احفاد الشيطان للكاتبة زهور جمال الدين

#احفاد_الشيطان

بقلم زهور جمال الدين
?الحلقه الثانيه والعشرون ?

–

فى حوش المبروك ولد خو سالمه …

زكيه والمبروك راقدين مع بعضهم فى دار النوم ومطفيين الضى ..شرين تليفونه …فاقت زكيه
-زكية ناضت مخلوعه / مبروك … يا مبروك نوض تليفونك ايشرين
-المبروك / انشااله خير
خدى التليفون وشافه لقاه رقم غريب …رد عليه
-المبروك / الوو
-جار ايوب / شنحالك يا مبروك ..حوش ايوب ولد عمتك كلاته النار
-المبروك مش مستوعب/ انت شكون ..
-جار ايوب / انا خالد جار ايوب.. مش انت المبروك ولد خاله ولا
-المبروك مخلوع / يا راجل انا هوا …عاودلى مالاول الله يربحك مافهمتكش
-خالد / رقمك خديته من مصطفى صاحب ايوب جى هوا وجماعته توة لما سمعو
-المبروك / وايوب وينه
-خالد / ايوب جت تندرا توة كلبشوله ايديه ورفعوه
-المبروك / يا والله ليله موباركه انت شن تقول يا راجل
-خالد / اللى سمعته توة

وسكرو الخط …وناض المبروك يجرى يغير فحوايجه وزكيه اتبع فيه وترعش
-المبروك قام ايده بحزم/ امى وعمتى مايسمعوش كلمه من اللى صار ..لين نجى انا تو نعرف كيف نقوللهم
-زكيه / باهى
وطلع من دار النوم مشى للباب يجرى سكره بالشويا وطلع
وخشت زكيه ترعش
-عمتك سالمه من الدار تنادى/ يا زكيه …زكيه
-مشتلها زكيه ترعش/ نعم يا عمتى سالمه
-سالمه شادة السبحة فى ايديها / وين مشى المبروك
-زكيه ترعش / مشى يجيبلى فى حكة حليب ..الولد يعيط يبي حليب وبوه نسى ماجابش لما روح
-سالمه / بسمالله وين بيلقاه توة الحليب…وبعتالى وينه صوت ولدك ماسمعتاشى
-زكيه / هوا مزال ماناضش ..لكن قريب اينوض.. قلت يمشى بوه قبل مايبدا فالعياط ..وبعتالى انتى خيرك نايضه لتوة..
الفجر قريب يأدن
-سالمه حطت يدها على صدرها / نار فى فم كبدى..ماقدرتش نرقد
-زكيه / مش كلمتى ايوب واطمنتى عليه ..خيرك
-سالمه /كلمته ومع هدا النار مابت تطفا
-زكيه / نستادنك نمشى نشوف الصغار
-سالمه/ ادنك معاك يا بنيتى
ومشت زكيه ترعش مع بعضها …سخفتها سالمه اللى حست باللى صاير لى ولد خوها

____________________________________

–

فى مكتب التحقيق

ايوب مربطيله ايديه بالحديد …ومقعمز .. سايرهم لانه عارف ان وراه ناس مايسيبوشى …
-المحقق/ فكله ايديه
-جى الشرطى / حاضر يا فندى
ومشى لى ايوب وفكله الحديد اللى فى ايديه
-المحقق/ اسمك
-ايوب يشبحله باستهزاء/ ايوب العارف
-المحقق/ انت متهم بتجارة السلاح … وانك جبت كميه كبيرة منه فى حاويات للبلاد قبل شهر
-ايوب / مش مزبوط الكلام هدا ..انا عندى شركه تصدير واستراد .. نصدر فى البصل ونستورد فى البطاطا ..
-المحقق/ اعترف خيرلك …زكريا صاحبك باعك .. وجابنا العقود والمستندات كلها
-ايوب وجهه راح اسود / زكريا يبيعنى.. زكريا يفدينى بروحه
وتلفتله وعيونه حمر/ وتصدق لو باعنى ..هادى احلى بيعه تصيرلى
-المحقق/ تكلم كويس … العقود اللى شريت بيها السلاح وينها
-ايوب / خلى زكريا اللى باعنى يقوللكم على كلامها وين

وبدو يسمعو فى صوت صلى الرصاص …وصوت صهيب ولد عياط يعيط من برة
-صهيب / تى حول ايديك يا حاتم ..بوى مات …تى اقسم بالله ماتكفينى رقبته ورقبه اهله كلهم
وجماعته ايشدو فيه برة ..تاريته واصل واللى فالمركز جماعت وهوا اللى دايرلهم بلاغ على ايوب

ايوب جاته نوع من الرهبه …مهما يكون الولد عنده كلاش وهوا اعزل …
وقف المحقق/ هدا شنو ..من فى برة
وبدى ضرب الكلاشن …كلهم خدو وضع انبطاح …
خشت بعضها والقو القبض على مصعب عياد

____________________________________

–
فى حوش سالم جار ابراهيم

روقيه مقعمزة مع مبروكه وكنتها وعبير بنتها وخوات
روقيه …شوى وخشت خالتهم خديجه تبكى
-خديجه/ يا حليلى على حويش اختى …يا حليلى على رزق بنات اختى
-مشتلها سماح تبكى/ شفتى شن صار يا خالتى
وضبطتها ويبكو … ومشتلها سهام نفس الشى
-مبروكه / يا ناس ادكرو الله وصلو عالنبى فى هالليله المباركه
ورقيه عقلها مش معاهم بكل .. تفكر فى ايوب الى القو القبض عليه وقد ماعاودت لرقمه شى اينادى ومايبوش ايردو عليه …ومع انها قالولها هكى سكتت..لا تبى تبلغ خواتها ولا جارتهم … غصتها وتتصل وخلاص
-خديجه جتها تبكى / رقيه
-روقيه سلمت عليها / اهلين خالتى
اضبتها خالتها وقعدو يبكو ….
خش سالم / يا مبروكه.. مبروكه
-عمتك مبروكه / نعم با سالم
-سالم / قولى للبناويت النار طفت ..ووتى المربوعه للحاج ابراهيم بيبات هنايا
-خديجه / يمشى معانا لحوشنا وحوش بناويته
-مبروكه/ حليلى.. كيف يطلع من قدانا وهوا مقعمز قدام حوشنا …حتى سالم مايرضاش
-روقيه تبكى على بوها / خلى يبات هنايا ..وحتى انا بنمشى نبات معاه
-سهام / لهينا فى حوش بوى ..انتى شن صار فى حوشك ياروقيه
-مبروكه / وخيره حوش رقيه
-سماح / انحرق حتى هوا
-خديجه / محمد حاضر وعلى .. كيف الحوشين ينحرقو فى نهار واحد

-مبروكه مدهولة/ وشن صار فيه الحوش
-روقيه / من بكرى نكلم فى ايوب تليفونه خارج التغطيه
-خديجه/ انتو ماكنتوش فيه

-روقيه تكنطت / بالله الكلام هدا ماحد يقوله قدام بوى…
منبيش انقوله يزيد مواجع ..اللى فيه كافيه
وتلفتت لخواتها / روحو باتو فحياشكم وغدوة تعالو
-سهام/ كيف نخلوكم فالحال هدا ..وبعتالى …
-قصت عليها روقيه/ انا قلتلك باتو فحياشكم خلاص …
.اسمعو الكلام
وطلعت للممر / عمى سالم ..وينه بوى دخله …
دخلت روقيه بوها للمربوعه .. ساوتله الفراش.. ورقداته عليه ..
وطلعت للممر تتصل برقم ايوب نفس الشى ميردش
خطر عليها زكريا …اتصلت بيه باعتبار انهم بدو معارف
-رد عليها زكريا/ اهلين اختى روقيه
-روقيه صوتها مغصوص/ ايوب رفعوه ناس مش عارفه منهما
-زكريا مخلوع / كييف .. وخيره ماحد كلمنى..انتى من قالك
-روقيه بدت تبكى / اتصلت برقمه رد عليا واحد ..قالى انه موقف عندهم ويحققو معاه وسكر عليا ورقمه من بكرى يضبح وميردش
-زكريا / تمام تو نتصرف انا
-روقيه تبكى/ وراس اوخى خلينى فالصورة وطمنى
-زكريا / حاضر
وسكرت الخط ومسحت دموعها وخشت للصالة
شبحت لخواتها / مش قلتلكم نوضو
ناضو الزوز بالخلعه ..زبطو روقيه تكنطت

________________________________________

–
فى حوش ايوب …

الحريقه قويه هلبا …سيارة مطافى غلبت فيها …دورين…
والادوار الزوز والعه فيهم النار …
وصل المبروك ونزل يجرى حاط ايديه على راسه ..والجيران موصلين طوبوات الميه فحياشهم ..ويرشو فالنار بالطوبوات والسطول خايفين على حياشهم …
والشيابين يحكو للمبروك كيف صار وكيف ناضو من النوم على صنه الحريقه وكيف جى ايوب وقاموه فالسيارة
قعد مع الناس لين طفت النار …وهوا يخمم كيف بيقول لى عمته عالحريقه وكيف بيقوللها على ايوب رفعوه وهيا روحها فيه …
روحت المطافى وخشو المبروك والجيران للحوش يلقو النار واكلة كل شى …تقولى ضايفيلها مادة بيش تتقاوى النار
خش المبروك ومن رهبه الموقف رعش مع بعضه ودمعو عيونه حالة ..مستكبر الموقف كيف بيقول لى عمته
بعد مافحصو الحوش هوا والجيران وشافو الخراب اللى صارله …
جابو قفل من واحد من الجيران وسكرو الحوش بسلسله حديدة …وردو باب الجنان

_____________________________________

–

زكريا سمع بى شدت ايوب من روقيه قريب طار ..اتصالاته ماوقفتش.. حتى حريقه المكتب فاتها …ووصى لد خالته اللى مع جماعه الاطفاء وجيران ااشقه ..ايسكرو المكتب ومايمسو شى لين ايجى…باعتبار حوش بوه مش خايف عليه وصى ولاد جيراته وبعت سيارتين من الجماعه التابعين ليهم

..قعد يخمم مفيش حد يعرف عليهم كل الاخبار الا امحمد الشياطين …واحتمال هوا الوحيد اللى يعرف ايوب وينه ..مع انه تكلم مع زوز عقداء مكتبهم عنده بيهم علاقه …خمم وين يمشى لى امحمد ويلقاه ماخطرش فى باله الا مكتبه ..
دور سيارته ووراه سيارة من اللى تابعينه ومشو جه مكتب امحمد … لما قرب من راس الطريق الرئيسيه اللى فيها مكتبه لقى ناس متجمعين ..سألهم شن فى .. قالوله واحد ايقولوله امحمد لقوه مقتول فى مكتبه !
زكريا وخر طول … ستر الله اللى ماجاش قبلها بربع ساعه
كنهدا راهو خش للمكتب واتهموه بيه…
طلعو من جهه مكتب امحمد ….شرين تليفون زكريا ..
كلمه واحد من العقداء اللى موصيه وقاله انه عرف الجهه اللى رفعت ايوب …خدى العنوان وطار طول بيش ينقد صاحبه ….

____________________________________

–
فى مكتب التحقيق

الشرطه القت القبض على صهيب ..وهوا يعيط ويبربر..
-صهيب/ يا مسخين .. يا اولاد الشيطان ..اقسم بالله لما نهده على روسكم المركز هدا
-الشرطى / تى صكر فمك وقعمز فى كرسيك …
صهيب شادينه فى الكارادورى الخارجى .. وايوب والمحقق فى الدار الداخلانيه والباب مفتوح ..
-صهيب يشبح لى ايوب بغل/ تى والله قتلت بوى ماك بارد بيها يا مسخ
-ايوب/ نقتل بوك وعشرة زيه فداء لى دم موسى
-المحقق/ هدا اعتراف انك قتلت بوه
-ايوب / هادى مش قضيتك توة يا خوى
-المحقق/ اولا انا مش خوك .. ثانيا اعترافك توة قدامى يخلينى نفتح محضر …
-صهيب موقفينه بيرفعوه بتهمه التهجم/ تى والله لما تشوف يا خامر
وبدو يسمعو فى صوت سيارات تتصكر وكلاشنات تضرب
الكل خافو … وخش مؤيد خو صهيب هوا وجماعته بيطلعو صهيب لان رجالة صهيب اللى قعدو برة اتصلو طول بخوه مؤيد …
صار ضرب السلاح ..ايوب مشى يجرى للشرطى اللى واقف خدى منه كلاشنه وبدى يضرب …وتجى طلقه فى راس صهيب ايطيح مكانه
-مؤيد زى المجنون / صهيب …قيمو صهيب يا بهايم
وتلفت للجماعه اللى جنبه / هاتوه الكلب
ويهيجو قريب عشرة نفار .. اللى تجى فيه طلقه يطيح والباقى خدو منه الكلاشن وشدوه طلعوه للسيارات برة
ومؤيد وباقى الشباب قايمين صهيب …
ولعو يجرو بالسيارات ..وصل بعدهم زكريا بعدهم قريب بى ربع ساعه لقى الدنيا خراب وسيارات الجيش مطوقين المكان والكل يحكى عالهجوم اللى داروه السيارات والشخص اللى قاموه بين ايديهم ورفعوه معاهم
” معقولة ياناس هدا كله ايصير فى ليبيا ..خسارة ماصفقنا وماشجعنا ”
______________________________________

–

فى حوش المبروك

وصل لحوشه والفجر يأدن … اتفاجأ لقى زكيه مرته مطلعه معاها ولدها فؤاد الكبير عمره 9 سنوات واطق على حوش الجيران
درس سيارته ونزل
-المبروك / زكية
-انخلعت زكيه وتلفتتله / باهى اللى جيت يا مبروك
-المبروك / خيرك شن اديري فالشارعة
-زكيه / عمتك طاحت علينا صايخه
-المبروك / خيرها …ماهو قلتلك ماتحليش فمك
-زكيه / يا راجل استرنا رانا فالشارع .. انا ماقلتلهاش …
جارتها كلمتها قالتلها حوشك انحرف وولدك انحبس
-المبروك ايعيط / الله يهديك .. وانتى وين
-زكيه / كنت اندخل فالصغار للحمام … تربح غير اجرى المراء اطلع فالروح
خش المبروك يجرى لقى امه مقعمزة جنب عمته وتبكى
-المبروك / تعالى يا زكيه انتى وفؤاد عاونونى فيها

جت زكيه تجرى هيا وفؤاد وعاونوه فى رفع الحاجه للسيارة
وركبت معاه زكيه وخش فؤاد وسكر الباب
وصلوها للعيادة خدوها الممرضات يجرو وسكرو عليه الباب هوا وزكيه خلوه فالانتضار
لما طلع الدكتور …
-المبروك / هااا يا دكتور شنحالها الحاجه
-الدكتور?/ الحاجه جتها جلطه عالدماغ

_______________________________________

–
ثانى يوم العصر …

جنازة عياد وولده صهيب .. ماتو فى نفس اليوم …مؤيد ولدهم يبكى دموعه زى المطر …وفى خاطره غضب يسد العالم اكله…
كملو صلاة الجنازة… وعزو مؤيد ….
وروحو للخيمه ….
مؤيد وواقف عالشباب اللى يخدمو عنده
-مؤيد / زى ما وصيتكم
-حسام / اللى قلته كله صار يا عرفى ..من امس لليوم لا ماكلة لا شراب
-مؤيد بغضب/ تعرفو لو يهرب منكم ..مايكفينيش سلخكم وانتو حيين
-جلال/ كون هانى يا عرفى .. مستحيل يهرب ..الحراسه مشددة عليه
-مؤيد / وفرخ الحرام الثانى
-حسام / سيوره ينشد كانا مش اليوم غدوة ..لامتى بيقعد مختفى…ولامتى بتقعد السيارات تحمى فى حوش بوه
-مؤيد / والكلب امحمد
-جلال / من امس عطاك عمره
-مؤيد / بيش يتربى … ويعرف كيف يجيبلهم شحنه سلاح الواطى
-حسام / ايوب ماعنده حد الا زوجته وحناه هما اللى عايش معاهم …بوه متوفى وامه مش معاه ..يا اما فى حوش بوها ويا اما متزوجه… غدوة بيجيبولنا المعلوم الجماعه
-مؤيد / اهم شى زكريا فرخ الحرام نبيه اليوم قبل غدوة
-جلال / منغير ماتوصى يا عرفى دايريله كماين فى كل مكان
-مؤيد / تو يشبح … اهله هادو لما يبوسلى رجليا وايديا بيش انسيبهم

_____________________________________

–
وفاتو 4 ايام ….

سالمه راقدة فى مستشفى الخضراء … فى غيبوبة مافاقتش
وروقيه قاعدة مرافقه معاها ….
حوشها محروق ..وحوش بوها محروق .. ومع هدا لقت من الواجب انها تقعد مع حناها سالمه فة المستشفى لان حالتها خطيرة …

اما ايوب …دارو معاه كل انواع التغديب …من ضرب واهانه
حتى الكرسى متع الكهرباء قعمزوه فيه ..
متهالك وحاطيله زوز خيوط متع ضى فى صدره وهوا يعيط
مؤيد شاده من شعره / وينه صاحبك اللى بينقدك .. باعك
وقعدو يضحكو
خدى تليفون ايوب .. وطلع رقم روقيه …
-مؤيد / توة بنكلمهالك بطلقها
-ايوب متهالك / مستحيل
ضربه الولد من الخلف / رد باهى يا حمار

“هدا هوا قهر الرجال ”
-مؤيد / تبيها تنجا مننا طلقها …والا والله ماتلقاها الا قدامك هنايا زى ماخلقها ربي
ضرب مؤيد رقم روقيه..كان كاتبها ايوب ماى وايف” زوجتى”

الخط اينادى… روقيه شافت رقم ايوب قريب طارت من الفرحه ..
قربت من عمتك سالمه / نوضى يا حناى ..اهو ايوب يتصل
فتحت الخط / ايوب حبيبي واخيرا اتصلت ماخلينا مكان ما دورناش عليك فيه
-ايوب مغمض عيونه / انتى طالق
-روقيه انصدمت/ نن ننعم .. كيف انا طالق .. ايوب ..ايوب ..ليش اطلقتنى ليش
ايوب يسمع فيها وعيونه معبيات دموع …

_______________________________________

تمت ….ويتبع

كيف بيصير فى ? ايوب وروقيه وعمتك سالمه
غدوة انكملو

نحبكم ❤