احفاد الشيطان للكاتبة زهور جمال الدين

#احفاد_الشيطان

?بقلم الكاتبه زهور جمال الدين?

?الحلقه السابعه?

.

اليوم اللى بعده …

فى حوش ابراهيم …..طقطق باب الحوش

طلعت مرام فتحت …لقت واحد واقف فم الباب
-الشاب / بوك قاعد
-مرام من ورا الباب / قاعد ايه
-الشاب / ترا ناديهولى نبيه فى موضوع
-مرام / بوى مريض ومايقدرش يطلعلك.. اناديلك اختى الكبيرة
-الشاب / قلتلك نبيه هوا ضرورى … كانا مايقدرش يطلع تو نخشله لداخل لمكانه
-مرام استغربت / باهى راجينى هنايا لحظه بس نشوفه

وخشت للدار اللى فيها بوها وروقيه

-مرام تكلم فى روقيه / فى واحد برة يبي بوى
-روقيه / خيره شن يبي…. ماقالش
-مرام / لا ماقالش …قال يبي بوى وخلاص

وقفت روقيه… لبست حجابها ….
وطلعت للباب ….

وقفت من ورا الباب / السلام عليكم
-الشاب/ وعليكم السلام
-روقيه/تفضل خوى
-الشاب/ نبى نكلم عمى ابراهيم
-روقيه / انا بنته ..تقدر اتقولى اللى تبيه ونوصلهوله
-الشاب / لا نبيه هوا شخصيا
-روقيه / باهى لحظه بس … انخش نعطيه خبر …ونجى ندخلك ليه
-الشاب / اوكى اهو نستنى

وخشت روقيه اتصلت بي سالم جارهم
-روقيه / اهلين عمى سالم
-سالم / اهلا يا رقيه شن حالك ..وحال خواتك وبوك
-روقيه / الحمدلله كلنا بخير
-سالم / شنو جوكم خواتك للحوش ولا مزال
-روقيه / ليهم اكثر من شهر مدخلتهم علينا خالتى..وجونا بعدها هلبا مرات..ماهو نادينا عمتى مبروكه عالعشى ليلتها
-سالم / ايه حق اتفكرت ..الله غالب عمك سالم كبر وجاه الزهايمر ..ربي يهنيهم انشالله
-روقيه مبتسمه / ربي ايطول فى عمرك يا عمى…..

واسترسلت / قتلك غير فى واحد يبي يخش لبوى لداخل .. قلت كانك فاضى اتجينا للحوش شويا
-سالم / انا فى الحوش ..اهو جايكم توة
-روقيه/تمام ..اهو تو نخلى الباب مفتوح ونخشو انا ومرام لداخل …ودخله انت معاك
-سالم / تم

وبالفعل خلت الباب مردود ..وعطت علم لبوها انها كلمت سالم جارهم وبيجى توة وبيدخل الشاب ..

وخدت مرام وخشو للمطبخ ايديرو فى الشاهى

____________________________________

.
فى منطقة السياحيه ….
حوش الاستاد عبدالرحمن مليان بي خوته

-زوجته حياة تبكى/ هوا هدا الرقم اللى كلمونى منه
-كريم ولدها / لازم انكلمو الشرطه ياعمى
-سعد عمهم / لاااا اصبرو شوى …الرقم اللى اتصلو بيكم منه واعطتهولى امك توة لقيته خارج الخدمه …مانبوش انديرو شوشرة لبوك يقتلوه ولا حاجه ونقعدو فى قصه ثانيه

-كنزى بنتهم تبكى / لا اااا يا عمى …بابا لا
-وقف سعد وجى جنب بنت خوه وحضنها / كنزى حبيبتى ماتخافيش ..غدوة ولا بعد غدوة انطلعوه
-كنزى تبكى/ وكيف بنطلعوه يا عمى وهما سكرو رقمهم ومعش قدرنا نحصلوهم
-سعد / تو انتصرف انا وانطلعوه بادن الله …اهم حاجه ماتقوليش الموضوع لصاحباتك فى المدرسه ويتنشر
-كنزى / ومنقالك انى مزال نقدر نمشى للمدرسه يا عمى
-سعد / لاااا ردى بالك …انتى شهادة ثانويه العام هدا
…ماتخليش ولا درس ايفوت عليك
-كنزى / انشالله نقدر يا عمى …

ياحنه عبدالرحمن مهندس فى شركة نفطيه.. عنده زوز ولاد فهمى وعزو مطلعهم يقرو برة بعد الثانوية خايف عليهم من الخطف ..ومعاه فى الحوش زوجته حياة مدرسه ثانوى وبنته كنزى تقرا شهادة ثانوية وولده كريم يقرا ثالثه اعدادى

خطفوه من الصبح … وكلمو مرته قالولها راجلك عندنا واى حركة او بلاغ منكم انسو امره بكل
وقالولها استنى مننا مكالمه هاليومين بيش نقولولك عالمبلغ المطلوب

__________________________________

.
قدام حوش ابراهيم ….

جى سالم جاره من حوشه لقى الشاب اللى قالتله عليه روقيه واقف فم الباب
-سالم / السلام عليكم
-الشاب / وعليكم السلام
-سالم / محسوبك سالم جار عمك ابراهيم اللى واقف انت قدام حوشه توة ..وكلمونى العيلة بالتليفون وقالولى نجى ندخلك للحاج
-الشاب / اهلا بيك
-سالم فتح الباب بيده / تفضل
-الشاب / شوية بس نبى نجيب حاجه من السيارة
-سالم / باهى على راحتك

مشى الشاب جهه السيارة …فتح الكوفينو وطلع منه شكارة كناسه كحلا معبيه ه ه ه …واضح انهم فلوس

سالم مستغرب ومصدوم فى الشكارة …
ومع هدا خش هوا والشاب

-سالم / السلام عليكم يا عيلة
-روقيه من ورا باب الكوجينه / تفضلو يا عمى سالم

خش سالم سلم على ابراهيم … والشاب وراه
ابراهيم باين عليه الكبر .. راقد عالفراش ومتكى المخده فوق … ومتغطى ببطانيه خفيفه عشان المكسف

-سالم / شن حالك يا حاج
-ابراهيم / الحمدلله بالف خير شن حال العويله

-سالم / الحمدلله كويسين …
وتلفت للشاب / اسمعو يا جماعه الخير…الحكايه كانا فيها اسرار ولا حاجه عادى راهو والله مافيها زعل نطلع للصالة وانتو احكو اللى تبو

-الشاب مبتسم / لا مفيش مشاكل….نعرفكم بنفسى ..انا طارق .. تبع منظمه احفاد المختار ..
وحط يده عالشكارة / الكيسه هادى فيها 70 الف …حق الارض اللى تملكها انت فى عين زارة.. احنا نبو نشروها منك

وطلع العقد من جيبه وحطه عالبساط .. هدا العقد موقع من المشترى والوسيط

-ابراهيم باندهاش / اللى باعتك اسمه حمزة ماهو
قام طارق الورقه وقري وتاكد من الاسم اللى فوق الشخص اللى موقع
-طارق / بالزبط اسمه حمزة
-ابراهيم بهدوء/ لكن حمزة هدا جانا من زمان.. وبعتلنا حتى ناس .. ورديناه قولناله اننا مش ناويين انبيعو

-طارق / رديتوه زمان قبل مانخشو احنا كوسيط .. لكن لما خشينا احنا خلاص وجب عليكم البيع

-تلفت ابراهيم لى سالم / ترا نتعبك ناديهم من داخل يا سالم

وقف سالم .. طلع من الباب وفات للممر ونادى روقيه

-روقيه / نعم يا عمى
-سالم / تعالى يبيك بوك
-روقيه / باهى شويا هى

وخشت لى لدار مرام لبست عبايه ..وساوت حجابها كويس وخشت للدار
-روقيه واقفه / السلام عليكم
-كلهم / وعليكم السلام
-ابراهيم شاور عالورقه متع العقد / ترا خودى الورقه واقراها

مدت يدها وقامت الورقه … وقرتها وشافت زوز توقيعات
وحده مكتوب فوقها حمزة..والثانيه مكتوب فوقها احفاد المختار

-قامت راسها / هدا شنو
-طارق / هدا عقد بيع الارض متع الوالد اللى فى عين زارة
-روقيه / قصدكم معش فى ارض فى ليبيا غيرها
-طارق / الاخ حمزة يبيها لان ارضه جنبها ويبي ايضمهم لبعض ..
واشر عالكيسه/ و هادو سبعين الف ..حق الارض ..ولو تبو اكثر انا نوصل للمنضمه وهما يتناقشو مع الاخ حمزة
-روقيه / لا توصللهم ولا يتناقشو معاه … الارض احنا مانبوش انبيعوها ..وهدا اخر كلام عندنا

-طارق اوقف وبهدوء / لكن احنا بعناها خلاص
-روقيه / انتو منو قصدك
-طارق مبتسم / احنا المنضمه
-روقيه / طز فيكم

وصارت لحظه صمت …..

طارق تلفت لى ابراهيم وسالم / انتو قد الكلام هدا
-روقيه مدت يدها للباب / اطلع برة …وارفع فلوسك معاك
..وقول للى اسمه حمزة انساها الارض ومعش تخمم فيها

__________________________________

ايوب يضرب فى ايديه الزوز على بعض متكنطى

-موسى / وشن تكون البنت هادى ..بالك عندها حد متكيه عليه
-طارق / ياودى ماشكلهاش عندها كتاف .. غير واخدة فى روحها مقلب

-ايوب / شن مزال عاد …اناااا نبعت مندوب لى ناس ايلزوه …هادو فى اما عالم ساكنين …شكلهم مش سامعين بيها منظمه احفاد المختار

-زكريا يضحك / لو قلتلهم ميليشيا راهو فهمو عليك ..لكن كلمه منضمه مايفهموهاش فى ليبيا
-ايوب / احنا مش مليشيا ..احنا منظمه ملمه بكل شى … والبنت هادى انا كسار راسها
-موسى / قصدك بتمشيلها بنفسك
-ايوب / هدا ماناقصنى غير نكشف روحى
وتلفت للباب / نصيص …وين نصيص

انفتح الباب وخش شاب قصيرون وضعيف / نعم يا فندى ايوب
-ايوب / قعمز مع طارق يعطيك نعتت حوش تمشى توة تجيبلى تاريخهم وتاريخ جدهم كلهم
-نصيص / تى نجيبلك تاريخهم وتاريخ جيرانهم واللى يعزوهم
-ايوب / تم تووووة اطلع …وغدوة زى الوقت هدا نبى تقرير كامل
-موسى يضحك/ وكيف بدير يا نصيص
-نصيص / كالعادة ..بنمشى للمحل اللى فى شارعهم ولا الحلاق وبنقوللهم بنخطب بنتهم وننشد على سلسفيل اهلهم كله
-ايوب / بلا كثر دوة عاد اطلع توة هيا

طلع نصيص وسكر الباب وراه ..وستادن منهم طارق وطلع حتى هوا

-زكريا / ما تغشش روحك يا ايوب …سيورنا نلقو دواها والبيعه اتم
-ايوب / تصدق معاه حق حمزة يشري الارض عالعناد ..تى والله دمى انحرق ..بنت فرخه اتلز راجل بفلوسه ..تى والله مانى معديهالها .. وحتى كانا حمزة بطل من الشري انا نبيها الارض

-موسى / صدقت …تى والله حاجه تحرق الدم …شنو الهم الاحرف اللى صار فى ليبيا حتى البنات بدو يحكمو
-ايوب قعمز على مكتبه / البلاد اتخدت خلاص…

وبدى تليفون ايوب ايشرين …شاف لقاها حناه

مد التليفون لى موسى / بالله قوللها ايصلى …

خدى موسى التليفون وكلم عمتك سالمه ..وقاللها ان ايوب ايصلى …وسكر الخط وعطاه التليفون

-زكريا / قاعدة شادة فى الموضوع
-ايوب يضحك / كل مانسكر موضوع حوش فلان ..يطلعلى حوش فلان الثانى تبينى نخطب
-موسى / باهى اخطب وتزوج يا راجل ..العمر هوا هداكه راهو ..احنا الثلاثه كبرنا راهو قريب نوصلو الاربعين

-حط ايوب يده على قلبه / وهدا شن انديرله
-زكريا يضحك / واااك عالحب الازلى ..قصدك قاعد مش يآئس
-ايوب / يائس عينك …للاسبوع اللى فات بعتت واحد يسأل فى نفس الجهه …وشى …مفيش حوش فيه بنت اسمها روقيه
-موسى / يا راجل بالك ملايكه ربي بعتهالك انقداتك
-ايوب وخر الكرسى واتكى عليه / من ناحيه ملايكه …نشهد بالله انها ملايكه
-زكريا / والله لما تتزوج وتحط صغارك فى حضنك حتنسى الدنيا ومافيها وحتنسى اى وحدة تعرفت عليها زمان
-موسى يضحك/ حسستنى انك دايرة عويله ومرقدهم على صدرك كل ليله
-ايوب / الحضن هدا رقدت فيه وحدة بس ..صح هيا طاحت عن طريق الخطا ..لكن انا حسيت بيها ومستحيل نخلى وحدة ثانيه تخشه
-موسى / ربي يشفيك ماعندنا نقولولك

وقعدو يضحكو الثلاثه ?

___________________________________

ثانى يوم …

كنزى مقعمزة فى الفصل فى الاستراحة
ومعاها ندى ومرام صاحباتها

-كنزى تبكى / ردو بالكم يا بنات تحكو لى حد …راهو مانعين علينا انطلعو الحكايه ..وعمى سعد وماما يمشو ويوصو فينا انا وكريم

-مرام حضنتها / يارووووحى عليك يا كنزى .. من امس صاير فيك هكى وماتكلميناش
-ندى / مفروض كلمتينا ..او عالاقل كتبتيلنا فى المحادثه المشتركه اللى دايرينها فى الماسنجر

-كنزى/ مقدرتش
-مرام / سبحان الله اختى روقيه تقول حست بيك ..امس تسأل فيا عليك …قالتلى خيره ندى وكنزى معش جوك

-كنزى / تسأل عليها العافيه انشالله
-ندى / تعرفى زمان جار حوش خالى خطفوه وماعرفوش اهله مكانه وين …شوى كلمو واحد جابهولهم …
-كنزى / منهوا وشن اسمه وكيف نقدرو نوصلو فيه
-ندى / والله مانعرف …لكن رقمه فى تليفون خوى صهيب
…اول مانروح ناخده منه
-كنزى / لا لا فكينى ماتقوليش لى صهيب …قلتلكم ما نبو حد يسمع
-ندى / باهى تو نخنبهولك ونبعتهولك بالماسنجر
-كنزى / تقدرى تخنبيه من تليفون خوك
-ندى / عيب عاد امالا الرصيد اللى ديما عندى منين…ماهو خنبه من خوى صهيب
-مرام تضحك / والله ماتتحشمى
-كنزى فرحت / تم امالا انراجى فيك

وبالفعل روحو من المدرسه ….

كنزى حكت لى عمها سعد عالشخص اللى ساعد جيران حوش خال ندى صاحبتها
لكن عمها رفض الموضوع …بل بالعكس قعد ايلوم عليها كيف خبرت صاحباتها بالموضوع

لما ركبت كنزى لدارها …فتحت التليفون وصلتها رساله عالماسنجر ..
فتحتها لقتها من ندى صاحبتها …باعتتلها رقم تليفون
..وكاتبتلها جنبه اسمه” موسى”

مالاول كنزى بتحدف الرساله …بعتالى لما خممت لقت انه المخطوف بوها ..وانها مش صغيرة وتقدر اتساهم فى انقاد بوها

قررت انها تتصل بالشخص اللى اسمه موسى …وبالفعل كتبت الرقم فى تليفونها واتصلت ..وبدى الخط اينادى

_________________________________

.
فى مكتب ايوب ..

عمك نصيص غاب وجابلهم الزبدة

ايوب واقف عالشباك يتفرج عالشارع ويسمع فى نصيص شن يقول …

وزكريا وموسى مقعمزين على صالونات الجلد اللى حوالين المكتب

نصيص ماسك ورقه فى يده مكتوب فيها المعلومات..

يقرا ويشبحلهم / هما اربع بنات …بوهم جابهم على شوق
..لما جاته بنته الكبيرة عمره قريب الخمسين عام

-موسى / هدا علاش البنت الكبيرة حاكمه
-زكريا / بالك حتى غابت عليه بوها ومعش زابط السمى مالعمى ?

-ايوب يشبح للشارع / كمل يا نصيص

-نصيص / الكبيرة ..والكبيرالله ..قاعدة فى حوش بوها
..جوها هلبا خطابين وترفض..من ضمنهم جيرانها

سكت وشبحلهم ..والكل ساكت وماعقبش

-نصيص/ البنات اللى بعدها توامه …واخدات صغار خالتهم خوت …اتزوجو قبل شهرين
-ايوب / كمل

-نصيص/ البنت الكبيرة تخدم فى المدرسه اللى جنبهم
….والبنت الصغيرة تقرا شهادة ثانويه فى نفس المدرسه اللى تقري فيها اختها

شبحلهم لقاهم ساكتين ..استرسل

-نصيص/ عندهم سيارة امدرسه فم الباب ..كانو يسوقو فيها وحدة من التوامه زمان ..ولما تزوجو خلوها مدرسه فم الباب
ولا ساقتها البنت الكبيرة ولا الصغيرة

-ايوب / وشن ثانى

وقعد نصيص يعطى فيهم فى معلومات ثانيه …وكمل

-ايوب / رقم واحد السيارة تنحرق اللى فم الباب…وترجعولها بالعقد اتخلوها اتوقع والا مزال اللى جايها اكثر

-زكريا / وكانا رفضت اتوقع

-ايوب / خواتها ايردوهم ازواجهم حوش بوهم …خلى ايخللو عندها …وكان قعدت امعنده يطلقو

-نصيص / تبى خواتها يغضبو …اعتمد عليا انا

-ايوب تلفت لزكريا / حرقه السيارة نبيها الليله ..بلغ الضبع يتخد الاجراءات اللازمه ..وغدوة يرجع طارق بالعقود

شرين تليفون موسى …شافه لقاه رقم غريب

-رد عليه / الووو
-كنزى بصوت رقيق / الو

موسى قريب داخ لما لقاه صوت ناعم متعود عالاصوات الخشنه بس ..وقرر يطلع من جنب صحابه??

-موسى/ لحظه بس نطلع للتغطيه

وبالفعل طلع ….

-موسى / تفضلى

بدت كنزى تبكى ….وهوا فى خاطره ريتها فى نصيص ولا فيك ?

-موسى / جنبك طاسة اميه
-كنزى بدلع / ايه
-موسى / اشربي منها
-كنزى / باهى

وهوا فى خاطره ايبهى ايامك

-رجعت تتكلم / ايوه
-موسى/ شربتى
-كنزى / ايه الحمدلله
-موسى/ صحتين …خيرك انشالله خير
-كنزى/ بابا خطفوه
-موسى/ بتساخير الله الليله ايبات عندكم … ولا بالكثير غدوة ….غير معش تبكى بس
-كنزى فرحانه / بلحقه
-موسى / وراس دموعك اندير جهدى …غير قوليلى وين واى جهه اللى خاطفاته
-كنزى/ منعرفوش …كلمو ماما مرة وحدة بس ..وبعتالى طلعو الرقم من الخدمه
-موسى/ باهى نتعبك اتجيبيلى الرقم اللى كلموكم منه
-كنزى / باهى سكر شويا بس وتو نعاودلك
-موسى قلبه بدى ايطق / باهى نراجى فيك

وخش للمكتب واتكى عالصالون

-زكريا / خيرك ياموسى شن فى
-موسى / خلونى رانى دايخ
-ايوب / خيرك من كان ايكلم فيك??

وشرين التليفون ….

وقف موسى / اسكتو .. خلونى نسمع الصوت الناعم

ورد عليها ..وعطاته الرقم اللى كلمهم..وعطاته اسم بوها بالكامل …ووعدها انه يوقف معاها

وصحابه منتبهين معاه ويضحكو

-موسى / قتلك …
-كنزى/ نعم
-موسى/ ماعرفتش الاسم الكريم
-كنزى/ انا اسمى كنزى
-موسى / كنزى….عاشت الاسامى ..

وسكرو ا لخط ..وبدو صحابه يضحكو ويقرقرو الزوز
وهوا هايم

__________________________________

.
فى نفس الليله فى الليل

ناض عياط فى شارع حوش ابراهيم …
سيارته اللى مدرسه قدام حوشه ولعت فيها نار

اولاد الشارع كلهم يجرو اللى فى توتا واللى فى كانتيرا يلمدو فى التراب وايصبو عالسيارة …
واللى يجرى بى قردل اميه ويصب….

-ابراهيم / يا رقيه …رقيه تعالى ..خيركم شن فى …شن هالعياط
مشت لبوها تجرى / ماتوجعش خاطرك يا بوى سيارتنا ولعت فيها النار
-ابراهيم / نوضينى …نوضينى نطلع انشوف
-روقيه / علاش طالع يا بوى وترعش فى روحك …اولاد الشارع ايطفو فيها برة
-ابراهيم / قلتلك طلعينى …تحسابينى طحت خلاص
-روقيه / الله لا اطيحك يا بوى …
ومدت يدها ..خدت يده ووقفاته طلع للشارع …

تلمدو عليه رجالة الشارع كلهم…

-على جارهم / علاش طالع يا حاج
-ابراهيم / نبى نشوف اللى صاير.. وانا عارفه ابتلاء من الله .
ايشوفنانصبرو ولا نكفرو
-سالم / مستورة انشالله يا حاج …هيا الحمدلله اللى مافيهاش بنزينه …كنهدا راهى انفجرت
-ابراهيم / الحمدلله ..ستر الله باقى

وطفو هاديكا السيارة اللى تبشمطت مع بعضها وراحت فحمه …حتى رابش ماتنباعش

فى نفس الليله جو خواتها وخالتها فى هداكه الليل لما سمعو وباتو عندهم .. وثانى يوم عاد الحوش يملى ويفرغ عاونوها خواتها وروحو فى الليل

___________________________________

فى مكتب ايوب

-موسى مقعمز على تركينه ويوشوش/ وتى العشى لبوك .. اهو امروح الليله
-كنزى فرحانه / بلحقه …الحمدلله ياربي…الحمدلله اللى كلمتك

طبعا هما يعرفو ارقام بعضهم حتى لو مقفلات …لما عطاته هيا الرقم اللى كلم امها …شاف الملفات متع الارقام اللى عندهم ..وزبط الجهه اللى خاطفاته وكلهم
طبعا هما يمونو على بعض …منغير مايناقشوه طول ركبو المهندس عبدالرحمن فى السيارة ونزلوه على رئيسى غوط الشعال ومشو

-موسى/ احسن مادرتى لما كلمتينى …اهو روحلك .والمهم تفرحى
-كنزى تتكلم بنعومه حتى هيا عجبها موسى/ مش عارفه كيف بنكافيك …لازم نشريلك هديه ونبعتهالك
-موسى / وعلاش تبعتيهالى …اعطيهالى يدا بيد
-كنزى تفاجئت / قصدك نتلاقو
“الفصعونه ?????

-موسى / وليش لا
-كنزى/ الاسبوع هدا عندى امتحانات ..الاسبوع الجاى نفضى
.. وعلى اى حال مابيناتنا تليفون …وتو نتفقو
-موسى / تمام..توة نخليك تمشى تفرحى مع امك برجوع بوك
-كنزى/ باهى باى

وفى الجهه الثانيه من المكتب

-طارق / شنو نمشيلها ثانى ولا مزال
-ايوب / لا مزال …انا غيرت رائي …نبى نمرمطها قبل ..
-طارق / وشن مازال بدير
-ايوب/ عد فى الايام غدوة لا … بعد غدوة بتوصلها الضربه الثانيه

__________________________________

ايوب باعت جماعه جابوله ارقام ازواج خواتها

واتصلو بيهم الزوز / يا توووة تسيب عملك وتروح ترفع مرتك لحوش بوها …يا اما اختك اكرام اهى قدامى فى كليه الطب
..بتلطع من درس العملى بنقيموها فى السيارة طول

-معاد/ وعلاش …شن فى
-الشاب/ البنت مازاللها نص ساعه وتطلع من درس العملى … اتحرك توة ودير شن قلنالك ..وردبالك اتكلم اختك …لان لو عاندت انجيبوها انشالله من تحت امها
-معاد / وشن المطلوب
-الشاب/ زوجتك تمشى لحوش بوها توة غضابه …اتلوحها وتطلع …ورد بالك تحكيلها عالموضوع اللى صاير
-معاد / وليش هدا كله
-الشاب / غدوة نقولولك ليش …قدامك نص ساعه …

وسكر الخط فى وجهه

معاد قريب يهبل …شرين تليفونه لقاه خوه احمد

-احمد ايعيط / يامعاد كلمونى ناس توة يبونى نرفع سماح لحوش بوها ولا يخطفو اكرام
-معاد / جتنى نفس المكالمه
-احمد / باهى وكيف الراى
-معاد / ماعندناش حل الا اننا نسايروهم …وغدوة ايكلمونا ويقولونا علاش دارو هكى
-احمد / شن الكلام اللى تقول فيه ..تو هدا راى
-معاد / اما احسن ولا اختك يخطفوها … مش بتموت ست الحسن والجمال كانا باتت عند اهلها ليله
-احمد / باهى اهو تو نمشى نرفعها

وروح احمد هوا الاول للحوش…طلع سماح بالسيف عليها وهيا تبكى

-سماح / يا خالتى والله مادرت حاجه
-خديجه / ياوليدى بدل الساعه بساعه …اطلع انت توة غير جوك وفى الليل روح تلقى المشكله تفهت

-سماح / والله مافى بينى وبينه اى مشكله… روح طول قالى اطلعى
-احمد / ليش اتكثري فى الدوة …قلتلك اطلعى ..اهو تلقينى فى السيارة

وركبت معاه …ووصلها لحوش بوها

سماح قريب تموت بالبكى …وروقيه اتهدى فيها

-روقيه / غير نقصى صوتك بوك يسمعك ..احمد مايستغناش
عليك يا سماح …غير لحظه شيطان

شرين الباب فتحت مرام ….

خشت سهام تبكى حتى هيا جايبها معاد لحوش بوها

-روقيه / معقولة الزوز قاعدات عرايس …والزوز تغضبو فى وقت واحد ..لاااااا الحكايه فيها إن

____________________________________

تمت ….ويتبع

ايوب يعطى لى روقيه فى الضربات وحدة ورا الثانيه ..
قاعدة مافاقتش من الاولى ايزيدها الثانيه
وعمى موسى اللى غطس لودانه زعما بيتلاقى معاها والا لا ?????

نحبكم

error: