احفاد الشيطان للكاتبة زهور جمال الدين
#احفاد_الشيطان
بقلم زهور جمال الدين
?الحلقه الرابعه والعشرون ?
والاخيرة
–
روقيه بعد ماجابت ولدها اتأقلمت مع الوضع الجديد …حزنها على موقف ايوب معاها بدى ينقص بعد ماحست بالامومه مع ولدها اللى يكبر بين ايديها يوم بعد يوم …تغيرت حياتهم كلهم بعد ايوب الصغير …حتى من عمك ابراهيم صغر عشر سنين …عيونه ودلاله ايوب ولد روقيه ..واللى يقوله حتى زيد غادى يعاركه..بعد ماطق ايوب الصغير عام …عرفت روقيه انها ضرورى تشتغل ..قداش بيقعدوفلوس بوها .. هيا مش تونسيه ..فمستحيل تلاقى عمل حكومى فى تونس
…. عمها عبدالسلام يشتغل فى فندق اسمه” بيترفلاي ” موجود فى تونس العاصمه تبع رجل اعمال ليبي .. دارلها واسطه ..وبدت تشتغل موضفه فى العلاقات العامه فى الفندق … صفتها متزوجه..وماديرش فى صداقات مع الموضفات او الموضفين الا نادرا..ماتدويش هلبا على حياتها الشخصيه …وبالرغم مفهمه كل الى فالفندق انها متزوجه..ومع هدا يعاكسو فيها ولكنها دايرة الحولة وزعميتا مش زابطه
وفاتو السنين …بعد اربع سنوات …
فى حوش ابراهيم فى تونس العاصمه
ايوب الصغير يلعب فالصاله … وروقيه تنادى من الدار …
-روقيه /ايوب .. ايووووب …والله ماتقولش نعم لما نجيك
مشى ايوب يجرى لبد فى عبايه جده ابراهيم ويضحك
طلعت روقيه من الدار/ ايوووب وينك
-ابراهيم يضحك / طلع للشارع يلعب
-روقيه / يابوى معش وقت علينا …
ومدت ايديها / مدهولى الشرير هدا
-ابراهيم / لاااا والله مانقدر ايلوم عليا يقولى حرشت فيا امى
-مدت روقيه ايدها لرجل ايوب/ شديتك …تعالة
-ايوب يضحك/ كيف شفتينى وانا لابد
-روقيه تضحك/ رجلك باينه من تحت العبايه يا شاطر
قاماته ومشت بيه للدار تغيرله …
ايوب طالع نسخه من بوه … نفس العيون ..نفس لون الشعر والبشرة ..ماخداش من روقيه ولا حاجه
-ابراهيم/ امتى بيفوت عليكم عبدالسلام
-روقيه/ قال الساعه 5 العصر
-ابراهيم / باهى سقدى معناها قريب يوصل
-روقيه / انا واتيه خلى نلبس للافندى هدا اللى متعبنى حوايجه
-ابراهيم / مرام مع اميمه فى الكليه
طلعت روقيه وفى غمرها ايوب وفى يدها حوايجها قعمزت جنب بوها تبى تكمله لبس
-روقيه / ماشالله عليها اميمه … كملت وتخرجت وخدت شهادة اللغه الفرنسيه
-ابراهيم / حتى مرام انشالله تتخرج منها نفس الكليه ..
بالرغم غاليه ..لكن مش مشكلة
-روقيه / لانها خاصه ..ولاننا مش من تونس.. الاجنبى ديما يخلص اكثر من ولد البلاد
كملت روقيه لبس ايوب … ومشت دارت لبوها شاهى عالنار
طاب وحطاته فى صفرة ومعاه بريوش …وسمعت كلاكس عمها عبدالسلام …
-روقيه / اهو عمى جى..
وشدت ايوب من يده / بادن الله مانتأخروش انشاءالله
-ابراهيم / خودو راحتكم ..اهو نتفرج عالتلفزيون
-روقيه / باهى
مشت فتحت الباب لقت عمها عبدالسلام قدام الباب
-عبدالسلام سلم على ايوب الصغير/ اووو قنديل
وتلفت لروقيه / والله مانقدر نجى قدام الحوش وماننزلش انسلم عالحاج
-روقيه ابتسمت/ اتفضل عمى ..
ابراهيم يضحك / ياعبدالسلام ميه مرة نقولك معش تقوله قنديل الولد بيمشى في فمه الاسم
-عبدالسلام / وشن بنديرله ..كله من رسوم قنديل اللى يتبع فيها .. خلانى معش اناديه غير قنديل ??
-روقيه / تصدقنى الاسبوع اللى فات فكرت ندخله روضه ..
انا واقفه عالمديرة نتفاهم معاها وهوا يتعرف عالصغار ويقوللهم اسمى قنديل
-ايوب يضحك / ايه انا زى قنديل اللى فالرسوم
روقيه وابراهيم يضحكو
-عبدالسلام / بري للسيارة ..هوينا فتحيه راكبه ..شوى نسلم عالحاج ونجيكم …
-روقيه / باهى
وطلعت للسيارة سلمت على عمتها فتحيه وركبت للسيارة …
حتى عمتك فتحيه روحها فى ايوب ..
مشو لحفله التخرج متع اميمه ….
خشو للصالة اللى مخصصها المعهد للتخرج قعمز وحضرو الحفله كامله وروحو
_______________________________________
–
فى حبس بوسليم …
ايوب وزكريا انحبسو على دمه قضيه قتل عياد …لكن وين الحكومه والمحاكم فى ليبيا … تبيلها سنوات القضيه بيش ينحكم فيها …جلسات ويرفعو فيهم وايجيبو وخلاص ..
وحتى ايوب وزكريا عاجبهم الوضع .. يبو يبعدو شويا عن
المشهد …لانهم دايرين هلبا وهما يعرفو الحكومه كانا قلبت عالشخص تقلب عليه بالكامل فى كل اموره قاعدين فالحبس ويطلعو فى فلوسهم ويحولو لتونس ومصر وافريقيا ….وتوة مستمرين عالحال هدا ليهم اربع سنوات …..
ايوب مقعمز فى الزنزانه هوا وزكريا و 4 انفار ثانين …
الشباب يلعبو فالكارطه وايوب وزكريا متكيين كل واحد فسريره
ايوب فاتح تليفونه ويتفرج على صوره هوا وروقيه ….
طبعا هوا واخد احتياطه ..منزلهم بالكامل فى الفيس فى بروفايل سري ..دايرهم انا فقط .. يتفرج عليهم امتى مايبي وبعدها يصكره حساب الفيس السري ويحدفه من تليفونه ولما يبي يشوف الصور يفتحه ثانى …
-زكريا اينادى / ايوب …ايوب
ايوب مانتبهش
-نزل زكريا من سريره ووقف قدامه / قعد فى عماك الاول
-ايوب انتبه / تكلم فيا …
وصبعه ايسكر فى الفيس السري ..وحدفه طول
قعمز عالسرير/ والله ماسمعتك
-زكريا / كلمنى عزو توة.. وقالى التحويل كله تم
-ايوب / باهى مليح .. ماتخليش حتى قرش فى ليبيا
-زكريا / لااا كلهم حولتهم يا معلم
انفتح الباب ..خش العسكرى متع الباب
-العسكرى/ ايوب نوض
ايوب مايبيش حتى يشبحله
-العسكرى قرب من ايوب / عرفى اينادو فيك فوق
-زكريا يضحك / ايووه نادى بأدب
” زكريا وايوب مغرقين العسكريه فى الحبس بالفلوس ولدلك كلهم تحتهم ??”
-وقف ايوب / يا فتاح يا عليم
وتلفت لزكريا / تو نجى
-زكريا / تم يا برو
وطلع ايوب من الباب ورا العسكرى …مشو لمكتب الآمر
_________________________________________
_
فى حوش ابراهيم
روقيه ومرام وايوب الصغير روحو من حفل التخرج ..جابو لبوهم من الكيكه والشوكلاته والحاجات كلها باعتتهم اميمه لعمها ابراهيم ….
خشو لدارهم ….مرام تغير فحوايجها ..وروقيه تغير لى ايوب
-مرام / شن حكيتى انتى وعلاء لما خداك على جنب
-روقيه متعصبه / عاجبك منضره وهوا يغنى للناس والبنات ترقص حواليه
-مرام / قداش مرة بنتناقشو فيه الموضوع هدا قلتلك هدا شغله
-تلبس لى ايوب فى بيجامه النوم / ومن اشغال الدنيا كلها مالقاش الا الخدمه هادى ..مهزبتله شخصيته ..مخلياته اى كلام
-مرام / لو مهما تقولى عليه ..انا نحبه ومستحيل نتزوج غيره
وقربت منها / ياروقيه انتى جربتى الحب.. هدا شعور من عند الله مش بايدينا .. ارضى عليا حبيبتى تعرفينى لو مرضيتيش انتى مستحيل نتزوجه
-روقيه هدت نفسها / ماتجينيش بعتالى تشكى من سهره خارج الحوش فى الحفلات ومن البنات اللى يجرو وراه
-مرام فرحانه / انتى غير ارضى عليا.. مستحيل نشكى منه فى يوم… نقولك نحبه ..ومستحيل نتخلى غليه فيوم
-رقيه ابتسمت / مبروك عليك يا مرومه ..غير انشالله اديرى عقل
-حضنتها مرام / سلم اوخيتى اللى رضت عليا …انتى مش اختى بس..انتى امى اللى يهمنى رضاها
-روقيه / بعد ما جربت الحب …عرفت ان اللى يحب صعب ينسى حبيبه ولا يبدله
-مرام / وبوى
-روقيه / خليه عليا انا …والف مبروك عليك اوخيتى
-مرام فرحانه / الله يبارك فيك حبيبتى …
وخدت تليفونها وطلعت تجرى فرحانه تبى تبشر علاء
________________________________________
–
فى مكتب الآمر
مقعمزين الامر ورا مكتبه …وشخص لابس بدلة وقرواطه مقعمز عالصالون اللى قدامه
خش ايوب / السلام عليكم
-الآمر لبس طاقيته / نخليكم براحتكم
وطلع وخلى ايوب يشبح للشخص اللى قدامه واضح ان المقابله معاه هوا ….
وقف الشخص وعيونه مدمعات / ايوب …ايوب ولد خوى
-ايوب فخاطره / ياعنجد ولد خوك …
-الشخص قرب منه/ معرفتنيش …انا عمك اسماعيل
-ايوب / عمى اسماعيل فى امريكا
مد اسماعيل ايديه وحضن ايوب / تعالة يا ريحه الغوالى
وايوب فاتح عيونه حاير فيه ..
اضبطه لين شبع وباسه من خدوده وعيونه ..وايوب مزال حاير…
-اسماعيل حاضن ايوب/ليا شهرين فى ليبيا .. سألت عليك قالولى محبوس …بعتت جماعتى نشدو عليك قالولى قضيه قتل …بديت نجرى بالساكت
ايوب مفهم شى وقعد ساكت
قعمزو عالصالون متع المكتب .. واسماعيل شاد محرمه يد ويمسح فدموعه …متأثر هلبا يانارى
-ايوب / سامحنى وشن ايأكدلى انك عمى اسماعيل
-اسماعيل / معاك حق ولد خوى معدور…
ويمسح فى وجهه/ ماشفتش صورتى فالحوش
-ايوب / الحق لما صغير كان فى صور مرسومه…لى بوى وجدى وعمى اسماعيل …لكن سنه 87 حناى قرت فالجامع وقالولها الصور عالحيط حرام قامتهم كلهم دستهم .. وماخطرش عليا اندور صوركم القدم ونتفرج ..
-اسماعيل / باهى ولد خوى …توة انا ماجبتش معاى شى .. لا صور ولا حتى حاجه بيش تصدق انى عمك ..
وطلع بطاقته / لكن عندى بطاقتى بس …
ومدهاله/ هاك شوفها
-خداها ايوب وقراها / والله حق ..
شبحله وابتسم / نورت ليبيا يا عمى
-اسماعيل يضحك / الله ينور عليك ولد خوى
-ايوب / غير شن جابك ياعمى والبلاد فى حوسة
-اسماعيل/احنا جينا بيش نفرضو سيطرتنا ..ونساوو الخراب
..ونخلو البلاد تتهنى
-ايوب يضحك / انتو منو
-اسماعيل / احنا حزب الميزان .. النواة الاولى تكونت فى امريكا وبعدها انتقلنا هنايا
-ايوب/ لاااا ساويتوها مدامكم جايين من امريكا
وتقاعد /انت تخدم معاهم عمى
-اسماعيل / انا رئيس الحزب ….
-ايوب / اهاا
-اسماعيل/ انا توة غايتى نطلعك من هنايا
-ايوب فرح / ياريت يا عمى
_________________________________________
_
وفاتو ثلاث شهور
مرام انخطبت لى علاء المغنى اللى تحبه وماتخلتش عليه سنوات .. وايوب ايجهز لطلوعه من الحبس.. ولكن شرط على عمه …ايطلعه هوا وزكريا فيوم واحد .. والا بلاش…
وبالفعل جرى عمك اسماعيل عالموضوع .. البلاد مافيهاش حكومه ومافيش اسهل من تزوير اوراق الضبط والاحضار….
خاصه ان عمه رئيس حزب وعنده الجنسيه الامريكيه
وبالفعل بعد شهر طلع ايوب وزكريا من الحبس لعدم كفايه الادلة ….
زكريا روح لحوشهم ….وايوب اول شى داره مشى يسأل على روقيه فى حوش خالتها
-سهام / تزوجت من ثانى عام من طلاقكم وجابت حتى ولد ..وساكنه برة ليبيا
-ايوب مصدوم / معقولة ..على طول تتزوج
-معاد / هادى سنه الحياة ..ومدامك طلقتها من الطبيعى تتسهل وتشوف نصيبها
طلع ايوب من عندهم وهوا مصدوم …معقولة طول تتزوج …ماصدقت طلقها……
بعد ماطلع ايوب
-سهام / انبلغو روقيه بطلعه ايوب ولا كيف ايصير
-معاد / مدامها تبيه يفهم انها تزوجت ف بالتاكيد ليها اسبابها ولازم نحترموها
-سهام / قصدك نسكت وخلاص
-معاد / حتى سماح مفيش داعى تعرف بالموضوع
سهام ?/ باهى
مشى ايوب لحوش عمه اسماعيل
وتعرف على مرت عمه اسمها هاله واصلها سوريه وعندها زوز صغار .. ولد مواليد 85 اسمه العارف على اسم عمه وبنت مواليد 89 اسمها سلمى على اسم حناها سالمه …
بالنسب لعمتك سلمى من لما شافت ايوب طاحت طول .. حباته من اول يوم …قولو من اول نضرة …هوا حس بيها لكن مايبيش ايطنعها …ينادى فيها اختى الصغيرة …على
طول اتحاول تغريه لانهم امريكان عندهم نوع من الانحلال
ومع هدا هوا داير الحولة وزعميتا مش فاهم ..والعارف ولد عمه انسجم معاه واتعلق بيه هلبا بالرغم ايوب يومه كله برة يروح فالليل بس ….
______________________________________
–
حزب اسماعيل بدى مااشالله واقف على رجليه .. وخاش فالدولة هلبا …ماسكين زوز كراسى فالبرلمان …وايوب اصبح من ضمنهم .. عرف ان الدولة تحمى.. يمشى فى مصالحه باسم الحزب وماشيه ..لبس عباءة السياسه لقاها استر
شهر 2 /2018
كان الحزب عنده رحلة لتونس فى مؤتمر دولى … وايوب دخله عمه معاه فالحزب خاصه ان الرزق عنده ماشالله والفلوس فيقدر يعاون الحزب هلبا ماديا …
مشو 5 اشخاص من الحزب مع وفد البرلمان .. طبعا ايوب واسماعيل كانو من ضمن الخمسه اشخاص من الحزب
حجزو فى فندق بيترفلاى باعتبار ان صاحبه ليبي …
كان المؤتمر 3 ايام فقط ..والرابع احتفال …
العارف دارله بوه تدكرة خاصه يبيه يسافر معاه للمؤتمر.. يبيه يتعلم .. لكن ممنوع يقعد معاهم فى نفس الفندق ..حجزله فندق ثانى ..لكن من الصبح ايجيهم للمؤتمر.. وسلمى طبعا لصقت فالمشى معاهم .. بحجه ان بوها يفضل فى العارف عليها .. لكن هيا فالحقيقه تبى تمشى مع ايوب وخلاص
وبالفعل مشت معاهم لكن بوها شرط حتى امها تمشى معاهم …وبالفعل مشت معاهم مرت اسماعيل وبنته وولده فى فندق ثانى …ومن الصبح تلبس سلمى وتكون عند بوها وايوب فى فندق المؤتمر
اما الفندق والعاملين اللى فيه على قدم وساق …
وطبعا روقيه كانت من ضمن اللى يشتغلو فيه .. ومن كثر ما مشدد الفندق عالشغل الاربع ايام هادو متع المؤتمر.. كلفو عاملين الفندق المهمين بالاقامه فالفندق ..اعطاهم غرف
…روقيه فالبدايه اعترضت لكن عمها عبدالسلام شد فيها
..وقاللها ماضيعيش شغلك فى الفندق وتعانديهم وبالدات ان الاربعه ايام هادو فيهم معاش اضافى قوى …و خاصه انهم قالولك جيبي من تبى معاك …وافقت روقيه وقررت ترفع معاها ولدها وبوها ومرام ..لكن ابراهيم اعترض بحجة مايقدرش ايغير مكانه .. ومرام بتقعد معاه طبعا مايقدروش ايخلوه بروحه .. فقاللها بوها ارفعى ولدك معاك وخلاص هما ثلاثه ليالى واليوم الرابع بتروحى…..وبالفعل.. رفعت معاها ايوب ولدها ومشت للفندق ..دارت شنطه صغيرة وخلاص …
هيا شغلها داخلى فمفيش داعى تنزل و تتلاقى مع اعضاء الوفود…لكن ولدها ايوب قلقها من اول ليله ..ديل مستاحش جده ومرام وديل حس انه محبوس ….وعداته انها من غدوة تنزله للنافورة اللى فى وسط الفندق
وبالفعل ثانى يوم روقيه نزلت ولدها للنافورة اللى فى وسط الفندق بيش يلعب شوى ..هيا مش فاضيه ماتقدرش اتسايره فخلت معاه وحدة من العاملات تحط عينها عليه
بعد ساعه جت سلمى لوسط النافورة تتسلى مابين ماطلع ايوب من المؤتمر …..تشبح فى ولد يلعب جنب النافورة …
وياسبحان الله شكله نسخه من ايوب …مشتله
-سلمى/ عالسلامه …
-ايوب الصغير/ اهلا
-سلمى/ انت تونسى
-ايوب / لا انا ليبي
-سلمى/ محلاااااك … شن اسمك
-ايوب / اسمى قنديل
-سلمى تضحك / تشرفنا سيد قنديل .. انا سلمى
وقعد ايوب يلعب .. وسلمى مركزة فيه ..يا سبحان الله الولد الصغير كأنه ايوب ….
قامت سلمى تليفونها تتصل بي ايوب …
-ايوب / الوو
-سلمى/ وينك ايوب نراجى فيك كسدت
-ايوب بحزم / انتى عارفتنى عندى مؤتمر وقتى معبى ومانفضاش ولا
-سلمى / ليش ماتفضاش ..خيره بابا معاك فى نفس المؤتمر ومع هدا فاضى بي ماما
-ايوب / هيا بالسلامه … مانيش فاضى
وسكر عليهى الخط ..تلفتت سلمى ادور فى ايوب الصغير مالقاتاش ….
وفالليل طلعت تتعشى مع العارف وايوب …سمعت من العارف بالطلعه لصقتلهم طول
-سلمى / تصدق اليوم شفت ولد صغيرون فالفندق نسخه منك انت ..حتى لو كان جبت ولد من صلبك مايكونش هكى شكله بهالدقه هادى فالشبه?
-ايوب يضحك / والله ..وشن اسمه شبيهى
-سلمى / قنديل
-ايوب / اول مرة نسمع اسم قنديل تونسى
-سلمى / لا ليبي الولد
-ايوب / حتى ليبي عمرى ماسمعت ….
_____________________________________
–
ثانى يوم ….
كان اخر يوم للمؤتمر ….بيديرو احتفال فى الفندق تحت…
نزلت روقيه ولدها بيش يحضر شوى فالاحتفال قبل ماتروح بيه للحوش ….
وبالفعل قعدت بيه قريب نص ساعه …وبعتالى خداته من يده بيش بتركبه للغرفه وتلمله حوايجه …
ايوب كيف خاش من باب الفندق …يبي يركب للدور التاسع قبل عنده موعد مع واحد …
فتح الاسانسير خش … وخشو وراه زوز نساوين وثلاث صغار ..تلفتو للباب متع الاسانسير بيسكروه .. انفتح خشو زوز شباب …بيسكرو الباب ..فتحاته روقيه وخشت للاسانسير ….
ايوب شافها …قريب جاته سقطه قلبيه …
-قعدت ماسكه الباب بيدها / ايوب .. ايوب بسرعه تعالة الاسانسير بيتسكر …
جى ايوب يجرى خش جنب امه …..
روقيه فى المقدمه وتفهم فى ولدها عالاداب ….
وايوب يابس فمكانه … مقدرش ايكدب عيونه …هيا روقيه ..لكن من هدا الولد الصغير اللى مع روقيه وتنادى فيه ايوب
وصلو للدور الرابع …طاعت روقيه من الاسانسير ….
وبعد لحظات طلع ايوب وراها منغير ماتحس …مشت لنهايه الممر وهوا وراها من بعيد .. حطت الكرت فالباب فتحاته وخشت …
رجع من الممر ملحقهاش .. خاف يكون زوجها فالغرفه …
لكن هوا شاف الولد وشاف كميه الشبهةاللى بينهم .. وعرف انه هوا هدا الولد اللى قالتله عليه سلمى …
لكن اسمه ايوب ..معقولة فى راجل يخلى زوجته تسمى ولدها على زوجها الاول ….افكار ترفعه وافكار اتجيبه ..قرر انه يسأل عليها
وبالفعل بعت ناس من اتباعه سألو …فى نفس اليوم ردو عليه قالوله انها عايشه فى حوش ملك مع بوها واختها … والعيل اللى معاها ولدها ..
مزال يبي يتاكد ان ايوب ولده … جابوله تاريخ ميلاده …لقى ان روقيه جابت الولد بعد 8 شهور من طلاقهم
خلاص معش عنده شك …. لبس بدلة ومشى لعمك ابراهيم اللى رحب بيه …
روقيه شافت ايوب فى حوشهم .. رعشت مع بعضها
-روقيه / ايوب
-ايوب فرحان بيها وتلفا لى عمك ابراهيم / ياعمى انا طالب بنتك روقيه على سنه الله ورسوله
وبالفعل وافق ابراهيم …لكن روقيه رفضت ….
روح الوفد ليبيا ..لكن ايوب قعد فى تونس …بين كر وفر مع روقيه لين خلاها وافقت ترجعله
بعد الخطوبه
-ايوب قرب منها وضمها ليه / روقيه حبيبتى ستاحشتك
-روقيه بدلع / ايه ستاحشتنى باين عليك من اول ماطلعت جيت ادور عليا
-ايوب / والله مشيت لحوش خواتك قالولى انك تزوجتى وجبتى ولد
-روقيه / غريبه ماقالوليش
-ايوب مسك يديها / المهم احنا مع بعضنا يا عمرى
وقررو ثانى يوم تلبس روقيه لبسه فخمه وتنادى بعض من معارفهم وحوش عمها عبدالسلام و يجيها ايوب ايروح بيها
ثانى يوم الصبح موعد زفت ايوب وروقيه ….لكن هيهات مؤيد ايخليهم فى حالهم … غيونه يلصلصو فى كل مكان
مترصدينه قدام الحلاق اللى يحلق فيه
مجهزين 5 اشخاص كل واحد قيهم بكلاشن وعندهم تعليمات انهم ايفرغو فيه المخزن كله لما يطلع .. وكان فى نضرهم لازم تكون نهايته الموت المحتم
الحلق يومها كان عنده ثلاث عرسان ….
فقال لى ايوب ارقد انت شوى لو تحب تستريح مابين كملت حلاقه للشخص اللى قبلك
-ايوب / اوكى
اتكى ايوب على جهه… رقد شووويا …ممكن خمسه دقايق
وبدى يتخايل فى حناه سالمه اتنوض فيه / ايوب …ايوب عطك طرشه ..نوض اخدم على راسك
________________________________________
–
ايوب راقد ….وعمتك سالمه اتنوض فيه ….
فتح ايوب عيونه ….يشبح …لقى روحه فى المربوعه راقد على فراشات حوش حناه سالمه
-عمتك سالمه/ خير بلاك عطلت فالنوم اليوم للقوايل
ايوب يشبحلها ومش مستوعب ….
ويسمع فى صوت عزوز اتنادى من داخل / يا حاجه سابمه تعالى
-سالمه / هيا هانى جايه يا حاجه فاطمه
-ايوب مش مستوعب/ انا وين !؟؟
-سالمه / انت فى فراشك فالمربوعه
-ايوب / ومنو المراءة اللى تنادى فيك لداخل
-سالمه / هادى الحاجه فاطمه ام عمك ابراهيم جارنا الجديد .. ماك شفتهم امس كيف جابو اثاثهم وشرو حوش عبدالنبى جارنا …
-ايوب يشبحلها ومزال مش مستوعب / وخيرها جايتنا
-سالمه / روقيه بنت ولدها وخواتها جايات ايسيقو فالحوش شوى جت معاهم بتتعرف على الجيران
-ايوب / هوا اليوم التاريخ قداش فالشهر يا حناى
-سالمه / اليوم 20/2
-ايوب / تى اما سنه قصدى احنا فيها توة
-سالمه/ احنا فى 2011 ..غبر فيك خيرك يا اوليدى شن جاك ….
-ايوب حط يده على جبهته/ شن فى ؟؟ كله كان حلم زعما ولا شنو
-سالمه / فطورك فالصاله …سقدنى عاد
طق باب حوش عمتك سالمه تبان روقيه واقفه متحشمه / عمتى سالمه وينك
-سالمه / خشى يا رقيه
-روقيه / غير نبى عصاة المكنسه …عصاتنا كصرتها اختى سماح
وايوب يشبحلها/ روقيه … خيرها ماعرفتنيش ..مش كنا متزوجين ونحبو بعض
-سالمه / ايوب …اعطى لرقيه العصا اللى ورا الباب
-طلع ايوب / صباح الخير
-روقيه بحشمه / قول مساء الخير.. قريب الساعه واحد
-ايوب خدى العصا ومدهالها / مش نعرفو بعضنا زمان والا انا غالط
-روقيه مستغربه / لا لا .. الحق اول مرة نشبحك …
ضحكت وشبحتله حساته يعاكس فيها ….وهوا مسكين بجد مستغرب فاللخبطه اللى صايرتله …
خدت روقيه العصا وطلعت …
ووقف ايوب من مكانه …مستغرب ..حوش حناه قداش ليه طالع منه كيف هوا توة راقد فيه…وحناه ماتت كيف تكلم فيه توة ….وروقيه زوجته كيف مش زابطاته
خش للصاله لقى عمتك فاطمه صبح عليها ومشى للحمام …
طلع صلى …وغير حوايجه ..خشتله عمتك سالمه للدار
-سالمه / سلم اوليدى رد بالك من الهدرزة الزايدة ماتقولش حتى كلمه ..احنا لا معا هدا ولا مع هدا ..وكان تخليه الدكان بلا فتح خير
-ايوب / تى كيف بلا فتح يا حناى..ناكلو التراب امالا ..اهو فتحته امس واولامس شن صار …تى حتى النت والفيس
سكروهم على شن بنكسد
-سالمه / المهم اهو وصيتك سلم وليدى هنينى
ايوب حس ان الحوار متكرر عنده .. معقولة عنده دكان بس .. وين حاله ومحتالة
طلع ايوب من الغرفه وحاس انه الكلام هدا سامعه زمان .
مشى للصالة لقى عمتك فاطمه …
-ايوب / انستونا يا حاجه فالشارع
-الحاجه فاطمه / الله ايآنسك اوليدى …
خدى صفرة فطوره ومشى للمربوعه ….
شويا وانفتح الباب …خشو عليه زكريا وموسى ..
-زكريا وموسى / صباح الخير
ايوب يشبح لموسى وفى خاطره / موسى مات ..كيف طلع حى ثانى..لااااا الباين بجظ شكلى كنت نحلم
-زكريا مد ملف لى ايوب / اسمع معهد اختى ردولى ملف اختك … قالولى معش يقبل راهو
خدى ايوب الملف فتحه …وشاف الصور لقى صورة ناقصه قعد يشبح لى زكريا …صورة ايناس عنده
طلعو للشارع يشبحو فى الميه طالعه من حوش روقيه
-موسى / قصدك جيرانكم سكنو
ايوب ساكت ويشبح حاير
-زكريا / هادو اللى جابهم امحمد المقاول…قالو باعلهم الحوش وضرب فيه تفتوفه مليحه بعد ماصينه
-موسى / حتى هوا معدور .. بنته كنزى مريضه ويبي يعالجها برة .. عندها فايروس فى عضامها
-ايوب يشبح لموسى / كنزى!
-زكريا / وانت منين تعرفه امحمد وتعرف قصه بنته
-موسى/ امه اتكون بنت خالة حناى يعنى فى نوع من القرابه بينا
-زكريا / ربي يشفيها يانارى
-موسى/ وهما باعو لى استاد عياد اللى كان ايقري فيكم زمان .. اللى ولاده صهيب ومؤيد
ايوب سمع الاسامى اتأكد انه كان فى حلم …
وهما واقفين فالشارع …درس حوه حسن …
سلم عليهم …
-حسن / شنحالكم ياشباب
-موسى وزكريا / اهلا حسونه
وايوب قاعد مسبوه
-حسن /مفيش داعى لدكر الاسماء.. صور هداكه الراجل فى سيارتى ..الليله نمشو الساحة الخضراء ونحرقوهم
ايوب فاق من حيرته ….
-ايوب متعصب/ صور شكون
-حسن / صور البوعا يا راجل …لازم ندير موقف ونحرقوهم مع باقى الشباب….
-ايوب متعصب / صور عينك يا مصخ يا كلب .. ارفع الصور ردهك منين ماجبتهم … البلاد واليها الله هوا يقرر شن بيدير فيها .. مش انت تاخد وتحرق وتحرض
-حسن مستغرب / مش امس اتفقنا ولا
-ايوب / خديت رضا بوك وامك قبل ماتموت..
وقام صبعه / اسمع رد بالك كان متت تحسب روحك شهيد . راهو منغير رضا بوك وامك شهادتك ناقصه يا غالى
-حسن مستغرب / انت شن تقول
-ايةب / نقولك بوك شن رايه ..قبل ماتطلع شاورته …ناقصه راهى كانهم مش راضيين عليك
-حسن تعصب / انا شاب وليا رائى الخاص بيا ..بوى مادخلاش
مشى ايوب لوسط الشارع وبدى يصيح / ياناس تعالو
…ياناس وينك شدو مفرخكم …راهو الشباب بتكمل فى بلادنا بيقعد الربع ولا اقل.. نصيحة منى ليك …
طلعو جيرانه كلهم على صوت صياحه …يحسابوها عركه
وحناه طلعت بسرعه وقفت قدام الباب تحسابه يتعارك
حتى روقيه تسمع فالصياح طلعت .. …وحسن تكنطى لقى خوه ولى فكلامه ولع سيارته ومشى
وزكريا وموسى واقفين يشبحو لصاحبهم خيره استملك
وايوب يعيط ?
ياناااس ياااناس .. اسمعونى وافتحو عقولكم …والله شفتها بعيونى …..راهى بتتعبى مليشيات … راهى بتتعبى سراقه
…راهو بتبدا نفسى ثم نفسى ثم نفسى …راهو الليبي بيقتل خوه اليبي .. راهى خوت وضنا عم يحاربو فى بعضهم .. وراهو بيبدا القرش سيدنا كلنا ..راهم احفاد شيطان …احفاد ابليس … راهى بتبدا حفرة دم …حفرة دم …حفرة دم .. لكى الله يا ليبيا ..
تاريته اللى صار مع ايوب كله كان حلم ……….
واصبح كابوس على ليبيا وواقع
______________________________________
طرابلس يا حفرة الدم .. وجنزور هيا الاشارة .. بشر الزاويه بالهم .. جاك الخلا يازوارة
انشالله قدرنا انجسدو الوضع الليبي فى روايه كانت حلم للبطل شاف فيها اللى بيصير .. ولكى الله يا ليبيا
ونتمنى من كل من قرى الحلقات اينورنا بتعليق هنايا حتى لو بملصق …
ونتمنى من المتابعاادت يعطونى رايهم فى القصه ككل وهل اعجبتكم النهاية ان القصه كلها طلعت حلم ?
تحياتى للجميع نلتقى فى روايه اخرى
نحبكم