احفاد الشيطان للكاتبة زهور جمال الدين

#احفاد_الشيطان

?بقلم الكاتبه زهور جمال الدين?

?الحلقه الرابعه عشر ?


ثانى يوم الصبح
روقيه راقده وجنبها ايوب …ماد يده اليمين وحاطه راسها عليها …
فتحت عيونها … لقت ايوب راقد قدامها … قنين وداير لحية
مش لابس تيشرت …وغاط فى سابع حلمه
قعدت تشبحله ومبتسمه وتدكر يوم اللى انقداته ..تدكر كيف مسكلها يدها وقاللها متسيبينيش .. مبتسمه وسعيدة حطت
يدها على شعره..وهيا تتخايل فيه يوم اللى مسحتله جسمه وغيرتله التيشرت ..وتخمم شن الحكمه فى ان لقائهم اتأخر سنتين..وكيف اقتنعت انها اتسيب بوها وتخليه بعد ماكانت مبعدة فكرة الزواج عن راسها …

ناضت من السرير لبست الروب الخارجى وساوت شعرها بيديها خلاته مفتوح ..وخشت للحمام … تشبح لى وجهها فى المرايه ..لقت رقبتها رايحه حالة?
تخمم فى خاطرها / يا والله عمله .. كيف بنحول وشاحى قدام بوى وخواتى …
وابتسمت وهيا تتخايل فى اجمل ليله فى حياتها ..بالرغم توقعت الامر صعب هلبا .. بس من رومنسيه ايوب وحنانه عليها ..خلاها مرنه ..وخلى الامر سهل وبسيط واقل الم

غسلت وجهها وطلعت مشت لشنطتها طلعت الفوطه وقفطان
قصير وعليه جاكيت خارجى مرخى لان الجو سقع خاطر هما تزوجو فى نص شهر 12 …
خدت فوطتها..وروب الحمام اللى دايرهولهم الفندق.. وخشت
اغتسلت ودوشت وطلعت لبست ملايه الصلاة وصلت ..
لبست القفطان القصير.. كان لونه سماوى والطرف الخارجى مزركش .. وقفت قدام المرايا ..فتحت السشوار اتجفف فى شعرها …
فاق ايوب … يشبحلها ومش مستوعب ..
-ايوب / صباح الخير حبيبي
-طفت السشوار وتلفتتله / صباحك ورد يا عريس
-ساوى المخدة وراه وتقاعد وحط ايديه ورا راسه / كملى نبى نتفرج عليك رانى لعند توة مش مصدق
-ابسمتله / نوض عاد بلاش كسل الساعه 11
-خدى دخانه ولعه / تو بالله عريس ساهر للفجر منوضينه من الساعه 11 مش ظلم هدا
-روقيه / لا مش ظلم ..اكيده حناك تراجى فينا ?
-ايوب يضحك / لا لا تو راهى تراجى فى العروس تهنت ولا لا
-روقيه / لا حناك فالحه بعتت ايناس من الفجر كلمتنى وقالتلى حناى مشغولة
– نفخ الدخان / بلحق ..امالا كلموك بعد مارقدت انت ..بعتالى تعالى جاى هيا منين عرفت رقمك
-قربت وقعمزت مقابلاته عالسرير ورجليها تحت / هدا يا سيدى يوم اللى جتنا مع امك وحناى طلباته منى
-بعد عن المخده وقابلها / نحبك
-ناضت من جنبها وقفت /وانا نموت فيك ونوض دوش هيا
-ايوب يضحك / باهى زيدى اهربي
-مدت يدها / هيا عااااد
-مسك الدخان بيده اليمين ومدلها يده اليسار وحول الغطا ونزل رجليه / اهلك كلمتيهم
-روقيه / ايه كلمت اختى سهام
-وقف وباسها من خدها/ الف مبروك يا مرتى
-ضحكت / الله يبارك فيك يا راجلى
-مشى جهه الحمام / جيبيلى فوطه ووتى روحك بيش ننزلو نفطرو
-روقيه مبتسمه / حاضر

