رواية قلبي شاريك كاملة

قلبي_شاريك❤

???الحلقه الثالثة ???

-حنان مقعمزة على كرسى وجنبها اختها قمرة ..
-قمرة: حنان وخيتى نوضى افطرى
-حنان: الحمدلله ياقميرة خديت تمر عالاقل يرفعلى السكر
-قمرة: لكن انتى من اول امس مادوقتى شى فى فمك غلط هكى سلم وخيتى
-حنان: وراس وخيتى ماخاطرى فالماكلة.. غير كان تهنينى على صغارى وتفطريهم
-قمرة: امولة بنتك فطرتها بنتى ميس من بكرى واحمد تفطر فيه خالته احلام فالحوش داخل ورياض قال فطر مع عمه حسين
-حنان: هه هوا حسين بدى عنده قلب ويعرف يشد صغار ويفطرهم ..
-قمرة : خيره هوا شن قصته
-حنان: منعرفش قصته لكن خوه محمود زمان ديما يدم فيه ويقول انانى ومش مدور حد مالعيلة وقفاص ومنعرفش يدوى فى هلبا حاجات هكى
احلام اخت حنان جايه من الحوش وطلعت للخيمه شادة فى يدها سندوتش
-احلام: حنونه وخيتى على خاطرى كان تعزينى خودى كولى السندوتش هدا
-حنان: وراس حلومه ماقادرة نحط حاجه فى فمى
-قمرة : على خاطر صغارك يا حنونه وراس وخيتى تاكلى
-حنان: جيبيلى قهوة بس راسى بيتفجر منى
-قمرة: حقه احلام شن درتى فالحجوزات
-احلام : رديتهم كلهم امس خالد راجلى رفع الفلوس متع العربون للناس وردهملهم
-حنان: ليش بس ياوخيتى هدا باب رزقك ورزق صغارك ليش تردى الفلوس
-احلام : يعنى انتى فالمحنه هادى يا حنونه وانا بندير للناس حلويات .. ميجيش ياوخيتى
-حنان: العجينه من امس فى ثلاجتك يا حلومه .. لو روحتى اليوم الساعه سبعه راهو سلمتى الطلبيه وجيتى ..هدا رزق صغارك يا وخيتى
( تو الحلقات الجاية نقوللكم علاش قالتلها العجينه عندك فالثلاجه من امس ?)
احلام: قلتلك لا وسكرى عالموضوع
الحاجه خديجه تتفرج على حنان وخواتها كيف شادين فيها يبوها تاكل ..ومعجبه بيهم .. كمية مشاعر رهيبه بين حنان وخواتها ..
وخاصه حنان مايرضوش فيها دقه الشوكه باعتبار انها الصغيرة ..وعانت هلبا من الظلم فحياتها …

_____________________

حسين مقعمز جنب رياض .. وشاد فنجان قهوة
-رياض: منو اللى كانت تكلم فيك عمى
-حسين: وانت كيف سمعتنى يامجرم هههه
-رياض: سمعتك تقوللها ياحبي معناها مرتك ولا
-حسين بحركه لا شعورية قال: بعيد السو عليا من الزواج ..زواج شنو سمالله
-رياض : امالا شنو
-حسين: انت باين عليك شاطر ودكى وتسأل هلبا
..كمل فطورك يابطل
شرين تليفون حسين مرة ثانية
-حسين : اوووف معش يبطلو هادو
-رياض: هادى منو مرتك الثانية ياعمى
-حسين يضحك : انت الباين عليك جوك مليح وتخش الخاطر يارياض خليك ديما هكى
-رياض: حتى ماما تقولى خليك ديما جوك حلو واضحك ومعش تبكى
-حسين: وعلاش تبكى انت راجل
-رياض: لما بابا يضرب ماما نقعد نبكى انا واحمد
سكت حسين زى اللى جاته صدمه من الجملة .. وحس انه ممكن يكون نوعا ماواخد فكرة غلط عن حنان
وشرين التليفون مرة ثانية نفس الرقم اللى قبل شوى
فتح الخط حسين ورد
-حسين: هلا بنور عيونى .. لو صبرتى شويا بس كنت حنكلمك …وحشتينى حبي

“?????.. نفس الجملة للجميع ..طلع خطير هالحسين وشادها علاقات ومكالمات..وبالك حتى لقاءات ..تو نشوفو ياحنه مزال الحلقات طوال”

____________________

عمك المولدى بو حنان مقعمز مع الحاج سعد ويتوشوشو
– سعد: ها شن قلت خوى المولدى
-المولدى: اسمع ياحاج هالثلاثة ايام لا قدمو لا وخرو لكن يوم ثانى مستحيل حتى خوتى يهزو عليا
– سعد: انت اسألها هيا بالك متبيش تمشى معاكم
-المولدى: وشنو على رايها يا سعد.. انت كان عندك بنت تخليها
-سعد: كان عندها صغار والله مانطلعها من حوشها تقعد مع عمتها
-المولدى: البحرى عنده حساب والرايس عنده حساب
– سعد: وشن الحسابات اللى عندك يامولدى .. بتزوجها مثلا ولا كيف
-المولدى: لا تو نخلاها زى الثلاجه الواقفه بش ترضا انت وخوتك والحاجه
– سعد: يامولدى عيب عليك انت تعرف حنان قداش متعلقه بصغارها ولا ..شن تخرف انت
-المولدى: توة هدا كلام قبل وقته سكر عليه ياحاج
-سعد:اسمع يامولدى هالكلمتين وحطهم حلقه فى ودانك .. حنان معزتها عندى زى معزت بنتى صالحة. والله ماعندى فرق بينها وبين وحدة مالبناويت .. واى شى يزعلها انا منرضاشى
-المولدى هههه بضحكه صفرا عرف روحه غلط: تى لا ياحاج شن تحكى انت تو انا بنزعل بنيتى ..ماندير الا اللى يرضيها

___________________________

ومرو ثلاثة ايام العزا …
وجهز حسين شنطه وسلم على خوته ومشى بيسلم على امه
-الحاجه خديجه: معقولة هكى ياوليدى ثلاث ايام وتمشى
-حسين: والله عندنا اجتماع فى تونس يمى وهادى شركه اجنبية صعب نتخلف عالاجتماع وانتى عارفه
طلع من جيبه ظرف فيه فلوس.. عطاه لامه
-حسين: لو ستحقيتى شى كلمينى يااام
-الحاجه خديجه : خيرك مغرقنى ياوليدى انشالله مانفقدك .. غير شوف خوك سعد وعاونه
-حسين: الحاج عطيته مصاريف الوفاة كلها تسده 15 يوم لقدام اكل وشرب ..
-الحاجه خديجه: سلم وليدى
-حسين طلع ضرف ثانى: وهدا اعطيه لمرت المرحوم
-الحاجه خديجه: سلم وليدى اللى مرضينى ديما
سلم على خواته وكل وحدة عطاها اللى فيه النصيب من تحت حس مس ميحبش الشهدرة والتفاخر
وخدى اخته امال فى ايده وهوا طالع
-حسين: شنو حال الغزال ماشى الامور ولا شنو
-امال: الحمدلله ماشيه تمام
-حسين: بالرغم دوة مش وقتها لكن مجيد ولد خالتى كلمنى عليك اليوم الصبح .. شنو رايك ياعروسة
-امال واطت راسها متحشمه: انا الحق مزال مش مفكرة….
-قاطعها حسين: مش مفكرة فى شنو يا امال راهو عمرك هوا هداكا فوتى العشرين ليك مدة ..وهدا رابع عريس ترفضيه .. لو فى حد ثانى قوليلى وكنهدا الحق مجيد عاجبنى ومنبيش نضيعه من يدى
-امال : باهى عطينى فرصه الشهرين هادو بس .. وبعدها دير اللى يعجبك
-حسين: يعنى فى حد ثانى …
عيونه بدو حمر ..وغيرة الرجل الشرقى على اخته نطت طول ..ولكن تمالك نفسه …
-حسين : حاضر يا امال ..لو روحت باهى لو مروحتش نكلمك تليفون
-امال : حاضر
-حسين: ردى بالك على روحك والمبلغ اللى خليتهولك يكفيك ولا نزيدك
-امال: لا مكفينى سلم وخى
سلم عليها وطلع …
وصله عماد ولد اخته مفيدة للمطار
وسافر بالف سلامه
___________________________

ومرت الايام .. حنان روحو بيها اماليها ثالث يوم .. وقعدت تجى لحوش العزى وتروح قبل المغرب لمدة عشرةايام …
وبعدها خلاص كل حد شد مكانه .. وحنان قعدت فى حوش بوها .. خدت الدار الصغيرة اللى الجنان.. بالرغم خواتها مارضوش وقالولها خودى الدار الكبيرة لداخل .. فقالتلهم انها هكى مستريحه هيا …
عمتها خيريه اللى هيا مرت بوها تلبس على راحتها ولادها ديما برة الحوش.. ومتبيهاش حنان تضايق من وجودها ولا من وجود صغارها ..
بالرغم معاملت مرت بوها ليها عادية فيها برود لا هيا كويسه ولا خايبه …

المهم ماعلينا من هدا كله …

ومرت ايام
ومرت ايااام
ومرت ايااام ..

فاتو اربعه شهور وعشرة ايام وحنان حولت رباطها ..
وكانت تحاول متخليش صغارها يرتبطو بخوتها
..لانهم مش مزبوطين ومش اهل للتعامل مع اطفال .. سكير على مخدرات على دعارة ..
نقدرو نقولو مش الخوت اللى يشرفو …
تليفون حنان شرين …
-حنان: الو
-سعد: اهلين حنان بنيتى كيف حالك
-حنان: اهلين عمى سعد شنحالك انت والصغار وعمتى بريكه .. وكيف حال امى خديجه ..وامال
-سعد: الحمدلله كلهم بخير ..عمتك بريكه فالسيارة مع اكرم بتجيك هيا وصالحه وامال .. قلت خلى نبعتلك معاهم جزء من الفلوس اللى خلاهم حسين للصغار تستحقيهم اكيد
-حنان: لا ياعمى خليهم عندك واصرف علينا منهم واللى ينقصنى نكلمك ونقوللكم عليه .. لكن اهنا انت تعرف الحال كانا حسو بيهم والله مايخلوهملى
-سعد: باهى ياحنان كيف ماتبى بنيتى
سكرت التليفون وتلفتت وراها تلاقى عمتها خيريه واقفه كانت تسمع فيها ..تلخبطت حنان
-حنان : اهلين عمتى خيريه خشى
-خيريه : بوك ينادى فيك قالك نبيك شوى
-حنان : حاضر اهو تو نجى .. على فكرة عمتى بريكه والبنات بعتالى بيجو
-خيريه: امالا كلمى خواتك يجو والله ماعندى خلوق نقابل حد ..
مشكلة خيريه اطيح قبل الضربه .. تو تلقاها تقول مانبى نقابل حد ولما الناس تجى تلقاها تمد وتهدرز والترحيب والفرحه مش سايعتها.. حنان طبعا بحكم العشرة بدت عارفتها الكلمه الاولى مش ليها
..ولدلك مدورش فيها …
لبست حنان وشاحها ومشت لبوها ..
-المولدى: حنان شن حالك بنيتى باهى
-حنان: الحمدلله يابوى بخير
-المولدى : اييييه الايام قداش تجرى توة المرحوم ليه سته شهور..
-حنان: ربي يرحمه ويغفرله انشالله
-المولدى: والله شن بنقولك بنيتى ..الحق شيخ الجامع كلمنى عليك وقالى فى ناس يدورو لولدهم ارمل وعنده زوز صغار.. فكلمنى عليك
-حنان نصدمت : انت شن تقول يابوى من قالك نبى نتزوج .. وبعديت مفكرتش فى صغارى من بيقبلنى بيهم
-المولدى: صغارك مرجوعهم لعمامهم
-حنان: الا هادى يابوى ماتقولهاش صغارى والله مانسيبهم كان نموت على خاطرهم
-المولدى: غير بالشوى سلم بنيتى.. قصه انك بتتزوجى هادى حاجه مفروغ منها .. حكاية تقعديلى هكى انسيها من بالك
-حنان : ليش تنرفز فيا يابوى.. قلتلك زواج لا وانا امتى جيتك وعلى طول تبى تزوجنى ..
صوت سيارة وقفت قدام الباب ..
عويلت سعد وصلو جابهم اكرم .. حطهم فم الباب وركب رياض واحمد وامل ومشى ..(متعودين يمشو مع صغار عمهم حتى بلا شيرة )
-بريكه: وين رافع الصغار يا اكرم هاتهم ستاحشناهم
-اكرم: شويا بس للمحل نشريلهم شوكلاته ونردهم
-بريكه: متعطلش سلم وليدى
خشو العويله وسلمو على حنان ..
عيونها حمر من البكى ..
سلمت عليهم خيريه بالاحضان وهيا تشالى وتوالى .. شن حالكم ياعويلة كيفنكم ..متقولش اللى بكرى تتأفف منهم وتهدرز ماخلت من جبدت شى قرمه وشى شكرانيه …وناضت تجيبلهم فالشاهى
-بريكه: حنان بنيتى خيرك مافيناش برانى حكيلى شن فى
-حنان: شن بنحكيلك عمتى بريكه .. بوى يبي يزوجنى
-امال: مسرع اللطف المرحوم ليه سته شهور
-حنان تبكى: خيره الحظ اللى عند الناس مانكسابش منه شى اللهم لا اعتراض..
-بريكه : احكيلى منهوا اللى خطبك وولد من
-حنان: وين نعلم عليه ياعمتى.. قالى بوى شيخ الجامع قاله عليه ومن منطقه ثانية قريبه علينا
-بريكه: خلاص سكرى عالموضوع تو نقول لعمك سعد وهوا يتصرف ..
روحو العويله وخبرت بريكه راجلها سعد بالموضوع كله .. وبالفعل سعد مشى لشيخ الجامع وسأله عالموضوع ..
-سعد: ياشيخ امتى هوا المرحوم ماطقش ست شهور وماشيين تخطبو فالمراءة
-شيخ الجامع: ياخوى سعد بوها هوا اللى موصينى لو فى حد يدور نقوله
-سعد: شن تحكى انت ياشيخ يدلل ببنته
-شيخ الجامع: فالدين مش عيب ياسعد ..وانا من لما المراءة رابط وبوها يجينى ويوصى فيا ..توة لقيتلهم شخص مناسب يشوفوه لو عجبهم ..
-سعد: باهى باهى ياشيخ فوته ومعش ادوره حتى كان وصاك ..
-شيخ الجامع: حتى لو انا فوته هوا بروحه مش مخلى جهد .. امس فالجمعه وقف على منير ولد اخته وقاله عليها
روح سعد لحوشه وهوا حامق وفهم ان بوها بيزوجها بيزوجها لانه قاعد يسعى ويخطب فالعرسان بنفسه

_____________________________

ومرت ايام … وسعد مش مبطل تفكير فالموضوع ..
وفى ليله متكى على سريره هوا ومرته بريكه ..
ويفضفضلها لانها بنت خاله وواخدها عن حب ..
-بريكه: خيرك ياسعد شن شاغلك
-سعد: شاغلتنى حنان والصغار
-بريكه : خيرهم شن جد ثانى
-سعد: بكرى جانى خوها معز وقالى وتو دار للصغار حنان بنعطوها لمنير ولد عمتى
-بريكه: نهارهم احرف مش هدا اللى يخطب فيها زمان ولا
-سعد: هوا بداته .. تزوج وجاب صغار وقاعد باله عندها ..
-بريكه: حتى ام المير جارتنا كلمت عمتى خديجه قالتلها مدامه بوها يحكى للناس و يقول نبى نزوجها كنهدا نبى ناخدها لخوى بوعجيله مطلق مرته وقاعد بروحه
-سعد: العرسان كثرو ومعش عرفت نتصرف . والصغار ماليهم الا امهم
-بريكه: نقولك حاجه ياسعد
-سعد: قولى
-بريكه: حنان لازم يتزوجها حد من العيله وتقعد على صغارها
-سعد: ومنو اللى بتجى وتقوليله تزوج مرت خوك وبيضحى وبيوافق
-بريكه صوتها تغير: انت يا سعد
-سعد مصدوم: شن تخرفى انتى يا مراءة هبلتى.. البنت تقولى ياعمى..وانا والله نعزها زى بنتى صالحه واكثر
-بريكه: وانا شن قلتلك حبها وجيب منها صغار.. هيا فاتحه تنقرا والمراءة تولى لحوشها هيا وصغارها
-سعد: والله ماتنكتب عليا يقولو طمع فى مرت خوه
-بريكه : وين الطميعه هدا نصيب ربي.. ومفيش حل ثانى غير انها تولى لحوشها..ومستحيل بوها يخليها تولى الا وهى على دمت راجل
-سعد: نقتل روحى قبل مانقرا على حنان بنتى فاتحه …شن تخرفى انتى

____________

عند حنان …
الساعه 12 فالليل
خشت للجنان اللى مقابل دارها.. تلاقى ولدها رياض يرقص زى السكران …ويغنى شالوها وماااااااودععععتنى وانا مانصصصصصبر بلاها هههههههههه وهاتك يا ضحك …
-شداته حنان : حيه عليا وليدى خيرك يارياض
مش رقدتك انت وخوتك وطلعت نغسل فالحوايج
-رياض: نادانى خالى يوسف ومشيت معاه عطاااانى ارقيله متعه هوا وصحابه دخنت منها هههههه
-حنان: حيه عليا ياوليدي دخان حشيش ولا شنهوا
خدت ولدها وخشت بيه للحمام صبت عليه امية ودوشتله
____________________________

فى دار امال .. انفتح الباب وراجل طول فعرض خش لدارها ..ولكن امال فالحمام مزال ماطلعتش ..
طلعت امال من الحمام وإدا بيها تتفاجأ بشخص مقعمز على صالون اللى فى دارها
-امال عيطت: حسسسسسسين وجت تجرى حضناته وسلمت عليه .. امتى جيت ياغالى
-حسين : توة بس وصلت حبيت نديرهالك مفاجأة
وفجأة شرين تليفون امال .. رقم غريب
-حسين: ممكن نرد عليه انا …
توقعه الولد اللى قالتله عليه اخته امال انها تبيه
-امال: رد عادى ياحسين مفيش مشكلة
فتح حسين الخط بيرد …وادا بصوت مراءة تبكى ..
وتعيط..امال تعالولى الحقونى ولدى رياض بيموت عليا
-حسين : من معاى
-حنان: انت منو هدا رقم امال ولا
-حسين : ايه رقم امال من معاى
-حنان : انا حنان مرت خوها عطيهالى نبى نكلمها ..
وفجأة صوت التليفون انحدف ويسمع فى بكى وعياط ..وليدى خيرك حيه عليا ولدى بدى ازرق ..
انخلع حسين وسكر الخط
-امال : منو ياحسين
-حسين: هادى حنان مرت المرحوم ..وشكله رياض مريض.. البسى عبايتك واطلعى معاى
ركبو الزوز السيارة يجرو .. وصلو لحوش بو حنان .. خشت امال تجرى لقت رياض ملوح فمه ازرق وعيونه مقلوبات …
-امال: حنان البسى عبايتك بسرعه
-خيريه : نمشى معاكم حتى انا ولا شنو
-حنان تبكى: لا ياعمتى خليك مع الصغار تشوفى فيهم ناضو يبكو
فتحت حنان الباب وطلعت تجرى وادا بيها تنخبط فى جثه طول فعرض .. ومن قوة الخبطه كيف بطيح شدها هوا من كتافها ووقفها
طاح وشاحها وانفتح شعرها ونزل على كتافها
-حسين : خيرك سمالله عليك
-وقفت حنان: انت منو
-امال: هدا خوى حسين ياحنان
خدى منها الولد فتح الباب الخلفى للسيارة وحطه فيها وقاللهم هيا اركبو ..وركب يجرى للسيارة
امال ركبت من قدام وحنان ركبت من الخلف ..
حسين يجرى 160 ويسال فيها خيره شن كلي هوا بيش تسمم
-حنان مقعمزة وراه تبكى: مش حالة تسمم
-حسين : امالا خيره شن جاه
-حنان: شرب من ارقيله خاله يوسف وشوره فيها حشيش …
يشد حسين فرينو ويطلع من الطريق .. الفرينو قوى قريب فوّز قومات السيارة ..
-حسين: شنووو.. شن تقولى انتى
-حنان : رياض قالى شربت من ارقيله خالى وحركاته زى السكران ..وبدت تبكى
-حسين: باهى باهى ..حسابه معاى بعدين خوك يوسف
وصلو للعيادة ..
خدى حسين رياض وطلع يجري خش للعيادة.. وهما الزوز امال وحنان يجرو وراه …
خداته الممرضه تجرى بيه داخل ..
-جى الدكتور وين امه خيره الولد حالت تسمم..
-حسين: لا يادكتور.. كنا مزردين ولقى ارقيله ملوحه شرب منها منغير منشوفوه …
-الدكتور : وين بوه
-حسين: انا بوه
-الدكتور : برة خلص فالاستعلامات
-حسين : حاضر يادكتور…
تلفت لاخته امال قاللها خليكم هنايا تو نجى .. مالقاش حنان.. قعد يشبح فالممر يدور فيها ..لقاها واقفه قدام الغرفه اللى فيها ولدها …
مشى من الجهه الثانيه من الممر بيش يكلم الاستعلامات ويحط فلوس تحت الحساب.. وشرين تليفونه …
-رد حسين : اهلين يا حاج
-الحاج سعد: حسين انت امتى روحت وخيره ولد خوك توة كلمنى المولدى
-حسين: اهو انا معاه وهوا عنده حالة تسمم متخافش يا حاج ……
-الحاج سعد: كيف منخافش اهو جايكم انا توة …فالطريق
-حسين : باهى ساعد روحك وتوصل بالسلامه

________________________________

تمت ….ويتبع

نحبكم ❤