رواية قلبي شاريك كاملة

#قلبي_شاريك ❤

???الحلقه التاسعه ???

قصيرة شوى الحلقه ..

حنان كملت فطور صغارها وضمت الحوسه …
طلعت مشت لحوش عزوزتها .. لقت الحاجه وولدها سعد مقعمزين مع بعضهم …
خشت وهيا رافعه معاها شنطه ورابطه عليها وشاح من برة …
-حنان: السلام عليكم
-الحاجه : وعليكم السلام
-سعد: وعليكم السلام
-حنان: شن حالكم ياعويله انشالله بخير
– سعد: الحمدلله فى خيار الخير .. شنو حالك انتى والصغار اياكم باهيين
-حنان: الحمدلله يا عمى ..
وتلفتت لعمتها .. عمتى عندى امانه بنحطها عندك ..
-الحاجه : امانه شنو
-حنان : كاصه متع دهبى نبى نخليها عندكم انتو ماشالله الحوش ديما عامر
حقة انا محكيتلكمش عالدهب اللى جابهولها حسين
جابلها تاكم خليجى…وحديدة بخاتمها.. وخراصات قلادة وخلال دهب..وشمبير دهب ..ولما لامت عليه قالتله ليش جبت هدا كله.. قاللها انتى مرت حسين
….وهدا الدهب اللى يليق بيه

__________المهم ماعلينا توة ..

-الحاجه: هاتيها الشنطه ..
اعطتهالها حنان
قعدت الحاجه تنادى يا امال تعالى
جت امال ..
-الحاجه: الشنطه هادى حطيها مع حاجاتنا ..وتأشرلها بعيونها زعميتا سريات ههههه متبيش تقول دهب
-امال : حاضر يمى
-ناضت حنان : نستادنكم توة
-الحاجه : خيرك اقعدى
-حنان: لا والله بنحط الغدى عالنار
-الحاجه: اقعدى تغدى معانا ماهو غير انتى والصغار بس ….. ربي يرده سالم وليدى
-سعد: الطيارة اكيدة راهى طارت توة

انصدمت حنان??? …………

وانصدمت انا…..

وانصدمتو انتو ……

وانصدمنا كلنا فى صوت واحد …

وين مشى حسين… سافر ولا شنو الدوة? …

حنان دارت روحها عارفها … وبتبكى غصه فى صوتها
-حنان: انشالله يروح بالسلامه
-سعد: باهى هاتى الصغار وتعالى
-حنان: لا والله ياعمى صغار ودوشه صحتين ع قلوبكم وخلى نغديهم فالحوش
-الحاجه: على راحتك يا حنونه …

________________

روحت حنان بسرعه للحوش… ومعش قدرت تشد دموعها ..وانهارت بالبكى …
وتحكى فى خاطرها: حتى كانا فى وجه خلاف بينى وبينه …وصحيح انه شرط عليها ماندخلش فحياته وانا وافقت …لكن مش لدرجه يسافر منغير مايقولى ولا يعبرنى …حتى من باب اللباقه
وجعتها حنان وقلبها حرقها
“وتبو الحق حتى انا وجعتنى حسيتها فى كبيدتى ههههههه.. واكيدة حتى انتو وجعتكم ومارضيتوهاش فيها يانارى???”

عموما …

حنان من حرقه قلبها… قعدت تفكر وتحوس زى اللى صابين عليها طنجرة طبيخه سخونه هههه
قعدت تفكر.. شن ادير .. شن ادير …
وبعدين تخمم فى خاطرها: لا كرامه لا دوة زايدة.. والله لما نكلمه بالتليفون ونلوم عليه ..
هيا نوعها رقيقه شوى ..وحدة ثانية راهو قالت والله لما نهزبه ???
شدت عمتك حنان التليفون ….فتحاته بتتصل … لقت 19 مكالمه لم يرد عليها من حسين?? …

“الله يابنات شورنا ضلمناه مسكين ..قريب زدنا شعلنا النار ??”

تاريته الفرخ رياض ولدها طير الشر واخد تليفون امه ويلعب بالدودة ودايره صامت منغير ماينتبه هوا ولا تنتبه امه …
تبو الحق حنان فرحت لما لقت المكالمات ..
تى شنو فرحت …قولو قريب زغرطت هههه ??
المهم هيا كيف بتتصل بيه وتجيها مكالمه …حسين يتصل بك .. قريب رقصت مالفرحة …
فتحت الخط طول
-حنان :الوو
– حسين:الو اهلين .. خيرك مترديش
– حنان : والله التليفون كان صامت وماشفتاش الا توة
-حسين: انا فالمطار ياحنان
-حنان: وين ماشى ?
-حسين: كلمونى الفجر قالولى فى طوبو اتعطل فالبحر ولازم يتصلح اليوم
-حنان: بتقعد هلبا
-حسين تغير صوته وبكل هدوء : لا انشالله مانعطلش عليكم
-حنان: تروح بالسلامه
-حسين: ردى بالك ع الصغار
-حنان : باهى فى حفظ الله مع السلامه
-حسين: خيرك بتسكرى
-حنان: ايه هوا هداكه
-حسين: باهى براحتك .. فى امان الله …
وانهى المكالمه ….
بعد متسكرت المكالمه ندمت حنان …قعدت تلوم على نفسها: خيرنى هكى زى اللوح .. هوا يتكلم وانا نقطع فالمكالمه .. ديما وانا نرعش .. وعندى نقص من الدوة مع اى راجل …..يااااربي حل عقدتى

_________________________

ومشى حسين للعمل متعه … طبعا مفيش مكالمات ولا تغطية تليفونات …
يضربهالك اسبوع مصكر …
وشن يصبر حنان عاد … مشو ايام زى النهارات السود
ملل وضيقه خاطر.. تقول متعودة عليه من سنين
لما كمل ..بيروح بيش يجو متاعين التوكه اللى بيبدلو عليهم …
قالوله توة ميقدروش يروحو بيهم لان الجو عاصفه والبحر هايج وصعب الطيارة اطير
زادوهم ثلاث ايام … صكر عالعشرة ايام وهوا قالق حاله …يبي يروح
عاشر يوم روح …
وصلو مقر الشركه .. الساعه 7 المغرب .. قدمو تقارريرهم واخلو طرفهم ..
وصلت الساعه قريب 10 ونص فالليل …
-ناجى: ياحسونه بات عندى الليله والصباح رباح
-حسين : صعب وراس وخى مشغول عالصغار نبى نروح
-ناجى يضحك : لاااا هوا معاك حق حتى انا مجرب الواحد يستاحش الصغار … وغمزله وام الصغار
-حسين: ماريتله ياوخى يا ناجى
عموما تو نرجع هنا ونهدرزو الايام الجايه …مع السلامه
-ناجى: مع السلامه

_____________________

وصل حسين سور حوشهم .. الساعه قريب الواحد فالليل .. . درس السيارة خارج السور بيش مايبيش ايفيق امه ويقلقها فى هالليل
خش من باب جنان حوشه بالشوى ميبيش ايفيق حنان والصغار لانه عقاب ليل واكيدة راقدين
و فتح باب الحوش وسكره بالشوى …

خش للصاله ….

الحوش هدوءءءءء

لكن فى صوت حد يتكلم …

قعد يقرب …
لقى الصوت طالع من دار حنان …
حنان تتكلم فالتليفون عقاب الليل ???
وفى وقت متاخر…
وقف قعد يسمع …
وحنان تتكلم …
-حنان: والله الدهب ماهو عندى عطيته لعمتى .. وحتى لو كان عندى والله منقدر نتصرف فيه
سكتت شوى تسمع فاللي يكلم فيها يرد عليها ابصر شنو يقول ….
وكملت دوتها: ياودى حتى انا والله نحبك.. لكن الله غالب مانقدرش نعطيك شى تشبح فيا بروحك

هنا يبس حسين فمكانه ….
معش يشبح فى شى … حنان تخون ??
معقولة …لاااااااا لاااااا لااااااا مستحيل البريئة هادى هكى ادير
نفسه انقطع عليه و عروقه تجمدو ……
غبارة عروقنا كلنا تجمدو منو هدا اللى تقوله نحبك ??

____________________________

تمت ويتبع _____________

زعما حق حنان تخون فى حسين
شن بيدير حسين
وكيف بيتصرف ….

نحبكم ❤