رواية قلبي شاريك كاملة

#قلبي_شاريك❤

الحلقة واحد وثلاثون

رياض: حقه بابا امس جت وحدة ادور فى جارنا وتعيط ..وحتى هوا اسمه حسين

-حسين: من جارنا ..وكيف عرفتو ان جارنا اسمه حسين

-امولا : ماما قالتنا

-رياض يضحك: صورتها لما تعيط

-حسين: ترا هات الايباد نشوفها

وجاب رياض الايباد وتفرج حسين ..
وفتح عيونه متفاجئ ..

حسين يتكلم فى خاطره

باهى وخيرها حنان ماقالتليش .. غريبة علاش قعدت ساكته …وليت طرطور انا امالا .. قصص تصير فى حوشى ومانسمعش بيها

هه عموما لو كان غارت راهو تكلمت .. لكن اللى بيغير لازم يكون يحب بيش يغير ….

يلاااا براحتها الحب مش بالسيف ..وحتى عشان فرق العمر اللى بينا منلومش عليها

“معقده فرق العمر اللى بيناتهم ??”

-امولا قطعت عليه افكاره : بابا بنمشو لماما ولا

-حسين حامق : هيا وتو روحكم خلى نرفعكم غادى

وطلعو من الشقه ونزلو مشو للعيادة

خشو لدار احمد لقوه بروحه

-حسين: وين ماما

-احمد : نادى عليها الدكتور توة

-حسين: باهى اقعدو هنايا بحدا خوكم نمشى نشوف ماما ونجى

طلع حسين للممر لقى حنان جاية من نهاية الممر ولما شافت حسين جاته تجرى وحضناته وفرحانه

لكن هوا ماحضنهاش

قعد يقوللها انشالله خير

طبعا هيا حست ان حسين محضنهاش لكن من فرحتها بالخبر مانتبهتش كويس

-حنان: جى التقرير من فرنسا واحمد مطلعش عنده التهاب سحايا الحمدلله

فرح حسين : الحمدلله يا رب كنت خايف منه هلبا
.. قصدك طلع التحليل غلط .. امالا شن عنده

-حنان: هوا اللى عنده التهاب .. لكن نوعه مش سحايا .. والحمدلله المضاد اللى ياخد فيه بيستمرو عليه .. توة ليه 4 ايام ياخد فيه مزاله يومين بس ويزيدو يديرو تحليل ثانى ويبعتوه

-حسين:معناها بيعطوه خروج بعد يومين

-حنان: قالى الدكتور مدام ساكنين قريب تقدرى تروحى بيه ..وتجو على مواعيد الابر لانه بدى ياكل ابيض

-حسين: وانتى شن تبى تقعدى بيه ولا تروحو

-حنان : لاا خلاص تعب وليدى من رقدة المستشفى
نطلعو ونبدو نجو يضرب المضاد وخلاص

-حسين: باهى زى متحبى

وجى ماشى يبي يشوف الدكتور

-حنان : حسين

-حسين تلفتلها : نعم

-حنان : فى حاجه

-حسين : لا

ومشى للدكتور بيش يفهم منه مزبوط

حنان حست ان حسين جاف معاها ..

وعلى طول طبعا جتها الافكار الغبيه متع كثرنا عليه انا وصغارى والمصروف هلبا من حقه يتكنطى..

وهوا زعلان لانها دست عليه جيت البنت.. واعتبرها دليل واضح على انها متحباش

وطلعو حنان واحمد من العيادة

روحو للشقه

طبعا حنان ساكته ومتحسسه من سكات حسين

وحسين ساكت ومتحسس من سكات حنان

________________

طبعا العيلة كلها تتصل بيهم وتسال

سكر حسين من العويلة جاه اتصال

-حسين: الو .. اهلا ياراس .. تم .. امتى الموعد .. تم زبطت المكان ..

اسمع..

