رواية قلبي شاريك كاملة

#قلبي_شاريك❤

???الحلقه الحادية عشر ???

حنان فى دارها طول الليل تفكر…
وتتكلم بينها وبين نفسها ..
انتى ليش تبكى هكى … ماتوجعكش منه… معندكش علاقه بيه ..انتى اللى يربطك بيه فاتحه بس
وتمسح فدموعها …

والله لو شك فيك واحد من صغارك رياض ولا احمد توجعك
لو شك فيك عمك سعد اللى يعرف اخلاقك توجعك …
لكن هدا .. انتى شن علاقتك بيه ..
وشنو اللى يخليك اصلا تفكرى انك تسامحيه ولا متسامحيشى …
بالك صدقتى روحك انك مرته
هدا واحد يسافر من بلاد لبلاد
ويعرف نساوين بعدد شعر راسه..اجنبيات وعربيات شن تجى انتى بحداهم
من اليوم حتى صباح الخير معش فيه بينك وبينه
انتى التضحيه هادى كلها على خاطر صغارك ولا
خلاص عينك على صغارك بس ..
وماليكش علاقه بحد …
وحطت فى راسها القناعه هادى
وصلت الفجر ورقدت
.
____________________
.

الصبح احمد يطقطق على دار امه ..
-احمد: ماما خيرك قاعدة راقدة نوضى
ناضت فتحت عيونها شافت الساعه لقتها عشرة ونص …
ناضت فتحت باب الدار ..
وخشت للحمام غسلت وجهها وطلعت

لقت احمد مقعمز على سريرها .. اهو تو نديرلكم فطور عطلت عليكم ولا
-احمد: فطرنا يا ماما
-حنان: وشن كليتو
-احمد: دارنا بابا توست
تلفتتله حنان : بابا!!
-احمد: ايه بابا نايض من بكرى لقيناه
-حنان: وينه بابا توة
-احمد: مقعمز فالصاله
-حنان: باهى خليكم فالصاله جنبه تتفرجو عالتلفزيون وردو بالكم انت ولا واحد من خوتك تطلعو منغير ماتقولولى
-احمد: باهى

وطلع احمد يجرى للصالة .. قالتلكم ماما اقعدو عاقلين وردو بالكم واحد يطلع منغير مايقولى

-حسين: ماما وين
-احمد: ماما فى دارها قالت بتقعد فيها تعبانه

ناض حسين من مكانه ومشى لدار حنان بيفتحها لقاها مسكرة بالمفتاح …
رجع للصاله وبعتالى طلع بسيارته …

___________

سمعت حنان صوت سيارة حسين ولعت ومشى بيها …
طلعت من دارها ..
حطت الغدا عالنار …
عطت للصغار تغدو .. وخلت غدى حسين
وناضت سيقت الحمام ومسحت الديار
ومسحت الممرات وبخرت الحوش
فالليل دارت سندوتشات لصغارها وحسين مروحش …
سقت الغدا لحسين وحطاتهوله على الطاولة فالصالة …
روح حسين الساعه عشرة ونص لقى الحوش نضيف وهدوءءء
راقدين كلهم .. لقى العشا عالطاولة
حول الغطاء ريحته حلوة
قعد ياكل كمله كله …

مشى لدار حنان .. قعد يطقطق..
حنان … حنان… وهيا ساكته زعميا راقدة تبيش ترد

حنان وينك
-حنان جت ورا الباب : الصغار راقدين خيرك اطقطق
-حسين: نبى شاهى … ?? يتلكك
-حنان: هوينا الكاتل عالرخامه .. واكياس الشاهى فالدولاب
-حسين: لا انا نبى شاهى طايب
-حنان: تلقى البراد عالغاز فيه شاهى سخنه
-حسين شاد ضحكته: والله تبينى نشرب شاهى طايب من الصبح بيش يجينى القداد
-حنان: باهى حول من قدام الباب اهو تو نمشى نديرلك شاهى
-حسين: هيا اطلعى

غيرت حنان حوايجها .. لبست جلابية ووشاح .. وفتحت باب الدار بتطلع …
لقاته حاط يديه الزوز على كاترو الباب .. وهوا واقف قدامه …
جت بتطلع معرفتش كيف لانه ضخم ومعبى الباب ..

-حنان: حول
-حسين: فوتى
-حنان : منين بنفوت وانت واقف قدام الباب
-حسين يتسهوك: ااه صح مخليتلكش طريق منين تهربي منى
-حنان بخوف: قلتلك حول ..

حسين نزل ايده اليسار وقرّب وجهه منها .. وقاللها اطلعى هى

مشت حنان للمطبخ …
حطت براد الشاهى عالنار
خش حسين للمطبخ .. قعمز عالكرسى ..وقعد يشبحلها .. عطاته بالضهر وهيا ترعش …

-حسين: بنقعدو هلبا هكى
-حنان: لو سمحت ماليكش معاى دوة
-حسين وقف قدامها وعظ فمه : كيف يعنى
-حنان خافت: خيرك هكى تتكلم

حسين قعد يشبحلها وسكت وطلع للصاله يضحك..
جابت حنان سفرة الشاهى ..وتلفتت بتمشى
شدلها يدها …قاللها خليك

جبدت يدها وقالتله منبيش وخشت لدارها وسكرت الباب بالمفتاح
-حسين: ياحليلى عالدلع اللى بيدوبنى

_____________

قعمزت حنان على سريرها وقلبها يطق
ويطق
ويطق

تكلم فى نفسها …

ردى بالك ياحنان .. ردى بالك تحبيه
انتى اللى بتنجرحى …
هوا راجل قاعد بروحه مع مراءة .. لازم تجيه النية فيها… وبعد تكمل النية يرجع لحياته …
وانتى تقعدى فالحب والشوق والغيرة
غدوة يسافر برة يقعد بالعام ..
وانتى شن بيصير فيك
ردى بالك …ردى بالك
عيونها تعبو دموع … وبدت تتكلم ثانى فى خاطرها
ليش انا مش انسانه زى باقى الناس… معنديش مشاعر..معنديش قاب يحب …
ايه معندكش مشاعر.. وممنوع عليك تحبى ولا تفكرى الا فصغارك

هيا تكلم فى نفسها ..

شدى دموعك …. خليك قوية يا حنان … انتى بس اول مرة تشوفى حد يحن عليك هكى … ايااام ..وبالكثير شهور وبعدها يمشى فى حاله ..

قررت انها تشد نفسها ..خايفه من اللى بيصيرلها بعد يسافر
وتبو الحق رايها سليم غير القلب احرف ??

___________

حسين فالصاله… الشاهى قدامه ما مساش اصلا..غير كان يتسبل
حول تيشيرته .. واتكى عالصالون

وقعد يفكر

انت شن ادير ياحسين .. البنت صغيرة عليك هلبا .. وانت خديتها على خاطر صغارها
…. تكدب على روحك ولا عالناس .. انت خديتها على خاطر صغارها وعلى خاطرها حتى هيا
اعترف انها عجباتك البنت …

لكن عشرين سنه ..عمر طويل …
لو تزوجت فى عمر العشرين راهو ولدى نديدها ..

ضحك …

وكمل تفكيره وتخميمه ..
لكن عليها تكشيخه ههههه … تخلى العاقل يهبل … تتعارك معاى وتقولى لو سمحت ههههه
البنت عجبتنى وطريق العودة تسكرت خلاص معش فيها كيف نرجع
الحب خش قلبى .. وحركه
وانا قلبى صعب يتحرك ..لكن معاها هيا مش عارف شن صارلى ….

خلاااص خلااااص…

تغطا ورقد

__________

ناضو الصبح..
حنان جهزت الفطور..
وحسين يبوس فصغاره ويلعب فيهم ..

-رياض: بابا اشريلى ايباد
-حنان: رياض شن حكينا احنا
-حسين: خليه يقول اللى فى خاطره
-احمد: حتى انا نبى
-حسين : تم هي بدلو واطلعو
-حنان ماتبيش تشبحله : لا صحيت مفيش داعى
-حسين: قلت وتيهم خلى نرفعهم معاى
-امولا: حتى انا يابابا منمشى معاكم
-حنان: انتى لا اقعدى مع ماما
-امولا تبكى: نبى نمشى ياماما
-حسين: خليها تمشى معانا
-حنان: باهى

طلعو الصغار هما وحسين وشرو ايبادات ..

وشرالهم معاه ماى فاى بيش اينزلو الالعاب .. ونزلهم فايبر وايمو برقم امهم

__________

ثانى يوم الشركه اتصلو بحسين قالوله احضر للمقر

حسين مقعمز فالصاله .. وحنان اطيب فالغدا
مشى للمطبخ .. اتكا عالباب ومد ايده عالجنب

-حسين: ماشالله عالريحه
-حنان ساكته
-حسين: بنمشى لطرابلس
-حنان: قامت راسه شبحتله !!
-حسين: الشركه استدعونى للمقر
-حنان: بتقعد ايام
-حسين: بتهيئلى لا .. لانى كنت فالبحر معتقدش ايردونى ..
-حنان: امتى بتمشى
-حسين: توة .. لازم نكون اليوم فطرابلس نبات غادى بيش نكون سبعه ونص فالشركه
-حنان: تغدى قبل اهو الغدى قريب يطيب
-حسين: حاضر انتى طلباتك اوامر

تغدى حسين وبدل حوايجه وسلم عالصغار ..

وشبح لحنان ..قاللها فى امان الله
-حنان: طريق السلامه

_______________

وصل حسين شقته بات وثانى يوم مشى للشركه من 7 ونص … وروح العشرة ونص الصبح للحوش ..

حنان ناضت هيا وصغارها …دوشتلهم .. ودوشت هيا ولبست سروال لاصق اسود وتيشرت اصفر ..وفاتحه شعرها بيش يجف… حسين مهناش عاد حرية تامه ???

الصغار مقعمزين فالصاله يفطرو وكل واحد شاد الايباد متعه وحاط سماعات فودانه يسمع فالاغانى

فجأة اتصل الفايبر اللى فى جهاز رياض …
معرفاش شنهوا المهم قعد يمس لين انفتح …لقى صورة حسين طالعه فالجهاز

-حسين: الووو
-رياض: بابا
-حسين : هدا فايبر يابابا مكالمة فيديو
-رياض يضحك: بلحقه

حسين يكلم فى رياض .. ويشوف فى مراءة جميلة ورشيقه .. شعرها لعند خصرها وتتحرك فالمطبح
…

حسين يشوفلها ويتفرج عليها ومتفاجئ

-رياض: انت وين يابابا
-حسين : هادى منو اللى وراك فالمطبخ
-رياض: هادى ماما
-حسين: الله اكبر عالجمال …تبارك الرحمن فيما خلق …

تحرك الايباد من رياض وتنحت صورة امه

-حسين : تى خيرك يا رياض قيم الايباد رد الصورة ..
-رياض: اسكت تو نصورهالك
-حسين: باهى اسمع فى علامه كاميرا فوق اصغط عليها ..
ضغط رياض عالايقونه متع الكاميرا انقلبت الصورة

-حسين: ارفع الكاميرا للمطبخ وانت ساكت
-رياض يحسابها لعبه : باهى يابابا

مشى رياض عالمطبخ وشاد الايباد … والايباد يصور ….
وحسين يشبح فى حنان بدون حجاب ..وشعرها مفتوح .. تلفه اديره كعكه وينفتح وينزل منها … التيشرت قصير .. المؤخرات واضحات .. والصدر كله عالشارع …

عجباته هلباااااا… وتأكد انه يحبها …
اول مرة قلبه وعقله وعيونه يتفقو على نفس المراءة ..

وفى عز انسجام حسين …

-رياض: ماما نصور فيك راهو
-حنان : بطل بلا شطانه
-حسين يتكلم والسماعات فى ودن رياض : رياض اسكت متقوللهاش
-رياض: باهى ..

وانقطع الارسال ….

لما حسين يتفرج على حنان فيديو خدى قريب 20 سكرين لصورتها …
قرّب صورة وجهها … شاف عيونها .. خدى بوسة من شفايفها وقاللها نحبك ….

________________

من توة اتاكد حسين انه يحبها …وقرر انه يخليها تحبه … وقرر انه يسكنهم معاه فطرابلس لان الشركه عطاته علم انهم حولوه من البحر ..لكن مش معروف وين …

زعمااااا وين جاته الانتقاله ?
زعما حق بيحول طرابلس وبيستقر فى ليبيا

دهشت ???

نحبكم❤