رواية قلبي شاريك كاملة
#قلبي_شاريك❤
??الحلقه الخامسه والعشرون ??
بوابة الحياش فيها باب سحاب
يردو فيه لكن منغير تسكير بالمفتاح
شاب يجرى .. فتح باب السحاب
وخش يجرى جهه حوش عزيز
يطقطق بكل جهده عالباب
افتح يا حفيظ .. افتح الباب .. حفيظ
ولع ضى الحوش وكل مرة يولع ضى الحياش الثانيين
حفيظ بالرغم نومه رزين لكن ناض مخلوع
اكرم وعماد بايتين فى حوش الحاجه …
عماد نومه خفيف ناض على صوت طقان الباب ..
-عماد: اكرم نوض فى حد يطقطق على حوش خالى
وبدت جميله تعيط
-جميله: ياحفيظ شن فى منو اللى يطقطق هدا
-عزيز : ضمى فمك وخشى لداخل
جت مرام تجرى تلبس فى وشاحها : شن فى يا ماما
_____________________
حفيظ راقد فالمربوعه سمع طقت الباب بالقوة
وقف
طلع يجرى
يلقى امه ومرام فى وسط الحوش لانهم نومهم خفيف هلبا ومن اول طقه ناضو
تلفت حفيظ لمرام : انتى تطلعى نقصلك رجليك
خش للممر
فتح الباب
يلقى منصور صاحبه يلهث ….
منصور من حرارة الروح دف حفيظ وخش يجرى للمربوعه
-حفيظ : خيرك يا منصور
-منصور : جماعه يلحقو فيا لقيت اقرب حوش حوشكم خشيت فيه
انتفتح باب البوابه
وخشو 6 اولاد كل واحد منهم شاد مسواق فى يده
طلع سالم وسعد من حياشهم يجرو
-سعد: شن فى
-الشاب: نبو الولد اللى خش يجرى توة ..شفته طق على الحوش اللى بابه ابيض
-اكرم: ماخش حد توة واقلب وجهك اطلع انت وياه وغدوة يبانلكم
-الشاب : مدامه متبوش اطلعوه بالكويس تو نطلعوه احنا بالغصب
وهجمو على حوش عزيز
وطاحو يضاربو هما واكرم وحفيظ وعماد
حسين طلع من باب الحوش
لقى عركه واولاد يضاربو
مفهم شى
خش يضرب حتى هوا مع صغار خوه وخلاص ??
منحكيلكمش عاللى صار
الشباب كل واحد شاد فى يده مسواق
واهل الحوش مش موتيين روحهم لعركه
وطاحو يضاربو
والنساوين يتعايطو .. جميله مش مخلية جهد ?
سعد يعيط : يا اكرم وليدى صلو عالنبى واوقفو
جى سالم يجرى بيحز
جاته ضربه .. طاح حتى هوا يضرب
وجميله معش سكتت عاد .. وطاحت تجولح فى الحوش
وووك عليا وليدى بيقتلوه ..نست راجلها عزيز حتى هوا فالعركه ?
حنان لبست عباية ووشاح وشادة صغارها فالحوش يبكو
ووجدان تنادى: ياسالم تعالة شن دخلك انت
الحاجه طلعت من الحوش تعيط: ياسعد واليدى خيركم شن فى
وحسين والشباب صغار خوته ومعاهم سالم منحكيلكمش فاتحين جبهه مع بعض
عزيز نوعه مسالم واقف قدام الحوش : يا حفيظ غير اهدو
والفرخ سبب العركه طلع يجرى يضرب مع حفيظ واكرم
” تبو الحق يابنات ظلمنا فرخ الشطان احمد ..كلنا شكينا فيه نحسابوه هوا??.. وانا نعتدرله هههه وكل وحدة شكت فيه مفروض تعتدرله ??”
نرجعو للعركه
نزل عزيز من دروج حوشه يبي يحز
خش وسط العركه يبي يطلع ولده حفيظ ويسكتهم
وتجيه خبطه على راسه
اغمى عليه وبدت الدمايات تشر من جبهته
حسين وحفيظ شدو عزيز
والشباب هربو جرى من الباب
واكرم قعد لاهى حتى هوا فى عزيز
وسعد جاى يجرى خيره عزيز
حسين شاده على يده يعيط : يا عماد جيبو قهوة نوقفو الدم
جميله وين تلقاها عااد … بواصى تعطى فيهم وبنتها اتسكت فيها
والحاجه حتى هيا تعيط
________________________
خلو الحوش يهوج ويموج وعياطات نساوين
وطارو بعزيز للمستشفى
حسين سوريته كلها دم من عزيز
وحفيظ مقعمز عالكرسى وجنبه خوه محمد يبكى
واكرم واقف فم باب الغرفه اللى فيها عزيز
جى الولد منصور سبب العركه يكلم فى حسين : زعما شن حاله توة عمى عزيز
يلم حسين يده ويركه فاكو على وجهه
-حسين: تى روح يا فاسد كله منك .. تى والله عزيز تصيرله حاجه لما نشرب من دمك
مشى الولد وقف فالممر الثانى
طلع الدكتور .. التمو عليه اكرم وحفيظ وعماد وحسين
-الدكتور: منكدبش عليكم الحالة مش ساهلة والضربه قويه عالجبهه
-حسين: مفهمناش هوا حاله باهى ولا لا فهمنا يا دكتور
-الدكتور: انا خيطله الجرح .. وهوا فاق توة ..لكن درتله تحويل للطبى…لازم اديرو تصوير خايفيين من الارتجاج
تليفون حفيظ واكرم يشرينو وهما مايبوش يردو
-حسين: ردو وطمنوهم الزح .. حتى هما مشغولين فالحوش
-اكرم : شنو عمى نمشو لطرابلس
-حسين: غير طلع عمك وحطه فى سيارتى وتو نعرف انا وين نرفعه
_____________________
حوش عزيز تعبى
الحاجه وحنان ووجدان وبريكه وبنتها
وجميلة عاد .. جتها لعندها
وهاتك يا عياط
ياحليلى على وليدى ..
ياحليلى على راجلى طلع كله دمايات
ياربي منيش صاحبت شر لا انا ولا راجلى
الله غالب يجينى جيان مانمشيله
الحمدلله وليدى لا متع مشاكل ولا متع عراكات راقد فمربوعته لا بيه لا عليه
ودوشه وصداع دايرتهم جميله عايشه الدور ?
“بالله قداش وحدة منكم عندها زى جميله فى عيلتها”???????
.
.
.
حنان تبكى .. لانها تعز سلفها عزيز هلبا .. عنده اكثر من موقف واقف فيه معاها زمان
والحاجه تبكى : حليلى على وليدى
والنساوين يسكتو فى بعضهم
خشو نساوين الجيران لانهم سمعو العركه
والوسعايه اللى قدام الحياش تعبت برجالت الجيران
وجو خوات جميلة سمعو فزعو طول
الساعه 2 ..خشت سيارة حسين للحياش
نزل حفيظ يجرى خش للحوش
سعد مشى بسرعه للسيارة : شن حاله خوك يا حسين
-حسين: اهو معاى فالسيارة .. قول لعياله تجيب جوازه
-سعد: علاش وين بتمشو
-اكرم: اجرنا سيارة اسعاف بنرفعوه لتونس
احمد درس سيارته قدام السور ونزل هوا وبوه وامه
امه خشت بسرعه للنساوين
وخالد وقف على سعد وحسين يحمد بالسلامه
-حسين: عماد نزل خالك دخله للمربوعه
-سعد: بتمشو غدوة
-حسين: لا سيارة الاسعاف لاحقتنا توة لكن خلى تشبحه امى وعياله وبنته ..وخلى نبدلوله حوايجه
نزلو عزيز من السيارة شادينه عماد ماليمين واحمد ولد خالد ماليسار
_________________________
دخلو عزيز للمربوعه ….
خشت فاطمه اختهم تبكى..
وبعدها طول خشت اختها مفيدة ..
المربوعه تعبت سعد وحسين وسالم ..وخشت جميلة ومرام والحاجه وفاطمه ومفيدة وبريكه …
وخشت امال تبكى من الباب للمربوعه طول
وفالممر قدام الباب واقفين خوات جميلة .. واحلام وحنان
حسين واقف فالمربوعه .. شاف حنان واقفه فالممر وقايمه بنتها امولا فى غمرها …اشرلها بيده خشى
اشرتله حنان براسها لاااا.. تحشمت من سلافها المربوعه مليانه
احمد من فم الباب ينادى : ياااام
طلعت احلام فم الباب : نعم وليدى
-احمد: بنمشى معاهم لتونس
-احلام: انشد بوك
______________________
-حسين: يا جميلة وقفى نديب وخشى جيبيله حوايج خلى نبدلوله
-سعد: حتى انت برة دوش وبدل حوايجك كلهم دم
وبعتالى تفكر سعد وكمل كلامه : حسين.. مش كلمتنى قلتلى ماشى لتونس … شن جابك الليله
-حسين: كنت فى تونس وروحت امبكرى عندى ماندير
وتلفت حسين لمرام : مرام نوضى جيبي حوايج بوك خلى انبدله قبل مانمشى انبدل حوايجى
وجابو لعزيز حوايجه وغيروله حسين واكرم
طلع حسين من المربوعه ينادى: حنان
جت حنان للممر: نعم
-حسين: تعالى عطينى حوايجى خلى نبدل
-حنان: باهى بالله عليك جيب الاولاد انروح بيهم معاى ..هوينا يلعبو
-حسين: باهى اسبقينى انتى وامولا اهو تو نجيبهم ونجى
لفت حنان وشاحها على وجهها ماباين منها شى الا عيونها لان الوسعاية معبية بالرجاله
خشت حنان ومعاها امولا للحوش
حولت وشاحها
وحولت العباية لابسة تحتها نفس القفطان اللى كانت لابسته ابيض فالاحمر
وغسلت وجهها من البكى
خش حسين ومعاه احمد ورياض
سلب سوريته رايحه كلها دم
وخش طول للحمام ..
-حسين: حنان جيبيلى حوايج
جت حنان فم باب الحمام تكلم فيه
-حنان: حسين تسمع فيا
فتح حسين الباب ويكلم فيها باين منه راسه وكتافه بس
-حنان: معندكش حوايج فالحوش .. رفعتهم كلهم انت
-حسين: اوووف نسيت …باهى هاتى تليفونى
وكلم عماد ولد اخته قاله جيبلى الشنطه الصغيرة اللى فى كوفينو السيارة
وبالفعل جابها وعطاها لحنان …
خشت حنان للدار وحطت الشنطه
وتفكر زعما ترقد صغارها فى سرايرهم ولا بترجع لحوش سلفها وترفعهم معاها
-احمد: تعرفى يا ماما الاشرار كلهم قتلهم بابا
-رياض: قعد يضرب فيهم بالضربه اللولبيه
حنان تضحك شنو تحسابوه بلايستيشن امالا ??
قررت انها ترقدهم فى سرايرهم ..
واللى تحطه فسريره يمشى فالنوم طول
حسين طلع من الحمام لاف فوطه
خش لدار النوم .. لقي حنان فيها
حنان تحشمت اول مرة تشوفه هكى
-حنان: خلى نطلع انا وانت خود راحتك
فتح حسين يديه الزوز ودارلها ممنوع الخروج
-حسين: راحتى معاك يا حبى
بنستاحشك …
تعالى..
قعمز حسين عالسرير وحط حنان فى حجره
وقعد يلعب بشعرها
ويشبح لعيونها
-حسين: عندك علم انى مروح على خاطرك ولا
-حنان: وعندك علم انى شايفتلك بيها كبيرة
قرب وجهه منها ….
وبدى يسمع فى صوت انفاسها يقوا
حضنها وقعد يبوس فيها : بنستاحشك من توة يا حبى
وهيا حطت يداها على كتافه وحضناته وبدت تبوس فيه : نحبك
-حنان: نحبك يا حسين
– حسين : وانا نموت فيك ياروح حسين
خشت الاسعاف والصوت متعها منحيلكمش قلب الدنيا
انخلعو الزوز يبسو فى حضن بعض
وبدى الباب متع الحوش يطقطق ..
اكرم فم الباب: عمى الاسعاف جت هيا
قعدو يضحكو الزوو وخدى بوسه من فهما وهيا تضحك
-حسين: فديت هالضحكه
-حنان: خليك كمل منبيش نحرمك منى قبل ماتمشى
-حسين: لا .. منبيهاش هكى .. هادى اول مرة ليا معاك …. ويامحلاه الرقاد بالحلال ..منبيش نديرها بسرعه ونطلع.. نبيك فى حضنى طول الليل
وقف ساوى الفوطه …
وخش هوا للحمام متع غرفه حنان فتح الميه المسقعه وقعدت تصب عليه بيش يهدا
وقعد ينادى فيها …
حنان نوضى خشى للحمام بسرعه بيش نطلعو مع بعض
وخشت هيا لحمام دار الصغار وغسلت بسرعه
طلع حسين من الحمام ولبس حوايجه
وهيا لبست عبايتها
________________
خش حسين لديار الصغار
قعد يبوس فيهم
وحضن امولا هلبا وهيا راقدة فى سابع نوما
طلعو للممر ….
جايب هوا الشنطه معاه
وقفو من ورا باب الحوش مزال ماطلعوش
نزل الشنطه من يده
خداها فى حضنه ..وقامها فوق من عالارض … وقعد يبوس فيها من خدودها ومن فمها ومن عيونها ومن شعرها قريب مية بوسه??
وقعد حاضنها
-حنان: رد بالك من روحك حبيبى
-حسين: نحبك هلبا
-حنان: وانا نحبك اكثر من روحى
-حسين: ردى بالك على روحى خليتها معاك .. وردى بالك على صغارى
خدت بوسه من فمه : فالحفظ والصون
-حسين يحب يتسهوك عليها: ماشالله وبدينا جريئين ونعرفو نبوسو بروحنا
-حنان تضحك : وليش لا مش حلالى
-حسين: حلالك وكل مافيا ليك
-حنان باست على فمه مرة ثانية: طبعا ليا انا وبسسسسس
طق باب الباب بالقوة ?
انخلعو الزوز مرة ثانيه وشدت هيا فى رقبته
-حسين: منو
-عماد: اهو خالى حطيناه فالاسعاف
-حسين: اهو جايكم
وقعدو يضحكو الزوز
-حسين: بنستاحشك
-حنان : مش اكثر منى
-حسين: خليتلك الماى فاى متاعى بيش نتكلمو فايبر
-حنان: انت شاريلنا نت .. فى فالحوش
-حسين: لا نخاف يضايقوك فيه الصغار ويضعف خلى الماى فاى متعى على جهازك انتى بس
-حنان: باهى
نزلها
-حسين: لا اله الا الله
-حنان: محمد رسول الله
وفتحو الباب …
طلع حسين .. وحنان وراه غطت وجهها وطلعت
_______________
تسقدو لتونس ..
سيارة الاسعاف فيها عزيز و حسين
وراهم سيارة حسين يسوق فيها اكرم وجنبه حفيظ
ومن الخلف عماد واحمد
ثانى يوم الضهر وصلو تونس
دخلو عزيز للعيادة
طلعت الضربه خطيرة رقدوه طول ..
اجرو شقه …
وقعدو يتبادلو على عزيز بالدور كل مرة معاه واحد
احمد وحفيظ تقوت علاقتهم شبحله كبيرة بمشيته معاهم
وحسين شادها غراميات مع حنان بالفايبر ومكالمات الفيديو
______________________
الساعه 1 فالليل حسين فالشقه بروحه بعت رساله لحنان بالفايبر
“حبيبي فالحوش”
ردت عليه حنان
“ايه فالحوش حبيبي”
بعتلها رساله
“باهى افتحى الفيديو انا بروحى فالشقه ”
ردت هيا
“شويا بس يقوا النت ونتصل ”
حركات بنات تبى اتكم قبل ???… ناضت تجرى غيرت حوايجها ..
لبست سروال لاصق اسود.. وبودى اصفر لاصق ثلاث ارباع صدرها عالشارع ..
وفتحت شعرها ..
ودارت مكياج خفيف … هدا كله جرى جرى
خدت التليفون وبعتت رساله
“اتصل توة اهوا الاتصال قوى”
اتصل حسين … طلعتله صورتها …وجهها زى القمر .. وابتسامتها خجوله
-حسين: فديت هالضحكه بروحى
-حنان لامه شاربها اللوطانى وغمزاتها اليمين واضحة وتتكلم بدلع : اهلين
-حسين: نحبك
-حنان تضحك بتشقليع : على طول هكى ..سلم عليا قبل
-حسين يضحك : انا هدا سلامى ليك ..نحبككككك
-حنان فعيونها نضرة ألم : ستاحشتك ياروحى
-حسين: امالا انا شن نقول اللى خليتك تحتى وطلعت
-حنان: اششش اسكت حد يسمعك
-حسين: بروحى يا هبله متخافيش ..
ترا نوضى ورينى اللبسه الحلوة اللى لابستيها
حطت حنان تليفونها عالكوميدينو
وبعدت شوى
تورى لحسين فى جسمها ولبستها
-حسين: اقربي
قربت حنان
-حسين: اكثر
زادت قربت اكثر
-حسين: قربيلى شفايفك نبى ناخد منك بوسه ستاحشتهم
-حنان : على شرط نبوسو بعضنا فى نفس الوقت
-حسين: هيا
وسهرو مع بعضهم ليله ناااار من خلف القضبان??
__________________
حوش جميله يملا ويفرغ
والناس اسمع وافزع
بعد اسبوع لحق سعد وسالم وخو جميلة
النساوين حتى هما يبو يلحقو غير ماخلوهمش
عزيز بدت حالته تتحسن
وقالو لحسين لااازم تروح انت عندك عمل .. برة شوفهم فالعمل وبعتالى ارجع
وبالفعل ركب حسين واحمد وعماد حتى هما عندهم خدمه .. وروحو ليبيا
مروحين فالطريق وحسين ساكت مفيش بين عيونه غير اخر ليله مع حنان …
كيف باسو بعض
وكيف حضنو بعض
وكيف قاللها نحبك ..
وكيف هيا حاضناته وتبوس فيه
وتبادل فيه فالمشاعر
________________
زعما حسين وحنان يقعدو مرتاحين
ولا بتصيرر حاجه ثانية تنغص عليهم
اهو نراجو حتى احنا