رواية قلبي شاريك كاملة

#قلبي_شاريك❤

??الحلقه السابعه??

اكرم وحسين راجعين بياخدو سيارة حسين بيش يمشو فيها للمطار
-حسين: اجرى يا اكرم خيرك
– اكرم: ياعمى خايفها توقف بينا السيارة مرة ثانية
– حسين : افففففف
– اكرم: خيرك يا عمى
-حسين: مش عارف ….
قطعو نص الطريق وقريب يوصلو
-حسين: فوت على صغار عمك هما الاولين
-اكرم: حاضر

_________________________

الساعه 7 المغرب ..
حنان فى دارها .. وبوها يحوس فالجنان ..
خيريه سحبت روحها بالشوى مشت جهت دار حنان …
طقت ع الباب …
-حنان : تفضلى ياعمتى خشى
– خيريه: شنو الصغار رقدو
– حنان: قريب حتى ينوضو
-خيريه: اممم شن بنقولك .. ولا تعرفى بلاش
-حنان: تعالى خيرك ياعمتى شن تبى تقولى..
– خيريه: عارفاتك انتى وخواتك تشوفو فيا مسمومه وماتحبونيش .. لكن انا والله ماعمرى كرهتك لا انتى ولا خواتك
-حنان: خيرك ياعمتى تنوضى فالمواجع على روحك والله مفهمتك فى حاجه
-خيريه: امالا تعرفى الكسكسى اللى نطيب فيه بمناسبة شنو
-حنان: بمناسبة شنو انشالله خير
-خيريه: اليوم فاتحتك على منير ولد عمتك
– حنان عيطت: شنو ..انتى شن تقولى
– خيريه: ياوخيتى متشهدريش واستري عليا… انا لا شفتك لا قلتلك
-حنان تبكى : كيف اديرو هكى منغير ماتاخدو رائي

“??? ياناااااري سخفتنى”

-خيريه: انا مدخليش .. بوك اللى داير كل شى هوا وولد اخته
-حنان تبكى : امولا نوضى انتى وخوتك هيا بنمشو لحوش جدك الثانى
وناضت لبست عبايتها ووشاحها وصغارها يلبسو فى مداساتهم ..
وخيريه طلعت تجرى هربت مشت للكوجينه متعها دايرة روحها ما قالت شى
طلعت حنان وصغارها فى جرتها .. لقت بوها واقف فالجنان
-المولدى: حنان وين ماشيه
-حنان: ماشيه لعمى سعد وامى خديجه
-المولدى: وماشيتلهم علاش انشالله خير
-حنان: خلى نهرب قبل ما تبيعنى لولد اختك
-المولدى: يوسف تعاله شوف اختك اللى بتفضحنا قدام الناس
-يوسف طلع من المربوعه: خيرك حنان شن فى
-حنان تبكى : هكى تبيعونى يا يوسف
-يوسف : ومن باعك سلم وخيتى ..
تلفت يوسف لبوه: مش قلت نشدتها ووافقت ولا يابوى
-حنان تبكى: ماسألنيش يا يوسف توة بس انا سمعت بالموضوع
-المولدى: وانتى من قالك
-حنان : اللى قالى قالى
-يوسف: لكن لا يجوز هكى الزواج يابوى منغير علمها
-المولدى : تى صكر فمك انت دايرلى روحه شيخ
-حنان : حرام عليك هكى يابوى
-المولدى: كان تعاندينى الليله لا بنتى ولا نعرفك ..
وشد قلبه هههه يمثل عليها .. داير روحه بينجلط
..ااااه يا قلبى قعمزونى ..جيبولى امية شربونى …
-حنان: اسمع يابوى مدامك بتزوجنى ناخد حسين اولى
-المولدى: ماهو جاك وتكبرتى .. وقالو سافر وين بنلقاهولك توة انا
-يوسف : اسكتو .. الرجاله وصلو متحشموناش
– حنان: الزواج هدا باطل وحرام عليكم
-يوسف : غير حولى من الجنان توة ياحنان وخشى داخل الرجاله خاشين ومعاهم الشيخ ..
خشت حنان لدارها .. شافت الرجاله خشو هما وبوها ويوسف …
شدت صغارها من يديهم وقالتلهم اسسسسس بنطلعو توة من الجنان ومانبو حد يحس بينا
طلعت حنان وهيا تبكى و دموعها مايبوش يوقفو …
فتحت باب القراج بالشوية وطالعه ..
لين جى فعيونها ضى سيارة وقفت قدام الباب
-اكرم نزل من السيارة : حنان وين ماشيه انتى والصغار فى هالليل ..

