رواية قلبي شاريك كاملة
#قلبي_شاريك❤
??الحلقه السابعة والعشرون??
نادو حسين .. جى يجرى قامها رفعها للسيارة وهيا فاقدة الوعى
ركبو معاه امال وحنان
ومشو لاول عيادة
-امال: خيرهم عطلو لداخل
-حسين: بالك يديرولها فى تحاليل
طلع الدكتور مواطى راسه ??
-حسين: انشالله خير يادكتور
-الدكتور: منكدبش عليك الحالة خطيره هلبا ودمها 3 بس .. ربي يشبح فيها خوى اللى زيها تحت التراب
-حسين: نزيدولها الدم يادكتور
-الدكتور: خلى امها تخش تشوفها
-حسين: امها مش معانا
-الدكتور: برة جيب امها تشبحها ..لان الحالة مطمنش
حسين يبكى شن قصدك يا دكتور
-الدكتور : عن ادنك توة
حسين قعمز وحط ايده على وجهه وقعد يبكى
جو حنان وامال يجرو : ياحسين شن فى مرام ماتت
حسين: لا حيه لكن حالتها خطيرة هلبا قالى الدكتور جيب امها تشبحها
حنان وامال قعدو يبكو
-حسين: خليكم هنا نمشى نجيب امها والحاجه ونجى
______________________
حنان تبكى … ادكرت احمد ولد اختها قداش يحب مرام
قامت تليفونها واتصلت بيه
التليفون يشرين
-احمد: اهلا خالتى
حنان تبكى بالعبرة
-احمد : خيرك خالتى .. شن فى .. صغارك فيهم شى
-حنان: مش صغارى
-احمد : امالا منو
-حنان تبكى : مرام
-احمد يعيط قريب يهبل: خيرها مرام .. انتم وين
-حنان: احنا فالعيادة اللى عالرئيسى وحنان فى غرفه العنايه
احمد سكر تليفونه وركب سيارته يجرى زى المجنون
___________________
جت الممرضه تجرى لحنان وامال
-الممرضه: اختى وين الراجل اللى كان معاكم نبو دم
-حنان: طلع وبيجى ميعطلش
-الممرضه : كلميه يسرع فالجيان لان نبو شكارة دم من مصرف الدم
-امال: اهو انا دمى مطابق ليها متاكدة عطتنى هيا زمان دم … اهو اسحبى منى
-الممرضه : باهى تعالى اختى نديرلك تحليل نشوف دمك مطابق والا لا
-حنان: حتى انا ديرلى تحليل نعطيها دم
-الممرضه : باهى تعالو بسرعه
_________________
وصل حسين لحوش عزيز …
نادى على امه وعيونه حمر
-الحاجه: شنو صار فى مرام وليدى
-حسين: شدوها فالعيادة وكان تبو تشوفوها تعالى انتى و جميلة
طلعت جميلة تبكى تواسى فى وشاحها: هيا عمتى اركبى خلى نمشو نشبحوها
ركب حسين الصغار والحاجه وجميله ومشى بالسيارة
وقعدت وجدان فالحوش
-الحاجه: وين رافعهم وليدى الصغار العيادة مش باهية ليهم
-حسين: لا يااام نبى نفوتهم على حوش خالتهم احلام
فاتو على حوش احلام وحط الصغار وطلع
___________________
وصل حسين للعيادة لقى حنان وامال مقعمزين قدام الغرفه
وصلت جميلة اضبطت حنان وقعدو يبكو
وامال مشت لامها تجرى تعاون فيها عالمشى
-جميلة : خيرها مرام يا حنان
-حنان: انشالله سليمه يا جميلة متخافيش عندها هبوط فالدم
-جميلة: نبى نخشلها
-حنان : توة خشو عندها زوز دكاترة اصبري شويا يطلعو
-امال تكلم فى حسين : يبو دم .. توة دارولنا تحليل انا وحنان بيش نتبرعولها
لان انت متلحقش تمشى للزاويه وتجى بيش تجيب دم من المصرف فهمت
جت الممرضه .. صعب ناخدو منكم الزوز
-حنان : ليش
-الممرضه : اللى اسمها حنان دمها غير مطابق للمريضه ..واللى اسمها امال حامل
انصدمت امال ماكانتش تندرى على روحها حامل
-حسين: ديرلى انا تحليل انا عمها ممكن مطابق
-الممرضه : تعالى
مشى معاها حسين ..
_______________________
خش احمد يجرى للعيادة يسال فالريسبشن على مرام وين حاطينها
خش يجرى لقى حنان وباقى العويلة واقفين
مشتله حنان تجرى …
وخر خش للممر اللى قبله ..مايبيهمش يشبحوه
لانه يبكى هلباااا
-حنان: احمد خيرك بالشوية عليك اهدا ولد اختى
-احمد : خيرها مرام ياخالتى شن صايرلها
-حنان : عندها هبوط فالدم ويبو يزيدولها .. انا وامال طلع دمنا مش مطابق ليها ..مشى حسين يحلوله
-احمد: وين هادى غرفه التبرع
-حنان: فى نهاية الممر الاول
خلاها واقفه ومشى يجرى
______________
طلع الدكتور من غرفه مرام
جميلة مشتله تجرى : خيرها بنتى يا دكتور
-الدكتور: روحنا وروحها عند الله .. اهو نزيدولها فالدم وانشالله الدورة الدموية ترجع تاخد نشاطها المعتاد ..
-جميلة : نبى نخشلها يا دكتور
-الدكتور: خشيلها لكن منغير شوشرة ودموع لو سمحتى
ناضت الحاجه وقفت : حتى انا بنخشلها يا دكتور
-الدكتور : انتو الزوز بس
خشت جميلة لبنتها
لقتها دايريلها جهاز التنفس على فمها ..ويزيدولها فالدم
تبكى بالشوى ..وشدت يدها : بنيتى خيرك ..
والحاجه تبكى
”سخفتنى مرام يا نارى ” ??
جت الممرضه طلعتهم
وسكرت الباب
-امال: شنو خوى طلع مطابق وحصلتولها دم
-الممرضه: لا الشاب الكبير طلع مش مطابق ..خدينا من الشاب الصغير هوا اللى طلع مطابق
-حنان: قصدك احمد
-الممرضه: مش زابطه اسمه
وطلعت وخلتهم
__________________
جى حسين وقاللهم انروح بيكم قعادكم زايد
-جميله: والله مانروح ونخلى بنتى
خشت احلام تجرى : خيرها مرام
-اضبطت جميلة وقعدت تبكى
-احلام: والله غير الصغار قالولى
-الحاجه: ماهو حسين حطهم مستعجل
___________________
روحو حنان والحاجه وقعدت جميلة وامال مع مرام
وفالمغرب مرام جسمها تقبل الدم وبدت تتحسن امورها …
”ياحنه حتى هوا دم الغالى ??”
حسين جاه تليفون … رد عليه
نادى امه وحنان قاللهم انا لازم نمشى للعمل توة
فى انبوب انفجر ويبو 4 مهندسين
وعندهم زوز بس …
وانا اقرب مهندس توة للموقع
_____________
-الحاجه : تو بتخلونا كلكم بروحنا وليدى
-حسين: الحاج مروح فالطريق وسالم وحفيظ قعدو مع عزيز
مشى لسيارته
لحقاته حنان تسقد فيه
-حسين: رد بالك على روحك وعلى الصغار
-حنان: رد بالك انت ومتعطلش علينا
-حسين: نحبك
-حنان: وانا اكثر
وركب حسين سيارته وتوجه لشركه الاينى غاز
______________
فالليل وصل سعد ..
وطمنهم على عزيز انه احسن بهلبا والحمدلله معنداش ارتجاج ..
وغدوة بيروحو حتى هما
فالليل حنان تتصل وتليفون حسين مقفل
ثانى يوم روح عزيز والحوش تعبى
ومرام حالتها تحسنت لكن مازالت فالعيادة
وحسين قاعد فالعمل وحنان مشغولة مكلمهاش
فالليل روحت بصغارها
شرين تليفونها
لقاته رقم حسين
-حنان: حبيبي وينك
-حسين: والله تشردت.. يومين واحنا فالبحر خارج التغطية
-حنان : والله وتوة روحتو ولا كيف
-حسين: ايه روحنا بالطيارة على موقع الشركه اللى فطرابلس
-حنان: ووين مشيت
-حسين: انا فالشقه توة
وقعدو يهدرزو طول الليل قريب للفجر
______________
-احمد : قلتلك توة تخطبيهالى يمى
-احلام : وراس وليدى غير تطلع مالعيادة انكلم امها طول
-احمد: قولى لبوي مش يوقفلى فيها
-احلام: ياوليدى انت مازلت صغير والله بوك ما يوافق يمشى يخطبلك لكن تو نقوله انا نكلم امها وماعتقدش يقولى متكلميهاش
-احمد: المهم نخطبها ..انتى ولا بوى تكلموهم
-احلام: باهى سلم وليدى مايصير الا اللى تبيه انت
_________________
ثانى يوم تليفون حنان يشرين الساعه 9
شافت التليفون لقاته اختها احلام
ردت
-حنان: الووو
-احلام تبكى: الو
-حنان نخلعت: خيرك يا احلام
-احلام: خالى محمد دار حادث وتوفا وجنازته الضهر
حنان قعدت تبكى لانه خالهم هدا يسكن فى طرابلس لكن كان زمان حياة امهم ديما يجيهم ..
-حنان: باهى انتى امتى بتمشى
-احلام: بنمشى توة كان تبى تركبى معانا فى مكان
-حنان: خلى نشوف حسين ونرد عليك
سكرت الخط
قعدت تتصل بحسين التليفون مقفل
طلعت مشت لحوش عمتها تبكى وقالتلها على خالها ونادو سعد قالوله
-سعد: لا كيف تمشى معاهم حتى احنا بنمشو وبعزو
قالتله الحاجه حتى انا بنمشى معاكم
قال لحنان وبريكه يوتو رواحهم شويا ويطلعو عالاقل يحضرو الجنازة
جى احمد رفع صغار حنان لحوشهم
وركبو فالسيارة وتسقدو مشو لطرابلس
_______________
فالطريق …
الحاجه راكبة من قدام …
وبريكه وحنان من تالى
-سعد : حسين فالعمل كنهدا راهو مشى معانا
-حنان: حسين فطرابلس
-سعد : من قالك
-حنان: هوا كلمنى امبارح وقالى رفعوهم من الموقع لطرابلس طول بالطيارة
-سعد: باهى هوا وين توة
-حنان: قالى فى الشقه فطرابلس
-سعد: باهى كلميه يوتى روحه بيش مايعطلناش كانه بيمشى معانا
اتصلت حنان بحسين الرقم مقفل
وصلو طرابلس
وقف سعد تحت عمارة حسين
-سعد: انزلى حنان ناديه تلقى الشقه فالدور الثانى ورقمها 4
فتحت حنان باب السيارة
خشت باب العمارة
ركبت من الدروج
وصلت للدور الثانى قدام الشقه رقم 4
شرينت
انفتح الباب
فتحت وحدة شعرها اصفر ولابسه بنطلون جلد اسود وجاكيت اسود وبلوزة موف
-حنان: شكلى غالطه فالشقه
-المراءة تتكلم جزائري: انتى ادور على شكون
-حنان: ندور على شقه حسين
تلفتت المراءة لداخل: ياسى حسين فى وحدة ادور فيك ?????
وتلفتت لحنان: يصلى اهو تو يجيك
حنان يابسه فمكانها…. مصدومه
وانا مصدومه
وانتو مصدومين
وليبيا كلها نصدمت
منو هادى اللى مع حسين فالشقه
جى حسين يبس الدم فعروقه لقى حنان واقفه قدامه
-حنان فمها يرعش: خالى توفى وفوتنا عليك كان تبى تمشى معانا احنا وعمى سعد نراجو فيك لوطا فالسيارة
ونزلت تجرى عالدروج
لحقها حسين يجرى
شدها فالدورة متع الدروج : اوقفى نكلم فيك
-حنان مصدومة حولتله يديه : انراجو فيك فالسيارة انزل كان تبى تمشى ..وكانك مش فاضى على راحتك
ونزلت تجرى ركبت فالسيارة
______________________