رواية قلبي شاريك كاملة

#قلبي_شاريك❤

الحلقة الثلاثة والثلاثون

الحلقة ماقبل الاخيرة

طلعت حنان وحسين مشو للمشير شرو منه الباكوات متع الحلويات والبكلاوة

حسين ماسك فى يده الباكوات وحنان تمشى وراه قص حسين بسرعه وحنان قعدت واقفه

وقف على سيارته تلفت لقى حنان ماقصتش الطريق

قاللها اوقفى اهو توة انا نجى نفوتك

فتح كوفينو السيارة وحط الباكوات وحنان قصت الطريق بتلحقه

تلفتلها حسين اشرلها بيده انه اوقفى اهو بنجيك

و لكن هيا قصت خلاص .. وحسين يشبحلها

ويجى فرخ حرام راكب على موطو يجرى يضربها ينطرها سابع سما واطيح عالوطا

فى تنطيرتها حسين قعد يعيط ويقص فالطريق يجري

وصلها

قامها مالوطا

الناس هاجت وماجت وصارت هرجه وعياط والناس تلمدت ..

______________________

الناس بدت توقف فالسيارات اللى فايته

قامها حسين بين ايديه يجري بيها

قص الطريق رفعها لسيارته

واللى يتفرج ..واللى يجرى معاه .. واللى يقول يا نارى .. واللى يعاون فيه

الناس مزال فيها الخير وتعاون

قعد شادها حسين بين ايديه ويجرى

ووراه شباب ورجاله

فتحوله باب سيارته من تالى ركبها ..

وشباب قالوله خوى قعمز معاها واحنا نسوقو ..

ركب حسين جنبها متكى راسها على كتفه وهيا وجهها كله رايح دمايات ..

وهوا سوريته كلها راحت دم

وركبو الشباب الزوز من قدام وطارو بيها لعيادة المختار

حسين يبكى يا نارى ويكلم فيها يقوللها حنان .. افتحى عيونك .. حنان نوضى مدوخيش

هيا مش فى وعيها لكن تتكلم .. شادة كلمه وحدة بس …. صغارى .. صغارى ..

-حسين شادها على صدره : حنان متغيبيش عالوعى

-حنان تتكلم بصعوبة بصوت مش مفهوم : صغارى امانه فى رقبتك ياحسين

وغابت عالوعى ….

وصلو للعيادة .. قامها حسين بين ايديه

وخش بيها يجرى يعيط ..دكتووور .. نبو دكتورر

جو يجرو الممرضات وفى ايديهم سرير متحرك

قعدو يقولوله رقدها بالشوى عليها خايفيين من كسور

رقدها حسين عالسرير وايديه الزوز رايحين دم

ودخلوها يجرو وسكرو الباب فى وجهه قالوله ممنوع الدخول ..

يخبط فالباب .. ويقوللهم افتحو

والشباب اللى جابوه شادينه ويسكتو فيه

-حسين بدى يعيط : قولو لسعد .. نادو سعد

“ياسبحان عالعقل الباطن.. شن جاب اسم سعد فى دوخته هادى كلها .. بيش تعرفى انك فالمحن تنادى اكثر انسان متعلقه بيه منغير متحسى ”

-الشاب : من سعد يا خوى

عطاه حسين تليفونه ..

خداه الشاب وقعد يفتش ..

لقى مكتوب فالاسامى الاولى الحاج سعد

اتصل بيه

الخط ينادى

رد سعد : الو حسونه

-الشاب : خوى صاحب الرقم هدا مرته صارلها حادث وهوا فى عيادة المختار

-سعد: شن تقول انت ..

________________

حسين واقف قدام الباب ويبكى

واحنا الليبيين عاد عندنا عيب الراجل يبكى قدام الناس وخاصه على مراءة

لكن حسين مشاعره هيا اللى تحكمت فيه مش هوا اللى تحكم فيها ..

وهوا مسكتش .. والرجاله اللى فالعيادة كلهم واقفين عليه ويصبرو فيه

عطل الدكتور .. قريب ساعه او اكثر وحسين يمولج برة الباب

طلعت الممرضه ..

وقفها حسين : اختى زوجتى متع الحادث توة دخلتوها ومعش طمنتونى

-الممرضه: هيا فى غرفه العمليات خوى ..

-حسين مخلوع : علاش قصدى على شنو العمليه

-الممرضه: تو يطلع الدكتور ويكلمك خوى عن ادنك

ومشت …

بعد ساعه ثانية وصل سعد وعزيز واكرم

سعد يبكى ومش قادر حتى يمشى يرعش مع بعضه

خشو عزيز واكرم للريبسبشن يسألو

وسعد خش طول من الممر كمله لنهايته

لقى حسين واقف عالباب

-سعد يبكى: خيرها حنان يا حسين

حسين تفاجى بالصوت تلفت يلقاه سعد ..مشاله يجرى اضبطه وقعد يبكى

جو عزيز واكرم سلمو على حسين

قعمزو سعد عالكرسى يانارى يرعش باللى فيه

قعد حسين يحكيلهم عاللى صار

تليفون حسين يشرين .. ماشافش من المتصل مده لاكرم

خداه اكرم لقاه احلام تتصل

رد عليها

-احلام : الو من معاى هدا رقم حسين ولا

-اكرم : اهلين عمتى احلام انا اكرم ولد خوه

-احلام : شنحالك يا اكرم نتصل بحنان متردش

“شنطه حنان قعدت طايحه فى مكانها وفيها التليفون”

-اكرم: والله شن بنقولك يا عمتى احلام حنان صار معاها حادث وهيا توة فالعيادة

وبدت تعيط : حيه عليا وخيتى شن صارلها

جت الممرضه : وين زوج المريضه طالبه الدكتور

وناض حسين لحقها

_____________________

-الدكتور : احنا درنا اللازم وانشالله ربي يشبح فيها

حسين ساكت ومسهم ويشبحله

-الدكتور: الضربه جتها من جهه اليمين ..
ضربت الكلوة وصارلها نزيف ..

درنالها عمليه وقفنا النزيف ونزيدو فيها فى دم ..

بس ضغطها نازل هلبا وضربات القلب ضعيفه جدا

-حسين يطمن فى نفسه : بس هيا بالتاكيد حتعيش صح دكتور

-الدكتور: منكدبش عليك لو قعد ضغطها نازل هكى حيأدى الى توقف الدورة الدموية

ومعش حيوصل الدم للدماغ ..وحيتوقف عن الخدمه

-حسين: نبى نشوفها

-الدكتور: حاليا ممنوع .. بس بعد 4 ساعات حنخليهم يدخلوك اتشوفها

العيادة تعبت ..اسمع وافزع ..

بوها المولدى ومرته ..خواتها ورجالاتهم .. امال ..حفيظ ..احمد.. سالم .. الحاجه .. فاطمه ….

كل اللى سمع جى …

ومزال كل مرة يخش حد

مرام نزلوها فالحوش مع مئاب بيش يقعدو مع الصغار

وكلها فالعيادة تبكى ..دارو دوشه فالعيادة .. وخيضه

والناس اللى فالعيادة كلهم وجعتهم حنان

وفاتو الاربع ساعات على حسين كأنهم اربع سنين …

وناداته الممرضه هوا بس يخشلها 5 دقايق

وقف حسين قدام الباب يمسح فى دموعه ويقوى فى نفسه

خش للغرفه ..

لقى حنان راقدة ومغطييلها راسها بطاقية العمليات ..

عندها كدمه على عينها منفوخه شوى …وشاربها اللوطى مجروح وعلى فمها جهاز التنفس ..

وفى ايديها ايبارى التغدية والشكاير…

وجهاز القلب جنبها موصلينهولها ويدير فى صوت

تووت توووت ومداير خط متعرج حاجه بسيطه عالشاشه .. واضح ان نبضها ضعيف هلبا

قعمز فى جنبها ومسكلها يدها

حنان .. حبيبتى .. بتعيشى ولا .. بتفرحينى ولا ..

مش قلتيلى حياتى بدت من يوم عرفتك .. مش

لبستيلى فيلو .. مش قلتيلى انا حبيبتك ..مش قلتيلى

احنا حنقعدو معاك طول العمر …

حبيبتى متخليش حياتك توقف ..

ولا توقفى حياتى اللى دخلتيلها الفرح بوجودك …

مزال بنكبرو

وصغارنا بيكبرو وبنزوجوهم .. امولا من بيديرلها

عرسها وبيقضيلها وبيلبسها الفيلو ..

رياض واحمد من بيدخلهم عرسان ..

ومريم من بيرضعها .. من بيكبرها .. من بيوقفها ويعلمها المشى .. ..

وانا ….

انا اللى تغيرت حياتى كلها بعد خشيتيها ردى بالك تخلينى

نزل على يدها ويبكى ..ردى بالك تخلينا بروحنا

احنا محتاجينك .. احنا الخمسه محتاجينك ردى بالك ترخى بينا

وفتحت الممرضه الباب …

خلاص خوى الدكتور قال 5 دقايق

باس حسين على يدها ..

وطلع

نزل بحدا خوته …

سعد مقعمز على يمينه .. وفاطمه مقعمزة على يساره

ويصبرو فيه وهما بروحهم يبو من يصبرهم

وبوها يانارى عمك المولدى..شاد لقاحية فى يده ومتكى راسه عليها

وشاد غير كلمت سامحينى يابنيتى .. ومقعمز جنبه

خوها يوسف….

والكل يبكى ومتأثر

جت الممرضه : الدكتور قال الساعه 11

والمريضه فى غرفه العنايه ومفيش داعى لقعادكم هنايا

__________________

فاطمه : حسين نوض روح معانا سلم وخى

-حسين دموعه نازلات ومسهم عيونه : وشن بنقول لصغارها …

-فاطمه: هادو صغيويرة يا وخى ويتزلبحو بأى كلمه

-حسين:بنزلبحهم شن بنقوللهم اهى جايه .. اهى بطق الباب وبتخش ..

اضبطاته فاطمه وقعدت تبكى وجعوها الصغار

وناضو كلهم روحو لحوش حسين ..

الا حسين قعد … وسعد قد ماشدو فيه ماباش يروح

وبعتو لحسين حوايج بيش يغير لان حوايجه كلهم دم

جابو الشباب الحوايج وقعدو الشباب فالسيارة بايتين

وحسين وسعد فالعيادة

_____________

الصغار فالحوش تفاجئو بالناس هادو كلهم اللى جايينهم

-امولا تكلم فى حناها خديجه : خيركم جيتونا كلكم

-الحاجه: جايين نشبحو فيكم يا بنيتى

-امولا : وين بابا وماما

-الحاجه : تو يجو يا بنيتى ..ترا شن يشرو غير عطلو

______________

الصبح خشو ناجى وكمال يجرو

اضبطو حسين .. وهوا لما شافهم غصراته العبرة وبدى يبكى لانهم هما الزوز شاهدين على قصته معاها اولا باول …

-ناجى يشبح لاكرم: معقولة متبلغوناش من امس ..

-كمال: والله سمعنا غير توة

وقعدو يحكو مع حسين يبو يفهمو القصه كيف صارت

وبعد نص ساعه

-حسين: اهو بعتت حفيظ يجيب فالجواز برة توة للسفارة ديرلها التأشيرة

-ناجى : اصلا تأشيرة العلاج اسهل تو يحاولو يسرعونا فيها ..

-سعد : انت وين بترفعها

-حسين: المانيا

-كمال: انشالله ربي يحفظهالك وتروح بيها سالم غانم

-ناجى: لكن بتصبر عالاقل 18 يوم بيش تطلع التاشيرة

جت فاطمه واحلام والحاجه مع حفيظ لما جاب الجواز

قعمزو قدام الغرفه بحدا حسين ..

وحنان فالغرفه ممنوع حد يشوفها ولا يزورها

وعلى قد ماشدو فى حسين يروح مايبيش

يخش لحمام العيادة ويصلى فالمكان المخصص ويبات عالكرسى

والجواز مزال يبي وقت بيس تطلع تأشيرته

وحالتها مفيش تحسن

__________

خامس يوم …

الدكتور طلب حسين ..

خش حسين للغرفه ومعاه سعد

قعمز ..

-الدكتور: منبيش نكدب عليكم فى حالة المريضه .. ونبى نحطكم فالصورة

حسين بدى يرعش

-سعد : خير يادكتور

-الدكتور : يؤسفنى نقوللكم ان ضغط الدم غير ثابت مما ادى لتباطئ وصول الدم للدماغ بشكل متقطع ..

واليوريا راكبة عليها هلبا لان الكلوة حكم توقفت عن الخدمه …

-حسين يرعش: مفهمتش قصدك دكتور

-الدكتور: يعنى هيا اكلينيكيا ميته .. قاعد غير النفس الصناعى يخش منها ويطلع وخلاص

وقف حسين يبكى .. يعنى هيا ميته ولا حية يادكتور

-الدكتور: النوع هدا احنا نسمو فالمريض
” مات اكلينيكيا” ..لكن منقدروش انحولو التنفس الا بادن اهل المريض

وانا حبيت بس نحطكم فالصورة

طلعو حسين وسعد يبكو

حسين قال للدكتور مستحيل نسمحلك اتحول التنفس الصناعى عليها لو مهما ادير ..

ويعيط يا ناجى شن صار فالجواز

___________________

بعد اربعه ايام …

حنان ليها 9 ايام ..

والصغار يسألو وين ماما وبابا

وحسين مافارقش العيادة حتى دقيقه

وجهه نبت لحية

وحنان شافها مرة وحدة بس

ممنوع دخول اى حد عليها

الدكتور زاد كلم خوه سعد ..

واقتنعه

انه زايد قعاد التنفس الصناعى عليها … لانها حكم متوفيه
وانها مصاريف زايدة عليهم ..
هيا العيادة مادا بيهم تقعد ويقعد الدفع ..
قاله لكن اخلاقيا لازم انحطك فالصورة
ان مفروض انحولو التنفس الصناعى عليها ..
حرام عليكم تعدبو فيا بالاجهزة وخلاص

_________________

سعد مقعمز جنب حسين وياخد فيه بالسياسه

-سعد : يا وليد سيدى حنان عمرنا وعمرها عند الله . واحنا مش بنعاندو ربي

-حسين: ساكت

-سعد : الدكتور قالك انهم متوفيه ريحت نفيسه تخش وتطلع منها وخلاص

-حسين ناض زى الغول : انت تقول هكى يا سعد .. وداير روحك طيب وداير روحك تحبها وتبينى نقتلها بايدى

-سعد : يا اوخى

-حسين: مانيش خوك مدامه هدا كلامك .. انت يا سعد .. انت … انت تقول هكى

-ناجى: معليشى عمى سعد هوا اعصابه تعبانه

-سعد: مانيش مواخده فكلامه يا ناجى ..خلى يقول اللى يعجبه .. لكن حنان ماتت ماتت

جاه حسين يجرى : معش تقولها .. معش تقولها الكلمه هادى

مد سعد يده .. واضبته حسين وقعدو يبكو الزوز

المولدى يبكى: غير جيبولها صغارها يشمو صنه امهم قبل مايفارقوها

وياخد حسين تليفونه ويحدفه عالحيط يتكسر طرف طرف

-حفيظ يبكى متأثر من الموقف: عمى خلى نمشى نجيب الصغار يشوفوها

-حسين: لاااا متجيبهمش لااااا

-سعد: يا راجل خليهم يشوفو امهم اخر مرة

-حسين قعمز عالكرسى وحط يده على راسه : معش تقول هكى يا حاج حرام عليك

-كمال: بالشوية عليه يا جماعه

-سعد: الكلام هدا مايقدر حد يقولهولك الا انا.. ويبكى .. شن تحسابوها هاينه علينا راهى بنتنا ..
لكن هدا قضاء الله وقدره …وهدا كلام الحق

وانا قلت لحفيظ جيب الصغار

-حفيظ : شنو عمى نجيبهم ولا شنو

حسين سكت

-سعد : برة يا راجل جيب الصغار يسلمو على امهم

وحسين انهار بالبكى شادينه ناجى من جهه وكمال من جهه الثانية

___________________

روح حفيظ للحوش كلم اخته مرام توتى الصغار ..

نزلتهمله ورفعهم

وصلو للعيادة

خشو للممر

لقو عمهم سعد وبوهم وجدهم المولدى مقعمزين عالكراسى

حسين شافهم نط جى واقف

مشاهلهم يجرى

نزل على ركابه

حضنهم الثلاثه وبدى يبكى

وهما مش فاهمين

مشى حفيظ للممرضه يبلغ فيها انهم جابو الصغار بيش يشبحو امهم

“يارووووحى عليهم ?”

-احمد: وين ماما قالنا حفيظ بنشوفوها

-حسين يبكى : ماما راقدة فالعيادة

-رياض: مش قالونا ماما مسافرة

-امولا : خيرها ماما مريضه وخيرك انت تبكى

-حسين: ايه مريضه يابابا

-امولا: بتموت?

حضنها حسين ويبكى : لا بتعيش على خاطرنا

جت الممرضه وقالتله خشو لكن متعطلوش …

خش حسين والصغار …

-رياض بدى يبكى جى بحدا راسها : ماما خيرك هكى دايريلك فى فمك

جى حسين بحدا رياض : احكي لماما شن درت فالروضه

-رياض: اعطونى واجب ..ولما انتى سافرتى قعدت معانا مرام رسمتهولى ..
وقالولى الاسبوع الجاى بيديرونا حفله احنا والامهات

-حسين: شفتى كيف رياض محتاجك يبيك تمشى معاه الحفله …
و رفع امولا فغمره ويبكى : امولا لما بتكبري بتتزوجى..

-امولا تضحك: ايه مش قلتلى انت بديرلى عرس كبير

-حسين يكلم فى امولا : وتبى ماما تحضره

-امولا : ايه

-حسين: تحبى ماما

-امولا : نحبك انت وماما ومريم اختى

تلفت لاحمد: وانت يا احمد

-احمد: نحب ماما اكثر وحدة

-حسين يبكى : باهى كلموها وقولولها هيا نوضى روحى معانا

-الصغار مع بعضهم : نوضى يا ماما ..هياااا

وبدو يبكو ..

قعد حسين يمسحلهم فدموعه بايديه

وخشت الممرضه بطلعهم وخش معاها سعد سمحله الدكتور بالدخول

خش سعد باسها على راسها ويبكى : ربي يسترك يابنيتى وين ما تمشى ..
مستورة ومغفورة انشالله
طلع سعد وخش المولدى شبح بنته وسامحها ..وباس على راسها وطلع

وقعد حسين فالغرفه وماباش يطلع

_______________

الدكتور واقف قدام الباب: هادو صغارها

-سعد: ومزال عندها بنية كيف مولودة فالحوش

-المولدى يمسح فدموعه : كيف امورها توة يا دكتور

-الدكتور: هدا اليوم تاسع .. والقلب وقف مرتين وانعشناه الايام اللى فاتو

-سعد : بالك امورها تتحسن يا دكتور

-الدكتور: محتاجه معجزة يا شيخ.. حالتها تعتبر خلاص منتهية كل اعضاءها متوقفه عن الحركه

-سعد: فى حالات زيها وعاشو

-الدكتور: العمر فى ايد الله مش فى ايد العبد

تلفت للممرضه : خلى زوجها يبات معاها الليله مفيش مشكله

“الدكتور متوقع انها الليله الاخيرة ليها ”

خشت الممرضه لغرفه حنان وقالت لحسين ان الدكتور بلغها لو يحب يبات معاها الزوج مفيش مشكله

وقعد حسين طبعا معاها ..

وطلعت الممرضه لسعد والمولدى قالتلهم مفيش داعى لوجودكم يفترض انكم تروحو

__________________

حسين مقعمز فالكرسى اللى جنب حنان

ويكلم فيها…

ويبكى

حنان … حنان ..

اسمك حنان .. وانتى حنان ..

تبى تمشى وتخلينى .. ..

بعد شنو .. بعد ماخليتينى نحبك .. بعد ماخليتى

لحياتى معنى بوجودك ..

وصغارك ..لمن تبى تخلى صغارك

ليا انا .. هما فالحفظ والصون .. ومسكنهم فعيونى من داخل …

لكن يبوك ..يبو ام تربيهم

انا ربي ستر وطحت فوحدة حنت عليا ودارتنى وليدها ..

لكن انتى منين تضمنى لصغارك انهم يتربو عند

وحدة تحن عليهم ..حتى لو كانت امى خديجه

قرب يده من خشمها ..شمى صنه دموع صغارك

شمى صنه دموع صغارك
بتخليهم يعيشو يتامى .. لاااا ردى بالك

وقعد شاد يدها ويبكى

حنان .. حنونه نوضى تربحى

بس نقولك حاجه

قلبى اللى شاريك والله ماتخشه وحدة غيرك

وحوشى اللى عمرتيه والله ماتعمره وحدة غيرك

نزل يدها عالفراش …وحط راسه عليها

ويبكى

يبونى انحى التنفس من عليك .. يبونى نقتلك بايديا

حنان .. حنى عليا ونوضى..

وهوا حاط راسه على يدها

بدى يقرا عليها فالقران

ايه الكرسى.. نهايه البقرة .. سورة ياسين .. المعودات ……

ويبكى

ويبكى

ويبكى

قام راسه من على يداها

وحط يده اليسار في ايدها اليمين وشبكها بيها

وفجأة حس انها حركت صبعها السبابه وتمس فيه

فرح

وقف ينادى

يادكتووور .. يادكتووور

__________________

زعما حق صبعها تحرك ولا حسين يتخايل

زعما حنان بتعيش ..
ولا بتموت لان الدكتور مش عاطى امل بكل

دهشت وبكيت وانا نكتب

واللى بكت وهيا تقرا تعترف

عموماً

الحلقه الجايه الاخيرة