رواية قلبي شاريك كاملة

#قلبي_شاريك

بقلم زهور جمال الدين?

الحلقه الثانيه

فالمطار اكرم ولد سعد ومحمد ولد فاطمه واقفين يراجو فى طيارة حسين بتوصل ..
وصلت الطيارة ونزلو الركاب والشباب يراجو برة
-اكرم: تصدق يا محمد ليا عامين ماشفتش عمى حسين
-محمد: وانا ليا 4 سنين ماشفتاش ..
-اكرم: لكن هوا روح قبل عامين قعد عندنا ثلاث ايام كان تدكر
-محمد: لما روح قبل عامين احنا كنا فى تونس ومعانا خالى محمود وصغاره ومرته حنان .. ولما روحنا قالونا انه سافر ماشفناشى وندكر امى قعدت تبكى هلبا تبى تشوفه ماهو معتبراته تؤامها
-اكرم: اهوا عمى حسين طلع
ومشو الزوز يجرو يسلمو عليه ويحضنو فيه ..
ويعزو فيه فى خوه محمود …
كانت معاه شنطه صغيرة فيها ملابسه بس
طلعو من المطار وركبو السيارة ..مسافه المطار عالحوش قريب ساعه ونص ..
وشدوها هدرزة معاه على شغله وعلى سفرياته
-حسين: قولى يا اكرم عمك كيف مات حادث ولا شنو ماسمعتش بيه مريض
اكرم يسوق فالسيارة تلفت فالمراية الوسطانيه قعد يشبح ل محمد ولد عمته وساكت
-حسين: خيركم سكتو احكولى شن سبب الوفاة
..احكيلى انت يا محمد خيره خالك كيف مات
-اكرم: بوى لما كلمك ماقالكش كيف توفا
-حسين: كنهدا وعلاش نسأل فيكم
-محمد: والله يا خالى شن بنقولك .. الحق خالى محمود توفا مقتول
-حسين وعلامات الدهشه على وجهه: من قتله وكيف صار وعلاش فى عركه ولا شنو
-اكرم: والله مانعرفو ياعمى.. لقاه راجل ملوح تحت شجرة والدمايات على وجهه ومضروب هلبا طعنات بموس .. على طول بلغ المركز وبعتالى بلغونا بالوفاة
-حسين: ومرته وين محستش بغيابه .. والله ماعمرى استريحتلها …
وولع دخانه : اصلا المراءة اللى ترضى تعيش مع زوفرى زى هدا اكيدة حتى هيا مش مزبوطه استغفر الله العظيم
-محمد : انت تحكى على حنان مرت خالى .. الله اكبر.. تى هادى من نعما الناس ياريت نساوين خوالى كلهم زيها
-حسين: اسكت يا محمد انت ماتعرف شى .. انا داير وشايف وعندى خبرة فالنساوين… لو كانت بنت اصل ماتقعدش معاه .. لكن هلبا زيها الراجل سكران وهيا العبى استغفر الله العظيم
-اكرم : تو هدا رايك فيها يا عمى .. انا متاكد انك مش شايفها مدام هدا رايك
-حسين : وين بنشوفها انا لا والله مانعرفلها شكل
المهم خلونا من سيرتها واحكولى على احوال البلاد

وقعدو يهدرزو طول الطريق عالبلاد لين وصلو

____________

اول ماوصلت سيارة اكرم جنب خيمه الرجاله ..مشو الصغار يجرو عمى حسين وصل
وقف سعد وقلبه يطق لانه مستاحش خوه حسين وبعدين فى حب ومودة قويه بينهم
وصل حسين…
واول كلمه قالها : وين خوى سعد
-سعد عيونه دموع : حمدالله على سلامتك يا حسين
جى حسين وحضن خوه سعد لانه مستاحشه وباس راسه : عظم الله اجرك يا خوى
-سعد: عزانا واحد يا حسين واجرنا واجرك حاصل
استمر حسين فالسلام على باقى خوته وعزوه وعزاهم وسلم على عمامه وباقى العيله ..
وجاب كرسى جنب خوه سعد وقعمز ..
-سعد: شن حالك ياحسين وشن امور خدمتك
-حسين : الحمد لله ياحاج شن حالك انت وباقى العويله
-عمه مختار: شن امور الخدمه ياحسين ليك فترة معش جيت هنا فى اى بلاد كنت
-حسين : كنت فالمجر ياعمى كانت عندى دورة 10 شهور تبع العمل .. وكملتها من مدة شهر
-سعد يوشوش لحسين: عمك المولدى نسيب المرحوم مقعمز فى آخر الخيمه وولاده الزوز مقعمزين عالكراسى برة الخيمه برة عزيهم سلم اوخى
-حسين: بالرغم والله ماعندى ليه خلوق المولدي
…لكن تو نمشيله نعزيه حاضر… لكن ولاده مش مستواى والله مانحط ايدى فيدهم ونعزيهم الصياع هادو
ووقف بيش يمشى للمولدى يعزيه ..
وتلفت لسعد :كلم امى وخواتى يطلعولى نبى نسلم عليهم
“?? قداش شايف روحه هالحسين .. اتيقعه”

حقه انا محكيتلكمش على اهل حنان …
هدا يا حناتى حنان عندها زوز خوات من نفس الام احلام وقمرة ..وبوها واحد بستاردى متع نساوين وبس ..
بعد ماتت ام حنان لما كان عمرها 10 سنوات …تزوج بوها وحدة واعرة اسمها خيريه جاب معاه زوز اولاد يوسف ومعز ..
اكبر حرايميه فالجهه حاشاكم .. سكير وخنبة سيارات وابتزاز للناس? ..
وسبب زيجت حنان من محمود هوا خوها يوسف لانه كان محمود صاحبه ومعاه فى نفس الوسخ اللى هوا فيه .. شرب وسكير وقمار واخرها يبارى مخدرات دهبت لمحمود شيرته ..
مزال تو نحكيلكم حنان كيف كانت عايشه مع محمود اصبرو مزال مش وقته توة ?

________________________

سعد قايم تليفونه ويتصل? …

-سعد: الو امال
-امال: ايوة خويا سعد
-سعد: كلمى امك وخواتك قوليلهم خشو للحوش بيجى حسين يسلم عليكم
انتفض قلب امال لما سمعت اسم وخيها وعيونها تعبو دموع
-امال: قوله ايجى اهو تو نخشو يلقانا فالحوش
سكرت المكالمه ومشت تجرى لامها وخواتها
-امال : حسين يبينا فالحوش يااام تعالتو …
ناضت الحاجه خديجه زى الفراشه متقولش نفسها اللى بكرى مش قادرة تتحرك بكرى..
-عيونها دموع : وينه وليدى حسين امتى وصل …

خوات حنان احلام وقمرة مقعمزين جنبها
-احلام: حنان منو حسين هدا اللى يبو يسلمو عليه حمواتك
-حنان : هدا سلفى خو محمود من بوه وديما مسافر
-احلام: منعرفاش تصدقى
-حنان: تى غير نعرفه انا بيش تعرفيه انتى
-قمرة : متبيش تنوضى تسلمى عليه حنونه
-حنان: اولا هوا مانادانيش ..ثانيا وضعى توة مفروض لا نسلم على رجاله ولا نكلمهم

__________

خشو امال وخواتها للحوش لقو حسين واقف فالجنان مشت امال تجرى تعلقت فى رقبة حسين
قعد هوا حاضنها ويسلم عليها..
حسين مدلل امال هلبا باعتبارها اخته الوحيدة من امه وباعتبارها تيتمت بكرى.. كانت مليانه فلوس وهدايا من خوها .. حتى تقول آه ياراسى يديرلها تدكرة ويسفرها تونس تعالج ..
قعد يسلم ويعاود ..وبعتالى نزلها وقعد يسلم على امه ويحضن فيها ويبوس على راسها
-حسين : سلامت راسك يا امى فى محمود
-الحاجه خديجه: عزانا واحد ياوليدى
-فاطمه عيونها دموع : عطينا معاك مكان يمى نسلم على وخى
-حسين: فطومه الغالية .. حضنها ويقعد يبوس فى راسها ويسلم عليها …
وحضن اخته مفيدة وسلم عليها
وعزّاهم وبكى معاهم وبكو معاه …
منها خوهم متوفى ومنها مستاحشينه
وفى لحظه تعبى الحوش نساوين خوته وبنات خوته وخواته جايين يسلمو عليه ويعزو فيه
فى اللى عرفها وفى اللى معرفهاش كبرو البنات وتغيرو فى شكلهم .. المهم عزوه كلهم

وطلع من الجنان واخد فى حضنه اخته امال ..وفى جنبه مفيدة وفاطمه يوصلو فيه للباب
جى بيطلع تلفت للحاجه خديجه
-حسين: ماتبى شى يمى
-الحاجه : ايه نبى ياوليدى
-حسين مشى بخطوات جيهتها: اؤمرى يمى شن تبى
-الحاجه: يوسف خو حنان مرت المرحوم يبي يرفعها سلم وليدى شوفه وكلمه عالاقل لين يتم العزا
-حسين: ماهو هدا الطبيعى يمى تروح بيت اهلها
-الحاجه عيونها دموع : سلم وليدى قوله يخليها مانقدرش نفارقها هيا والصغار
-حسين : حاضر يمى كل شى ولا دموعك
وطلع حسين من الباب ومشى جيهت خيمه الرجاله وقعمز عالكرسى وجنبه معاد ولد اخته فاطمه والتمو عليه صغار عمه يهدرزو
فجأة شرين تليفون معاد وكان حاطه عالطاولة جنب عمه حسين ..
معاد: عمى ترا التليفون جنبك
-حسين شاف التليفون مكتوب يتصل بك حنان
-حسين : انت يامواعيد ..ماكش ساهل يا معاد
-خدى معاد التليفون من خاله وشاف الرقم
-معاد: هادى حنان مرت خالى محمود الله يرحمه
حط السماعه على ودنه : الو اهلين حنان
-حنان : معاد وراس وخى الساعه قريب الواحد شوفلى احمد ورياض وين مشفتهمش من العشيه
-معاد: حاضر ياحنان اهو تو نشوفهم توة
وسكر الخط
-حسين : مصح وجهها تو هيا وضعها يسمحلها تكلم راجل فالتليفون
-معاد: حنان هادى وخيتنا يا خالى ..لو تطلب عيونى مايغلوش عليها
-حسين: انشالله تردوهالى السيدة مريم بالله اسكتو
-معاد: تو الايام تبينلك ياخالى
ناض معاد من مكانه شاف جيهت الصغار لقى رياض واحمد يلعبو معاهم قاللهم برو ل ماما تنادى فيكم …
مشو يجرو جهه خيمه النساوين
ادكر حسين ان امه وصاته يكلم خو حنان
-حسين: معاد ترا ناديلى يوسف خو حنان هنا نبيه
-معاد: حاضر يا خالى تو نشوفه لكن مرات روح الوقت متاخر لانه
ناص معاد يدور فى يوسف لقاه مقعمز جهت جماعه الشاهى ناداه وجابه معاه وجى
-يوسف : اهلين حسين شنحالك عظم الله اجرك
-حسين : الحمدلله شكر الله سعيك
-يوسف : عزانا واحد خوى حسين
-حسين: خلاص هاك جبت الفايدة مدام عزانا واحد امالا ليش تبى تروح باختك لحوشكم
-يوسف: هكى المفروض ولا.. امالا شن بنخليها هنا
حسين يبي يزلبح يوسف لانه عارفه قفاض واجرب ماعنده شى وعارفه حاط عينه على الجمعيه متع الوفاة …وهدا السبب اللى خلاه يبي يروح باخته
-حسين: ماهو المصروف هلبا خوى يوسف لو مشت مرت المرحوم عندكم معناها الوفاة كلها بتتحول غادى .. وهدا مصروف مش ساهل راهو
-يوسف : ماهو بتعطونا الجمعيه متع الوفيات اللى تلمدو فيها قريب 1500 دينار سادين
-حسين : باهى واللى يعطيهملك توة منغير مايلمدوهم .. بس على شرط تخلى اختك اسبوع هنا
-يوسف يضحك فرحان : خليها حتى اسبوعين المهم اعطيهملى كاش
-حسين : الدوة ليك انت وخوك معز وبوك راهو
-يوسف: انا وخوى معز خودنا نفس الراى من توة خلى تقعد .. لكن بوى منضمناش
-حسين : غير اضمنلى خوك معز وبوك ماليكش علاقه بيه تو نتفاهم معاه انا
-يوسف: تم الكلام
-حسين : غدوة العصر تعالة خود فلوسك
طلع يوسف من جنب حسين فرحان ..وناض حسين لخوه سعد وقاله ياحاج مرت المرحوم حتقعد هنايا وسكر عالموضوع .. معش تفتحه بكل مع حد
-سعد: ربحت يا وخى وانت من قالك عليه
-حسين : قالتلى امى
-سعد : اهو تو نكلمها الحاجه ونقوللها الموضوع تم
-حسين : باهى تصبح على خير نبى نستريح شوى من السفر
-اكرم يوشوش ل محمد: اهو الكاصة بدت تتحرك ياحميدة وتحل فالمشاكل
-محمد: اس تو يسمعنا بوك يقعد يشحط عقاب هالليل ??
____________

وجى اليوم الثانى ناض حسين دوش وصلى ولبس حوايجه وطلع للخيمه برة بيش يفطر

قعمز عالكرسى لقى ولد صغير مقعمز جنبه… سأله
حسين : انت ولد شكون ياشاطر
باعتبار انه يغيب سنوات ومايزبطش الصغار
ردالولد : انا اللى بوى مات
تلفتله حسين وحس بالكلمه..
-حسين مدله يده : تعاله
خداه قعمزه على فخدته : شن اسمك
رد عليه : اسمى رياض وخوى اسمه احمد واختى امل
-حسين : ماشالله عليك ربي يحفظك وانا عمك حسين خو بوك
وشرين تليفون حسين …شاف لقاه رقم خارجى
حط رياض عالكرسى ووقف بعيد بيش يرد
-حسين : الو اهلين حبيبتى وحشتينى ..كان صبرتى شوى كيف بنكلمك ياعمرى

___________________

زعما منو اللى يكلم فيها حسين ????

وحنان زعما بوها بيخليها عندهم ولا بيعفس فيها

وخوات حنان ومرت بوها شن بيكون رايهم
?????

نحبكم❤❤