رواية قلبي شاريك كاملة

#قلبي_شاريك❤

???الحلقه العاشرة???

حنان فى غرفتها …
وحسين فم الباب واقف …
والكلام يسمع فيه بودانه …
ويكدب فى نفسه …
مصدوووووم ….
المكالمه ماتمتش …
حنان مازالت تتكلم
-حنان: معش نبيك تجينى هنا نخاف تتلاقى مع اكرم وحفيظ ونقعد انا فى قصه …تى والله اول امس لما جيت لو شافوك راهو صارت مشكلة
حسين مصدوم .. هدا شنو .. ومنو هدا اللى قاعدة تتلاقى معاه بالدرقه ….
حنان ساكته تسمع فالشخص اللى معاها فالمكالمه يتكلم.. ..
-حنان: خلاص تو نشوف لو قدرت نتصرف…وزى ماقلتلك معش تجى هنايا تو انا انجي غدوة ..
باهى مع السلامه ..
حطت حنان تليفونها فالشحن وتغطت ورقدت

_______________________

تحرك حسين من قدام الدار بالشوى ..
فتح الباب وطلع وكل مافيه مصدوم ..
ركب سيارته ولعها وطلع …
ساكت …
مش مستوعب اللى صار ..
لو كان بداية المكالمه خلاته يشك فى خيانتها…
نهاية المكالمه خلاته يتاكد انها خاينه …
طلع عالرئيسى .. وتوجه لطرابلس ..
ميبيش يفكر ..
ميبيش يتكلم …
هدوءءء وصمت فالسيارة
حس بالوحدة ..
عيونه دمعو ..
مصعبها عالراجل لما يشد البكى.. يبيش يبكى .. ولكن عيونه يخونوه ويتعبو دموع وهوا رافض يخلى هالدموع تنزل.. ويقعد فى صراع
ساكت وفى خاطره يدافع عليها حنان مستحيل ادير هكى .. حنان متربية …
وعنده صراع بين مصدق بين مكدب
لكن هوا مكدب تفكيره اكثر ما مصدقه

يكلم فى نفسه…..

..◇ خيرك ساكت يا حسين .. وكيف سكتلها وطلعت
..☆ مستحيل حنان تخونى وتبيعنى
..◇ وكيف عرفت ؟.. وشن ايأكدلك ..انت شاريها لكن هيا الله اعلم
..☆احساسى ايأكدلى انها ماتبيعنيش
..◇شنو يا حسين.. وقاعد ادافع عليها بعد اللى سمعته بودانك .. انت تحبها ولا شنو ..
..☆هه حب شنو باللهِ…
..◇ امالا خيرك …
.. ☆الخونه تحرق
..◇وخيرك مادرتش ردت فعل وانت تسمع فيها فالحوش مدام الخونه حرقاتك
..☆ لانى مصدوم فيها
..◇ انت المصدوم ولا قلبك المصدوم
..☆انا المصدوم قلبي مادخلاش
..◇تى قلبك هايم ويحب ليش ادس
.. ☆مفيش منه الكلام هدا
..◇تى انت تحبها ياراجل دس عليها وعلى الناس كلها .. لكن متقدرش ادس على روحك
..☆ باهى نحبها وانت ماليكش علاقه اسكت
..◇ تحبها …. ايه تحبها ..واضح عليك
..☆ايه نحبها .. ونحب شكلها وكلامها ودلعها عليا وحركاتها … اااااه ياقلبى ياااربي نطلع غالط

تصدقو يابنات الموقف اللى صايرله دكرنى باغنية اليسا متع مسلسل ..
ياريت
مثل هالايام قلبك كسر قلبي
مثل هالايام صابو العمى قلبي
ماعم اسمعله دقاتو .. ولا بتعنيلى حياتو
شو بيسوا قلبي والعالم ياعمرى ..
ياعمرى وانت منك جواتو
آآآه يا زمانى آه .. شو بعمل باللى جواتى
آسرنى وحابس انفاسي..
شو صعبي انسى حبيبي .. والاصعب كمل حياتى
ياريت
___________

وصل حسين لشقته الساعه 2 ونص فالليل …
ركب للدور الثانى ..
فتح باب الشقه بالمفتاح …
شقته ثلاث ديار وزوز حمامات ومطبخ ..
شاريها من ثلاث سنوات ..
وفيها اثاث بسيط …
خش حسين وهوا متأثر واجعته روحه
عنده شباك كله مرش يطل عالطريق .. صانعله صالون عالى وحاطه موازى ليه .. يحب يتكا على هداكه الصالون ويتفرج عالطريق
خش حوّل الستار واتكى عالصالون حاط يده اليمين ورا راسه ويخمم للصبح
راسه قريب يتفجر من التخميم ..
بعد التفكير..
قرر انه لازم يتروى ويصبر لعند يشوفها اليوم فالليل وين ماشيه ومنهوا اللى بتتلاقى معاه ..
ولو طلعت تخون حلف لما يعدبها وماعاد شايفه صغارها طول عمرها
وشن بيصبرنا احنا لليل عاد بيش نفهمو ????

_____________________________

جت العشيه … نزل من شقته و ركب سيارته وطلع
نزل لسوق كبير ماخلى ماخدى منه للصغار وللحوش اكياس اكياس …
وفات على قهوة شرى نسكافيه.. وفات شري باكو دخان وطلع
راسه يوجع ليه يومين لا كلي ولا رقد ..من لما كان فالبحر
الساعه 6 ونص توكل وروّح لحوشه
وصل ممكن الساعه 8
قام التليفون بيكلمها يبي يسألها وين هيا توة ويزبطها …
شرين تليفون حنان .. لقاته حسين يتصل ..
فرحت
فتحت التليفون
-حنان : يا اهلين حمدالله على سلامتك
-حسين : انتى وين
-حنان مستغربة: انا فالحوش
-حسين : باهى افتحى الباب انا فم الحوش
طلع رياض يجري فتح الباب …الحق حسين فرح بشوفت رياض وقامه فى غمره ..
-حسين: سميّنه شن حالك
-رياض: ستاحشناك يابابا احنا وماما
-حسين: وين باقى الابطال
جت امولا تجرى … بابا جيييت
قامها وباس عليها وحطها فوق رقبته ومنزله رجليها على ضهره …
وجي احمد وقامه بيده اليسار فوق وقعد يبوس فيه …
وخش بيهم للصاله .. لقى حنان واقفه مبتسمه وفرحانه ومتحشمه من عركتها معاه هاديكه الليله اللى بالى بالكم ?
-حنان: الحمدالله على سلامتك
حسين ماشافش جيهتها بكل مع انه مستاحشها..
رد عليها : اهلا
حنان تشبحله ومستغربة .. مفيش اى اهتمام منه ولا عبرها حتى …
وتلفت للصغار:هيا تعالو معاى انزلو الاكياس من السيارة
وطلع للسيارة ..هوا والصغار …
وقعدو الصغار ينزلو فالحاجات يحطو فيهم فالمطبخ …
وخشو للحوش وسكرو الباب
-حنان تكلم فصغارها : وين بابا
-احمد: بابا مشى لحوش حنينة خديجه
-حنان: اكيدة بيسلم عليها …وسكتت
ومستغربة فالبرود اللى سلم بيه عليها
خش حسين لحوش امه وسلم عليهم ونزلهم اكياس حتى هما ..
-حسين وقف: نستادنكم توة…نراجى فى مكالمه مهمه خلى نروح للحوش وتو نجى بعتالى
وروح لحوشه .. فتح الباب بالشوى ..
حنان مقعمزة عالطاولة جنب صغارها فالمطبخ .. الصغار فرحانين ويفتحو فالاكياس
خش حسين يتسحب بالشوى لدار نوم حنان … لقى التليفون عالكوميدينو
فتحه وشاف المكالمات …
قعد يدقق فى الساعات اللى صارت فيها المكالمات .. لقى مكالمه واردة الساعه 1 ليلا ..مكتوب احمد
فتح الرسايل عالاسم نفسه…
وكتبله رساله …
بعتها للرقم …
وبعتالى مسحها …
وحط التليفون
وطلع ..

“زعما شن كاتب فالرساله ??”
___________________________

حنان فالمطبخ مع الصغار …شافت حسين مقعمز فالصاله
جت قعمزت عالصالون ..
-حنان: انشالله متعبتش فالسفرة
-حسين: يتفرج عالتلفزيون ومردش عليها
-حنان: حسين!!!
-حسين تلفتلها: تكلمى فيا منتبهتش
-حنان? : لا سلامتك
وناضت من مكانها ومشت للمطبخ ..تلفتلها قعد يشبحلها وهيا ماشيه وكالعادة لابسه جلابيه ووشاح
حسين يتكلم فى خاطره: نحس فى نفسى تسرعت فى بعت الرساله .. بالك انا ظالمها .. وهدا واحد من خوتها .. وتقوله غدوة بنجيك .. قصدها لحوش اهلها
خش حسين للمطبخ …
-حسين: كل واحد ياخد الكيسة اللى مكتوب عليها اسمه وباقى الاكياس فالثلاجه
-رياض: ايه قالتنا ماما كل واحد مكتوب اسمه على الكيس متعه
-حسين: حنان شن حال خوتك وينهم معش بانو
-حنان: خوتى فى تونس ليهم اسبوع هما وبوي وعمتى خيريه ماشيين علاج
سكت حسين … معناها المكالمه مش مع خوتها ولا المشيه لحوش اهلها ..ولا هوا ضلمها
لكن ربي كريم .. اهو تو يبان كل شى

__________________________

حسين مقعمز فالصاله ومعاه الصغار كل واحد فرحان بالشوكلاتات والتشيبس متعه … وباب الحوش شرين
-حنان: منو زعما
-حسين وجه اسود : افتح الباب يا رياض
مشى رياض من الممر يفتح فالحوش …
و خش يجرى … احمد ولد خالتى جى ياماما
انصدم حسين وفرح وزعل وندم وكل المشاعر تخلطت عليه فى لحظه وحدة
الحمدلله المكالمه طلعت مع ولد اختها
كان يبي ينوض يبوسها ويعتدرلها لانه شك فيها ولو لحظه …وهيا ماتستاهلش ..
خش احمد ولد احلام اخت حنان ..
-احمد: السلام عليكم
-حنان وحسين : وعليكم السلام
-احمد: شن حالك عمى حسين روحت …
طبعا احمد عمره 17 سنه يقرا فى ثانى ثانوى … ووحيد امه مع زوز بنات
-حسين: ايه روحت اليوم
حنان بدت تتخضر وتتصفر : شن فكرك بينا فى هالليل يا احمد
-احمد: انتى يا خالتى بعتيلى رساله وقلتيلى تعالة توة
-حنان شبحت لحسين وكملت الدوة مع احمد: اااه ايه الرساله نسيت .. ايه بعتهالك مبكرى.. نحسابها موصلاتكش …
-احمد: لا والله وصلتنى توة ممكن من عشرة دقايق
-حنان : ايه ايه
ناضت حنان مشت للمطبخ .. قامت تليفونها خشت عالرسايل لقت الرساله ممسوحه مهناش
خشت على المهملات .. لقت تم حدف رساله مند 12 دقيقه
فهمت ان فى شى …
دارت شاهى وكيك وبشكطى …ماشالله حسين جايبلها الخير كله
قعد يهدرز احمد .. وجى بيروح طلعت خالته تسقد فيه ..
-احمد: ها شن درتى فالمبلغ ياخالتى الماكينه بيبيعوها ..اهو عمى حسين روح
-حنان: يا احمد شد قرايتك خير .. انت العام الجاى شهادة
-احمد : توة عطلة يا خالتى نخدم على راسى
-حنان: مزال ماكلمتاش
-احمد: امالا ليش ناديتينى
-حنان : ناديتك بنعاركك تشد قرايتك وفكك من الدوة الفاضيه
-احمد: باهى كيف حال مرام
-حنان: المرة اللى فاتت خوها حفيظ ضربها قريب قتلها .. متحطنيش فى موقف اخيييي معاهم يحسابونى نديرلكم فى مواعيد ..وحتى اكرم مش ساكت
-احمد صوته تغير وبعصبيه: وشن دخل امه فيها اكرم ..هوا ولد عمها مش خوها
-حنان: ولد عمها وزى خوها
-احمد: لا زى خوها لا نمى .. تى والله يجى جيهتها نعدمه
” طبعا الكلام على مرام بنت عزيز سلف حنان ”
طلع حسين …شنو انت مزال قاعد يا احمد …
-احمد : ماهو عندى موضوع قلت لخالتى تقولك عليه
-حنان: غدوة نقوله يا احمد
-حسين: خير شن فى
-احمد: فى ماكينه شاورما ببيعوها ..ونبى نخش انا وصاحبى شركه فيها ونبى 5000… سلف منك
-حسين: ياسلام .. اى شى يجى من ناحية حنان كله موافق عليه
حنان تشبحله وفى خاطرها ياسبحان مغير الاحوال قبل شوى مايبيش حتى يرد عليها
-احمد: تم يا حويج امتى ناخدهم
-حسين: تعاله غدوة الضهر تلقاهم عند حنان ..سلام توة وسلملى على بوك
وطلع حسين مشى لحوش امه يهدرز مستاحشهم هيا وخوته وسعد وامال

__________

الساعه 12
روح حسين من حوش امه .. لقى حنان والصغار راقدين والحوش هدوءءء
طلعت حنان من دارها …
لقت حسين متكى عالصالون
-حنان: نديرلك عشى
-حسين: عادى منقولش لا ..من امس مادوقت شى … واحلى حاجه توة سندوتش دحى سخون
-حنان وعيونها حمر باكيه : حاضر شوى
خشت للمطبخ …دارتله سندوتش وجابتهوله مع عصير وطاسه شاهى …
وتلفتت بتمشى بتخش لدارها…
-حسين : خيرك وين ماشيه
-حنان: شوية بس تعشى انت براحتك واهو تو نجى.. اصلا نبيك فى موضوع
– حسين حس انها مش تمام: باهى نراجى فيك
ربع ساعه .. وطلعت حنان من دارها قامت السفرة من قدام حسين …ورجعتله
-حنان: انت الى بعتت الرساله
-حسين: رسالة شنو
-حنان: الرساله اللى وصلت لاحمد ولد اختى
-حسين: منعرفش نكدب … ايه انا اللى بعتها
-حنان : وليش !!؟
-حسين: مافى شى ..رساله وانبعتت وجى الولد وتم … وفوتى الموضوع
-حنان: لا منفوتاش الموضوع
-حسين: على خاطرى فوتى الموضوع ومنبيش نغلطو مع بعض ونتعاركو
-حنان وقفت واشرت بصبعها عليه : الغلط انت اللى بديت بيه ..مدامك واخد تليفونى وتفتش معناها شاك فيا ..ومدامك شكيت فيا مرة .. ح تشك فيا ديما .. وانا كل شى نرضى بيه الا انك تهينى
-حسين: كرامتك محفوظه حنان خيرك ..منو هانك انتى
-حنان تبكى وحطت يديها على ودانها :اسكت اسمى ماتجيباش على لسانك مدامك تشك فيا …
-حسين: اسمعى احنا قاعدين فى بدايت حياتنا وموضوع وصار متوقفيش عليه
-حنان : انا معنديش معاك حياة .. انا قاعدة اهنا على خاطر صغارى بس .. وبعتالى انت منين عرفت ان ولد اختى يكلم فيا ويبي فلوس س س…سكتت..
ادكرت …اااااااه انت امس فالحوش فالليل لما انا نكلم فيه
-حسين: يعنى شن تبينى ندير لما نسمع مرتى تقول لواحد حتى انا نحبك.. وتقوله غدوة نتلاقو
-حنان: مرتك لو واثق فيها صح .. ماتشكش فيها ….
ولو فتحت الباب وخشيت رانى ماسكرتش المكالمه وكملتها قدامك ..لكن يا حيف عليك ..طلعت على حقيقتك
-حسين: حنان
-حنان: قلتلك اسمى ماتنطقاش على لسانك تفهم ولا متفهمش انت
-حسين: باهى انا اسف وبادن الله معش تتكرر واللى تبيه انا فيه
-حنان تبكى: مانبى منك شى غير تخلينى فى حالى نربي صغارى مانيش مستحقاتك
-حسين: حاضر انتى غير اهدى ومايصير الا اللى انتى تبيه
-حنان تمسح فدموعها : انا هادية .. ولما اتفقت معاك ع الزواج كان كلامك واضح وكلامى واضح
-حسين: باهى كيف تبى انت
-حنان:من اليوم لا عاد فى دوة بينى وبينك ولا ليا علاقه بيك ..والافضل رقمى تمسحه .. والصغار تقدر تكلم خوك سعد تطمن عليهم
-حسين: باهى بعد ماتهدى تو نتكلمو
-حنان: انا معش عندى دوة معاك ..من اليوم
وخشت لدارها وسكرت الباب بالمفتاح …
وقعدت تبكى ..وتبكى ..
” ماحرها حد يتهمك بالخيانه ”
وحسين ضميره ايأنب فيه .. ونادم عالتصرف اللى داره
حبيبته زعلانه ومقهورة وتبكى .. وكيف بيرضى يخليها هكى …
وقف قدام باب دارها ..طقطق
-حسين: حنان اسف سامحينى .. عمرى ماتأسفت لحد اول مرة فحياتى نتأسف

حنان ردى ….

يطقطق عالباب حنان ردى عليا
جت حنان وقفت ورا الباب …
وتبكى بحرارة
حسين كل مشاعره متحركه معاها
-حسين: باهى تكلمى
-حنان: منبيش نتكلم باهيوو
-حسين: تأسفتلك
-حنان تبكى : منبيش نسامحك طول عمرى
-حسين: تبينى نطلع مالحوش
-حنان بدى صوته كله بكى على دلع : لاااا الدنيا ليل
-حسين: يعنى كانا مش ليل نطلع
-حنان: برة امشى تشك فيا
-حسين: غيرت الراجل على زوجته مش عيب .. وانا الله غالب اللى سمعته عمالى عيونى
-حنان عجبتها الجملة : ايه غيرة ..مش شك
-حسين تغير صوته ويهمس من ورا الباب: ايه نغير عليك هلباااا … فوق ماتتصورى

حنان بدى قلبها يطق يطق بسرعه

-حنان: امشى مستحيل نسامحك .. خلاص امشى امشى
مشى حسين من قدام دارها وقعمز فالصالون .. وسلب تيشيرته ورقد .. مشى فالنوم تعبان ليه يومين مرقدش …

_______________________________

تمت ويتبع ____________

نحبكم❤