_____________________________________

فى حوش على جار ابراهيم

-منير ايخبط / وكيف ماتكلمينيش يااام وتقوليلى
-عزيزة / يا اوليدى كل شى صاربسرعه .. خطبها وتزوجها كله فى اسبوعين
-منير / معقولة ماقدرتيش اتقيمى التليفون وتقوليلى راهى بتتزوج
-عزيزة / وشن بدير يا وليدى ..البنيه بوها عطى كلمه للرجالة
مايقدرش يلغيها على خاطرك
-منير / انتى غير كلمتينى بس..رانى الزمته بالكلمه اللى عاطيها لى بوى زمان
-عزيزة / وامتى ابراهيم عطى كلمه لبوك .. هيا كلها كانت بصارة
-منير ايعيط / البصارة نقلبها انا جديات يااام .. ونلزمه بالكلمه اللى عطاهانا ..لكن معقولة تخلينى مُغيب لين انروح وتقوليلى امبارح دخولها
-عزيزة / البنيه ماتبيكش مش عارفه علاش بتموت عليها
..تى ماهو من زمان كلمتها ورفضت
-منير/ زمان كانت متسبلة بي بوها ..لكن مدامها وافقت وسبلتها تنحت ..كنت عرفت كيف انحشم بوها ونخليه يعطيها ليا انا
-عزيزة / توة البنيه تزوجت ومشت على حالها وربي يهنيها
..وكانك خاطرك فى حوش ابراهيم اهو نخطبلك مرام
-خبط الروشن بيده / تى اما مرام اللى تحكى عليها يااام

وطلع وخبط الباب وراه خلى امه تنادى ..طلع فم الباب
..وتلفت لى حوشها ..لقى احمد ولد خالتها فم الباب ..وسماح تمدله فى الطناجر الكبار اللى اجروهم وطيبو فيهم يوم القفه
ولع سيارته ومشى

_____________________________________

قدام حوش عمتك سالمه …

موسى وزكريا جايبين سيارة وعمال ايلمو فى الخيمه والحاجات متع العرس ومعاهم حسن وحسين وجماعه الشارع

موسى يبان واقف بعيد يحكى فى التليفون وعاطيهم بالضهر
-موسى/ وراس حبيبتى حتى انا ستاحشتك لكن تشوفى فى الوضع
-كنزى تبكى / ايه واضح تحبنى يومين نكلم فيك اتصكر عليا
-موسى/ باهى ليش الدموع هادو توة
-كنزى/ خاطر ستاحشتك .. ومعش قادرة اكثر وانت بعيد عنى
-موسى/ ياريتنى جنبك ..
-كنزى بدلع / وشن بدير
-موسى/ كنت مسحتلك دموعك بايديا ..وحضنتك وضميتك
-كنزى / محلاك وانت تقولى فى الكلام الحلو هدا ..زيد قولى ورضينى رانى زعلانه
-موسى/ نحبك يا عمرى
-كنزى / وانا نموووت فيك
-موسى / معش زعلانه حبى

-كنزى / انامانقدرش نزعل منك حبي….غير ندلع عليك
-موسى/ للله يحفظك ليا يا دلوعه
-كنزى/ تمام انا معش نبى نعطلك اكثر
-موسى / ربي يحقظك ليا ياغاليه …سلام
وسكر الخط …

قعد واقف شوى حس بمشاعر الحب معاها
وضحك ..

وتحرك مشى للشباب اللى ايضمو ..لقاهم ايهدرزو

-عثمان جار ايوب / جاه عرس مش عادى
-موسى / العقبالكم كلكم شباب
-ضرب حسن كتف زكريا / العقبى للشيبانى هدا هوا الاول وبعده احنا كلنا
-زكريا يضحك / والله ناوى .. وقاعد اندور فى بنت الحلال
-موسى / خسارة والله خواتى كلهم عطيتهم كنهدا راهو عطيتك وحدة منهم
-زكريا/ تى مانى جاهل..كيف فاتت عليا ومافكرتش اناسبك
-حسن يضحك / ونعم النسب يا زيكو

حسين واقف جنبهم شرين تليفونه…
-رد عليه / تى باهى اطلعى وانتى كسرتيلى راسى ..سيارتى عاليمين برى اركبى فيها

وقام ال لارم متع السيارة وفتحها ..
طلعت اخته ايناس .. وقايمه جزء من وشاحها مغطية بيه فمه وخشمها وخدودها ..مبينه عيونها بس ..لابسه جلابيه وطلعت بسرعه ركبت فى سيارة خوها مع ان عندها نيه ادور زكريا بعيونها لكن ماقدرتش ..خافت من حسن خوها واقف
-حسين / نستادنكم نوصل العويلة للحوش ونجى نكمل معاكم
زكريا يبي يشوفها معرفش كيف ايدير..حسين مشى للجنان يغسل فى ايديه بيش يمشى للسيارة
لحقه زكريا للجنان ..وزعميتا بيغسل ايديه
-زكريا / ياريتنى ما عطيت سيارتى لى ربيع صاحبي..كنهدا راهو ولعت ومشيت توة
-حسين استغرب / علاش خيرك بتمشى
-زكريا /يا راجل عارف روحى بنتوك عركه اليوم
-حسين / وعلاش شن صار
-زكريا / فرخ وحيد جاى داير روحه بيقض معانا.. وهوا طول العرس حاط راسه من راسى ..عندى نيه نتوكها معاه عركه اليوم تمسحلى كبدى
-حسين يضحك / وربيع علاش واخد سيارتك
-زكريا / وين نندرى عليه انا .. قال ماشى شوى وجاى ..
وحط يده تحت الشيشمه / عالمهم شكلها بتوك العركه
-حسين / تعرف كيف ..هى تعالة امشى معاى نوصل اختى ونولو
-زكريا حط يده على كتف حسين ?/ ياريت ..هيا تعالة قبل مانرتكب جريمه?
-حسين / هى
وطلع من الجنان مشو للسيارة ..زكريا قعد بعيد مابين كلم حسين اخته وقاللها اركبى من الخلف
-موسى قام ايده/ تى وين يا زكريا
-زكريا / شويا بس ..نساير حسين ونجى
-حسن كأنه مش راضى وغاير على اخته / ماتعطلوش
-حسين/ باهى
وتلفت لى زكريا / هيا يا زيكو

ومشى زكريا ركب من قدام ..وقلبه ايدق

_______________________________________

فى الفندق
روقيه وايوب مقعمزين عالكنبه اللى جنب السرير
هيا قاعده فى القفطان القصير وحولت الطرف الخارجى لان الفندق تدفئة مركزيه وهوا قاعد فى روب الفوطه متع الفندق

-حاط ايديه الزوز على ضهرها وضامها ليه / ماتحرمنيش منك حبيبتى
وقرب من رقبتها ايبوس فيها
-روقيه / وراس حبيبي عندى الم من ليله امبارح مانقدر
وهوا مايسمع فى شى بكل رومنسيه يتحرك ويبوس فيها من رقبتها لخدودها لى فمها ..
وهيا قريب بدوب …
-روقيه تضحك/ حبيبي مش قلتلى مننزلو نفطرو تحت
-ايوب مقرب وجهه من وجهها / تى ماهو انتى ماغيرتيش..معناها ماتبيش تنزلى ?
وحط يده على كتفها / ودايرتلى كمين بي هالقفطان القنين هدا اللى مطلعك اميره الله يبارك
-روقيه / باهى مدام دايرتلك كمين?.. فى الليل بعد نروحو تو نلبسلك ملايه ولا جلابيه
-يضحك / ومنقالك نبيك تلبسى اى حاجه بعد انروحو
-ضماته وحطت راسها على كتفه وتضحك / يوبي ..تحشم
عااااد
وقف وقامها بين ايديه / على خاطر كلمه يوبي والله مانى مسيبك اليوم
حطت ايديها على رقبه / يا راجل عيب بنعطلو على حوش حناك
مشى بيها للسرير ..رقدها .. وفتح رجليه وقعز على رجليها
..ومد يده يمس فى جسمها
-ايوب / توة نسيب الجسم الحلو هدا ..ونمشى نقعمز مع جماعه الشارع
-راقدة على ضهرها ومبتسمه وتشبحله / حبيبي والله عندى الم مانكدب عليك
مد يده عالقفطان وقامه / انا نخليك ماتحسيش بأى الم .. وتنسيه بكل
-حطت يدها على يده / يوبي .. اهفت عاااد
-يشبحلها برومنسية ويضحك / اششششش اسكتى …من قالك تلبسيلى هكى ?

وحول روب الفوطه اللى كان لابسه

وكمل تحويل القفطان بالكامل

______________________________________

قدام حوش سالمه

ايناس قلبها بدى ايطق لما قاللها حسين اركبى من الخلف صاحبي بيمشى معانا …
وشافت زكريا واقف قريب منهم ..عرفت ان هوا اللى بيركب معاهم..فرحه بانت عليها لدرجه انها خافت حسين ايلاحظها

زكريا قرب من سيارة حسين ..فتح الباب من قدام وركب
-لابس نضارات شمسيه / السلام عليكم
-حسين وايناس/ وعليكم السلام

ولع حسين السيارة ومشى …
فتح الراديو …برنامج تهنئة للعرسان .. والناس تبعت فى رسايل ..
قام زكريا تليفونه وطلع رقم ايناس وكتب رساله/ “العقبالك ”

هيا دايرة تليفونها سايلنت ..شافاته ضوى ..قاماته لقتها رساله من زكريا …فتحتها …وقرتها وفرحت بيها
وقعدت فى صراع مع نفسها ..زعما نبعتله حتى انا رساله ولا بايخه …وفالاخير قامت تليفونها
قام تليفونه وبعت رساله للبرنامج ..المديع ساعه يدكر فى رقم البرنامج ويعاود ..
بعتلهم/ ” الف مبروك للعرسان ..والعقبى لى ايناس وزكريا ”
وحط تليفونه وصلاته رساله من ايناس/ ” وليك انشالله ”
ضحك …وفتح الروشن ومد يده للمرايا عدلها على ايناس لانها مقعمزة وراه حول نضاراته..وشبحلها وابتسم

وهيا شبحتله وغصبا عنها ابتسمت وواطت راسها
بعتلها رساله/ ” انا وانتى فى يوم واحد يااارب ”
قرت الرساله وشبحتله فى المرايا مش قادرة ادس سعادتها

المديع يتكلم / ومن صديق البرنامج .. الف مبروك للعرسان والعقبى لى ايناس وزكريا …
وقرب من المايك” العقبالكم يا نوسه وزيكو ” وضحك

حسين مانتبهش لاهى ايسوق .. ولكن ايناس لاحظت وضحكت اعتقدت انها صدفه …

-بعتلها رساله/” محلى ضحكتك ..تصدقى انك احلى من الصورة بهلبا ”
-بعتتله/ ” اى صورة قصدك ”
قام تليفونه وداره صامت…وكتبلها/ ” موضوع طويل تو نحكيهولك
-بعتتله /” امتى”
-حسها متلهفه عليه حتى هيا وضحك وكتبلها /” استنى منى اتصال الليله لو بتروحى لحوشكم ”
-بعتتله/ ” بنروح انراجى فيك ”

وقعدو ساكتين لين وصلو لحوش ميلاد …حسين نوعه مايدويش هلبا…
نزلت ايناس ونزل حسين فتحلها الباب …وزكريا قعد فالسيارة
حسين واقف يفتح فى الباب وايناس واقفه وراه وتشبح لى زكريا ….
يشبحو لبعضهم ومبتسمين وهما فى عالم ثانى
خش حسين للحوش وخشت حتى هيا وخلت الباب مردود

فتحلها باب الحوش واتفق معاها انه ايجيها الساعه 4 العشيه

وطلع ركب سيارته ورجعو لى حوش عمتك سالمه

______________________________________


فى الفندق

ايوب راقد على ضهره كتافه باينين وعضلاته
وروقيه راقدة على صدره ومتغطيه بس كتافها باينات شوى

شد ايوب الغطا وزاده فوق غطالها كتافها / كتافك مصقعات
… بردانه حبيبتى
-روقيه مغمضه عيونها / مش هلبا ..
وحركت راسها على صدره / منرقد
-يضحك عليها / مش قلتى معش وقت علينا
-ابتسمت وهيا مغمضه عيونها / انت خليت فيها وقت
حركها ايوب..مددلها جسمها جنبه .. ورقدها على ضهرها وحط راسها على يده وخلى جسم لاصق فيها..
يشبحلها باعجاب ونزل باس على شفايفها / باهى ارقدى شوى.. وانا شن نبى فى الدنيا غير راحتك
-فتحت عيونها وقامتهم شبحتله وهوا متكى اعلى منها وضحكت/ كلهم مايشبعوش ..ولا غير اللى طحت فيه انا
-ايوب يضحك/ اللى يحبو بس يا عمرى
تلفتتله ومدت ايديها وحطتهم حوالين رقبته وحضناته وحشت راسها فى صدره وبدلع / خلينى نرقد … وكان تبى حتى انت ارقد
-ايوب / لا لا ارقدى انتى ..انا اكثر ما صحصحت ?
-روقيه / كانا مضايقتك نبعد
-ايوب / ايه باين عليك غير تبى تبعدى وانتى مشبكه ايديك على رقبتى
-روقيه تضحك ومغمضه عيونها / كان تبى نحول
-باسها على شفايفها / تحولى عينك كل ليله نبيك ترقدى هكى
-تضحك / يا حليلى من اللى مايشبعش
-يضحك / ماتحلميش انى نشبع
وضمها ليه / هيا ارقدى شوى وبعدها نطلعو

غطت فى نوم عميق

_____________________________________

فى العشيه …
جى ايوب ودرس سيارته قدام حوش حناه بالزبط بيش تنزل روقيه …
بعتت لاختها سماح رساله ” وصلت حوش ايوب ”
لانهم ايجهزو فى روحهم بيجوها

خشت روقيه لجنان عمتك سالمه ..وهاتك يا زغاريط

سالمه واقفه فى السقيفه فاردة ايديها الزوز بتسلم على روقيه ..وفرحانه
قامت روقيه نقابها وخشت/ السلام عليكم
واكثر ما زادو ايزغرطو

-نزلت روقيه للحاجه سالمه سلمت عليها/ اهلا بيك يا عمتى
-سالمه / اهلا بيك يا غاليه يا مرتى الغالى.. وناديلى حناى زى ماينادى فيا ولدى ايوب
-روقيه مبتسمه / حاضر يا حناى
وخشت سلمت على امنه … وامنه وين تلقيها تسلم وتبكى ..
واجعها ولدها اللى عاش بعيد عليها لين تزوج
وسلمت على ايناس …. وعلى جيرانهم واقاربهم ..

وخشت لدار نومها .. حولت عبايتها…
خاطر ايوب مسكنها معاهم فى حوش حناه مؤقتا مابين مابيشري حوش دورين الاول لى حناه والثانى ليه هوا

لبست روقيه سيتاقونا متع قفطانها الصبحه.. وساوت شعرها اللى سشوراته بروحها ..وخلاته مفتوح ..اسود وطويل ماشالله
وطلعت قعمزت عالصالون اللى مجهزينهولها

-الحاجه سالمه / يابنيتى قعدتى هكى لا محضر لا ثالث
روقيه ساكته وفى خاطرها / انا غير خديت ايوب مانبى شى ??
-جارتهم / غير انتى قاعدة شاده فى سبر متاعينكم يا حاجه سالمه …الباقى المحضر الناس كلها ادير فيه
-سالمه / انا نديره ..لكن من بيجينى فيه .. الشيابين داعيين عليه ومخليين الثالث …كيف ندير محضر ونخلى الدعوة اتجى فى ولدى
-امنه تكلم فى روقيه / اهلك مايديروش فى ثالث
-روقيه بحشمه خاطر متعرفهمش/ احنا ناسنا ايديرو فى محضر ..الثالث مانعرفوشى ..نشوفو فيه عند جيرانا ايديرو فى فريك وسفنز

-سالمه / امالا ماتعرفوش لعب العراسه
-روقيه / شفناه زمان عند جيرانه لما احنا صغيريين
-سالمه حزينه / والله ماكنت نبى انقص على وليدى حاجه ..
حتى البيت دقوهوله صحابه فى الشارع .. كنت نبى نديرله ثالث وحتى العراسه تلعب فيه ..لكن الله غالب
-امنه / انا ندير لى كنتى الفريك والسفنز والبسيسه
-سالمه فرحت / بلحق
-امنه / خلاص خبري اهلك غدوة ايجو للثالث وايجيبو احبابهم واقاربهم
-روقيه / اهو خواتى بيجو .. قوليلهم
-سالمه / مرحبتين بيهم ..خلاص تو ايجو ونخبروهم

وبالفعل جو خوات روقيه ..اللى تزغرط واللى تبكى..وروقيه ماتنشد الا على بوها شاغلها
ومدولهم اللى فيه النصيب عصاير وشكاليط وحلويات وفتحو المسجل ورقصو كلهم

وروحو ايوب وروقيه للفندق وعاشو ليله عسل

_______________________________________

ثانى يوم دارو الثالث….
طيبت امنه الفريك والسفنز وحركت البسيسه ودارته فى حوافظ صغار متع نفر
وجابو خواتها العصير والشوكولاته والحلويات ..دايرنه كله متارد ومغلفينهم بي سلفر النايلو

اما روقيه رفعها ايوب من الفندق للمزينه لبستها البدله الكبيره …
وحطلها كرسيها عالجنب فى البيت يبيهاش مقابله التريس من غيرته عليها …بالرغم بيقعمزو بعيد
وجابها هوا لابس زبون اللى هدتهوله هيا ليله الدخول
نزلها للبيت استلموها خواتها وايناس حماتها
وقعمزوها على كرسى الصالون امتقيه شوى عالرجالة ..
وبدو خواتها ايمدو فى هدايا العروس
مدت للحاجه سنيبله ” سلسله تلتبس فالرقبه”
ومدت لعمتها امنه سلسله حتى هيا ..وعطت لى ايناس خاتم كبير ..ومدت لى عمتها امنه هدايا سلافها وعمها ميلاد ساعات ماركه بيش توصلهملهم …

وبدو العراسه يلعبو .. والبنات ايمدو فى الفريك والسفنز والشاهى والحلويات للرجالة والنساوين ..وعمك ميلاد والشيابين مقعمزين بروحهم على جهه

اللى ماتعرفش لعب العراسه كيف
ياحنه هما شباب صحاب السلطان” العريس”.. ياخدو منه الفرملة والشبب والساعه متاعه .. واى شى يخصه ..حتى مفتاح سيارته
يبدو الشباب صحاب العريس يجرو يبو يحدفوهم للعروس والمتزوجين ايشدو فيهم مايخلوهمش يوصلو
واللى يوصل يحدف الحاجه واللصغار اللى فى البيت يوصلوها للعروس ..
كلها تجرى موسى زكريا حسن والشباب كلها
والحاجات اللى توصل تطلب فيهم العروسه فلوس بيش تردهم ..الفلوس هادو يدفعوهم المتزوجين ..وتاخد نصهم العروس ونصهم الشباب اللى حدفو الحاجات

بعد ما كملو اللعب ….

وقفت عمتك سالمه / العروس طالبه الف جنيه
الرجالة / لا هلبا يا حاجه ..نقصونا شوى ماعندناش اللى هناك عطيناه للنساوين بيش حضرو العرس??
-خشت سالمه شوى وطلعت / قالولكم 800
-الرجاله ايعيطو / هلباااا هلبا

خشت وطلعت قريب اربع مرات وفالاخير استقرو على 600 دينار …وعطتهم كلهم للشباب

“من يدكرهم عادات زمان ..ايام بالله لما كنا صغار وناخدو فى حاجات العريس ونمشو نجرو نعطوهم للعروس??

وتم الثالث .. وروحو اهل روقيه … وروحت الناس
وركبت روقيه مع ايوب فى السيارة مشت للمصوراتى وصورو كم لقطه مع بعض…وروحو للفندق …
يادوبك حولت البدلة الكبيرة عاونها فيها ايوب
وغسلت وجهها من المكياج .. شنطتها اللى بتسافر بيها مجهزتها من قبل يوم الدخول ..
نزلها ايوب وركب مع خوه حسن هوا وياها وتوجهو للمطار
وسيارة موسى وايوب وراهم

ركبو للطيارة وسافرو لى ماليزيا شهر عسل ..ومنها بيمشو لى اندونيسيا وبعتالى تركيا ومصر وبيروحو
رحلة مدتها 25 يوم …..وكانت من اجمل ايام حياتهم …

زارو كل البلدان اللى قرروها وشرو هدايا وروحو لحوش الحاجه سالمه

_____________________________________

تمت ….ويتبع

على فكرة مش مسامحه اى وحدة تقرا وماتعلقش ولا ادير لايك .. تعليقك تشجيع للكاتب

نحبكم

 

error: