رواية قلبي شاريك كاملة

#قلبي_شاريك ❤

???الحلقه السادسة عشر ???

مرام بنت جميلة دايرة دونات بالعسل

دارت معاه نسكافيه وجابتهولهم

وخشت مدت لعمتها ومرت عمها ..

-جميلة : سلم بنيتى .. تصدقى يا حنان الدونات دايراته بروحها يا سعد عزوزتها بيها

امال تضحك عارفتها تلقيحه

-حنان: ياجميلة مش وقته غير كملينا

-جميلة : الخطه وين .. اهو نقوللكم .. كبري راس الحمار يصدق روحه ..والراجل سره مرته …اقنعى المراءة يقتنع الراجل
-امال: مفهمناش
-جميلة: حل مشكلتك كلها عند الدراه وجدان
-حنان: كيف
-جميلة : اهو نقوللكم كيف

الخطه امال اديرى روحك فايتنا انا وحنان ..وامشى كبرى بوجدان واحكيلها عالموضوع وقوللها ساعدينى

-حنان: باهى وبعتالى
-جميله: تمشى امال اتشوشد ل وجدان .. نقوللها بيعطونى ووقفتلى فيها جميلة…وانك حكيتيلها هيا باعتبارها الطيبة وبتساعدك …طبعا اهنا وجدان بتاخد مقلب فى روحها وبتتجعد وبتقولك انها بتساعدك
وتبدا يضحك والضحك عليه

-امال: باهى ولما بنحكيلها اول مرة .. كيف نضمن ردت فعلها ..وما تنقلبش عليا

-جميلة : اهو انا نقولك شن تقولى

وكملو هدرزتهم ..

_____________

سعد مقعمز بحدا امه وساكت
-الحاجه: خيرك سلم وليدى ليك ايام تخمم
-سعد: حسين قالى على موضوع .. وقاعد نوزن فيه فدماغى
-الحاجه: انشالله خير
-سعد : لا خير انشالله

خشت امال من حوش خوها عزيز .. لقت سعد وامها

-امال: السلام عليكم شن حالك خوى سعد
-سعد: الحمد لله
-الحاجه: معش وقت ع الغدا بنيتى ..ديري رز واختك مفيدة قالت بتجى تتغدا معانا
-امال: حاضر

حطت الغدا ومستعجله تبى تمشى لحوش خوها سالم قبل ما تجى مفيدة

كملت الغدى وطلعت
-امال: يمى بنمشى لحوش سالم بنجيب المقص متعى من وجدان
-الحاجه: متعطليش اختك على وصول
ولبست وشاحها وطلعت

__________________

امال طقت على حوش سالم
فتحلها ساجد ولد خوها
قالتله برة نادى امك …

-وجدان: اهلين امال تفضلى
-امال: اهلين وجدان شن حالك
-وجدان : الحمدلله
-امال: نلقى عندك مقص
-وجدان: اهو تو نشوفلك

وتحركت امال دارت روحها بدوخ وبتسيخ

شدتها وجدان قعمزتها عالكرسى .. خيرك اللطف

-امال : عطينى المقص خلى نطلع راسى دايخ وطول الليل نبكى
-وجدان : علاش اللطف خيرك
-امال: جونى ناس ووقفتلى فيها جميله
-وجدان : جميلة هادى نعرفها انا مسمومه وحقودة

غير خشى خشى احكيلى
خشت امال

-امال : هما الناس انا اصلا بنرفضهم ..غير كانا ماحشمتش روحها هيا
-وجدان: وعلاش بترفضى كانا الناس باهيين
-امال: بنرفض على خاطرك انتى ..لانك مستحيل تحضرى العرس ..وانا منتشرفش الا بيك انتى .. فكينى منهم الثانيات
-وجدان: والله على قولتك شلفط ويحشمو خاصه اللى يقولولها حنان
لكن انتى ليش بترفضى على خاطرى!؟
-امال: ماهو العيلة اللى جونى متعاركين مع خوى سالم
-وجدان : متقولليش ولد نورى جايك يخطب فيك
-امال: لا خوه
-وجدان: مصح وجوههم .. كيف حتى يفكرو فيك
-امال: ماهو قلتلك حتى انا فايته الموضوع على خاطركم ..لكن ماحارقنى شى غير جميلة اللى تحساب روحها هيا اللى وقفت الموضوع

-وجدان: بيها ولا بلاها الموضوع مستحيل ايتم
-امال: نفس كلمتها..قلتلها انا بنرفض على خاطر وجدان …قريب ماتت وقالتلى وجدان بيها ولا بلاها الموضوع واقف .. وقرمه فيك وكوووم كلام

-وجدان : تى والله كانا ننوى ماتبدى الا واخداته

-امال: تبى الحق هيا قوية .. وقالتلى وجدان شن عندها من كلمه ..مدامنى انا بنفركش الموضوع والله مايقدر اتمه واحد حتى وجدان
-وجدان: باهى شن رايك انكمله الموضوع ونشوفو منو عنده كلمه
-امال: غير اسكتى نكلمها واسمعيها

اتصلت امال برقم جميلة وفتحت المايك

-جميلة : الو
-امال: الكلام اللى قلتيه امبارح يا جميله مردود عليه
-جميلة: اعلى مافى خيلك اركبيه ..ومدامنى انا قلت لا معناها رائي هوا اللى بيمشى ..
وانا عزيز فى يدى و مايطيحليش كلمه ..

-امال: تى والله وجدان انتى ماتقدريها
-جميلة: تى من وجدان هادى.. امالا تقدر اتأثر على سالم وتخليه يوافق زى ما انأثر انا على عزيز .. احلمى

-امال: انا ليا الله ومانبى حد يكلم على خاطرى

-جميلة : انا نعرف سلفاتى ..توة حنان عندها راى مع حسين حتى كانا كيف واخداته ..وبريكه تحكم وتطلق فى سعد . وانا الكلمه كلمتى مع عزيز .. الا وجدان يا نارى ماعندها معاه شى ومجربتها فى اكثر من موقف..

وجدان رقالها الزيت هههه

خدت التليفون من امال ..
-وجدان: خيرك واقفه فى نصيب البنت انتى
-جميله: خوها عزيز مايبيش
-وجدان: خوها عزيز ولا انتى يالفعه
-جميلة : انا حلفته يمين ماهى واخداته
-وجدان: امالا يمين على يمينك ماتبدا الا واخداته
-جميلة: سالم متعارك معاهم قاعد غير بيدورك ليش تحشمى فى روحك
-وجدان: سالم لما تقول اللّا وجدان كلمه .. مايخليهاش تنزل الوطا
-جميلة : تو نشوفو انا ولا انتى
-وجدان: تو نشوفو يا جميلة

وسكرت الخط

-امال: ماشالله عليك يا وجدان مانحسابكش قوية ?
ماهو قالتلها جميلة زمزكيلها واشكراها ?

-وجدان: امالا يمين فوق يمينها ماتبدى الا واخدتيه ويا انا ويا هيا ..وسالم مستحيل يكسرلى كلمه

-امال: اقصري الشر يا وجدان.. ووالله انا مانبى ندير مشاكل مابيناتكم
-وجدان : هيا اللى بدت الاولى وتو تشوف ..بدت مسألت تحدى ..غير انتى ماترخيش بيا
-امال : اللى تبيه انا فيه
-وجدان: باهى خلى نكلم سالم ونقوله

____________

جت مفيدة هيا وبنتها اسماء

تغدو ..وهدرزو

-مفيدة: هوا شرط عليها يتزوج ولا يمى
-الحاجه: منعرفش شرط عليها ولا لا.. وهدا موضوع يخصهم هما بس
-اسماء : من حقه يتزوج يا حناى .. هوا خداها عزابى وهيا ارمله من حقه ياخد عزابيه
-امال: بلا تفلسيف يا اسماء الهى فى روحك وماليك علاقه بحد
-مفيدة : ماهو انا يمى قصدى حطوها فودانها بيش تعرف انه فى اى وقت ح يتزوج
-الحاجه: اييه علينا عاد قلنا هدا موضوع يخصهم

مفيدة فى خاطرها.. تو نقولهالها انا مدامكم متحشمين منها

__________

وجدان كلمت سالم واقنعاته باسلوبها ….
-سالم: هكى قولك انتى
-وجدان: حبى عركت زمان قديمه ..واحنا ناس راقيين مانقعدوش نلتفتو لحاجه كلى عليها الزمان وشرب

المهم انها تقنعه بأى طريقه ???

-سالم: لا …يعطوها …شن انا بنوقف فى نصيب اختى
-وجدان : هما قالو عزيز رافض
-سالم: ياودى عزيز ماضنى يوقف فى نصيب اخته
-وجدان : تى ماهو هاديكه اللفعه تزن عليه ..
ويبو يجيبوها فى وجهك انت قالو سالم متعارك معاه
-سالم: هوا احنا فعلا تعاركنا
-وجدان: مش صالحوكم على بعض بعد ما طلعت ..واضبطه واضبطك …خلاص معناها متصافيين
-سالم: صح تصافينا
-وجدان: توة شنو حبيبي كيف يصير
-سالم : انا معنديش مانع الحق

ضحكت وجدان : تو نشوفو يا جميله انا ولا انتى

________________

يوم الجمعه العيلة متغديين مع بعضهم …
وطبعا امال مقعمزة جنب وجدان ..تبعاً للخطه اللى حاطتها جميلة
متغديين معاهم فاطمه ومفيدة

بعد الغدى ..
-فاطمه: شن حالكم حنان انتى والصغار

طبعا فاطمه تحب حنان هلبا من زمان

-حنان: الحمدلله يا فطومه
-فاطمه : ستاحشت حسين
-حنان: الاحد الصبح يروح تعالى تغدى معانا
-فاطمه: الاحد لا .. لكن حندير يوم ونجى نتغدا معاكم
-حنان : تآنسينا وتنورينا
-مفيدة: فاطمه بس .. انا لا
-حنان: لا تفضلى حتى انتى مفيدة معنديش فرق فيكم

طبعا حنان ومفيدة ديما مش فالابيض .. مفيدة ديما اضايق فى حنان من ايامات خوها محمود

امال تنادى فى اختها فاطمه
-فاطمه: نستادنكم نشوف امال شن تبى
-حنان: ادنك معاك

وناضت فاطمه من جنبهم

-مفيدة : قتلك منسئلك حنونه
-حنان: نعم اسألى
-مفيدة: لما خطبك حسين شرط عليك انه بيتزوج ولا
-حنان: مفهمتكش
-مفيدة: قصدى مفروض تخليه ياخد بنية
-حنان: وانا من قالك مانعاته
-مفيدة: لا هوا انتى اصلا ماتقدريش تمنعيه بعد الجميل اللى داره فيك
-حنان بقوة: جميل شنو يا مفيدة .. هدا نصيب من الله
وناضت من جنبها مضايقه …

لمت صغارها وقالت للحاجه خلى نروح بالصغار يقيلو

___________

-فاطمه : تى كيف يا امال مستحيل
-امال: مديريليش حتى انتى زى مفيدة لما حكيتلها .. قلتلك الموضوع بادن الله حيصير منه غير انتو اوقفو معاى
-فاطمه: سالم ووجدان حيوقفو فيها
-امال: باهى شن رايك ان سالم ووجدان موافقين
-فاطمه: كانا هكى على بركت الله
ربي يكملك على خير وخيتى

_______________

حنان اضايقت من كلام مفيدة

تكلم فى نفسها

انتى شن وجعك .. كلمت داير فيك جميلة ..ولا كلمت بيتزوج
ويتزوج من شاده

انا ماقلتلاش ماياخدش

__________

وصل يوم الاحد
حسين يوتى فى شنطة حوايجه يبي يروح

خش ناجى لغرفته ..

-ناجى : شنو بتروح
-حسين يضحك: اهو نوتى فى روحى
-ناجى يضحك : ربي يصبرك
-حسين: انا لازم انحط النقاط عالحروف
-ناجى: ياودى منيش مصدق انك حتقدر تصبر
-حسين: لا ح نصبر لين نتاكد انها تبينى ومتعلقه بيا ونعيشو عادى زى اى راجل ومراءة .. لكن هكى انا تعبت الحق
-ناجى: انشالله ربي يهنيلك بالك

حنان فايقه من الساعه 6 تراجى

ناضو الصغار الساعه 9 .. دوشتلهم .. وفطرو ..

خش حسين الساعه 10 للسور متع الحياش ..

لقى خوته قعد يسلم عليهم ..

حنان تسمع فى صوته لكن مطلعتش تتحشم من سلافها
_______________

شويا وخش لحوشه …

لقى حنان لابسه سروال لاصق بيج وتيشرت ابيض ..
ولامه شعرها ديل حصان .. ودايرة قصه

جت سلمت عليه ..

شدلها يديها الزوز .. ستاحشك

قعدت تراجى يبوس على خدها

لكن هوا مادارش هكى …

لانه عنده حسابات ثانية

___________

قعد يسلم عالصغار ونزللهم اكياس متع العاب وحطهم وبدو يركبو فيهم

دارت قهوة وجابتها

ساكته وسرحانه وتتفرج على حسين والصغار كيف يلعبو …

عقلها يودى ويجيب … ربطت الاحداث بين كلام مفيدة انه تخليه يتزوج … وبين سلامه الجاف ليها

______________

الحلقه الجاية عرس امال ..

نحبكم❤❤