رواية قلبي شاريك كاملة

#قلبي_شاريك

الحلقه الثلاثون

ماحد يعيط عليا ويقولى عطلتى الضى هرب وخدى الغالى معاه ههههه.. نحكى عالنت طبعا??.. صح تاخرت لكن دلعتكم بحلقه اطول من طريق سبها ??

خش حسين للغرفة
انفتح الباب
حنان لقت حسين مشتله تجرى …

حضنها وهوا يقوللها متخافيش

وهيا تبكى

-حنان: شفت يا حسين قعدت بروحى
-حسين: انا بوك وانا خوك وانا زوجك وانا سندك

-حنان مضبتاته وتبكى : قالولك على احمد

-حسين: ايه خشيت للدكتور

اسمعى ..ممكن تعطينى فرصه لغدوة العصر ونجيك.. لا تتحركى فيهم ولا اديري شى

-حنان: احمد حالته خطيره

-حسين:عارف ..هدا علاش نبى نسبق الوقت
ونتصرف قبل مايجرى الوقت ومعش نلحقوه

-حنان: باهى كان جو بيعطوه المضاد شن ندير

-حسين: خليهم يعطوه .. وحتى لو بيديروله مخفض حرارة عادى خلى يديرو

وحضن حنان بقوة

وهيا فحضنه تبكى وتقوله متعطلش علينا

-حسين: اششسش مرتى قوية وماتبكيش

-حنان تمسح فدموعها : باهى

وقف قدامها وحط ايديه على خدودها : انا تو ندبر راسى..غير ردى بالك على احمد وتو نجى

طلع من الغرفه

مشى طول لسيارته

يشبح فيه خوه سعد حاير فيه خيره خلاهم وطلع روح

____________________

ركب حسين سيارته وطلع من المستشفى ويكلم فى ناجى صاحبه بالتليفون

-حسين: نبيهم توة ضرورى
-ناجى : ممكن عندى 1500 بس توة فالحوش

-حسين: هاتهم ومع اللى عندى ونخلليك شيك حولى غدوة من حسابى

-ناجى : تم

-حسين: نتلاقو وين ماقلتلك

-ناجى: بادن الله

وسكرو الخط

__________________

سعد انشغل خيره حسين طلع وخلاهم وفات وما وقفش عليه

فتح تليفونه كلم حنان على رقم اكرم لانه خلالها تليفونه

-حنان: الو
-سعد: شن حال احمد توة يا حنان

-حنان: اهو معلقيله يبرة شكارة ويضربو فيها فاليبارى

-سعد: وخيره حسين طلع بسرعه

-حنان : كان هنايا وقالى اهو بنمشى وتو نجى

-سعد : باهى انشالله خير

-حنان: عمى انت نوض روح قول لحفيظ يوصلك واهو اكرم قاعد هنايا سقع عليك الجو ندوة تو تمرض

-سعد : لا والله لابس كبوسى مايصيرلى شى

-حنان : وراس عمى كانا تعزنى نوض روح مقعمز لوطا شن بدير اهو اكرم معاى وحسين بيولى

وقعدت شادة فيه انه يروح ..وبالفعل ناض روح مع حفيظ

الساعه 1 حسين ماشى فالطريق

ويتكلم فالتليفون

-كمال: لاباس عليه الوليد خيره شن عنده

-حسين: عنده التهاب سحايا حاد

-كمال: من هالافارقه متاعين الهجرة اللى خشو البلاد لعبو فيها الله لا تربحهم

-حسين: الله غالب كاتبله ربي

-كمال: بالنسبه للتوكه متعك تو نمشى انا غدوة الفجر ونقدملك عارض اجازة ونستلم مكانك

-حسين: توة كيف سكرت من المهندس عبدالكريم وشرحتله الوضع واتفهمه وقالى تمام مدامه كمال بيجى مكانك

