احفاد الشيطان للكاتبة زهور جمال الدين

#احفاد_الشيطان

?بقلم الكاتبه زهور جمال الدين ?

?الحلقه الثامنه?

.
فى حوش ابراهيم

سهام طلعت من الحمام …
وشادة جهاز فى يدها …

-مداته لى روقيه/ شوفيه ترا ماشفتاش راهو
-خداته روقيه وضحكت / منعرفش انا راهو
وتلفتت لخواتها / طلع خطين ..شن معناها

-مرام عيطت / معناها حامل …مبروك يا سهام
-سماح / مبروك ياسلفتى ..الف الف مبروك ?
-سهام فرحانه / بلحقه …بلحقه حامل

-روقيه / الف مبروك ياسهومه ..وانشاءالله توصلى بالسالم
-سهام / ياااربى نشوفه عندك يا روقيه …وعندكم كلكم اوخياتى
-سماح / مفلحك ..جايباته معاك التحليل المنزلى
-سهام تضحك / والله لا ..هوا مالاول فى شنطى ..وكنت نبى نديره بكرى غير هوا خلعنى وطلعنى من الحوش

تلفتتلها روقيه بحنان ومدت يدها ليها …وقربت منها سهام و حضنتها روقيه .. وفى احساس عند سهام كأنها تحضن فى امها اللى فيسع توفت وخلتهم

ابراهيم سمع الدوشه ….

-قعد ينادى من الدار / رقيه… وينك يا رقيه خيركم شن فى
خشت روقيه وقعمزت جنب بوها / سهام حامل يا بوى
-ابراهيم فرح / الحمدلله ..انشالله توصل بالسالم

وحط يده فى جيب الفرملة اللى لابسها وطلع 30 دينار
مدهم لى روقيه

-روقيه / هدا شنو
-ابراهيم / عطيهملها…هادو نحيلتها
-باست على راسه/ ربي يحفظك يا بوى ويطول فى عمرك ويخليك لينا

ووقفت طلعت للصالة لقت خواتها مقعمزين عالصالون

-مدت روقيه الفلوس لى سهام / هاك شدى ..هادى نحيلتك من بوى
-سهام خدتهم ودنعو عيونها / ربي يخليهولى ويطولى فى عمره
-مرام / بري خشى لى بوى يا سهام
-سهام / لا لا والله مانقدر …نتحشم منه
-روقيه شبحت لى مرام / حتى الحشمه باهيه يا مرومه

وطلعت مشت للمطبخ تبى تصب عصير ع فرحة سهام

-سماح / تى كلمى معاد خيرك باردة يا سهام
-سهام زعلانه / لاااا مستحيل نكلمه .. جايبنى هنايا وملوحنى منغير سبب ..
-سماح / اهو انا احمد جابنى ومنغير سبب… سيورنا نعرفو علاش دارو هكى .. واكيدة سبب قوى اللى خلاهم الزوز ايديرو هكى
-مرام / زعما خالتى معبيه فى روسهم
-سماح / ما اعتقدش …صح هيا صعبه شوى..بس الشهادة لله مش من النوع اللى تقلب فيهم علينا ..وخاصه معاد مستحيل يرضخ لامه ..اللى عندى ممكن لكن راجل سهام مستحيل
-سماح قامت تليفونه / بلاش ماتكلميشى ..اهو تو نقول لى روقيه تكلم خالتى
-سهام فرحت / ايه قوليلها تكلمها ?

جابت روقيه العصير ..مدت لبوها هوا الاول ..وبعتالى جابت لخواتها ومدتلهم
-سماح / كلمى خالتى قوليلها يا روقيه
-روقيه / اكيد بنكلموها ..واجب
وتلفتت لى سهام / كلمى ولد خالتك قوليله
-سهام / باهى كلمى انتى خالتى قبل .. وبعدها تو اهو نكلمه
-سماح تضحك/ الخوف باهى

وطقطق باب الحوش

-روقيه/ مرام شوفى شكون عالباب مابين كلمت خالتى

___________________________________

فى حوش خديجه

اكرام مقعمزة عالصالون تبكى

-اكرام / الايام هادى منقدرش نغيب..ناخد فى دروس عملى
..كلميهم يا ماما
-معاد / هما كلمتين .. قلنالك الجامعه فوتيها الايام هادى

-اكرام / انتو شفتو عليا حاجه
وتلفتت لاحمد عارفاته صخوفى/ بالك حد كادب عليكم
..قولولى خلى نفهمكم

-خديجه/ ياوليداتى خيركم…شن صايرلكم..نساوينكم رفعتوهم لحوش بوهم لا احترمتونى انا ولا احترمتو بوكم..وتوة تبو اختكم اتبطل من كليتها فهمونا شن صاير
-معاد قام يده / مافى شى قلنالك ياام

-خديجه تلفتت لاحمد/ قولى انت يا احمد …فى حاجه

وشرين تليفون خديجه …قاماته من عالطاولة اللى فى الوسط لقتها روقيه تتصل

-خديجه / حشمه حالى …هادى روقيه تتصل تبى تشكيلى ان خواتها روحولها
-احمد / غير ردى يااام شوفيها شن بتقولك

-فتحت خديجه الخط/ اهلين روقيه شن حالك
-روقيه / الحمدلله خالتى شن حالك انتى
-خديجه / اهو الحمدلله تشوفى فى الحال..شن حال بوك
-روقيه / بوى كويس..لكن انا وياه نبو منك البشارة
-خديجه تفاجئت / انشاءالله خير
-روقيه / كنتك سهام حامل
-خديجه فرحت / حامل …
انتبهو ولادها الزوز وقعدو يشبحولها كل واحد يراجى زعما مرته هوا ولا مرت خوه

-تلفت خديجه لى معاد / مبروك عليكم يا وليدى ..سهام طلعت حامل يا معاد
ورجعت للتليفون / الحمد لله …مبروك عليها بنيتى …وينها اعطيهالى انكلمها

-اكرام / مبروك يا معاد
-معاد فرحان / الله يبارك فيك ..

وغمزلها / اهو ماشيلها

وطلع وسكر الباب وراه ….

__________________________________

امحمد مقعمز فى مكتبه….

وعنده الصادق صاحبه ضيف عنده

-الصادق / هيا مسكرة راسها عالبيعه من زمان …وهوا متقلدها بالعناد فيها …ارض الف ميترو شن بيدير بيها هوا

-امحمد / لاااا كيف عاد…ابله روقيه نساعدوها بعيونا..زميلتنا من زمان …وبنت مجاهدة الحق وخلوقه
-الصادق / انت ربطها ولا

-امحمد / عرفتها ايه ..مش البنت اللى تقري معانا فى العلوم زمان لما كنت انا مدرس …ودرتلها انت عقد …خيرك انا خدمت معاها قريب سته شهور راهو

-الصادق / البنيه مستقيمه …وماعندهاش عالدوة الفاضيه .. وانت عارفها وعارف قصتها تعانى فى بوها وخواتها يا نارى ..جايينهم للحوش ويهددو فيه

-امحمد / منهما اللى ايهددو فيها ..وانت من حكالك

-الصادق / انا حكالى سالم جارى ..وهوا اللى فكرنى فيك قالى امحمد صاحبك واصل برة شوفه بالك ايديرلها حل ..
-امحمد / منعرفاش جارك سالم الحق ..لكن بارك الله فيه

-الصادق/ قالى جايبيلها ورقه زعميتا عقد وقالولها وقعى عليها انها ورقه بيع والورقه جايه من منضمه اسمها احفاد المختار
-انخلع امحمد ناض من مكانه لف وجى قعمز فى الكرسى اللى قدام الصادق/ ااه شن تقول …احفاد المختار…هادى عندى فيها معارف هلبا

-الصادق / امالا ليش جايك انا .. عارفك خاش مع الثورة الجديدة وعندك فيها معارف ..والبنيه قليله والى .. قلت نقصدك بالك توقف معاها
-امحمد / غير بالشوى بيش نزبط …هيا منو اللى يبي يشري منها …نبى اسم المشترى ..لانى نبى نتاكد من حاجه

-الصادق / والله مانعرف …لكن اصبر نكلم سالم جارى هوا اللى حضر الموقف كله

وبالفعل قام التليفون وسأل سالم وقاله ان اللى بيشرى الارض اسمه حمزة

-امحمد انصدم / هيا الابله روقيه اللى بيشرو منها قصدك
-الصادق / شنو وهيتك تعرفهم
-امحمد نكر / لااا ومنين بنعرفهم انا المجرمه هادو .. لكن عندى معارف قواة يقدرو ايوقفوهم عند حدهم

وانتهت المقابله .. وخدى امحمد مفاتيحه وركب سيارته وطلع متوجه لى مكتب ايوب

___________________________________

فى حوش ابراهيم …

طلعت مرام فتحت الباب لقت واحد واقف فم الباب

-مرام من ورا الباب/ ايوووة شكوون
-الشاب / السلام عليكم
-مرام / وعليكم السلام

-الشاب / هدا حوش الحاج ابراهيم
-مرام / ايه هوا

-الشاب مد ورقه / هادى الورقه اعطيها لبنته روقيه
-خدتها مرام / منو نقوللها
-الشاب/ اعطيهالها تقراها تو تفهم هيا

خدتها مرام وخشت … لقت روقيه كيف مكملة مكالمتها مع خالتهم

-مدتلها الورقه / روقيه فى واحد جابلك الورقه هادى
-روقيه / منهوا الواحد هدا
-مرام / منعرفش ..قالى تو تقراها هيا الورقه وتفهم

-سماح غمزتلها / ماشالله بدت اتجينا حتى رسايل من معجبين
-ضحكت روقيه وهيا تفتح فى الضرف / معجبين عينك?

طلعت الورقه من الضرف …وقرتها

مكتوب فيها

“السيارة ونحرقت …وخواتك وروحولك ..لو بتزيدى فى عنادك المرحلة اللى بعدها فصل من المدرسه بي فضيحه .. وبعدها طلاق خواتك..والحبل عالجرار ..وانتى اختارى..
غدوة زى هالوقت حنبعتولك العقد وقعيه..وليبيا حرة ”

وموقعين من تحت ” احفاد المختار”

روقيه انهارت / هادو احفاد المختار… هادو#احفاد_الشيطان
مستحيل ايكونو هادو مسلمين
-سهام / منهما هادو ..
وبتاخد منها الورقه ماخلتهاش روقيه تاخدها

وخشت لدار مرام / يستقوو على مراءة الحرايميه هادو ..

وبدت تلبس فى جلابيتها وطلعت / كانا سأل عليا بوى قولوله مشيت لحوش عمى سالم
-مرام / علاش ماشيتلهم
-روقيه / نبى عمى سالم شوى وتو نجى

مشت خطوتين وتلفتتلهم / وبوى ماتحكوله شى على الورقه واللى صار

وطلعت للباب فتحاته تتفاجأ بي صلاح قدام الباب

___________________________________

فى مكتب ايوب

زكريا مقعمز على صالون فى نهاااايه المكتب..

وموسى مقعمز ورا المكتب وماسك تليفونه ويهدرز

-موسى / بجد شوقتينى انى نشوفك
-كنزى / وعلاش تشوقت
-موسى/ بصراحة اسمك حلو ..عنده هيبه …وصوتك حلو …فاكيد بيكون شكلك حلو

خش عليه ايوب انتضار …
شافه ورد التليفون على ودنه لانه عارفه لو ماردش هوا حيرد زكريا ..فمفيش مشكله

-كنزى بدلع / منو خاش عليك انتضار
-موسى / هدا ايوب صاحبي ..
-كنزى/ باهى رد عليه وبعتالى عاودلى
-موسى / لا لا عادى ماحصلنيش انا تو يكلم زكريا صاحبى

وصلاته رسالة لكن ماشافهاش

-كنزى / انتو ثلاثه صحاب
-موسى / ايه احنا الثلاثه صحاب وروح وحدة من زمااااان
-كنزى / قاريين مع بعضكم فى المدرسه

-موسى / لا زكريا وايوب قاريين مع بعضهم ..وانا اصغر منهم بى اربع سنوات .. هما مواليد 77 وانا 81
-كنزى / امالا كيف تعرفت عليهم
-موسى / زمان خدمنا فى لاوادجو بو زكريا مع بعضنا

-كنزى باستغراب / قصدك كنت تخدم فى لاوادجو
-موسى / خدمت فى كل شى..امالا كيف كونت روحى..ولحد توة نشتغلو مع بعضنا
-كنزى / وشن تشتغلو توة

-موسى/ توة امأجرين شقه فى المدينه وفاتحينها مكتب تصدير واستيراد ..
“هما بالفعل اماجرين شقه وفاتحينها مكتب استيراد وتصدير كواجهه بس ”

-كنزى / وتوة ماشالله مكون روحك..قصدى عندك حوش
-موسى/ والله مفكر نشرى حوش..لانى توة فكرت فى الزواج
-كنزى فرحت / ماشالله امالا حصلت بنت الحلال

-موسى/ تبى الحق .. فى وحدة كيف متعرف عليها جديد..
فزلها خاطرى و ندعى فى ربي انها تكون من نصيبى
-كنزى/ انشالله تكون من نصيبك

وطقطق الباب …فتحه زكريا ..خش عليهم امحمد

-موسى /بنسكر توة جانا شغل.. ساعه ونعاودلك
-كنزى/ تمام ..ربي يعاونك

-سكر الخط وتلفت لامحمد / اهلا امحمد تفضل

_____________________________________

.
روقيه فتحت الباب لقت قدامها صلاح جارهم

-روقيه تلخبطت / اهلا صلاح
-صلاح / شنو كنتى طالعه

-روقيه / كنت بنمشى لى حوشكم
-صلاح / باهى هيا نمشو اطلعى
-روقيه خافت مرته تشوفهم وادير منقدة / لا لا تو نمشى

-صلاح نزل راسه / باهى براحتك …

-وتلفتلها/ كنت فى المركز عشان قضيه حرق السيارة

انتبهتله روقيه كويس

-صلاح / الحادث مدبر بى فعل فاعل.. البنزينه صابينها على نشافه حطوها تحت السيارة ..وولعو فيها النار ومشو ..النيابه لما دققت فى السيارة لقت اجزاء من النشافه لاصقه فى ارضيه السيارة
-روقيه / كنت حاسه انها بفعل فاعل مش قضاء وقدر.. وقبل شوى اتاكدت انها بفعل فاعل

-صلاح / ومنو متقصدكم … عمرى ماشفتكم متعاركين مع حد
-روقيه مواطيه راسها / الله غالب شن بنديرو هى
وتلفتتله / صحيت يا صلاح تعبناك معانا ..نستادنك توة خلى نمشى لى عمى سالم
-صلاح / انتى عارفه ان تعبك راحة يا روقيه
-روقيه دارت الحولة/ عن ادنك

وطلعت من فم الباب وخلاته …

ومشت لحوش سالم جارهم .. وحكتله اللى صار كله ..وورتله الورقه ..عمك سالم اتأثر ..وتأسف على ليبيا وكيف شبابها ضاعو

طلعت من حوش سالم جارهم …
لقت معاد ولد خالتها كيف مدرس قدام الحوش وجايب معاه باكو شوكولاته كبير ..

ابتسمتله روقيه / اهلا ولد خالتى
-معاد سلم عليها / اهلا روقيه
-روقيه فتحت الباب بمفتاحها / تفضل

———————————————————–

فى مكتب ايوب

-امحمد / وين ايوب
-موسى / توة كان ايكلم فيا مارديتش اكيد اتصل بى زكريا

-زكريا خاش للمطبخ يبي ايدير قهوة / انا تليفونى مقفل من بكرى شحنه تام ..ونسيت نجيب معاى شحنى اليوم

-امحمد / كلمه نبيه ضرورى …نحسابه فى المكتب توة

قام موسى تليفونه وقعد يتصل بى ايوب …ورقم ايوب مقفل
-موسى / رقمه مقفل

ولقى ايقونه رسالة من فوق ..فتحها

لقاها مكتوب فيها

” حناى زعلانه منى هلبا لانى ليا فترة نروح من الليل لليل … وماتشوفش فيا توة رافعها لسوق الدهب بندهورها شوى ونشريلها حديدة….بالك ترضى الغاليه
بنسكر تليفونى منبيش ازعاج وانا معاها..ماتنشغلوش عليا
..اول مانكمل تو نفتحه”

-موسى / اهو باعتلى رساله ..قال مسكر تليففونه ..رافع حناه ايدهور فيها ..وكاتبلى اول مانكمل تو نفتح تليفونى
-امحمد / انتو شن صار فيكم فى القضيه اللى تشتغلو فيها توة

-موسى / اما قضيه ..احنا قضايانا هلبا ?
-امحمد / القضيه متع البنت اللى بتشرو منها الارض

-زكريا / اما بنت..واما ارض …انت عارف عندنا هلبا قضايا متع اراضى
-امحمد / البنت اللى اسمها روقيه

زكريا وموسى شبحو لبعض ..لان الاسم هدا يتردد هلبا فى المكتب نفسه

-امحمد /نبيكم توقفو القضيه …لان البنت طلعت نعرفها .. كانت زميلة ليا لما كنت زمان فى التعليم
-زكريا باهتمام / وهيا شنو المادة اللى كانت تقري فيها معاك

-امحمد / وانت شن يهمك فى اسم المادة اللى كانت اتقري فيها.. انا نتكلم على قضيه الارض توة
-زكريا / غير جاوبنى بس

-امحمد / تقري فى مادة العلوم ..متخرجه من قسم احياء

زكريا شبح لموسى وابتسم

-موسى / كم عمرها البنت
-امحمد / ياوالله موسى وزكريا..انا نكلم فيهم على موضوع
وهما ايدققولى فى موضوع ثانى..
وتلفت لى موسى / ممكن 24 سنه عمرها توة

شبحو زكريا وموسى لبعضهم مرة ثانيه

-موسى وقف وخدى تليفونه ودخانه/ اعتبر الموضوع تم
-امحمد / انا المفروض مالاول دققت فى الاسم قبل مانبلغكم

-موسى/ قلنالك الموضوع اعتبره تم … وسامحنا نستادنوك عندنا مشوار توة انا وزكريا
-زكريا ضحك / لى سوق الدهب
-موسى/ لازم نلقوه اليوم قبل غدوة

وطلعو هما وامحمد من المكتب وسكروه وراهم …
ولعو سياراتهم ومشو لسوق الدهب ايدورو فى ايوب

______________________________________

.
فى حوش ابراهيم

روقيه خشت للحوش …ومعاد وراها ..

-معاد / روقيه نبيك فى المربوعه شوى بروحك
-روقيه ابتسمت / حاضر تفضل ..غير نقوللهم ايديرولك قهوة بس

خشت روقيه للصاله…

-روقيه / سهام ..ترا ديري قهوة لى معاد
-انخلعت سهام / وينه معاد

-روقيه / هوينا فى المربوعه ..بنتكلم معاه انا شوى ..وبعتالى خشيله انتى
وحطت صبعها على خد اختها / ولا بديري روحك زعلانه
-سهام فرحت? /لا عادى مدامك قلتيلى خشى تو نخش
-روقيه تضحك / باااهى اتسبلى بيا مش مشكلة المهم تتفاهمو ?

وتلفتت سهام خشت للمطبخ

وخشت روقيه لى بوها / معاد هنايا يا بوى
-ابراهيم / وينه قوليله يتفضل

-روقيه تنادى/ معاد .. خش سلم على بوى
-خش معاد للصالة/ السلام عليكم

الصاله فاضيه البنات فى دارهم ..وسهام اتراقب فيه من باب المطبخ وقلبها ايطق

-خش معاد لى عمك ابراهيم / شن حالك يا عمى
-ابراهيم / الحمدلله..فى خيار الخير…شنو جيت بتروح بي سهام
“بوهم قاعد ماسمعش ان البنات جايات غضبانات”

-معاد / هيا جايه بتبات قالت تقريبا
-ابراهيم / لا تبات لا شى..المراءة ماليها الا حوشها

“الاب الليبي ???

-معاد تحشم / انشاءالله ياعمى

-ابراهيم / قعمز يا معاد خيرك واقف
وتلفت لى روقيه / قولى لى خواتك ايديرو العشى

-معاد / قاعد بكرى النهار يا خاج حتى المغرب ما ادنش ..

-روقيه / نستادنك بوى بنمشى انا ومعاد للمربوعه شويا غير ترا شن نبيه … وبعتالى تو ايخش

-ابراهيم / باهى على كيفكم

وطلعت روقيه من الدار وخشت للمربوعه

-روقيه / كيف حالك يا معاد
-معاد / بخير الحمدلله

-روقيه / خيرها سهام جبتها هنايا …كانها غالطه فيك انا انوريها

“بالرغم انها بعد قرت الرساله صبحت عارفه ان الجماعه اللى يبو يشرو الارض هما السبب لكن هيا تبى تفهم كيف قنعو معاد واحمد انهم يرفعو نساوينهم لحوش بوهم

-معاد / سهام متربيه …وعمرها ماغلطت لا فيا ولا فى امى
-روقيه / امالا خيركم شن فى

-معاد / نحكيلك اللى صار ويقعد الكلام بيناتنا
-روقيه / احكى
-معاد / انا واحمد جانا تهديد من ناس مانعرفوهمش

وقعد يحكيلها كيف هددوه هوا وخوه انهم بيخطفو اختهم كانا مانفدوش مطالبهم
.
.
وبعد ماكمل

-روقيه / معدور يا ولد خالتى …العرض واعر
-معاد / احنا توة نراجو فى مكالمه ثانيه منهم ..واكرام منعناها انها تطلع مرة ثانيه

-روقيه / لا حرام تحرموها من قرايتها
-معاد / تى كيف …انى بطلتها لانى خايف عليها
-روقيه / عموما ربي يهدى …خلى نمشى لى سهام نقوللها اتجيبلك القهوة

نستادنك انا …

وطلعت هيا وخشت سهام لى راجلها

-وقف معاد خدى منها الصفرة متع القهوة/ الف مبروك حبيبتى ..معش نبيك اتعبي روحك
-سهام بزعل / ايه حبيبتك واضح

____________________________________

موسى وزكريا ايدورو على رجليهم فى سوق الدهب…لا عارفين روحهم مصدومين ولا عارفين روحهم فرحانين لى صاحبهم ..

-زكريا / معقولة تطلع هيا
-موسى / على حسب المواصفات هيا

-زكريا / لكن احنا المفروض نتاكدو قبل مانقولوله ..افرض تطلع مش هيا ينصدم ايوب
-موسى / وكيف بنعرفوها يا فالح .. نمشو نسألوها كانها انقدت ولد مضروب بى رصاصه زمان

-زكريا / لا نرفعولها الوشاح ونسألوها ليك هدا ولا لا

وقعدو يضحكو

-موسى / اسكت خير مايسمعك ايوب ايوريك النهارات السود
-زكريا / كيف عاد كل شى الا حبيبة القلب

وقعدو ايلفو وايدورو مالقوشى

-زكريا / تى وينه ايوب مهناش فى السوق اكله
-موسى / تعرف كيف …اسلم حل نمشو ندرسو قدام حوش حناه بيش نحصلو عليه لما ايروح

-زكريا / صح كلامك

وطلعو من السوق ركبو سيارتهم ومشو لى حوش عمتك سالمه …
درسو السيارة وقعدو مقعمزين فيها وايراجو

عطلو قدام الحوش قريب للمغرب

لين شافو ايوب جاى من نهايه الشارع وحناه مقعمزة جنبه

_____________________________________

درس ايوب السيارة وشافهم ..

نزل من السيارة / شفتى كيف مانقدرش نهرب منهم يا حناى
.. اهم المقردة مقعمزين ايراجو فيا فم الباب

نزلو موسى وزكريا مشو للحاجه ايسلمو

.-موسى / اهلا يا حناى شنحالك
-سالمه / اهلا موسى ..شنحال امك
-موسى / الحمدلله ديما تنشد فيا عليك
-سالمه تلفتت لى ايوب / مش قلتلى حتى هما نا يروحوش
زيك ..اهم يشبحو فى اماتهم وينشدو فيهم حتى عليا

ايوب يضحك

-جى زكريا / اهلا حناى شنحالك
-سالمه / اهلا زكريا ..حالى باهى ..وانت امك تسلم عليا ولا لا
-زكريا يضحك / امى ليا شهرين ماشفتهاش

-سالمه / اكدب?.. تحط فيه حيار حيار

وشبحتلهم / هى خشو للحوش

-موسى / لا والله نبو زكريا فى امر مهم
-سالمه / هدرزو فيه حتى فى المربوعه الموضوع اللى تبوه فيه
-زكريا / لازم نمشو للمكتب ..فى اوراق لازم ايشوفها ايوب

وادن المغرب ..الله اكبر

-سالمه / باهى عالاقل خشو صلو المغرب.. وبعتالى امشو
-ايوب حاط دخانه فى فمه ويشبحلهم شاك ان فى حاجه مهمه هلبا / نخشو انصلو وبعتالى ساهل

خشو الثلاثه توضو وصلو جماعه …

ايوب الامام وهما الزوز وراه

بعد ماكملو تلفتلهم ايوب / تقبل الله
-موسى / منا ومنك صالح الاعمال
-ايوب / حسكم شغلتونى ..شنهوا الموضوع المهم اللى تبونى فيه …وشنهما الاوراق اللى تبونى نوقعها

وقف زكريا ..مشى للباب سكره

وتلفت لى ايوب / ممكن ..ومش اكيد …لقينالك روقيه

وقف ايوب مشى لى زكريا شده من رقبه سوريته / وين لقيتوها ..وعن طريق منو
-موسى / عن طريق امحمد

-ايوب استغرب / امحمد ..وامحمد منين يعرفها
-زكريا / كانت تقري معاه فى المدرسه ..وهوا دكر اسمها بالصدفه واحنا ربطنا الاحداث
-موسى / تخدم مدرسه علوم
-زكريا / وعمرها 24 سنه …وقبل عامين انت قلت عمرها 22 سنه

ايوب مصدوم وساكت …

سيبهم وفتح الباب وطلع يجرى

طلعو يجرو وراه / وين ماشى

-ايوب/ بنمشيلها للحوش …
-موسى مسكه من يده / ومنين بتعرف عنوان حوشها
-ايوب/ انكلم طارق ايدلنى ولا نمشى للمكتب نفتح ملف قضيه الارض عنوانها مكتوب فيه

وجبد ايده / غير حول يا موسى خلينى نمشى

-زكريا / وكانا طلعت مش هيا

-ايوب / كانا طلعت مش هيا نطلع من الحوش وخلاص ويا دار مادخلك شر
-موسى/ لا يا ايوب نعرفك عاقل ..كيف نمشو لحوشها طقطقطق بنتكم اسمها روقيه ولا لا

-ايوب / امالا كيف اندير ..انا مزال عندى صبر انفكر فى خطط
-زكريا / انا نعطيك الحل…ناخدو عنوانها …والصبح نمشو نوقفو جهه حوشها انراجوها الصبح لما بتطلع تمشى للمدرسه ..وتشبحها هيا والا لا وتتأكد

حط ايوب ايديه على راسه ومتعصب/ تى مزال بنراجى للصبح
– موسى/ احسن حل اللى قاله زكريا ..انت صبرت عامين ماتصبرش ليله

يضرب القردل اللى حاطين فيه طوبو مكيفهم اينطره فوووق

-زكريا / غير اهدى يا ايوب…مش هكى يا راجل

-ايوب / منقدرش نبات هنايا ..مش حنتحكم فى نفسى وبنولع سيارتى وبنمشى نطق على حوشهم فى عقاب الليل
-موسى / هيا نمشو للمكتب ..واحنا معاك

ركب ايوب سيارته وركبو هما الزوز سيارة موسى وتوجهو للمكتب

وقعدو فى المكتب …ليله حرفه ..ايوب مرتين ايشدو فيها ياخد فى مفتاحه وبيمشى لحوشها

قيس الساعه سبعه …طلعو من المكتب

ومشو جهه حوش روقيه …ايدورو بالسيارة ويرجعو بيش مايبوش حد يلاحضهم

قيس للساعه 9 الشارع مسكت …

درسو فى نفس الشارع وعيونهم الثلاثه عالحوش ايراجو فى اى حد يطلع منه

الساعه 9 ونص ….

انفتح الباب…وطلعت روقيه لابسه سروال وماليه طويلة للركبه …ودايرة حجابها

شافوها ااثلاثه …

ايوب قعد حال فمه

-زكريا / شنو يا ايوب

-ايوب حط ايديه الزوز على وجهه ونزلو دموعه / هياااا

سكر موسى تاكو بطم السيارة …لانه مايبيش ايوب يتهور ويفتح السيارة وينزللها

____________________________________

تمت ….. ويتبع

زعما كيف بيكون اللقاء بيناتهم ….
ايوب بينزل ولا بيمنعوه صحابه ………

الليله بنبدا فى تنزل رواياتى القدم فى صفحتى العامه .. حتلاقو رابطها فى اول تعليق

وعلى فكرة اليوم ماجانا حد غير انا الباين عليا خديت عالتنبلة??
وبعدين معقولة منشور الحلقه فل التعليقات قريب يوصل خمسين تعليق .. احنا دايرينه للناس اللى النت عندهم ضعيف ..كيف بيوصلو فى التعليقات ..ارجوكم معش تعلقو فيه

نحبكم

 

error: