو بيها بيش جبتوها .. فأدت اللى اجهاض
-حسين باستغراب : اجهاض شنو
-الدكتورة : ليش انت متعرفش ان زوجتك كانت حامل
____________________