متنوضش لين انا نوصل باهى .. تم صحيت واكيد حقك محفوظ

-حسين: نطلع نجيبلكم غدا ولا تطلعو معاى نتغدو برة

الصغار يشبحو لحسين وساكتين

-حنان: لا اهو بنطيب انا هنا

-حسين: شن بطيبي .. ليش التعب تو ناكلو من برة وخلاص
والحاجات اللى جبتهملك طيبي بيهم لاحمد بس لانه اكله ابيض

-حنان : اكل الشارع ايمرض والصغار ليهم قريب اسبوع ياكلو من الشارع

-امولا : لا لا مانمرضوش احنا يا ماما خلينا نطلعو

حسين حس فى حاجه

سكت وقعمز عالصالون

ونادى امولا قعمزها فى حجره يلعب فيها ويجبد منها فالدوة ??

-حسين: خيركم سكتو لما قلتلكم هيا نطلعو

-امولا : ماما قالتنا معش فى طلوع وشرى

-حسين: امتى قالتلكم

-امولا : بكرى الصبح قالت خلاص ممنوع الشرى والصرف
وناكلو فالحوش وكانا قال بابا نشرو قولوله لا منبوش..

حسين رقاله الزيت معش يشبح فى حتى حاجه

خدى جهاز التلفزيون وفتح طيور الجنه على اعلى صوت ..

وقعمز رياض وامولا قدام التلفزيون وعطاهم ايباداتهم

وخش للمطبخ ونادى حنان بصوت عالى

حنان نخلعت ..تلفتتله لقاته فم الباب واقف زى الغول

-حسين: طفى الغاز والحقينى يا هانم للدار

خش حسين للدار الفاضيه ..لان الدار الثانيه راقد فيها احمد

لحقاته حنان ترعش مع بعضها

خشت للدار

سكر وراها الباب بالمفتاح

-حسين: قعمزى عالسرير

-حنان مغصور صوتها : نسمعك فيك حتى وانا واقفه خيرك شن تبى

-عظ حسين شاربه وشبحله بغضب وقرب وجهه منها : لمانقولك قعمزى شن معناها

مشت حنان تجرى قعمزت ..

جى وقف مقابلها وحط ايديه فى نصه

قاللها: انتى كيف تقولى للصغار ماتتطلعوش مع حسين

حنان بدت ترعش حست انها غلطت

فمها يرعش: انا ماقلتلهمش معش تطلعو مع حسين

-قص عليها: كدابة قلتيلهم لان الصغار ميعرفوش يكدبو

-حنان تبكى: انا ماقلتش ماتطلعوش .. انا قلت ياسر صرف لاننا تعبناك معانا

-حسين متعصب : اسمعى جو الشحاتين اهوا مايمشيش معاى ولا تحسابى روحك بتزلبحينى بدمعتين

-حنان تبكى : اقسم بالله انترزى صغارى الا هدا قصدى .. حسيت تكدرت من مصروفنا

طبس عليها وهيا ترعش مع بعضها: وكيف حسيتينى متكدر يا هانم.. منين جاك هالاحساس

-حنان: يومها لما فى كنا اخر يوم فالمستشفى ….حتى لما قلتلك احمد مطلعش عنده سحايا محسيتكش فرحت .. حسيت شاغلك موضوع ثانى

-حسين: اهاا شوى بدت تخدم الطاسه اللى فوق راسك وقالتلك شورة حسين متكدر من حق العيادة

حنان تبكى وتتكلم بخوف : معندهاش تفسير ثانى

حسين يعظ فى شاربه اللوطى وحنان تبدا ترعش

-حسين: ريتى حنان هادى اخرلك مرة تفتى من راسك باهى .. الحوش هدا فيه راجل واحد مش زوز

حنان تبكى : ياحسين ماتفهمنيش غلط اقسم بالله الا قصدى انى تحشمت منك

-حسين: ويومها انا متكنطى لانى منحبش نكون طرطور .. لان الصغار قالولى عالبنت اللى جاتك هنايا

-حنان ادس فى بكيتها زعميتا تبى تبان قوية : اسمع انا منقدرش نحسابك ..انت متزوج مش متزوج هدا شى يخصك

-حسين: ومن قالك حاسبينى .. لكن مفروض قلتيلى .. كيف تجيك وحدة فاسدة زى هادى وادسى عليا

-حنان: انا مادسيتش الموضوع ..انا اجلت النقاش فيه انت شفت الضرف بعيونك مش وقت مشاكل ولوم

-حسين: قصدك معناها انا فالحوش نسمع بالمواضيع لما حضرت جنابك تقرري تناقشها .. ولما ماخاطركش مفيش داعى نسمع بيها ..

معناها فالاكيد اناطرطور

-حنان: ليش تقول هكى وتكبر فيه الموضوع

-حسين: تو نعرف انا كيف نتصرف

وفتح الباب وطلع من الشقه ..

خشت حنان غسلت وجهها
وخاطرها تشد صغارها تمرجهم طريحه
لكن مش حيفهمو اللى بتقولهولهم
وحيعاودوله وتزيد تتازم المشاكل

سكتت وخشت للمطبخ اطيب فى غدى ولدها احمد

بعد ساعه تقريبا

انفتح باب الشقه حسين ومعاه نفس البنت ..

حنان طلعت تجرى ..

-حسين يكشخ : دخلى الصغار للدار وسكرى عليهم وتعالى

دخلت حنان الصغار للدار وسكرت عليهم

وسكرت باب احمد

وطلعت

حسين شد البنت من شعرها ويعظ فى شاربه : انا منو
-البنت: انت حسين

-حسين: سيدك حسين يا وسخه

-البنت خايفه : سيدى حسين

حنان واقفه وحايرة فالموقف اللى قدامها

-حسين: انا متزوجك يا فاسدة

-البنت تبكى : لا

-حسين: قولى لى لالتك حنان انتى منو

-البنت : انا وحدة فاسدة

-حسين يعيط: انتى منو عاودى على صوتك

-البنت : انا وحدة فاسدة

-شدها حسين من شعرها وكرها للصالون : باهى علاش درتى هكى

-البنت: مكر لانك زمان فوتنى من دون صحابك

-حسين ردسها على رجليها احكى شن صار زمان خلى لالتك حنان تسمع

-البنت: العام اللى فات صحابك كلهم رقدو معاى ودفعو الا انت

-حسين ريشها من شعرها : وعلاش

-البنت: قلتلى انت تحب النظاف بس

-حسين: ومدامك عارفتينى نحب النظاف علاش جاية تبى توسخى فى حوشى يا فاسدة

وطاح يضرب فيها قريب قتلها بالضرب رديس بالرجلين على كفوف

وحنان منها فرحانه بطير حست انه قامها بيها

ومنها تحز وتشدله فى يده : ياسر البنت بتموت بين ايديك ياحسين

وقف البنت وعطاها كفين وقاللها ورينى عرض كتافك

طلعت البنت

حسين قاعد متكنطى وغاضب

حنان ترعش باللى فيها خايفاته يولى عليها

-حسين: وتيلى الصغار بنطلعهم نتغدو برة

-حنان : باهى شوى تلقاهم واتيين

“الخوف باهى ??”

لبسو الصغار وجو طالعين مع حسين

-احمد : حتى انا نبى نطلع يا بابا

-حسين تلفت لحنان : احمد تغدا

-حنان : ايه غديته امبكرى .. لكن نخاف عليه يمرض خليه معاى وانتو برو

-حسين قرب من حنان وقرب وجهه من وجهها وعظ شاربه : انا قلتلك معش تفتى ولا

وتلفت لاحمد: هيا اطلع معانا يابطل .. وقامه فى غمره

-احمد: ماما نمشى ولا لا

-حنان: برة معاهم

-امولا : بابا و ماما بتطلع معانا ولا

-حسين: كانها تبى تطلع هيا

انصدمت حنان من الرد

-حنان بهدوء: لا انا نبى نرتاح اطلعو انتو

الصغار يعيطو شادين فى حنان يبوها تطلع معاهم وهوا ولا قاللها هيا ساكت وخلاص

وحنان اصرت انها متبيش تطلع

طلعو الصغار لعبو وضحكو وشرو العاب

وحسين شاد احمد فى غمره يبيش ينزله بكل خايفه يتعب ويمرض

لكن حس انه كسد منغير حنان .. يتدكر فى خوفها وهوا يعيط عليها يقعد يضحك

طلع صورتها يشبحلها: ستاحشتك ياعنشكلك

روحو الصغار وحسين .. وجابو لحنان بيتزا

-رياض: اهوا غداك جبناهولك يا ماما

-حنان تحدف فالدوة على حسين?: لا صحيتو شبعانه الحمد لله

ماقاللهاش خودى كولى ولا كيف تقعدى بلا ماكلة ولا دورها .. يبي يعاقبها

مع انه قلبه بيتقطع يبيها تاكل ..لكن ماباش يقوللها دمه قاعد محروق كيف دست عليه حكاية البنت

وفالاخير ماهانش عليه انها تقعد بلا اكل ناض لحقها للمطبخ

خش فتح الثلاجه زعميتا بياخد امية

خدى شيشه المية وجى طالع لقى حنان قدامه قريب خبط فيها
مشى يمين بيش يمشى بالصدفه حتى حنان مشت يمين وخبطو فبعض
بحركه لا اراديه مشت حنان يسار وهوا نفس الشى
وخبطو فبعض ثانى
???????

-حنان: اوووف اسفه

-حسين: كليتى غداك
-حنان : صحيت منبيش مش جيعانه

-حسين: هيا بلا جو عاد شنو بتقعدى بلا ماكلة
-حنان متلفته للحوض متع الغسيل وتتكلم بدلع: وانت شن يهمك

حسين خاطره يوقف وراها ويحضنها ويبوسها لكن مش قادر

-حسين:كولى حتى على خاطر صغارك .. بيش تلقيلهم صحه

وطلع …
_____________

العشية مشو للعيادة اخر مراجعه لاحمد

وقاللهم الدكتور ان حاله تحسن نهائي ومعش فى عليه خوف ويقدرو يروحو بيه

روحو للشقه جابو معاهم خبزة وحكاك تن .. ودارتلهم سندوتشات ماعدا احمد طبعا .
لانه مزال ياكل فالابيض

رقدو الصغار فالديار .. وحسين رقد فالصاله

طلعت حنان الساعه 11

لقاته متكى عالصالون

-حنان: نبى نتكلم معاك

-حسين : راسى يوجع فيا خلى الكلام وقت ثانى

“عارف روحه بيضعف قدامها وهوا يبي يعاقبها كيف ادس عليه ”

-حنان حست كرامتها نجرحت : خلاص ولدى صحته تحسنت توة الحمدلله لو سمحت غدوة روح بينا

-حسين: مش انتى تقرري امتى نروحو

-حنان قعمزت جنبه عالارض وقابلاته : الا انت يا حسين

-حسين: اول مرة تقوليلى هكى

-حنان: لان جميلك فوق راسى

-حسين: اهاا انتى قصدك توة جايه تكلمى فيا على خاطر الجميل

-حنان: لا جايا نكلم فيك لانك تستاهل كل خير

-حسين مكابر: معليش لو سمحتى بنرقد

مشت حنان زعلانه خشت لممر الديار فتحت دار احمد وسكرتها ورقدت جنب احمد عالسرير وبدت تبكى

حسين ماهانتش عليه لحقها للممر وقف قدام الدار .. فى حاجه منعاته يفتح الباب..ممكن كرامته ..ممكن هوا مزال يبي يعاقبها
قعد واقف .. يسمع فيها تبكى .. قلبه عصره ..ورجع لمكانه ……ورقد

__________________

ثانى يوم الصبح لمو حوايجهم على اساس بيروحو

نزل حسين الشنطه وحطها فى كوفينو السيارة

لبسو الصغار مداساتهم وحنان لبست حجابها ونزلو للسيارة

ركبت حنان جنب حسين والصغار من الخلف

-حسين: شنو يا ابطال تبو نروحو ولا مزال

-رياض : مزال يا بابا نبو ندهورو

-حنان : لا خلاص يا ماما مرة ثانية نجو توة خلاص بنروحو

-حسين تلفتلها: قلتلك مش انتى تقررى

ولع السيارة وطلع

-حسين: نقعدو ندهورو ونمشو لمدينه ثانية توة ..شن رايكم

-رياض وخوته يعيطو فرحانين : هههههاي

-حسين: نمشو لمنطقه قريبه اسمها عين دراهم

“قال قريبه قال هادى المنطقه على حدود الجزائر ?”

___________________

وصلو لعين دراهم الساعه 4 الفجر ..

خشو فندق

طبعا هما عائلة 3 صغار وام واب

عطوهم سويت متع غرفتين لاصقات فى بعض يفصل مابيناتهم باب

غرفه فيها سرير زوجى وغرفه فيها ثلاث سراير

خشو للغرف .. رقدو من التعب

حسين وامولا ورياض رقدو عالسرير الزوجى

وحنان واحمد رقدو على سراير الغرفه الثانية

فاقت حنان من النوم الساعه 2 الضهر

غسلت وصلت ونوضت صغارها فطرتهم كيكه وعصير عندها فى شنطتها

العشيه فاق حسين دوش و صلى

وقاللهم الغدى متع الفندق فات توة.. هيا نطلعو نتغدو برة

حنان مابتش تطلع معاهم قد ماشدو فيها صغارها ..

قالتلهم جيبولى غدى معاكم وخلاص

طبعا على قد ماشدو فيها صغارها وحسين متكلمش

لكن قلبه رق عليها فالاخيرر ..

-حسين: هيا اطلعى كولى حاجه

-حنان دايرةجو الزعل: صحيت منبيش

حسين يشبحلها يبي يحضنها ويبوسها .. لكن قعد واقف وبعدها طلع

طلعو الصغار وحسين دهورهم شوى بالسيارة وخشو لمطعم قعمزو يتغدو

________________________

حنان فتحت البلكونه تبى تقعمز فيها جو شميسه العشيه

شمت ريحه حلووووة ..فالاول تحسابها بخور نوع هندى ولا خليجى اول مرة تشمه

بعتالى زبطتها انها ارقيله

لكن المعسل متاعها عجبتها ريحته

قالت خيره فى ليبيا ارقيله صغار سلافى ريحتها ادره الكبد ???

المهم عجبتها الصنه

لكن بعيدة من الغرفه الثانية اقرب

خشت
وفتحت الباب الفاصل بين الغرفتين

ومشت للغرفه الثانية وفتحت البلكونه وطلعت منها لانها اقرب

قعمزت على كرسى وطاولة لقتهم فالبلكونه وبدت الريحه تقرب منها وتقوا …

فالبلكونه اللى فيها الارقيله زوز بنات وزوز اولاد وهاتك ياضحك وبصارة

حنان بدت تشم فالريحه بقوة وتقرب من الحيط بيش تزيد تشم كويس ??

__________________

حسين ستاحش حنان

وحس انه مفروض شد فيها طلعت معاهم خير من قعادها بروحها

قام التليفون اتصل مفيش رد

حنان فالبلكونه وماتسمعش فالتليفون

اتصل بيها قريب اربع مرات وماردتش

انشغل

قال للصغار هيا نوضو انروحو لماما

دفع الحساب وخدى غدى حنان معاه وركبو السيارة وروحو

فالفندق ..

ركبو حسين والصغار للدور اللى ساكنين فيه ويسمعو فى ضحك حنان واصل لعند الممر

حسين قعد حاير شن فى

فتح الباب وخش لقاها فاتحه التلفزيون ومتهسترة وهيا تضحك

جاها حنان خيرك هبلتى

______________________