احفاد الشيطان للكاتبة زهور جمال الدين

#احفاد_الشيطان

بقلم الكاتبه زهور جمال الدين
?الحلقه السابعه عشر ?


السيارة تحت الجرف .. وهما منهارين كلهم ايوب وزكريا وصحابهم …
ايوب بينزل للسيارة شدوه الشباب الا بالسيف
-اشرف صاحبهم / تى كيف تنزل يا ايوب اطيح فالقاع لوطه حتى جثتك صعب ايطلعوها
-ايوب يجبد فى ايده / تى حول يا اشرف …موسى طايح فالسيارة
-زكريا / كيف قصدكم كانا نزل واحد مننا بيطيح
-اسعد / منغير ماتفكر .. احنا جباليه والمنطقه احنا نعرفوها كويس
واتصلو صغار المنطقه بصغار عمامهم جابولهم رافعه …
وقعدو قريب ساعتين وهما يحاولو ايطلعو السيارة
وفالاخير نزلو زوز شباب بالحبال .. بيش ايطلعو موسى عالاقل …وبالفعل نزلو الشباب وفتحو السيارة وطلعو موسى مابين ايديهم
مشاله ايوب وزكريا يجرو ويحركو فى وجهه / موسى
..موسى .. موسى تكلم
فتح موسى عيونه شبح لى ايوب ….
-زكريا يعيط / موسى حى …حى قيموه يا شباب

قاموه حطوه فى سيارته اللى عطاها لى ايوب …
وركب ايوب بيسوق …
طلعه اسعد / حول يا ايوب تو نسوق انا
وبالفعل نزل ايوب وركب جنبه …وزكريا من الخلف مع موسى
ومشو للمستوصف يجرو
ايوب / اجرى با اسعد ..اجرى
-اسعد / اهو وصلنا يا ايوب صلى عالنبى
-ايوب / عليه الصلاة والسلام
وتلفت لى موسى ماسك خده ويحرك فيه ويبكى/ موسى فيق .. موسى
-اسعد / اهو وصلنا للمستوصف
خشو ودخلوه للاسعاف .. رقدوه عالسرير
خشله الدكتور يجرى …بعد شويا طلع
-الدكتور / درتله تحويل لى طرابلس .. الاسعاف برة جهزوها وارفعوه طول
وبالفعل طلعو الاسعاف من القراج وركبو فيها موسى فى السرير وجنبه ايوب وزكريا ..ومعاهم ممرض
طارو بيه لى مستشفى بوسليم …وصحابهم وراهم فالسيارات … المغرب ادن عليهم فالطريق …
وصلو الساعه 9 فالليل …
دخلوه طول للاسعاف ….وماخلوش حد ايخش من صحابه
فالممر زكريا مضبط ايوب ويبكى .. وصحابهم ايبعدو فيهم على بعض…
فاتت ساعه ..واثنين وثلاثه ….
وهما ايجيبو فى الدم وايدخلو ….
قيس الساعه 12 ونص فالليل

طلعت الممرضه / وين اهله .
ايوب وزكريا فى صوت واحد / احنا اهله
-الممرضه / تفضلو للدكتور الداخل ..والباقى خليكم هنايا

خشو ايوب وزكريا للممر وقلوبهم اطق..وقلوبنا كلنا اطق معاهم …
ايوب / ايوة يا دكتور
-الدكتور / خشو شوفو ولدكم ..طالب ايشوفكم
خشو ايوب وزكريا يجرو ….
وقفو جنب بعضهم ..ايوب يبوس فى وجه موسى ..وزكريا ايبوس فى ايديه
موسى فتح عيونه بصعوبه ….
-ايوب يبكى/ الحمدالله على سلامتك يا صاحبي
-زكريا / الحمدلله على سلامتك يا موسى ..ربي يطول فى عمرك
-موسى بصعوبه / بوى….امى …خواتى….وكنزى ..وانتم سامحونى
ونفخ فى وجههم الزوز …وقعدو عيونه مفتوحات
-ايوب يبكى/ موسى …موسى
وزكريا طاح على رجليه / لاااا لااا لااا
-ايوب / تى صكر فمك موسى حى
خشو الممرضات والدكتور يبو يطلعوهم …
ايوب مد يده وغمض لى موسى عيونه / والله اللى دارها لما نشرب من دمه …ونخليه عبرى

