رواية قلبي شاريك كاملة

#قلبي_شاريك❤

الحلقة الرابعة والثلاثون
والاخيرة

قام حسين راسه من على يداها

وحط يده اليسار في ايدها اليمين وشبكها بيها

وفجأة حس انها حركت صبعها السبابه وتمس فيه

فرح

وقف ينادى

يادكتووور .. يادكتووور

جت الممرضه تجرى: اطلع برة لو سمحت

-حسين: والله حركت صبعها.. والله والله

جى الدكتور يجرى خش للغرفه هوا وزوز ممرضات ولحقهم ممرض… يجرو

وسكرو الباب وخلو حسين واقف برة

__________________

الدكتور شاد فى يده كاشف اضاءة صغير وموجهه على عينها ..

قعد يشبح اكثر من خمسه دقايق فى عيونها

والممرضه من الجهه الثانية تقيس فالضغط

-تلفت الدكتور للممرض اللى معاه: بالفعل الاعصاب تحركو ..

-الممرض : الباين عطت اشارة انها حاسه

-الدكتور: معجزة يا سبحان الله ..

-الممرضه: حتى ضغطها ارتفع حاجه بسيطه

_______________

طلع الدكتور .. لحقه حسين يجرى

-حسين: شنو يا دكتور

-الدكتور مبتسم وسعيد : معجزة خوى .. بكل المقاييس ?..
هادى اللى يقولو عليها ماتت وناضت حية

-حسين: فهمنى اكثر يا دكتور مش فاهم

-الدكتور: الباين ان الدماغ قاعد يخدم وبدى يقوا ويعطى فى اشارات للاعضاء..

-حسين: يعنى فى امل يا دكتور

-الدكتور : الامل ديما فالله

-حسين: بنطلب منك طلب يا دكتور يقعد الامر سري بينى وبينك .. انت تعرف الحاجه كانا طلعت معش يصيرش منها ..
وانا بنحاول نحافظ عليها بأى طريقه..

نبيها تعيش .. ساعدنى تربح يا دكتور

-الدكتور : حاضر زى متحب

-حسين : وامنع الزيارات والحضور

-الدكتور: تو نبلغ الممرضات يبلغوهم

_________________

وبالفعل منعو الدخول جهه الممر اللى فيه حنان

وحسين بيش يبيهم يروحو قاللهم ارفعو معاكم الصغار غادى

وعطى مريم لامه قاللها بنتى فى امانتك

وروحو الجميع ..

وقعد حسين فالعيادة

طبعا لحيته تقول داعشى

وحنان نتكست حالتها ثانى ..

ماتقدمتش زى ماكان متوقع حسين

طلب منهم انه يبات معاها كل ليله

وبالفعل الدكتور عطاه الادن وخلاه يبات معاها

وكل ليله يحكيلها على صغارها اللى بيكبرو ..

وعلى الحب اللى نولد بكل براءة بيناتهم

_____________________

بعد اسبوع …

حنان حركت رموش عينها ونزلت منها دمعه

خلاص …

الدكتور اكدله ان مفيش ضمور فى خلاياها

وان معاها معاها حتستجيب للعلاج

وطلعت تأشيرة المانيا

وبلغ العيله انه بيسافر بيها برة

جو كلهم شافوها وهيا مازالت فى غيبوبه

وصل المانيا حطها فى مستشفى كبير

و قعد يعالج فيها …

_____________________

بعد ثلاثه شهور

فاقت حنان من الغيبوبة

فرح حسين .. ويتصل باهله كلهم والارض مش سايعاته من الفرحه

وبعد شهر …

روحو حسين وحنان لى ليبيا

كان يوم اربعاء

صغارها فالمطار يراجو فيها ..

حتى مريم جابوها معاهم كبرت عمرها قريب 6 شهور

روحت لحوشها اللى بحدا عزوزتها

وماقعد عليها حد فالدنيا ما جاهمش

لان طلعت اشاعه انها ماتت.. والناس معش زبطتها

ميته ولا حيه .. ففرحو لما سمعو انها روحت

__________

مقعمزين فالصاله

-الحاجه: الحمدلله بنيتى اللى خلاك ربي لصغارك

-حنان: الحمد لله

-حسين: لصغارها بس يمى .. لصغارها وليا وليك ولينا كلنا

-حنان تلعب فى بنتها مريم : مريومه حبيبتى ستاحشتك انتى وخوتك يا عمرى

امولا واقفه جنبهم …

توقعتها حناها بتغار على امها

وهيا بالعكس هههه

تلفت امولا لحسين وسالاته : باهى انت من تحب اكثر

-حسين: طبعا نحب امولتى حبيبتى اكثرر

وضحكو كلهم

مريم بدت تعيط

عطتها حنان لحناها وناضت

تبى اديرلها حليب ماهو معش ترضع منها

____________

خشت حنان للمطبخ

فتحت الثلاجه

جى وراها حسين .. حضنها

-حسين :امتى بتفضى ستاحشتك راهو

-حنان تضحك : ياحليلي منك انت متبيش تتغير بكل ??

-حسين لفتها لعنده وضحك: لا والله تغيرت

-حنان: وتحلف

-حسين: ايه والله تغيرت.. حبيتك اكثر ?

وباس شفايفها بوسة خفيفه بيش مايسمعهم حد

ضحكت حنان وتتكلم بالشوى : باهى غير اهفتواسترنا ..حاضر يا هم الليله نرقد فى دارى جنبك

-حسين: اسمعى راهو اكيد مش زى امبارح تجينى نص ساعه وتهربي

-حنان تضحك: يعنى الحاجه بايته عندنا نخليها بروحها

-حسين ضمها ويضحك: لكن الليله خلاص عطيتينى كلمه

-حنان: هيا من بكرى قالتلى قلقت وبتروح

-حسين: باهى نحبك وباسها

-حنان تضحك : باهى حول ياسرك

-حسين: اااه شن بيصبرنى لليل

ومشت حنان رفعت المرضعه دارت الشيشه لبنتها

_____________________

وفاتت سنين …

وجابت حنان زوز اولاد لحسين

واحد اسمه رؤوف… والثانى سموه سعد

وعاشو احلى حياة

وصغارها كبرو ورياض بيخش ثالثه اعدادى

وحسين شد مكان كويس فى الشركه النفطية الوطنيه

وعمره ما فرّق بين الصغار ..حاسبهم كلهم صغاره

❤❤❤❤❤❤❤❤❤

??????????
وهاااااادى قصه حسين وحنان

انشالله تكون عجبتكم ….

طبعا الحوار تأليفى .. بس خطوات القصه كلها حقيقيه .. والعائلة موجودة لتوة فى طرابلس وربي يهنيهم

____________________

فى نهاية القصه نبى نقوللكم
انك لما ترتبطى بشخص …فكرى بس كيف تكيفى نفسك معاه ….
سواء كان الشخص هدا معرفه سابقه وهوا حبيبك…او كان زواج تقليدى..او كان صاحب خوك ..

نحبككككككم ❤