احفاد الشيطان للكاتبة زهور جمال الدين
#احفاد_الشيطان
?بقلم زهور جمال الدين ?
?الحلقه الثانيه ?
.
.
العسكريه خشو للحوش يضربو فى ايوب / تى اطلع يا مسخ …اطلع …اطلع وصكر فمك
-ايوب/ تى حووول …تى حول ايدك خيرك تضرب
ويدفوه الزوز ايطلعوه من الباب ويحشوه فى التندرا ويطيرو بيه
وعمتى سالمه عياطات وبواصى / وووك عليا وليدى…حيه عليا وين رفعوه
تلمدو عليها جماعه الجيران كلهم النساوين خشو لداخل
والرجالة التمو عليها فى السقيفه ..عمك عبدالنبى ورجب والطاهر وعبدالكريم ..وولادهم
-الطاهر/ منهما هادو ووين رفعوه
-سالمه تبكى/ وانا وين ندرى عليهم منهما لين طقو عليا ..ياكيتى كيه
-عبدالنبى / غير اهدى ياحاجه تو نديرو حل وننشدو عليه وين رفعوه
طبعا ايقولو فيها كلمه مرخية وكلهم وجوههم تتخضر وتتصفر… فى هداكه الوقت ماحد يقدر يسأل على حد محبوس…اللى بتسأل عليه بيحشوك معاه
طلعو الرجالة وجوها النساوين دخلوها لوسط الحوش
وهاداكه الحوش تعبى فى لحظه بالجيران ..
شويااا وخشو حوش خوها مصباح
جى المبروك وامه ومرته وخواته الزوز … سمعو فيسع خاطر سكنهم قريب فى نفس المنطقه تفصلهم شوارع
.
.
.
الخبر وصل لامه … عن طريق خاله محمود
لان محمود متواصل مع عبدالنبي من زمان ..من لما ايوب خدم معاه فى الخضرة …
وامنه عاد وين تلقيها …اللى خلاته حناه عيطاته امه ..
-ميلاد راجلها / غير اهدى بس يا امنه تو نلقوله حل
-امنه متهسترة وناضت عليها المواجع/ انا اللى سيبت ولدى…انا اللي لوحت ولدى…
وتلفتت لمحمود / كله منكم …كله منك انت وحياة بوى..كنهدا ولدى عندى وبين ايديا ..مش ايدورفى الشوارع لين يحبسوه
-محمود / خيرك هبلتى يا امنه ولا شن صارلك …ولادك اهم يسمعو فيك تريس واحد عمره 28 سنه والثانى 27 …شن تخرفى انتى توة جايبه تندبي على نصيب قاسمهولك ربي
-ميلاد بهدوء/ معليش خليها يا محمود …حقها تنهار راهو ولدها
-امنه تبكى/ اسمع يا ميلاد…اهو عمر توة معاك ولامرة طلبت منك حاجه لولدى…الا هادى…كلم عليه واجرى..الحمدلله حتى رتبتك مش شويه ..رايد فى الجيش وتحتك هلبا ناس
…. انشالله حتى اتكلم صحابك اللى قاريين معاك زمان فى روسيا
-ميلاد / امالا شنو تحسابينى بنسكت…هدا خو صغارى
ايناس تبكى جنب امها ..وحسن وحسين متأثرين هلبا عالعمله اللى صارت لخوهم بالرغم باعد عليهم وقاطع اى علاقه بيهم
…ومعاملته معاهم من فوق لفوق بس
__________________________
فى حوش ابراهيم
روقيه وبوها وخواتها يتفرجو عالتلفزيون
خطاب للقدافى مع فعالياامناء المناطق
سهام وسماح ومرام ايوشوشو مع بعضهم
-روقيه / اسكتو عاااد خلو بوكم بيسمع
-حناها فاطمه / منو قلتى بيتكلم الملك ادريس
-مرام / ياحناى الملك ادريس مات من زمان … نص الشعب الليبي مايعرفاش حتى فى المدارس مانقروش فيه
-حناهم تكلم فى روقيه / منو هادى جارتكم عندكم ولا شنو
بدو يضحكو البنات الثلاثه
-روقيه تشبحلهم وتضحك/ ضمى فمك انتى وياها
وتلفتت لحناها / هادى اختى مرام يا حناى..خيرك
-حناهم / وهادي امتى جابتها امك….في بالي معش جابت بعدك ..والله ماسمعتش بيها …ماتطلع غير جابتها لما انا فى الحج
البنات يضحكو / معناها حتى احنا مش فى الداكرة بكل …نسكتو خير
وبدى الخطاب
-ابراهيم / نقصو الدوشه خلى نسمع القايد
“الشيابين والعزايز كلهم مؤيدين ??”
-روقيه / كانا ماتبوش تسمعوه برو خشو لداركم
ناضو البنات الثلاثه خشو للدار…مرام اصغر منهم بسنه بس ..يعنى تعتبر زى تؤامهم
قعدت روقيه مع بوها وحناها…بالرغم حناها راقدة وخلاص واخدها النوم …
قعدو قيس الربع ساعه يتفرجو
-ابراهيم/ ديريلى طاسه شاهى خضرا يا رقيه
-روقيه / حاضر يابوى
ناضت من جنبه خشت للمطبخ ودارت براد شاهى عالنار
وخطرو عليها خواتها ..مشتلهم فى الدار
__________________________
فى حوش زكريا …
زكريا قايم تليفونه ويتكلم بحرقه
-زكريا / تى قلتلك متاكد توووة كلمنى مصعب ولد جيرانهم وقالى جت تندرا قاماته
-موسى مخلوع/ تى شن تخرف انت …وعلاش قاموه شن دار ايوب
-زكريا / وكيف بنعرفو شن دار كانا ماوصلناش فيه …توة المفروض اى حد فينا يعرف شخص قوى فى الجيش يسأله
-موسى/ منغير ماتوصى…توة نايض بنمشى لخالى خالد..
عنده جاره رايد فى الجيش تو نقوله يساله عليه
-زكريا / وانا تو نمشى لى محمد راجل اختى ..نسيبه ضابط فى البحريه بالك عنده معارف يزبطوه وين
-موسى / تم الكلام ونتلاقو فى حوش حناه
-زكريا / اسمع انا بنرفع حوايجى نبات عندهم راهو
-موسى/ هادى فى الاكيد ..منقعدو مع حناه لين ايروح
-زكريا/ بالرغم المبروك ولد خو عمتى سالمه ماعنديش ليه خلوق واكيدة توة بيشد المربوعه بيدير فيها رايس
-موسى/ تى فوته الدراه هدا وماتعدلش عليه
وانهو المكالمه باتفاقهم انهم يبدو فى البحث على صاحبهم
__________________________
خشت روقيه لدار خواتها …تسمع فى مرام تتكلم
-مرام/ قالى بنمشى لتونس…مايبيش ايغنى لا مع هادو ولا مع هادو
-سهام / احسن مادار
خشت روقيه مصدومه / قصدك قاعدة تكلمى فيه
-مرام تلخبطت / مننن منهوا اللى تحسابينا نتكلمو عليه
-روقيه/ اخيه عليك.. اول مرة نعرف انك كدابه
-مرام انغصت/ والله ماكدبت عليك …من يوم اللي وعدتك معش كلمته …لكن امس بعتلى رساله قالى نبيك ضرورى فرديت
-مشتلها روقيه قعمزت جنبها/ مرام حبيبتى..انتى اختى وبنتى…تو معقولة انا نبيلك الخايبه
مرام ساكته
-روقيه / ردى عليا
-مرام / اكيدة لا
-روقيه / تو يا مهبولة انتى تبى تقري طب … دكتورة زيك تاخد واحد ايغنى شادها من عرس لعرس والبنات يتراقصو على صوته
-مرام / ياروقيه هدا شغله ..زى الدكتور زى المهندس زى المطرب
-وقفت روقيه قامت ايداها / ايه زى بعضهم امالا شنو …
وتلفتتلها / تصدقى انتى الدوة معاك زايدة…اصلا شنهوا عمرك اللى نكلم على شخص وتناقشى فيا .. راك ثالثه اعدادى
ووقفت وقامت يدها فى وجهها / واسمعى من توة نقولك كانا خديتيه انا مش راضيه ..وانتى ديرى مافى راسك
-مرام / اهو خواتى اولى ثانوى ومخطوبات
-قعمزت جنبها / اولا خواتك من لما هما صغار متكلمه عليهم خالتى ومسميتهم على ولادها…ثانين جيبيلى واحد مناسب زى معاد ولا احمد مستحيله نعترض…لكن غناى…ماتحلميش انى نرضى..وكانك بتاخديه خودى من غير رضاى
وطلعت روقيه من الغرفه ومشت للمطبخ تشوف فى الشاهى وتجهز فى الصفرة
-سهام / كيف بديري توة
– مرام / سيورها تقتنع …احنا مزال قدامنا وقت ..لين نتخرج انا من الثانوى وهوا يزيد ايكون نفسه وبعتالى يجى يتقدملى نكون انا درت حل واقنعتها
-سهام / قصدك بتقري الجامعه عنده
-مرام / ايه بنقرا عنده وقالى اقري طب والا اى كليه ثانيه على رغبتك
-سهام تضحك / اششيه …ريته حالى ..غير انا طايحه فى واعر..قالى خدمه ماتحلميش بيها
-سماح / سبحان الله معاد واحمد ماتقوليش خوت ..توة انا احمد قالى اشتغلى عادى..وسوقى وديري سيارة
-مرام مبتسمه / حتى انا علاء قالى بنديرلك سيارة
-سماح تضحك/ صدقت سهام لما قالتلك اشيه ?
-مرام / انا توة ماهامنى شى الا روقيه …لازم نقنعها بي علاء..تعرفونى قداش متعلقه بيها ..مستحيل ناخده وهيا مش راضيه
-سهام / وقرايتكم كيف صار فيها توة..احنا المدرسه قالو كانا تقاوت الحرب بيوقفو
-مرام / احنا فى مدرسات بطلو معش ايجو…و قالو كانا ضرب الناتو بلحقه بيوقفو
-سماح / معاهم حق اللى مناطقهم معارضه مايقدروش يقعدو فى طرابلس
-سهام اتكت فى سريرها/ انشالله خير وخلاص وربي يهني البلاد … قالو بنغازي ليها فترة القرايه واقفه فيها
وشرين باب الحوش
-روقيه تنادى / سماح شوفى اشكون فى الباب
-سماح وقفت/ باهى
__________________________
امنه وخوها محمود راكبين فى السيارة …
ماشيين لحوش الحاجه سالمه
-محمود / مش كانا قالتلك كلمه هكى ولا هكى اديري انتى وياها عراك …عارفها حرفه ولسانها مايهنيهاش
-امنه تبكى/ انا قلبي حارقنى على ولدى ..قاعدة غير ندور فيها كانا حدفت عليا الدوة
-محمود / نحس فيه ميلاد هدا علاش ماخلاش ايناس اتجى معاك …شاك فيها بديرلك مدعك
-امنه/ هوا بارك الله فيه طلع هوا والاولاد ماشيين بيسالو عليه فى المراكز
-محمود/ تبى الحق..مش غير هادى بس…بارك الله فيه حتى انه خلاك تمشي لحناه ورافعه حوايجك بتباتى
-امنه / اسمع يامحمود ..بالرغم عمتى سالمه حرفه …لكن جميله فوق راسى..توكل وتشرب وتخدم فى ولدى
.
.
وصلو امنه ومحمود لحوش سالمه
نزلت امنه وهيا تبكى حاله ..دموعها ارباع ارباع
خشت لوسط الحوش
لقت عمتك سالمه مقعمزة وتبكى…جتها ونزلت اضبطتها وبكو مع بعض …
الحاجه سالمه منهارة .. ماعندهاش حيل اتعافر حد ولا تكبر الدوة …جامرها ولدها وين مشى ..ووين رفعوه
وامنه منهارة زيها ولا اكثر منها ….
فكوهم النساوين من بعضهم
-الصالحه جارتهم / وحدو الله خيركم ..تتعايطو عليه تقولى مات بعيد السو
-مريم / حتى الفال مش كويس ..
-سالمه / ياريتنى جوزته …قداش ليا انقرز عليه نبى ناخدله وهوا شى مسكر راسه
-نعيمه / وشن فايدة الماخدة توة يا عمتى سالمه
-سالمه / كانا عنده حوش وصغار راهو يخاف على روحه على خاطرهم …لكن قاعد هكى ايدور لا مدور ولا معدل واللى فى راسه دايره ماعنده على من حاير
-امنه تبكى/ يااااربي احفظلى وليدى
__________________________
طلعت سماح تفتح فى الباب
لقت جارتهم عمتك مبروكه مرت سالم جارهم وبنتها عبير
سلمت عليهم ودخلتهم لوسط الحوش
-سماح / روقيه ..جونا عمتى مبروكه وعبير
حطت روقيه سفرة الشاهى لبوها ..وطلعت من الدار
سلمت عليهم ورحبت بيهم وقعمزو عالصالون اللى فى الصالة
طلعو البنات سلمو عليهم وقعمزو جنب عبير
وناضت عمتك مبروكه خشت للدار …سلمت عالحاجه فاطمه بالرغم لقتها راقدة …نوضتها روقيه وسلمت عليها
-مبروكه / شن حالك يا حاج ابراهيم ..وشن حال صحتك
-ابراهيم يدوى بالشوى/ الحمدلله ..شن حالك انتى يا مبروكه وحال سالم والعويلة اكل
-مبروكه / الحمدلله اكل باهيين ..
-ابراهيم / وخيره سالم ماجاش معاك
-مبروكه / هوينا مقعمز فى المربوعه يسمع فى الخطاب
…مايبيش الدوشه
-ابراهيم / اهو حتى احنا نسمعو فيه ..وانشالله ربي ايدير نايب ..هالبلاد والله ماتستاهل
-مبروكه / صدقت والله ياحاج
وتلفتت لى روقيه / نطلعو برة
-روقيه / هى
وطلعو من الباب …وماشيين فى الممر بيقعمزو جنب عبير والبنات
وقفتها مبروكه / قتلك …
وقفت روقيه وتلفتت / ايوة
-مبروكه /انا الحق جايه بنفسى نكلم فيك على موضوع ولدى صلاح
-روقيه واطت راسها/ ياعمتى مبروكه انا بعتلكم الرد مع عبير من المدة اللى فاتت لما بعتيهالى
-مبروكه / عمك سالم شاد فينا نخطبوله بنت عمه مدامك انتى ماتبيش …قلت نجيك بروحى ونكلمك بالك يهديك ربي..انا والله مانبى غيرك كنه …وعارفه حتى ولدى عنده نيه فل الماخدة هادى..الحق ولدى صلاح مايتعايبش بيش ترفضيه
-روقيه / من قالك انى رافضه صلاح فى حد داته ….والله يا عمتى مبروكه صلاح مافيه عيب …لكن انتى عارفه البير وغطاه ..انا فى باب ناخد راجل…خواتى مازالو صغيرات ويبو توجيه… وبوى تشبحى فيه شاد تركينته ..وحناى اهو تشوفى فى حالها
-مبروكه / ولامتا بتقعدى هكى … منير ولد على جارنا رديتيه …اقارب بوك كل مرة ايجى حد وترديه وولدى صلاح كيفهم …راهو العمر هوا هداكه .. تحسابي روحك اتفرحى فى بوك هكى…لاااا بوك يفرح لما تنسترى واديري حوش وصغار
-روقيه/ مشكلتى انا قلبي مش عاطينى نسيبهم ..هما عارفتهم يبونى نتزوج
-مبروكه / اهو هما بيسيبوك وبيتزوجو
-روقيه / ربى يهنيهم انشالله …نتهنى عليهم وبعتالى ساهل
-مبروكه / توة انا شن بنقولك عاااد …على راحتك
-روقيه مبتسمه / ربي يهنيه اوخى صلاح ويكتبله بنت الحلال اللى تسعده
-مبروكه تضحك / هاالسان اللى عاطهولك ربي ينقط عسل .. وقلبك الكبير كيف تساعدى فى بوك وحناك …ايخلى اى مراءة تتمناك تكونى كنتها
ومشو للصاله شربو الشاهى والحلاوات وروحو…وقالت مبروكه لولدها على قرار روقيه واسباب رفضها …نقرز شويا وبعتالى رضخ للامر ووافق ان امه تخطبله
__________________________
وفات اسبوع …
مكان جديد زى حوازة محبلينها بي حبيله …وفيه قريب اربع تريلات داخلها
دايرينه زى الحبس جديد ايشدو فيه الجماعه اللى دايرة مشاغبه ضد النظام
فى تريلات الحبس الحارس فتح الباب / تعالة انت يا امسخ
ناض شاب مضروب على وجهه وتحت عينه ازرق / انعم
-الحارس / شن اسمك
-الشاب / اسمى ايوب
-الحارس / اطلع نظف حمام الضابط
(عبارة عن براكه دايريينه حمام اكرمكم الله )
-ايوب / نبي نعرف علاش شادينى هنايا ..شن درت انا
-الحارس / اطلع نظف وصكر فمك …دورك فى التحقيق مزال ماجاش
-ايوب غير اسلوبه / انا ياخوى عندى حناى ساكن معاه انا ونعول فيها بروحى ماعندنا حد ..غير نبى نعرف علاش شادينى ..ونطمنها بس
-الحارس/ تى منهيا بطمنها انت الدبان الازرق مستحيل يعرفلك طريق…قضيتك وملفك فى امن دولة راهو
-ايوب/ علاش امن دولة انا شن درت
-الحارس/ وراس اوخى مانعرف ..انت تفكر روحك شن داير..ولا مع من متعارك جاى واشى بيك
-ايوب / انا ماعندى مشاكل مع حد ..حتى عركاتى على حاجات بسيطه مش لدرجه حبوس
وفى دماغه وبين عيونه هاديكة الليله اللى طلع فيها والصورة اللى مزقها …وفى خاطره ايخمم ان مفيش موضوع غيره داره
-تلفت للحارس/كان تعمل فيا معروف وتقدملى موعد التحقيق
-الحارس سخفه / انشالله خير ..تو نكلم الفندى عمران هوا الوحيد اللى عندى معاه دوه
-ايوب/ وامتى بيجى
-الحارس/ بعد غدوة توكته
-ايوب / باهى سامحنى فى الكلمه هادى ..منقدرش نبعتك لحناى اطمنها اكيدة صايرة فيها حاله
-الحارس/ تى اطلع نضف وضم فمك …نمشى لحناك ونقعد انا فى مصيبه ..خاطر يسكتو العزايز
-ايوب / باهى مدفش اهو طالع
.
.
.
بعد ثلاثه ايام جابو ايوب عالتحقيق
خش لغرفه مقعمزين فيها ثلاثه انفار …
واحد ورا المكتب والثانى واقف ورا الكرسى اللى بيقعمز عليه هوا ..والثالث مقعمز على جنب الطاولة ويكتب
خش ايوب/ السلام عليكم
-الضباط / وعليكم السلام
-الضابط اللى ورا المكتب/ تعالة قعمز
خش ايوب قعمز
-الضابط / اسمك وعمرك وسكنك وعملك
-ايوب/ ايوب العارف .. عمرى 34 سنه ..نسكن فى طرابلس ونخدم عمل حر عندى دكان
-الضابط / وين كنت يوم 20 فبراير
-ايوب / والله ماعاد ندكر ..فات اكثر من شهر معش نزبط
-ضربه الضابط اللى واقف وراه على راسه / رد عالمحقق كويس يا حمار
-ايوب / تى بالشويا خيرك تضرب رديت كويس انا
يدورله الضابط يوقف قدامه وطاح فيه ضرب على رديس
ويعيط عليه/ صكر فمك ورد كويس
-ايوب ايدف فيه/ تى باهى باهى
فتحله المحقق فيديو فى الموبايل / هدا منهوا
ويشوف فى روحه ايمزق فى الصورة ويقول البوعا مات
ايوب منصدمش لانه كان متاكد ان هادى هيا قضيته …لكن مالاول كان مخمم ناوى الانكار
-ايوب/ مش انا هدا حد يشبهنى
-المحقق/ كداب هدا انت …اعترف خيرلك بالك الحكم يتخفف عليك …لانها تعتبر قضيه خيانه عضمى
-ايوب / تى خيانه شنو انت شن تقول
واستمر التحقيق اكثر من ساعه وهما ايمغصرو فيه وهوا شى ناكر وراقى الازرق انه يكون هوا
وانتهى التحقيق وردوه للحبس
__________________________
ميلاد راجل امنه شاد الصحيح وايدور عليه …
من مكان لمكان هوا وولاده ايدورو فى خوهم وين
لا السمى قالت ريته ولا الوطا قالت ريته
-ميلاد/ الو
-العقيد محمد / اهلين ميلاد شنحالك
-ميلاد / الحمدلله بخير …كيف حالك انت والجماعه لينا وقت ماتلاقيناش
-محمد / حالنا هاك تشبح فيه البلاد خاشه بعضها
وقعدو مشوار يحكو فى امور السياسه واللى صاير فى البلاد
وبعد وقت
-ميلاد / والله شن بنقولك .. العيلة عندى عندها ولد قبل ماناخدها عايش مع حناه ..المدة اللى فاتت جو قاموه من الحوش منغير مايدكرو سبب شدتهم فيه …فياريت لو بس تعرفلى المكان اللى ماسكينه فيه بس
-محمد / والله شن بنقولك ..هاك تشبح فيها كل حد يحكم من تركينه …انت وين سألت عليه
-ميلاد / ماخليت وين سالت عليه ..اى جهاز يخطر فى بالك سألت فيه مهناش ..حتى حبس بوسليم ابعتت لكدا شخص يخدم فيه واكدولى انه مش موجود فيه
-محمد / امالا تعرف كيف …مايكون الا شادينه الجهاز الجديد اللى داروه من اسبوعين تابع امن الدولة
-ميلاد / ومن ماسكه
-محمد / اللى ماسكه مانعرفاش منهوا…لكن العقيد خيرالله معاهم …ومن ضمن مؤسيسينه .. ماك تعرفه
-ميلاد / نعرفه اكيد …لكن لما تنشده انت افضل ..باهى وراس اوخى انشدلى رانى دوخت
-محمد / تم ..اعطينى يومين ونجيبلك الثابته
وبالفعل بعد اربعه ايام جابله الثابته وقاله ان ايوب محبوس فى حبس خاص كيف دايرينه فى حوازة فى عين زارة
…تريلات حابسين فيهم الموقوفين للتحقيقات قبل مايحكمو عليهم ويرفعوهم لسجن بوسليم
-ميلاد/ وعلاش الجهاز الجديد هدا قامه …خيره شن داير
-محمد / علمى علمك …لكن انا ناديت خيرالله غدوة العشيه بيش تتلاقى معاه ويفهم …تعالة
-ميلاد / بادن الله غدوة انجى
.
.
.
ثانى يوم جى خيرالله وهدرز مع ميلاد …قاله ان قضيته قويه ..لان وجهه طالع فى الصورة
-ميلاد / دبرها من عندك يا خيرالله …تو البلاد بتوقف عليه ..ياما من قضايا لفيناها
-خيرالله طلع من جيبه تليفون / هاك شوفه الفيديو
خدى ميلاد التليفون وتفرج …وتأسف من اللى قاعد ايشوف فيه …لانه عرفه حبل مشنقه والتفت على رقبه ايوب
-ميلاد / الولد فى الفيديو مش داكر اسم القدافى..هوا قاعد ايقول البوعا..معناها فيها ثغرة كيف نخشو فى الموضوع
-خيرالله / والصورة اللى فى يده … والساحة اللى متضاهر فيها مع المشاغبين
-ميلاد / يا خيرالله …انا هادى خدمتى عاد …وعارف ان فى ثغرات اتصير فى التحقيق المكتوب ..وخاصه ان الولد ماعترفش
-خيرالله خدى التليفون / باهى كيف قصدك
-ميلاد / قصدى يتغير اسم المكان بس …نكتبوه انه فى منطقته …وجاره بوعجيله مات ..ساهله يا خيرالله غير كانك تبى توقف معاى
-خيرالله / ااحكايه مش ساهلة …ومانوعدكش انها تكون قريبه …لكن تو نشوف وانشالله خير
وبالفعل بدى خيرالله يجرى على ملفه ويدير فى واسطه بحيث تتغير الاقوال اللى فى التحقيق نفسه
وفات شهر كامل وهما يجرو …..وبدى الناتو يضرب فى ليبيا
ايحدد فى مواقع للجيش ويضرب …وفى من يعطى فى الاحداثيات
……………………..
بعد ثلاث اسابيع…..
ابراهيم مشى لحوش عبدالسلام ولد عمه فى عين زارة
فترتها الناس خايفه من الناتو والضرب …وخاصه ان حوش ابراهيم كانو فى منطقه حيويه وقريبه من المعسكرات
…فقرر ابراهيم يطلع ببناته على قد مايخاف عليهم
-سماح / اهو هلبا من جيراننا قاعدين يابوى ماعندنا مامطلعنا
-مرام / صح هما الطيارات يضربو بعيد علينا…ومواقع محدده …
وتلفتت لى روقيه / تكلمى روقيه خيرك
-روقيه بهدوء/ انا اللى بيدره بوى ماشى عليا…انتو فى داركم وين تدرو ..انا نبات هنايا مع بوى وحناى..حناى طول الليل وهيا تنوض مخلوعه
-سهام / باهى اهو نمشو لحوش خالتى …مش بكرى كلماتك ياروقيه
-تلفتتلها / مصحك …
وواطت صوتها/ عندك عادى تمشى لحوش خطيبك وتقعدى وانتى مازلتى مخطوبه
خلاص ابراهيم اصر انهم يمشو لى عين زارة حوش ولد عمه من خوفهم من الضرب
وابراهيم اختار حوش عبدالسلام لان ولاده صغار الكبير فيهم صف ثالث ابدائي .. البنات هما الكبار …ابراهيم حتى كبر قاعد حزار على بناته
مشو لى حوش عبدالسلام … وباتو اول ليله …الناس رحبت وهللت بيهم
لان هاديكا الفترة هلبا عائلات التمت فى حوش واحد عشان الدربكه اللى صايرة فى البلاد
روقيه عجبتها الحوازة ..ومرة مرة تطلع ادير دورة …عندهم براكه بعيدة وعندهم سعى وخرفان
والبنات منسجمين مع بنات عبدالسلام الزوز
__________________________
الناتو قبل مايضرب اى مكان يبعت طيارة تحدف ورق للمكان يبلغوهم انهم بيضربوه قريبا ارجو الاخلاء…وهادى حقيقه اكيدة…
اى مكان انضرب بلغوه قبل مايضربوهم
شوره هادوكا التريلات اللى حابسين فيهم ايوب والشباب الثانيين ترا من اعطى احداثيات مكانه للناتو
جت طيارة وحدفت عليهم ورق انها بتضرب الليله
بدو يجارو ويلمو فى ورقهم …
-الحارس/ والموقوفين يا سيدى
-الضابط / كانا بننقلوهم يبو سيارات اتجينا من الكتيبه .. ومرات معش فى وقت
-الضابط الثانى / تى فكنى منهم …هما اصلا ميتين ميتين ..كلهم حكمنا عليهم بالاعدام
وبدو بجرو ويلمدو..شوره ترا من سرب للمساجين ان الناتو بيضرب
-ايوب داير لحيه وواقف ايكلم فيه/ كيف من قالك …واحنا كيف بيديرونا
-الحارس/ بضميري مع الله لازم انقوللكم قبل مانطلعو ..راهم بيخلوكم وبيهربو …ووراس اوخينى ما اديرولى مشكلة خلونى نطلع ونصكر الباب وانتو تصرفو
وبالفعل طلع الحارس وسكر الباب
وتلفت ايوب للمساجين/ نوضو خبطو عالتريلا
وبالفعل بدو يخبطو على هاديكا التريلا دارو دوشه..سمعوهم التريلات الثانيات عرفو ان فى قصه فى الموضوع بدو حتى هما ايخبطو بالقوة على حيط التريلا
كثر الصوت وتقوا …وخاقو الضباط انهم يلفتو انتباه الحياش اللى فيها سكان ..حتى لو كانو بعاد …لكن الصوت ايواجب
الضباط مع بعضهم اتفقو على حاجه …ونادو الحراس
-الضابط متشنج ايعيط / افتحو الباب وطلعوهم …افتحو
مشو الحراس فتحو البيبان وطلعو المساجين
وطلعو كلهم دفعه وحدة ….
وقامو الضباط الكلاشنات وبدو فيهم صلى ….
رصاص يتناطر رحى …اللى تجى فى وجهه واللى تجى فى عينه ..واللى تجى فى كتفه واللى تجى فى رجله …كل واحد وحظه ….
ايوب جاته رصاصه فى رجله ..والثانيه ناشت كتفه وطارت ماستقرتش
وركبو الضباط والحراس سياراتهم وطارووووو
وقعدو هادو المساجين …اللى ميت واللى اينين واللى مغمى عليه
زمان فى اجهزة تتبع سياسه الارض المحروقه..فى جميع دول العالم …بعد ماتكمل ماتخلى شى وراها
ايوب هرب زيه زى كل المساجين اللى قاعدة فيهم شوية صحة
شاد رجله ويكر فيها مرة ايطيح مرة يمشى لين وصل حوازة بعيدة فيها براكه …اتكى عليها
__________________________
فى حوش عبدالسلام
-ابراهيم / ولد صحيت وزايدة معاك ..ماتعرضليش بنروح
-عبدالسلام/ هاك قاعد وفرحانين بيك انت والبنات غير شن ضايقك وخلاك تبى تروح
-ابراهيم / والله ماضايقتنى حاجه …وانشالله حوشك ديما عامر ..لكن هوا هضاكا اهو لينا اربعه ايام هنايا وسعما خاطرنا
-الحاجة فاطمه / رقيه …يا رقيه
-روقيه قعمزت جنبها/ نعم يا حناى
-الحاجه / العشبه اللى طبختيهالى امس متع المعدة لقيت بيها ..كانا تزيدى تقطعيلنا منها
-روقيه / باهى اهو تو نمشى نجيبلك منها
وتلفتت لخواتها / هيا وتو ارواحكم خلى معى عبدالسلام ايوصلنا
هيا لابسه سروال وبلوزة طويله ووشاح …خدت ماليا خارجيا لبستها وطلعت …
ادور فى هاديكا العشبه اللى تبيها حناها لين وصلت قريب من البراكه ….
وهيا اتقطع فى العشبه .. سمعت صوت حد اينين
انخلعت روقيه ولفت حوالين البراكه / انت منو
-ايوب قام راسه شبحلها/ ساعدينى
-روقيه / انت منو ..وشن جابك هنايا …ومن ضاربك
-ايوب/ انا كنت محبوس فى حبس قريب من هنايا
..والضباط فرغو فينا السلاح
وشبحلها / ساعدينى.. وين حوشكم
-روقيه / انا حوشنا مش هنايا …
وتشبح فى رجله تصب دم / اسمع اول شى لازم اتوقف النزيف اللى فى رجلك
-ايوب/ انا مش قادر نتحرك ..ديري انتي اللى يعجبك انا
قربت منه ومدت يدها / نوض
مدلها ايده وحطت يدها الثانيه على ضهره وساعداته انه يوقف …
لما وقف حط ايديه الزوز على كتافها …هيا تحشمت حساته زى الحضن ..رخت يدها شوى …ارتخى هوا وقريب طاح …
ردت ايديها وشداته كويس ….
هوا يانارى حس ان اول مرة حد يحضنه ويحس بالحنان
..بعد حضن حناه
-روقيه / ساعدنى اندخلك للبراكه
حول يده من كتفها واتكى ع البراكه ودخلاته فيها
هيا براكه نضيفه ..لما يبو ايزردو فى الحوازة يمشولها ويقعمزو فيها ..من داخل فيها صندوق على تركينه فيه حرارات وطماطم وزيت وجنبهم غاز رخامه
دخلاته بصعوبه لان جسمه قوى وعضلات
قعمزاته وتكت ضهره على حيط البراكه / اصبر شوى
جابت الصندوق وحطاته فى جهه والغاز فى جهه الثانيه
مدت يدها / تعاله
يتحرك بصعوبه قعد يدنى بالشوى ..ساعداته و حطتله راسه عالغاز ورجله المضروبه قامتها عالصندوق
-روقيه / لازم انوقفو النزيف من رجلك …لازم نربطو رجلك بحاجه فوق الجرح
-استغرب فيها / صح كلامك ..وانتى كيف تعرفى هدا كله
-تلفتتله / انا ابله علوم …لكن المشكلة بيش بنربطلك توة
-ايوب / حوليلى تيشيرتى اربطيلى بيه
-روقيه / تيشيرتك كله تراب من كثر ماطحت شكلك…وبدل ما بنديرو حاجه تنفعك ..بنخلوها اضرك
-حط يده على فخده / ااااه ….
-منغير ماتخمم مدت يدها على وشاحها وحولاته وربطتله بيه رجله
وهوا يتفرج ويتمتم / بسم الله ماشاء الله
وهوا فى عز الالم والمرض..البنت عجباته ….
قصتها طايحه علي وجهها وهيا تربطله فى رجله …وهوا يشبحلها
سبحان الله هدا اللى ايقولوله الحب من اول نضر
-ايوب/ شن اسمك
-تلفتتله/ عندك حرارة
-ايوب/ مش عارف…مش حاس بشى
حطت يدها على جبته لقاته زى النار
-روقيه/ انا لحد هنايا ومعش نقدر نساعدك اكثر …بوى ايراجى فيا فى السيارة ..نخاف ينشغلو عليا ويلحقونى ويشوفوك
-ايوب/ لا لا مانبى حد ايشوفنى
-روقيه / اعطينى رقم حد انكلمهولك من اهلك ايجيك
-ايوب / نعطيك رقم صاحبي زكريا …كلميه واوصفيله المكان ..تقدرى تحفظى الرقم
-روقيه / ايه نقدر نحفظه قوله
واعطاها الرقم …ووقفت حولت الماليا الخارجيه اللى لبستها وحطتها على شعرها غطاته وبتطلع
-ايوب/ بنطلونك فيه دم
-شبحاته / حييه .. تو نحوله ومانخليهمش ايشوفوه
-يشبحلها / شن اسمك
-واطت راسها / اسمى روقيه
-ايوب بتعب/ احلى اسم فى الدنيا
-روقيه / وانت
-ايوب / اسمى ايوب
-روقيه / عاشت الاسامى …
وتلفتت لباب البراكه / توة خلينى نطلع نخاف حد يلحقنى
..وكون متهنى طول حنكلم صاحبك وبادن الله ايجيك
-ابتسملها / فى امان الله
وخلاها تمشى على اساس امتى مايبي يلقاها ايجى هنايا ويسأل ويدلوه على حوشها …يحسابها تسكن فى نفس الجهه
طلعت روقيه من المكان وهيا مخليه قلبها فيه …
وصلت لباب حوش عمها عبدالسلام وخشت من الباب ماشافها حد…. وركبت من الدروج اللى فى السقيفه ركبت فوق طول ..خشت لدار البنات مالقت حد غيرت حوايجها وحطتهم فى كيسه ودستهم فى شنطتها الصغيرة
وقلبها يدق
__________________________
تمت ….ويتبع
توة كيف بيصير …وهل مازال بيتلاقو روقيه وايوب مرة ثانيه ….الحلقات مزال…وتو نعرفو
وقولو زهيرة ما ادلعش فينا وما اطولش في الحلقات ??
اعطونى رأيكم فى الحلقه نفسها والاحداث
نحبكم❤❤❤