طلعو ايوب وزكريا يبكو

صحابهم انخلعو مشو يجرو/ شن فى ..خيره موسى مش قلتو كويس
-الدكتور / الدوام لله

وصارت ضجة فى الممر كلهم يضبطو فى بعضهم ويبكو .
فات الوقت منغير مايحسو … شافو الساعه لقوها 2 فالليل …قررو انهم مايخبروش اهله الا الصبح ..
-ايوب / مستحيل .. موسى يموت ونقول لامه الصبح ..
استحاله
-اسعد / من بيخبرهم
-ايوب / تو نمشى انا نقوللهم ….
ركب السيارة هوا وزكريا صاحبه ….بيمشو لاهل ايوب ايبلغو بوه ….
فالطريق زكريا بلغ امه بالوفاة لان عندها علاقه قويه مع ام موسى
وايوب قام التليفون اتصل بى حناه خبرها …وطارت لحوش عبدالنبى جارهم تبى محمد ولده ايوصلها عندهم
واتص روقيه خبرها …وقاللها بنصكر تليفونى ماتنشغليش ..
وعييت ماتبكى وتواسى فيه
ووصلو لحوش موسى .. نادو بوه …

-عمك صالح بو موسى يشبحلهم وخايف ومخلوع / خيركم جايين عقاب الليل الساعه 2 ونص توة …ووين موسى
-ايوب يبكى / موسى عطاك عمره
وخش الشيبانى يجرى / يا صالحه …يا صالحه …
وناض العياط فالحوش لداخل …وايوب وزكريا يبكو برة ..
وتلمدو عليهم الجيران …
وبدو خوات موسى يخشو بالوحدة امانى وامال وخلود
اللى يجيبوها يقولولها بوك مريض ولما توصل تلقى الشباب يبنو فى الخيمه يخبروها ان موسى هوا اللى مات …
صوت العياط حالة ….امانى اخته طاحت من لما خشت مغمى عليها طلعوها جيرانهم ركبوها فى سيارة راجلها رفعها للعيادة

_____________________________________

فى حوش ابراهيم ?

بعد ساعه ..حوالى 3 ونص ليلا

روقيه عاودت اتصلت بي ايوب لقت رقمه مقفل..كلمت عمتك سالمه تسأل وينهم .. ردت عليها قالتلها انها مشت لى حوش الوفاة وبتبات فيه …. فقعدت روقيه ليلتها فى حوش بوها ماروحتش للحوش ….
وباتت ليله حرفه مع اختها مرام على خاطر كنزى اللى عازمتها اتجيها من غدوة لان اهل موسى بيجوها

مرام قريب تهبل زعما كنزى سمعت ولا مزال..فتحت الفيس لقت كنزى تعلق عادى عالمنشورات ومش سامعه بالوفاة
…ياغبارة .. مرام بتموت بالبكى …كيف بدير بس اتقول لصاحبتها ولا تسكت
-روقيه متكيه مرام فى حضنها / كيف بديري توة .. بتكلميها ولا لا
-مرام تبكى / مستحيل نقوللها ..البنت احتمال تموت ..هوا غير سيبها يومين خشت فى انهيار عصبي وكآبه
-روقيه / ياروووحى عليها كنزى لازم نمشولها ونواسوها

