رواية قلبي شاريك كاملة

#قلبي_شاريك❤

???الحلقه الثانية عشر ???

حنان ضمت حوسة المطبخ .. وقالت لصغارها هيا نمشو نتغدو فى حوش حنينه

لبست جلابيتها ووشاحها وطلعت وصغارها وراها وسكرت الباب

خشت كنشيلو حوش عمتها لقتهم مقعمزين عالسطحه
-حنان: السلام عليكم
-الجميع : وعليكم السلام
-سعد: معقولة قاعدة نفس الطبع يا حنان
-حنان: الله غالب عمى الطبيعه جبل
-سعد : توة انتى عارفتينى على شنو نتكلم ولا
-حنان: ?? عارفتك قصدك على طلوعى من الحوش يا عمى ولا
-سعد : صدقتى
-حنان: والله تعودت انى نقعد فالحوش باليومين بالثلاثه منطلعش .. مشى فيا طبع خلاص
-ربي يعاونك ويسعدك بنتى
-بريكه: ستاحشت الصغار وينهم
-حنان: يلعبو مع صغار عمهم فالوسعايه اللى فالوسط
-بريكه: سبحان الله صغارك انتى بالدات يا حنان ديما قلبى يفزلهم

مقعمزين معاهم سالم ومرته وجدان
وجدان:شنو احنا صغارنا مافيهمش فزة يابريكه
-بريكه تبصر عليها : لا لا مافيهمش هههه
-وجدان تكنطت : ايه هوا معاك حق صغار حنان يتامى ويستاهلو الواحد يسخف عليهم
حنان قعدت ساكته ماقالتش كلمه

وتنوض الحاجه خديجه تفتح على وجدان مدافع رمضان ههههههه
-الحاجه : منهما اليتامى ياحنه .. حالتهم ريتها حالتى وحالتك … و عيشيتهم ريتها عيشتى وعيشتك
-وجدان: مش عارفه علاش ديما اديري فالفرق بين صغارك يا عمتى
-الحاجه : حسين مش ولد بطنى .. لكن انا الحق واللى نشوف فيه قدامى قلته
هدا كله وحنان ساكته ..

-وجدان: انا ماناقصنى شى ياعمتى
-الحاجه: توة انتى ولا صغارك بتجو فى ربع عيشت حنان ولا صغارها .. بسلامت الصقر اللى واخداته فارد عليها جنحانه هيا وصغارها مضلل عليهم مامخليهم محتاجين شى
-وجدان: يا عمتى الغنى غنى النفس
-امال: صدقتى الغنى غنى النفس ..فى اللى نفسه خسيسه .. وديما مهزب روحه

سكتت وجدان واتمتم بالشوى…قالت كانا جت الدوة على حسين تبدا كلها تزمزك وترعش عاد ..

خلى نعرفكم على وجدان .. ياحنه هادى سلفت حنان المحسدية … تحسد فى حنان فى كل شى انشالله فى كحل عيونها .. حتى كان محمود ضرب حنان طريحه تحسدها وتبدا تنبش على طريحه من راجلها سالم حتى هيا هههه…
وكان حنان اطيح فالبير .. اطيح وراها
شادة راسها وراس حنان .. لكن حنان زمان راجلها محمود كان مهزب ماكانتش تقدر تتكلم لان راجلها ماينفعش ..ومعنداش حتى قيمه بين خوته .. لكن قد ما تتجعد وجدان على حنان .. مستحيل حنان ترد عليها ولا تعبرها ..وجدان عندها ثلاث اولاد اصيل وساجد ومهيمن .. الكبير عمره 8 سنوات والصغير عمره سنتين

حطو الغدى وتغدو مع بعضهم الرجاله فى تركينا والنساوين فى تركينا

درست سيارة قدام السطحه .. وخش حسين … السلام عليكم…
الشباب والنساوين كلهم …اهلين حسونه ..

حنان جت عينها فى عين حسين .. قعد يشبحلها فوق العشر ثوانى وبعتالى فاق لنفسه . فرحت هيا بشوفته .. والفرحه بانت على عيونها ..وامال وبريكه لاحظوها …

قعمز تغدا مع خوته …

رفعو السفرة وناضت امال وصالحه بنت سعد ومرام بنت عزيز يغسلو فالماعين
وحنان بتنوض معاهم حلفت عليها بريكه …

حسين قعمز عالحيط فالجهه اللى مقابلة ..
مدو الشاهى
يشرب فالشاهى وهوا يشبح لحنان
وحنان مرة مرة تشبحله تجى عينها فى عينه

خشت جميله مرت عزيز للجنان وسلمت عالجميع …

-الحاجه: صيامك فالجنه يا جميلة قالتلى مرام انك صايمه
-جميله : الله يسلمك ويعطيك صحيحتك يا عمتى
-بريكه: سعدودك اتصيمى فى كل اثنين وخميس
-جميلة: الحمدلله سنتين نصيم فيهم مافاتونيش

خلى نحكيلكم على جميله حتى هيا سلفت حنان .. انسانه دكية جدا ..ومايفوت عليها شى ..ولماحه .. ونشادة هلبا .. وتحب تتكلم عالعلن وتفضح وديما كلامها يطلع فالاخير صح ههههه قلتلكم مايفوت عليها شى ..وتحب تعرف البير وغطاه نظام ميسر مرت خو فاطمه فالمسلسل التركى ???
عندها زوز بنات مرام عمرها 14 سنه .. ومروة عمرها 4 سنوات .. وعندها زوز اولاد حفيظ عمره 18 سنه وايمن عمره 10 سنوات

مقعمزين يا حنه …وعمك حسين هايم يشبح لحنان .. خدى فيها شوووط قوى فالحوش محروم مايشبحش فيها هلبا ???

هوا يشبح وعمتك جميلة لاحظاته وتنخص فى حنان .. ياعينى ياعينى
وحنان ميته بالحشمه ..دايرة روحها مش فاهمه على جميلة
-جميلة: بي خيرك متحشمه
-حنان: بتسكتى ولا خلى انوض اروح
-جميلة: وين تروحى وانتى زى هلال العيد نبيك فموضوع
-حنان : انشالله خير
-جميلة : خلى تروح ودان الستلايت وجدان وبعتالى نقولك
-حنان: باهى

كملو الحوسه وناضو كل حد بيروح للحوش ..

ناضت حنان بتروح ..ادور فى بنتها امولا
-حسين: شبحلها وحرك شفايفه منغير صوت واشرلها براسه و قاللها بتروحى
-حنان: اشرتله بوجهها ان ايه بتروح
لحقتها جميلة
-جميلة : والله شن بنقولك ياحنونه
-حنان: انشالله خير
-جميلة: ياوخيتى حفيظ داير فينا حاله على موضوع مرام واحمد ولد اختك
-حنان : مفهمتكش يا جميلة
-جميلة : قصدى كانهم يبوها حق قولى لاحلام اختك تجينا
-حنان: تتكلمى من جدك انتى.. هادو اطفال خطوبة شنو
-جميلة : هكى قولك انتى
-حنان: بنتك عمرها 14 سنه يا جميلة تو من كل عقلك بتعطاها انتى.. و الولد فالثانوى استحاله امه بتخطبله ..
-جميله : باهى باهى

طلعت حنان خشت لحوشها ..هيا وصغارها … دوشتلهم وقالتلهم خشو قيلو .. مسكرة برسيانات الحوش كله .. وفاتحه المكيفات

خش حسين للحوش ينادى بصوت واطى …حناااان

_______________

مشى للممر طقطق عليها الدار
حنان انتى هنايا
فتحت حنان باب الدار ..ايووة
-حسين: ممكن نخش
-حنان : تفضل ..

حسين قعمز عالكنبة وحنان على حاشية السرير

حسين : نقلونا من مقر الشركه اللى فالبحر ..
-حنان: وين نقلوك
-حسين: مزال مش معروف انا متوقع يحولونا لطرابلس
-حنان: ومرات خارج ليبيا لان اللى نعرفه انك ديما مسافر برة
-حسين: سفراتى كلها دورات لكن عملى كله فى ليبيا
-حنان: اهاا
-حسين: لو نقلونى لطرابلس حنرفعكم معاى
-حنان: منهما بترفعهم
-حسين: انتى والصغار
-حنان واطت راسها: اسمع ياحسين والله شن منقولك
-حسين: متقولى شى قولى انشالله
-حنان: غير اصبر نكلم فيك جد نبيك تسمعنى
-حسين: تعرفى بكرى وانتى مقعمزة جنبهم طالعه احلى وحدة فيهم
-حنان: بتسمعنى ولا شنو ..ليش تغير فالموضوع
-حسين: شن تبى تقولى هى
-حنان: احنا منقدروش نمشو معاك .. انت حياتك فطريق واحنا حياتنا فطريق ثانية .. انت بارك الله فيك تصرف عليا انا وصغارى.. لكن منقدروش نطمعو فيك اكثر من هكى .. ارجع لحياتك اللى كنت فيها وخلينا هنايا فى حوشك واحنا مسامحينك

حسين ناض وقف جنبها وخدى يدها وحطها على صدره وقاللها
وبالك انا اللى كنت ندور فيكم ولقيتك
-حنان:لكن احنا مش مستواك
-حسين: تتكلمى على روحك ولا عالصغار
-حنان:نتكلم على حياتنا كلها
-حسين: باهى نحاول نرّقى نفسى ونوصل مستواكم
-حنان ضحكت بهدوء: احنا اللى نحاولو نرقو نفسنا بيش نوصلو مستواك
-حسين: باهى حاولو .. اهو انا كنت بنحاول نوصل مستواكم.. ومدام المشكلة عندكم حاولو انتو ..ولا منستاهلش انا تحاولو على خاطرى
-حنان: عندك طريقه سلسة وسهله فى الحوار .. انت ديما هكى
-حسين: لا مع الناس اللى نحبهم بس

سكتت حنان وابتسمت
اسمع اولا واخيرا انت بترجع حياتك .. وانا نبى نعطيك علم انك كفيت ووفيت ..وخود راحتك فى حياتك ..وانا الحمدلله فالامان انا وصغارى

سكت حسين ..وقاللها غير خلى نشوفو الشركه وبعتالى ساهل
-حنان: نبى نمشى لاهلى اليوم روحو من تونس
-حسين: حاضر من عيونى امتى بتمشى
-حنان: بعتالى العشية بيش نروح قبل المغرب
-حسين: باهى

طلع حسين للصالة فتح التلفزيون والمكيف .. وخداه نوم القايلة حتى هوا

فاق الساعه 6… قعمز .. الحوش هدوءء..
قعد ينادى.. حنان .. حنان
ماحد رد
فتح تليفونه .. اتصل بيها ..ردت عليه
-حسين: حنان انتى وين …
-حنان : انا فى حوش بوى ماهو قلتلك بنمشى
انصدم حسين: وخيرك مانوضتينيش
-حنان: عادى قلت خليه راقد
-حسين بعصبيه: باهى امتى بتروحو
-حنان: ساعه ثانية
-حسين: تو نجى انا نروح بيكم
-حنان: لا مفيش داعى
-حسين: قلتلك تو نجى انا
وسكر التليفون .. استغربت خيره متكنطى

بعد ساعه جى روح بيهم …

منزلش من السيارة كلمها قاللها اطلعو انا برة

طلع المولدى سلم على حسين..وحسين يرد عليه من تحت ضرسه هههه ماعنداش ليه خلوق
_______________

روحت حنان وهيا ساكته حاسه ان فى حاجه .. دارت للصغار سندوتشات .. وقعدو يلعبو بى الايبادات متعهم

جت لحسين تكلم فيه : نديرلك سندوتش حتى انت

ناض من مكانه .. الحقينى لدارك نبيك ..وعيونه حمر

لحقاته

خشت لدارها

خايفه ….شن فى وهيا شن دارت ..

سكر الباب وتلفتلها

-حسين: مفيش داعى نتناقشو قدام الصغار
-حنان: شن فى
-حسين: ليش ماشيه على رجليك اليوم لحوش بوك
-حنان: عادى وشنو فيها
-حسين: ماهو واخدة طرطور
-حنان: ليش تقول هكى
-حسين يعض فى شواربه: تعرفى هادى اخرلك مرة اديريها
-حنان خافت منه : باهى حاضر وجت بتطلع
شدها من يدها وجبدها عنده :تعالى نكلم فيك ولا
-حنان: نعم
-حسين: الكلمه اللى نقولها منقعدش نعاود فيها ثاني
حنان صوتها انغص: وانا قلتلك حاضر

فتحت الباب وطلعت .. وطلع هوا وراها…

كملو الصغار لعب .. وخشو لديارهم رقدو .. وحنان خشت دارها …
حسين كسد بروحه مستاحشها .. ويبيها تطلع من دارها .. قاعد ايدور فى سبلة

وادا بيها هيافتحت باب الدار ..طلعت منها .. وطبعا لابسه عباية ووشاح

_____________________

قعمزت عالصالون ..

-حنان: انا اسفه
حسين فرح بطلعتها.. ولكن قاعد عايش الدور ?????

-حسين: المهم ماتتكررش ثانى
-حنان: انا طلعت نبى نقولك حاجه عاللى صار اليوم
-حسين : قولى
-حنان: انا من زمان نمشى لحوش اهلى على رجليا.. الراجل اللى كنت متزوجته مكنش يهتم ان زوجته تطلع على رجليها ..عنده عادى.. حتى لما كنت حامل وفشهورى الاخيرة كنت نروح ع رجليا ..فمخطرش عليا انك بتوصلنى .. عقلى قاعد متعود على حياتى القديمه.. اصبر عليا شوى خلينى نتعود على حياتى الجديدة
-حسين: وين صغار خوتى ليش مايوصلوكش
-حنان: هوا كان مانعنى نركب مع اى حد ..وانا اصلا منطلعش الا لحوش بوى او حياش خواتى وهما قراب حتى عالرجلين
-حسين سخفاته حنان: وليش القسوة هادى
-حنان: هدا بعض من كل .. المهم منبيكش ترقد زعلان منى وقلت نفهمك ليش مشيت ومانوضتكش
-حسين: تبينى نسامحك قصدك
-حنان بضحكه : لو تكرمت عليا
-حسين: نسامحك لكن عندى شرط
-حنان: اشرط وحاضر انفد
-حسين: وعد
-حنان: وعد
-حسين: حولى الجلابيه والوشاح وخليك فى ملابس الحوش العادية
-حنان تلكمست: انا اصلا نلبس هكى وهادى ملابس الحوش العادية
-حسين.. كدابة انا شفتك امس
-حنان: وين شفتنى وشن شفت امس
-حسين: شفت قمر واقف فالمطبخ ويتحرك بكل انوثه
-حنان: امتى هدا فى اما وقت
-حسين : لما جى جنبك رياض
-حنان: والله مانقدر خلينى على راحتى
-حسين: وانا مستحيل نسامحك الا بشرطى هدا
-حنان: معنديش حوايج مستورات
-حسين يضحك : ومن تكلم عالحوايج المستورات

ناضت وقفت بتمشى ..شد يدها يضحك
ههههه غير تعالى نبصر عليك

حنان قعمزت
-حسين: باهى تطلعى معاى غدوة انتى والصغار
-حنان: وين
-حسين: للمحلات ناخدلكم حوايج
-حنان: لا والله عندنا صحيت
-حسين يضحك: مش توة قلتى ماعنديش
-حنان: عندى لكن تيشيرتات قصيرة ومكشوفه شوى صراحه
-حسين:غدوة نطلعو خودى تيشرتات اسلاميه????
-حنان: بلا بصارة زايدة عاد
-حسين: خلاص اتفقنا غدوة نطلعو مش ترخى ..
-حنان: باهى

__________________

ناضو الصبح فطرو وجهزو نفسهم

-حنان :خلى نمشى نقول للعيلة اهو طالعين
-حسين مستغرب : لمن بتقولى .. قصدك لما بنطلعك انتى والصغار لازم نعطى علم ونوقع فى حوش العيلة ولا كيف
-حنان: منعرفش.. هكى نديرو احنا
-حسين: اسمعى الحكايات متعكم القديمه هادى كلها فكينى منها ..انتى ولدتى من اول وجديد
-حنان: ??باااهى حاضر منغير عياط بس
-حسين: هيا اركبو فالسيارة

وطلعو عالرئيسى .. محلات كلها ملابس قنينه

شرت حنان توته وردية .. وتوته صفرا
وثلاث تيشرتات وزوز سراويل .. وثلاث قفاطين نص كم قصار للركبه متع حوش …

وشرو الصغار حوايج وملابس داخليه

وروحو للحوش…

-حسين: حنان خشى قيسى انتى الاولى وورينا وبعتالى قيسى للصغار
-حنان متحشمه :باهى
-حسين: اسمعى
-حنان: نعم
-حسين: منغير وشاح راهو
-حنان متحشمه : باهى

خشت لبست التوته الورديه ..طلعت عليها تجنن
قعدت تتفرج على روحها فالمرايا جسمها كله منسق
وشعرها مفتوح …خدت التوكه ولماته وفى خاطرها توة عيب نطلعله وشعرى مفتوح
ولكن عندها نيه توريهوله ..فتحاته وبعتلى لماته .. جت بتفتح الباب متع الدار وبتطلع
وقفت
فكرت
حطت ايدها عالتوكه حولتها من شعرها وحدفتها عالسرير وقالت مفتوح ولا ملموم زى بعضه

الفصعونه تبى توريه شعرها وتقنع فى روحها ههههه

طلعت
حسين شافها عجباته : ماشالله عليك وعلى جسمك
حنان تحشمت شبحت لصغارها
شنو رياض حلوة التوته
-رياض: طرف يا ماما
-حنان ضحكت: من يعلملك فيه هالكلام بس
-رياض: اكرم ولد عمى

ضحكو كلهم ….

قاللها حسين ديرلى قهوة قبل ما تقيسى للصغار
خشت للمطبخ

حسين حط راسه عالصالون اتكى وقال.. ااااه خديتى عقلى

حنان حاطه بكرج القهوة عالنار ..
خش حسين للمطبخ
وقف وراها
خدى شعرها بيديه وحطه على وجه يشم فيه
وقاللها
الله محلاها صنت شعرك

__________________

حنان يبست فمكانها ..
وحسين قرّب منها اكثر فالخلف ويشم فشعرها وتسمع فى صوت انفاسه
يبسو عروقها..

شرين تليفون حسين …
جابهوله احمد
تليفونك يشرين بابا
بعد عليها وخدى التليفون من احمد
لقاه صاحبه كمال يتصل
رد عليه
-حسين: اهلين كمال
-كمال: اهلين حسين كيف حالك انت والعويلة
-حسين: الحمدلله بخير
-كمال: سمعت بالحدفة وين جتنا
-حسين: وين نقلونا
-كمال : نقلونا لشركه اينى غاز
-حسين: والله

وقعدو يتكلمو ويهدرزو ويتناقشو قريب ربع ساعه وبعتالى سكرو
لقى حنان فالصاله رافعه زوز فناجين قهوة
-حسين: ماشالله اطورنا وبديتى تشربي معاى فالقهوة
-حنان تضحك: بلا تعليق زايد اهو تو نردها للمطبخ
-حسين: ومن يخليك ..حصلت عليه فنجانك معاى خلاص توة
-حنان: وين نقلوكم
-حسين: موضوع
-حنان: وين
-حسين: الاينى غاز
-حنان: باهى كويس عالاقل قريب علينا ..راجل بنت خالتى يخدم فيها يروح لحوشه كل يوم ادان العشا وثانى يوم يطلع الفجر
-حسين: ماهو انا مش زيهم ..احنا شغلنا حساس
-حنان: كيف
-حسين: احنا لازم نباتو عندهم اقامه جبريه لان الانابيب ممكن تعطل فالنهار وممكن تعطل فالليل

هوا انا مقلتلكمش حسين شن يخدم ..
هوا يشتغل غواص تبع صيانه الانابيب اللى تحت البحر …يعنى توة فالاينى غاز بيخدم عالانابيب اللى تحت البحر وماشيات لايطاليا …اى عطل يصلحه…. هدا علاش ديما تلقيه دورات برة فى كيفيه صيانه الاعطال …

-حنان: وكيف بتكون الاقامه الجبريه
-حسين: 15 يوم اقامه فالعمل ..واسبوع راحة فالحوش وهكدا
-حنان: بتغيب علينا 15 يوم قصدك

حسين قام راسه وشبحلها عجباته الجملة
-حسين: بتستاحشونى قصدك
-حنان متلكمسة: اكيدة الصغار بيستاحشوك
-حسين: وانتى
-حنان تحشمت ….

_______________________

توة حسين بيقعد 15 يوم فالشركه واسبوع معاها

كيف بيصير فيهم .. وكيف بيتواصل معاها

نحبكم ❤