احفاد الشيطان للكاتبة زهور جمال الدين

#احفاد_الشيطان

بقلم زهور جمال الدين
?الحلقه الواحد والعشرون ?

–
فى حوش المبروك خو سالمه

سالمه وقمر مرت خوها راقدين فى دار قمر مفرشين فراشات واراقدين …خشت زكيه فتحت الضى ..
-زكيه / تبى حاجه عمتى
-قمر شادة السبحة وتسبح / لا بنيتى صحيتى ..المبروك روح
-زكيه / لا مزال لكن على وصول
وتلفتت لى سالمه / تبى حاجه عمتى سالمه قبل ماترقدى
-سالمه مغصوصة/ لا صحيتى بنيتى
-قمر تلفتتلها / خيرك يا سالمه
-سالمه بدت تبكى / مندرى خيره قلبي مطبق
-قمر / اللطف علينا .. ادكرى الله يا حاجه
-سالمه /لا اله الاالله …
وقامت تليفونها /من بكرى وانا نكلم فى ايوب تليفونه خارج التغطيه .. قالقه عليه وقلبي بيتقطع
-قمر/ بلاش هبال يا حاجه ..خيرك تفاولى عالولد
-زكيه / غير اصبري يا عمتى .. هاتى تليفونك نكلمهولك..
مدتهولها/هاك خودى… انشالله تحصليه يابنيتى
خداته زكيه وضربت رقم ايوب .. بدى ينادى
-زكيه / اهو ينادى يا عمتى ..
-سالمه / الحمدلله …
-ومدت يدها / هاتى التليفون بسرعه قبل مايفصل

______________________________________

–
فى شقه السراج ❤

روقيه قايمه ايوب .. وهوا مشبك ايديه عليها .. وزنه رزين لكن قعدت متحملة لين وصلاته دار النوم …
-روقيه / حبيبي خيرك شن صاير معاك …
-ايوب تعبان / شكلى بنستبرد ..
قعمزاته عالسرير ووقفت تشبحله / انا مش صغيرة .. قولى خيرك …
-قام راسه بصعوبه شبحلها/خشيت فى عركه..وتمت بالسلاح
-قعمزت جنبه / خيرك صغير خاش فى عراك وثانى ادخل فيهم السلاح
-ايوب / غدرونا .. وبدو يضربو بالكلاشنات منغير مانشوفوهم
-مدت يدها اتكى فيه عالمخدة / مش عارفه امتى بتم السلاطه اللى صايرة فى البلاد ويلمو السلاح
تساوى فيه مست التليفون حاطه فى جيبه الخلفى … طلعاته لقاته يشرين وهوا دايره سايلنت
شافت لقت اتصال من” لحنونه”
-روقيه / حناك اتكلم فيك ..رد عليها
-ايوب/ ردى عليها انتى صوتى تعبان تو تنشغل
فتحت روقيه الخط وردت / اهلين يا حناى
-سالمه فرحت / رقيه ..شنحالك ايوب روح
– روقيه / بكرى شويا بس كيف روح ..
-سالمه / وينه اعطيهولى
-روقيه تشبحله / راقد يا حناى …اينوض انوقله يتصل بيك
-سالمه / سلم بنيتى هنينى عطيهولى .. قلبى واكلنى عليه
-روقيه / باهى شويا هى انوضه
سكرت الصوت من التليفون وتلفتت لايوب / حناك تبى تكلمك …
شاور بوجهه الجهه الثانيه
-روقيه / وراس حبيبي كلمها مشغوله عليك هلبا
-ايوب تعبان / بتسمع صوتى بتنشغل اكثر
-روقيه / قلتلها راقد .. معناها حتى لو سمعت صوتك متغير حتقدر انك راقد ….
-ايوب / هاتى ..
خدى التليفون ود عليها / اهلين ياحناى
-سالمه / شنحالك يا وليدى ..هكى تروح لحوشك طول منغير ماتفوت عليا ونطمن عليك
-ايوب / روحت تعبان يا حناى …حتى روقيه المفروض دورها اليوم فى حوش بوها تفاجئت بيها هنايا
-سالمه / معليشى يا وليدى ..عارفاتك تغبان حتى صوتك متغير بكل
-ايوب / صوتى متغير حتى على خاطر كنت راقد وروقيه نوضتنى
-سالمه / ربي يحفظك يا اوليدى.. وغدوة بادن الله تلقانى واتيه انروحو لحوشنا
-ايوب / حاضر يا غاليه ..ومعش تنشغلى هلبا
-سالمه / ربي يحفظك يا اوليدى
وسكرو الخط ….
-غمض ايوب عيونه من التعب/ سكريه التليفون
-روقيه / حاضر
-تلفتلها وحط يده على خدها / ربى يخليك ليا
قربت منه روقيه /جعان … انطيبلك حاجه
-ايوب / لا
-روقيه / باهى ارقد كانك تعبان
غمض ايوب عيونه ….ورقد …حس بالامان مدامها هيا فى جنبه ….تعمق فالنوم لدرجه بدى يشخر
حطت روقيه ايدها على شعره .. وقعدت تمس فيه بحنان.. وتدكر كيف كانو يرقدو مع بعض ..وبوساته ليها …والحب اللى كان يصير بيناهم ….
ناضت فتحت شنطه الحوايج اللى جايبهالها هوا من الحوش بعد ما جابها للشقه… وكان حاط فيهم زوز ارواب? .. روب لونه اسود … وروب لونه موف ….
طلعت الروب الاسود …كان قصير ومكشوف هلبا …لبساته ..
ورقدت جنب ايوب وتغطت معاه فى نفس اللحاف …
تشبحله وتمس فى وجهه وشعره لين خداها النوم

______________________________________

–
فى الطريق …

زكريا بعد ماحط ايوب فى شقته قرر انه يتوجه لحوش بوه
عطى النعته للتاكسى..وخش منطقتهم ويمشى فى شوارعهم
فى راس الشارع لقى زوز سيارات لبوة واقفين …كأنهم ايراجو فيه هوا ايجى…
شقه ايوب واخدها جديدة وحاط فيها روقيه مايعرفوها
.. لانهم مش متوقعين مشكله معاه وهوا شاريها بالسر مايعرف بيه حد .. لكن حوش زكريا يعرفوه كلهم …
وهوا فايت جنب اللبوات شاف صهيب ولد عياد شاد كلاشن فى يده…. اتأكد ان فى خونه فالموضوع .. وانهم مبلغين عليهم …
-يكلم فى سواق التاكسى /اطلع من الشارع خوى
-التاكسى تكنطى/ ياوخى واخدنى من شارع لشارع تعبتنى والله خمسين جنيه فى الكريه ماترضينى
-زكريا / مية وخمسين ايساعدوك
-السواق انخلع / ااه
-زكريا / خود ميتين …راضى هكى
-السواق فرحان / راضى هلبا… وين تبى نرفعك توة

-زكريا / للمدينه
“وقعد يعطى فيه فى نعته مكتبه ”

______________________________________

–

الساعه 2 فالليل

روقيه راقدة جنب ايوب …لابسه روب اسود .. شن جاها وغير رايها وخلاها تلبسله هكى… هيا نفسها مش فاهمه ليش دارت هكى .. يمكن تبى ترقد معاه ومش قادرة تتنازله لانها زعلانه من حكايه شغله…وممكن لانها عارفه انه عنده رغبه فيها وفالاخير هيا مازالت زوجته…….ويمكن سخفها كيف مريض وحرارته مرتفعه……وممكن حضنها ليه لما دخلاته للغرفه دكرها باحضانهم القديمه …بس فالاخر كل الاسباب اساسها الحب ….
هيا راقده بالنوم ….ومتلفتتله … سير روبها من جهه اليسار طايح على ايدها ونازل …
فتح ايوب عيونه …لقاها فى وضع مغرى .. للحظه الاولى ماصدقش عيونه .. معقولة روقيه قبلت تكون ليه بعد الصد اللى صار فى الايام اللى فاتو كلهم
حط يدها على كتفها .. وقعد ايمرر فيه على جسمها كله …
قام يده فوق وحطها على رقبتها ..ونزل لصدرها …
فتحت عيونها … وابتسمتله / فقت
قرب منها هلبا ولصق فيها / نحبك
-روقيه / وانا برغم كل شى نحبك ..ومانتحملش نشوفك هكى مريض …
حط يده على ضهرها وضمها ليه / انت عارفه انك روحى وكل حياتى
باست على شفايفه / وانت روحى
نزل يده من الخلف على افخادها وقام الروب فوق لضهرها وهيا تضحك
-ايوب / حوليه
-تشبح لعيونه / تؤتؤ مفيش
-حط ايديه ورا ضهرها ورقد فوقها / مفيش عينك …يرضيك نقعد مريض وتزيد حرارتى
-روقيه / ااه وجعتنى .. تحساب وزنك خفيف
-ايوب / نحول لكن على شرط تجى انتى فوقى
-روقيه / لاااا ماتحلمش
-قعمز على رجليها/ انتى الباين بتعبينى …
شرين تليفون روقيه …قامه شاف لقاه منبه دايراته روقيه عشان موعد حبوبها .. سكر المنبه وداره صامت …
-روقيه / خليه ماتسكراش
-حط التليفون وقام الروب فوق وحط يده على بطنها / منبيش حاجه تشاركنى فيك الليله او تزعجنى
-حطت يدها على ايديه وقامتهم فوق / وانا ليك يا روحى
رخى ايده من يديها وفتح بطمه سوريته من الفوق وحولها .. وخدى الروب وقامه بالكامل لفوق ..وحوله منها ولوحه عالارض ….
-ويشبحلها / محلااااك …
ونزل عليها يبوس فيها … وعاشو ليله حلوووة

______________________________________

–
فى حوش ابراهيم ….

سماح بايته فى حوش اماليها ….
كملت اماعين العشى …ودارت لبوها الشاهى …وتغطى ورقد
ومشت اتكت فى سريرها فى دارهم القديمه
هدرزت على مرام شوى …وبعدها مرام رقدت غدوة عندها مدرسه …وسماح قعدت شادة الفيس وتقلب فيه …

قيس الساعه 3 شرين تليفونها .. احمد يتصل بيها
شافت الرقم فرحت …وردت عليه
-سماح بدلع /الووو
-احمد يعيط / روقيه وين يا سماح.. خيرها
-سماح انشلغت / بالشوى يا احمد خيرك ..ماهو وصلناها بكرى انا وياك لشقتها
-حط يده على جبهته يمسح فالعرق/ صح معاك حق من الخلعه طارت من بالى
-سماح / خلعه شنو … خيرك حبيبي رد عليا شغلتنى
-احمد / حوش روقيه ركبت فيه النار وينحرق توة
-سماح / حيه عليا على اختى ..شقتها ولا حوشها
-احمد/ حوشها اللى شروه جديد يا سماح
-سماح / وانت من قالك
-احمد / تى ماك عارفه خميس جارهم يخدم معاى …توة كلمنى وقالى حوش عديلك ركبت فيه النار
-سماح / يا حليلى على وخيتى
فاقت مرام مخلوعه / خيرك يا سماح
-سماح / حوش روقيه انحرق
-مرام وقفت بسرعه / اسسسسس اسكتى بوى يسمعك
-سماح تبكى وحاطه يديها على خدودها / تى ماهو سيوره بيسمع .. ياحليلى على وخيتى
-مرام / هيا وين
-سماح / هيا فى شقتها
-مرام / اتصلى بيها
-سماح / ينادى ومتردش شكلها دايرة تليفونها عالصامت ومتردش
-مرام / يا حليلى على وخيتى …كلمى احمد ايجيك نمشولها
تو تنخلع لما تسمع ….
وتفكر/ ولا مرات سمعت ولا
قامت سماح تليفونها / كانها سمعت راهو كلمتنا وخافت علينا ننخلعو
فتحت التليفون بتتصل …وفجأة شرين سهام تتصل
-ردت سماح/ ايوة
-سهام تبكى/ خيره حوش اختك …حاق انحرق
-سماح / انتى من قالك
-سهام / توة احمد كلم معاد وقاله …هيا وين
-سماح / هيا فى شقتها بكرى وصلناها انا واحمد
-سهام / توة بنمشيلها
-سماح / فوتى عليا .. تو نكلم احمد نقوله بنمشى معاكم
-سهام / باهى انتى فطريقنا هى

وبالفعل طلعت سهام ومشت لحوش بوها …ركبت سماح ومعاها مرام
-سهام/ مرام انتى ليش جيتى ..شن قلتى لبوى
-مرام / مقدرتش نقعد… قلت لبوى ان روقيه مريضه ومنمشو نشبحوها
-معاد / ربك يستر
-سهام قلقانه / ياااارب

____________________________________

–

فى شقه ايوب …

ايوب خش للدوش مع روقيه ….هيا لابسه روبها ..وهوا لابس شورت
-ايوب واقف عالحوض يشبح فى وجهه و يضحك : وين كنت بكرى … ووين موجود توة
-روقيه واقفه وراه / ديما وانت بعراكاتك ?
-تلفتلها / عادى اصلا طلعت من عركه خشيت لعركه احلى
-ضرباته على كتافه / تسمى فيها عركه
-ايوب / العركه الوحيدة الحلوة فالدنيا ….

-مشى للشباك سكره / اااه نسيتينى اللى كنت فيه …تو راهو الدنيا مقلوبه برة …

ووتلفت قرب من مكانها وباسها / وانا راقد فالعسل
-حطت يدها على صدره / لاحظت جسمك فيه ضربه جيهه رجلك وشكله صب منها الدم بكرى
-ايوب / بكرى شكلها فالعركه حصلت ضربه

حضنها / اوعدينى انك معش تسيبينى
-حاطه راسها على كتفه/ واوعدنى انك تصلح كل اخطائك وتحلل فلوسك
-ايوب / نوعدك .. لان الايام اللى فاتو زى المهبول منغيرك
-روقيه / نحبك
-ايوب / نمووووت فيه ….
وتلفت للباينو / افتحى الميه
-روقيه / هى

بعد ساعه /

طلعو للصالة.. وكل واحد فيهم لابس روب الدوش …
خشو دار نومهم … ايوب خدى توته لبسها من الملابس الى جابهم من شقته … وروقيه لبست روب ثانى
-ايوب / لااااا هكى ماتفاهمناش ..بنرجعو نتعاركو ثانى
-روقيه تضحك / ياسرك شر ..
-ايوب / تعالى للصالة
-روقيه /هى ?

قعمز ايوب عالصالون…وطلعت روقيه من دارها لابسه جلابيه اردنيه احمر فالاسود .. وفاتحة شعرها كلها مبلول من الدوش مد ايوب يده .. وخداها فى حجره … ويشبحلها ومبتسم …
-ايوب / معش نبيك تغيبى عليا
-لفت يدها حوالين رقبته / مستحيل .. اصلا حتى انا معش قادرة نبعد عنك اكثر

وطق باب الحوش تخبيط بالقوة …والشريانه تشرين فى جرة بعضه بنفس الطريقه
-روقيه انخلعت / يا ساتر
-ايوب وقف / انشالله خير
وتلفتلها / البسى حجابك وخشى الدار وسكرى على روحك بالمفتاح
-روقيه / ليش
-ايوب يعيط/ ديري زى ماقتلك
-روقيه خايفه/ انت غير اسأل من فالباب
-ايوب قرب / شكون
-معاد / انا معاد افتح يا ايوب انت هنايا
خشت روقيه تجرى تجيب فى وشاحها … ومشى ايوب للباب يجرى يتفاجأ بى معاد وخوات روقيه الثلاثه معاه

-طلعت روقيه انصدمت بيه / خيره بوى
-سهام تبكى / بوى مافيه شى
-روقيه / امالا خيركم
-معاد تلفت ل ايوب / حوشكم ولعت فيه النار من بكرى وجيرانك جابوله سيارة االاطفاء.
-سماح / واحنا من بكرى نكلمو فيك وانتى ماترديش
-روقيه غطا وجهها بايديها الزوز/ دايرين تليفوناتنا عالصامت
-ايوب / اطلعى بري مع خواتك لى حوش بوك ..وانا تو نتصرف
-روقيه / بنمشى معاك .. غير قولى من حرقه الحوش … شن فى يا ايوب
-مسكلها ايديها الزوز / ماتشغلينيش عليك … برى مع خواتك منغير عناد
-وتلفت لى معاد / وصلهم حوش بوهم توة
-معاد / سيارتك ماشفتهاش برة
-ايوب خش يجرى خدى تليفونه ومشى طلع من الباب / تو ندبر راسى …غير امشو بس

طلع ايوب يجرى ماشى للرئيسى …
وركبهم معاد وروح بيهم لحوش بوهم
-روقيه تبكى / تربح يا معاد ارفعنا للحوش نشوفه بالله عليك
-معاد / ياروقيه اكيدة الشارع معبى رجالة..غير وين منرفعك
-سماح جنبها / يا وخيتى اهدى
-روقيه/ معاد يا اوخى عالاقل الحقه انت ..ماتخليشى بروحه
-معاد / اكيدة بنلحقه منغير ماتقولى
وصلو راس شارعهم …يشبحو فالجيران كلهم متلقطين من راس الشارع…. قربو لقو الناس زحمه من قبل ماتخشى راس الشارع من فوق
-سهام / شكلع فى حريقه …نشم فى صنتها
-مرام تعيط / حييييه الحريقه جيهه حوشنا.. يا حوشنا يا حوش واحد من جيرانه
-روقيه / مستحيل …

________________________________________

–

فى التاكسى

-ايوب/ ياوخى اجرى انقولك حوشى والعه فيه النار
-السواق / حاضر خوى اهو قريب نوصلو
ضوى تليفون ايوب …قامه شافه لقاه زكريا

-ايوب / الووو
-زكريا يعيط / تى وينك يا راجل ..المكتب والعه فيه النار
-ايوب / كيف …حتى المكتب
-زكريا / وشنو انحرق ثانى
-ايوب / حوشى والعه فيه النار
-زكريا / حيه على امه .. معناها حتى حوش بوى بينحرق ..
لقيتهم واقفين فى شارعنا بالسيارات
-ايوب / شن درت للمكتب
-زكريا / كلمت ولد خالتى فالمطافى باعتلى سيارة فالطريق
-ايوب / كمبيوتر موسى وينه …فيه كل شى
-زكريا / حطيته فى دار كنزى .. فى الحوش اللى اجرناه من نسيب عبدالرحمن بوها
-ايوب / كل شى فيه ولا
-زكريا / خلى يحرقو اللى يبوه … الكمبيوتر اللى فيه امورنا كلها خارج المكتب
-ايوب / انا ماشى لحوشى … قالى عديلى جابوله حتى الاطفاء … نشوف شن صار فيه
-زكريا / اهو الاطفاء وصلت …تشاو توة …

وسكرو الخط ….

وصل ايوب جهه حوشه …نزل يجرى لقى جيرانه واقفين
تلمدو عليه كلهم..يسأل فيهم كيف صار قالوله انهم فحياشهم لين شمو صنه النار …
مشى وقف قريب عن الحوش …ويشوف فى جماعه الاطفاء كيف ايرشو فى الميه …
وقفت سيارة تندرا كبيرة نزلو منها ثلاث اشخاص لابسين عسكرى ….
وقفو قدامه / انت ايوب
-ايوب / شن فى
-العسكرى / رد كويس عالضابط
-ايوب / ايه انا ايوب
-الضابط/ قيموه …

وبالفعل قامو ايوب فى بوكس التندرا اللى صانعينه ليها من الخلف …خدو منه تليفونه وركبوه …

وجيرانه يتفرجو ….

________________________________________

–
–
فى شارع ابراهيم

معاد درس السيارة من راس الشارع خاطر الزحمه ..ونزلو من السيارة يجرو على رجليهم …ولما قربو من الشارع وخشوه
لقو الحريقه واضحة فى حوشهم …
مشو يجرو يلاقو بوهم واقف مع سالم جاره وباقى الشيابين والشباب ايجيبو فى سطول الميه وايطفو .. وبدو يسمعوفى صوت المطافى
مشو البنات يجرو لى بوهم / خيره الحوش يا بوى شن صار
-عمتك مبروكه لابسه رداها وطالعه فم الباب/ يا رقيه…تعالى انتى وخواتك هنايا
مرام تبكى حاله قاموها خواتها ودخلوها لحوش مبروكه
-روقيه تنادى/ يا صلاح …صلاح ..
جاها صلاح داهش/ روقيه …سلامتكم كبيرة
-روقيه / كيف صار
-صلاح / لقينا شيش معبيات بنزينه حادفينهم لحوشكم.. ومولعين وحدة منهم وحادفينها شوى ولعت الثانيات ..وكل مرة تتفجر وحدة …
-روقيه تبكى/ ومنو دار هكى بس
-صلاح / صغار الحرام هلبا … خلى نساعد جماعه المطافى
ومشى يجرى يعاون فيهم هوا وشباب الجيران
مشت روقيه تجرى لبوها باست على خدوده / سلامتك كبيرة يا بوى
-ابراهيم شاد لوقاحيته ومقعمز على مرشابيدى حوش سالم / غير انتى وخواتك باهيات … انشالله ماولى الحوش
-روقيه / منو اللى دار هكى يا بوى ..احكيلى اللى صار
-ابراهيم / انا فمكانى لين سمعت مرش المربوعه انكصر ..وبدت شيش تنحدف منه جيهه السقيفه.. وفى اللى انحرفت وخشت للصالة..وقفت طلعت للصالة لقيت النار…
طلعت فتحت الباب وناديت
-سالم / ستر ربي انك طلعت طول يا حاج …كنهدا ممكن الباب اتصكر عليك

بعد ماطمنت على بوها مشت روقيه لحوش سالم جارهم
…لان الرجاله معبيين فالشارع …..طول ادكرت ايوب
…قامت تليفونها واتصلت بيه رد عليها شخص صوته غريب ….
-روقيه / الوووو
-الشخص/ الو
-روقيه استغربت فالصوت / هدا رقم ايوب ولا
-الشخص / ايه توا ….
-روقيه / وين ايوب
-الشخص / رافعينه معانا بنحققو معاه
-روقيه انخلعت / انتو شكون

وسكرو فى وجهها التليفون ……

_______________________________________

تمت ….ويتبع

نحبكم ❤