____________

سبحان الله يابنات .. شن خلى السيارة توقف ..وحسين يلف ويرجع …وشن جاب صغار خوه فى تفكيره من وقت ماطلع
المهم ماعلينا .. نرجعو ل حنان اللى دارت صغارها وهربت نفدت بجلدها.. تبى تستنجد ب سعد والحاجه باعتبار قاللها بوها ان حسين سافر
طلعت حنان هيا وصغارها بالهدوءءء بيش ماحد يسمعها …
فتحت باب القراج وطلعت ..وجى ضى سيارة فعيونها ..
نزل اكرم : حنان وين ماشيه فى هالليل انتى والصغار
وانفتح باب السيارة الثانى وادا حسين نازل من السيارة …
مشى جيهتها بخطوة سريعه .. مسكلها يديها الزوز لقاها ترعش وتبكى ..
-حسين: حنان وين ماشيه وخيرك
-حنان: بوى باعنى ياحسين
-حسين منغير تفكير : وانا #شاريك
صارت لحظه صمت وقامت راسها وشبحتله.. رنت فى ودانها الكلمه
-حنان تبكى : تعرف شن داير توة
-حسين: اى حاجه دايرها توة وانتى مش راضيه عليها انا ح نوقفها …غير اهدى بالشوى وفهمينى خيره بوك
– حنان: جايبيين شيخ داخل ويبو يقرو فاتحتى على منير ولد عمتى
– حسين: وانتى شن اللى تبيه ويريحك وانا نديره
…تبى الفاتحه توقف !؟
-حنان: لا نبي الفاتحه اتم و تنقرا
– حسين مصدوم: يعنى انتى موافقة تنقرا فاتحتك
-حنان : ايه موافقه لكن مش على منير ولد عمتى..
-حسين: امالا على منو
-حنان: عليك انت لو كنت مزال موافق .. لان الموضوع هدا مش حيوقف ولا بوى حيهدا لين يزوجنى .. فخلينى ناخد القرار الصح ولو مرة فحياتى
-حسين شاف لصغار خوه: طبعا مازلت موافق
…امسحى دموعك وخشى .. وانت يا اكرم برة جيب بوك وتعاله
اكرم مصدوم من اللى قاعد يصير قدامه لانه مافى حد عنده علم بزواجت حنان من حسين الا سعد والحاجه ..
-اكرم: حاضر ياعمى اهو تو نجيبه ونجى

________________________

خش حسين للمربوعه متع المولدى
-حسين: السلام عليكم ياجماعة الخير
اللى فالمربوعه كلهم ردو السلام … والمولدى بدى يرعش .. عارف الموضوع بيخرب …
-يوسف: اهلين حسين تفضل
-حسين: زاد فضلك .. انشالله خير شن فى متجمعين
-المولدى: لا خير انشالله ..
ويضحك فى ضحكة صفرا : هاهاها شنو تبى حسونه اوليدى تفضل منبيش نعطلك ..
-حسين: لا مفيش تعطيل ولا شى ..غير عندك امانه تخصنى و نبى ناخدها
-المولدى: امانه شنو .. ايه ادكرت الالف جني باهى تو نجيبهولك .. تعالى بعتالى توة تشوف فيا مش فاضى
وهوا يتخضر ويتصفر عمك المولدى ?? ….
-حسين: لااااا الف شنو يا راجل .. انا الالف بنزيدك عليه .. نكمللكم المهر
-منير: مهر شنو يا محترم ..
-حسين: مهر المستورة بنته ربي يستر عليها
المولدى بدى يزرط فى ريقته … ووجهه الوان ?…
-المولدى: مانيش فاهم شى انا .. انت مش جيت وقلتلى الموضوع ماصارش منه
-حسين: وانت خيرك تصدق فى البصارة ..
ويتسهوك عليه : انا نبصر عليك ليلتها راهو وانت ماصدقت ???
-المولدى : معش فهمت شى حد يفهمنى
-حسين: انا جاى توة للشيخ المحترم اللى مقعمز قدامى ونبيه يقرالى فاتحتى توة ..
-منير: احترم نفسك واعرف قدر التريس ..
-حسين: قدرك محفوظ خوى لكن انت خاش ع الطريق بالعكس .. شن بنديرولك احنا
– منير قدام حسين وحط يديه فى نصه : اللى تتكلم
عليها هادى حب حياتى من زمان .. ووالله المرة هادى مانى متنازل عليها
-يلم حسين ايده ويعطى ل منير بونية على فمه خلاه كله دمايات : واللى تتكلم عليها انت توة هادى بعد شوى بتكون مرتى
-المولدى: يعنى انت جاى تخطب فى حنان ولا شن قصدك يا حسين
-حسين: انا حنان خاطبها من الاسبوع اللى فات .. انا توة جاى بنقرا فاتحتها ..اهو الشيخ مقعمز واتى ..
-منير: والله مانى مفوتهالكم ياخالى كان ترخى بيا حتى المرة هادى .. واللى نديره ليكم تو تشوفوه شنهوا
المولدى لقاها فرصه يفتك من منير ?? ..
-المولدى: تسب فيا فى حوشى يا منير.. والله ماك مربي
-منير: امالا كلمت التريس ساهله عندكم اطيح ..
-المولدى: ايه واطيح ووين المشكله
– منير: انت حلفتلى المرة هادى
-المولدى: تو نصيم ثلاثه ايام مش مشكلة
-منير: والله ماعندك طارقه يا خالى
وطلع من الحوش وطلعو معاه صحابه الزوز جايبهم بيديرهم شهود بالدرقه
-الشيخ : شنو يا جماعه نبدو على بركة الله …
-حسين :خليك شوى يا شيخ خلى يجى خوى سعد

________________________

اكرم وصل لحوشهم ..
خش لقى بوه وحناه خديجه مقعمزين فالجنان .. انخلعو الزوز
-سعد: خيرك روحت بسرعه ووين عمك
-اكرم : عمى فى حوش المولدى وقالك جيب الكتيب وتعاله
-سعد: يمى نوضى جيبيلى كتيبكم خلى نشوف شن فيه
– الحاجه: باهى واهو حتى انا بنمشى معاك
ركبو فى سيارة اكرم ومشو لحوش المولدى..
الحاجه خشت للنساوين …وسعد خش للمربوعه
حكت حنان للحاجه القصه اللى صارت كلها ..
-الحاجه: ربحتى يا بنيتة اللى وافقتى تلمى شملك على عم صغارك
_______________________

فالمربوعه …
-سعد : باهى احسن مادرتو حسين يا اوخى
– المولدى: تى ماهو مفروض مالاول.. عالاقل انتو اهل الصغار واولى بتربيتهم
– سعد: لكن تبى الحق يا مولدى مفروض توة انوضو انروحو عندنا غادى.. هادى فاتحت ولدنا تنقرا فى مربوعتنا
-المولدى: وراس ولد عمى ماك متحرك من مربوعتى ياسر من المقلب الاول اللى درتوهولى ..تبو البنت توة تقرولها فاتحتها …هيا ابدا يا شيخ
-الشيخ : اين وكيل العروس ووكيل العريس
-حسين: وكيلى سعد خوى
– المولدى: وانا وكيل بنتى .. واهما اكرم ويوسف الشهود
” المولدى كل شى يبيه فيسع فيسع ???”
بدى الشيخ يساوى فى اوراق قراية الفاتحه …
-وتلفت للمولدى :سامحنى خوى المولدى بس حسيته فى تلخبيط فالموضوع وركبنى شك .. لازم نسمع موافقت العروس بودنى
– المولدى: يوسف نوض قول لاختك تجى بحدا الباب
ناض يوسف ناداها …جت ورا الباب .. ناض الشيخ ورا الباب
-الشيخ: يابنتى الاخ حسين عبدالحفيظ يريدك زوجة على سنه الله ورسوله
حنان قعدت ساكته شوى..وحسين متلفت جيهت الباب اللى هيا واقفه وراه .. .
وبعتالى تكلمت …
-حنان: موافقه
ابتسم حسين وتلفت الجهه الثانيه ..استريح ان حنان بنفسها موافقه مش واخدها مغصوبة عليه
-الشيخ : اداً على بركة الله ..
وبدا يقرا فالفاتحه… وكملو …
وخش يوسف لامه خيريه وقاللها ياااام قرينا الفاتحه
وبدت عمتك خيريه تزغرط ..
-حنان: باهى خلاص اسكتى ياعمتى
-خيريه: وخيرك متحشمه بنزغرط هدا حلال ربي
خلى نمشى نسقى الكسكسى .. ارمى ملحه فيه ماتدرى عاللى يواتيه طيبناه لناس وكلوه ناس ثانيه .. اصحيحه
سلمت الحاجه على حنان: سلم بنيتى ولت لحوشها هيا وصغيويرتها

_______________________________

سقت خيريه العشى ..وتعشا الشيخ والرجاله اللى فالمربوعه ..وحطت للحاجه منه شوى تعشت …
وطلعو حسين وخوه سعد بيروحو ونادو الحاجه …
-المولدى بضحكه صفرا: ههه وحنان امتى بترفعوها
-سعد: اهدا يا مولدى الموضوع توة عند حسين انت مش بتوريه
-المولدى : باهى ديرو رايكم ..
طلعت الحاجه ..وسلمت على حسين وباست على خدوده: سلم وليدى ومبروك عليك
-حسين: الله يبارك فيك يا حاجه ..
وتلفت للمولدى: هيا نستادونك توة

___________________

حنان خشت لدارها هيا وصغارها وتفكر …
وتفكر … وتفكر….
هل اللى داراته صح ولا غلط
فاقت على تليفونها يشرين …شافاته …
لقت حسين يتصل بك
تحشمت وماقدرتش اترد …
عاود مرة ثانية .. ويتكلم فى خاطره : ردى بلا دلع
شرين تليفونها مرة ثانيه .. عطته لامولا قالتلها قوليله ماما فالحمام
-حسين : الو
– امولا :اهلين
-حسين : حبيبتى امولا عطينى ماما
-امولا : قالتلى ماما قوليه انا فالحمام
-ضحك حسين من قلبه على برائتها: قوليلها عارفك فالدار ردى عليا
-حولت امولا تليفون من ودنها :قالك عارفك قاعدة فالدار ردى عليا
خدت حنان التليفون من امولا وردت
-حنان : الو
-حسين: خيرك متبيش تردى
-حنان بحشمه وصوت واطى: لا غير مكنتش فالدار
-حسين:باهى نقدر نقولك مبروك والا لا
-حنان: قول اللى يعجبك
-حسين: باهى الف مبروك يا عروسة مهما كانت الظروف
حنان ساكته وماردتش .. لانها مش متعودة عالكلام الرزين الحنون .. فمتعرفش ترد عليه

المهم ماعلينا …

-حسين: نبى نجيكم غدوة عندى كلام نبى نقولهولك
-حنان : تفضل عادى مرحبتين بيك
-حسين: وانتى فكرى فاللى تبى تشرطيه
-حنان: انا مانبى شى غير صغارى يقعدو معاى
-حسين: تمام غدوة نتلاقو انشالله
-حنان: ليلتك سعيدة

______________________

فى حوش اهل حسين الدنيا تهوج وتموج …اللى مصدوم واللى رافض ..واللى فرحان ..واللى مش مصدق …
-فاطمه: انتى تتكلمى بجديات يمى ولا تبصرى
-الحاجه : والله جديات .. وتوة قرينا الفاتحه وروحنا
-مفيدة: لكن هدا ظلم ل حسين
– الحاجه:يابنيتى هدا نصيب..ومفيش ظلم فالنصيب
..وحنان عرضنا عليها ورفضت .. لكن لما بوها بيزوجها عم صغارها اولى
-عزيز : ومن امتى الراى هدا وكيف مسمعناش
-امال: والله كنت حاسة ان فى شى
-سعد: حنان على اى حال بنتنا مالاول مش اليوم احنا بنعرفوها
والشباب متع العيلة دايرين تجمعات ويوشوشو .. ويسألو فى اكرم كيف صارت الحكاية مالاول واكرم يحكى على سيارته اللى عمرها ما وقفت واول مرة اديرها لان فى نصيب بين حسين وحنان
والبنات متجمعات .. اللى ادم فى حنان واللى تشكر
عالمهم دوشه صارت ليها اول ماليها اخر

__________

________

حسين ماباش يروح عارفهم بينفخوله راسه …
قعد يدور فى سيارته ..
مشى جهت حوش المولدى لقى ضى الدار متع حنان اللى فالجنان مزال والع…
قعد يدور فالسيارة ورقد فيها ..
ناض على ادان الفجر .. مشى للجامع صلى ..
وروح للحوش .. خش يبي يبدل حوايجه ويطلع .
-امال لقت حسين قدامها اضبطاته: وخى حسين مبروك عليك
-حسين: الله يبارك فيك امولتى
-امال: نقولك حاجه
-حسين: قولى
– امال: صدقنى مش راح تندم ..
-حسين: ربي يجيب اللى فيه الخير
-امال: امس فالليل خواتك كلهم كانو هنايا
-حسين: هدا علاش مروحتش عارفه اجتماع مجلس الامن ???
-امال: ???
-حسين: باهى ديريلى فطور .. بندوش وبنطلع
-امال: من عيونى ياعريس ?

__________________________

طلع حسين الساعه 9 من حوشهم …
كلم حنان ..
-حسين: شنو نجيك
-حنان صوت دوشة جنبها : انفطر فالصغار .. اعطينى ساعه ثانية وتعالة
-حسين: من عندكم
-حنان: خواتى كلمتهم من امس فالليل قلتلهم وجونا اليوم الصبح
-حسين: تمام ساعه ونجيك

___________________________

توة زعما شن بيقول حسين ل حنان …

وشن بيشرط عليها ….

نكمللكم فالحلقه الجايه …
?????

________________________________
__________________________________

.
.
.
.
.
تعرفو حسكم سخفتونى ..وشن بيصبركم لغدوة … نكمللكم توة وامرى لله …
???????

__________________________

فاتت الساعه …
درس حسين سيارته قدام حوش حنان ..
نزل من سيارته لابس نضاراته
وينادى:يامولدى .. مولدى
طلع عمك المولدى.. اهلن حسونه نسيبى آنستنا ..
خش للقراج ..
وفتحله المولدى باب المربوعه : تفضل خش
-المولدى: بلغتنى حنان قالت انك بتجينا اليوم
-حسين بابتسامه صفرا: باهى ناديها
– المولدى: تشرب قهوة ولا شاهى
-حسين: قهوة ناقصه سكر
-المولدى : هيا شوى بس
وطلع من المربوعه .. وخشو امولا ورياض سلمو على عمهم .. طلع شوكالاتات من جيبه وحلوة وعطاهملهم -حسين: اعطو حتى لصغار خالاتكم …
لبست حنان عبايتها ووشاحها …ويداها يرعشو
-قمرة: خيرك ترعشى ياحنان
– حنان: مش عارفه
– احلام : حنونه وخيتى التريس مش زى بعض راهم
حنان ساكته وخلاص ..
خشت للجنان جهت المربوعه …وطقت على الباب
حسين قدامه قهوته: تفضلى
خشت حنان .. وقف حسين .. مد يده .. سلم عليها ..
?? تعرفو يابنات شوره الراجل والمراءة لما مايربطهم شى يتكلمو بشكل …ولما يكونو متزوجين ومرتبطين يتكلمو بشكل ثانى وبشعور ثانى …مش بالضرورة يكون شعور حب… المهم الشعور يكون ان الحاجه هادى ليا .. وانا مسؤل عليها ..

??? خيرنى بديت نتفلسف …

المهم ماعلينا خلى نرجعو لحكايتنا …

خشت حنان ووقف حسين سلم عليها : تفضلى
قعمزت حنان فالكرسى الثانى
-حسين: اول شى الف مبروك عليك.. ثانى شى انشالله ماتندميش
-حنان: انشالله ياااارب
-حسين: ليش تدعى وتقولى انشالله يااارب شكلك متوقعه انك حتندمى ….وضحك
-حنان: لاااا مش هكى… وضحكت
-حسين: نبيك ديما تضحكى وما ادورى شى مدامك معاى ..
-حنان: قلت تبى تشرط … يلا نسمع فيك
-حسين :هما مش شروط .. بس هوا توضيح لكيفيه حياتى .. وحدود تدخلك فيها
-حنان : كيف
-حسين : انا انسان نخدم فى شركه نفطية فالبحر وديما نسافر…ومش متعود حد يقلقنى ولا يقولى وينك ولا خيرك ماروحتش
-حنان : وانا مفروض لا نسالك وينك ولا ليا حقوق عليك
– حسين: كلامى مفيشى زعل
-حنان: ومن قالك انى زعلانه.. بس مدامنا دكرنا الحقوق .. حتى انا منقدرش نعطيك كل حقوقك
-حسين : كيف يعنى
– حنان: يعنى حقوق الراجل على مرته
-حسين: انتى تقصدى الفراش
حنان واطت راسها بمعنى ايه
-حسين: وانا مسامحك فيه .. اصلا انا كنت ناوى الشى هدا منغير ماتطلبيه
لانبى نلمسك ولا نبى عليك حق …لكن انتى لا تسألنى وين كنت ولا هادى منو اللى معاك
-حنان:حاجه وحدة .. تسترنى قدام سلفاتى وحمواتى .. منقعدش عزار قدامهم .. ويقولولى راجلك يتبع فالنساوين
-حسين: وموضوع رقادى معاك يقعد سر بينى وبينك
-حنان: يقعد سر لين نموت
-حسين: نقعدو اصدقاء وما ادرقى عليا شى
-حنان: مستحيل ندس عليك حاجه
-حسين: تسكنى فى حوشى انا اللى بانيه .. مش حوشك القديم
-حنان: باهى
-حسين: انا مهناش تاخدى شيرتك من خوى سعد ..ولما انا فى ليبيا تكلمينى بالتليفون تشاورى
-حنان: تفاهمنا
-حسين : متفاهمين …جهزى نفسك يوم الثلاثاء بنجى نرفعك انتى والصغار ..الحوش ناقص هلبا حاجات ناخدهم ونجى نرفعكم
ااه ونسيت …حنعطى مبلغ لبوك يعطيهولك واشري كل اللى ناقصك
-حنان: مسامحنى
-حسين: مسامحك .. لكن على شنو
-حنان: انها انكتبتلك جوازة بلا شى
-حسين: ربي كريم ونقدر لو نبى نتزوج زوز وثلاثه واربعه
-حنان: وانا مسامحاتك .. اتزوج وربي يباركلك

-حسين وقف: نستادن توة
-حنان مع السلامه ..

___________

نحبكم❤