-كمال : انت اوراقك اللى قدمتهم متع النقل شن صار فيهم

-حسين: مزال ماعطونيش الرد

-كمال : خلاص اهوا ناجى خاش انتضار خلى نعطيه اللى عندى ونجى معاه نسايره .. زعما يسدوك 4 الاف

-حسين: غدوة الصبح بيديرلى ناجى تحويل من حسابى

-كمال: ربي يعاونك انشالله

وسكرو الخط

__________________

الساعه 2 وصل حسين للسور متع حوشهم…

مفيش حد خارج الحياش

فتح حسين باب الحوش وخش لدار النوم

فتح الدولاب وطلع شنطه صغيرة فيها اوراقهم

خدى جواز حنان .. فتحه

لقى صغارها الثلاثه مرافقين ليها

طلّع ساكو حط فيه جلابيه وزوز وشاحات وسروال وتيشرتوملابس داخلية لحنان وخش دار امولا وحطلها لبستين وملابس داخليه وخش دار احمد وحط منها لبستين ودار رياض نفس الشى ..

الساكو ماباش يتسكر مدوراش خلاه مفتوح لين يشري شنطه وحطه فى كوفينو السيارة

وطق على حوش امه مافى حد

سمع عزيز طقه باب حوش امه فتح لقاه حسين

-عزيز: حسونه تعالة اهيا امى بايته عندنا مع الصغار

مشى حسين لحوش عزيز

سمعو صوته امولا ورياض جوه يجرو لانهم اصلا مابوش يرقدو : بابا وين ماما

قامهم فى غمره : اهو بنمشولها يا بابا البسو مداساتكم هى

-رياض: وحتى ايباداتنا نجيبوهم
– حسين يضحك: ايه هاتوهم

طلعت الحاجه مالدار: خيرهم الصغار يلبسو فمداساتهم شنو بتبات بيهم فالحوش ..خلى يباتو هنا معاى انا و بنت عمهم خير

جميلة ومرام طلعو حتى هما وسلمو على حسين

-حسين: شنحالكم يمى .. وسلم على راسها

-الحاجه: شنحالك ياوليدى ..احمد شن صار فيه من بكرى نكلمو فى حنان تليفونها مسكر

-حسين: عطوه مضاد ..وحنان تليفونها مفيشى شحن

جو الصغار يجرو : هيا بابا

-حسين يكلم فى امه : بنرفع احمد لتونس

-الحاجه : شنو حالته مش باهية ولا شنو وليدى

-حسين: ماتنخلعيش يمى .. لكن تعرفينى انا نقتنع غير بعلاج برة

-الحاجه: باهى متسقد فالليل خلى الصبح احسن

-حسين: لا خلى نمشى فالليل خير بيش الشمس متجيش على راس احمد

-جميلة: والصغار علاش بترفعهم اهو قاعدين معانا واطمنو عليهم فالحفظ والصون لين تروحو

-حسين: ربي يحفظك جميلة لكن انا منعرفش بنعطل ولا بنروح فيسع .. وحنان تعرفاها متقدرش تكون هيا فمكان وصغارها فمكان ثانى

خدى الصغار وطلعو ويسقدو فيهم الحاجه وجميلة وعزيز

وقفت سيارة حفيظ ونزل منها سعد لقى حسين سلم عليه
وحكاله انه بيمشى لتونس توة ..

-سعد: طريق السلامه اوخى وكان تبى نمشى معاك انا ولا واحد من الاولاد معندكش مشكله..وكان تبى فلوس فى

-حسين: لو استحقيت حنكلمكم والحقونى

وباس على راس سعد ..

وركب رياض وامولا فالكرسى اللى جنبه بحدا بعضهم ودارلهم حزام الامان

وقاللهم كان تبو ترقدو عادى

مشى عالرئيسى وطلع ماشى لمستشفى صبراته

______________

الساعه 3 ونص

وصل حسين قدام مستشفى صبراته لقى ناجى وكمال صحابه وصلو و يراجو فيه

نزل من السيارة سلم عليهم وخدى منهم الفلوس

تكلم معاهم عشرة دقايق وركبو سيارتهم وروحو لطرابلس

خش حسين هوا والصغار للمستشفى

كلم اكرم قاله وينك ..

جى اكرم تفاجئ بوجود الصغار مع حسين ..

-اكرم : عمى خيره الصغار معاك

-حسين: بنمشو لتونس توة

-اكرم : وعلاش رافع الصغار مفروض خليتهم

-حسين: مرات نعطل وتخافهم يقلقو منغير امهم .. خليهم معاك اهو تو نجيكم

ركب حسين فوق للدكتور وتكلم معاه .. وقاله انه بيطلعه ..

كتبله روشيته دوا وزرابيط ..

ونادى الممرضه قاللها تعطيه طروف يديرو فيهم تحت راس للطفل لما يرجع مبطنات بالبلاستك بيش مايتلبزوش الحوايج

____________

حنان بروحها فالدار مع احمد

حرارته انخفضت .. تمسله فى جبهته

طق باب الغرفه ..

نفتح الباب وخش حسين

فرحت حنان : جيت يا حسين

-حسين: ايه جيت

-حنان: مش قلتلى بنجى غدوة العصر

-حسين: كنت منبيكش تقلقى من الانتظار .. عطيتك وقت بالزايد …

حضنها : واتية

-حنان: واتية لشنو

-حسين: بنطلعو من المستشفى

-حنان: وين بترفعه

-حسين:.. بنرفعه لتونس

فرحت حنان حست انها مش بروحها …

مسحت لاحمد وجهه وساوت وشاحها

حسين حط احمد على كتفه وطلع بيه واحمد راقد لانه ضاربيله مخفض حرارة فيه نسبه منوم

-حنان: بنمشو الصبح

-حسين: لا توة

-حنان: وصغارى وين بنحطهم نخاف نعطل عليهم

-حسين تعالى وتو نفهمك

نزلو للدور الاول.. الصغار شافو امهم مشولها يجرو

-حنان : قصدك بنرفعوهم معانا

-حسين: ايه

-حنان: احسن مادرت

ركبو فالسيارة… وسقدهم اكرم … وتوجهو لبوابة راس جدير

فالطريق

-حنان : بنمشو جربة ولا صفاقس

-حسين: بنمشو لايطاليا

-حنان: شن تقول

-حسين: غير خلى نوصلو وبعتالى ساهل .. بنطلعه برة نعالجه

وهما فالطريق احلام تكلم فى حنان لقت تليفونها مقفل..
فكلمت حسين تسال قالتله توة قالى احمد ان خالته فى المستشفى

“واحمد معروف من قاله طبعا ??

طمنها وعطاها كلمت حنان قالتلها انهم ماشيين بيه لتونس

واتصلت قمرة تسال

واتصل المولدى

واتصل سعد

والتليفون مابطلش

وصلو للبوابه لقوها فاضيه الساعه 5 الفجر

احمد فاق وبدت حرارته ترتفع المسكن تم

دترتله زرابيط ..وبهدلهم فالطريق بالترجيع

وصلو جربة الساعه 8

خشو طول لعيادة مشهورة يعرفها حسين من زمان

عطو اوراقه للدكتور ودارله اللازم

ضربله مخفض وعطاه الجرعه الثانيه متعت المضاد لان وقتها وصل وعلقوله شكارة تغدية تبى ساعه كاملة

قعدت حنان هيا واحمد فالعيادة ..
وحسين خدى الصغار ورفعهم ياخدلهم فى فطور ..
وبالمرة شرو شنطه حطو فيها الحوايج ..

وفات عالمصرف دار التحويل متع الفلوس اللى بعتهمله ناجى وسحبهم

وفطر الصغار وجاب لحنان فطور

واحمد ممنوع عليه الاكل نهائيا حاليا

كملو التغدية وركبو فالسيارة توجهو للعاصمه

والولد يرجع فالطريق وحرارته تقوا وتنزل

الصغار رجعو رقدو ..تعبو من الطريق

وصلو صفاقس الساعه 6 العشية

فاتو على عيادة
نفس الشى عطوهم اوراق احمد وضربوله المضاد وداروله شكارتين تغدية

حسين دور نزل بيش يباتو فيه

خشو للغرفه فيها اربع سراير وصالون على تركينه وتلفزيون

وطلع حسين جابلهم عشى من برة

عشى حسين الصغار ورقدهم

وحنان لاهية مع احمد

بعد ما دارتله كمادات ارتاح ورقد

_____________________

حنان خشت للحمام ..

دوشت .. وخدت الغيار اللى جايبهولها حسين ولبساته ..
ولقاته حاطلها سروال وتيشرت لبستهم

طلعت تجفف فشعرها

قعمزت عالصالون تبى ترتاح

وحسين لابس بنطلون بس ومتكى عالسرير ويتفرج عليها
ناض من السرير وقعمز عالصالون

-حسين: حنان نوضى ارقدى عالسرير ارتاحى

-حنان: لا ارقد انت وارتاح لانك تعبت

-حسين: لا ارتاحى انتى

-حنان: لا انت

جى قعمز وراها عالصالون وحضنها من الخلف وشعرها مبلول حشى فيه وجهه

-حسين: باهى تعالى نرقدو فيه الزوز مع بعض ونرتاحو .. تعالى نرقدك فى حضنى

-حنان تحشمت : تبي السرير يتكسر انت ولا شنو

-حسين: باهى اهو نديرو حل بيش نرقدو الزوز وواحنا مرتاحين

-حنان: كيف

-حسين: تعالى انلصقو السراير عالحيط ونرقدو كلنا صف واحد انا وانتى والصغار

-حنان : وانا موافقه…المهم نرقد احمد عالطرف بيش كانا رجع نرفعه طول للحمام ..

-حسين: باهى وخلى نحركو السراير بالشوى احسن مايسمعونا

وبدو يحركو فالسراير والصغار راقدين عليهم ..لصقوهم عالحيط داروهم صف واحد

رقد حسين جنب الحيط وبعده رياض وبعده امولا وبعده حنان وفالطرف احمد

-حسين: نسينا الضى مطفيناشى

-حنان: اهو تو نطفيه انا

-حسين : لا خليك اهو تو نطفيه انا اصلا بنوض نشرب

طلع حسين من السراير ومشى خدى شيشه المية من عالطاولة وشرب

وطفى الضى

قعد ضى بسيط خافت يبان من الستار من لامبة الشارع

جى حسين للسراير وبيرقد قعد يساوى فالصغار ..منغير ماتحس هيا

رقد رياض جنب الحيط وجنبه امولا وبعتالى رقد هوا ..

هيا متلفته عاليسار ..جى وراها ورقد لاصق فيها من الخلف وحط يده على شعرها ويهمس فودنها

متخافيش نبى نشم شعراتك بس

-حنان: هدا شنو وين حطيت الصغار

-حسين: اشششش مانبى منك شى غير خلينى حاضنك هكى …
وحاط يده يلعب بشعرها : محلا هالشعرات الناعمات
قداش محلى فيهم ربي ويبوس فى شعرها وفى رقبتها

-حنان : باهى حول شوى ريشتنى ههههه

وحولتله وناضت قعمزت متلفتتله وحاطه يداها الزوز جنب كتافه الزوز وتشبح لعيونه

وقالتله: داير روحك بتساوينا السراير ..يعنى مكر مع سبق الاصرار والترصد??

-حسين تحتها يضحك: اصلا العربي كانا دبر نص الدبارة ليه

-حنان: لكن تبى الحق .. انا مش عارفه كيف نوفيك حقك ..انت تستاهل نبوس راسك عاللى درته كله على خاطرنا

-حسين ناض بحركه سريعه ورقدها تحته ورقد فوقها بنصه الفوقى و باس شفايفها بصوت قوى

وقاللها : انتى بوسى فمى وحقى كله يكون وصلنى ?????

-حنان ادف فيه بدلع : حول بلا جو عاد نكلم فيك جديات

-حسين: لا لا هكى متفاهمناش .. انا منيش مسؤل عن اى شى يصير مدامك تدلعى عليا

-حنان حطت يدها على فمه : اششش الصغار جنبنا بلا شطانه

-حسين: قلتلك اى تصرف يصير انا مش مسؤل عليه

وقرب من شفايفها وبدى يبوس فيها

وهيا تدلع : يا حسين لا الصغار ينوضو

وهوا مايسمعش فيها اصلا .. ضمها ليه وقعد يبوس فيها متع واحد مستاحش

فجأة ناض احمد ..

وقفو …

ودارت حنان تلفتت لولدها

مست جبهته لقاته سخون

ناضت جابت كمادات وقعدت اديرله فيهم للفجر .. وقالت لحسين انت ارقد مزال قدامك سواقه للعاصمه

وصلو العاصمه ودخلو احمد لمصحه …

طبعا الدكتور رقده طول ..

ودارله تحاليل من اول وجديد

خلى حسين الصغار مع حنان ومشى طول للسفارة الايطالية ..
يبي ياخد تأشيرة الشنغن لحنان والصغار لانه هوا عنده ….

فقالوه ان الموضوع ياخد شهر كامل

رجع حسين للعيادة .. وحكى لحنان اللى صار

فقالتله مفيش داعى للسفر ..اهو حتى عيادات العاصمه كويسات

قعدت حنان راقدة مع ولدها وخدى حسين الصغار ومشى لعمارة مقابله المصحة طول وأجر فيها شقه

عطى للصغار ايباداتهم وقاللهم استنونى هنايا خلى نمشى نجيب غدى ونجى

طلع شري غدى للصغار بس باعتبار حنان جابولها غدى كويس فالعيادة

وروح للعمارة ..

وهوا خاش للعمارة فى بنت مقعمزة فى مقهى جنب العيادة ..

شبحت حسين .. زبطاته

قامت تليفونها .. اتصلت برقم

البنت: تعرفى كانا نقولك من شفت توة مش حتصدقى ??

______________

رقدو وثانى يوم مشو على رجليهم للعيادة شافو احمد وحنان وقعدو معاهم

-حنان : الدكتور طمنى وقالى انهم بعتو التحاليل ل فرنسا

-حسين: توة كنت عند الدكتور وقالى

-حنان: ربي يشبح فى وليدى

والصغار يلعبو ويصورو فى بعضهم بالايباد

خشت حنان للحمام توضت وطلعت بتصلى هيا وحسين ..

صلو المغرب ..

وطلعو هوا والصغار شرو بيتزا .. فوتو على حنان باكو وروحو هما للحوش

___________

اليوم الثالث

نفس الشى مشى حسين والصغار زارو حنان واحمد ..

-حنان: محلاهم حوايجكم

-رياض: شريناهم توة ياماما

-احمد : وانا

-حسين: انت شريتلك اكثر منهم يابطل اهما حوايجك فالاكياس

وتلفت لحنان

-حسين :حتى انتى شريتلك حوايج جدد ..
تلقيهم فالشقه .. خودى الصغار وروحى دوشى وارتاحى
وانا الليله بنقعد مع احمد وتلقو عشاكم فالحوش

-حنان: والله مانقدر نخلى ولدى
-حسين يلم فى شاربه اللوطى: قلتلك نوضى روحى

-حنان تضحك: قلتلك لا

-حسين يكلم فيها بالشوى: معش تدلعى لانى مش مسؤل عن اى حركه تصير

-حنان: والله مانقدر نرقد بعيد على ولدى

-حسين: باهى بري بدلى دوشى وارتاحى .. اهيا الشقه مقابله عالرجلين روحو وانا نقعد معاه وبعتالى تعالى

-حنان: باهى الساعه 12 نرقد الصغار ونجى وروح انت

-حسين: تمام

________________

بالفعل روحت حنان للشقه … عجبتها ??

عطت للصغار عشاهم ..

تعشو وقامت الاكياس

وقعدو يلعبو الصغار بالايبادات يصورو فى بعضهم فيديو بالفلتر المضحك ويضحكو

وخشت هيا دوشت ..

وطلعت

شرين الباب

فتح رياض وراه واقفه حنان

لقت بواب العمارة واقف قاللها فى ناس يسالو عليكم

تلفتت لقت زوز بنات واقفات

حنان خافت مابتش تقوللهم تفضلو

-البنت: هادى شقه حسين ولا

-حنان: ايه هيا تفضلى

البنات شلكهم فانصات .. لكن ليبيات

-البنت علت صوتها : وانتى منو يا حنه

جو امولا ورياض شادين ايباداتهم فى ايديهم

حنان تشبحلها ومتفاجأ

-البنت: نكلم فيك انتى منو ..وشن تكونيله

-حنان : لوسمحتى انتى شكون وشن تبى

-البنت : انا مرته??..وندور فيه

حنان تفاجئت …انصدمت .. معش عرفت تتكلم

-حنان : لو سمحتى انا مش فاضيه توة مع السلامه وسكرت الباب بسرعه

البنت اطقطق بالقوة عالباب .. افتحى .. افتحى

جى البواب قاللها انزلى ولا اناديلك الشرطه ..

طبعا البنت خافت و نزلت

الساعه 11 كلمت حنان حسين
وقالتله تعاله انت ارفعنى .. مايصيرله شى احمد كان قعد خمسة دقايق بروحه انا نخاف نمشى بروحى ليل ..

“وهيا خايفه تلقى البنت تحت العمارة ”

طبعا حنان قررت فى داخلها انها ماتعاودش لحسين اللى صار ولا تساله ولا تلوم عليه
لان مش وقته
ولدها مريض وهوا يجرى بيها
وبتقعد هيا تمنقد وتسال

لكن وجعتها ..

تحكى فى خاطرها ..
معقولة متزوج فى تونس وما قالش..
وزعما متزوج من قبل ماياخدنى ولا بعد

المهم قررت تسكت وماتحكيش..
وقالت لصغارها ان المراءة غالطه فالشقه وادور فى جارهم اللى قدامهم حتى هوا اسمه حسين ..

_____________

جى حسين للشقه خداها بسرعه ورفعها لاحمد مايبيشى يقعد بروحه ..

خشت حنان لغرفه احمد وسكرت الباب

فتح حسين وراها الباب : فى شى حسيتك زى اللى متغيرة

-حنان: لا مافى شى غير تعبانه

-حسين : ماهو قلتلك ارتاحى وانا نقعد معاه
-حنان: لا والله مانقدر

روح حسين للشقه لقى الصغار راقدين ..رقد جنبهم للصبح

الصبح مشى جاب الفطور ويفطر فالصغار

-رياض: حقه بابا امس جت وحدة ادور فى جارنا وتعيط ..وحتى هوا اسمه حسين

-حسين: من جارنا ..وكيف عرفتو ان جارنا اسمه حسين

-امولا : ماما قالتنا

-رياض يضحك: صورتها لما تعيط

-حسين: ترا هات الايباد نشوفها

وجاب رياض الايباد وتفرج حسين ..
وفتح عيونه متفاجئ ..
وعرف البنت اللى جت منهيا..
وفهم القصه كلها

_____________________

 

error: