رواية قلبي شاريك كاملة

#قلبي_شاريك❤

??الحلقه الثالثه والعشرون ??

حسين: اشششششششش بتعلى صوتك امى بتسمع وانا من مكانى جنبك مش حنوض لو شنو اديرى
ولدلك حط راسك على صدرى وارقدى

بالفعل حنان حطت راسه على صدره ورقدت

لانها حست بالدفى والامان

-حنان بدلع : وكان ناضت امك ولقتنا هكى

-حسين: متخافيش انا بنرقدك وانوض نخش للدار الثانية

حسين حضنها ومشى فى سابع نومه …

ناضت حنان من جنبه خشت دارها ..

لقت رياض وامولا على سريرها

رقدت جنبهم

والصبح فاقت حنان اول وحدة

دارت الفطور

طلعت الحاجه للصالة لقت الفطور واتى

قعمزو يفطرو .. وحسين يشخر غاط فالنوم

-الحاجه: شنو حسين رقد عالسرير هنا

-حنان: ماهو قلت خلى انا نرقد بحدا الصغار احسن خفتهم يضايقوه

-الحاجه :نسمع فى صوت شخيره لما نضت بنصلى الفجر عرفته راقد فالصاله ههههه

تشبحله الحاجه بكل حب : وليدى من التعب حتى صوت الدوشه منوضاش

-حنان: خلى يرقد وينوض براحته

فطرت الحاجه وشربت الشاهى وقالتلها هيا بهناك عاد

-حنان : خيرك ياعمتى اقعدى
-الحاجه: لاااا بنيتى قوليلى زينه …يومين مخليه حوشى بروحه …
-حنان: سامحينى يا عمتى تعبتك

-الحاجه: وبنوتو روحنا خلى تخش علينا امال مدامه خوها اهنا

-حنان: صح مدامه حسين اجازة

-الحاجه هوا بيولى السبت ولا..

-حنان: ايه

-الحاجه: خلاص امالا تو نقوللها تجى الخميس

-حنان: ديرى رايك يا عمتى

وطلعت الحاجه ..وحاست حنان فى مطبخها اضم فيه

____________________

ناض حسين من النوم ..

لقى روحه قاعد عالسرير

ناض وقف لقى الصغار فالصالة وحنان فالمطبخ

خش المطبخ

-حسين: صباح الخير حبيبي

-حنان ترد فوق النفس : صباح الخير

-حسين: وين امى

-حنان : روحت

-حسين: نضتى من جنبى وخليتينى بروحى عالسرير يا مجرمه

حنان ساكته ومتبيش ترد عليه

حسين خش للمطبخ

حط ايده على اكتافها : خيرك حبيبي مريضه

-حنان: معليش لو سمحت بعد ايديك

-حسين: حنان ….

-حنان: مش قلتلك اسمى ماتنطقاش على لسانك …انت عندك انفصام فالشخصيه ولا شن قصتك

-حسين: انتى اللى الباين عندك انفصام فالشخصيه ..مش امس حضنا بعض و..

قصت عليه حنان : امس انا سكتت لان امك هنايا ومنبيش فضيحة بس

-حسين: انتى عارفتنى لا حنعيط ولا حنعلى صوتى ولا حنخلى امى تسمعنى ومع هدا قعدتى

-حنان: هداكه زمان لما كان عندى فيك ثقه كنت ممكن نفكر انك مش حتعيط ولا حدير فضيحه … لكن بعد اللى صار خلاص صعب نوثق فى تصرفاتك

-حسين: حنان شن صايرلك

-حنان: فى واحد اغتصبنى وجاى يبي يضحك عليا ويكمل عملته

-حسين يعظ فى شاربه اللوطى: حنان انتى مرتى ..انتى شن تخرفى بتجننينى اغتصاب شنو

-حنان خايفه : و اللى درته يومها شنهوا …شن تسميه ..ولا شفتنى سكتت تحسابه حق …

-حسين: صار انتى داستهالى فى قلبك

-حنان: كنت مريضه وانت رفعتنى وعالجتنى ..ولحد هنايا صحيت …علاقتك بيا وبصغارى تمت

حسين سكت …………..

-حنان: اتفقنا من اول يوم زواجنا على ورق .. لعبه .. على خاطر الصغار وبس ..

-حسين باحباط : لكن انا حسيت بيك فى حضنى ..حسيت بسعادتك وانا نبوس فيك ..واحساسى عمره مايكدب

-حنان عطت بالضهر بيش مايبانش كدبها فعيونها : لو كنت انسجمت معاك وانت تبوس فيا فهدا لانى زى مراءة فى حضن راجل بالحلال..بالتاكيد ح تنسجم

-حسين: حنان انتى شن تقولى ..والحب

-حنان: حب شنو اللى انت تحكى عليه.. انا مفيش فحياتى حد الا صغارى ..ومش ممكن نخلى حد يخش حياتى غيرهم

-حسين: انا مصدوم فكلامك

-حنان: مش زى صدمتى فى شكك فيا

-حسين: هدا اخر كلام عندك

-حنان عيونها دمعو تلفتت للغاز : هدا كلامى الاول والاخير

-حسين وقف وراها حضنها : انا حندير اللى تبيه انتى ..بس لازم تعرفى ان فى شخص فالدنيا يتمنى التراب اللى تمشى عليه .. ويتمنى يديرك اميرة فى قصر ويعبيه خدام
انا اقسم بالله انى حبيتك بصدق ..ممكن عيبي غيرتى تعمى فعيونى..لكن هدا مايمنعش انى بالفعل نحبك

-حنان: موشح حلو .. لكن ميهمنيش

حسين حول يده من عليها ووخر وصل لعند باب المطبخ

-حسين : مدامه ميهمكش تم الكلام … زى متحبى وكل حد مننا فطريقه

-حنان عيونها دمعو: طريق السلامه

-حسين: وكيف تبى يكون النظام

-حنان: من المربوعه متفوتش .. تو نبعتلك غداك وعشاك

-حسين: لاااا صحيتى لا نبى منك غدى ولا نبى منك عشا … هوا اسبوع انروح فيه تو نشد رجلى ومفيش داعى للمرواح ومصروفك يوصلك لعندك
غير اهتمى بصغارك وربي يحفظكم

-حنان غصرتها العبرة : خلاص تم …هوينا فطورك فالصاله

-حسين: لا صحيتى تو ندبر راسى … وحتى حوايجى تو نتصرف ونرفعهم للونديريه

تلفتلها لقى عيونها معبيات دموع : اى اوامر ثانيه

-حنان: لا

-حسين: بس نطلب منك اخر طلب

-حنان: نعم

-حسين: متحرمينيش من الصغار

-حنان: هما على اى حال صغار خوكم لا نقدر نحرمك انت ولا اى واحد من خوتك منهم

حسين ساكت مصدوم فى قوتها ..

وطلع من المطبخ

__________________

حسين مشى للحمام اللى قدام المربوعه .. بالرغم زمان كان يخش للحمام الدخلانى

طلع من الحمام

وحنان مقعمزة فالصاله مع صغارها وتشوف فيه

خش لدار نوم حنان …

فتح الدولاب …

لم حوايجه المعلقات والمطبقات وحطهم فى ساكو

وطلع للجنان فتح كوفينو السيارة وحط الحوايج كلهم فيه

خش باب الحوش جاته امولا تجرى

-امولا : بابا نبى تشيبس

-حسين: اسألى ماما كانا وافقت ..تعالى نطلعو ونشرو

-رياض واحمد : حتى احنا يابابا

مشو لامهم قالولها بنطلعو قالتلهم برو مع بابا

بدل حسين حوايجه وطلعو

______________________

خشت حنان لدارها

قعمزت قدام المراية

تكلم فى نفسها

انتى يا كدابة قعدتى فى حضنه امبارح بيش ميعيطش

على من تكدبى

تى انتى ماصدقتى خداك فى حضنه وباسك

ناضت من قدام المرايه واتكت على سريرها

معقولة الحب هكى يدير

معقولة مع اول حضن ننسى اللى مزعلنى كله

ونرقد طول على صدره

انا عمرى ماكنت هكى

“تلفتت للجهه الثانيه”

لانك عمرك ماحبيتى وهادى اول مرة فحياتك

ناضت من على السرير ورجعت قعمزت عالمرايه وتكلم فى نفسها

امالا شنو هدا اللى درتيه

اللى درته رد لكرامتى …. ايه كرامتى .. كرامتى اللى نجرحت كان لازم نردها…وماتتردش الا بالطريقه هادى

وتتلفت للمرايه ثانى

باهى وكانا ضاع منك ..بتتحملى !؟

يمشى يملح ..منحباش .. منحباش

لااااااا ليش الكدب تحبيه .. ايه تحبيه وتحبى كل شى في كلامه وهدرزته عليك

تبكى .. ااااه ياااربي ساعدنى وطلعنى من هالدوامه اللى انا فيها

لو تبيه ارجعيله مش عيب

لااااااا لااااااا مستحيل نرجعله لانه اهانى وقتل روحى …..

امالا خلاص انسيه من اليوم زى ماهوا قالك انه بينساك

ورقدت مشت فى نوم عميق
_____________________________

-احمد : ماما ماما ويهز فيها من كتفها

-حنان: روحتو حبيبى

-احمد: روحنا ايه وشرينا شكلاطه الدحية وتشبس وكل شى

-حنان: مش قلتلكم التشبس معش تشروه

-احمد: بابا حطلك شكاير فالمطبخ قالى اعطيهم لماما واعطيها الورقه هادى

-حنان: هاتها ترا

فتحتها

كاتب

جبت للصغار صندوق شوكلاته كيندر وصندوق تشيبس وصناديق شوكلاتات ثانيات وياغورت السايل وعصايرر…
منبيش صغارى يستحقو شى فغيابى .. والفلوس تعرفى مكانهم وين كالعادة خودى قداش ماتبى ..و حطيتلك تليفون عالطاولة وفتحتلك الشفرة …استعمليه …ولو استحقيتى اى حاجه كلمينى .. ولو متبيش تسمعى صوتى ابعتى رساله

المحب لكى دائما حسين

_________________

ناضت حنان قعمزت ورجعت تقرا فالرساله ثانى

لقت روحها تقرا بس فى جملة المحب لكى حسين

ناضت طيبت غدى صغارها

وخلت غدى حسين عالتسخين

تغدو الصغار

جوها نساوين فالعشيه

جت جميلة والحاجه …

بعد ماروحو النساوين

-الحاجه : وقف سوقه المشى للعمل اليوم

-حنان مستغربه : عمل شنو

-الحاجه : كيف انا نقوله اختك بتخش علينا الخميس يقولى العمل نادونى وضرورى نمشى

-حنان مصدومه : على من تتكلمى عمتى

-الحاجه : على حسين … شنو العمل بيوقف كانا هوا مامشاش

-حنان انغصت : ماهو يا عمتى نادوهم كلهم مش غير هوا بس

“دارت روحها تندرى على مشيتها للعمل ”

-الحاجه: هوا قالى تو نجى الخميس .. انشالله يخلوه

-حنان بغصه: انشالله

وروحت الحاجه وجميله …

حنان فالصاله تكلم فى نفسها

امالا عابى عليا انا بنكلمه انقوله ارجع

والله مانى مكالماته ولا معبراته

قال نحبك قال… كداب

تى هوا ماصدق دار حوايجه ومشى

__________________________

مشى حسين الثلاثاء للعمل

مقعمز فالغرفه متعه بس لانه معنداش عمل .. وهيا متبيش تفارق تفكيره ..يتفرج على صورهم مع بعض وهيا لابسه الصدرة..
ويتفرج على صوره مع الصغار

ويراجى فى تليفون منها

يتصل برقمها يطلعله مقفل

وجى يوم الخميس ..السلفات يطيبو فالعشى فى حوش العزوز

وحنان قاعدة فى حوشها قالولها انتى مريضه ومش لازم تتعبى

بدلت لصغارها وبعتتهم يلعبو

وقاعدة فالحوش تراجى فى حسين امتى بيوصل

ادن المغرب وهوا ماجاش

امال قريب توصل معش تقدر تقعد فالحوش اكثر من هكى

ناضت بدلت حوايجها

وبتطلع …

خش ولدها احمد يجرى : ماما نبى الحمام

-حنان: وخوك واختك خيرهم ماجوش خشو للحمام

-احمد : دخلهم بابا الحمام البرانى متع حوش عمى سعد

-حنان انصدمت: جى توة بابا

-احمد: لا لا من لما طلعنا بكرى لقيناه مع الرجاله

-حنان: سلمتو عليه

-احمد: احنا مقعمزين فى حجره يا ماما يبيش يخلينا انوضو نلعبو

-حنان: باهى يا ماما رد بالك اطيح ولا تلبز حوايجك ولما تبينى تلقانى فى حوش حنينه باهى

وطلعت هيا واحمد وسكرت الباب ومشت لحوش عمتها
وجعتها كيف وصل وماخشش للحوش

___________________

حسين مقعمز مع الرجاله

وعقله مع حنان ….

يفكر فى خاطره

كانها فالحوش تو يقولى احمد اصلا انا بعته بلعانى لحمام الحوش

وبنمشى نشوفها حتى لو هيا متبيش تشوفنى

احمد خش يجري ..هيا رياض نلعبو

-حسين: خشيت الحمام

-احمد : ايه دخلتنى ماما

فرح حسين انها فالحوش تلفت لامولة

-حسين :هيا امولا تروحى معاى للحوش نمشو لماما

-احمد: امولا كان تبى ماما تلقاها فى حوش حناى

-حسين: مش قلت ماما فالحوش

-احمد : توة طلعت ومش لحوش حنينه

حسين جاه احباط وقعد مقعمز ماصارش من المشى للحوش

وصلت امال

وجو معاها عزوزتها وسلفاتها وحمواتها الكبار…

جابت هدايا لامها والصغار

وجابت معاها سقيطه وخضرة وفواكه ..

مدو العشى

تعشو

وحنان تخمم وتكلموفى نفسها : اسمعى يا حنان قوليله يخش يرقد لداخل فالصالة زى ماكان يرقد زمان ..عيب تحشمى شنو يرقد فالمربوعه

_________________

حسين مع الرجاله يخمم ..

معش نبيها تضايق … منبيش اى شى يزعلها …وهيا مازالت مجروحه منى

نخاف كانا رقدت حتى فالمربوعه انضايقها

نبيها تقعد مستريحه

نبيها تقعد هيا والصغار مرتاحين فالحوش

مدامنى انا مضايقهم…. بلاش من خشانى للحوش

وبعتالى يزيد يفكر

لا لا لكن انا ستاحشتها ونبى نشبحها

ولكن انت متقدر تقاوم وجودها جنبك منغير ماضمها وتبوسها

ااااااااااه نضمها …قداش ستاحشها حضنى

نقولك حاجه .. ياسرك يا حسين من الهزايب المراءة ضايقتها بما فيه الكفاية ..ياسرها خلى ترتاح

جى حفيظ قطع عليه حبل افكاره وقاله عمتى امال تبى تسلم عليك

مشى لجنان حوش امه

خش لقى امال لابسه بدلة صغيرة

قعد يسلم عليها ..وهيا تحضن فيه وتبكى

شدها بحنية: خيره بنتى تبكى

وامال معش سكتت عاد

-امال: خشيت بنغير الصدرة شوى قلت اناديك تشوفنى قبل ما نحولها

-حسين: ماشالله عليك وربي يحفظك ..

وطلع مبلغ من جيبه عطاهولها ..قعدت هيا متحشمه ومتبيش تاخده

حلف عليها قاللها هادى انحيلة اللبسه اللى توريلى فيها ????

جو مفيدة وفاطمه سلمو عليه حتى هما

وخشت امال لدارها تبدل وتبكى…

حنان معاهم فالدار هيا وجميلة

-جميلة : خيرك امولة تبكى
-فاطمه : سلمت على حسين

حنان سمعت اسم حسين وبدى قلبها يطق يطق

-حنان منغير متحس : قصدك حسين كان هنايا فالجنان

-فاطمه: ضاعف هلبا شوره الخدمه متعباته

حنان ساكته وتتكلم فى خاطرها …. معناها مش غير امال طلعتله حتى فاطمه طلعت سلمت عليه

باهى خيره مانادانيش حتى انا !؟

والله بعتالى فالحوش لما نلوم عليه

وغيرت امال جلابية عرايسيه وطلعت

___________________

حنان مقعمزة بحدا النساوين

جوها صغارها .. ماما اهو بنلعبو فم الباب باهى

-حنان: اقعدو بحدا بابا

-رياض: بابا روح

-حنان: باهى برو روحو معاه للحوش وارقدو اهو تو نجى انا

-رياض: لا بابا روح للعمل يا ماما

-حنان مصدومه : من قالك

-احمد: سلم حتى على عمى سعد وولاد عمامى ..وسلم علينا وقالنا برو بحدا ماما توة وروحو معاها وماتعبوهاش وركب سيارته ومشى

حنان نصدمت …معش عندها نيه تقعد حتى لحظه فى حوش عمتها

تبى تروح

تبى تبكى

وبالفعل ستادنت دارت سبله انها مريضه وطلعت روحت هيا وصغارها

رقدت صغارها

خشت دارها

قعدت تبكى بغصه متبيش صغارها يسمعوها

وخاطرها واجعها

لهدرجه ..

معقولة ..

ماصدق قلتله كلمتين فرح بيهم ومشى فى حاله

انتى كنتى تحلمى يا حنان والحلم تم

ارجعى لارض الواقع .. واحد زى هدا داير وعارف ومتعرف مستحيل يحبك انتى

انتى مراءة فحياته وخلاص زى باقى النساوين مايمزك شى غير فاتحه مقريه وخلاص

بكت مايغسلها ??…

ورقدت

__________________

-مئاب : منقدرش نجى لحوش خالتى
ماما متخلينيش
-معاد: باهى ديري حل لازم نبى نشوفك
-مئاب : باهى انت اصبر شوى المدرسه قريب بتبدا
وقتها نقدر نطلع
-معاد: باهى على خاطرك نصبر

اتاريها المفعوصه كلمته من نفس الليله اللى عطاها فيها الرقم ????

__________________

ناضت حنان الصبح

دوشت وفطرت صغارها وقررت انها معش تفكر فيه

تنساه

لانها هيا اللى طلبت منه هكى

معش تقدر توة تكلمه وتلوم عليه وتقوله وينك

-رياض: اليوم الجمعه بنمشو نتغدو فى حوش احنينه

-حنان: لا بنمشو لحوش خالتك احلام

-احمد: من بيرفعنا

-حنان : اكرم مهناش اهو بيرفعنا معاد ولد عمتك فاطمه

طبعا حسين مقايلها لحوش بوك او اختك مايرفعك حد الا اكرم او حفيظ او معاد او احمد ولد اختها …فقط

جى معاد الساعه 12 متكم

بعت رياض لامه قاله قول لامك هيا

طلعت حنان سكرت باب حوشها وخشت لحوش عمتها سلمت عليها وعلى امال ..
قالتلهم احلام عندها طلبيه ولازم نعاونها كنهدا راهو قعدت

قالولها عدرك معاك

طلعت ..رفعها معاد

درس قدام حوش احلام

خشت حنان للحوش ومعاها رياض واحمد

وامولا قعدت عند معاد

طبعا متفق مع مئاب عاللقطه هادى

مئاب دارت روحها بدخل امولا

طلعت تنادى : امولا هيا تعالى

نزل عماد من السيارة .. فتح الباب ونزل امولا

قرب من الباب مدهالها وسلم عليها وعطاها معاها كيس

ورجع لسيارته وركب فيها

مئاب مشت تجرى لتحت الدروج اللى فالجنان دست الكيس ورجعت فم الباب

زعميتا بتسقد معاد

جت فم الباب لقت خوها احمد كيف درس

خشت خدت الكيسه من تحت الدروج ومشت لدارها تجرى

قلبها يطق خايفه ان احمد شبحها .

ومعش طاقها الصبر

فتحت ياحنه هاديكا الكيسه

لقتها هديه

دبدوب وساعه .. وشوكلاتات .. وتعليقه بسيطه فضه سنسال ومعلق فيها قلب

عيونها ولو قلوب البنات طبعا يموتو فالهدايا ????

_______________

قدام حوش احلام تلاقى احمد مع معاد قبل مايطلع

-احمد : اهلين معاد
-معاد: اهلا احمد شنحالك
-احمد : شنو معاد جاى ادور فيا
-معاد: لا الحق جبت حنان مرت خالى
-احمد: غريبه عجيبه اومرة نشوفك توصلها
-معاد : غير اكرم مهناش قلت نوصلها انا ..

جى عمك خالد راجل احلام قعد يسلم على معاد ..وقاله انزل عالاقل فنجان قهوة

نزل معاد .. “ماصدق ?” خش للمربوعه

-احمد: مئاب ترا ديري قهوة معاى ولد
-مئاب فى خاطرها : سمسام ديما وانا حاصلة فصحابك

-احلام: حطى من المقروض اللى درناه امس
-مئاب توشوش : والله ماهم دايقينه

خش خالد سلم على حنان

-خالد: شن حال صحتك توة حنونه
-حنان: الحمدلله عمى خالد
-خالد : نبيك تريحى روحك
-حنان: احنا توة كيف جينا مزال مابدينا فى شى
-خالد: ايه قالى معاد انه توة جابكم
-حنان: تلاقيت معاه لما مروح
-خالد : لا خش هوا واحمد للمربوعه

مئاب فالكوجينه قريب داخت

لوحت القهوة الاولى وحطت قهوة ثانية

وطلعت السفر الدهبيات

وطلعت جميع انواع الحلاوات فى حوشهم

هههههههه

___________________

وفاتو الاسبوعين متع شغل حسين

وهوا يتصل برقمها

والرقم مزال مقفل

وجى اسبوع الراحه اللى بيروح فيه

حنان فرحانه ..وسعيدة ..وتراجى فى يوم السبت بفارغ الصبر

جاهم سعد يوم السبت

طقطق الباب

فتح رياض ..

ماما عمى سعد

خشت لبست جلابيه ووشاح ..

وطلعتله فم الباب : تفضل عمى خش

-سعد : لا والله بنمشى لسوق الخضرة ..

غير كلمنى حسين قالى ميقدرش يروح اليوم بعتوهم لتونس عمل الاسبوع الجاى كله

حيه عالاحباط اللى جى لحنان

قدام سلفها تمالكت نفسها ..

وقالتله انشالله ربي يعاونه

الاسبوع اللى تراجى فيه بفارغ الصبر ماصارش منه

سكتت وعطت احكامها لربى وخلاص

-سعد: قتلك ….خيرك ماتفتحيش شفرتك وتشري تليفون بدل اللى راح منك

-حنان: انشالله عمى تو نفتحها

وخشت قعد تدكر كيف طلعت الشفرات الزوز وكسرتهم

شفرة الفاتوة والشفرة السرية

خشت لدارها

قعمزت قدام المرايه وقعدت تبكى

ستاحشاته

ندمت انها كسرت الشفرتين

وندمت انها قالتله ابعد عنى

لكن كيف بتوصله توة خلاص

______________

حسين مشى لشقته فطرابلس

قبل بيمشى لتونس حق ..ولكن ماخاطراش

فضل انه يمشى لشقه طرابلس وخلاص

وجاه كمال يوم الاحد الصبح جايب معاه كريب ونسكافيه بيش يفطروه

فتح حسين الباب

خش كمال

-كمال : عارفك باير ويلقوك معفن اهنايا بلا ماكله كان تقعد شهر ماتطلعش

– حسين يضحك : الله غالب طبع

شاد حسين تليفونه وفاتح لعبه يلعب بيها

-كمال: خيرك مهيم

-حسين: ستاحشتها …….. هلبااااا

-كمال: باهى روح لحوشك

-حسين: اللى جاها من وراى سادها

-كمال: باهى ولامتى بتقعد هكى

-حسين: لين ربي يدير حل

-كمال: لكن هكى ممكن تهبل انت

-حسين: انا هبلت وتم ..
شكلى حطيت رجلى فى طريق مش ليا ..

لا قدرت انرد رجلى ونطلع من الطريق ..
ولا قدرت نعفس برجلى الثانى ونكملها

-كمال: احسن حل المواجهه

-حسين: مواجهه شنو …انا منقدرش نقاوم وجودها جنبى .. على طول ناخدها فى حضنى ..منقدرش نقاومها ..

-كمال: انت حاول تتفاهم معاها

-حسين: هيا كلامها واضح ..معش تبينى فى حياتها ..ماحاولتش حتى انها تفتح التليفون وتكلمنى .. بيش تعرف انها مرتاحه هكى

-كمال: وليش الزعل هدا كله فى حلقه مفقودة انت متبيش تحكاها

سكت حسين وتلفت للجهه الثانية من الصالون

_____________________

فات الاسبوع وحسين فى شقة طرابلس …

يوم السبت العشيه مفروض يكون فالعمل

نهار الجمعه من الصبح .. لبس عربى .. ومشى صلى الجمعه …

طلع من الجامع

ركب سيارته

ولقى روحه ماشى فالطريق مروح للحوش

خلاص معش قدر يقاوم

ستاحشها

وستاحش الصغار

وصل يشبح للسور متع الحياش من بعيد

وقف السيارة

صراع

يخش للحوش ولا يروح

___________________________