رواية قلبي شاريك كاملة

#قلبي_شاريك❤

??الحلقه الثامنه عشر ??

وروح حسين للحوش

خش سلم على حنان والصغار
وحط ساكو حوايجه

-حنان: شنو عشرة ايام بس المرة هادى
-حسين: انا كلمت واحد يجى يشد مكانى على خاطر العرس وتو انعوضهاله
-حنان: باهى كويس عالاقل تعاون امال
-حسين: اديرلى قهوة
-حنان: حاضر

خشت تحط فالسزوا عالنار تبى ادير قهوة
جى حسين من وراها ..
ضمها
ونزل باس على رقبتها ..

قاللها هداكه منحسبش فيه سلام اللى فالصاله

ضحكت هيا وقالتله باهى الصغار يشوفوك

لفتها ليه وقاللها .. اسمعى انا روحت اليوم والعرس الاسبوع الجاى وراس حبيبتى مانبو نتعاركو .. نبى يمشى العرس وانا مرتاح وانتى فرحانه

-حنان: حاضر وربي مايجيب بينا زعل
-حسين: وانا بنقعد 10 ايام مش شوى.. بس نوعدك وعد منى مانضايقك الا لما تكونى انتى اللى تبى الشى هدا

حنان نزلت راسها

-حسين: ماهو منبيش تقولى هاملنى لانى اقسم بالله بعد ما تسيبينى وتمشى يعلم الله قداش يصير فيا

-حنان : ربي مايحرمنى منك

-حسين: تعبان منرقد
-حنان: ارقد فى دارى
-حسين: اهاا شن هالتطورات
-حنان ضحكت: لا تطورات لا شى ..غير تشبح فيها عرس وحدة خاشة ووحدة طالعه .. ويلقوك فالصاله شن بيقولو
-حسين : بيقولو يانارى عليه محروم
-حنان تضحك: بلا برادة عاد
-حسين: نموووت فيك ..حوايجى فالصاله اغسليهم
-حنان: من عيونى

وخش حسين دار نوم حنان ..

ورقد

طق الباب ..فتح احمد لقاها امال

خشت

-امال: توة هكى اديري يا حنونه ماتطلعيش معاى ولا مرة
-حنان: اهو حسين روح ويرفعنا وين ماتبى
-امال: نبى نمشى تختارى معاى الفيلو
-حنان: من عيونى… منين بتأجريه
-امال: من صبراته .. عندى محل معين نبى انأجر منه
-حنان: خلاص يرتاج اليوم حسين لانه روح متاخر وغدوة نطلعو بكرى

روحت امال ..

خشت حنان دار نومها .. لقت حسين قاعد راقد

ماتبيش تزعجه

طفت الضى وطلعت …

____________________

جت الساعه 7 وحسين مزال راقد ..

وحنان لازم تمشى لحوش اختها احلام

-حنان: حسين…

حسين … ياحسين نوض

-حسين: اااه كتفى ..
-حنان: خيره كتفك
-حسين : مش عارف ترا شوفيه

نزلت حنان وقربت منه تشوف فى كتفه ..

بحركه سريعه .. ضمها .. ولفلها جسمها ورقدها بحداه …

-حنان تضحك : دوختنى خيرك
-حسين: توة يامجرمه حارمتنى من هالسرير المريح هدا
-حنان: ارقد فيه ومن مانعك ..
-حسين: وانتى جنبى
-حنان تضحك : لا وانا فالصاله يا شاطر

ناضت من جنبه وقعمزت على حاشيه السرير..

-حنان: نبى نمشى لحوش اختى احلام
-حسين: انا اليوم روحت بري غدوة وخلاص
-حنان تلكمست: ماهو انا ضرورى نمشيلها اليوم
ناض حسين اتكى عالوسادة وراه .. وخدى باكو دخان : ممكن نولع سبسى
-حنان: براحتك
-حسين ولع الدخان وسألها : مفهمتش ليش ضرورى
-حنان: ماهو اختى احلام تخدم فالحلويات زى ماتعرف ونبى نمشى نعاونه
حسين لقاها متلخبطه فالدوة … قاللها باهى غير ديريلى قهوة واهو جاي للصاله

ناض حسين خش حمام الغرفه ..
صلى
وطلع لقى الصغار يلعبو بالبلاي ستيشن ..
وحنان جايبه فنجان القهوة

-حسين: كيف بنلعب شوط بلايستيشن … توة معش نقدر لانى القهوة لازم من نارها نشربها
-حنان: اصلا انا معش وقت عليا .. مش قلتلك بنمشى لاحلام
-حسين: خلى قمرة تمشيلها
-حنان: قمرة متعرفش تساعدها
-حسين: وحتى انتى صعب تمشيلها توة
-حنان مستغربه : حسين خيرك نقولك اختى تراجى فيا
-حسين: لانى مستغرب انا ليا عشرة ايام مهناش ويوم اللى انروح تطلعى
-حنان: ماهو الطلبيه ضرورى تنعجن اليوم
-حسين: وانتى شن علاقتك بالطلبيه

_________

-احلام: مئآب كلمى خالتك خيرها عطلت
-مئآب : نكلم فيها يا ماما متردش من بكرى
-احلام: ممكن لاهية مع حماتها
-مئآب : لكن معش وقت عالعجينه يا ماما .. لازم تبات الليله مسبوكه
-احلام: انشالله تأخيرها خير

تدكرو فالحلقه الاولى لما حنان قالت لاحلام العجينه فالثلاجه واتيه مفروض مشيتى كملتى الطلبيه

تدكرو قلتلكم تو نحكيلكم علاش …لان حنان هيا سطى الطلبيات ..هيا اللى تعجن واتكم .. واختها احلام وبناتها هما المعاونات

_______________

-حسين: كيف مفهمتش يعنى انتى اللى تخدمى فالحلويات للناس مش اختك احلام
-حنان: ايه
-حسين: وليش مدرقتها
-حنان: قصه طويلة
-حسين: ليش فهمينى ليش
-حنان: لانى كنت واخدة واحد حرايمى مايصدق يلاقى عندى فلوس ياخدهم
-حسين: يعنى المرحوم مكنش عنده علم انك تخدمى مع حنان
-حنان: لا عنده علم طبعا ويراجى فالطلبيات بالدقيقه .. لانى كل مانمشى نعاونها نجيبله 25 دينار نقوله هادى حق مساعدتى ليها
-حسين: وانتى تحصلى اكثر
-حنان: طبعا اكثر مرات نوصل 100.. ومرات نوصل 150…
-حسين: وشن اديري بيهم
-حنان: نعطى فيهم لعمى سعد يصرف علينا لانه هوا والحاجه عندهم علم انى انا اللى نخدم فالحلويات فى حوش اختى ..نخدم ونوكل فصغارى
-حسين: تعرفى انك كل مادى تكبري فعينى .. واعجابى بيك يزيد
-حنان: محلاه كلامك
-حسين: بس حنونتى انتى مش مستحقه توة
-حنان: لكن اختى مستحقه .. ومنقدرش نسيبها مرة وحدة .. من يوم خديتك بطلت الخدمه معاهم .. لكن العجن بس قاعدة انا نعجنلهم فيه لانهم مايعرفوش ..وتوة قاعدة نعلم فى بنتها وماشالله عليها فهمت بسرعه
-حسين: باهى عندك علم
-حنان: بشنو
-حسين: انى اليوم زدت حبيتك اكثر

??????

وصلها هيا والصغار لحوش اختها
نزلت حنان
وقاللها خلى الصغار معاى ندير بيهم دورة مابين ماكملتى تو نجوك ..
مشو وهيا خشت لحوش اختها

وبعد ساعتين رجعو خدوها من حوش اختها
_________________

الصبح ناضو جهزو نفسهم ..لبست صغارها ..

وكلمت امال بالتليفون ..

-حنان: امولة شنو واتية
-امال: واتية ايه
-حنان: والله شن منقولك الحق بنرفع الصغار معانا لانى والله ماعندى وين نخليهم احلام عندها طلبيه وقمرة تعاون فيها
-امال: بلاش هبال ..شن بيضايقونا الصغار
-حنان: امالا تعالى هيا اهو احنا بنطلعو

طلعو وركبو فالسيارة .. ومشو لصبراته

خشو امال وحنان لمحل الفيلوات …

والصغار قعدو مع حسين

عطلو

حسين والصغار ملو

كلم حسين حنان بالتليفون

-حسين: حبي شنو مزال
-حنان : امممم اطورنا وخشينا فى كلمت حبى
-حسين: ومزال شن ريتى انتى ياحبى .. مزال يوم اللى بنلبسك واحد من القفاطين البيض اللى داخل
-حنان: اهاا بتلبسنى فيلو
-حسين: وشن ناقصنى ماتلبسيليش فيلو
-حنان: امال تنادى فيا بنشوف الفيلو عليها
-حسين: باهى متعطلوش

اختارت امال فيلو ..ودفعت عربون ..

وطلعو مشو للمحلات الثانيات كملت امال اللى ناقصها من مكياج وكنادر ..

ودارو دورة وبصرو وضحكو ..

ورفعها محل اماعين خدت اللى ناقصها كله على حسابه هوا

وروحو .. ادن عليهم المغرب وهما فالطريق

وصلو للحوش الدنيا ظلام

خشت امال تورى لامها فالمشتريات ..

وحنان سلمت على عمتها وقالتلهم تصبحو على خير يادوبك نغير للصغار لانهم رقدو فالسيارة …

وهيا طالعه لقت جميله خاشه لحوش عمتها

-جميلة تضحك وتغمز لحنان : الايام ايامك يا حنه

ضحكت حنان وقالتلها تصبحى على خير وطلعت

______________

روحو للحوش …

بدلت لصغارها وحطتهم فسرايرهم لانهم تعشو فالطريق

-حسين: نبى شاهى اخضر من تحت ايدياتك
-حنان : حاضر

طيبت حنان الشاهى وجباته لحسين ..وقالتله يادوبك نرقد ..

-حسين: خيرك

-حنان: تعبانه

-حسين: حاس فى خاطرك كلام
-حنان: لا والله
-حسين تعالى جنبى وقولى اللى فقلبك
-حنان: خيرك ماقلتليش شوفى الحاجه اللى تعجبك واشريها ..وعيونها دمعو
-حسين:هادى اللى وجعاتك حبيبي
-حنان: ايه باهيوو
-حسين: لانى نبي نرفعك لطرابلس

انصدمت حنان .. سكتت .. فرحت انه مش ناسيها

-حسين: تحسابينى ناسيك ياعمرى .. اكيدة لا .. لكن نبى نرفعك لمحلات فيها حاجات حلوة

حنان ساكته
-حسين: اليوم الصغار تعبو .. غدوة خلى يرتاحو ..وبعد غدوة نمشو شن رايك
– حنان: تصدق انها حتكون اول مرة نخش طرابلس
حسين: ومش حتكون الاخيرة وحياتك…وتى روحك باهى
-حنان: باهى زى متحب

-حسين يضحك : انا نحبك انتى

-حنان تضحك : بلا برادة

. وناضت حنان رقدت

ثانى يوم الصبح فطرو ولعبو الصغار ..

وضموو الكناين والبنات المخزن متع حوش العيله.. ونضفو الساحه..

اليوم اللى بعده .. ناضو بكرى وطلعو من الساعه 8 .. توجهو لطرابلس

دهورهم فالمحلات متع الاطفال ..
وشرو الصغار حوايج ..
ورفعهم شرو احدية ..

وخشو المطعم الساعه 5 وتغدو..

وبعتالى رفع حنان لشارع بن عاشور .. وقعدو يدورو فى قفطان ليها بيش تلبسه يوم الحفله ويختارو …

طبعا هيا تبيه مستور من جهه الكمام ..وطويل

اختار هوا قفطان لونه احمر فالدهبى

قاساته .. جى مقاسها.. عجبه عليها ..

شروه

وقفو خدت شنطه وكندرة ..

ومكياج ماركه

وخشو مطعم تعشو ..

-حسين: حنونه شقتى هنايا .. هيا نباتو فيها وغدوة نروحو

-حنان: الوقت مزال خلى نروحو خير ..الصغار يتبدل عليهم المكان معش يرقدو ..

وروحو ..

______________

وبدى العرس .. وبدت السهريات

-امال: شنو حنان وصيتى احلام عالحلاوات

-حنان: اللى اخترتيهم انتى متع السهريه والقفه قلتلها عليهم كلهم ..هدية منى طبعا

-امال:سلمهالى

يوم الثلاثاء سهرية كبيرة …

حسين يكلم فى حنان فالتليفون

-حسين: ستاحشتك
-حنان تضحك : منسمعش فيك
-حسين: نعيط راهو وجنبى خوى سعد كانا سمعنى مادخليش فيك
-حنان تضحك: لا اسكت سمعتك ههه…..الصغار جنبك
-حسين: اهما قدام عيونى ..وامولا وين
-حنان: اهو تلعب جنبى
-حسين: شوى ونكلمك ابعتيهالى بنخشو نرقدو … وانتى متعطليش .. عندى ليك مفاجئة
-حنان: ياعينى ياعينى امالا بنروح حتى انا مع الصغار
-حسين يضحك: ياريت

_______________

حنان لابسه قونه سوداء استريت ..وبلوزة مووف شرتهم لما مشو لطرابلس

وحاطه مكياجها الماركه …

بالرغم دايرته بسيط جدا .. باينه احلى وحدة فيهم

وسلفتها وجدان مش مواطيه عيونها من عليها ..وتشوف فيها سعيدة .. بعد ماكانت اقل وحدة فى سلفاتها

حسين كلم حنان قاللها ابعتيلى امولا

_______

يحنو فى امال ..

جتها الحنايه طبعا حنتها ..هما سبرهم ايحنو الثلاثاء ..

تمت السهريه …

ضمو الحوسه …

وروحت حنان للحوش ..فتحت الباب بالمفتاح وخشت …
لقت حسين راقد عالصالون ..

قررت تخليه راقد … لكن قلبها ماهناهاش تبى تعرف شنهيا المفاجئة …

جت لحسين نوضته

-حنان: حسين
فاق حسين من النوم .. روحتى

-حنان: ايه روحت ..

-حسين: تعالى بنوريك حاجه

خشو لدار النوم لقت زوز اكياس عالسرير

فتحتهم ..
لقت حولى حصيرة .. وبدلة كبيرة

-حنان: هدا شنو
-حسين: مش هادى اللى يقولولها بدلة كبيرة ولا انا غالط
-حنان عيونها دمعو : لا مش غالط
-حسين: نبيك تصدرى حبيبى
-حنان : محلااااها المفاجأة حبيبى .. احلى مفاجأة
-حسين: شن قلتى
-حنان: احلى مفاجأة

-حسين: لا اللى قبلها
-حنان: خلاص عاد ..
-حسين: لا قولى ..
-حنان: لكن البدلة الكبيرة تبى صدرة
-حسين: ايه غيري الموضوع
-حنان: لا بلحقه ندوى
-حسين: مفهمتش
-حنان: تبى خناق وبيزوان وحاجات الصدرة كلها

-حسين: صح والله نسيت.. غدوة الصبح نطلع نشريهملك
-حنان: لا منبيش تشريلى اجرهم وخلاص ..ونبى كندرتها وشنطتها
-حسين: باهى زى متحبى ..وجيبى وحدة تلبسك
-حنان: انشالله نحصل
-حسين: ونبى نشوفك بيها

______________

ثانى يوم الصبح .. طلع حسين جابلها حاجات الصدرة كلها …

خشت حنان مع سلفاتها طيبو الغدى ومدو للرجاله

والبنات يوتو فالحلويات فالباكوات ..

روحت حنان للحوش بتلبس للقفه

محصلتش من يلبسها
مكيجت بروحها ..ولبستها اختها احلام ..

وطلعت روحت احلام هيا وبنتها مئاب بيش يوتو روحهم فالحوش ..

-حسين: الو لبستى
-حنان: ايه كملت
-حسين: بروحك فالحوش
-حنان: ايه احلام روحت
-حسين: اهو بنجى
-حنان: جيب معاك الصغار باهى

شويا وفتح باب الحوش ..
خشو الصغار وحسين ..
وحنان فى دار النوم لابسه البدله

خشو الصغار فالصاله فتحو التلفزيون ويتفرجو..

خش حسين للدار وحنان عاطية بالضهر..

قعد يمشى جى قدامها

تفاجأ بالجمال

-حسين: الله الله على مرتى حبيبتى .. ربي يحفظك يا غاليه
-حنان متحشمه: حلوة
-حسين: تهبلى واللى محليك الحشمه متعك

طلع تليفونه قعد يصور معاها .. هيا بالصدرة وهوا بالعربى …

-حنان: خلينا فالحوش شويا مزال الوقت
-حسين: تعالى للصاله مكيفها اقوا

طلعت للصاله …صغارها قعدو يعيطو ..ماما محلااااك

قعدو فالحوش مع بعضهم هما وصغارهم قريب ساعه وبعتالى لبست عبايتها ونقابها وطلعت بتمشى لحوش العرس وحسين يمشى معاها

وتوصى فيه على امولا والاولاد لانهم بيقعدو معاه

________

خشت للحوش .. سلفاتها وحماواتها ما عرفوهاش

عجبتهم كلهم …

واللى يشوفها يشكر ويبدع فيها…

خشت سلفتها جميله لابسه صدرة متع فضه

ولابسه هاديكه الزمالة فى راسها

شافت حنان طاحت تشكر وتحط .. وجابت البخور تبخر فيها …

عجبتهم كلهم …

وخشت سلفتها وجدان مصدرة بالبدله الصغيرة ..

شافت حنان قريب داخت ماتحسابهاش بتصدر

جى الليل .. وجو حوش العريس ..وجابو القفه …

مدو الروزاطه والعبمبر .. والشاهى والحلويات …وجو بيطلعو العروسه بالحصيرة ..

سبر حوش العريس يطلعوها صدارة من حوش العريس وصدارة من حوش العروس

ولازم تكون صدرة بالبدلة الكبيرة …

جو ياخدو فالخلالات من الصدارات وينادو يبو صدارة من حوش العروسه …

ناضت وجدان بكل انفه … اهو تو نجى انا

اخت العريس قالتلها سبرنا اللى بطلع العروس لازم تكون عروسة و لابسه بدله كبيرة ..

تلفتت ل حنان قالت اهيا عروسة نادوها

وجدان قريب ماتت هههههه .. قالتلها .. عروسة شنو هادى عندها ثلاث صغار

اخت العريس قالت مصلى عالنبى زى الوريدة تقول عروس…

المهم فالاخير نادو حنان وهيا اللى طلعت العروس

وتمت القفه …
ودارو شوط سهريه ..

ورقصو البنات ..

ورقصو الصدارات

ورقصت العروس

والحاجه خديجه شادتها بكى بس على امال كيف بتفارقها …

كلمت حنان حسين قالتله انها بتروح

جى للجنان الخلفى بالسيارة وركبها
-حنان: وين الصغار
-حسين: فى سرايرهم من بكرى راقدين
-حنان: احسن مادرت

ودار بيها ودخل السيارة لقراج حوشه
ونزلها ..

خشت لدار النوم حولت الحزام هوا الاول وفتحت الردى لانه ضايقها

وبدت تحول فالصدرة

خش حسين دار النوم وراها : نعاونك

-حنان: منقولش لا

وبدى يفتح فالخلالات الصغار اللى شادين الخناق والبزوان

حولت هيا الخراصات ..

وبتحول الشنبير لقاته عالق فى قصتها ..

قعد يسلكلها فيه بالشويا

وقعدت فالقمجه الدخلانيه وشعرها مفتوح

-حنان: خلى نخش ندوش .. وجيعانه

-حسين: درت حسابى وجبت عشا من برة توقعتك مش حتاكلى
-حنان: الصغار تعشو
-حسين: ايه تعشو
-حنان: باهى الحمدلله ..
-حسين: اهو تلقينى فالصاله

خشت حنان دوشت ولبست قفطان خفيف موووف

وطلعت للصاله ..لقت حسين موتيلها العشى عالطاولة ….

قعمزت تتعشا وهوا يساير فيها …

كملت

رفعت العشا

وغسلو يديهم وجو قعمزو فالصالة

-حسين: محلاك بالصدرة
-حنان: اكيد بتكون حلوة مدامك جايبهالى مفاجئة
-حسين: غير ارضى علينا بس
-حنان: راضيه 24 قراط والعالم ربي يكفى صغارى اللى عندك اليوم كله
-حسين: هادو صغارى اللى نحبهم
-حنان: وحتى هما يحبوك
-حسين: حط يده على خدها .. انا نبى امهم تحبنى
-حنان: حسين
-حسين: ياروووح حسين ويا قلبه انا من لما شفتك بالصدرة مش قادر نتمالك نفسى
-حنان: عجبتك
-حسين: عجبتينى وسكتى
-حنان بدلع: وشن ثانى
-حسين: اهو نقولك وشن ثانى
……………………....
-حسين: لو بكمل حنزعلو من بعض ونتعاركو .. وانا منبيكش تكونى زعلانه فالعرس….

ناضت حنان من جنبه وهيا فى حاله …

بالرغم لو كمل هوا ماكانتش هيا حترفض …

ورقدت على سريرها وهوا رقد

________________________

تمت ….ويتبع

نحبكم ❤