-مرام ناضت قعمزت وحاطه يديها على خدودها / غبارة لما بتسمع شن بدير ..ومن بيقوللها .. وكيف بيقولهالها …وهيا عابيه عليه غدوة بيجيبلها اخته الكبيرة لامها يخطب
-روقيه ردت مرام لحضنها / بالك اتلوم عليك لما تسمع انك عارفه بالموضوع وماقلتيلهاش
-مرام / ومنين بتعرف انى عرفت
-روقيه / صح كلامك .. يومها لما سألنى ايوب عليها وسألتك
.. ماقلتلكش ان السؤال عشان موسى
-شبحتلها مرام / انتى كنتى تعرفى ان موسى صاحب كنزى
هوا نفسه موسى صاحب ايوب
-روقيه / ايه كنت نعرف انه نفسه
-مرام تبكى / باهى خيرك ماقلتيليش
-روقيه / حبيبتى مرام ..هدا مش موضوعنا توة .. ومدامك اوخيتى مش متحملة انك اتشوفى صاحبتك محروقه على خطيبها .. باتى الليله وانتى ساكته ..واول ماتلقيها سمعت امشيلها طول ..خلى الخبر ايجيها من بوها ولا امها ..هما اقرب الناس ليها
مرام راقدة فى حضن روقيه وتبكى حالة ..واجعتها صاحبتها اللى انحطت فى موقف ماتنحسدش عليه
-روقيه / تو نكلم سهام اتجى تقعد مع بوى .. وانتى امشى لصاحبتك بعد تسمع ..قولى لى معاد يرفعك
مرام تبكى حالة

______________________________________

ثانى يوم ?

فى خيمه النساوين

كل اللى فى الخيمه يبكو ….مفيش مراءة ولا بنيه ساكتات
كلها تبكى …
قطلعهم قلوبهم امه اللى تبكى وتعدد عليه .. ياوليدى يلى جبتلى ..يلى قضيتلى ..يلى رفعتنى وصرفت عليا ودرت عراس خواتك وهاتلك من هالكلام اللى يقطع القلب …
جاراتها وعمتك سالمه وام زكريا مقعمزين جنبها ايصبرو فيها وخلاص

اما خواته? يانارى كل وحدة ملوحه فى تركينه …

شوى ودخلو اخته امانى الكبيرة جابوها تشوف خوها مع انها شبه فايقه ..ضاربيلها غير مهدئ ومنوم .. هيا فالاصل بنيتها ضعيفه وديما بالتغديه ..
وهيا اللى كان بيرفعها معاه تخطب هداكا اليوم .. وكان متفق معاها ماتقول لحد حتى خواتها ..هيا بس اللى عندها العلم
…حتى امه بالرغم شاورها انه بيخطب لكن ما قاللهاش على انه بيرفع امانى للناس …يانارى كان متوقع بو كنزى يرفضه لفارق السن .. فمحبش ايكبر الموضوع ويقولو عليه ردوه ناس..
لما دخلوها بين ايديهم …حكم دايخه ..وشبه مغمى عليها..
يضربولها فى وجهها ويبخو عليها فالميه بيش اتفيق
حتى موضوع كنزى والمشى مع خوها ماخطرش حتى عليها من صدمه موتت خوها وكثر المهدئات اللى ضربوهملها
عزوزتها وحماواتها جنبها …ايفيقو فيها كل شوية …
ايبخو فى الميه على وجهها شبه فاقت وهيا مصدومه مش مستوعبه ان موسى توفى وقامو عزاه

قبل الضهر بشويه …

خشو صغار عمه ودخلو التابوت للمربوعه …
ودخلو امه وخواته … وحلفوهم ما حد ايعيط …
شافوه ومسو وجهه وسامحوه….خواته الثلاثه طلعوهم دايخات … اخته الكبيرة امانى والصغيرة خلود رفعوهم للمستشفى دايخات .. قعدت غير اختهم امال الوسطيه مع امهم… ..
كل الناس تبكى راس اوليد يانارى اشتاقوه ….
______________________________________

قبل الضهر بشوى ?

خيمه كبيرة حجمها قريب 7×10

كراسى حمر وزرق…والخيمه مليانه بالرجالة
ايوب وزكريا مقعمزين جنب بعضهم يبكو ……
وصوت القران يقرا ….والناس كلها ترحم على موسى …كان شخص محبوب جدا من الناس كلها …

ادن الضهر ….
ناضو كلهم بيمشو للجامع بيش يصلو الضهر وصلاة الجنازة على موس?
بوه يا نارى قايمينه غير ولاد عمه واقاربه …راس اوليد وارتزى فيه …
مشو زكريا وايوب للجامع وكل واحد يعلم الله بحالته …
قامت صلاة الضهر وصلو ….
وقامت صلاة الجنازة … وصلو عليه صلاة لا ركوع فيها ولا سجود
مع كل تكبيرة يهتز جسم ايوب بالكامل …وفى داخله غضب ونار تحرق بلاد كاملة
قامو التابوت بيطلوعه للسيارة مشو ايوب وزكريا قاموه من قدام وصغار عمامه من الخلف
مشهد مبكى … ايوب مايشوفش فى شى قدامه …ضميره يعدب فيه …مفروض اللى بيموت هوا ..وجت فى موسى .. صاحبه اللى تعرف عليه من ايامات المراهقه
زكريا يمشى ويبكى وصوت موسى فى ودنه لما كانو اخر مرة فى المكتب .. يتخايل فى موسى لما يقول”يابخته والله حسدته ” ….ويمشو بالتابوت وصلوه للسيارة عكاريه عاليه فتحو الكوفينو من الخلف وبدو ايدخلو فى التابوت..
وزكريا قاعد صوت موسى فى اودانه ” خلاص انت لقيت الشقه ..وحتى انا بنخش فالعسل وبتحسدنى ”
كملو تدخيل التابوت وركبو ايوب وزكريا وزوز صغار عمه جنب التابوت … ومشت السيارة …. والكل ركبو سياراتهم ومشو للمقبرة
وصلو المقبرة ونزلو التابوت .. الدفانه حافرين القبر …
وصلو قدام القبر .. ونزلوه ايوب وزكريا وصغار عمه ..
حولو الغطا من على وجهه …صافى يبان زى العريس..
وانهارو صحابه الزوز .. بعدوهم …وكملو صغار عمه باقى مراسم الدفن …
وجت الرجالة تعزى واقفين بوه وبعده ايوب وبعده زكريا وبعدهم صغار عمام موسى ورجالات خواته …
كل اقارب ايوب وخوته وجيرانه مشو ايعزو …لانهم عارفين موسى شن يعنى لى ايوب …دفينه تقول مهرجان ..ماقعد عليهم حد ..جوهم حتى ناس اصحاب مناصب
وتمت الدفينه وروحو للخيمه ….

_____________________________________

فى حوش سالمه بعد الضهر

روقيه روحت لى حوشها وصلوها معاد ولد خالتها واختها سهام …خشت فتحت بالمفتاح لقت الحوش فاضى … والضى هارب اتصلت بى ايوب نفس الشى رقمه مقفل .. اتصلت بي عمتك سالمه قالتها انها قاعدة فى الوفاة.. وانفصل الخط طفى شحن روقيه ….
خشت لدارها اتكت عالسرير تراجى فى ايوب ولا عمتك سالمه واحد منهم ايروح …

بعد العصر

قاعدة متكيه فى سريرها .. تسمع فى باب الحوش انفتح ….طلعت من دارها تلاقى ايوب كيف خاش .. وشكله مبهدل وحزين
-مشتله تجرى حضناته / سلامه راسك حبيبي
-حضنها ايوب وهوا يبكى / ايدى اليمين انقطعت ومعش بتولى ..
-روقيه تبكى / بعيد السو عليك حبيبي
وخداته من يده دخلاته دار النوم … رقداته عالسرير
..وقعمزت جنبه ….خداته فى حضنها زى البيبي وهوا يبكى
-ايوب / من جابك

-روقيه / جابنى معاد ولد خالتى وسهام اختى
-ايوب / جو الزوز معاد واحمد للجنازة
-روقيه نزلو دموعها / يارويحتى .. لا تزوج ولا دار صغار
-ايوب / لكن اقسم بالله مانى ساكت..كانا نص ليبيا انودرها
-روقيه/ ايوب وحد الله

-يمسح فدموعه / موحده من يوم يومى .. لكن اقسم بالله اللى قتله لما نعرفه ونشرب من دمه ..هوا واللى خطط واللى شاركه
-روقيه / حبيبي بالك موته قضاء وقدر
-قعمز ايوب وشبحلها عيونه حمر/ موسى مات بدلى انا
-روقيه انخلعت/ كيف بدلك انت .. مفهمتش
-ايوب / مفسدين فرينوات سيارتى .. وركب فيها موسى بدلى

وحط ايديه الزوز على وجهه/ ومات هوا بدل مانموت انا
-حطت يدها الزوز على وجهه/ متخوفنيش عليك ايوب
شرين تليفونه والبتاريه اتأشر يادوبك شحنه فى السيارة شوى
-فتح الخط ورد / ايوة
-حسن / جوك جماعه يا ايوب وينك
-مسح دموعه / هى ربع ساعه ونجى قعمز معاهم انت وزكريا
سكر الخط …
وتلفت لى روقيه / وتيلى حوايجى خلى اندوش ..
وناض خش للحمام … وناضت هيا جهزتله حوايجه …
يادوبك خمسه دقايق وطلع …لبس حوايجه
-روقيه / راجينى شوووية نجهز نفسى ونمشى معاك
-ايوب / حبيبتى سمعتى بودانك جايينى ناس.. نخاف نعطل ويمشو

-روقيه / باهى حبيبي على راحتك …
-حضنها بالقوة / عارف روحى مقصر معاك حبيبتى ..
-حضناته بايديها الزوز / ياااربي مانفقدك ولا نفقد حنيتك عليا
طلع من الدار وروقيه وراه اتسقد فيه
-ايوب / وتى روحك تو نبعتلك خوى حسن ايجيبك للوفاة وروحى مع حناى فالليل

-روقيه/ بيجى بروحه ولا معاه ايناس
-ايوب / حسن وحسين خوتك ..لما نبعتهملك معناها بعتلك اخ ليك.. وتتصرفى معاه كأنه خوك
-روقيه / حاضر .. لكن تليفونى مسكر قوله ايطق لما يوصل

-ايوب / نفتحلك المولد
-روقيه / لا معش نعرف انسكره كانا رجع الضى
-ايوب / تمام فى امان الله
-روقيه/ فى امان الله

_____________________________________


قبل المغرب بساعه

فى خيمه العزى متع النساوين

سالمه وامنه مقعمزين جنب بعض .. شرين تليفون امنه
قماته وشافت لقت حسن يتصل بيها ..ردت
-امنه / الوو
-حسن / اهلا يااام .. هاا شنو بتروحى
-امنه / مزال بنقعد.. وشوى ثانيه تو انروح مع بوك حتى هوا هنايا فى العزى
-حسن / قالى ايوب جيب روقيه تعزى توة ..بنمشى بنجيبها
-امنه / لا خلاص امالا خلى نقعد نراجيها هنايا وتو نروح حتى فالليل
-حسن / باهى على راحتك …
وسكرو الخط ..
-سالمه/ منو اللى بتراجيها هنايا
-امنه / روقيه ..ماشى بيجيبها حسن توة
-سالمه وجهها تغير/ منهيا اللى بيجيبها ..شنو ماتفهميش انتى يا امنه ولا كيف … كيف تخش عزى وهيا قاعدة ماختش فرح
-امنه اتفاجئت / لا عارفه الحق .. لكن موسى صاحب ايوب هلبا زى وخيه ..مستحيل يرضى ان زوجته ماتجيش اتعزى
-سالمه / وكانا هوا مايفهمش انجو زيه حتى احنا …كلميلى حسن وهاتى التليفون
-امنه / باهى

وقامت التليفون واتصلت بولدها حسن وعطت التليفون لى عمتك سالمه
-حسن / ايوة ياام
-سالمه / حسن اوليدى شن حالك
-حسن / الحمدلله شن حالك انتى ياعمتى سالمه
-سالمه / الحمدلله كويسه.. شن بنقولك ..رقيه خليها توة ماتجيبهاش ..
-حسن / علاش شنو فى حاجه
-سالمه / يا اوليدى هادى حاجه انتو ماتعرفوهاش .. كيف عروسه اتخش الحزن قبل ما اتخش الفرح .. خليها توة بعد اتخش فرح تو انجيبوها هنايا تعزى
-حسن / على راحتكم
وسكرو الخط …

ناض حسن من مكانه مشى قعمز جنب زكريا
-تلفتله ايوب / خيرك ما مشيتش وين قلتلك
وقف حسن ومشى جنب ايوب ايوشوشله / حناك قالتلى مانجيبهاش .. قالت مايجيش اتخش حزن قبل ماتخش فرح

-ايوب تكنطى ووجهه بدى احمر/ كلمهالى وهات التليفون
-حسن / باهى
وتلفت حسن واتصل بى امه ..وطلب منها عمتك سالمه
..ردت عليه وعطى التليفون لى ايوب
-سالمه / الوو
-ايوب / شن حالك يا حناى
-سالمه / من عند ربي الحمدلله يا اوليدى
-ايوب / كيف تقولى لى حسن ما تجيبش روقيه للعزى..منين بنجيبهولها العرس انا توة
-سالمه / على كيفه يا اوليدى .. حتى كانا ماجتش ..اهو انا وامك جينا وانا بايته من امس
-ايوب تكنطى هلبا / تعرف كيف ..امالا اقسم بالله كان ماتجى روقيه تعزى اليوم ما عاد بايته عندى ليله
-سالمه انخلعت / حليلى يا اوليدى ..والمراءة فاش جت تحلف عليها ..انا اللى قلتلك
-ايوب / اهو قتلك وديري رايك انتى ..هيا بالسلامه
وصكر الخط …

-سالمه تلفتت لى امنه / كلمى ولدك حسين ايجينا
-امنه / ايجينا علاش .. اهو حسن قال بيمشى ايجيبها
-سالمه / قلتلك كلمى حسين ..حسن ولد واعر
-امنه / باهى شوى بس
وكلمت حسن وقالتله مفيش داعى تجينا وكلمت حسين قالتله تعالنا توة انا وعمتى سالمه
وتلفتت للحاجه / معرفتش احنا علاش ماشيين
-سالمه / تو نقولك …

وبالفعل جاهم حسين …وركبو معاه الزوز …ومشو للحوش …لقو روقيه واتيه تمشى للعزى لان المغرب حل والحوش بدى بيضلم ..ركبوها معاهم فى السيارة ومشو
-سالمه / حسين اوليدى ارفعنا لاى صالة قريبه
-حسين مستغرب / صاله شنو ..صاله ملابس ولا احدية
-سالمه / لا ملابس ..لا احديه .. نبو صالة افراح
-حسين/ صاله افراح!!!.. وليش يعنى مفهمتش
امنه تضحك ..زبط شن قصد سالمه
-سالمه / غير ارفعنا سلم اوليدى وتو انقولك انا علاش
-حسين / اهيا الصاله القريبه عليكم فيها حفلة اخت صاحبى توة

-سالمه / خلاص امالا ارفعنا ليها
ممكن خمسه دقايق ووصل / اهيا الصاله ..هيا تفضلو
والمغرب يأدن
-سالمه / روقيه هيا انزلى خشى معانا للصالة شوى
-روقيه مستغربه / وعلاش بننزل
-سالمه/ انتى غير انزلى معاى وبعتالى تو انقولك علاش
-روقيه / اولا مانقدرش انخش صالة افراح لى ناس مانعرفهمش ..ثانيا حتى راجلى مش مشاوراته
-سالمه / سلم بنيتى ماتوجعيليش قلبي ..ايوب يبيك تمشى تعزى وانا والله مانخليك اتخشى للعزى قبل الفرح ..فكينا
منه احكيله بعد ما نخشو ..تو يديرلك حالة ويقولك ماتخشيش
-روقيه ?/ باهى حاضر
ونزلو للصاله خشو من الباب بحجابهم ..فاتو الممر ..لحد ماوصلو للقاعه لداخل ..
الانوار ساطعه والمنظومه تخبط ..اهل العرس بس موجودين
المعازيم مزال ما وصلوش
جت ام العروسه اتسلم / تفضلو مرحبتين بيكم
-سالمه وجهها يتخضر ويتصفر ?/ شكلنا غلطنا ..مش هدا العرس اللى جايينه
-ام العروسه / تفضلو .. حتى هدا عرس مرحبتين بيكم
-سالمه / زاد فضلك ..مبروك عليكم انشالله ..خلى نمشو للعرس اللى قاصدينه عاد
-ام العروس/ على راحتكم
وطلعو ركبو سيارة حسين واتسقدو لى حوش العزى
وخشت روقيه …قعدت تبكى هلبا …وجعوها ام موسى وخواته

____________________________________


فى خيمه الرجاله …

تليفون زكريا ايشرين شاف لقاها ايناس…تحشم من امس وهيا تكلم فيه وهوا يصكر عليها
فتح الخط / الو
-ايناس/ واخيرا حبيبى رديت عليا .. سلامه راسك ..
-زكريا صوته مغصوص / الله يسلمك

ومشى بعيد قعد يحكى معاها شوى

ايوب مقعمز ودايرين بيهم معارفهم يهدرز ….
شوى وجى زكريا قعمز فالكرسى اللى جنبه …
ونادو امحمد جنبهم .. وقعدو هما الاثنين متلفتين لى امحمد ايهدرزو عليه ويوشوشو معاه

-ايوب / قلتلك الفرينوات واقفات ..احنا سكتنا بيش ايسلموه لاهله وندفنوه …
-زكريا / لكن وفاته جريمه …واللى دارها لازم يتعاقب
-امحمد / هوا قالو توفا بسيارتك انت ولا يا ايوب
-زكريا / مش قلنالك بفعل فاعل .قاصدين ايوب وجت فى موسى
-امحمد / والله بنحاول وانشالله نوصلوله ولد الحرام هدا
-ايوب / لاااا ..مش بتحاول …بتجيبهولنا …واطلب من جنيه للمليون ..تعرفنى منقصرش معاك
-امحمد فرح / لااا مش بيناتنا عاد
-زكريا / لما ينوو قتلنا .. تبدا مستاهله… وكل شى بثمنه
-امحمد / فى ثلاثه شاك فيهم .. والثلاثه عندى عيون فى وسطهم .. وقراب منهم …لو واحد منهم اللى دارها انجيبلك اسمه
-ايوب / تم
-امحمد / لكن انا ناخد حقاتى …لا شفتك ولا سمعتك
-ايوب / تم

تلفون زكريا شرين … رقم غريب

-رد عليه / الو
-صوت رقيق/ ايوووة ..كيف حالك خوى زكريا ..انا كنزى
-زكريا يبس فمكانه وشد يد ايوب بلقوة / اهلا بيك اختى
ايوب انتبه اشرله بيده شكون
زكريا حرك فمه / كنزى
ايوب دمعو عيونه طول ..
-كنزى / الوو .. الو
-زكريا / ايوووه معاك
-كنزى/ معليش لو موسى جنبك اعطيهولى نبيه ضرورى
-زكريا صوته انغص / لا مش جنى
-كنزى/ مش عارفه كانا عندك علم اولا ..بس موسى كان المفروض ايجيبلنا اخته اليوم ..وامس الصبح كلمنى واجلها لى غدوة قال مزرد مع صحابه .. وانا الحق انشغلت رقمه مقفل من امس الصبح ..ورقم اخته امانى اللى كلمت ماما حتى هوا مقفل ..معش فهمت
-زكريا معش عرف شن يقول / اختى قدامى بوابه مضطر انسكر الخط وتو نعاودلك ..
سكر عليها …وسكر تليفونه بكل
-ايوب / مش سامعه
-زكريا / لا
قام ايوب تليفونه واتصل بى روقيه / اطلعى من الخيمه تلقينى فى سيارة خوى حسن
-روقيه / نقول حتى لى حناى وعمتى هيا

-ايوب / لا انتى بس ..ترا وين عندنا ماشيين
-روقيه / باهى
وسكرو الخط

مسك زكريا يده / بتمشيلهم
-ايوب / حق موسى علينا
وتلفت لى خوه حسن/ ترا مفتاح السيارة
مدله حسن المفتاح وطلع

مشى جهه خيمه النساوين ركب روقيه ومشى
-ايوب / شن قلتى لى حناى
-روقيه / قلتلها ايوب يبينى فى مشوار
وتلفتتله / واحنا وين ماشيين
-ايوب / بنمشو لى حوش كنزى بنخبروها بالوفاة

_______________________________________

فاتو على مرام ركبوها …ومشو لى حوش كنزى

خش ايوب لى بوها …
وخشت روقيه ومرام لى ام كنزى …
ومرام قبل ماتجى كانت مكلمه ندى صاحبتهم وخبرتها بحكايه موت موسى وقالتلها تعالى لحوش كنزى
كنزى وامها استغربو ….وواضح وجه روقيه اسود

ايوب قعد يحكى لى بوها وفهمه قداش كانت بنته وموسى
متعلقين ببعض …بوها تأثر هلبا …لانه مثقف و حس ان بنته بالفعل اتحب وحسها فرحانه وكان ناوى ايوافق عليه

شويا وخش عبدالرحمن للصالة / كنزى تعالى لى دارك
وخشت كنزى ترعش مع بعضها لى دارها ورا بوها

-عبدالرحمن / سكرة الباب وخشى
-كنزى صوتها هارب / خيرك شن فى بابا

-عبدالرحمن / انتى قلتى لامك تخبرنى على واحد جاى يخطب فيك غدوة
-كنزى/ ايه ..فى حاجه
-عبدالرحمن / كانا قلتلك الولد رخى وما صارلاش وقرر ان مفيش نصيب بينكم شن تقولى
‘كنزى / مستحيل …كل شى نصدقه الا ان موسى يسيبنى
-عبدالرحمن / وكان ربي قرر ان مفيش بينكم نصيب شن تقولى
-كنزى / بابا ليش اتلف وادور قولى اللى تبى اتقوله
-عبدالرحمن / موسى عطاك عمره
-كنزى ماستوعبتش او متبيش اتصدق/ وليش بيعطينى عمره
-عبدالرحمن / نعرفك متدينه وتصلى يا بنتى …موسى توفى امس

وانهارت كنزى وبدت تعيط باعلى حسها …خشو امها ومرام يجرو ويسكتو فيها …وتشنجت وداخت عليهم
قاموها بوها وامها رفعوها لنفس العيادة ودارولها دخول

______________________________________

تمت …..ويتبع

موسى ?????

نحبكم

 

error: