رواية قلبي شاريك كاملة

#قلبي_شاريك❤

??الحلقه الثانية والعشرون ??

حسين: دكتورة انا زوج حنان اللى ركبوها توة

-الدكتورة : منكدبش عليك حالتها خطيرة شوى ..

-حسين: شن عندها يا دكتورة

-الكتورة : حالة تسمم ليها عالاقل ثلاث ايام ..

وانتو تاخرتو بيها بيش جبتوها .. فأدت اللى اجهاض

-حسين باستغراب : اجهاض شنو

-الدكتورة : ليش انت متعرفش ان زوجتك كانت حامل

-حسين: انا كنت فالعمل ليا اسبوعين واليوم بس روحت

-الدكتورة: عندها كدمات دم فالحالب ..

ادت الى تسمم ..ومنكدبش عليك نسبة التسمم عاليه هلبا ..

لانكم تأخرتو فى احضارها …

انشالله ربي معاها

_____________________

حسين قعمز جنب الصغار فالممر

-احمد يلعّب فى رجليه عالكرسى: بابا ..خيرها ماما

حسين قعمزهم الثلاثه على رجليه وضمهم ليه وقعد يبكى

الممرضات يتفرجو عليه ويتهامسو ..

حيه شوفى راجلها كيف يبكى ??

-امولا: بابا متخليهمش يضربولها يبرة

-حسين: وعلاش

-امولا : ماهو بتوجعها

-حسين: من اليوم معش حنخلى شى يوجعها ..

غير خلى تنوض بالسلامه بس

جت جنبه ممرضه عطاته شيشه امية نص ليترة

-الممرضه منيرة : هاك اشرب خوى

قام حسين راسه وخدى منه الشيشه ..

جى فى اخر الممر وطبس

وصب شيشه الميه على راسه بالك يفيق من الصدمه

والعملة اللى هوا فيها

جابوله الممرضات كلينكس مسح وجهه

-الممرضه سكينه : خوى ماتخافش يعطو فيها فالمضاد وانشالله خير

-حسين: لكن الدكتورة قالتلى حالتها خطيرة

-الممرضه منيرة : ايه هداكه لما جبتوها حالتها خطيرة هلبا لو زادت ليله كنتو لقيتوها متوفيه لا سمح الله
-الممرضه سكينه : خوى لازم تروح بالصغار توة .. وتجيب كتيب العيله نكملو منه بياناتها

-حسين: بيش نروح للحوش يبيلى ساعه وربع فالطريق ماشى ..وساعه وربع جاى منقدرش الوقت هدا كله نخليها بروحها هنا

-الممرضه منيرة: باهى بلغ حد من اهلك يجيب الاوراق ويروح بالصغار

_________________

هوا مكنش ناوى يقول ان حنان فالمستشفى

لكنه مضطر انه يكلم حد منهم

كلم اكرم ولد خوه سعد

-حسين: اكرم انا فالزاوية ونبيك تلحقنى

-اكرم: شفتك طالع انت والعويلة البارح ..

-حسين: احنا فالمستشفى العام متع الزاوية

-اكرم : خيركم شن فى انشالله خير

-حسين: اسمع خود مفتاح حوشى الاحتياط من بوك ..وافتحه ..
و خش لدار النوم وجيبلى كتيب العيله وتعالالى ..

وماتبلغ حد الا بوك منبيش شوشرة

-اكرم : بايت معاى معاد ولد عمتى فاطمه تو نقوله يجى معاى

-حسين: باهى اهو نراجى فيكم

___________

خدو الكتيب وطلعو ..

سعد اتصل بحسين

-سعد: خيرها حنان يا حسين
-حسين: عندها حاله تسمم شدوها فالمستشفى

-سعد : اهو شوى ثانية بنجى حتى انا
-حسين: مفيش داعى اتعب روحك يا حاج ..حتى انا مخلونيش نخشلها

-سعد: شن تحكى انت هادى بنتى راهو

الساعه 8 صباحا …

وصلو الشباب عند حسين عطوه الكتيب متعه

-اكرم : مدامها حالة تسمم شن دخل الكتيب يا عمى

-حسين: انا قلت مرات يبو الرقم الوطنى ولا اوراق
-اكرم: قصدى شن دخل هدا فى هدا

-حسين تعصب: وانا وين ندرى عليهم يا اكرم هما
قالولى جيبه
____________

خش حسين لغرفه الدكتورة

-حسين: صباح الخير دكتورة
-الدكتورة : صباح الخير خوى

-حسين: شنو حال حنان توة
-الدكتورة : حالتها تحسنت هلبا ومستجيبة للمضاد

-حسين: انا الحق جو العيلة فقلتلهم انها حالة تسمم بس والاجهاض ماتكلمتش عليه

-الدكتورة : ليش ؟
-حسين: معرفش شن يكدب هههه

شوى قاللها

والله عويلتى صعبين ومالنوع يحدفو فالدوة

فنخاف حد يضايقها على حكاية الاجهاض هادى ولا يقول قدامها كلمه

-الدكتورة: كلام شنو اللى بيقولوه قدامها وهيا ماشالله بصغارها

-حسين: منبيش نقول عليه الاجهاض وخلاص وعندى اسبابى .. ممكن والا لا
-الدكتورة : تمام براحتك

___________________

تليفون حسين مبطلش تشريين سمعت العيلة كلها عاد

مرة تكلمه جميلة ومرة امال ..حتى وجدان اللى متحبهاش تتصل وتعاود …

انشغلو لما سمعو بالتسمم

ف لقى حسين من الواجب انه يبلغ اختها احلام

الساعه 9 شرين تليفون احلام

ردت

-احلام: الوو
-حسين: اهلين احلام كيف حالك
-احلام: الحمدلله شن حالكم انتو يا حسين

-حسين: احنا فالزاوية حنان صارتلها حاله تسمم وشدوها هنايا
-احلام انخلعت: خيرها شن صارلها اوخيتى
-حسين: حاله احسن توة الحمد لله غير قلت نبلغك

__________________

حسين ماشى جاى على حجرة الدكتورة يبي يخش لحنان يشبحها…

وهيا قالتله ممنوع حاليا لين تفيق

الساعه 11 صباحا

خش سعد ومعاه امه وبريكه وبنته صالحه …

ركبو للدور الثانى

لقو حسين والصغار مقعمزين …

اكرم ومعاد مزال ماروحوش بالصغار للحوش

سلم عليهم حسين…

والصغار جو يجرو لصالحه بنت عمهم

-حسين: ليش جاية يمى مسافه طويلة عليك رجليك ميتحملوش المسافه
-الحاجه: تقولى بنتى حنان متسممه وتبينى نقعد

-سعد : شن حالها توة
-حسين: الحمدلله يعطو فيها فالمضاد

-صالحه: ليش جايبهم معاك الصغار يا عمى مفروض فوتتهم علينا
-حسين: منحسابش تسمم وبيشدوها..نحساب معاينه عادية وبتروح

شوى وخشت احلام وبنتها مئاب وراجلها خالد

-احلام تبكى: خيرها حنان
-حسين: هدى روحك يا احلام حالة تسمم ويعطو فيها فالمضاد

سعد وخالد مشو قعمزو بروحهم على تركينه

والصغار لما شافو مئاب سيبو صالحه ومشو يجرو شدو فيها لانهم واخدين عليها هلبا

-مئاب: عمى حسين الصغار فطرو
-حسين: لا والله لتوة ماداقو حاجه

-مئاب : اهو تو ننزل نجيبلهم انا فطور
-احلام: خلى صغار خالتك هنايا متنزليهمش معاك

حسين عطاها 30 دينار وقاللها جيبي للكل

وطبعا الكل قعدو يقولو لا فاطرين والحمدلله

فتحت باب الانسانسير ونزلت …

وصل الاسانسير للدور الارضى كيف بتطلع وتخبط فى شاب شاد فى يده 3 اكواب نسكافيه ..

تتبزع طاسه نسكافيه وتنطرت على الحيط وتلبز سروالها وسرواله وتيشريته

قامت راسها شبحتله

-مئاب: يعطك فقصه فعيونك … سروالى راح حالة

وبدت تمسح فيه بكلينكس طلعاته من شنطتها

-الشاب: انتى اللى طالعه تهزى فراسك ..ماهو اشبحى قدامك

-مئاب: والله مانى مسامحاتك

ومشت فالممر والولد يشبحلها ويتفرج عليها ويضحك

_____________

حسين واقف هوا وسعد واكرم

-اكرم: اهو بنروح بيهم توة الصغار يا بوى

-سعد: ماهو هدا مستشفى ونخافهم ياخدو عدوى

-خالد: الصغار تو يروحو معاى انا واخدين عالبنيات عندى فالحوش ومتعلقين بيهم

جى معاد شاد فى يده طاستين نسكافيه ..

-اكرم : خيرك جبت طاستين بس
-معاد : جبت ثلاثه لكن وحدة من الطواسى طاحت منى توة خبطت فى بنت فالاسانسير

وتلفت ل سعد وخالد

شن حالك يا خالى ..شن حالك عمى خالد

ردو عليه سعد وخالد : الحمدلله

اكرم يوشوش ل معاد بالشوى: ههههه والبنية حلوة

-معاد: اطير العقل يا ولد خالى مسحت بيا الوطا ومشت

وضحك

________________________

جت الممرضه تكلم فيهم

-الممرضه سكينه: قالتلى الدكتورة نبلغكم ان وجودكم زايد ..والمريضه صعب زيارتها اليوم

-سعد: احنا جايين من مكان بعيد خلينا نشوفوها شوى ونروحو

-الممرضه : الدكتورة اللى شدت توة صعبه شوى وقالتلى نبلغكم هكى

خشو عزيز وجميلة ..

جميلة قعدت تبكى لانها تحب حنان هلبا

-جميلة تمسح فدموعها : يانارى على حنان وهيا الحظ حتى ريحه ..شن كلت زعما من شنو جاها التسمم ..

جميلة تحب تسال ههههه

-حسين: مزال التقرير متع الدكتورة مطلعش

وهوا فى خاطره ..ريحينا يا جميله

ومشى حسين لخوه سعد يبي يقوله روحو ولما تفيق نكلمكم تعالو

-جميلة: شن حالكم يا عمتى .. ركبتو وجيتو كان قلتولى راهو جيت معاكم

الحاجه مبتش ترد متحبش التلكليك

-مئاب شادة فى يدها كيسه: السلام عليكم
-احلام خيرك عطلتى وخيره سروالك ملبز
-مئاب : لا شى غير طاح عليا عصير ..

??متبيش تحكى لامها اللى صار معاها

-جميلة : اهيا الدكتورة فايته والله لما نسالها

مئاب خدت الصغار وتوكل فيهم فى كيكه وعصير

جى جنبهم حسين سخفوه الصغار كيف براءة وما فاهمين شى

-حسين: خلى الصغار يروحو معاك مئاب باهى

-مئاب: ايه اكيد بنروح بيهم معاى

-بريكه : اهو حتى قدانا احنا يقعدو

-احلام: واخدين على مئاب هلبا هما حتى عندنا احنا مفيش تعب

جميله كانت واقفه عالدكتورة وجت تضحك

-جميلة: خيرها فى غيرها وربي يعوضكم خير ياحسين
-الحاجه: بيعوضهم خير فى شنو

-جميلة : قصدى عالبيبي .. ماهو حنان رامية شنو ما قاللكمش حسين

ووك عليا مايفوت عليها شى هههههه

و عم سكووووت تاااااام فالمكان

_________________

-الحاجه فرحت: ربي يعوضكم خير يا وليدى ..

-بريكه : الله غالب شوره ولى عليها تعب العرس

-جميلة : العمر قدامهم مزال

_______________

وناضو كلهم بيروحو

-سعد: اكرم انت اقعد مع عمك هنا

-اكرم: معاد وانت شن برنامجك

-معاد:عندى عمل غدوة .. تو نروح مع حد من اللى مروحين

-عزيز: روح معانا خالك سعد سيارته معبيه .. العيلة تبى ادير دورة فالزاوية ونروحو

-اكرم: لا ياخالى ديرو دورة براحتكم انا تو ناخد تاكسى

-خالد: انا سيارتى فاضيه معاى العيلة والبنية بس .. روح معانا احنا مروحين طول

-اكرم: لا لا عادى والله التاكسيات متوفرات
-خالد: عيب عاد سيارتى فاضيه قلتلك

ونزلو كلهم ..احلام تبى تقعد ولكن اقنعها حسين بالمرواح قاللها اول ماتفيق نكلمك طول

___________

طلعت سيارة سعد وروحو ..

حسين شاد الصغار ويبوس فيهم ..

ويوصى فى احلام عليهم ..

عطاها فلوس ومفتاح الحوش الاحتياطى وقاللها ارفعيلهم حوايج

عزيز وخالد ومعاد قعدو واقفين مع بعض بعضهم

شوى وبعتال ركبو فالسيارات

جو النساوين …

مئاب لقت معاد راكب فى سيارتهم

-مئاب: حيه نفس الولد اللى تعاركت معاه بكرى

وهوا قعد يشبحلها لقى معاها صغار خاله وهيا جاية لنفس السيارة اللى فيها هوا

خالد قال لاحلام اركبى من تالى بيروح معانا معاد

ركبو مئاب وامها فالسيارة وقالو السلام عليكم

مئاب مصدومه ..

-رياض: معاد بتروح معانا

-معاد: ايه بنروح معاكم ..يضحك ويشبح فى مئاب من المراية كيف متلخبطه ومصدومه ..

-احلام: شن حال فاطمه مسمعتش امالا

-معاد : الحمدلله كويسه .. لا مسمعتش انا كنت بايت فى حوش جدى

يكلمو فيها الصغار فى مئاب .. يا مئاب نبو امية

عرف ان اسمها مئاب ..

احلام كلمت اختها قمرة قالتلها متجيش حتى احنا روحنا مانعين عليها الزيارة

طول الطريق يهدرزو معاد و خالد ..

ويستعرض معاد فى نفسه .. انه مهندس ويخدم فى منظومه النهر الصناعى ..

_____________

بعد ساعه فى المستشفى

-حسين: اكرم هى تسقد روح طريقك بيضا

-اكرم: خلى نقعد معاك يا عمى خيرك

-حسين: انا سكتت بكرى بيش ميشدش بوك فقعادك ويقعد يحلف …حنان توة فى غيبوبة وغير قاعد زايد انت …لما تفيق نكلمكم

-اكرم: على راحتك يا عمى

وطلع اكرم ولع سيارته وروح

وفات العصر

وجى المغرب .. صلى ودعى ربي يحفظها ليه

الساعه 1 فالليل ..

-الممرضه سالمه : المريضه فاقت

وقف حسين فرحان : ربي يبشرك بالخير

مشى يجرى وقف قدام باب غرفتها بالزبط

جت الدكتورة .. خشت للغرفه وسكرت الباب

بعد شوى طلعت وقالتله لو يبي يخش يتفضل ..

وصاته الدكتورة انها لازم تشرب سوائل وعصائر بيش سكرها يرقى

خش حسين لغرفه حنان ..

لقاها راقدة ع السرير وعيونها حمر والدموع يسيلو من عيونها

جى حسين جنبها

مد يده يمسح فدموعها : اشششششش حبيبى

تلفتت هيا للجهه الثانيه وتبكى

-حسين: حبيبي

متبيش ترد

-حسين: حبيبي ردى عليا

خشت الدكتورة ومعاها زوز دكاترة ثانيين ..

حسين قعد واقف جنبها ويواسيلها فى حجابها

الدكاترة قعدو يهنو فيها ..

-الدكتور محمد: انتى قوية يا حنان وانكتبلك عمر جديد
-حنان بهدوء : الحمدلله

-الدكتور نعيم قريب ياكل حنان بعيونه : نسبه التسمم الى جاتك تقتل لكن انتى ربي نجاك

“راهو بلحقه فى دكاترة هكى يقعدو يفنصو ههههه”

حسين يشبح للدكتور نعيم جاته صفار

-الدكتورة : وربي يعوضك خير فالبيبي اللى طاح

-حنان مستغربه : بيبي شنو

حسين قرب يده ومسكلها يدها بكل حنية

-الدكتورة : انتى كنتى حامل …معندكش علم قصدك

-حنان: لا والله

وطلعو الدكاترة وقعد حسين معاها فالغرفه

-حسين: اكيدة بتقولى الحمدلله انه طاح

-حنان: ماعادا الله .. كلهم صغارى.. حتى لو الاب مينفعش لكن هدا عيلى ومن نبضى كيف نكرهه

-حسين : خدى يدها وفتح كفها وباسها .. وقاللها سامحينى

-حنان: اطلب السماح من ربي انا معش يربطنى بيك شى

-حسين: وقلبى اللى شاريك كيف ندير فيه

-حنان: هادى خصوصياتك اللى متهمنيش .. ارجوك خلينى فى حالى انا وصغارى.. وحتى لو تبينى نطلع مالحوش عادى

-حسين: تعدبى فيا بكلامك راهو

-حنان: قلتلك ملياش اى علاقه بيك لا بعدابك ولا ليا علاقه بشى .. ارجوك خلينى فى حالى .. واطلع برة

-حسين: منقدرش نطلع واللى بديريه ديريه..

-حنان: والله نعيط انادى الممرضات

-حسين: ناديهم انا مش طالع خلاص

خشت الممرضه ..

-ممرضه منيرة: الف الحمدالله ع سلامتك حبيبتى
وتضربلها فى يبرة فى شكارة التغدية

-حنان : الله يسلمك

-ممرضه منيرة : يبرة المضاد هادى منومه حترقدى طول

وطلعت الممرضه وحسين مقعمز عالكرسى ويشبحلها وهيا متلفته للجهه الثانية لين خداها النوم …

وحتى هوا رقد عالكرسى

الصبح الساعه 9 حولولها يبرة التغديه

وقالتلها الممرضه لازم تنوضى تمشى حتلاقى صعوبة فالبداية لاننا درنالك رسكامينتو تنضيف

ناضت حنان تمشى وتساعد فيها الممرضه …

-ممرضه سكينه : صحه ليك براجلك ربي يحفظكم لبعض
-حنان : خيره

-ممرضه سكينه : حيه عالحالة اللى دارها الليله اللى قبل امبارح لما جيتى
وهوا يجرى ويسأل فالدكتورة ..اخر حاجه دارها قعمز صغاره فى حجره شادهم و يبكى

-حنان فى خاطرها : يملح

??تعجبنى ههه???

كلم حسين خوه سعد قاله مفيش داعى تجو لانهم بيعطوها خروج وبنروح بيها

حنان عطوها خروج وطلعو من المستشفى

ركبها فالسيارة وتكى الكرسى

ركب فمكانه ..

شدلها يدها وباسها وخلاها فى يده

-حنان: ياراجل ليش تنرفز فيا الناس تتفرج

-حسين: مرش سيارتى مظلم مايشوفنا حد

-حنان: نتكلم بجد راك تنرفز فيا بحركاتك

-حسين يضحك: ااه حلوة من فمك كلمت بجد .. وبدينا نحكو بالرسميات

ولع السيارة وروحو

_____________

طول الطريق يكلم فيها

وهيا ولا معبراته

وصلو للحوش …

لقت العيلة كلها تراجى فيها …

عطى فلوس لحفيظ ولد خوه وبعته للسوق جابله لحم وعصاير وحاجات

الرجاله مقعمزين فى حوش سعد …

والنساوين كلهم جو لحوش حسين يحمدو بالسلامه

فاطمه ومفيدة واحلام وقمرة وخيريه مرت بوهم وسلفات حنان

وعمتها خديجه

والبنات يعولو فالمطبخ ويديرو فالشاهى

ناضت جميلة طيبت العشا

وصغار حنان فرحانين الناس عندهم

-مرام: مئاب صبيتى شاهى متع الرجاله

-مئاب : ايه صبيته

-صالحه : باهى حطيه فالجنان وتو نكلم اكرم يجى يرفعه

-مئاب : باهى

طبعا صالحه تبى اكرم يشوف مئاب لانهم يبو يقولوله عليها هيا وامها

طلعت مئاب ..

حطت السفرة

قامت راسها

لقت معاد واقف

-معاد: واتى الشاهى

-مئاب متلخبطه: ايه واتى

وتلفتت بتمشى
-معاد: احم شن بنقولك
-مئاب : نعم

طلع ورقه من جيبه ومدهالها

-معاد : اهوا رقمى كان تبو تبعتو حاجه للرجاله كلمينى نجى طول

خداته بحركه سريعه ..وقالتله باهى

-معاد: شرينيلى توة بيش ندير حفط لرقمك

-مئاب : مش عارفه

-معاد: رقمى واتى فالورقه وحاطه فى جيبي من الصبح ونراجى فالفرصه هادى وتقوليلى مش عارفه

-مئاب ابتسمت: باهى بعتالى ساهل

وخشت تجرى

لقت صالحه شادة تليفونها

-صالحه: الو اكرم تعالى خود الشاهى

-اكرم: لا مشى معاد يجيب فيه

وسكرت الخط

-مئاب: صالحه امتى عرسك
-صالحه: مزال لين يكمل بنى الحوش
-مئاب : انتو تحبو بعضكم من زمان ولا
-صالحه تضحك: من لما احنا فالروضه ههههه

________________

النساوين شادينها لقنى وهدرزة

حطو العشى

والبنات غسلو الماعين

-جميلة : شنو مزال ماحددتوش العرس
-بريكه : والله مندرى كان عليا والله مانبى نعطاها غير البنت شادة

-احلام: وخيره الولد ميخدمش
-بريكه: كانا عالولد زى الليرة الدهب اخلاق وعلم ..لكن يا وخيتى امه واخته واعرات وبنتى متقدهمش

-جميلة : ووووه بتقوليلى على مفيدة حماتى …نااار هيا وبنتها

حنان دايريلها سرير فردى متع دار ولدها رياض فى دار المسند …

ساكته وخلاص ماتحكى مع حد …

جتها صالحه مدتلها التليفون مفتوح قالتلها يبيك عمى حسين

خدت منها التليفون وسكرت الخط وحطاته جنبها

شرين مرة ثانية وهيا تسكر عليه

شرين تليفون الحاجه

-الحاجه: ايه الحمد لله كويسه يا وليدى ..

وتسكت

وكملت ردت : لا متعشتش مابتش تاكل

وسكتت تسمع فيه

ردت : ايه اهى جنبى

ومدت الحاجه التليفون لحنان قالتلها يبيك حسين ……..
معش فيها كيف تسكر عليه الحاجه جنبها هههه

ردت

-حنان: الو

-حسين: نحبك

-حنان وجهه تغير قدام النساوين : باهى الحمد

-حسين: نعشقك

-حنان: باهى مع السلامه

وسكرت الخط ..ومدت التليفون للحاجه

عاود مرة ثانية

ردت الحاجه قاللها عطينى حنان

مدتلها التليفون

حنان تلفتت للجهه الثانية وتتكلم بالشوى: انت خيرك هكى ماتبيش تتحشم
-حسين: وعلاش ماتاكليش
-حنان: مادخلكش فيا
-حسين: شكلى بنسكر وبنجيك نوكلك بالسيف قدامهم وتعرفينى نديرها
-حنان: باهى اهو تو ناكل غير معش تتصل

هدرزو النساوين وسهرو عندها

وروحو

قمرة تبى تقعد تبات قالتها حنان منبيكش اتعبى روحك ..روحى وغدوة ولى

وقعدت الحاجه باتت معاها

خش حسين يبي يتحركش فى حنان لقى امه بايته عندهم

ناضت الحاجه خشت حاشاكم للحمام

خش حسين المطبخ جاب من العشى اللى فاضل

وحطه قدامها قاللها بتاكلى بالهدوء والله نوكلك بيدى قدام امى

-حنان: حول من على السرير

-حسين يعظ فى شاربه اللوطى : نعم شن قلتى

-حنان خافت منه : ماقلت شى

-حسين: باهى كولى توة …

كلت من العشا شوية وجابلها طاسة عصير كمثري شربتها

-حسين: نرقد فى دار النوم احسن ولا قدام امى

-حنان: الحوش حوشك ووين مايعجبك ارقد

-حسين: كان ماتبينيش نرقد فيها عادى

-حنان : انا راسى يوجع فيا راهو منبيش نتكلم هلبا

الحاجه طلعت من الحمام

-حسين تلفت لامه : الصغار رقدو

جت الحاجه تمشى : تعشو ورقدو من بكرى

خش حسين دار النوم ورقد ويتخايل فى حنان جنبه

______________________

ثانى يوم الصبح ناضو

جت صالحه بكرى دارتلهم الفطور

فطرو

الحاجه تكلم فى امال فالتليفون

امال: نجى خمسه دقايق بس ونروح

-الحاجه: قلتلك لا .. انتى مزال ماخشيتيش علينا

امال : حتى عبدالرحمن قالى نرفعك عادى
-الحاجه: حتى بالتليفون كويس حنان مش لايمه

اشرتلها حنان هاتى التليفون

حنان: اهلين امولا
-امال: قوليلهم يخلونى نجى
-حنان : هاك كل يوم تكلمى فيا وتنشدى عليا كأنك جيتينى …اسمعى كلام عمتى

________

رجعو جو سلفاتها العشيه

وجو خواتها احلام وقمرة وعمتها خيريه مرت بوها

وجو نساوين من عويلتهم سمعو بيها رقدت فالمستشفى ..

وجو خالات حنان يحمدو بالسلامه

اليوم مفيش عشى .. جيت عشيه بس

الساعه 9 فضى الحوش

خش حسين لقى امه بايته حتى الليله .. قعد يهدرز عليها شوى …

قالتله امس ضهرى وجعنى من الفراش خلى نخش نرقد فى دار وحدة من الصغار

دخلها حسين لدار امولا رقدت عالسرير ..وجاب امولا لدار نوم امها رقدها فيها

حنان كانت ادير فى دوش..

غسلت جسمها بس وشعرها لا

وطلعت

خشت للدار متع الجلسه لقت حسين متكى على سريرها

ناض هوا من على السرير وقعمزت هيا ..

قعدت تمشط فشعرها وتبى تقيمه فوق ديل حصان

ولكن جسمها كله تعبان وتحرك فى ايديها بصعوبه

جى هوا قعمز وراها ..يبي يساعدها خدي شعرها بين يديه وقعد يقيم فيه فوق

شده بتوكه

ضمها من الخلف وقعد يقوللها سامحينى حبيبي

قاعد مقعمز وراها

نزل على رقبتها

قعد يبوس فيها

ضمها بالقوة

-حنان: حول ولا نعيط عيب عليك امك فالدار

حسين ناض قعمز مقابلها : عيطى ولا ديري اللى بديري ..
كان ماسامحتينى توة والله مانى مسيبك
وخلى امى تجى تحز

وضمها بين يديه وقعد يبوس فيها

ويقوللها نحبك .. هيا سامحينى

-حنان: مش ح نسامحك حول

-حسين عيونه دمعو : ليش بس

-حنان : ..لانى صدقت انك تحبى وصدمتنى .. معش نبى ننصدم ثانى ياسرنى

-حسين: والله نحبك . والغيرة تعمى العيون

-حنان: خلاص تربح عيب العزوز بتسمعنا

-حسين: خلى تسمع شن درت انا من عيب

-حنان : ياناس انا مريضه وانت بتزيد اتمرضنى

خش عالسرير بينها وبين الحيط واتكى

ورقدها

خداها فى حضنه

-حسين: انا مانبى منك شى غير تسامحينى بس

-حنان : مستحيل … و لو سمحت نوض اطلع من السرير

-حسين: اشششششششش بتعلى صوتك امى بتسمع وانا من مكانى جنبك مش حنوض لو شنو اديرى
ولدلك حط راسك على صدرى وارقدى

بالفعل حنان حطت راسه على صدره ورقدت

لانها حست بالدفى والامان

-حنان بعصبية : وكان ناضت امك ولقتنا هكى

-حسين: متخافيش انا بنرقدك وانوض نخش للدار الثانية

______________________

توة اشبح غدوة شن بيصير فيهم

يتبع